☆UNEXPECTEDLY YOU☆ - 25 By Dingdi Pachuau

 ☆UNEXPECTEDLY YOU☆ - 25 By Dingdi Pachuau

A hmel chu a lo danglam ve teh meuh mai. Kum thum chuang ka hmu ta lo a ni bawk a, tlêmin a lo lang upa ve deuh tawh a, a hmel pawh a lang chêr ve deuh bawk; mahse, rui hmel meng phî chiai leh hnâr țawk lam kha chu a lang lo, a chhiat loh ngaiin a la chhe lo reng tih ka'n belh hrâm ang e. A țhianpate inneihnaa kal a ni ve bawk a, a inchei nalh zeih zawih viau bawk a, motor nghènga inkuangkuah thân chung leh kawi sawi ru zet si hian a ding a, a din dàn lah chu a inhmeh phian, hmãna ka rilru ang kha la pu ni phei ila chuan ka en ngawih ngawih hial ang chu; mahse, tunah chuan thil engkim a danglam vek tawh a, keima lam ațang phei chuan ani hi hmu ngama be ngam tùr pawh ka ni tawh lo va, amah ngaihtuaha rilru sèn pawh ngam tawh lo tùr ka ni.

Hei hi second rei lo tê chhûnga ka ngaihtuah chhuah vek a ni.

"Dinpui, haw nghâl mai in tum em ni?" 

Min rawn betu lam chu ka en zui nghâl dâwrh lo thei lo, ka intehkhin ber chu kan star deuh kan en rûk dêk dêk laia tu emawin min rawn khawih thut, min rawn barakhaih thut ang vël hi a ni, Dinpuia chuan Chhanzuala nèn kan inhria tih hi min hre chhuak ta emaw ka ti hial, hria se eng nge pawi chuang ni?

"Aw, tum mai e," tiin ka chhâng a, Chhanzuala lam chu ka melh tawh lo, ka ngam tawh lo a ni ber ang chu, min rawn koh lai takin mipa dangin min la rawn be zui a nia, a thin a rim loh pawhin a thin a sa phat ngèi ngèi dâwn tih ka hria. Ka chungah eng emaw rilru a la pu ang ka tihna a ni lo, min huatna thinlung zâwk chu a so tharin a let but but ngei ang.

"A nih chu, chuti, thingpui hâng lo in i phal ang em?"

Dinpuia hi a lo lèn ve zauh zauh tawh avàngin kan inngam ve deuh tawh a; mahse, Maduhi thil sawi avàng erawh kha chuan ka invêng sa viau. Mipa lam hi hawi ka duh tawh lo va, ka hma lam zél hun tùr erawh ka hre bîk lo, tûn atân chuan fapa ka neih hi țha taka enkawl ka duh a ni tawp mai.

Chhanzuala en tawh hauh lo chuan kan kal zui ta a, huatna tinrênga min han en zui tùr mawlh chu, a thinlung ka tihnatsak tawh kha, tunah tak hian thisen tharlâm tak a rawn chhuak leh zur zur ang chu; mahse, hetia inbe zui loa ka kalsan ta pawh hi a țha zâwk maithei a ni.

Mo chu Lunglei lama a làwi thlâk dáwn avàngin mikhual rawn kalho pawh an chhuk thla diakin ka ring, Chhanzualate pawh an chhuk thla nghâl ngei ang chu, ruaichaw hma takah an siam a, keini nufa erawh chu kan kal ta lo, Bawihtea chuan chhuatah toys a khàl a, kei erawh chu a bulah țhu ve rengin, rilru erawh hmun dang daihah a awm thung.

Chaw ei kham hnu àwm vêla kàwn lama motor thãwm vut vut chu ka ngaithla reng a, an kal dâwn ta a nih chu. Ka hmel hriat hluite ka hmu a, chutiangin ka bialpa hlui pawh, biak ngam chu sawi loh, an hmel takngial pawh ka hmachhawn ngam loh avàngin ka relhru a, mi dâwihzep ber awm dàn chu a va ni tehlul êm! Kum heti chen  a liam ve tawh a; mahse, ka nunhluia ka thil tih chuan liam zai rêl loin min rawn ûm pha leh si, eng chen nge hetiang hian ka awm dâwn le? Engati nge hetiang hian ka awm le? A, ka pawm thiam mai a ngai a ni, mite pawhin an duh dàn leh an ruahmanna angin an hringnun an hmang chho vek bîk lo; mahse, kei erawh hi zawng, mi rilru ka tina êm mai a, huatna tinrêng nèna Pathianin min hrem loh hrâm theih nân țha taka ka nun hi ka hman chhoh a ngai a ni. Mihring lam ațanga huatna leh hremna chu hrehawm ti viau dâwn mah ila ka tawrh theih mai ka ring, harsa chu ka ti khawp ang, vawiina Chhanzuala ka hmuh pawh khân hrehawm ka tihzia kha... mahse, ka thih phah lo tawp ang, chakna ka neih theihna turin fapa ka nei tawh a, ani hi ka intihchakna hmanrua tùr a ni.

