☆UNEXPECTEDLY YOU☆ - 27 By Dingdi Pachuau

 ☆UNEXPECTEDLY YOU☆ - 27 By Dingdi Pachuau

"Min kalsan hun lai kha tûn ang hun chho, Krismas hma chiah tho a nih kha, eng anga hlimin nge kha hun kha i hman chu hre lo mah ila i hlim ngeiin ka ring a; mahse, a châng chuan i hlim lo ve thovin ka ring bawk a, i kalsan tâk thinlung tùr kha i ngaihtuah chhuah ve zauh ka rin vàng a ni. Chance pawh inpe hlek lova inkalsan tawp mai kha chu a fair tâwk lo va, thil ni thei tùr ni pawhin ka hre thei lo; mahse, thil ni thei lova kan ngaih pawh hi thil ni thei a lo ni tih ka hre chiang tawh a, a taka tawngtu ka ni bawk. Hmangaihna leh indonaah hi chuan fair lo a lo awm lo a, fair lo sak sak ka tih kha tu emaw tân chuan a lo fair tâwk tihna a lo ni bawk a," a ti leh sak sak a.

Min huain a thinrim tawngkhawng bawk tih ka hria a, chuvàng chuan ka lo inrawlh ve lo, a duh duh sawi rawh se, hei hi ka phû tâwk chiah a ni. Na thei ang ber pawhin min diriam rawh se, ka pawm vek ang, thinlung nâ chu kei pawhin ka lo tuar ve tawh tho a, a tawrh ang 'Kalsan' nih erawh a nat dàn tùr ka hre lo, kalsan ka ni ve tlat si lo va, 'kalsan' ni lovin 'kalsantu' ka ni, a inang lo êm mai!

"Eng emaw tal sawi ve rawh," a tih pawh chuan ka la ngawi reng a, sawi tùr nei țeuh mah ila sawi thei tùr ka ni lo. Ka chunga thil thleng kha tu mah ka la hrilh lo va, hrilh tumna lah ka nei hek lo, ani phei hi chu... thil kal tawh sawi chhuah thar leh kha awmzia a awm lo.

"Sawi tùr ka nei lo," ka ti sap a, a lam pawh en duh lo chuan ka coffee no ken lai chu ka en a, hmânah pawh khân he no ngei hian coffee kha ka in țhìn a nih kha, a la hre ve reng a ni ngei ang.

"He khawvêlah hian, i sawi tùr àwm chu ka hre țeuh! Ni e, sawi tùr i nei nâng, tuin nge a kalsan tawh hnênah sawi tùr nei ngai? Mi mãwl tak ka lo nih hi, min kalsan pawh kha a lo àwm e, kalsan phü tâwk chiah ka ni," tiin a thil ken lai chu a in khawlh khawlh a, ka mitsìr a, thinrim hmel zeta a beer can ruak a hmet khãwr rap rap chu ka hmu thei a, ka awm a tinuam lo tak zet a ni.

"Coffee kha in zo thuai la, min chhuahsan thuai mai teh."

Coffee tui hmel zet chu a tui leh tui loh pawh hre chiang hman lo chuan ka in pawp pawp a, ka in zo ta thuai a, a ngawi ngul tawh mai a, ding zetin hma lam chu a en a, a thil en chu hmu àwm hmel pawh a pu lo.

Ka ding chhuak a, ka rilru chhûngril hrehawm dàn chu, hetia kalsan ngawt mai hi thil dik a ni ang em? Nge ka awm ve reng chuan a thin ka tirim belh chhah ang? Ka kal dáwn ûk a; mahse, ka ding leh dat a.

"A pawi ka ti tak zet, chu chauh chu ka sawi ang," ka ti sap a,"Keimah vàng chuan thil țha lo i tih phah loh hrâm ka beisei, i thil sawi zawng zawng kha a dik vek, ka haw lo che a nia, i dinhmun kha hre thiam phâk vek lo mah ila tlêm chu ka hre thiam ve hlek a nia, min ngaidam suh ang che," ka rilru chuan ka ti zui mawlh mawlh a; mahse, ka sawi chhuak ngam lo thung.

