☆UNEXPECTEDLY YOU☆ - 29 By Dingdi Pachuau

 ☆UNEXPECTEDLY YOU☆ - 29 By Dingdi Pachuau

Bawihtea chuan min rawn țhut hnaih sauh a, ka en vat a, hmel ți deuh dai hian Chhanzuala chu a lo en reng a. Ka en chho ve leh a, Chhanzuala pawh chuan ka fapa chu a ni a lo melh ve tho ni, inngaina taka inen erawh an ang lo alawm, ngaina lo ang, pakhat tân lah a huat ber ka pasal fapa a ni miau mai si a.

"I chhuak dáwn emaw ti a... I duh ve nghâl dáwn em?" Zawmdiki rawn phei chuan a rawn ti nghâl phei lang lang a, kan in tùr chu dawhkànah chuan a rawn nghat zui a, Chhanzuala chu melhin," Ka rawn lâk ve ang che aw?" a ti leh a, ani erawh chuan chhâng lêm lo chuan a bu nghut ringawt a. Zawmdiki chu tho zui leh nghâlin," In r'u, a tui 'cial' tawp a nia," a ti leh a.

Kan piahah chuan Chhanzuala chu a țhu ve tlat mai a, nuam lo ka ti ru khawp mai. Ka tihna chhan erawh thil dang daih a ni, a uin ka chanchin min zâwt ngei ang a, a lo hre pha ngei bawk ang, chu chu ka duh tehchiam lo. He pa hi beiseina ka nei tawh lo va, beiseina chhan tùr lah ka nei hek lo, khati khawpa tinâa kalsantu kha, ani phei hi chuan min haw viau lehnghâl a, min beiseina lam phei chu, paih bo ang vang vang a ni tawh bawk ang.

Zawmdiki chuan ka chanchin chu min zâwt ta ngei a, chipchiar takin ka hrilh lo va, a tlângpui a sawi pawr pawr a ni mai. Ka pasal thih thu pawh a lo hre lo niin, Chhanzuala'n a lo la hrilh lo a nih chiah hi. Accident avànga nâ tuara boral a ni tih ka hrilh chuan min khawngaih khawp mai a, kei erawh chuan," Min boralsan mah se fapa țha tak ka nei a, ani hi ka chakna a nia, a lo piang hi ka tân vànneihna niin ka neihchhun liau liau a ni tawh bawk a," tiin Bawihtea lu chu ka han chûl a, ani chuan min rawn en chho ve a, duat tak hian ka nuih sak a.

A chanchin chu min hrilh ve zawr zawr bawk a, chutah," Naktúk tlaiah ka pasal chu a lo thleng phei ve dáwn a, in inhmu ve ang chu tiraw?" tiin nui deuh sâng hian min rawn en a, kei chuan," A nih chu, hmuh ve ka châk nèn, han hmu ve hman hlauh ila... mahse, ka hman loh chiah chiah hmel, ka hnathawhna lama haw a ngai leh tawh a," ka lo ti a, han hmuh ve pawh chu ka châk ve viau asin le.

"A va pawi ve  tiraw? Mahse, Pathian zârah kan dam ang a, inhmuhna hun chu kan la nei leh tùrah ngai ang, nakkum lamahte pawh kan pa hna thilah kan la rawn lang leh maithei a nia, dam lam hi han hauh phawt mai ila,"  a ti a, kei pawh chuan nui chung hian," Nia.." ka lo ti ve a. Kan ngawi deuh vang vang a, chutah, ka lamah a rawn thle hnai deuh a," En teh, Naua hi, bialnu a lo nei ve ngei niin; mahse, a bialnu chuan pasal a neihsan daih a ni àwm a, ka khawngaih reuh lutuk!" a rawn ti ta sar sar a. Phâwk zet hian ka en a, min hre chhuak ta emaw ka ti hial mai.

Ka meng phâwk deuh a niang, min nuih pah chuan a țhut pángngaiin a han țhu a," Nang pawhin mak i ti ve tho a ni maw? A inhmeh lo hi ka tia, a la na viau zui a," a ti leh a, a țawng chu Chhanzuala chuan a lo hria a ni ngei mai,"Ka chanchin sawi lo teh," a rawn ti ta chiah mai. Ani lah chuan," Kan rualin rawn chhuk ve mai rawh, nuam i ti dâwn ka tih tawh kha," tiin a chhãng lêt thung a, kei chu ka lo ngawi kar a, an unau inchhàn dàn chu thin phu dup dup chungin ka lo ngaithla a.

