☆UNEXPECTEDLY YOU☆ - 24 By Dingdi Pachuau

 ☆UNEXPECTEDLY YOU☆ - 24 By Dingdi Pachuau

Bawihtea leh Engmawia inkàwm chu an țawng nasa khawp mai a, a rûkin ka lo ngaithla reng a. An inbia a, pakhat a țawng fiah lo nasa mai si a; mahse, an inhre thiam tawn tlat tho, an lawmawm dùn ka ti a, ka lo nui ru ka lo nui ru mai.

School ka kai chhûng hi chuan an school Anganwadi-ah a lo kai ve mai a, nau min lo awmsak tùr chu ka nei tho nain Anganwadi worker hi Pa Vana mo Maduhi niin, Engmawia nu kha a ni hlauh a, ngaihtuah ngai vak lovin ka kalsan thei a ni. An khua hi a lian lêm lo nain an school-ah hian naupang làwm tùr bungrua a awm nual mai a, min ngai hman lo. Bâkah, Engmawia school pângngaiah a la lût bík lo va, Bawihtea aiin upa hret mah se an inkàwm táwk viau tho a, a tihzia viau mai. Min ngaih deuh cháng erawh chuan school-ah min rawn kalchilh mai a, ka thawhpuite pawhin min hre thiamin hruai tùrin min ti fo zâwk țhin a; mahse, hna thawhna hmuna naupang hruai tel fo chu ka duh lo. Chawhma hun chhûng chuan an school-ah hun an hmang a, chawhnu lamah chuan nau awmtua ka biak Maduhite unau zînga tê ber Partei chuan a lo awm a, a chângin a lo paw mu țhìn bawk a, hna thawh ka duh ve si chuan hetia ka tih mai hi a ngai si a ni. School kal chhûng tih lohah hi chuan ka bul loah chuan a awm mang lo, mi dang kuta han dah pawh hi ka duh lo viau țhìn nain min nghèng lova awm zirtîr hi țha ka ti ve tho bawk a, kum hnih khat hnuah, school pângngaia a kal ve theih hunah chuan ni tin kan inhmu thei tawh ang a, ngaihtuah rûk viau pawh a ngai tawh lo ang.

Phone pawh ka hmang ve tawh a, ka phone hlui kha chu mamawh mi dang ka pe daih tawh a, sim erawh ka paih daih thung a, tunah chuan a thar ve ve ka hmang tawh a nih chu. Engmawia chu chaw a ei ve nghâl dâwn avàngin a nu Maduhi chu ka hrilh a, zàna rawn hruai mai tùrin ka hrilh pah bawk a, ani chuan," A tibuai mai mai ang che, a ei fel si lo," a rawn ti a, kei chuan," A ho mai mai, nuam an la ti ve si a, țhen hran an khawngaihthlâk," ka ti ve tlat thung a, chaw ei kham lama rawn hruai mai chu a rem ti ve ta a.

Helai hmuna kan kal tùr kha min hringtu ka nu leh pate ai mahin Bawihtea pi leh pute'n min uiin min ngaihtuah zâwk niin ka hria a, kan in ațang pawh khân ka chhuak ta miah lo nghe nghe, ka thutlûkna hnial an hreh a, min kaltîr ta chauh niin ka hre bawk. Kawng engkimah min buaipui a, kan bungrua tùr leh kan ei leh in tùr chenin min ngaihtuahsak a, motor nèn kan lût rup rêng bawk a ni. Bawihtea an ngaiin an rawn be reng reng a, an rilru tùr ka hriat thiampui êm êm  bawk a, kan kal kha phal lo viau mah se, kan kal ațanga tûn thlengin kan inkârah boruak țha lo a awm hauh lo.

An rawn be leh ta ngei a, a school kal dàn chanchin chu fiah lo zet chuan a'n hrilh leh ta a, a pi leh pu lah chuan dawhthei zetin an lo ngaithla leh bawk a, dârkâr chanve dâwn lai chu an inbia a, Engmawia pawh chu an rawn be tel bawk a, nuam an ti ve khawp mai.

