☆UNEXPECTEDLY YOU☆ - 28 By Dingdi Pachuau

 ☆UNEXPECTEDLY YOU☆ - 28 By Dingdi Pachuau

A hmel chu chiang takin ka en phawt a, a mitah tak ka en leh bawk. Ani erawh chuan min melh zawkin Bawihtea chu a en leh nghâl daih a, min melh rei lo nain a hmelah chuan thinrim hmel a pu àwm pawhin ka hre lo, hlim hmel leh mi nuihsawh hmel pawh a pu chuang lo, chutiang rilru chu lo pu pawh ni se a hmelah a lantîr lo hrim hrim a ni ber ang chu.

"Naupang mai a nih hi, eng mah a hre ve lo, ani chu telh ve suh," ka ti sap a, Bawihtea hriat loh tùra zàwiin ka hrilh ve a ni. A dik a ni, ani naupang mai hi chuan eng thil mah a ti sual lo, a duh vànga rawn piang lah a ni hek lo, a thinrim hrîkthlâkna tùr chu keimahah a ni, keimahah chauh tàwp rawh se, phatsantu ka ni alawm.

Țawng lo chuan Bawihtea chu a la melh kur reng mai a, Bawihtea chuan ka kut a rawn vuan a, min han pawh deuh dat tâkah chuan ka en ta vat a, kal a duh tawh a ni tih ka hria, a kut chu vawn nghehsak sauhin ka thil khai chu ka khai leh a, melh nawn tawh lo chuan kan kalsan zui ta nghâl a.

In kan thlen chuan a lunghnûr hmel hmuh tùr a awm leh tawh lo, a pi leh pute'n an fiam thiam a, an chhaih hlim thiam bawk nèn, vawiina thil thleng kha a theihnghilh leh vek tawh a ni ngei ang, naupang rilru thianghlim tak hi chu aw... ka awt țhin mang e.

Kan kal dâwn zànah chhûngkhat laina leh țhiante an rawn kal khâwm a, rin loh deuhin Famkimi leh Remlali pawh an rawn lang ve a, rei erawh an awm hman lo, an haw thuai a, an rawn lang ve hrim hrim chu ka lãwm khawp mai, țhian tak tak anga min lo en reng mai chu phû lo ka inti a, zahthlâk ka tiin ka inthiam lo ru khawp mai.

Kan kal tùr chu kan bâwr ve khawp mai a, bungrua eng eng emaw min kentîr țeuh a, kan lum loh an hlau khawp mai. Taxi kan hmang leh tawp mai a, taxi-ah pawh chuan keini nufa leh kan bungrua nèn, kan khat tâwk viau a ni.

Phailêng kan thlen zànah chuan Pa Vànate inah chaw kan ei a, min lo bàwl kêp vek a, hnial theih pawh a ni lo, an thil tùr kan hawnsak pawh chu kan keng nghâl bawk a, an lo lãwm thiam viau mai lehnghâl a, ka zak lek lek zâwk a ni.

Zanriah kan kîl lai chuan Maduhi pasal Rosanga, Pa Vàna fapa chuan

nui deuh chung hian," Kumin Krismas zet chu, țhian lunglêng fâl deuh ka kawp a, tu nge maw a ngaih teh rêng ni, Lunglei lamah kan rawn tlãn chúk chúk lo chauh maw le," a ti a, ka ngaihsak vak lo va, Maduhi chuan," In tlàn mai kha ka ring deuh a nia," a lo ti ve a, Pa Vàna chuan," Mipa ve si, chuti êm êma lunglèn te chu a," a lo ti hluk thung a.

"A pawttuin a pawt nã a ni mai alawm le," Maduhi'n a tih leh chuan Rosanga chuan," A pawttu lah hian a'n haider lui tlat bawk a," a lo ti leh a, ka melh ralh a, min en pahin a lo nui țhû a ni tih ka hmuh chuan hre thiam lo ru deuh hian," Tu nge chu chu?" ka lo ti ta vat a. Ani lah chuan," A la haider char char zui," a ti leh a, Maduhi ka en a, ani pawh chuan nui sûngin min lo en ve tho a, Rosanga en lehin," Ka chungchâng em ni in sawi?" thutak deuh hian ka ti hâ a.

