☆UNEXPECTEDLY YOU☆ - 30 By Dingdi Pachuau

 ☆UNEXPECTEDLY YOU☆ - 30 By Dingdi Pachuau

He pa hi ka ngei lo va, ka haw lo va, a țawngkam chhuak hi ngaihthlâk nuam lo angin lang țhìn mah se ka hre thiam tho, min tih anga tih lêt hi ka tum lo, a lakah hian ka inthiam thei lo va, a tih ve theih tâwk a ti-ah ka ngai mai.

"Pu Rinate inah em ni i innghah a?" tiin thil dang chu pángngai takin ka han zâwt ta daih a, kei hi chuan pángngai takin ka be zêl ang. Min rawn melh rulh pah chuan," Tu nge Pu Rina pawh ka hre nek lo ve!" a rawn ti ve thung a, min chhàn dàn leh a hmel chu inhmeh ka ti ngang mai a, kan boruak hi pángngai tak ni se chuan ka nuih nasa ngawt ang chu; mahse, kan tûn boruakah hi chuan ka nui ngam lo hrim hrim.

"Sam-a puzawn kha Pu Rina chu a nia," ka tih chuan," Chutiang pawh ka hre ve lo. An inneih nîa ka biak dâwn lai chea rawn ko hrangtu che kha hetah hian a la awm em?" a lo ti thung a, ka han ngaihtuah lét a, khami ní khân ani nèn hian kan inhmu ngei a, ka biak dâwn lai takin Dinpuia'n min rawn ko ta a nih kha.

"Eng atân nge i tih?" ka lo ti thung a, ani chuan," Ka biak theih loh phah che a nih kha, polite loh thlâk lutuk!" a ti leh hluk a, kei erawh chuan," Nangman min bia tih a hriat loh vàng a nih kha," ka lo ti leh a,  rum zeta min rawn melh pah chuan," I țan a ni maw? A țha e, ka hmuh hun chuan a châk lo ang maw le," a ti leh bul bul a, Bawihtea chu ka en chhuk vat a, min rawn melh chho ve kar a, ka nuih sak a.

"I țawngkam kha uluk ve deuh la aw, ka fapa kan bulah a awm hi," dam deuh tak chuan ka ti a, ka fapa bula ka țawngkam hman ka uluk țhin avàngin țawngkam mawi lo, eng emaw hlek a hriata hman pawh hi ka duh lo a ni.

"Ka fapa..." nûr nang chung hian a ti hrãwk a, chutah, a ngawi leh ta daih a, ka en ru reng a, a hmui chu a pet fan fan a, 'Ka fapa' tia ka sawi kher kha a thin a rim a ni ngei ang chu, chutah, a thil sawi vàngin ka la khak hlak zui a nia, pài daih harsa chu a ti ve țalh țalh ngawt ang.

In chhûng chu a reh tlawk tlawk a, pâwn lama zàn lama hrãm chi rannung hrãm rî erawh hriat tùr a awm thung a, Bawihtea chu ka han en a, a mut a chhuak tawh a ni ngei ang, a meng khup deuh lap lap tawh a, vawiin lamah a tãl chàu deuh a ni ngei ang.

"Thil pakhat chiah ka sawi tawh ang, zawhna hnuhnung atân : Engtin nge Romeo-a kha Juliet-i khân a phatsan theih? Chu chauh chu, ngun takin ngaihtuah rawh. Inhmangaih tak leh hlim tak khân hun kha an hmang dùn țhin niin kei chuan ka hre si a, Romeo-a khân a hmu châk a, ngai leh hmuhhlan nghâkhlel êm êmin a zinna aţangin a rawn haw a, a rawn haw kawng tluanin Juliet-i bâk a ngaihtuah lo, a hmuh hun tùr mawlh a ngaihtuah a, a suangtuahna ramah chêngin rilru hlim takin, an hma hun tùr suangtuahin a rawn haw a; mahse, a suangtuah phâk loh thil chuan a rawn dêng ta si, a nun tihchhiatin a awm phah asin, phatsan a nih chhan kha tûn thleng hian a la hre chhuak lo, i hriat ngei ka ring," a ti ta chat chat a, a țawngkam tin mai chu a sawi mai mai lo tih a hriat a, a thinlung chhûngril ber ațangin a sawi chhuak tih a hriat viau bawk.