Phailêngah hian kan awmna a la rei lutuk lo bawk a, lènna hun ka nei lêm lo bawk nèn, mi hriat ka nei tam lutuk rih lo va, kan naupangte erawh ka hre vek tawh thung, an nu leh pate hming pawh ka hre nual a, anmahni tak erawh chu ka la hre vak chuang lo. Kan țhenawm hnai bera awm Pu Hluna lah chu parawl a ni a, 'fiamthu duh zet leh taima zet a ni' an ti a, inah a awm khât êm êm zui nèn, kan inhmu khât viau. Pu Hluna in piahah chuan Pa Vànate an awm a, Pa Vànate in lo lama kan țhenawmte nèn chuan kan inhnaih vak lo va, chubâkah, naupang an awm lo va, ram lamah hna an thawk nasa bawk nèn, kan inlènpawh tehchiam lo. An in piah chiahah erawh chuan dàwr a awm ve avàngin ka kal ve zauh zauh thung.

Zànah Maduhi chu Engmawia hruai tùrin a rawn kal a, a țhu ve rih bawk a, kan titi luam mai. A țawng duh a, sawi tùr a hre bawk a, a thil sawi chu ka ngaithla a ni deuh ber.

"Thu dang daih, kàr hmasa Inrinni zànah khân a nih chu, Dinpuia, in head fapa kha, a rawn kal laiin i chanchin hi kan sawi chhuak a, hmel țha a tih thu che a sawi zuk a, U Rosanga lah chuan,'Eu, a țha dâwn e,' a lo ti pek a, a zak nasa mai maw le," tiin a nui kar kar a, kei chuan," A nih tak chu, a làwmawm hle mai, hmel țha min ti an awm ve a nia," ka lo ti ve a, ka nui pah bawk a.

"Dinpuia hi chu kan pa nèn hian an têt laiin an inkàwm ve nasa țhin a, kan inneih pawh khân phai lama a awm lai ni lo se chuan a dinpui tùr a ni nghe nghe a, tlangvâl fel tak a ni," a tih leh chuan," Pu Head-a hi a fel êm mai a, a fate pawh an fel a nih dâwn chu," ka lo ti ve leh a.

"Fel vek bîk lo, sual ve deuh pakhat a awm alawm, tunah kan khuaah hian a awm rih lo zâwk a, a rawn haw châng hi chuan an buai ve nuai reng mai a ni. Dinpuia ai chuan a hmel chu a țha zâwk a; mahse, a sual thung. A nu rilru pawh hi a tihah ve thei a nia," a ti leh barh barh a, Pu Head-a leh a nupui hi chu ka hmu tawh a, an fate chu ka la hmu lo a nih ka ring, Pu Head-a hi chu pa hmel țha a ni hran lo va; mahse, a fel êm mai a, chu chuan a tihmel țha ka ti, an nu erawh chu nu lian fahran lo niin, a ngo a, a hmel pawh a țha.

An haw hnuah chuan mutna lam kan pan zui ve ta a, mut hmunah chuan Bawihtea chu țawngțai dàn ka zirtîr ang chuan a țawngțai a, rei lo te hnuah a muhìl zui mai bawk. Kei erawh chu U Kimi nèn kan in-text leh rih a, a vànnei a, a thawhna school hlui lamah khân a lêt leh tawh a, a thla tin hlawh pawh a chhawr nahawm ta deuh. A pasal hlui U Tluanga khân nikum hmasa khân nupui dang a nei a, U Kimi hi ka fiam țhìn a, a nuih a za thei nasa mai.

*Bawihtea hmuh leh tawh ka châk! Engtikah nge in rawn zin theih ang?*  a rawn tih chuan ka nui hak a, a tlawngãwl zâwkin chutiangte min zawh ka ti rilru a, ka chhànna tùr ka type nghál mawlh mawlh a.

*Rawn zin zâwk la? Keini nufa tân chuan tihngaihna a awm hleinem, kawng a zia lutuk, i scooty pawhin i rawn inkhalh thleng thei ang* tiin ka chhâng a, ani chuan *Tak tak maw? Chuti, Thawhțanni chawlh a nih leh veleh rawn zin tùr a nih chu, Zirtàwpni chawhnuah rawn inkhalh thleng ta ila, Inrinni leh Pathianni ka awm thei ang a, Țhawhțanni chawhnu lamah haw leh ta ila, a va țha dáwn êm!*  a rawn ti a.

Kan school hi kan in ațangin a hla tehchiam lo va, dàwrah ka pêng kawi lawk a, a la hma deuh tho bawk nèn, dàwr nghâktu Pi Zuii chuan," I va hma lehpek ve! Nang hi chu i hma thei ngawt mai, peon ai pawh hian i thleng hma țhin lo maw?" a lo ti a. Kal hma hi min ti thei viau a, dâr 9: 15-ah school kan țan a, devotion awm loh niin in-line țhìn a ni a, minute 15 vêl hun kan hmang țhin a, chuti a nih chuan dàr 9: 30 vêlah chiah class kan kal țan tihna a nih chu, a tlângpui thuin dâr 9: 05-ah school ka thleng țhin.