"Dinpuii pawh mi hrang a ni chuang lo va, țhian bâkah unau ang maia kan en țhin kha a ni a, a la ni reng bawk. Ani bula i chanchin sawi chu a pawi vak hleinem, nupui țha deuh nei tùrin ani pawhin a duhsak ve tho ang che chu, tiraw Dinpui?"" Zawmdiki'n a tih chuan ka en vat a, nui deuh chung hian," Nia... duhsak lo thei nâng," ka lo ti ve a, ka țawng chhuak chu pângngai thei ang ber tùrin ka aw chu ka thunun ve a ni. Chhanzuala chu a ngawi kur a, min rawn en phei ngeiin ka ring bawk; mahse, ka en duh lo.

"Ka inngaihtuah thei, min ngaihtuah suh u," a rawn ti ta nghut a, Zawmdiki chuan rang zet hian," Nangmah chiahin kawppui i nei tawh lo va, ngaihtuah loh theih i ni lo alawm, bâkah, mipa mahni chauha awm chu hmingchhiat pawh a awl bîk, kan rualin rawn chhuk ve la, kum hnih khat tal chu boruak dang rawn hîp ve teh, i duh phei chuan chu aia rei pawh chu i awm ang a," a lo ti leh a. 

Chhanzuala awm chhûng chu a thlêm reng a, a hnu deuhah Chhanzuala chuan a ning ta deuh nge ni, a chhuak ta daih a, a chhuah hnu chuan Zawmdiki chuan," Ngaihtuah loh theih hi a ni bîk si lo va, puitling ni ve tawh mah se ka nau kha a ni miau mai a, ka lo en nau leh deuh țhin," a ti zui sap sap a, kei chuan," A ni thei viau ang," ka lo ti ve a, Zawmdiki chuan," Min zui ve mai chu hnial lo hrâm se ka ti tak zet a ni, ka biaka chanchin ka zawh hian a țhat thu hian min chhâng ziah a; mahse, a hmel ka han hmuh chiah khân ka khawngaih reuh tlat a. Hmeichhe rinawm lo a lo tawng fuh ve bawk si nèn, pâwn lamah sual viau angin lang mah se a nun chhûngril hi a sual bîk lo va, mipa mah ni se mihring a nih miau avangin a rilru pawh a na ve thei tho bawk a, amah kalsantu hian a hre chiang tâwk lo a nih ka ring deuh ringawt a," a ti leh barh barh a.

A tûk chhùn thingpui in zawh hnuah kan nufa khaw lam pan chuan kan chhuak leh ta a, nimin chawhnu khân Sêntei, ka nute leh U Kimite ka tlawh chhuak vek a, Zawmdiki nèn kan titi rei deuh avàng erawh kha chuan mi dang inah chuan rei kan awm hman ta lo va, a pasal pawh chu hmuhpui duh viau mah ila tlai lam daiha rawn thleng tùr a ni si a, a ngaihna a awm ta lo a ni.

Kan in kan han thleng a, a lo reh țhap mai a, Lunglei lam ka hre chhuak vang vang a, khu lamah kha chuan 'reh' tih kha a awm ve lo va, bâkah, kan bulah țhenrual lainate an awm ve lât lât reng a, reh lai tak tak kha kan nei lo a ni.

Mahse, kan haw tih hriain Maduhite nufa an rawn lang vat a, thil kan hawnsakte chu kan pe ve a, Maduhi chu a awm rei hman bîk lo, kan haw tih hriain min rawn tlawh tak tak chauh a lo ni, eirawng a bâwl bawk si a, ka hre thiam, a tilàawmawm khawp mai, min rawn ngaipawimawh a. A  haw dâwn chuan Engmawia chu a haw ve duh lo va, Bawihtea nèn motor bawk a ni an khalh leh tawh ni, zàn lama rawn lam mai tùrin kan inthlah leh tâk kha. Anni pahnih hian khua an tihar lo ve a, pawh țhen hi ka phal lo țhin, an inngai ve bawk si nèn, ka fapa hian a ngainat êm avàng hian kei pawhin Engmawia hi ka ngaina ve viau rêng a ni.

Zanriah ei khamah chuan Rosanga leh Dinpuia an rawn lang a, Maduhi ni lova Rosanga lo lang zâwk chu ka han fiam a," Thaibâwih deuh hi chu a hriat a nia," nui var var chung hian ka ti a, Dinpuia pawh chuan min lo pui vatin," A lo kal lo ngam teuh lo mai, vìn deuh hlara Maduhi'n,' Va lam rawh,' a tih hmak tawh hi chuan... A ngaihna a awm lo," a lo ti ve a.

