☆UNEXPECTEDLY YOU☆ - 31 By Dingdi Pachuau

 ☆UNEXPECTEDLY YOU☆ - 31 By Dingdi Pachuau

A awm dàn chu ka hre thiam lo kher mai. A hmêlah leh a awm dànah lah chuan a tider mai mai lo tih chu a lang ve reng bawk si nèn, a rûk tak chuan ka hlauthãwng, a hriatah erawh ka hlauhthàwnna chu thup ka la tum hrâm hrâm a.

"Engtin nge a nat dàn? Engtik ațangin nge hetiang hian i awm a? Engati nge i inentîr loh?" tiin zawhna hlîr mai chu ka zâwt a, a bulah țhuin amah chu ka khawih mai ngam si lo, a nâ chu a chhuak leh palh ang tih ka hlau a ni. A thlanfîm bawl țak țak erawh chu ka rawmawl la chhuak vatin zàwi tê têin ka deh hulsak thung a, a hmel chu ka en pah zauh zauh a, ani chu a mamimichhîng a, a hmui a chîp tlat bawk a, ka zawhna chu chhàn tum àwm pawhin a lang lo.

Tihngaihna ka hre lo tak zet a ni. A khua a sik pawhin ka hre bawk si lo va, a nâ lah chu nâ a ti êm êm mai bawk si, a nerve lam a nih ka'n ring ta deuh ngawt a. A na vek ni khân a insawi a nih kha, a dikin ka ring.

"Hetia tuar ngawt ai chuan inentîr rawh aw," a hnu daiha ka tih chuan a rawn meng chhuak a,"Ka duh lo," a ti sup a, dam tak, thlêm titih deuh  hian,"Engati maw? Hetia tuar ngawt hi zawng a fuh lo, nâ i ti reng mai dâwn asin," ka ti leh a, inentîr chu mipa tân tlàwmthlâkah a ngai deuh em maw ni ka ti.

Kan ngawih leh deuh reng hnu chuan,"Min jection ang asin?" a rawn ti chhuak ta sup a, ka en deuh reng a! Mak ka ti a, ka insûm bawk. A hnuah erawh a thil rawn sawi chhuah chuan ka nuih a tihzat êm avàng chuan ka insûm thei ta lo, ka nui chhuak ta hawk hawk a, a nâ lam pawh ka hrechang tawh lo.

"Jection i hlau maw?!!" ka ti a, ka nui chhunzawm leh nghâl a, inhmeh lo ka ti tak zet a ni. A inlâk pà ve tehlul nèn, inchìu a hlau a nia, a hmel nèn chuan a inhmeh hlawl lo.

"Min nuihzat a nih kha, i duh tâwkin nui rawh; mahse, hriau ka ngainat phah chuang lo ang," a rawn tih leh phei chuan ka nuihbâwm a keh a, ka nui char char, nâ a tawrh laia nuih chu ka inthiam lo ru ve tho a; mahse, a za laklawh tlat tawh.

"Nâ ka tawrh laiin za takin i nui thei a nia... A țha, nui zêl rawh," a rawn ti leh nghut a, a țawng chhuak leh a hmel chu a inhmeh tak zet, kei pawh chu ka insûm ve ta deuh a; mahse, chhúngrilah chuan ka nuih a la za tho.

"Doctor hmel hriat pakhat ka nei alawm, ka'n râwn chhin ang e, hetia tawrh chawrh chawrh hi chu a fuh lo," tiin ka bag-a ka phone chu phawrh chhuakin doctor hming chu ka hmet chhuak ta nghâl a; mahse, țhen chawk chawk chunga ka kut a rawn vawn chuan amah chu ka en ta vat a.

"Ti suh!" sehchilh zet hian a rawn ti a, a na tawrh vàng chuan ka kut a min vawnna pawh chu a nghet khawp mai, a ngaihna hre lo taka ka en lai chuan," Hetia ka bula i awm lai hian thih ka duh zâwk!" a ti leh ta a, a fiamthu emaw ka ti hial a ni; mahse, a hmêlah leh a mitmengah chuan fiamthuna àwm rêng a lang lo.

"Vawi khat mah thih thu sawi tawh ngai suh!" ka ti ve thung a, thi tùrin ka duh hauh lo, ngaihtuah pawh ka la ngaihtuah chhin hek lo, pakhat a boral tawh a, kha pawh kha thil țha lo tak a ni, dam hi kan tum hrâm hrâm tùr zâwk a ni.