"Ni maithei, țhianpa Dinpuia lung a lêng deuh hlek a," a tih chuan," Mipa mah ni se a lêng ve thei tho ang chu," ka lo ti vat a, Maduhi pawh chuan," Nia, lêng ve thei tho tih hre chiangtu zîngah ka telin ka hria, kan inah a rawn tãl tam bawk a,"a lo ti ve a.

Chaw kan ei kham ta maw tihah chuan Dinpuia ngei mai chu a rawn lût hlawl a, Maduhi chuan," Mi chhe sawi chu koh aiin a hnai tak tak a lo nih hi," a lo ti var a, ani chuan," Ka dam rei deuh hlek dáwn a niang, in hmel chhiat lai ka rawn nang teuh êm mai," nui var var chung hian a ti ve thung a, Rosanga'n," Zanin chu i va rawn lang hma ve a!"nui chunga a tih chuan Maduhi chuan," Chutia mi? Rawn lang har ka lo ti tawh khawp zâwk a," a lo ti ve a, a nui zui hak hak a. Dinpuia chuan," Ãwihawm loh e, zan tin ka rawn kal ziah alawm le, nangni nupa tak hi chuh!" tiin nui chung vêk hian a chhâng lêt a.

Hmun kan tihfel zawh chuan haw nghâl mai bík lovin ka țhu khawmuang ve rih a, Bawihtea leh Engmawia pawh an bengchheng ve leh viau mai a, motor khàlin an buai dùn a, min ngaihsak lêm lo. Thingpui hâng kan in a, kan titi a, Dinpuia chu a titi tam vak lo, Rosangate nupa chu an țawng bawrh bawrh a, kei pawh ka lo inrawlh zauh zauh bawk a, Krismas kan hman dàn kan sawiho a ni deuh ber.

A hnu deuhah Maduhi chuan," I lunglêng chu a zia viau tawh lo maw?" tiin Dinpuia chu a han fiam leh zauh a, Dinpuia chuan min rawn melh zauh phawt a, Maduhi lam en lehin," Tu nge lunglêng a?" a ti zui zat a, a hmel chu chîk taka en chuan zak hmel a pu deuh tih a hriat, chaw ei lai khân a lunglèn thu kha an sawi ngei a, inhmeh lo ka lo ti ru khawp mai kha a nia, tuna a hmel nèn hi chuan a nih duh hmel ta viau mai.

"Zêp kher lo la; mahse, tunah chuan lunglèn ngai tawh lovin engkim a fel vek tawh tho a tiraw?" zawi deuh sapa Maduhi'n Dinpuia lam hawia a tih chuan ani chuan," I va ho tak e aw," a lo ti thung a, zak hmel deuh hlek, lài hmel deuh hlek hian a nui a, tlangvâl fel tak leh țawng duh ve tak ni mah se a lo zak ve thei viau a nih dâwn hi.

Dâr 8: 30 a rîk chuan haw mai ka duh thu chu ka han sawi a," A la hma alawm," an lo ti a, chutia ka sawi vàng chu nge ni, Dinpuia pawh chuan," Chutia haw i tum chuan kei pawh vawiin kan hna thawk ka chau deuh si a, haw ve nghâl mai teh ang, in neitute hian lêng rei min ti palh ang," a lo ti ve a. Kan haw tùr chu Rosanga chuan," Nang tlangvâl phanchang tawhah, thlah haw nghâl mai la, an nufa chauha hàwtîr ngawt ai chuan, kawng laka tlangvâlin an lo ambush palh hlauh tâkah?" tiin Dinpuia chu enin a han nui a, Maduhi lehpek chuan," Tlangvâl dang ai chuan amah zâwk hi a hlauhawm ang," a lo ti ve leh a, an han infiam zui leh lâwp lâwp a.

Min thlah haw ve mai a, in kan thlen chuan lêng rih tùrin ka han sâwm ve a; mahse, min lo hnialin,"Zàn dangah zâwk le," a ti a, ka sâwm lui zawm ta bík lo.