Rosanga chuan," Nangni pahnih chu, in inthurual hle mai, Țhiana lah hi tute emaw awm loh zàn apianga kan ina lunglênga kûr kûr si hi, an rawn haw tawh hi chuan uite vawih khum ang sawi ang mai hi a ni tawh țhìn a, chhuahpui loh theih pawh a ni lo, zanin pawh zanriah kan ei kham hma ațang tawhin min rawn tur tawh a nia," tiin Dinpuia chu a'n fiam lêt zat a, anni pahnih hi chu an inkàwm rei ve tawh bawk a ni, an inngam dùn a nia, zahthlâk deuh tùr anga an infiam pawhin zak angin an awm ngai lo.

Dinpuia hi a fel tih ka hria, Rosanga nèn hian an inkawp fuh a, an sual lo ve ve. Dinpuia nau mipa 'A sual' an ti pawh hi âwih a har zâwk, a chhan chu an chhûngkua ka hriatho hi chu an sual lovin an țawngkam a zaidam hlawm bawk si a, Pu Head-a ber hi a a aw hi a ring a, a lang zaidam lo zâwk a, mi dang hi chu an dam thlap mai a, an bula awm pawh a nuam. Pu Head-a hi zirtîrtu a thawh tirh ațangin he khuaah hian a la thawk ngar ngar a, Phaileng khaw chhuak hi chu a ni bîk lo va; mahse, 'Phaileng khaw mi' tiin an hre ve reng tawh dâwn a nih hi, an inbun nghet tawh êm mai.

Dinpuia lo hi inlêng nei ve zauh zauh mah ila Dinpuia an en dàn hi chu a dang deuh niin ka hria, Primary Head fapa a ni a, tlangvâl lehkha thiam leh fel tak a ni bawk a, tluk loh en hian an en deuhin ka hria, bâkah, tlêmin a lo upa ve deuh hlek tawh bawk a, mi dang hi chu min beiseia rawn lêng pawh an niin ka hre lo, Dinpuia erawh hi chuan țawngkamin sawi lo mah se a awm dàn ațang hian ka man thiam ve, ka khawngaih ru viau mai. Bawihtea hi a chhaih thiam a, ani pawhin a ngaina ve viau bawk a, amah chauha a rawn lèn châng phei hi chuan keimah nèn hian kan inkàwm tam lo záwk, motor a khalhpui loh leh thawnthu an inhrilh a, ka lo ngaithla ve țhìn. Naupang a ngaina ve a niang, an ngainat theih dànin a awm thiam êm mai.

Mahse, kei hian ngaihzáwng angin ka en thei lo. A fel ka ti thlâwt, tlangvâl hnahkhat leh lehkha thiam lehnghâl, ka phû hauh lo tih ka hria, a dinhmun leh ka dinhmun ka han khaikhin phei hi chuan ka tla vawng vawng mai a ni; mahse, ka tihsual tawhna leh ka dinhmun ațangin mipa dang hi melh thei niin ka inhre lo va, hmangaih dang neih leh hlauh phei chu. Nuthlawi niin fapa enkawl tùr ka nei lehnghâl a, hei hi ka tih hmasak ber tùr a ni.

Zan khat a rawn lêng chu,"Naktûkah Lunglei ka kal dâwn a, mamawh min chah duh i nei em?" a rawn ti a, Bawihtea nèn dawhkàn chungah motor an khalh dùn leh tawh a, kei an bulah țhuin naktûk lama naupang zirtîr tùr ka en lâwk mêk a ni. A rawn lêng ngun a, inkawm tak tak ang leh inlêng mi tak rùn angin a awm ngai lo va, Bawihtea nèn an infiam châng hian kei pawhin an bulah thil dang pawimawh ka lo ti mai zêl.

"Eng nge i tih dâwn a?" ka ti vat a, ani chuan," Ka patea Aizâwl ațangin a rawn phei a, kan inhmu lawk dâwn a," a lo ti ve mai a. Mamawh ka neih rih loh thu ka hrilh chuan," I inthlahrung a ni maw?" a lo ti sap a, ka en vat a, thutak hmel zeta min lo en ka hmuh chuan," Kan nufa mamawh hi a tam lêm lo va, kan rawn haw chhohna a la rei lutuk lo bawk nèn, chah tùr che ka nei lo tak tak alawm. A làwmawm ka ti lutuk, ka inthlahrung hauh lo," ka lo ti ve vat a.