Kan chungchâng a sawina a ni. He hun hi a lo thlen ka ring rêng a, chhàn dàn tùr erawh ngaihtuah chhuah thiam har ka ti țhin a, 'a hunin a rawn hril mai ang' tiin ka ngaihtuah țhìn a nih kha, tûn hi a hun chu a ni ta, ka țawngkam hman ka fîmkhur loh chuan ka tina nawn leh dâwn tihna a ni, tunah pawh hian a chhûngril hi a la dam lo nasa mai si a, fîmkhur taka ka chhàn chu a ngai a ni.

"Mihring tu pawh mai hian kan nunah hian kan lo suangtuah lâwk loh leh kan ngaihtuah phâk loh hi kan tawng vek a, chu chu Juliet-i pawh khân a tawng ve a ni, chutiang chuan ka chhâng mai ang che," ka ti ve ta a, a lo dawngsawng thiam ang em chu ka hre lo, min zawh nawn tawh loh hrâm erawh ka beisei.

"I chhàn dàn chu ka hre thiam lo, kha aia chiang khân i sawi leh thei em?"

Ka hmui chu ka pet fan fan phawt a, chutah," Thil kal tawh sawi chhuah hian awmzia a nei tawh lo va, thinurna leh lungawi lohna bâk a rawn thlen lo ang. Chuvàng chuan duh tâwk mai ang hmiang," ka ti ve ta thung a, sawi chhuak vekin hun kha koh kìr leh theih vek dáwn chu ni se chuan sawi chhuah khân awmzia a nei mahna...  Sawi chhuah chu sawi loh, ngaihtuah chhuah leh pawh hi ka duh tawh lo asin.

"Hei chen hi záwt tùr chein ka rawn kal vang vang a, chuti chauh chuan maw min chhàn dáwn a?" muangchânga rawn dâk chhuak chung hian a ti nghut nghut a, ka mit chu ka khap fak fak a, a hmelah chuan eng mah tilang lo mah se a lung a awi lo tih erawh ka hre tho.

"Chumi min zâwt tùr chuan maw i rawn kal a?" ka lo ti ve thung a, za lo zet hian a nui hawk a," Awmzia a awm lo," tiin a lu chu a thing nak bawk a, chutah, ding zui nghâlin," Nang chuan hlimna tùr fapa i nei a, țha takin enkawl mawlh ang che, kei hian eng nge neih ka neih ve? Lâk bosak vek ka ni a, min tichhe vek bawk!" sehchilh deuh nak hian a ti leh a, a insehruh danah a thinlung nâ chu tihlan loh tumin a insúm nasa viau a nih ka ring.

A chhuah hnu chuan a reh tlawk tlawk mai. Tunah chuan ka duh loh thil bawk kha ka tinawn leh ta si, a rilru ka tina thar leh a ni, ka thil tawn kha ka hrilh thei si lo, ka fapa pa hian ka duh lo chung min tilui a ni tih hrilh chu ka duh hauh lo, he thil hi zawng... ka maimichhîng a, kan nunhlui chu ka mitthla suangtuahnaah chuan a rawn lang thar leh ta chuai chuai mai, a rilru ka tihnatzia kha, khatiang tluk zet khân kei pawh kha ka na ve tho asin, hlim nî ka nei ngai lo a nih kha. Ka biang chu a rawn lum thla pap pap a, ni e, a phû a ni, a tân ka mittui hi tla zawih zawih mah se a àwm viau a; mahse, chu chuan a natna tawrh ka tihnêpsak thei chuang lo tih ka hria. 