"Doctor ka phone chhin mai dâwn alawm, i thi dâwn lo," ti lehin ka kut lehlamin phone chu ka la a, Dr. Châma chu ka phone ta nghâl a, ani pawh chuan min dan a tum tawh chuang lo, a ngawi rùn a, min en kur pah bawk.

Thil awmzia ka hrilh zung zung a, ka tur hmanhmawh deuh vàng a ni ngei ang, Dr. Châma chuan a hnêna kal phawt tùr chuan min lo ràwn a, kei chuan," Tunah hian kan rawn kal nghâl mai dâwn asin?" ka lo ti vat a, ani pawh chuan," Aw, vawiin phei chu naktûk lama ka zin lawk dâwn avàngin ka off a, in lamah min rawn kalchilh mai ula aw," a rawn ti leh a,"Aw le, kan rawn kal nghál e," ka tih ve leh hnu chuan kan inbiakna chu ka ti tàwp ta a.

"Le, kal ang le, insiam pawh a ngai lo, tikhân kal tawp a ni mai," tiin Chhanzuala chu ka han en a, ani chuan," Bike ka khalh thei lo," a lo ti ve thung a, kei chuan," Scooty ka rawn keng a, ka phur mai ang che," ka lo ti thung a, lu thing nak chung chuan a nui hawk zui a.

"Nang hian min phur ang maw?! Hmeichhe phurhah ka chuang lul lo ang," a ti leh mauh mai, a buaithlâk thei a nia, ni e, a duh hauh lo ang le, a inla pà ve ropui si a; mahse, a kal duh laia ka kalpui si loh chuan, hetia na tuar reng mai tùr hi chuan ka duh si lo.

Rickshaw-in kan kal ta ringawt, a ngawi rùn mai a, a chêt vêl chânga a țhen leh sak țhìn chu ka hmu ru reng a, a na viau a nih ka ring bawk. Dr. Châma chuan a lo en kual a, a nat dàn lah chu, na tuar zâwk ni àwm takin keimah min zâwt zêl zui a, pakhata lah chuan ngaihtheih loh hmel zet hian min en tawn sek zui a.

"Lunglei lam ai chuan Aizawl lamah en se a țhat zâwk ka ring, phei thuai bawk se," tiin min rawn en a,"I nau em ni?" a ti zui leh zat a, kei chuan," A nih tak chu, a làwmawm lutuk e," ka ti phawt a, chutah, Chhanzuala en pah chuan," A nih ve hi," ka ti a, nau anga sawi chu a duh dâwn lo tih ka hre sa kar a, ka ti dik viau bawk. Kan bulah doctor chu awm lo se chuan min chùm thlu tawp duh maithei, mit khap duh miah lo hian rum zetin min melh rùn a.

"Inhmuh a khât si a, lêng ve rih r'u aw, Sêntei nen pawh kan inhmu zauh zauh a, a dàwrah pawh ka kal zauh zauh, hmanlai chanchin kan sawi chhuak țhin a, a lunglènthlâk thei a nia," tiin min rawn en vang vang a, chutah," Ka lo țawng leh duah a, thingpui kan in dâwn nia, ka'n lum nghâl ang e," a ti sauh sauh a,  Chhanzuala lungawi lo hmel chu en duh lovin," A dik alawm, túnlaiah chuan mihring hi kan buai tawh a, inhmuh mai mai pawh hi a har tawh a ni... Khawnge in nu hi?" ka lo ti vat a, ani chuan nui chung hian," Kan ințhen daih tawh alawm, nang i awm chhûng chuan mi dang melh ka tum tawh lo," a lo ti a, kei pawh chu ka nui ve hak hak a, Chhanzuala meng rum kual vêl chu ka haider lui tlat a.

Kan awm rei vak lo, kan haw dâwn chuan," Eng nge ka zinna ațang chuan ka lo hawn ang che?" a ti leh a, kei chuan," Dam tak khân lo haw tum phawt mai teh," ka ti ve thung a, a nui zui var var a. Dr. Châmate nèn hian Sacred Heart School-ah kan lût tlâng țhìn a, mipa naupang fel tak leh lehkha pawh thiam thei tak a ni țhìn, a vànduai a, a nu leh pa a chân hnu khân a u hmeichhiain a chãwm char char a, doctor a han zir zo va, a u a chàwm lêt theih hnu rei vak loah a u chu motor accident-ah a boral zui leh bawk a, a khawngaihthlâk hle a ni; mahse, amah a inchãwm thei tawhin a ngaihtuahawm tawh lo va, vànduai ta rau rauah a vànnei ve tho a nih hi.