A tûkah school-a Pu Head-a titi ațang chuan Dinpuia Lunglei kal chhan chu ka hre chiang lehzual ta a, a patea hian Aizawlah sumdàwnna lian ve tak a nei a, nupui neiin fa an nei thei si lo va, a patea chuan Dinpuia chu a sumdàwnna enkawlpui atân a duh a, hmaichhan ngeia biak a duh avàngin a zuk kal ta a ni. Heta rawn kalchilh mai pawh a duh a; mahse, hun a chêp bâkah an nu lo dam țha lo ve bawk nèn, hman a inti ta ngang lo va, hman zâwk Dinpuia'n a zuk kalchilh a nih ber chu.

"Ka unaute hi thil dangah tluangin malsàwmna dawng viau mah se fanauah hian an tluang lo tlat mai a, ka chhang chiah pawh hian a nupui nèn fa pakhat chiah an nei thei a; mahse, ani chu a vànnei ka ti dáwn nge, an nu khân nulât fa a lo nei hlauh a, pahnih an nei tihna a nih chu. Kan tê ber, tuna Lungleia rawn kal hi chu a vànduai a, a nupui nèn fa an nei thei tlat lo, hmunpui lamah pawh an kal fo tawh nain Pathianin rem a tihsak lo nge ni, tûn thleng hian an la nei thei lo va, upat pawh an upa ve ta, ka khawngaih țhìn," Pu Head-a chuan a ti sup sup a, Pu Rina chuan," A lo nih tak chu, an khawngaihthlâk hle mai, fa nei thei lo chuan fa neih châkawmzia leh fa neih theih hlutzia an hre chiang ber ang chu," a lo ti ve a, Sir Puia ve thung chuan,"Mihring hi chu kan inang lo thei teh asin, fa neih châka fa awt ngawih ngawih an awm laiin a țhen lahin fa neih tam duh lovin an han insiam a, an han indang bawk a, kan inang lo teh tak e," a lo ti a.

Dinpuia rawn haw chuan Bawihtea chu cake 'cial' deuh tak a rawn hawn a, Rosanga'n a lo hmu ve bawk si a," Naute tân tiin a chhuanlam mai mai a nih kha, a rawn hawnsak tak chu a nu zâwk a nia," a lo ti a, kei chuan,"Ni ve bawk ang chu, bâkah, naute chuan amah chauh chuan a ei zo thei dâwn chuang lo va, ka ei ve tho tho a ngai alawm," ka lo ti ve sawk sawk a, ka nui pah bawk a,  Dinpuia pawh chuan," An  nufa tân ka hawnsak a, an ei ve ve thei," a lo ti ve dút dút a.

A Lunglei kal chanchin chu ka zâwt a, ani pawh chuan țha takin min chhâng ve mai bawk a, thlaleh ațang chuan Aizawl lamah min liamsan tawh dâwn a nih àwm chu. A awm loh chuan a reh ngawt ang, ka inlêng ber a ni si a, khua a tihar ve rawih dâwn a ni.

"Mahni khua tluka nuam hi awm lo mah se thil țûla chhuah ve fo hi a ngai lo thei si lo va, khaw lam ngaih a na duh khawp ang. Peih lo dáwn viau mah ila ka patea hnial chu ka hreh ve a, bâkah, min duat ve bawk si nèn, ka kal hunah chuan in nufa hian ka ngai ngawt ang che u, nanga tân chuan thawven huaina a ni thung ang," a ti sap sap a, Rosanga a haw tawh avàngin min țhut hnaih ve viau a, țawng pawh a țawng ring lo.

"Kan nufaa min kàwm hlimtu ber i awm loh chuan khua a har ngawt ang," ka ti ve a, ka ti tak tak bawk. Ani hi a awm loh chuan kan khua a har dâwn tih ka hria, kan inlêng neih regular ve ber a nia, chêt dàn ngeiawmin a awm ngai lo va, a fel êm êm reng a, Bawihtea lah a kàwm thiam si, a awm loh hunah chuan a reh khawp ang.