Ani tân chuan phatsantu dik tak ka ni a, a tân pawm leh theih ka ni ngai tawh dâwn lo. Tinatu leh phatsantu chu tuin nge pan leh ngai? Mi ã ber chauh lo chuan a pan lo tawp ang, kei chuan a tân hian thil țha ber ka la duhpui fan a, ka thih nî, thlàna ka taksa a liam nî thlengin chu thil chu a pângngai reng ang. Ani ka hmangaihna hi a chuai lo a, hun kal hian a tikiam hek lo; mahse, he thil hi chu a hre hauh lo thung ang, a tân ka thi tawh a, ka tân lah ngaihtuah phák ngam loh a ni bawk. Tihian, a sawi ang khân ka fapa chauh hi ka neihchhun a ni tawh a, ani nèn hian dam chhûng nî chu kan chhiar chho dùn tlauh tlauh mai ang chu.

School lamah Pu Rina chuan Chhanzuala chanchin chu a sawi chhuak miah lo va, mi dang bula a sawi chhuah chuan min fiam min hlauhthàwnpui ve pawh a ni mahna le, Dinpuia a lo lêng ve țhìn bawk nèn, han sawichhuak chiah se chuan min fiam nasa dâwn êm asin.

Fùr hunpui a rawn inher chhuak leh a, thingtlâng lamah hi chuan fùr hi ka lo ngaina hran miah lo tih ka hre chhuak, a chhan chu in bul hnai a hnim chak nasa mai si a, thlawh thuai thuai loh chuan rannung mi seh thei chi leh rûl lam an rawn kal ka hlau a, ka buai phah ve viau a ni, rûl leh vangvat lah hi ka hlauh ber ber an ni bawk si nèn, tlai ni tla tùr erawh mawi ti viau mah ila, fùr hun chu liam thuai thuai se ka ti ta viau mai a ni. Bâkah, ruah a sùr chuan Bawihtea ka ngaihtuah lo thei lo va, lo awmtu awm țhin tho mah se ka ngaihtuah zual tlat zêl.

Dinpuia pawhin min rawn be reng reng a, sawi tùr a hre lo viau țhìn erawh ka khawngaih zâwk, ngaihawm min tih thu lo hi chu sawi tùr a hre thláwt si lo va, a hna chungchâng zâwtin ka sawipui zâwk țhin a, chuti chu ni lo phei se chuan minute khat lek pawh min biak dàn tùr a hre lo ang ka ti. 

Bawihtea pi a dam țha vak lo va, ka pa min rawn hrilh a ni nghe nghe a, Bawihtea nèn an in-video call laiin a rawn sawi a, ka ngaihtuah rilru khawp mai. A upa ve tawh a, bâkah, Zda boral kha a tuar viau a, khata țang khân a hlim lo țan a, Bawihtea rawn piang chhuak khân a boruak kha a rawn tidanglam êm zâwk a, chuti ni lo phei se chuan a nun ram a chau tawh ngawtin ka ring.  A hnuah keimah zâwkin ka pa chu zuk be țhain ka nu chanchin leh a awm dàn chu ka zâwt chiang a, inentîr rang tùrin ka zu ti ve tawp bawk a. Ka nu lah chuan,"Kan bulah awm ula chuan ka zia sawt ngeiin ka ring," a lo ti zauh a, ni e, a dik ngeiin ka ring, a chhan chu Aisami awmpui mah se ani chu inah a awm reng hman lo va, class kal ve reng a ngai bawk si nen, ka ngaihtuahna chu a vâk thui khawp mai.