Ka hun hman chu a ngai chho leh ta a, naupang zirtîr hi ka thiam zâwng tak leh phùr zâwng tak ni lo mah se țha taka naupang enkawl chhoh tum ka nihna hian min țantîr a, ka rin aiin țhahnem pawh ka ngai chho a, fapa, nakin lawka school kal ve tho tùr nei ka nih ve avàngin naupang nungchang ka zir chho nasa  a, chu chuan min pui khawp mai. Naupang pawhin min ngainat phah ve a, an duh dàn, an tui zâwng leh an phùr theih dàn tùr chu ka ngaihtuah nasain ka hriat ang ang pawh chu ka practice nasa țhin viau bawk.

Zàn lamah Dinpuia pawh a rawn lêng zauh zauh a, tlangvâl fel tak a nih vàng hian kei pawhin amah beisei ni chuang lovin ka be chhe lo va, a hawihháwm viau bawk si a, tu tân pawh a ngainat loh theih loh, kawm dàn tâwk erawh thiam ka tum viau. Ka nihna ka hre chiang a, mi min en dàn tùr pawh ka hre ruak tho. Mipa fel tak leh hawihhâwm tak ni mah se ngaihzâwng lam ang chuan ka en duh lo hrim hrim, tumna lah ka nei lo bawk, a rûkin ka theihtâwp chuan ka invêng ve a, sawi lang lo mah se min duhin min ngaina tih ka hre ve tlat si a, keimah vànga a nat hi ka duh lo a ni. Tlangvâl fel tak a ni a, a milpui leh a phû tâwk hmeichhe fel leh nula dik tak neiin ngaizâwng se ka duhpui a ni.

Thingtlâng khaw lian a ni lo bawk a, zànah a lo lêng țhìn tih hriain school-ah ka thawhpuite hian Pu Head-a hriat loh hian min fiam ta zauh zauh a,"Engtikah nge kan tih huk ang?" tiin, kei erawh chuan,"A, in ti ang lo thei êm mai, nula pawh ka nih loh hi maw," tiin ka chhâng mai țhìn.

School kan țan ațanga thla hnih a ral hnu March thla laihàwl vêlah U Kimi chungchângah ka pate'n palai hmel an hmu ta a, U Kimi'n min rawn hrilh chuan," Ka lawmpui che, tunah chuan i duh tak i nei thei tawh dâwn si a," ka ti a, ani pawh chuan," Ni e, kei pawh ka lãwm asin; mahse, a châng hi chuan hlauhthàwnna ka nei leh thut țhìn," a rawn ti a, ka hriat thiampui reng mai, a hmain a lo tisual tawh a, a hun a han thlen dâwn meuh chuan hlauhthàwnna chuan a bei lo thei lo ang tih ka hria a ni.

"A fel êm kha, a nungchang a thlâk hlawk a nih loh chuan pasal fel tak leh rintlâk tak a ni ngei ang," tiin ka hnèm ve a, chu chu ka ring a, ka beisei tlat bawk a ni. Kei chu heti mai hì ka ni tawh a, kan unau vànduaina  ka han ngaihtuah chhuah châng phei hi chuan Pathian hi ka dem lek lek fo a; mahse, tunah chuan hlimna kâwl a êng ve leh dâwn țan e.

Ka nu leh pate pawh chuan hnial an tum lo va, U Kimi'n a hmangaihin pasal atân a thlang tih an hriat chian miau avàngin a hun thu pawh a hma thei ang ber an vawrh chhuak a, bâkah, an pahnih inkâr thu a ni bawk a, rei rial an tum hran lo. Kei pawh an inneih hun chuan chawlh ka lâk ve ngei chu a ngai ngei ang le, ka phûr tawh khawp mai.

Tlai khat school ațanga kan haw chu Pu Rina chuan a fate'n rawn zin an tum thu chu a sawi a, Pu Head-a chuan," A țhat chu, lo zin rawh se, i mákpa chu lo chhawr nghek dâwn nia, mâkpa tha chhawr theih lai hi chuan chhawr char char tùr," a lo ti a, mi dang chu kan lo nui mai a. Pu Rina chuan," A dik chiah mai, ni tin huan lamah chhuahtîr tlut tlut tùr a ni," a lo ti ve a, Pu Head-a vêk chuan," Thingtlâng nun dàn hi hriat chiantîr tum êm êm mai tùr a ni, dim duh hauh loh tùr," a ti leh a, kan ințhen darh ta hlawm a.