Țhian hluite ngaihtuah zui loh tum chuan thil dang ngaihtuah luih ka tum a, hmun ka han phiat a, chhuat ka nâwt bawk a, Bawihtea pawhin chutia ka chêt tâkah chuan min rawn pui ve a, phone-ah a duh ber hla ka play-sak a, chhuat nâwt pah chuan kan lâm a, ngaihtuahna kal ding tak pawh chu tih tàwpin a awm thei ta.

Chaw ei hmain a pite pahnih kan bia a, Krismas hun daihte sawi kaiin Krismas an nghahhlelh tawhziate an rawn sawi luam a, a chhan chu chumi hunah chuan Lungleiah kan chhuk thla tawh dáwn miau si a, an nghâkhlel viau pawh chu a àwm tho, Bawihtea hi ngaihawm rual a ni ve tlat tawh si a.

Zànah pawh chuan Pu Rinate in lama lèn ve pawh a țhat tehlul nèn, ka lèn tha a tho tlat lo va, bâkah, mi an lêng ve țeuh thoin ka ring a, nau nèna lèn ka ngai dâwn nèn, ka țhulh hmin dèr. Zàn lama chhuah hi chu ka ti vak lo bawk, kan nufa hian inawm keuh keuh ila kan inhmeh. Ka inlêng regular ve pâwl, ka hmingpui Dinpuia pawh zanin chu a reh tlat, Pu Rinate in lamah a lêng ve a ni ang.

Mut hmunah chuan Bawihtea chu thawnthu ka hrilh keuh keuh a, vawiin chhùn lamah a muhìl lo bawk a, a muhìl ta thuai a. Mut tak tak hmain U Kimi nèn kan in-text leh ta rih a, Rinnunga chanchin chu ka zâwt leh a, mi fel tak a niha a duh phawt chuan inkawp thei se ka ti a ni, heti ringawta ka u a awm hi ka duh lo, kei chu loh theih loh vàngin hetiang hian ka awm a ngai si a, ani hi chuan hmangaih taka dawmtu leh enkawl theitu hmu se ka ti a ni.

Rinnunga'n a duh thu țawngka ngeiin a lo hrilh tawh a ni àwm e, chu pawh nizàn hmasa lawkah; mahse, U Kimi chuan *Tihsual leh ka hlau tawh êm mai a, ka la chhâng ngam lo*  a rawn ti a, kei chuan *A, ni e, hmanhmawh lo la, hmanhmawh hi a țha lêm lo*  tiin ka chhâng lêt a.

*Rinnunga chuan min nghah rei tawh thu a sawi a, mak ka tihzia chu, Tluanga nèn kan inneih hma ațang tawha thawk tlâng kan ni a, kan inhre rei viau tawh tihna a nih chu. Pasal ka neih hma ațang tawha a rûka min beisei thu leh a sawi chhuah ngam ngai loh thu min hrilhin, tunah erawh chuan hun țha bawhpelh mai mai a tum tawh loh thu a sawi bawk a*  a rawn ti leh duah a.

A țhat nasat chu. A han sawi vêl dàn ațang hian U Kimi pawh hian a haw bîk lêm lo tih a hriat theih ruak tlat a, a duh lêm loh chu ni se min hrilh duh pawh ka ring lo bawk. Chu vàng chuan inkawp ngei se ka ti, kan unau hniha hetianga awm ve ve ringawt hi zawng, a fuh lo. Ani tal hian pasal nei leh se, chhûngkua țha tak dinin nun hlim takin hmang se ka duhpui.