"Duh táwk rawh, kha thu kher kha chu khawvêla ka thu hriat duh loh ber a ni, thil pawi thlen tawh hnua pawi tih thu sawi leh țhin hi, awmzia a awm lo," a lo ti nghut nghut a, a ti dik bawk si a, sawi leh tùr rêng ka hre lo, inthiam lo êm êm chung chuan muangchângin a in ațang chuan ka chhuak ta zàl zál a.

Sëntei ina ka chhuk chuan min lo en chîk khawp mai a,"In sawi tùr àwm chu hre ruak mah ila, a țhen a zár chu min hrilh ve duh tho ang em?" a lo tih chuan ka nui lui sak a," Sawi tùr a awm lo, thil kal tawh, awmze nei lo chu sawi chiama fel thei pawh a ni lo," tiin ka chhâng a. Ani chuan," A nih, a thin a rim viau em? Chu chu a tilang em tih tal?" a lo ti leh țâlh a, dik taka chhângin," Um, a thin chu a rim ve khawp mai, a àwm rêng bawk a," ka ti a.

"Țha taka inbiain thil awm dàn sawi fiah la ka ti asin le," a ti leh sap a, chutah," En teh, thil àwm lo pawh a ni miah lo, tunah chuan pasal nei lai i ni tawh lo va, kawplai in nei lo ve ve a, insawi fel leh mai ula?" a ti leh a, a thil sawi chuan ka nuih a tiza lo va, ka thin pawh a tirim chuang lo; mahse, tlêmin ka lung a tichhia niin ka hria!

Ni lul lo mai, thil theih pawh a ni lo, a thleng lo ang. A tân chuan thil sawi àwm tak a ni maithei; mahse, ka tân chuan ngaihtuah chhin ngam pawh a ni lo va, ngaihtuah pawh ka la ngaihtuah hek lo. Kan inkawp leh ang maw? Ni lo, ni lo ve, a tân amah kalsantu kawp leh chu a tlàwmthlák lutuk, mipa a ni a, tlâwm tùrin ka duh lo, bâkah, ka tân pawh, a, thil theih a ni lo, thil thleng ngai lo tùr a ni.

"Ni lo ve, fiamthua sawi chi pawh a nih loh chu," ka tih chuan," Fiamthu pawhin ka sawi lo bawk, bialnu a nei bîk nâng, in inhmangaih tih ka hria alawm," a lo ti ve thung a. Chu chu kum thum kaltâa thil thleng tawh a ni alawm, mihring inhmangaihna hi chuan tàwp chin a nei a, inngaizâwngte inkâra hmangaihna hlauh phei hi chuan a daih rei lo, eng emaw thil vàngin a reh thuai mai țhin.

"A, sawi tawh lo teh ang, thil awmze awm lo sawi hi a ninawm," ka tih hlak tâkah chuan mitko sàn ãkin a hmui a tipawrh a, dàr chhìn leh ãk pah hian," Ni rawh se, ka sawi tawh lo ang," a ti ve ta a, chutah," I hawn tùr pawh ka lo tifel tawh aw," tiin Rambo polythene chhuata awm chu a kâwk a, ka en vat a, a va tam hmel ve! Ani hi, chhum ve tùr nei lêk lo hian min pe vek a ni mai lo maw?

"A va tam ve! I indah ve mang nange?" ka ti a, ani chuan," Dah e, nangni chhûng chu kei ai chuan member in tam a, in ei pawh a tam zâwk ngei ang," a lo ti a, thingpui siam turin a tho a, kei chuan," Ka lo siam zâwk dâwn em niang?  Buhban fai min pe a, thingpui min siam leh dáwn bawk a nia," ka ti a, ani chuan," Ho mai mai, i lo lèn ve chhunah i duh apiang ka tihsak vek ang che, chhang erawh tui tak ka nei lo thung a," rawn hawi lêt paha nui țhû chung hian a ti a.

