☆UNEXPECTEDLY YOU☆ - 26 By Dingdi Pachuau

 ☆UNEXPECTEDLY YOU☆ - 26 By Dingdi Pachuau

Zànah pawh chuan ka muhìl thei lawk lo va, Bawihtea muhìl thaw sâk sâk bulah chuan mu be reng mah ila ka ngaihtuahna zawng hmun dang daihah a awm. Chhanzuala mawlh chu ka ngaihtuah lo thei lo va, zanin boruak kha, ani kha rawn inrawlh lo ta se kha zu rùipa nèn khân engtin nge kan inkâr boruak kha a chhoh zêl ang tih te ka ngaihtuah a, ka thin a rim dâwn si a, kan mualpho nasa ngawtin ka ring, chumi lak ata chu chhanchhuah ka ni a, min chhanchhuaktu pawh tu dang ni lovin Chhanzuala, hmâna ka bialpa ni țhìn Chhanzuala kha a ni, rilru nâ leh hrehawm tinrêng tuar tùra ka kalsan ngei kha.

Ani erawh chuan natna ka tawrhtîr leh hrehawm taka ka kalsan kha hre  lo ang maiin kha pa lak ațang pawh khân min la rawn chhan hrâm chu a ni tak si a, a lakah hian induh thei ka ni mawlh lo, ka induh lo, ka inthlahrung êm êm zâwk a ni, amah hmuh leh pawh ngam lo khawpin a nia ka inthlahrun ni, a hmel hmuh hi ka hreh ngawih ngawih a, hreh tùr pawh ka ni rêng bawk a. A hmel hmuh mai ni lovin, amah ngaihtuah ngam tùr pawh hi ka ni tawh hlawl lo.

Mahse, ka ngaihtuah leh țan ta chu a nih si hi.

A tûkleh lam thleng pawh chuan Chhanzuala chu ka ngaihtuah reng a, a inah khân a la chêng reng tihna a ni ngei ang a, a hnaahte khân hlâwkna tam tak a hmu ve ngei tawh bawk ang chu, kum thum zet a lo liam ve tawh bawk a, hlâwk viau turin ka duh, a phû alawm, keimah vànga rilru natna leh hrehawmna a tawrh zawng zawng lêt hnih aia tam hlimna nei mawlh rawh se, ka duhsak hlê a ni.

Min hringtu ka nu leh pate in lamah, chaw ei tùra min sàwm avàngin kan kal a, ka hlim lehzualna tùrin Sëntei leh U Kimi ka nuin a lo sâwm ve bawk a, ka nu nungchang a inthlâk tawh êm avàng hian nuam ka ti a, bâkah, khatia Zda ka han neia a boral leh tâk ațang khân a mizia hi a danglam țan a, fa ka neih hnuah phei kha chuan keh thei dawmin min dawm ni berin ka hria.

Ka pain Bawihtea a hmuh veleh chuan," Aw ka tupa duat, ka neihchhun," tiin a lo pawm kãng vat a, ka nu chuan," 'Ka' ti bîk suh, 'kan' ti rawh, kei pawhin ka duat ve tho, kan neihchhun liau liau a nih hi," a lo ti ve a, ka pa chuan,"A, i duh leh sawi ve mai rawh, ka tupa duat leh hmel țha, fel bawk si a nih hi," a ti leh a.

Bawihtea ngawt chu an buaipui a, Sëntei leh U Kimi an rawn thleng ve bawk a, kan ri lè lú mai. U Kimi chuan," Zanin chu chaw ei khamah meilum chhêm ang u aw, a vawt reuh si a, a nuam leh viau ang," a ti sauh sauh a, ka pa chuan," In chhèm duh ka ring a, thing pawh ka dah kháwm țeuh tawh mai," a lo ti ve a. Sikria mei chhèm hi nuam kan ti țhìn a, kan kawtah kan chhêm hluah țhìn. Heater nei reng mah ila ka pa hian kan la têt deuh lai pawh khân thing bung tê tê hi a dah khâwl țhìn a, chu chu kan chhêm țhìn a ni, Zda nèn kan inngaihzàwn lai pawh khân Krismas kan hman dun tawh phawt hi chuan kan chhêm ziah a, a chângin arsa pawh kan hem țhìn, nuam kan tih ve theihzia kha.

Zanriah ei lai chuan ka pain Bawihtea a pawm a, an puar khawp an ei pawhin ka ring lo. Ka nu chuan," Ka lo pawm ve tawh dâwn em niang? I puar thei lo ang," a ti nghe nghe a, ani erawh chuan," Ka tupa pawm vànga ka puar thei lo a nih leh, ka puar lo tawp mai ang, pawm ka thlahlel alawm," a lo ti mai a.