*Nangmah i pawimawh ta a nih chu, i thinlung awmzia chu i hre chiang ber ang a, i thinlungin a hrilh ang ngei chein thutlûkna chu i siam dâwn nia, hlim taka awm tùr hian ka duh che tih theihnghilh hauh suh*  tiin ka chhâng lêt a, ani pawh chuan *Ka thinlung hi chuan àwn lam hi chu a nei sa ve tho a; mahse, tihsual leh hlauhthàwnna bawk hian min pawt lêt leh țhìn, a châng hi chuan  eng nge maw ni le, ani ang mi felin kei ve mai mai hi min han duh ve a nia, engati nge ka chhàn loh? Chapo leh induh tâwk min ti ru viau ang a ka ti țhìn a; mahse, chumi avàng ringawta han chhàn chu dikin ka hre si lo va*  a rawn ti leh a.

Umm...tihsual leh a hlau tawh êm mai a, a thil ngaihtuah hi a dik ka ti reng mai. Mihring hi zawng, pâwn lam lan dàn leh țawngka chhuak ațanga inteh ringawt hi chu a dikhlel țhìn si a, chhûngril lam kan hre thei si lo. U Tluanga pawh kha a fel lutuk țhin alawm; mahse, khati kha an ni zo a, mipa lama a fîmkhur ta viau leh a khirh ta viau pawh hi àwm ka tihpui hliah hliah.

Chhanzuala hmel ka hmuh leh tâk ațang chuan ka ngaihtuah chhuak leh țhìn a, duh lo teh mah ila ka ngaihtuahna ațangin ka dah bo thei lo. Thil dang ka ngaihtuah pawhin ka ngaihtuahna kil khatah a awm reng a, chu chu lo lan chhuah châng a awm zêl si a, ka ngaihtuah phâk tawh loh leh ngaihtuah tawh lo tùr ka ni tih ka hria; mahse, ka thei lo, ka mumang thleng thlengin ka hmu zui a, ngaihtuah loha theihnghilh chu a harsa khawp mai.

Sêntei'n min rawn biakin Sam-a nupui neih chungchâng chu a rawn sawi a, sàwmna a lo hmu bîk pek niin, a lo chhiar chiang vak lo a nih ka ring, a nupui chu ka thawhna khuaa mi a ni tih a sawi chhuak tlat lo. 

"An inneihnaah chuan i kal ve em?" ka tih chuan," Kal nâng, a nupuite khuaah khân an innei a, a in luahah erawh ka lo kal ve hrâm thung, a nupui chu a chhe vak lo," tiin min rawn chhâng a, a hre chhuak miah lo tihna a nih chiah hi.

"A nih tak chu, a nupui kha tuna ka thawhna Phaileng khua hi a nia," ka tih leh chuan," A ni maw? Ngawi teh, ka'n en leh chhin. Aw, a nih hi, ka va chiang lo tak! I thawhna kha ih maw, Phaisen tih nèn ka hriat pawlh a nih hi, a va mak tak! A nih, i kal ve em?" a rawn ti nghâl vat a.

"Kal e, Sam-a a ni tih ka hre miah lo, inneih inkhâwm chhûng pawhin ka hre lo, pâwna an chhuak tùr ka hmuh khân ka hre chauh alawm," ka ti a, a chek hlak a," Nih, Chhanzuala i hmu em?" a rawn ti ta chiah a, hei hi chhàn ka huphurh, sawi chhuah ka duh loh thil a ni.

"Umm..."

"In inbia em? Mak i ti dâwn nasa mai si a," a rawn tih leh chuan," Sam-ate chu ka be lo, min hmuh ka hlau a, i hriat vek kha, hetah ka thawkin ka awma an inneihnaah pawh ka inkháwm ve a ni tih pawh an hre hauh lo ang,  Chhanzuala erawh chuan min hmu ta hrâm a nih kha," ka ti zuai raih a.

"In inbia em?"

"Min rawn ko a; mahse, kan inbe hman lo," ka tih chuan a tlak karh a," A va pawi ve aw...! Han inbe hman hrâm ula. Kei pawhin pasal i neih nia ka hmuh bâk kha ka hmu ta miah lo va, kei aiin i hmu hnai a nih chu, Hriatpuia hnên ațang erawh hi chuan a chanchin hi chu ka hre zauh zauh thung a," a rawn ti leh a.