Ka pa chuan," Lo ngaihtuah suh, ràl ațang phei chuan inngaihtuah a na duh si a, chutia na viau pawh a nih loh hi. Lungleiah hi chuan han ràwn mai tùr ka hre thiam lo deuh a, amahin a inhuam chuan hmunpui lam nge nge chu a țha zâwk tùrah ka ngai a," a ti dap dap a, kei pawh chuan," A țha lutuk, ka nuin a zuam phawt chuan kei chuan a hma thei ang bera check kha țha ka ti a ni, natna hi chu hriat chhuah thuai thuaia enkawl thuai hi a țha, a hnuah  kan buaipui leh tho țhin si a," ka ti ve a.

Ni tin mai chuan ka nu chanchin chu ka ngaichang reng a, ka pa nèn kan inbiak ațanga ni thum níah chuan Aizawl lam pan chuan an chhuak ta nghe nghe a, ka nu chhang chiah fanu Bialtei an hruai tel bawk a, tlëmin ka ngaihtuah lo deuh, doctor chuan a natna chiang takin lo hmu chhuak se ka ti tak zet a ni.

U Kimite leh Sênteite nèn pawh kan inbe reng a, kan inbiak chânga U Kimi aw chhuak zãngkhai tak leh hlim nui ri chu hriat nuam ka ti țhin, Rinnunga'n a duatin a enkawl thiam viau a nih ka ring, a chanchin ka zawh pawhin a rawn fak thei khawp mai a, hlim takin a chanchin chu min hrilh țhin. An inhmangaih dun thu leh an hlim dun thu chu nuam ti tak hian min hrilh siam siam țhin a, a nu (Rinnunga nu) pawhin a duat țhinzia chu sawiin a chunga Pathian țhatzia a sawi lang ngei ngei țhin bawk. Chutiang a sawi chhuah chuan ka chunga thil thleng kha ngaihtuah chhuakin ka chunga Zda nu leh pate felzia ka ngaihtuah ziah bawk, anni tluka an fa mo duat hi an awm thei kher ang em? Mo ang pawhin min en lo, an fanu dik tak angin min en tak tak a ni. Mi sual tak ni se, heti tak hian an chungah ka țha thei bík ang em? An țhatna hian min hneh a, an chunga țha lo thei lovin min siam a ni, țhat leh țhat a inlàwm hian nun chu a lo nuam ber mai.

"Nizàn chu Chhanzuala a rawn lang ve nawlh a," Sêntei a rawn tih chuan," Tlangvâl a ni ve a, nula inah chuan a rawn lêng ve ang chu," tiin fiamthuin ka lo chhâng a, ani chuan," Chutiang lam pawh a lang lo, a hmel a khem nuan maiin ka hria, insualnaah a tel lehpek a ni ang," a rawn ti thung a, fiamthu chuan ka chhâng chhunzawm lo khawp mai.

"A rui em ni?" ka tih chuan," Ruih pawh ka hre lo, a rawn lût a, ka lo be vat a; mahse, a ngawi deuh reng a, chutah, i chunga thil thleng ka hriat leh hriat loh min zâwt leh a, a ngaihna ka hre lo khawp mai a, i chungah eng thil emaw chu thleng se ka hriat ngei ka ring bawk sia, eng thil mah a thleng lo tiraw?" a rawn ti leh a, kei pawh chuan," Thleng lo," ka lo ti ve mai a.

"Ka hriat loh thua ka chhàn chuan ngawi rengin a chhuak leh ta mai a, a awm dàn chu mak ka ti angreng khawp mai a, rawn biak nghâl che ka duh viau nain thil pawimawh tak a ni mang si lo va ka ti deuh a, tukin erawh chuan ka rawn zâwt ta che a nih hi," a rawn ti leh a, kei chuan," A nih tak chu," ti ringawtin ka chhâng a.