Kàwna car tlãn ka hmuh chuan Pu Rina fate chu an lo thleng tawh a nih ka ring ve ringawt a, a fanu chu a vànnei ngawt mai. A pasal nèn, a fate nèn, a nu leh pate bulah ngei, mahni khuaah ngei an rawn zin thei a ni si a, a nuam duh ngawt ang chu, hlim takin an chhûngkua chu an han inhmu khâwm ang a, kei ve kha, pasal ka neih chhúng khân hlimna ka nei lo va, hlim chu sawi loh, chhûngkaw inhmuh khâwm tih vêl phei chu... Ka lu chu ka thing nak a, ka lo ngaihtuah thui mah mah a ni, Bawihtea chuan min lo ko mawlh mawlh tawh a, a police car chu țhutthlèng hnuaiah a lo tilût daih a lo ni a, ka fapa min kohna pawh hrechang lova ka ngaihtuahna rama ka lo chêng veng veng chu ka inthiam lo khawp mai.

A tûk zàna kan in luaha Sam-a rawn lût ka hmuh chuan biak nachâng pawh hre lo lêk chuan ka lo en reng ringawt a, eñg nge a rawn tih dâwn ni? Engtik laiin nge a rawn kal? Ka awm tih engtin nge a rawn hriat?

"Helaiah te i lo awm ve nawlh a!" a rawn tih chuan," Nia..." nui deuh chung hian ban zetin ka ti a, chutah," Engtikin nge in lo zin a? In awm rei dâwn em?" ka ti chhunzawm leh a, Dinpuia lo lêngin, Bawihtea nèn ka țhutna piah lawka dawhkànah car lem an buaipui a, Dinpuia chuan min rawn en dùn reng tih ka hriat avàngin a pângngai thei ang ber tùrin ka inthunun a.

"Kárleh lamah kan haw ang, hna lam ngaihthah reng chi a ni si lo va," a ti a, țhutna ka kawhhmuh a, a țhut hnu chuan a han hawi kual a," I in luah chu a zia reuh phian hi, a nuam ve reuh khawp mai," tiin min rawn en leh vang vang a," Inhmuh lohna a lo rei tawh hle mai," a ti leh a.

"Nia tiraw? Lêng ve reng rawh aw, thingpui ka'n thli phawt ang e," tiin ka tho zui a, ani chuan," Hetah i awm tih țhianpain a sawi a, ka hre ve chauh alawm, khawvêl hi a lo zîm viau a lo nih hi, eng nge i thawhna chu a nuam bawk em?" a ti nghâl bawrh bawrh a, ani hi zawng țawng duh ve tak kha a ni hrim hrim a, a bula awm pawh kha a nuam viau țhin rêng a ni.

A lêng ve ta reng a, vànneihthlâk takin Chhanzuala chanchin chu a sawi chhuak ta miah lo va, Dinpuia a lêng ve reng bawk si a, sawi chhuak chiah ta se chuan hrehawm ka ti ngawt ang; mahse, mi ã a ni lo va, a țhianpa nèn kan inkâr a hre vek thovin ka ring bawk a, a sawi chhuak duh bîk lo chu ka lãwm hle a ni.

An chàm chhûng chuan a rawn léng zauh zauh a, a țhianpa phatsantu ni mah ila min ngei hmel leh min haw àwm pawhin a awm lo, chutih ahnêkin hlim takin min kàwm a, a țawng bawrh bawrh bawk a, chu chuan a lakah inkiltawihna min neihtîr zual a, Chhanzuala laka inthiam loh tawh nèn, min huatna a tilang duh miah lo hi a langah hlim viau angin lang mah ila chhûngril lam erawh a rûm vawng vawng thung.