Kan sawi zui ta rih lo, a chanchin chu hre châk ru viau mah ila ka ngaithla ngam lo, engtianga hrehawmin nge hun a hman tih chu ka hre ngam lo a ni, hetia ka hriat loh hi a țha zâwk. Thil awmzia a hre lo ang, a ngaihna pawh a hre lo ang, chu vàng tak chuan khatia ka kalsan ațang khân min hmangaihna kha huatnaah a chang ngei dâwn a, min hmangaih êm avàng khân min huatna a nasa dâwn tih ka hria, min rawn ko duh pawh kha a mak zâwk, min ko duh miah lo ni zâwk ta se a mak hauh lo ang.

December thla a lo thlen chuan khua pawh a vâwt ve ta viau a, kan in phei chu a vâwt reuh tawp. Kan kawmthlang lam ațang hian thli hi a rawn thaw her her țhin a, tlai lam dár 2 vêl ațang chuan thlanglam tukverh hi kan hawng ngam ngai tawh lo, Pa Vàna'n an sikri hman lai pakhat min pe a, meihawl bag khat deuhthaw nèn, a ti làwmawm tak tak a ni, kan nufain lum takin meiling vàm sen huam kan ai theih phah a, kan mu lum ham ham thei bawk. Anni chhûngkua hi ka bèl fuh thlâwt ka ti, an chhûngkaw chungah ka lãwm tak zet, min ngaihtuah thei si. Phailenga thlasik kan vawi khat tawrhna a ni a, Pathian zâra kan dam a nih chuan nakkum lamah chuan heater leh tuilum ip lamte pawh kan keng chho thei tawh ang a, kan tuar zia tawh ang chu. 

School kai hun a tàwp a, Krismas a hnaih ve tawh avàngin an khuaa lìrthei awm chu an tâwt ve thei khawp mai a, kan nufa tê chauh chuanna tùr pawh a buaithlâk avàng chuan min hringtu ka pate'n Lunglei ațangin taxi an rawn hmang ta tawp a, kan nufa leh bungrua nèn chuan kan khat ve tâwk viau mai.

Lunglei kan han thleng a, kan inah kan lût zawk nain Bawihtea pi leh pute hnên lamah kan liam phei leh ta zâwk a, anni hi ka la chhuahsan lo hrim hrim a, an phal bawk si lo va, anni chuan," Chhuah kher a ngai lo, i duh phawt chuan kan in ațang ngei hian pasal pawh i nei dâwn nia, fanu thlahin kan thlah ang che," an ti a, pasal neih leh lam ka ngaihtuah loh avàng chuan ka nuih a zâ a, min hringtu ka nu leh pate bulah lah tih tak zeta an ngen tlat avàngin anni pawhin chhuak tùra min tih chu an hreh ve a, ka la awm ta reng a ni. Thil mawi lo a ni em tih lam chu ka hre lo va; mahse, ka nu leh pa khawhar lutuk tùr hi ka khawngaih a, an in ka chhuahsan lo tih an hriat ringawt pawha an rilrua hahdamna awm hi tihchhiatsak ka hreh ve a ni.

Kan inbe lâwk sa vek bawk a, kan thleng chu kawtah min lo hmuak a, Bawihtea chuan a pi leh pute chu a pan nghâl chat mai rêng a. An inawm ngun ve ém mai a, kan inchènchilh bawk a, min hringtu ka nu leh pate ai hian a ngaina dùn daih zâwk tih ka hria.

A tûk tlai lamah ka pain ruai tenau a siam a, chhûngkhat hnaite a sâwm a, kan inah chuan kan ei khâwm leh ta lât lât a, kan haw lawm nân a ni ber ang chu, kei pawhin Sêntei ka sâwm ve bawk. Kan han ri lai lai chu Phailênga Bawihtea nèn kan ina kan pahnih chauha kan awm dùn rak rak lai boruak nèn chuan ka khàikhin a, inang lo ka ti khawp mai, chutih rualin Phailêng lama kan in tê pawh ka ngai ru deuh tho bawk.

Krismas a hnai ve tawh bawk a, khawpui chhûnga kàwn lùn lai deuhte chu an lo chei ve nasa tawh a, zànah phei chuan a de sup sup mai a, Bawihtea'n hmuhnawm a ti khawp mai. Ka nu chuan," Nakzàn lamah kàwn an chei mawite fanpui la a țha ang, hmuhnawm a ti dâwn êm mai," a ti a, ka pa pawh chuan," Ni e, a țha viau tak ang, in room lam pawh chei ve deuh hlek bawk ila, zàna a en atân," a lo ti ve bawk a, Aisàmi pawh chuan," Yes, kàwn chei in en dâwn chuan ka kal ve ang," a lo ti ve vat a. Nutling ni tawh mah ila kei pawhin light de sep sep leh kàwn an chei hrim hrim chu hmuhnawm ka ti ve tho a, fanpui chu ka hreh loh zâwng tak a ni.