Chhanzuala chu a țawng tawh lo rêng rêng, keiin chu chu remchângah lain Aizawl chu a rang thei ang bera kal tùrin ka hrilh mawlh mawlh a, a nâ chu a zual zêl hma ngeia inentîr tùrin ka hrilh a, a ngawih reng avàng erawh chuan ka thil sawi chu a pawm ang nge pawm lo ang tih erawh hriat a har.

Amah mai chuan thil tih a har àwm si a, a tân chuan chêt vêl takngial pawh a har a ni si a, sumo ticket han hauhsak ta ila, phei tawp mai se, Aizawlah lo ngaihtuahtu tùr țhian leh chhûngte a nei àwm si lo, a awm dàn tùr hi a buaithlâk vêl vek.

"Hriatpuia leh Sam-a helama an awm lai a ni em?" tia ka zawh chuan a ngawi ngur mai a, eng thlarau sual nge maw a kaw chhûngah hian a lo luh leh tawh ni ka ti rilru neuh neuh a, min chhàn loh chuan a buaithlâk, ka ngaihtuah ve tho bawk si a.

"Aizawlah chuan phei i hreh em? Nangmahin i phei thei ang tiraw?"

"Ka inngaihtuah ve thei," tiin min chhâng ta nghut a, ka thaw deuh huai thei. Ka ngaihtuah a ni tih a hre ve tho ngei ang a, ka hman lohzia pawh hre chiang bertu a ni ngei ang.

"A țhat nasat chu, sumo ticket erawh ka lâksak ang che, driver hmel hriat țha ka nei alawm, in inkàwm ngeih phian ang, hmel hriat loh bula kal ai chuan a zia deuh bawk ang," ka ti leh zung zung a, hetia ka tih zung zung loh chuan a sawi nãwi ang a, a kal duh loh phah ang tih ka hlau. A châng chuan hetia a inla pà ve tlat pawh hi a țha riau, hruai ngiat ta tlat se engtin nge ka tih tehlul ang? Pà takin a tuar chhuak thei ngei tùrah ngai ang.

A remti lo chung a thuamhnaw ka siamsak vek a, chumi hnuah chuan ka chhuahsan ta chauh a, ticket ka va lâksak leh rih a, naktûkah a va kal ang a, kei ai chuan va inentîrna tùr doctor pawh a hre daih zâwkin ka ring, bâkah, a țhiante pawh a zâwt thei bawk ang chu.

A chanchin hre tùrin ka va phone ve lawk a, tluang takin a thleng phei thei a, a zia lutuk e. A hnu lamah erawh chuan ka phone ta lo vang vang a, amah zâwkin min rawn bia a, a sawi dànah Lungleia kan awm chhûng chuan a rawn phei hman tawh dáwn lo a nih hmel, a kâwngah chawr a lo awm a, an zai nghâl dâwn ni àwm tak a ni, mak ka ti kher mai! Engtin nge a kâwng chu a lo chawr theih ni?! Kâwng hi a lo chawr thei ngai a ni tih ka hre ve chiah bawk, a mak viau a ni, bâkah, a nerve lam a lo a chiang vak lo bawk a, zai a ni dâwn bawk nèn, Aizawlah a awm rei deuhin ka ring nghâl ringawt bawk.

Kár khat a ral a, keini pawh kan nufa chuan kan khuaah kan haw leh tawh a, ka nu a dam țha ve leh tawh bawk a, Aisami hnênah hun ãwl a neih lai chuan ka nu chu a tam thei ang ber lo kàwm hlim tùrin ka chah a, mal taka awmtîr lo tùrin ka duh a ni. Ka ngaihtuahna a vâk kual nasa a, kei hian ka tih loh tawp tùr ti niin ka inhre deuh hlek a, an bula awm tama duat taka enkawl tùr niin ka inhre thar deuh a ni.

Sêntei erawh chuan," A ho mai mai, an fapa ber a awm tawh lo va, i duh chu i ti thiang a ni, an in chhuahsan lovin i la ngaihsak ëm êm zâwk a, i hna bànsan lam chu ngaihtuah rih lo ang che, kan hma hun tùr kan hre lo," a ti deuh tlat a, a dik ka ti ve deuh tho mai. Pasal dang neih leh lam chu ka ngaihtuah hauh lo va, ka neihchhun Bawihtea hi ka ngaihtuah ber chu a ni mai.

School chu ka han kal leh lâwp lâwp a, boruak pawh a nuam leh deuh tawh bawk a, school bul vêla pangpár han pár vul chûk mai chuan nun a tihlim ka ti, hawi vêl a nuam a, ka phone-ah pawh pangpâr thla chu a tam viau réng a ni, ka thlalâk aiin a tam daih nghe nghe ang chu.