U Kimite inneihna hmang tùr chuan Bawihtea nèn chuan Lunglei lamah kan chhuk leh ta a, inneihnaa hâk tùr kawr ka țhuitîr hman ve si lo va, ka lunghnûr ru khawp mai a; mahse, an inneihna tùr boruak hlimawm tak tihchhiat nãn erawh ka phal lo, pheikhawk erawh ka lei ta hrâm a, kawr erawh ka kawr hlui ka ha mai ang chu. Ka țhianteho chu ka sáwm ve vek bawk a, an rawn tel thei vek dáwn a ni àwm a, a tihzia khawp mai.

Inneihni chuan lawmpuitu mipui pawh kan tam khawpin ka hria, mitthlaah U Tluanga nèn an inneih lai kha a rawn lang uar uar a, boruak chu a inthlau viau mai. Khami kha chuan U Kimi hlim hmel kha a lem lutuk a nih kha, tunah ve thung  hi chuan a hlim tih a mitmeng nung sar ațang chuan a hriat theih a, hlim hmel siamchawp a pu lo tih a hriat ngawih ngawih. Rinnunga pawh hmuh a nuam e, a nui sâng reng mai, an naupang chhe zawk zawk lo dùn tawh bawk a, hei vang hian lawmpuitu pawh hi an tam phah a nih ka ring.

Lungleiah chuan Pathianni kan châm ang, a tûk Thawhțanni chawlh a ni hlauh a, a zia. Chàwl tam lo zâwngin chawlh ka la thei a, thawhpuite'n min hre thiam viau mah se a inthlahrunawm ka tih bâkah an zahawm ka ti a, zirlaite pawh ka khawngaih bawk. Ningàni leh Zirtàwpni kha thawhpuite'n ka class an lo hmui dâwn tihna a ni a, mahni class lâk zawh hnua mi class han kalsak leh chu, an zahawm thláwt, Thawhțanni erawh chawlh a ni ta hlauh a, kan haw chho ang a, chawlh mai mai ka tum tawh lo ang.

May thla a nih tawh avàngin khua a lum viau mai a, Inrinnia ka chhuak pawh chu lum ka ti ngang mai a, ka thaw a sain ka thlan dep dep maiin ka hria. Bawihtea pheikhawk enin ka kal kual nasa ve bawk a, a àwm viau mai, duh zâwng tê ka nei bawk si a. A tàwpah lungthlu lo zetin pakhat chu ka leisak ta hrâm, Pathiannia bun tùr a nei țha tlat lo va, nimin lama a bun pawh kha a tâwt deuh tawh a ni, pheikhawk nei nual mah se a tê hlawm deuh tlat tawh.  Ka lei fel hnuah a ei tùr cake ka lei leh a, chumi hnuah chuan chàwl tùrin restaurant ka pan ve ta thung a, fan thaw hnuaia ka han chàwl vang vang mai chu, nuam sawng sawng tak a ni.

Ei tùr ka nghah lai chuan," Dinpui?" tiin hmeichhe aw hian min rawn ko ta a, ka hawi chhuak vat a, kan inmelh dùn ta reng mai. A hnuah amah zâwk chu rawn nui chhuakin," Ka hai lek lek che a ni, i niin ka hre deuh a; mahse, ka chiang chiah lo leh deuh a, chuan, ka ko ta che a... i lo danglam ve tawh lutuk a," tiin a kut chu a rawn phar chhuak a, ka lo vuan vat a.

"Nang chu i danglam vak miah lo a nih chu, hmuh i nuam, i hrisêl țha tih a hriat bawk. Chuan, eng nge i lo tih? Hmun dangah i awm niin ka lo hria a," tiin ka bula țhutna chu ka kian a, a rawn țhu ve leh mai bawk a, kan inhmuh lohna a rei tawh hle a nia, min la hre chat thei chu mak ka ti zâwk, ka danglam ve viau tawh àwm si a.

"Kan pa hna lam thilah Shillong-a rawn kal a ngai a, Mizoram lama rawn pèn a remchâng ta êm  a, kan rawn pêng ta rih a nih hi, nimin tlai khân Aizawl ațangin ka rawn phei a, motor ka la rui zui a, ka che chhe tawp, ka muhìl char char a, chawhma lam zawng inah ka awm a, chawhnu lam chu chhuah harh pahin ka tia, ka rawn chhuak ve ta chauh a ni," a tih leh chuan," A nih tak chu, a va zia lo ve le, i rawn kal chhunah chuan nuam ti taka hmang tùr i ni asin le, khawiah nge i innghah a? Hotel-ah em ni?" ka lo ti vat a, ani chuan," Nau ka la nei ve alawm le," tiin a nui a, chutah," Zanin chu rawn lêng la, kan pa a awm lo va, ka free viau ang, chanchin zawh tùr che ka ngah bâkah hrilh tùr che pawh ka ngah a nia," a ti leh a.