"Chawlh hahdam veng veng hi a nuam ve a," ka ti mai a, ani chuan," I ti țha thei ngawt mai, i la tlai ngai miah lo ang tiraw?" a ti leh a, ka la tlai loh thua ka chhàn chuan," I hun i vawng dik a, a țha, mi dangte tâna entawntlâk i ni ngei bawk ang. Hun vawng dik mi leh tlai ngai lo hi chu eng ang mi pawh lo ni se, an zahawm ve tlat," a ti leh bawrh bawrh a, ka sawi zawm ve lêm lo va, ka thil duh ka lei hnu chuan ka chhuak zui ta nghâl a.

October thla a rawn ni a, boruak a nuamin a lunglènthlâk leh ta ruih mai, khaw bul vêlah naubân chi khat Lawhlei a tam si a, a han pâr vul chûk mai chu, mawi hi ka ti thei khawp mai a, Bawihtea nèn thla kan la nasa thei a nia, kan kawmthlang lawk thingkûngah pawh a awm ve a, a pâr buk lêm lo nain a mawi ve viau tho.

Innei tùr an awm a, inkhâwm laiin an puang dum dum a, a mipa chu Samuel Lalmuankima niin hmeichhia chu R. Vanlalmawii tih a ni a, ka han hriat chuan ka ngaihtuahnaah Zda leh Chhanzuala an lo lang țhawt a, Zda nèn kan inneih laite ka mitthlaah a rawn lang zawr zawr a, chutah, Chhanzuala chu ngaihtuah lehin ani kha engtin tak awm ve zêl ang maw? Zda nèn kan inneih hma ațang khân a chanchin kha ka hre ta hauh si lo va, a la dam țha ve ang em? Nupui pawh a nei ve tawh hial lo'ng maw? Chutiang chu kan inkhâwm chhûng chuan ka ngaihtuah a, vawiin zet chu inkhâwm hlâwk tak ka ni ta tlat lo mai.

Chhanzuala hi ngaihtuah loh ka tum tlat avàngin ka ngaihtuah lo viau tawh a, kan inkhâwm bàn hnu leh chawhnu lam thleng mai chuan ka rilruah a awm ta reuh reuh mai, duh lo viau mah ila ka ngaihtuah zui zêl tlat mai si a, buaithlâk tak a ni.

U Kimi a rawn zin ve ta ngei a, a khaw hmun chu nuam a ti ve khawp mai, Bawihtea thil tùr a rawn leisak țeuh a, Maduhite leipuia ka feh hlànin inah an lo inawm thei bawk a, a zia khawp mai. Maduhite leipuiah hian chawhmeh lain ka kal ve a, ni dangah ka hman ngai si lo va, vawiin chu nau awmtu ka nei ta bawk a, leipui chu hmuh ka châk ve tho nèn, kan inzui chhuak ta a ni.

A lo hla hran lo va, a hmun pawh a nuam reuh, thlâm lian vak lo hi an lo nei ve nghe nghe a, kan hmanhmawh hran lo bawk a, thingpui a'n lum zui nghâl a, a sen hângin kan in leh rih a, chumi hnuah chuan thlai lo tùrin kan chhuak dùn ta a.

Thlai chu ka han lo ve a, nuam ka ti, Bawkbawn leh Samțawk a tam phian a, kan duh tâwk kan lawh hnu chuan Ankasa lain Behlawi hnah kan mal leh bawk a, a rah pawh no tê tê chu kan lo nual bawk. Hmarchate leh hmarchapui tam vak lo kan lo leh a, lêngsèr leh pàrdi pâr nasa ve tawh deuh pawh chu kan la pah hlek bawk a, Bawkbàwn baia thlâk hian a tirimtui ve ka ti a, ka duh țhin.

Kan haw dâwna thlâma kan la awm lai chuan ràl lehlama kawngah chuan tlangvâl pahnih hi an rawn 

lang a, an rawn  țawng bawrh bawrh a, ka en ve vat nain ka hmuh ngai loh leh hriat loh an nih avàng chuan biak ka tum lêm lo va, Maduhi chuan an țawng ri chu hriain a hawi phei vat a," Dinpuiate pahnih chu, khawiah nge in kal a?" a ti vat a, pakhat chuan," Luiah kan kal lawk a, chawhmeh in la elo?" a lo ti ve vat a, chu chu Dinpuia a ni ngei ang chu.