Chaw ei khamah chuan," Nang chu kan lo àwl ang che, zanin chu che lovin i lo țhu dar dar thei ang," an ti a, ka chêt ve phal lo chuan Sêntei leh U Kimi chu an phe vat vat a, nui chung hian ka pa chuan," Ni e, nula țuan țha tak tak pahnih an awm kha, lo țhu mai mai rawh," a lo ti ve a; mahse, àwl chu duh bîk lovin dawhkàn chu  ka hru fai ve tho a.

Chaw ei khamah chuan muangchângin meilum chhèm tùr chu kan buatsaih a, Bawihtea erawh chu a pi leh pute bulah awmin a hlim chu a țê rai rai reng a, keini hmeichhe pathum erawh pâwnah thli thaw min chhèm theih loh lamah chuan mei kan chhêm a, chumi pah chuan Sêntei chuan a phone-ah Krismas hla a play pah bawk a, a boruakin a zir ve bawk nèn, kan zàwm deuh dal dal a. Chutah, Sêntei chuan," Ka lo ngaihtuah mai mai a, kumin Krismas hi kum dang aiin ka nghâkhlel zek zek a, a chhan ka hre si lo, eng nge a chhan nia in rin ve?" a rawn ti chhuak ta hluai a.

Ka lo nui hawk a, he nu tak hi chu, nuih hi a tiza ve thei a ni, Krismas a nghahhlelh chhan chu engtin nge keini hian hria se min tih ni? Bialpa lah neih nachâng hre bawk si lo, mipa hian an melh ngam lo em maw ni, a upa ve tâwk tawh!

"Bialpa thar i chhar dâwn a niang," ngaihsak loh hmel zet hian ka lo ti a, a lo meng phâwk nasa, U Kimi pawh chuan," A ni ngei ang, a nih loh pawhin Krismas putarin eng emaw thil hlu tak a pe dâwn che pawh a ni maithei," a lo ti ve a, U Kimi ena nui var var chung hian," Ni mawlh teh se, kum heti chen hi Krismas ka lo hmang ve tawh a, thil hlu tak dawn hi chu ka phû ve tawh a ni," a ti a.

"Thil hlû thil hlû tih a ngai lo, bialpa lian pui rawn pe che se, pasal atân nei nghâl nghe nghe la, chu chu i mamawh tawh ber," ka lo tih chuan," Mamawh pawh ka lo inti hran hleinem, hetia 'single' rek rek hi a nuam, kan free alawm, free hi a ni lo'm ni kan duh ber," a lo ti leh mai a, kei chuan," I single kumkhua dáwn tlat, Paul-a anga inserh hrang tlat ni la chu ka hre thiam. Siamtu siam dàn ang chea a ngai ngaia Amah tawh i tum a nih ngawt loh chuan--" ka tih lai chuan U Kimi chuan,"Chutiang a ngai lo, Mizo kan la tlêm lutuk, țan a ngai, pasal neiin fa pali panga i la nei ang chu," a lo ti ve bawk a.

"Nang pawh," Sëntei chuan a ti ve thung a, U Kimi chu a ngawi deuh vang vang a, chutah," Ti dâwn e, Mizoram tân Mizo fa a tam thei ang ber ka hring dãwn alawm," a rawn tih chuan Sêntei nèn chuan kan nui ta tlãwrh tlãwrh a, a sawitu pawh a bãng chuang lo, kan nui vak vak a.

Thil chi hrang hrang sawiin a chângin fiamthu kan thawh a, kan nui leh țhìn bawk a, tu dang vak kan ngai lo, min hmangaihtu leh kan hmangaihte bula awm hi a lo nuam ber a lo nih hi ka tih phah, anni hi he khawvêlah hian an lo piang lo ang tih ka hlau ngawih ngawih, anni vàng hian hun hlimawm tak tak ka hman theih phah a, ka tân hian an hlu tak zet a ni.

Kan haw lama Chhanzuala in  bula kan tlàn lai chuan ka ngaihtuah chhuak leh reuh reuh a, kan kal lam kha chuan a awm ka rin loh vàng khân thlêk pawh ka thlêk duh lo kha a ni a, tunah chuan veranda-ah êng a chhit avàngin a awm ngei ka ring a, ka thlêk deuh zauh bawk. Eng nge a tih ang? Tûnlaia amah ka ngaihtuah nasat ang hian min ngaihtuah ve ang em? Ngaihtuah lo ang, a duh lo tawp ang, ka kalsan dàn kha, tlâwm a inti dâwn lutuk, chu vàng chuan min ngaihtuah chhuak duh lo ang; mahse, a châng chuan loh theih loh thilah min ngaihtuah chhuak ve zeuh mahna...