Chhanzuala chanchin chu sawipui duh viau mah ila ka ngam dèr lo, ka sawipui duh chhan erawh chu amah beisei leh duh vàng lam ni lovin lo ngaihven deuh tùra chah ka duh vàng a nia, na takin ka siam tawh a, kum thum chuang zet ni tawh mah se hmel kan inhmu leh lo thei si lo va, a na thar dáwn tih ka hria a ni, chutiangin kei pawh; mahse, keia nâ ve hi zawng, a tawrh lakah chuan a nêp àwm êm mai.

Mut hmunah chuan Bawihtea, min kuah chial chunga muhìl thaw ri sâk sâk chu ka ngaithla reng a, ani hi lo piang lo ta se, khatiang hringnun, lungngaihna kâra hlimna lo êng ve sét sét kha ka chhar ang em? Ka pai țantirh lam kha chuan tihtlâk daih emaw tihhlum daih emaw kha ka ngaihtuah hial țhin a nih kha, a nih tunah hian? Ngaihtuah pawh ka ngam tawh lo, ani hian chakna min pe a, hringnun nunrâwng thei tak kârah hian beiseina nei thei tùrin min fuih a, ka chakna hnâr a ni. Awm lo ta se engtin nge tunah te hian huaisen takin hringnun ànchhedawng hi ka hman chhoh theih ang?  Ani chauh hi ka innghahna awmchhun a ni a, ani chauh hi ka neihchhun a ni tawh bawk, țha takin ka enkawl chho ang a, pa nei lo mah se a nu leh pa ni fàwmin pa a nei lo tih hriat miah lo tùr leh ngai miah lo tùrin ka uap tlat ang.

Kan room chu mawi takin kan chei a, kan sitting room-ah pawh chuan Krismas tree lian ve pângngai tak kan hûng bawk a, Bawihtea chuan a thiam tâwkin a chei ve a, light kan zam, zàna a han êng de neuh neuhte chu hmuhnawm a tiin mawi a ti khawp mai a, thla pawh kan la nasa e. A pi leh pu lahin an chhaih peih si a, an inûm loh leh an insakawr-chung-chuan a, a tih dàn ang angin a pi leh pute chu an awm peih a, ani tân hi chuan ngainat loh theih pawh an ni lo. Aisami an in lama a haw ve rih avàngin kan tlêm deuh sawt a, chêt pawh ka chêt nasat phah deuh, kan awm lai tala ka nu chu àwl ve ka duh si a.

Krismas chu hlim takin kan hmang a, kan inkhâwm vek a, zaikháwm lam erawh kan tel ve ta lo. Krismas ruai erawh kan țheh peih ve lo va, ka nu leh pate hi Zda boral ațang khân Krismas-ah ruai an țheh ngai ta lo va, kei pawh ka ni, in lamah tui takin kan duh zâwng tak chawhmeh kan siam a, kan duh tâwk ve mai.

31 zàn lam erawh chu Sêntei, U Kimi leh Rinnungate nèn kan in lamah kan hmang ta thung a, a hmaa kan tih ang bawk khân pâwnah sikri kan chhêm leh hluah a, chhang kan aiah arsa kan kang a, in chhúng lam nèn kan kàrtawn chhên mai. Bawihtea pawh a pi leh pu bulah a awm a, ka bula rawn awm a ngèn bîk miah lo. Ka nute pawh hian Rinnunga hi an lo hre ve tawh a, U Kimi hian a hrilh ve vek tawh a nih ka ring, an hmêlah duh lohna leh eng emaw dik lo an tilang lo va, an duhpui ngei a nih ka ring, a țha e.

"Nakkum tûn ang huna nula tlangvâl tawh lo tùrte kan awm maithei a, ãm takin i hmang ang u, kei hi chu chiang sa," tih pah chuan Sêntei chuan ârbawp chu a'n lek kãng a," Ka nulátna ka'n vúi liam ang e," tiin a han keih ta hmak a, kan lo nui țhâ hlawm a.