Hun a ral a, ni a ral a, thla pawh a ral leh dâwn ta mai. Dinpuia Aizawl phei ni tùr pawh a lo hnai ta, a phei dâwn zànah kan inah thlahna hun kan hmang a, mi dang vak kan awm chuang lo. Chhang kan kang a, kan ri ve chèl chúl tho mai, kan titi a, fiamthu kan thawh a, kan nui bawk a, Dinpuia nui hmel phèna a hlim lo hmel chu ka hmu thiam a, tlangvâl phanchang lam ve tawh a ni a, inhmeh lo ka ti deuh hlek a; mahse, mihring rilru hi a inang lo êm mai a, ka hriat thiampui deuh, mi lunglêng thei tak a nih ka ring ve ta bawk, Rosanga sawi kha a ti mai mai țhin a nih ka ring a nia; mahse, ka ringhlel ta miah lo mai.

"Tûn țum tluka kan khua chhuahsan ka hreh hi a la awm lo, ka patea ka lo hnial mai lo kha ka inchhîr ta rum rum mai ka ti," a tih phei chuan a khawngaihthlâk zâwk ka ti, a peih loh ve hmel sia. Rosanga lah chuan," Kha maw, i ţap ringawt ang e, țap thlèm hi ka thiam miah lo a nia," nui chung hian a lo ti a, Maduhi chuan," A hun lai alawm, țap bawrh bawrh rawh," a lo ti ve bawk a, Dinpuia chu a zak leh deuh si a niang," In ninawm, nangni nupa hi chu ka ngai lo phawt ang che u," a lo ti bài bái a, Rosanga lah chuan," Keini chu min ngai dãwn lo tih hi kan hre chiang alawm, kan phüt chuang lo bawk che, ni lo'm ni Darling?" tiin Maduhi chu a'n nghawk deuh salh a, ani pawh chuan,"Phût nâng, a rilru kil sîrah pawh kan lang pha lo bawk ang," a lo ti ve a, an fiam reng mai a, boruak pawh an tinuam fû mai.

A tûk zàn ațang chuan a hriat nghâl ta hle mai. Bawihtea nèn chauh kan awm a, a reh țha khawp mai. Zan danga motor khàla ri deuh rum rum țhìn kha a nih ve nèn, zanin chu chutiang awm lovin ka bul chêtah a awm a, lehkhabu ka en loh chu a lo keu a lo keu ve a, ngaihtiah duh lo viau mah ila Dinpuia chu ka hre chhuak vawng vawng mai. Zàn tin deuhthawa rawn lêng țhin kha a ni miau mai a, a han reh ta rawih chu a àwm a, hriat chhuaha ngaihtuah loh theih pawh a ni lo tlat a ni.

Vànneihthlâk deuhin U Kimi pawh a ruak lo a lo ni a, min rawn hrilh chuan ka nui var var reng mai, ka hlimin ka lawmpui tak zet a ni, a upa chho deuh deuh a, fa nei thei lawk lovin a awm reng ang tih ka hlauhpui deuh kha a ni a; mahse, tunah chuan rilru hahna pakhat a kiam ta, ka nute pawh an lãwm ngawt ang chu.

Dinpuia pawhin min rawn be zauh zauh a, kan nufaa min ngaih thu tih loh chu thil dang tehchiam a sawi ngai lo, ka khawngaih ru ve reng mai.  'Mi fel tak i lo ni kher kher hi chu aw' ka ti ru vawng vawng țhin, a chhan chu eng mah min hrilh lo mah se min beiseiin min duh a ni tih ka hre ve tho si a, chu chu min han hrilh ta chiah se chuan ka chhâng lêt ve thei dâwn si lo va,  chuvàng tak chuan ka khawngaih a ni. Kei zawng, hetiang lam hawi leh thei hi ka ni tawh lo va, fapa enkawl tùr ka nei a, ani bãk hi thil dang ngaihtuah ka tum lo, chu chu ka thu tlûkna a ni tawp mai.

Zirtàwpni zàn a ni a, a tûk class kal loh ni a nih vàngin ka indah ãwl ve a, Bawihtea chu ka infiampui a, a tih ang ang chuan ka awm a, a hlim khawp mai a, a țê rawi rawi mai. Chutah, kawngka kik thãwm a rawn awm a, ka lo chhàwn vat a, Bawihtea motor chhuata darh deuh niai pawh chu ka dah khâwm zui bawk a.

Kawngkaa rawn lût ka hmuh chuan ka ding zawt a, phûng hmu ang mai ka nih ka ring, hetah eng nge a rawn tih? He khuaah hian eng nge a rawn tih dâwn?

"Ramhuai hmu ang mai! Ramhuai ka ni lo a nia."

A țawng ri-ah chuan ka harh chhuak zawk a, ka enna mit la sawnin ka inher zui ta vat a, he pain min la tihdanglam hnehzia hi a mak a ni.