"Aw, hei Dinpuii nèn kan kal ve a, sangha in rawn man em?" Maduhi chuan a ti leh a, ani chuan,"Man lêm náng," nui chung hian a lo ti mai a, thlâmah chuan an rawn lût chawpchilh ve chu a ni deuh mai a, chutah," Haw in tum tawh a ni maw? Haw rual ila?" pakhatin a tih chuan Maduhi chuan," Nia," a lo ti vat a.

"Miss chu, i va taima ve a, i phur chu a rih hmel si a, i zo dâwn em maw ni le?" tia tlangvâl pakhat zâwkin min fiam chuan nui deuh chung hian," A, zo ve mai ang chu maw," ka lo ti ve a. Kan èm phurhte min chàwisak hnu chuan thlam kan khâr țha a, kan kal zui ta nghâl a.

Kawngah chuan an titi a, kei chu ka țawng ve vak lo. An titi dàn ațang chuan pakhat Dinpuia chu kan Head fapa, Maduhi'n a sawi ngei kha a ni tih ka hre thei a, pakhat chu Dinpuia cousin Thlenga a lo ni thung a. An titi tui khawp mai a, kan in pêng ţheuh kan thlen hma chuan an titi char char a ni.

In ka thleng chu U Kimi'n min lo làwm thiam khawp mai a, a'n phawrh darh a, ka thil hawn chu tam hi a'n ti khawp a," Kan ei zo vek thei lo tawp ang," a ti deuh reng mai a, kei chuan," Fridge-ah kan dah țha ang a, duh leh i hàwn ve ang a," ka ti a, ani pawh chuan," Ni dâwn tak e, a remchâng lutuk si, i chawhmeh lâk ve ngei kan han ei ve dâwn a nia, a mak e," a ti leh a, phûr tak chuan thoin," Thingpui ka'n siam lawk ang che, i hah dâwn tehlul nèn," a ti a, thingpui siam tùr chuan a kal sawn zui nghâl a.

Zànah chuan ka ke chu a rawl ve deuhin ka hria. U Kimi chuan damdawi ei tùrin min hrilh a; mahse, țûl ka ti lêm lo. Ka ti țhang lo va, ka tih ve zeuh zeuh hnuah erawh chuan ka zia mai ang, damdawi ei chu ka duh lo, a hnuah min țhîng zêl palh ang.

U Kimi chuan phone call a dawn avàngin Bawihtea nèn chuan phone kan en a, a duh záwng ka enpui a, ka hrilh fiah pah zêl bawk a, nuam a ti ve khawp mai. 

U Kimi phone chhâng zo  kan bula rawn kal chu," I va'n be rei! Tu emaw a ni chiang mai," tiin ka lo fiam a, ani pawh chuan," Ni ve bawk ang chu, nula ka ni tlat alawm," a lo ti ve mai a; mahse, a hmel sen deuh leh lai ru hmel deuh ka hmuh chuan," Zêp lo khân min hrilh ve mai teh," ka ti leh a.

"A, chutiang a awm lo, kan thawhpui Rinnunga a nia, tlêmin min hope ve deuh a, chu chu maw le," a tih chuan," A fel em? Ruihtheih thil a ti ngai em?" tiin ka lo zâwt leh vat a. Ani chuan," A, mi hi chu an fel vek alawm," tiin min lo chhâng thung a, kei chuan,"Pasal atân a tlâk dâwn em katihna a nia," ka lo ti leh a.

"Hm, pasal neih leh i duh deuh tihna em ni?" nui chunga min rawn en pah hian a ti a, kei chuan," Ka tân ka ti mai mai lo, i single rei tawh a, chutia hope deuhtu che an awm chuan a tih chi dâwn riauin ka lo hria a," ka lo ti thung a.

Mut hmunah chuan Rinnunga chanchin chu ka zãwt chhunzawm zêl a, ani pawh chuan a hriat ang ang chu min hrilh a. A sawi dàn ațang chuan mi fel tak a nih ka ring deuh ngawt a, ruihtheih thil ti ngai lo leh kohhran khawtlângah pawh a mawi tâwka inhmang, a inhman lam ai maha mite'n fel an tih chi a lo ni a. Tlangvâl phanchang lam ve deuh tawh niin nula mi lo ve tak a nih thu a sawi chuan," A țha ngawt ang, a duh chea nangin i duh ve theih phawt chuan," ka lo ti vat a.