"Keini pawh kan pahnihin," tiin Rinnunga chuan U Kimi kut chu la kãngin," Nakkum tûn ang hunah chuan nupa kawpchawi hlim tak kan nih tawh ngei ka beisei," a ti leh zui a, Sêntei chuan," A țha! Khatiang tùr kha a ni, han keih ve ula, nakkum tûn ang huna nulât tlangvàl tum tawh lo țheuh kan ni si a," a lo ti vat a, a thingpui no chu chawi kãngin," Cheers  ti ang u le," a han ti zui a, a nuih loh theih loh, a thu erawh kan âwih vek tho. "Zanin chu lu lam leh mawng lam pawh hre lo lëkin aw ni ang," a tih phei chuan kan nui tlâwrh tlãwrh a, a thingpui in chu a'n tlâk pap a, a'n ding kàwi deuh chhâ châ bawk a.

"Tu nge min cho?" zu rui aw anga a han tih chhoh chuan nui țhâ chung hian," Tu ma'n kan cho lo che, duh tâwk rawh, i khulh hnem deuh hlek a ni, ârbawp lah i sehhmeh hnem bawk, i puar mah mah tawh lo maw?" ka lo ti a, ani lah chuan," Het! Tu nge arbawp sawi? Min han pe teh u, ka la ei miah lo a nia," a ti leh a, a han meng lap lap a, a tep deuh chap chap bawk si a, kan nui zo leh vek. Zanin zet chu, pasal ka neih ațanga ka la hlim ber zàn a ni ngei ang.

U Kimi leh Rinnunga chu chance kan pe ve a, Sêntei nèn chuan intihrang deuhin eng eng emaw kan sawi a, a dàwr chungchâng ka zâwt pah bawk a, ani pawh chuan a sawi tui ve khawp mai, a tuina a ni bawk a, a lawmpuiawm ka ti.

"Mak deuh mai chu maw, han ti hluai ila, mak deuh han tihah a mak tehchiam lo maithei, khatia pasal i neih hnu khân Chhanzuala hi ka hmu khât khawp mai a, vawi hnih chu ka inah a rawn kal ve ngei mai a, chu pawh i chanchin min zâwt ve vein. Khatih laia hrehawm ka tihzia kha, i chanchin lo hrilh tùrin ka hre bîk bawk si lo, Zda nèn in tlân dùna in innei dâwn tih kha ka hre leh tawp a, kha thuin min den dàn ka ngaihtuah khân Chhanzuala kha engtianga nâin nge a den ang aw tih ka ngaihtuah a, hnèm tùra a ina han kalchilh pawh ka duh viau a, eng nge ka han sawi anga engtin nge ka hnem chuan ang tih ka ngaihtuah a, ka hriat ngang loh avàngin ka han kal ta lo a ni. Khatih lai khân ka hre thiam lo che a, ka hua che a, ka ngei bawk che, inneihnaah lah min sâwm bawk si lo. Khatia i awm tlat chhan kha, Zda hian a vau che a nih ka ring deuh a; mahse, vauzàm mai mai theih i niin ka hre bawk si lo, i hmangaih miah loh i han nei ta thut kha tûn thleng hian a ngaihna ka la hre chhuak thei lo," a ti ta duah a.

"Inhmangaihte hi an innei vek kher hleinem," ka lo ti thung a, nunhlui lam ngaihtuah lét duh lo hian," Nakkum lam chu i pasal tùr kan ngaihtuah tak tak tawh ang," ka ti zui a, ka nui pah a. Ani chuan," A hmanhmawhthlâk loh lutuk! Keia pasal tùr ve hi chu, a la piang lo záwk pawh a ni maithei, chuvàng chuan, hun ka la ngah lutuk," a lo ti mai a, kei chuan," Chutin ti ziah suh, i fate chu Bawihtea'n a vél a vèl mai tur a nia, fapa matric pass ka neih hnuah hian Anganwadi lamah inla inhnûk kawi fê mai ang," nui chung hian ka ti leh a.

"Zda khân a hmu hman si lo va, hmu ve ta se engtiangin nge a ngaih ang le? Fapa a nei tih kha hre hman tal se..." a tih leh chuan," Nia, a lo pian hun kha a nghâkhlel ve khawp asin, kei ai mahin a nghâkhlel maw le. Bawihtea hi nei lo ta ila engtin nge ka hringnun hi ka hman chhoh ang tih pawh ka ngaihtuah ngam lo, mahni chauha khawvêl hmachhawn chu a harsa dâwn êm asin," ka ti sap sap a.