Bawihtea Krismas thuamhnaw tùr chu kan leisak vek tawh nain ka pain Bawihtea bazâra hruai ve tùra min tih tlat avàngin kan chhuak dùn a, nuam a lo ti nasa mai, naupang làwm thil chi hrang hrang an zuar tam bawk si a, tum loh deuhin thil kan lei ta nual mai. Thil a hriat thiam ve deuh hnua Krismas bazâra a kal vawi khatna a ni bawk a, kan inkhai bâwr dâwn khawp e.

Bawihtea thil en kual vêl lai chuan ka han hawi kual ve a, mihring pawh kan tam ve viau tawh e. Thingtlâng lam ațanga lo kal te, khawpui chhûnga awm te leh town area china chëngte pawh a ni ang chu, kan inpèl nuk nuk a, chutia ka hawi kual vêl chu min en rengtu awm tlata hriatna ka nei thut a, nuam lo ti ru tak chuan hawi kual tawh lovin Bawihtea lam chu ka en nghâl ta daih a, police car lem a lo la buaipui char char niin, pakhat chu ka leisak tawh nghe nghe a, a la duhkhawp lo a niang.

Fate thil duh hi chu leisak loh a lo har a nih hi. Kan inlei tam ve viau tawh tih pawh chuan duh a hmu zêl mai a, hawpui tawp mai a țhain ka hria, hetiang chuan kan inkeng zo sêng lo ang, a duh kan lei zo chauh a, kan piaha mi a dang a duh leh zêl țhin si a.

Inkhai bâwr deuh țûn chuan dàwrah ka chawlhpui a, chàwl ve dang an lo tam lêm lo va, a zia viau. Kan țhu chiah tihah chuan police car ka leisak chu khalh a'n ngèn nghâl a, ka pe ve mai bawk, dawhkànah chuan a khàl a, a nawr a, a tlàntîr bawk a.

Ei tùr chah a rawn thlen lai chuan a motor khalh chu ka lo ngaihvenpui hman lo va, dawhkàn ațang chuan a ti tla a, a la thar țha bawk nèn, a lìr duh khawp mai. Kan piahte piah chiah dawhkàn ke bul thlengin a va lìr a, Bawihtea chu lo țhu reng tùra chahin va chhar tùrin ka kal ta nghâl a. Inthlahrung ru tak chuan chu dawhkàn kîltute zînga hmeichhe pakhat hnênah chuan," Ka fapa motor lem in dawhkàn hnuaiah hian a rawn lìr lût palh hlauh a, ka lo chhar lawk mai aw," tiin ka han dîl a, chu nu chuan," Aw, chhar rawh khai," a lo ti vat a, ka han chhar a, chu nu chuan," Urlâwk zàn atán, ka pa in tùr țhami rûk chhuah tùr ka rawn dap ang, Chhanzual, i inah aw niang?" ring vak lova a tih chu ka hria a, ka phu deuh zawk nghe nghe,  ka han hawi chhuak leh chu Chhanzuala hmel ka hmu zui nghâl zat bawk, dawhkàn kîltute zîngah khân a lo tel ve reng niin.

Ka en rei lo viau a nia; mahse, a hmai duk deuh leh a biangki lai taka band-aid bel vâ chu ka hmu chiang khawp mai, eng vàng nge ni ang? Tu emaw nèn an insual leh tawh tihna em ni? Nge hmeichhiain a duatna? Mahse, chu êm chu ka ring lo deuh si.

Ei tùr chu ka ei mawlh mawlh a, a tui em tih pawh ka hre lo, ka hnawh lût mawlh mawlh a ni ber ang chu, ka ei zo ta thuai a, Bawihtea lam ka en chuan a lo ei ve nual tih ka hmu a, ka nuih sak nghe nghe. Ei tùr chu ka han barh a, amah hi chuan a la ei thiam lutuk lo a, a tibaw ve țhin bawk a, chu vànģ chuan kan inah tih loh hi chuan ka barh tlângpui rêng a ni.