Kum tam tak kan inhmu tawh lo va, hetia kan inhmu leh ta thut mai hi mak ve tak chu a ni, a nau nèn kan inkawpin ka phatsan a ni tih hre ta se eng angin nge a ngaih ang le? Ka chanchin tlêm tlêm hi chu a hriat tho ka ring, Chhanzuala nèn kan inbe ve zauh zauh ngei ang a, hrilh pawh a hrilh hial ang.

"Pasal i nei ve tawh em? Nge la nei lo? I nu leh pate pawh ka hmu châk mang e, châm rei deuh hlek thei ila ka ti hlê mai," a ti leh barh barh a, min zawhna chuan min tiharh deuh huai mai. Chhanzuala hian eng mah a hrilh lo tihna a ni chiang mai, a zia huai e.  

Ka ei tùr a rawn thlen avàngin ka chhâng ta lo, ei tùr rawn thlen rual chuan kan order belh leh a, a țawng siam siam reng a, a pasal fanute leh an awmna chanchin min hrilh ve a ni, hetia en mai chuan pasal fanau nei hmel pawh a la pu lo ka ti. Chhanzuala chuan a u rawn kal chu eng ang takin ngai ang maw?

"En teh, tûnlai hian Bawiha nèn in inhmu ngai em? Tlêm lai khân ti ila a rei tawh a nih chu, in inhmuh thu kha chu min hrilh ve ngei a; mahse, a rei tawh êm mai a, i hmuh hunah lo hrilh ve mai mai teh, nupui nei ve tawh tùrin, i nau ang tho a ni bawk a, a haw miah lo ang. Hmánah kha chuan ka hrilh duh ngai lo va; mahse, tunah chuan nupui nei tùrin a upa tâwk ve tawh a, bâkah, amaha a awm hi ka ngaihtuah ru ve tho a ni, chãwm thei dinhmunah a ding tawh a, nupui a neih chuan ka ngaihtuah lo sawt ang a," a ti leh daih a, min tiphu zawk lo chauh a ni.

"Keia sawi chu engah mah a ngai nâng," ka lo ti ve a, a rûk tak chuan nuam lo ka ti viau a ni, bialpa hluite nupui nei tawh tùra han hrilh chu, a tih chi loh ve êm asin.

"Ngai ang, ' Ka hrilh ngam che a, ka hrilh che a nih chu, i u pawh ngaihtuah ve la, nangmah chauha i awm reng hi a ngaihtuah dâwn êm che asin,' i ti ang a, keiin ka hrilh ai chuan a ngaipawimawh chein ka ring. A nih loh chuan, kan awmna lama hruai ve daihte hi ka duh a, amahin a duh phawt chuan, nupui tùr pawh a phû tâwk chu an awm ve ngei ang, nei thuai tùrin ka duh a ni, unau amah chiah ka nei si a, ka ngaihtuah lo thei si lo va," a tih leh chuan," Aw le, ka hmuh hunah ka lo hrilh ve dâwn nia," ka lo ti ve leh mai a, ani chuan," Zanin chu rawn lêng rawh aw, i ngaihawm, Awii, sawi tùr ka ngah lutuk! Rawn lêng phawt mai rawh, a in pawh i hre thei maiin ka ring, ka hrilh ang che," a ti leh sauh sauh a. Phone number kan inpe a, inbiak ngei intiamin kan ei tùr kan ei zawh hnu chuan kan ințhen ta rih a, kan ințhen hnu chuan Zawmdiki chu ka ngaihtuah chhunzawm rauh rauh a.