"Chhanzuala'n a hmu ve tawh em?" 

A hmu tawh em kha? Ka han ngaihtuah vang vang a, kàwn chei kan fan țum kha chuan a hmu kher lo ang. Dàwra ka chawlhpuia dawhkàn ațanga police car a tih tlâk țum khán, a hmu maithei, a hmu lo thei tho bawk.

"Ka hre lo," ka tih chuan," Ani zawng naupang mai a la ni a, a haw thei lo tawp ang. Zda nèn khân lo innei lo ta ula, tûn ang hunah hian Chhanzuala nèn in innei tawh ang em le?" a rawn ti chhuak ta a! 

"I ngaihtuah ho mai mai e a!" ka lo ti ve thung a, ani lah chuan," I nute'n an la phal kher lo maithei a ni; mahse, hetia vànduaina i chunga lo thleng ta pawh hi in tân kawng hawngtu pawh a ni ve thei tlat," a ti leh a, ka lo khap vat a.

"Zda thlarau i tikhawngaihthlâk, duh tâwk teh!" ka lo ti vat a, ani chuan," Ni tho mai; mahse, awm tawh lo chu awm tawh lovin kal mai se, kal tawhte aiin la dam mêkte hi kan inngaihtuah a țúl alawm," a ti ve leh thung a, a dikna chen awm mah se, kan sawia hi ka pasal thi tawh a ni a, a thih hnua hetiang sawi hi chu ka duh lo.

Kan haw dâwn meuh chuan a lo tlai ve viau tawh mai a, Bawihtea pawh a pi mal chungah a lo muhìl dêr tawh a, ka nu chuan," Riak ve mai ula?" a ti a, kei chuan," Ni lo ve, ka hrilh lâwk bawk si lo va, ni dangah kan ti dâwn nia," tiin ka hnial ve thung a, ka hna thawhna hmuna kan kal leh hma ngeia riah ve chu ka tum a ni.

Kumthar a nih ațanga ni thumna zànah kan țhianho, Remlali, Famkimi leh Sêntei chu Sêntei inah chaw kan ei khâwm a, Bawihtea a pite bulah a awm a, hruai ve ka tum viau a nia," Kan lo awmpui thei alawm, i țhiante nèn pawh inhmuhna hun nei thei lovin i buai țhìn si a, i hman ve chhunah chuan ni lo ve," a ti tlat a, ka nu hi chuan mi hriat thiamna hi a ngah a nia.

Hetia kan han inhmu khâwm ta mai hi mak ka ti rilru deuh a; mahse, Sêntei lo ruahman vek a lo nia, ani chuan an pahniha number hi a la nei ve ve a, a lo phone lâwk vek a, an hman hun tùrah hetiang thil hi a ruahman ta a ni, tih nachâng a hre khawp mai ka ti.

An chanchin chu ka zâwt ve ve a, Remlali chuan dàwr dang a lo nghâk tawh a, Famkimi erawh chu a patea school boarding-ah a thawk ve thung a, pasal an la nei lo ve ve bawk, kei erawh chu ka hna thawh an hriat tawh avàngin ka hrilh nawn lëm lo. 

Chaw ei khama kan țhut khâwm tal tal lai chuan,"Hawh u, hun kal tawh sawi mai mai ang u, hun kal tawh a ni tho a, sawi hrehawm awm lo tùrah ngai bawk ila," Remlali chuan a ti chhuak hliai a, Famkimi chuan," Eng nge, i bialpa hlui lam chanchin em ni? Ka ngaithla peih miah lo a nia," a lo ti hmanhmawh a, nui duh miah lo hian Remlali chu a melh a. Ani lah chuan," Ni mai mai lo, i ninawm," a lo ti hlak a, chutah," Sawi nuam lo a nih chuan sawi kher ngai lo mai se. Dinpui, birthday kan lawm zàn khân engtik laiin nge i lo bo hman ka hre miah lo va," a rawn ti chhuak ta a, min rawn en ta țhap mai.