"Min duh tak tak lo ang, nuthlawi ka nih bâkah kei aia țha a hmu tam àwm êm mai, nula mi ve deuh phei se chuan amah beiseitu tam tak a nei ngei ang," a lo ti ve thung a, kei chuan," Mi dang beisei lovin nangmah a beisei si che chu maw le, hawi tum ve deuh teh, i duh theih loh tùr mi a nih erawh chuan sawipui che chu ka duh miah lo; mahse, heti chung pawha a duh tlat che a nih chuan..." ka ti a, ka sawi zawm duh ta lo va.

U Kimi awm chhûng chuan kei pawh ka mal bîk lo va, nuam pawh ka ti. Pathianni chawhnu lamah chuan inlêng kan nei ve a, Maduhite nupa leh Dinpuia an rawn lêng a, Bawihtea leh Engmawia pawh an inkàwm leh chat tawh a, an țawng dùn nasa leh khawp mai. Maduhi'n Dinpuia chanchin min hrilh hlek tawh avàng khân biak lümlàm chu ka hreh ru deuh a; mahse, mi fel lo zia a ni tih hriain ka be bawrh bawrh ta zâwk a. Ani pawh a țawng duh a, fiamthu pawh a duh viau bawk a lo nih hi, kan nui kan nui mai.

Zànah Séntei'n min rawn bia a, a rawn vui nung nung a," Biak hmasak loh chuan min biak pawh i tum lo, nuam ti lutuk mai," a rawn ti a, kei pawh tlêm chuan ka inthiam lo deuh, vawi khat chauh ka la be hmasa tlat a, ani'n min rawn ngaihtuah tehlul nèn.

"Hetiang a nih chuan pasal ka neih hunah pawh ka sáwm lo tawp ang che," a rawn tih leh chuan," Zahngai zahngai, ka thiam loh a ni e," ka ti phawt a, chutah," Pasal i neih phawt chuan min sâwm lo pawh ni la ka rawn kal dâwn tho tho, min dang thei teuh lo mai," ka ti a, ka nui a, ani pawh a titau rei thei bîk lo.

Thingtlâng khaw tê ve ngang a ni a, nula ni ve ta chu, zànah inlêng pawh ka nei ve țan ta a, kum naupang lam deuh hlek chu an rawn lêng ngam lo va, tlêma kum û deuhte leh pathlawi lam deuh a ni rawn lêng ni. Nuthlawi ka nihna ka hre ve ràn tho a, kawm dàn tùr erawh ka thiam tâwk chiah lo maithei, school lamah pawh min ngam țan deuh tawh bawk a, min fiam ta zauh zauh, kan Mizo Society hian nuthlawi a hmuh dàn ka hre chiang a, ka nihna a ni bawk a, ka ngai haw chuang lo; mahse, kan khawtlâng mai ni lo, a ram pum pui pawh hian hemi kawngah hian țhan harh kan ngai niin ka hre ve țhin, nuthlawi kan hmuh dàn leh en dàn fuh zân lo lai tak hi chu a fuh táwk lo chu ka ti.

Thingtlâng nawmna ka tem chho ve zêl a, innei tùr an awm rêng rêngin khawtláng an huap deuh zêl a ni àwm e, han inphatsan tham awm hek lo le, an khawtlângin an inlawmpui a nih ber chu, țha ka ti, chhiatna lam erawh kan awm hnuah a la thleng lo va, ka la hre rih lo; mahse, an sawi dàn chuan an intawrhpui țhain khawhar inah pawh an lêng rei thei viau țhìn ni àwm tak a ni.

R.Vanlalmawii leh Samuel Lalmuankima innei tùr chu, kohhran dàn thianghlim ngeia innei tùr an ni bawk a, an inbuatsaih nasa ve viau a ni. R. Vanlalmawii chu kan Health Worker fanu niin, a pa hi kan school-ah Peon a ni a, an inneih dâwn hnaiah chauh Pu Rina fanu a ni tih ka hre pek a nih chu, a bengvàr loh theih khawp mai. A sawi dànin a fanu chu Phailêngah hian a awm tam lo viau mai a ni àwm a, chuvàng chuan hmuh pawh ka la hmu ve lo pawh chu àwm ka ti hnuhnawh. An inneih ni chuan kan school pawh min sàwm vek avàngin kan chàwl a, inneih inkhâwmah kan kal vek, an tih dàn hi a țha phian mai ka ti, sàwm loh bîk an awm dàwn si lo va.