"A chungchâng hi eng nge i ngaih dàn? Ka hmuh châng hi chuan ka khawngaih ve țhin a, a hlim hmel hmuh tùr awm lo leh...A, sorry lutuk, eng nge maw ka'n sawi chiam chu le, thil țangkai lo lutuk," a rawn ti niah niah a, kei chuan," A khawngaihthlâk alawm, amah tinatu ka ni a, phatsantu tenawm tia a hriat reng tùr ka ni tawh bawk. Nang tal chuan a theih hrâm chuan ngaihven hrâm hrâm rawh khai, khawi laiah emaw a lo tlu sual mai mai ang e, ngaihsaktu laina pawh a neih loh kha," ka ti a, chu aia thui chu ka sawi thei tawh lo, a malzia ka han ngaihtuah chhuah leh phei chuan ka natpui ngawih ngawih si a, ka tân lah ngaihtuah phâk rual a ni tawh lo va, ka ngaihtuah lah a duh hek lo ang, a tân chuan phatsantu tenawm ka ni miau si a.

Ka nute pawh an rawn haw phei leh tawh a, boruak dang a han hîp hrim hrim chu a zia phah niin ka pa chuan a rawn sawi a, ka lãwm khawp mai. Doctor chuan ina inkhung lova khawi lai lai emawa zin chhuak zauh zauh tùrin a lo ràwn bawk a, ka pa chuan," In awmnaahte khân kan la rawn zin lo ang tih a sawi theih miah loh, doctor-in zin zauh zauh tùrin a hrilh bawk si a," a rawn ti a, kei chuan," Lo kal hlauh teh u, a nuam êm asin, ka nu chuan nuam a ti viau ang, nang tak pawh khân nuam i ti ve tho ang," ka ti ve a; mahse, fùr hun hi han liam phawt se, kawng pawh a zia leh deuh tawh bawk ang a, an tân pawh a nuam zâwk ngei ang.

Ka nu ka ngaihtuah ve avàng chuan hun remchâng hmasa berah Bawihtea nèn chuan Lungleiah kan chhuk leh ta a, inbe reng reng țhin mah ila hmaichhana inhmuh tluk hi a awm si lo va tiin, in kan han thleng a, ka rin aiin ka nu chu ka hmu zia viau mai, Bawihtea a han hmu chu ngai tih hriat tak hian a han pawm vawng vawng a, a mittuite chu a tling kiau a.

"Bawihtea nufa hi ka lo ngai ber mai a nih dáwn hi, tunah chuan ka hmu tawh bawk che u a, ka dam nghâl sawt sawt mai," a ti a, a hlimzia chu a hmelah pawh a lang chhuak chiang viau a ni. Kan chhuk thla lo ang tih ka hlau hnuhnawh, min chah thlâk êm chu a lo sawi ngam lo mai niin ka hria, heti êm êm hian min lo ngai mai si a, hrehawm ka ti ru hial zâwk a ni.

Ka nu dam țhat deuh hma chu awm rih țhain ka hria a, Pu Head-a ka han be zui nghâl a, kâr khat chhûng chawlh ka han dîl a, chawlh tih lêmah ai kal lâk ka tum tho a ni, ani pawh chuan min lo hre thiam khawp mai a, ka awm loh chhûnga ka ai lo kal rih tùr lâk ka tum thu ka hrilh chuan," I thu thu a ni e," a ti ve mai a, inthlahrung viau lo tùrin min hrilh zui bawk a.

Nilêngin inah a pi chu Bawihtea nèn chuan kan awm a, zànah ka nute an rawn phei ve bawk a, kan hlim leh ta niai niai khawp mai. Ka pate pahnih chu khùnkhàn tak hian an titi a, keini hmeichhe lam chu kan bengchheng deuh a, Bawihtea kan chhaih pah nèn, kan ri chùl mai.

U Kimi leh Sëntei pawh Lungleiah kan awm tih ka hrilh a, Sêntei chuan nakzàn lama lo lèn a tum thu a sawi a, U Kimi erawh chuan a nu a dam țhat loh thu sawiin kan awm rei dâwn leh dâwn loh min rawn zâwt thung a, kan awm chin tùr ka hrilh chuan," A țhat chu, hun remchâng i neih chuan min rawn tlawh ve la, ka nu pawh i rawn kan pah ve sng a," a rawn ti a, kei pawh chuan ka lo aw ve mai bawk a.