"Eng nge i lo tih dâwn?" A hmuh loh turah chuan ka ner sawk a, chutiangte zawh rêng rêng, mãwl leh lutuk mai, ka rin loh lutukin ka hmu thut a, min ti ã vek alawm le, ka awm dàn chu a hai lo ve chiang khawp ang le.

"Ka rawn lëng."

A awka chhuaka nuihzatna ri tel chu ka hre reng, kha, min nuihzat leh tawh a ni. Ka inthunun theih ve tawh tehlul nèn, zanin chu ka rin loh lutukin a hmel ka hmu thut a, ka buai vek a ni.

"Țhu rawh... eng nge Phailengah hian i rawn tih dâwn a?" ka ti leh a, chhûngte a nei àwm tawp si lo va, a rawn kal chhan tùr àwm ka hre lo a ni. Keini nufa hi min rawn kal chhan lo tawp ang, min diriam tur leh min hmusit tùr zâwkin em ni a rawn kal? A u kha a zui ve daih ka lo ring asin.

"Ka rawn zin ve maw le, eng nge, rawn zin ve i phal lo em ni?" tia min chhàn chuan," Phal lohna tùr a awm hleinem... I u kha i zui daihin ka lo ring a," ka ti a, ka thil sawi chhuah kher kher chuh, ka inchhîr kher mai, ka sawi zo vek tawh si, ka lo ngaihtuah zui a ni tih a hre dâwn ta, ka inpuang a ni ringawt alawm le, ka insehruh a.

"Min lo ngaihtuah zui a ni maw?" a rawn ti ta chiah rêng a, a hmuh loh lamah ka țhen sak ringawt. Ka țawng chhuak fuh lo lutuk chu ka inngei ru khawp mai, ka inhau ry mawlh mawlh a, awmzia lah chu a awm tawh dèr si lo va.

"Thingpui i duh em?"

"Beer i neih hmel si lo va, thingpui chu ka lo in poh mai a niang chu," tiin min chhâng a, thingpui siam tùrin ka kal zui nghâl a,  chutah, Bawihtea ka bula rawn kal ve dat dat ka hmuh chuan Bawihtea rêng rêng ka lo hrechang tawh lo tih ka ngaihtuah chhuak leh chiah. Engtin nge ka fapa hi ka lo theihnghilh theih ni? Zanin chu ka chiang lo tak zet a ni.

Thingpui ka pêk hnu chuan Bawihtea chu ka pawm a, amah hlat deuh hlek chuan ka țhutpui a, chu chu a hmuh chuan za lo zet hian a nui hawk a," Min hlau chu a ni êm lo maw?" a ti phawt a, chutah, sawi zawm lehin," Khawnge mi dang hi ka va hmu lo ve?" a ti leh a, a ngaihna hre lo zet hian," Tu mi dang maw?" ka lo ti a, ani chuan," Tlangvâl inlêng maw le, i nei țhìn ngei ang chu," a ti leh a.

Ka chhâng peih tawh lo, a ngaih ngaihin ngai rawh se, Bawihtea lah chuan Chhanzuala chu a hlau a nih ka ring, min kuah chãih chãih a, Chhanzuala lam pawh a hawi duh lo. Naupang pawh hian anmahni ngainatute leh hawtute hi chu an mitmeng leh awm dàn ațangin an hai lo tawp a nih dâwn hi.

"Eng nge i lo tih dâwn tak tak a?" ka ti leh daih a, Sam-a nupuite inah khân a innghat a ni ngei ang chu, eng thil nge maw a rawn tih dâwn ni?

"Ranngo ka rawn zawng maw le, nupui ka neih i duh thu kha i sawi a ni lo'm ni? Tihhlawhtlin ka tum maw le," a ti a, thingpui chu a in hlak a. Zawmdiki bulah khân ka sawi ve ngei mai a; mahse, a chungchângah hian inrawlh tumna ka nei lo va, nupui a neih leh neih loh pawh chu a thu tlûkna a ni, a thu thu a ni e.

"I thu thu alawm, sawi theih ka nei lo," ka ti a, ani chuan," A dik, nang pawhin i duh chuan pasal i nei mai a tiraw?" a rawn ti leh sak mai a, a thil rawn sawi dàn chuan mei a nei chiang hle mai, min demzia a rawn tilang leh a ni.

*RILRUA BEISEI LÂWK, THLIR LÂWK KAN LO NEIH VE SI, A LO THLEN DIK SI LOH HIAN KAN NA ȚHÌN A NI*