Zànah chuan min rawn be ta ngei a; mahse, fapa ka neih tawh thu leh ka chhuahsan theih loh thu ka hrilh chuan," A ni maw?!! Vawiin khân pasal i nei tawh ti khân min hrilh miah si lo va... I fapa chu ka va hmu châk tak! Zanin i theih si loh chuan naktûk lamah tal ti ila, i rawn lèn hman loh pawhin ka rawn tlawh ang che, Bawiha pawh ka rawn inhruaitîr mai ang, in awmna a hre tho ang tiraw?" a rawn ti leh bawrh bawrh a.

Hre kher lo maithei, hria pawh ni se a rawn kal duh kher lo ang, a ngêng ve êm! Bawihtea pawh su thlu duh kha a ni ve a, a mi huat êm êm kei, amah phatsantu fapa a nih vàng pawh a ni mahna le, ka thiam lo chuang lo; mahse, naupang, eng mah tisual ve lo chungah chuan eng thil mah ti lo se ka duh. A duh phawt chuan ka chungah ngei hian phubâ chu la mai rawh se.

A pawi lo, ka nute tlawh pahin duh leh lêng ve pah ila, Chhanzuala a lo awm kher bîk nâng, bâkah, Zawmdiki nèn kan inhmuh lohna a rei tawh a, helai meuhaa rawn thlen chhoh ve chuan tlawh ngei ngei ka bâ a ni, a rawn zin zâwk chhuah dû dû thu a awm lo, Chhanzuala vàngin tlawh ka hreh phah tùr a ni lo bawk. Kan chanchin a hre ve chuang lo va, nuam tih lohna tùr pawh a awm lo ang.

Ka chanchin tlêm chu ka hrilh hnuah chuan kan inbiakna chu kan ti tàwp a, lèn ngei chu ka ba ta a nih chu. Rawn lèn pawh a inhuam viau nain ka ngaihtuah cheuh cheuhin  thil mawi a ni tlat lo, țhian kan lo ni tawh țhìn a, kei a dinhmunah hian dingin amah hi ni ta ila, ka țhiannu chuan min rawn tlawh duh miah lo se mak ka ti ngawt ang.

Inkhâwm bànah chawhnu lamah kan va lëng ta ngei a, Chhanzuala in han luh leh chu ka hreh ru ve khawp mai a; mahse, ka tuang ka ti chhah lui ve a, ka thei ngei ang, engah nge ka huphurh ang tiin ka infuih a, ka lût ta nge nge a, vànneihthlâk takin Chhanzuala pawh ka hmu lo ve.

"I fapa hmel țhat reuhzia chu, a duhawm reuh lutuk! A pa pawh a hmel chhe lo chiang a nih hi," tiin a nui var var a, Bawihtea biangah chuan a piaisak a," Kei chu ka fate an lian tawh a, a naupang zâwk pawhin kum 10 a chuang tawh," a ti leh a,  kei chuan," I rawn hruai ve lo va, hmuh an châkawm tehlul nèn!" ka lo ti ve a, ani chuan," Nia, an zirna lam a buaithlâk a, rawn kal ve chu an châk lutuk," a lo ti ve leh a, Sofa-a kan țhut hnu chuan," Lo thleng chauh mah ula in tùr ka'n buaipui nghâl ang e," a ti a, a tho zui ta nghâl a.

Choka lama a kal hlan chuan ka hawi kual a, engkim mai chu a la ngai thlap tak si a, hun liam hnu kha a ngaihawm mang e, ani lah sâwn he inah hian ka lo tãl ve hrep tawh tih a hre àwm dér si lo, tuna kan țhutnaah phei hi chuan a nau nèn kan chesual țêp a nih kha, han hre ve phei se...

"Nangni nufa chu..."

Ka ngaihtuah ram ațanga harh chhuakin aw lo chhuahna lam chu ka hawi vat a, a room kawngkhar nghèngin a lo ding a, duhdah leh kàwi sàwi zeta dingin a inkuangkuah thãn thung.

A lo awm reng a nih hi.

*MI I SAWISÊL DÂWN A NIH CHUAN, I SAWISÈL HMA CHIAH KHÂN HE ZAWHNA HI INZÂWT HMASA PHAWT RAWH AW, SAWISÊL THEI DINHMUNAH I DING CHIAH EM TIH HI*