Damloh a lêng deuh a niang ka ti rilru tawp mai. Zànah mak tak maiin Chhanzuala'n min rawn be tlat mai bawk a,"Ka thih hma ngei hian min rawn kan rawh," tiin, mak ka ti lutuk ringawt! Thih thu a rawn sawi a nia, fiamthuna chi pawh a ni lo, bâkah, hetah ka awm a ni tih hre sa ang hrimin, a hriat lah ka ring hauh si lo.

"I damlo em ni?" ka tih chuan," Aw, ka thi țêp tawh," a rawn ti leh mai a, a ngaihna ka hre lo lek lek hial mai. 'Damlo ve si, heti êm êma țawngkam han duh tui loh mai chu' ka ti rilru hial a, chutah," Damdawite i ei em?" ka ti leh a, ngaihsaktu a nei lo ang, laina hnai a nei tlat lo, kei ka awm lai kha chuan ka theih ang tâwkin ka ngaihsak ve țhin kha a nia, laina a nei lo tih ka hriat avàng khân ka ngaihsak zual țhin a.

"Ei lo."

A timak thei a nia. Puitling ve tawh si, engtin nge hetiang hian a la awm theih ni?

"Engati nge doctor hnênah i kal loh?" ka tih leh chuan," Chakna ka nei lo," a rawn ti leh a, a aw chu a pângngai viau si a, mak ka tiin min tihder mai mai a nih ka ring deuh a; mahse, a damlo tak tak a nih ka ring deuh tho bawk si, chhûngrilah hlauhthàwnna ka nei tlat mai a ni.

Han kan chu a mawi lo viau ang em? Mahse, hmân ațangin kei bâk ngaihsaka duattu a nei lo a nih kha, amah ngaihsak theitu awmchhun a u lah ram hla takah a awm leh tawh si, phatsantu ka nihna dah bovin, a u țhiannu ka nihna ang zâwkin ka ngaihven chu a ngai a ni. Bâkah, ani pawhin phatsantu ka nihna lam dah bovin amah kan tùrin min rawn bia a nih kha. Sêntei záwt chhin ta ila, ani'n a chanchin chu a lo hre mial maithei asin, bâkah, sâwm ve bawk ila... mahse, a hman lo tak ang, dàwr nghah a ngai ang.

Sêntei ka han zawh chuan," A ni tak maw, ka hmuh hnuhnun ber khân a kâwng, hnungzâng a nat deuh thu kha a sawi tak a, ka lo ngaihven chhunzawm miah lo mai a, kha kha a lo ni ang e, ka va bengvâr lo tak!" a rawn ti niah niah a, kei chuan," A, i buai ve êm a ni, kei pawh min rawn hrilh lo se chuan ka hre chuang miah lo ang," ka ti a, ani chuan," A rawn hrilh che maw?! Lungleiah i awm tih ka hrilh miah si lo va, hrilh tùr pawhin kan inhmu azeng pawh a ni bawk si lo," a rawn ti leh a.

"A damlo tak tak a nih chuan kan tùrin kal ta ila, a mawi lo viau ang em?" tia ka han ràwn chuan,"A ho mai mai, tu mahin an hre chuang nâng, bákah, a lo na tak tak a nih phei chuan ngaihsaktu a nei dâwn hleinem, i kal theih phawt chuan kal rawh, tlêm tal pawhin in inpawh leh thei deuh mahna, " a lo ti thên a.

Kan loh chu pawi lo ka tih viau rualin lo damlo tak tak ta se tih ka ngaihtuah lo thei lo a ni, min huatna zawng zawng dah țhain min rawn bia a nia, min beisei leh vàng lam a ni lo, a laina hnai ber ka nih vàng chauh a ni. Kei lo amah pawh bertu chu Séntei a ni leh mai a, Sêntei bulah chuan a sawi lan miah loh hi.