"In làm lai khân maw le," tiin ka lo chhâng ve mai a, Famkimi chuan," Zda'n a rawn bia che a niang maw? Khami zàn khân a ni lo'm ni in inrûk tâk kha?" a rawn ti leh a, ka chhâng lo. Remlali chuan," Khami zàna ka làm nasatzia kha, theitui lah kha kan hnianghnar nasa mai si a, zànlaiah ka thawh zin phah viau zui asin le," a ti barh barh a, Famkimi pawh chuan," Kei pawh, ka mu hman mang hleinem," a lo ti ve a, kei chuan," In rui lo em ni?" ka lo ti a, anni lah chuan," Theitui a ruih theih em ni? Ruih theih ni ta se chuan keini aia rui nasa an awm kher lo ang," an la ti zui a, ka hre thiam lo angreng viau mai, kei kha glass no khat chauh ka in kha a ni sia, ka rui a, ka lu a hai a, hàwn ka tum ta a nih nghe nghe kha.

"Khami zàn kha chu tute emaw tân chuan zàn chhinchhiah tlâk tak a lo ni reng sia, kan inang lo teh e," tiin Famkimi chuan min rawn melh ralh a,  Remlali pawh chuan,"Nia, bâkah, a tûk lamah Zda nèn in lo inkawp ru reng tih pawh kan hriat chhuah phah bawk a, in lo inthup thei khawp mai, inneihnaah min la sâwm duh lo zui, a hun lai kha chuan kan hre thiam lo ve lutuk a; mahse, tunah hi chuan engkim kan theihnghilh vek tawh a nia, hringnun hi chu a hmang thiam thiam tân hian a nuam a ni mai," a lo ti ve duah a, chutiang chuan a sawi na a, a rûk tak chuan nuam lo ka ti reuh reuh mai. Ka thil tawn kha an hre hauh si lo va, an tân chuan hriat thiam theih a ni tlat lo, min demnaah pawh kei chuan demna tùr ka nei lo, an dinhmunah ding ve ta ila an vuina hi ka vuina tùr ve tho a ni.

"Dinpuii a awm lo tih kan hriat hnu lawkah tiraw buaina tenau kha a chhuah?" tia Famkimi'n Remlali a en chuan ani pawh chu a lo bu ve zauh a," Ni chiang e, boruak pawh a nuam lo zo vek alawm," a tih chuan Sêntei chuan," Eng buaina nge ni a?" a lo ti vat a.

"Nula tlangvâl buaina maw le, tlangvâl pakhat khân birthday lawmnaa kal ve a bialnu kha beih a lo tum deuh em maw ni, zia lo lutuk ringawt!" Famkimi chuan nui țhû chung chuan a ti a, Remlali chuan," Harhfîm ve reng a hmeichhe zâwk tân chuan a tih chi loh alawm, khatiang hmuna puanhnuai thil tih tum rêng rêng, mipa zâwk ang khân rui ve ni ta se chuan ka hre thiam deuh thei mahna!" a lo ti ve a, chutah," Țap pûrin an inhau a, an chanchin kha hre zui lêm lo mah ila an ințhen chiang ngawtin ka ring, mipa khân hmeichhe in tùr nia a hriatah khân thil a pawlh niin a insawi a; mahse, a hmeichhia khân a in miah lo a niang, a taksaah danglam a awm loh bâkah a rui hauh si lo va, tuin nge chu a thil pawlh chu in ta tih tu mahin kan hre ta lo a ni. A mipa kha a che mak ve rêng rêng, mahni bialnu in tùra ruihna thil pawlh duh tlat mai kha, ka bialpa a ni ang tih ka hlau," Remlali vêk chuan a ti leh ta barh barh a.

Ka vâr ta kuar mai. Vànduaina hi ka tân, ka lamah a lo țang țha êm a lo ni. Ka thiam loh pawh ni bîk loah vànduaina ka tâwk a, chuta țangin vànduai lehchhàwnnaah lûtin ka nun pum chu sâwi danglam vek a ni a, ka tân hawi kìr leh theih a ni tawh lo, hei hi ka tân Khuanu ruat hringnun chu a ni, ka pumpelh thei lo, ka tâna a ruat a ni tlat, sawisêlin duh lo mah ila tihdanglam theih a ni hek lo.