Ka háwkdâk lutuk lo va, inneih thu tiam an chham lai pawh chuan ka hun kal tawh ka lo ngaihtuah pek avàng chuan an thil sawi chu ka lo ngaihtuah teh chiam lo va, inkhâwm chhûng a rei lo. Mo leh mo neitu an rawn chhuak lam chu ka lo en ve a, chutah chiah chuan mak ka tih lutuk avàngin ka meng phar nasa ngawtin ka ring, mo neitu Samuel Lalmuankima chu tu dang ni lovin Chhanzuala țhianpa Sam-a kan tih kha a lo ni reng a!!! Engtin nge ka lo hriat loh a, bâkah, ka lo en chiang àwm lo rêng rêng ka ti. Chuti a nih chuan Hriatpuia leh Chhanzuala pawh an rawn tel ve ngei ngei ang le. Ni lo, Sam-a dinpui kha tu nge ni ta? Ka en zui vat a, Hriatpuia a ni chiah e, ka thin chu a rawn phu zui ta hlawk hlawk a, Chhanzuala pawh a awm hnai ve ngei ang.

Ka țhutnaah chuan ka țhu deuh reng a, Bawihtea chuan chhuah duhin ka kutah min kai sek reng a, ka thin phu nasa lutuk hi ka tih reh phawt a ngai a ni, heart attack vàngin ka tlu țêp a ni. Engtin nge hêng lai laia mi Sam-a chuan nupuiah a rawn neih rêng rêng ni? A mak ka ti, engtin nge ka lo hriat loh? Sam-a kha Samuel tih lam tàwi a lo ni reng sia. Min hmuh hlauh chuan ka chhe vek a ni mai, min haw dâwn lutuk, min hmuh ka duh lo, ka haw tlang nghâl daih mai ang. Tlai lamah ruai țheh tùr a la ni zui; mahse, ka kal tawh lo ang.

Bawihtea chu a kutah nghet takin ka chelh a, kan chhuak ve ta a, ka hawi kual ngam lo, mi kâr ațangin Chhanzuala' n min lo en kur palh ang, hlauthãwng ru tak leh zàm avànga kut hmâwr vâwt vek chung chuan ka kal zêl a, tuak tharte pawh chibai lo mai ang, mi zînga inlan tam loh hi a țha.

Biak in gate kan pèl fel ta maw tihah chuan ka thaw deuh huai a, inkhâwm kan tam azârah hriat chhuah ka ni ta rih lo  chu ka thaw a veng deuh a; mahse, chhûngril lamah erawh inthiam lohna ka nei tho. Ka thil tihsual avàngin ka țhiante, ka hmel hriatte ngei ngei pawh ka tlànchhiatsan chu a ni ta si a, min hmuh hlau zek zekin ka hun ka hmang chu a ni ta mai si.

"Dinpui..!!?!"

Ka ding chawt. Ka thin phu chu second 7 vêl chhûng chu a phu lovin ka hria! Chu aw kher chu khawiah pawh awmin amah hmu kher lo mah ila ka hai thei ngai lo ang, chutiang chuan min ko ngai lo tih nèn lam ka hre nghâl vek, 'D'pui' min tih loh leh 'D' min ti mai țhìn a nih kha.

Ka che sawn ngam lawk lo va, a lam pawh ka hawi ngam lawk lo. Eng ang hmel nge a lo put tawh ang? A lo hmel țha leh zual tawh ang nge, a lo lâk tlâk tawh loh viau ang? A hnâr a lo țawk tawh ang em? Nge, a lo rui meng phî chiai zâwk ang le?

Mahse, rui meng phî chiai ni ta se min lo hre chat dâwn em ni? A thin a rim viau ang em? Helai mi awmnaah hian min àn khum ang em? Min vìn ang em? A țhianpa nupui neih niah chuan a rui duh bîk dâwn êm em ni? Chûng zawng zawng chu rei lo tê chhûngin ka ngaihtuah vek hman.

Chutah, zawi muangin ka inher ta a.

*BEIDAWNG DUH MIAH SUH, VAWIIN CHUAN A HARSA A NI THEI, NAKTÛK LAMAH PAWH VAWIIN LAM AIIN A HARSA ZÂWK MAITHEI; MAHSE, A TÛKLEH LAMAH ERAWH CHUAN CHÛNG HARSATNA ZAWNG ZAWNGIN A HLIAH KHUH THEIH HLIMNA CHU I HMU ANG*