A tûkah chuan Bawihtea chu a pi leh pu bulah a awm a, ka chhuah lawk tùr thu ka sawi chuan ka nu chuan," Ni e, chhuak rawh khai, awmpui kher pawh ka ngaih loh hi, Bawihtea lah kan lo awm thei bawk a," a ti a, Bawihtea pawh chuan min ngen tumna a nei miah lo, a pi leh pu hi a lo ngai ve viau a nih ka ring ta hial mai.

Chhanzuala in ka thlen chuan kawngkhàr chu ka han kik dat dat a," Lo lût rawh," chhûng lam ațang chuan aw hian a rawn ti a, ka han paet a, a inhawng nghâl ta mai a, a kawngka pawh a kalh lo a nia, min lo beisei reng tihna em ni? Lungleiah ka awm tih a hria em ni zâwk? In chhûnga lûtin ka han hawi kual a, tu mah ka hmuh pawh ka hre lo; mahse, ka han en chiang leh deuh a, sofa lama che deuh chu ka hmu ta a, ka han hmuh chian chuan kàwi sàwi zet hian a lo mu a, a hmelah chuan damlo hmel pawh a pu miah lo, a lo nui suk zui a.

Min tihder a ni ngei ang chu, engati nge ka lo âwih kher kher ni? Min bum chhuak nalh a nia, nêp min va ti dâwn rua ém! Min hmusit ngawt ang chu, amah hmuh châka pan ruak ruakah min ngai ngei ang, kei lah chuan a damlo tak tak emaw tiin ka la pan zui a.

"Țhu rawh," a tih chuan," Damlo kan tuma rawn kal ka nia; mahse, bum ka nih duh hmel, min bum chhuah dàn pawh a nalh e," ka ti fak thung a, ka hmelah chuan lungawi lohna nasa tak a chhiar thei ve ngei ang.

"Țhu rawh ka tih chu," a rawn ti leh a, kei chuan," Ka țhu dâwn lo, engati nge dâwt min hrilh?" ka ti ve leh a, min bum nalh lutuk chu mak ka ti a ni, nizàn lama min biak rawn lai lah khân chhúngrilah amah ngaihtuah tlatna, hlauhthàwnna riau kha ka nei tlat bawk a nih kha. A damlo hmel, a chau hmel hmuh ka tum a, a lo ni si lo.

"Eng dâwt nge maw i sawi le?" a tih chuan," I hre zâwk ang chu!" ka lo ti hul hak a, min rawn enin,"Lungleiah i awm tih ka hriat avàngin ka rawn hrilh ngam che a nih kha, Phailengah chuan awm la khatiang khân ka rawn hrilh hauh lo ang che, min ngaihtuah dâwn tih ka hre sa ve reng alawm," te chu a la ti deuh deuh a, Phailenga awm lo chung pawh hian ka ngaihtuah tih chu a hre lo em maw ni? Ngaihtuah lo ila chuan tunah pawh hian a inah hian ka awm tawp nâng; mahse, tûn țum zawng, a u țhiannu ka nihna ang leh a laina hnai awmchhun ka nihna angin a ni ka kal ni. Chutah, bumin ka la awm zui.

"Min ngaihtuahtu i lo kal tho tâkah chuan min han tung tho teh le, i lakah lo chuan pangchanna ka nei si lo va," a ti leh a, zahna a hre map lo hi a buaithlâk, mit khap hauh lovin ka melh reng ringawt. A thil sawi chu inhnehtîr ka tum lo va, a thu zawm pawh ka tum chuang lo, ka ding mãwl tawp ringawt, min bum chhuahna chuan ka rilru a tinâ a ni.