Kan dawhkàna lehkha phêka number inziak dal ka hmuh rual chuan chu lehkha rawn dahtu kut chu ka hmu nghâl a, kut neitu ka en chhoh chuan," Min rawn be rawh," a ti sup a, a kal sawn zui ta nghâl a, a ngaihna hre lo zet hian ka en zui a, chutah, lehkha phêka number inziak chu ka en leh a, hei hi a number a nih chuan number dang a lo hmang ve tawh a nih chiah hi, a hmaa a phone number kha chu a ni tawh miah si lo va.

Zàna kan room-a kan awm hnu chuan chu lehkha phêk chu ka phawrh chhuak a, ka en leh a, a number a ni tihna a ni ngei ang a, han biak ringawt chu, eng nge ka sawi ang? A lo thinrim phei chuan... Biak chu ka han tum deuh zuau zuau a; mahse, ka țhulh leh ţhìn, eng nge ka sawi ang? Biak ka huphurhzia hi, eng atán nge bia se min tih ni?

Ka be lo ta nge nge. A tûkah Zda thlànah kalin kan chei a, thlâte kan la a, hei chauh hi Zda tâna ka tih theih chu a ni tawh. Ina kan haw chuan ka chau ruai maiin ka hria, rawngbàwl a la hun lo deuh bawk a, khumah tlu zâl lawk tùrin kan room-ah chuan ka lût a, Bawihtea chu a pi leh pu bulah a awm tho a, ka ngaihtuah rih lo.

Ka mu tùr chuan dawhkàn chunga lehkha phêk,Chhanzuala min pêk ngei kha ka hmu leh a, ka han en vang vang a, ka phome chu phawrhin khumah chuan ka mu zui ta nghâl a.

A ring ta e. Mu chung chuan ka hmui chu ka pet fan fan a, ka maimichhîng vang vang bawk, ka zàm êm avàng chuan ka kut hmâwr pawh a vawt leh vek tawh!

"Dinpuii maw?" 

Ka biak a lo beisei reng a ni thei ang em? Min rawn hre chat bawk sia, ka number hi a lo nei reng a ni lo maw? Mãwl lian, engtin nge maw min hriat loh ang? Number a save loh ațangin ka bia a, min ring nghâl lo thei nâng, amah be tùrin min hrilh kha.

"Aw, keimah...Hmãn zàn avàng khân ka lãwm e, làwmthu kha ka hrilh hman lo che a," ka ti ta ringawt a,  sawi tùr dang ka hre mai lo, kha kha ka ngaihtuah chhuak phut a, sawi chhuah mai a lo remchãng a, làwmthu hrilhna hun remchâng tak a ni pawhin ka hre bawk a.

"Min hrilh dâwn tawh loah ka lo ngai mai asin," a rawn ti sup a, chutia a rawn tih leh tâkah phei chuan sawi leh tùr ka vàn zual ta kher mai, ka ngawi vang vang a, ka hmui chu petin nghet zetin phone chu ka hûm a, ani pawh a rawn țawng chhunzawm bîk lo. Chutah, hmeichhia awin," I va luck tak! Mahse, i bula ka awm ve reng lai hi chuan hmeichhe dang call hi chu chhâbg lo hrâm teh, " a tih vau vau chu ka hre thei a, Chhanzuala nui deuh hawk ri pawh ka hre zui nghâl. Ka biak hun hi a fuh chiah lo a nih àwm hi, bâkah, kei pawhin a hman remchâng em tih pawh zâwt hmasa hauh lovin ka be ringawt a.

"Ka tihpalh, i remchãng lo em tih zawh nachâng che ka lo hre lo a," ka ti a,  ani chuan," Nakin zàn dâr 9-ah min rawn be leh rawh, ka hman tawh êm ang chu," a rawn ti a, kan inbiakna chu a ti tàwp zui ta nghâl a. Ka muthilh chhuak zawng zawng chuan min thlawh bosan hneh kher mai, min chhàn dàn chu ka beisei loh thil a ni, heti hian ka lakah nunràwn a chhuah țan dâwn chiah tihna a ni ang maw? Ngeiawm min chhuah khum dâwn maw? A ngeiawm thiam theihzia  ngaihtuah chuan thil huphurhawm tak a ni; mahse, hêng mai mai te chu, ka tawrh tùr alawm, ani pawhin kum khati chen kha keimah vàngin rilru hrehawm a lo tuar ve tawh a, a sawhkhâwk chu tuar ve tùr ka ni, vui ngam tùr ka ni lo va, phunnawi ngam tùr lah ka ni hek lo, ka tuhrah ka seng dâwn tihna a nih ber chu, engtin pawhin min țawng khum se, a damna tùr, a hlimna tùr leh a phubâ a nih phawt chuan ka tuar chhuak ngei ang, hlim tùrin ka duh alawm.