Sêntei leh U Kimi kan sâwm tel bawk a, U Kimi chuan Rinnunga a lo be lâwk niin, a motor a rawn thawh chhuahpui a, a tih chi tak tak a ni. U Kimi chuan a nau ka ni tih a sawi chuan kan inchibai vat a, a hmel leh țawngkam chu a fel khawpin ka hria. Kan inhmuh vawi khatna mah ni se mipa sual a nih ka'n ring lo nghâl tawp a, a nih ngei pawh ka beisei.

Motor-ah chuan kan leng tâwk chiah chiah a, Bawihtea chu ka pawm chang lo, a nu Kimi'n a pawm phawt a, a hnuah Sêntei'n, Aisàmi nèn chuan kan lo inrawlh ve lo tawp. U Kimi'n a pawm lai chuan Rinnunga chuan," Nu pawh ni la, i inhmeh dâwn khawp kha," tiin a fiam zauh a, kan lo nuih dar dar a, U Kimi pek chu, a upat ve tawh nèn, a zak leh ringawt tawh. 

Sèrkàwn lam an chei dàn chu mawi ka ti khawp mai a, Sêntei thung chuan Lunglàwn lam mawi a ti thung a, U Kimi chuan a khawsakna Rahsi vêng a ti ve thung, thla pawh kan la ve chuai chuai a, Bawihtei hlim nuam ti țê ruai ruai reng chu hmuh a hrehawm lo khawp mai, ka nuin fanpui tùra a rawn sawi chhuak kha a fuhzia ka hre chiang viau a ni.

Kàwn chei fang ve mi chi hrang hrang an awm a, kan inpèl nuk nuk a, kan ri deuh luih luih hlawm ni maiin ka hria, chi hrang hrang kal kháwm ta chu rui deuh an awm a, rui lo pawh kan awm tho bawk a, hetiang hunah hi chuan a loh theih loh ve bawk a ni. Kawngkam lawka ei tùr lo siam an awm a, kàwn chei fangho tâna dàwr theih tùra siam an nih ka ring. Bawihtea'n ei a ngèn tlat si a, kan han nghâk ve ta rèn ràwn a, mi kan awm ve nual si a, nghah chhûng pawh rin ai takin a rei.

Tlangvâl pakhat hian hnung lam ațang chuan min rawn nawr a, ka tlu țêp a ni, a rui a ni ngei ang, chu vàng chuan ka sawi buai lo va, ka ding țha leh mai a, chu pa vêk chuan ka hnung lawk ațang chuan," I va chhiat loh hmel ve a! A tâwk chiahin i mawng a la khal zui a. Zanin chu hmun dangah hun fâl kan nei lawk dâwn em ni ang?" a rawn ti zui a, ka kekawr hâk chhanah chuan ka mawng chu a rawn khawih titih ta mai, a rim aţang chuan zu a in tih ka hria a, thinrim taka amah hmachhawn tùra ka inher chiah tihah chuan," Tenawmpa, kal sawn vat rawh!" tih ri leh chu pa hmai ri no chawk chu ka hre zui a, ka hlau lutuk lah chu ka petek nawlh mai nghe nghe a; mahse, ka tlu hman lo, chu pa rawn hnektupa chuan ka kutah min la rawn chelh hman tho, min pawh lêtna lamah a âwmah ka la bei thlawp zui, chuta, a thinphu ri leh ka thinphu ri a inchhawn chiah chuan tu nge a ni tih ka hre nghâl, ka hai lo chiang khawp mai.

Chhanzuala. A âwmah ka bei ngun tawh a, a awm dàn, a thâwk dàn leh kan thinphu a inchhawn dàn thlengin ka hre bel viau tawh a ni. Kum thum chuang zet ral tawh mah se tuna min kuah leh chiah hian automatic-in keimahah hriatna a rawn awm nghâl vat réng a ni. Mak ka tih êm avàng chuan chêt sawn nachâng ka hre lawk lo zui a, ani pawh chuan min thlah nghâl mai bîk lo; mahse, mi dang rawn țawng thãwmin ka beng a rawn luh thlen tâkah chuan che sawn zuiin a kuahna ațang chuan ka tãl chhuak ta nghâl a.