Ka chêt ták si lohah chuan amah chuan harsa tih hmel tak hian a rawn tho chhuak a, hei pawh a tider mai mai a nih hi, min bum lehna bawk. Chutah, sofa-ah chuan țhuin a țhen deuh sak a," In tùr i duh em?" a ti leh a," Duh lo, thil dang sawi lovin eng vànga min bum chhuak nge i nih sawi rawh, damlo anga i insawi avàngin, i u țhiannu ka nihna zâwnah, chuvàng chauh chuan ka rawn kal a ni," ka ti leh a.

"A làwmawm e," a ti sup a, min enin a hmui a han pet a, chutah," Ka u țhiannu i nihna zâwna min ngaihtuah avàngin ka lãwm e; mahse, min ngaihtuah suh, i kal thei tawh ang, ka u ţhiannu ka mamawh lo ve, ka mamawh ngai lo ang," a ti hul ve ta hak mai a, sawi țha ka intih ve tehlul nèn, a thil sawi chuan min tidang leh dér tawh zâwk.

"A nih chu," ka ti sap a, ka inher zui ta nghâl a, hawi lét lo chuan ka kal a, kawngka bul ka thleng țêp tihsh chuan eng emaw ri thlawrh ri hi ks hria a, ka phu chiang lutuk ringawt, ka hlauhna avàng chuan ka hawi lêt ngam lawk lo nghe nghe a.

Ka hawi lêt chu, chhuatah chuan a lo tlu a ni ngei ang, eng emaw hi sawiin a phun sup a, thawh tumin a lo inbengkãng nasa mai a, a awm dàn chu mak ka tih êm avàngin puih pawh tum lo chuan ka en reng ringawt a, khùr dawt dawt chunga a rawn innem thawh tâk hnuah chuan ngaih țha lovin ka pan phei a, vîn deuh țhawk hian," Rawn pên tawh suh!" a rawn ti chhuai a, a insehruh țeuh bawk a, mak tak maiin a bek, a chalah leh a nghâwngahte chuan thlan a bawl țuk mai nia!

"Engtin nge i awm?" ka tih chuan," Haw rawh, i haw dâwn a ni lo'm ni?" a ti chher leh chhuai mai a, a la ding khùr dawt dawt a ni tih ka hmuh chuan pan pheiin," Engati nge hetiang hian i awm?" ka ti leh a, a aw chher chhuai pawh chu ka hlau zo tawh lo, a taksa awm dàn chuan ka ngaih a ti țha lo a ni. Inthunun tum takin ding mah se a inthunun hlei thei lo tih ka hmu reng si a.

"Haw rawh, ka mamawh lo che!" a ti leh a, ka pan hnai zêl a, a t-shirt hâk âwm leh nghâwng vêl thlanin a tihhuh ka hmuh phei chuan ka hlauthãwng lutuk tawh, eng vàngin nge hetiang hian a awm ni?

"Chhanzual, eng nge thil awmzia hi?" tiin a kutah chuan ka va chelhsak a, a lo inhûm sek viau a ni tih leh a taksa chu a lo inlek kawh viau a ni tih ka hre nghâl a, a kut pawh a lo thlan dup mai. Chutah, harsa tih hmel fê hian sofa-ah chuan a țhu thla a, a țhut thlâk pah chuan a țhen sawk bawk a, a taksaah chuan nâ a nei a ni ngei ang. A thaw hawk hawk a.

"Khawi lai nge nâ?" 

Țhu rei lovin a bawk zui ta nghâl a, a kawr hnung lam pawh a lo hnâwng chup tho, a taksa chhûngril khawi lai emaw a nâ a ni ngei ngei ang, a thlanfîm a la bawl țak țak a nia.

"Ka na vek!"

*I HMAIHMAA MI DIK TAK NIA LANG IN ȚAN CHE AN AWM ANG A, CHÛNG MITE AI CHUAN I HNUNGLAM AȚANGA ȚAN TLATTU CHE KHA I TÂN A RINAWM ZÂWK NGEI ANG*