Ka muhìl lo chiang kher mai, a hnuah phei chuan ka tho ta daih nghe nghe a, muhìl chuang lova mut zawng ka peih lo.

Zàntîrah Sêntei nèn kan inbia a, a chhûngte'n Krismas chhang tùr Buhban fai an rawn thawn chu," A tam sia, in duh ve lo'm ni? Naktûkah rawn lam la, i rawn lêng pah ve bawk ang a," a rawn ti a, kei pawh chuan," Min pêk phal phawt chuan kan lãwm ngawt ang chu, ka rawn lêng dâwn sa," ka ti ve a, rei tak pawh inbe lo chuan kan ti tàwp zui a.

Zàn dár 9 a rîk chuan ka phone chu ka en vang vang a, ka biaang nfe be lo ang tihah chuan keimah leh keimah chu ka inhnial a, be ta ila a lo remchâng lo leh thut thei, nula bula a awm lai a nih phei chuan... ka phone duh ta lo va, ani pawhin ka biak chu a lo chãng kher lo ang, a sawi mai mai a nih kha, a sawi dànah khân amah pawh a chian loh êm kha.

Bawihtea tel lova ka chhuah ve vawi khatna. A pite'n an phal tlat lo va," I chhuahpui ziah a, kan lo awm ve tawh ang e, Kum thar hnu lawkah min kalsan leh daih dáwn si a, kan awm leh khât dâwn êm asin," an ti tlat a, ka hnial bîk lo. Scooty ka khalh chhuak a, Sêntei in luah lam pan chuan ka chhuak ta vang vang a, ani hian dàwr a la nghâk reng a; mahse, mi dàwr ni lovin ama dàwr ngei a ni a nghah tawh ni, rilru hi a nei reuh a, a hausa ru phian tawh ang.

A ina ka luh hma chuan a in chung lam ka han thlîr chho zauh a, tukverh a inkhãr a, a awm lo a ni ngei ang, chhùn lamah hi chuan inah a awm khàt ve theih êm kha maw.

"Nula hausa, bialpa neih pawh ngai ti lo khawpa nula thianghlim leh free ngaina inah, ka lo thleng tawh a nia," kawngkaa luh pah chuan ka ti lût làwng láwng a, in chhúnga lo awm ka hmuh vàng erawh chuan ka pên tàwp chut a, posi lai zet hian ka ding deuh ui a, ka din dàn chu laklawh tak a ni, mak tiin ka ka hau maithei bawk, ka rin loh deuh ka hmu miau a.

"A chhuak lawk a nih kha, min hmuh i inring lo hle mai maw?" a rawn tih chuan ka din dàn chu ka siam rem ta phawt a, chutah,"Nizàn khân min be tùr khân ka hrilh chein ka hria a," a ti leh charh a. Kei chuan," I buai ka ring a," ka ti ve thung a, dâwt a ni lo bawk a, ka țawng pawh a ban lo.

"Kum khati chhûnga min hmuh duh lo leh biak duh loh chhan kha, tunah chuan i pasal pawh a awm tawh lo niin ka lo hria a, ka tuarpui khawp mai che. Chu thu chuan a hnèm kher lo che a nih pawhin ka thiam loh a ni lo ang," a tih leh chuan sawi tùr tam viau mah se a vâng a ni tawp mai.  Amah pawh en duh lo chuan chhuat lam chu ka en daih nghe nghe a, ka mitah ka rilru a lang chhuak ang tih ka hria, a hmuh ka duh lo. Tunah chuan țawngkam  hriam zâwngin min khei dâwn a nih hmel a, ka tawrh tùr tih hre mah ila rilru na thei ka la nih tho avàngin ka mitmenga nâ hi a hmu tùr a ni lo.

"I duh duh sawi rawh," ka ti sap a, a duh duh sawi se, min diriam se, a țawngkamin min nghaisa se, a damnaa nih chuan ka tuar chhuak vek ang, țawngkam mai mai chuan a tawrhna zawng zawng chanve chanve leh pawh a tluk tawp nâng.