"Buaina siam in awm elo?" YMA duty an nih loh pawhin khawtlâng hruaitu lam an nih ka ring tho, hlauthâwng ru tak hian Chhanzuala chu ka en zui a, ani erawh chu a awm ngaiin a awm ngar a, a hnekpa lah chu pàwr zet zet hian a rawn râk chhuak nawk nawk tawh a," Min cho in awm em ni? Tu nge min rawn hnek kha? Tu pawh ni ula, ka cho vek che u," a rawn ti kûk kûk a, khawtlâng hruaitute ni ngei tùr chuan," Buaina kan duh lo a nia, naupang leh kum lama upa tawhte pawh an awm ve a, buaina siam lo hrâm ang u," an rawn ti leh a, chu pa lah chuan," Tu nge buaina siam? Khawnge nula chhe lo deuh kha? A mawng a khal asin," a rawn ti leh a, thil ei tùr lam pawh ngaihsak duh tawh lo chuan U Kimi ţhutna lam chu ka pan ta dàwr dáwr a.

Thâwm chu an lo hriat ve phâk tho avang chuan anni pawh chu an ţhutna ațang chuan an lo hawi ve nasa a, ka va pawh tâkah chuan ei lova haw mai chu țha kan ti a, Chhanzuala lam pawh ngaihven ta lo chuan kan haw ta daih a.

Engtin nge kha lai hmunah khân a lo awm ve nawlh theih ni? Min zui ru em ni? Ni lo, a ni thei lo, kan intawng fuhin a lo awm fuh ve êm a nih kha, lo awm lo ta se kha zu ruipa kha engtin nge ka tih ang? Ka bêng ngeiin ka ring a, kan mualpho hial ang chu, mualphona tùr lak ațangin Chhanzuala khân min vêng a ni, kha pain ka mawng a rawn khawih te kha a lo hmu ve reng ang em? Ka hmai chu ka hup a, ka thaw deuh hawk hawk a.

"Eng nge ni ta?"

Ani kha chuan zu rim chu a nam lovin ka hria; mahse, engtin nge a lo awm ve nawlh theih ni? Lungleiah hian a lo la awm ve reng em ni? Ka chungah a thin a rim ang em? Khatiang hmunah, zu rui, ka hmel hriat pawh ni lo bulah lehnghâl kha chuan min hmuh a inring bîk kher lo ang, min hua ni ta se kha pa lak ațang khân min chhan kher ang em? Ngaihtuah tùr a va tam tak! Ka kalpuite bulah chuan buaina chhan bul ber ka ni tih ka hrilh miah lo va, an țawng bawrh bawrh a, kei erawh ka ngawi kar thung.

Sêntei chuan min rawn nghawk salh pah chuan,"A mak!  Rilru hahna nei ang mai, engah nge i ngawih reng? I la thaw hawk hawk zui a," a rawn ti sar sar a, ka lo en vat a, ka thil ngaihtuah vàngin ka awm dàn chu ka lo hrechang lo niin," Nei lo, puipun boruak kha ka zo meuh lo niin ka hria," ka ti ta zaih a.  Ani pawh chuan," Ni e, zanin phei chu kha, buaina kan hmachhawn țêp zui a, Zorin-Bawihtea a tel ve bawk sia, a fuh lo țêp chu a nih kha," a lo ti ve leh mai a.

Chhanzuala ka hmu a, zu ruipa lak ațangin min chhanin chu chu buaina chhuah bul tumtu a ni tih hrilh ta ila mak a ti àwm mang e,  Chhanzuala kha engtin nge a awm zêl ang? Buaina dangah a intulût ang em? A thin a rim leh dâwn si, kha pa khaa pàwr chhunzawm zél chuan a thin tertek a chhuak leh ngeiin ka ring, a va buaithlâk țhin êm!! Ka chhuah ve vàng vek.

*I CHUNGA THIL SUAL TITE NGAIHDAM KHA  HARSA I TIH VIAU PAWHIN THIL ȚHA A NI A, I TUM NGEI A PAWIMAWH, NANGMA TÂN NGEI KHÂN. A CHHAN CHU MI NGAIHDAM THEIH LOH I NEIH CHUAN I NUN KHA HAHDAM TAKIN I HMANG THEI LO ANG*