Ka haw hnua khuma ka mu chu ka mittui a rawn tla zawih zawih ringawt a, ka vànduaina avàng chuan ka inkhawngaih a ni. Mi fate pawh khami zàn khân birthday lawmnaah an kal ve a, tu mahin ka tawn ang kha an tawng lo, ka tawng bîk kha ka vànduai ngawih ngawih ka inti a, ka inkhawngaih a, ka duh ang leh ka lo ruahmanna ang pawhin nun ka hman theih loh phah a, dàn thianghlim ngeia pasal neih tum tlat pawh kha, eng thil nge ka chungah thleng kha? Engati nge kha kha Pathian khân ka chungah thlen rem a tih theih? A duh loh dàna nun kha a duh zâwk em ni? Nupui pasal neih hmaa châkna suala tlu lût lo tùra ka invèn ve țhin nèn, eng vàngin nge kha thil kha a thlentîr si? Ka rilru chuan Pathian chu ka chhuahchhàl a, ka dem mawlh mawlh bawk a.

Mahse, awmzia a va awm chuang si lo ëm!

Ka nute chuan kan kal leh tawh tùr chu min ngaihtuah khawp mai a, ka pa chuan," Car khalh i lo zir lo chu aw... Khalh hiam la chuan car hi keng ta mai ula ni tùr a nia," a ti vang vang a, ka nu chuan," Kawng a țha fahran lo ang, a khalh thiam chuan an ngaihtuahawm zâwk ang," a lo ti thung a, chutah," In mamawh tùr kha in lei kim tawh maw? A vawt viau ni khân in sawiin ka hria a, electric heater pakhat saw keng ula, a țha ang.  Bawihtea'n vâwt a ti lutuk ang a, a muhìl țha thei lo ang tihte hi ka hlau a nia," a ti leh a. Ka hre chhuak leh chiah mai, ka nu chuan sawi chhuak lo se chuan ka theihnghilh leh ngei ngei ang chu.

Tuilum ip ka lei nual a, Pa Vànate pawh pe ve ila ka ti rilru a, heater kan neih chuan sikri pawh chhèm a ngai tawh lo ang a, kan pe lét leh thei bawk ang chu. Khuaa kum upa zual deuh tawhte mawza tùr pawh hi en nghe nghe ila, man to tak ni lo mah se an tân, a dawngtu tân chuan a làwmawm dâwn êm asin.

Dàwr ațanga kan nufaa kan chhuak chu ka inkeng bâwr ve bawk nèn, Bawihtea pawh ka kai thei hrâm hrâm a ni, chu dàwr lah chu a lùn phian zui a, chutah, Bawihtea chu ka thlah ta daih mai a, harsa zeta ka hawi lëtin ka han hmu chu a lo tlu niin, a lo țap lek lek mai lehnghâĺ a.

"Bawihte..." tiin ka pan leh vat a, ka thil khai chu dah rawkin ka han kai tho a, ani erawh chuan a hmaa mi chu țap hmel pu lek lek chuan a en thung a, chu pa ka han hmu chu ka ding zawt lo chauh, a lo su thlu lui a ni ngei ang, kaih thawh pawh tum lovin a en reng zui a.

"Âma..."

"Aw, Bawihte, i tlangvàl tawh kha, tlûkin țah loh tùr, tlangvâl chu an țap ngai lo," ka han ti a, țah chhuak hmel insûm deuh hian Chhanzuala chu a en reng a, chutah," Âma, a suai(A sual a tihna)," a ti ta reuh a," Eng maw?!" ka ti vat a, a thil sawi chu ka hre sual a nih ka ring a; mahse," Hei hi a suai," a tih leh ka hre sual lo tih hriain Chhanzuala chu ka hmachhawn ta nghâl a.

*ENGTIKLAI PAWHIN MI CHAK TAK I NI RENG THEI BÎK LO, A CHÂNG CHUAN MAHNI CHAUHA AWMIN I MITTUITE KHA CHHUAHTÍR VE I MAMAWH CHÂNG A AWM NGAI A NIA*