"Ka chungah làwmthu kha i sawiin ka hria a, i lãwm tak tak a nih chuan ka inah rawn chho rawh," tiin a țhutna ațang chuan a tho thut a, a chhuak zui ta nghâl a, kei erawh chu chêt sawn pawh tum lo chuan ka la ding reng a, a hnu deuha Sêntei rawn lût chuan," Tunah chuan zawhna chhàn tùr i hmachhawn ta, i hriat thiam ngei ka beisei a nia, a tawrhna kha ngaihtuah la," a rawn tih chuan muangchângin țhutna ka pan a, ka țhu ve ta chauh a.

A thin a rim tih a țawngkam ațang khân a lang chiang si a, a ina han luh pawh a huphurhawm ka ti. Bâkah, a ina han luh leh chuan nunhlui hnutchhiah tam tak kha thinlungah a lo thar leh uau uai ngei ang, ngaihtuah loh tùr thil țûl lo tak tak kha a rawn inlâr leh zut zut bawk ang a...

Sêntei min ngenna vàng pawh ni chuang lo chuan in chungah chuan ka han chho ta poh a, lût mai lo chuan kawngka bulah ka ding rèn ráwn phawt a, thâwk ka lâk hawk hawk hnuah ka lût ve ta chauh a, a in chhûngah chuan danglam a lo awm lêm lo, keini pahnih hi danglam awmchhun kan nih ngei ka ring.

"Coffee?" a rawn tih chuan ka bu zauh ringawt a, thil dang ngaihtuah duh lo lui tlatin Sofa-ah chuan ka țhu a, island bula stool sâng êr âwrah pawh chuan ka țhu duh lo. A in chhûnga parda leh engkim mai, a awm dàn ngai veka la awm chu mak ka ti lek lek, a thinrimin a hùn sawn vek ka ring tawh a nia.

Coffee no chu dawhkànah chuan a rawn hûng a, ani erawh chuan beer can a hûm leh chat tawh, a la sim hlei thei lo chu a nih dâwn hi.

"Mipa rinawm lo hi ka hua a, hmeichhe rinawm lo lek phei chu haw tak ka ni."

A huat dàn tùrzia chu a țawng dàn ațang chuan a hriat theih hialin ka hria, țawng ring lêm lo mah se min haw tak zet a ni tih ka hai lo; mahse, a lakah hian ka thin a rim lo, rinawm lo hmasa zâwk kha ka ni miau a, engtin pawhin min sawiin min diriam mah se haw ngam tùr leh thinrim ngam tùr ka ni lo. A tân chuan phatsantu mi rinawm lo ka ni a, tunah phei chuan thinrima àn khum bawrh bawrh tùr chauh ka ni tawh, kum thum kalta khân a tân ka thi tawh tlat.

"Phatsantu hmeichhe rinawm lo lakah hian phubâ lâk ka tum lo, phubâ chu a changtupain a la țhin, kan duh dànin kan nung thei alawm. Kan duh kan pan ang a, kan hlimna zawng thei tùrin zalènna kan nei vek, i hlimna i pan a, i hlim nì pawhin a lang, ka lawmpui bawk che, ka lawmpuina thu erawh i hre tlai ta deuh a nih hi."

A țawngkam tin mai chuan min chhu sawk sawk ni maiin ka hria; mahse, nâ ka ti lo ang, nâ ti thei ka ni lo, ka tawrh tùr a ni, hêng hi chu a hma pawhin ka lo ngaihtuah lâwk vek tawh; mahse, suangtuahna leh a tak ram chu a va inthlau si êm! A taka han tawn meuh chuan ami deh dàn a dang daih mai.

"Hmangaihtu pawh phatsantu a nih theihna khawvêlah hian thil theih loh pakhat mah a lo awm lo a nih hi, țawngkam hi chu țawngkam mai a ni a, thinlung leh rilru chhûngril hmuh theih ni hek lo le, kan inbum tawn fo mai chu a nih hi."

Coffee no chu ka hûm ngawt ngawt a, a țawngkam tina thumalte chuan min dêng dawt dawt a, min ring ëm ëmtu, thinlung leh tih takzeta min hmangaihtu tân chuan kha a chunga  ka thil tih kha a na êm mai a, kei ni ve ta ila amah ang hi ka ni ve thei lo zâwk ang, ani zawng chak takin a la ding thei a, a thinlung chu eng ang taka nâin nge ka hliamsak tih hre lo mah ila ka hliam na tâwk ang tih ka hria, a țawngkam chhuak tin maiin ka thinlung a den nat dàn ațang hian ka hria a ni.

*A HMEL ȚHAT AVÀNGIN I HMANGAIH A NI LO, I HMANGAIH AVÀNGIN A LO HMEL ȚHA ÊM ÊM MAI ZÂWK A NI*