Chhanzuala chanchin hre tùrin ka va be leh hrâm a, an zai hlawhtling viau a ni àwm a, a làwmawm khawp mai; mahse, doctor-in bike khalh a phal rih lo va, a rei lo berah kum chanve vêl chhûng tal chu bike a khalh loh a ngai dâwn a ni. Engtin tak awm ang maw? A bike chu a ngai ngawt ang chu, a țhian pakhat kha a ni ve a.

October thla chawhnu lamah Dinpuia a rawn haw ve hlawl mai a, zànah a rawn lêng nghâl a, a hmêl pawh hmuh a nuam viau e. Ka inlêng ve ber kha a ni a, zàn a lo thlen tawh hi chuan ngaihtuah chhuah tum lo deuh chung pawh hian ka ngaihtuah chhuak ve fo țhin a nih kha, a àwm ve viau tho mai.

Bawihtea lah chuan a rawn lang chu a lo làwm khawp mai a, car lem leh JCB lem a rawn hawnsak zui a, kan pahnih pawhin kan inkàwm hman meuh lo, an pahnih chuan an inkàwm a, Bawihtea'n JCB chu a khàl a, car lem chu khàl ve tùrin a ti a, a țawngpui bawrh bawrh bawk a, titina hun pawh kan nei meuh lo. An inbiak loh kârah erawh zawhna ka zâwt ve zauh zauh thei chauh a ni.

Kâr khat chawlh a rawn hmang dáwn a ni àwm e. Mahni khua, in leh lo leh mahni chhûngkaw awmna hmun hi chu a lo ngaihawm ber chu a lo nih hi, chhûngte nèna kan chènhona hi chuan zùn hi a nei tlat mai a, khawi hmun ațang pawhin kan hre chhuakin kan ngai a, in dang kan ngai ngai lo. A building ropui chiam lo mah se emaw a bante chu sángin lian viau lo mah se rilru chhûngril lamah hian him tâwka ngaihna a awm tlat a, mi in ropui leh changkâng tak tak aiin kan chènna kan in ngei hi chu a thlákhlelhawm vawng vawng a, a lamah hian min pawt tlat țhin a ni.

A awm chhûng chuan zàn tin a rawn lang ziah a, a zahawm hi ka ti țhìn. A țawngkamin sawi chhuak lo mah se a mitmeng leh cheziain min duhna a lantîr țhìn tih ka hria, ka zah ru viau țhin. Kei nuthlawi mai mai hi min thlahlel ve viau chu a ni tak si a, mi dang aiin felna ka neih loh bâkah nula pângngai pawh ni lovin nuthlawi fa nei ka ni zui a, a zahawm ka ti lutuk. Hmeichhe fel tak, nula hnahkhat ngei a phû tâwk nei se ka duhpui viau a ni, kei chu ka hniam lutuk, bâkah, mipa lam ngaihtuah thei pawh ka nih tawh loh hi.

Aizawla a phei zàn chuan min rawn bia a," Thil hrilh che ka tum ve tehlul nèn, ka țhulh leh zo ta a nih kha, ka lo haw phei leh veleh ka hrilh tawh tak tak ang che," a rawn ti a, kei chuan," A pawimawh lêm lo a nih dâwn chu," nui chung hian ka ti a, ani erawh chuan," Pawimawh lutuk! Phone-a sawi mai mai chi a ni si lo va, ka lo haw phei hunah ka hrilh ang che," a rawn ti ve thung a, a thil min hrilh tum chu rin hriat ruak mah ila sawi chhuah chi ni hek lo, fiamthuin ka chhâng zêl a.

Kan school bâng kan haw chu kan titi bawrh bawrh hlawm a, hla deuh hlek ațang chuan kan kawta motor ni àwm tak ding reng chu ka hmu vuai vuai a, mak ti rilru zet chuan ka han khap sak sak a; mahse, motor chu ni ngeiin ka hmu tlat tho, tu motor tak ni ang maw? Nge kan kawtah chuan a lo din ve ngawt? A remchâng êm a, an dah rih a niang ti tùrin ka kawt chu a remchâng viau bawk si lo, kan țhenawmte kawt a zau daih zâwk si a.

Ka hnaih deuh deuh a, chiang deuh hlekin ka hmu thei tawh a, motor ngei chu a ni, mi chuang an awm em tih erawh ka hmu thei lo, tute tak ni ang maw? A bul hnaia ka kal chuan driver seat-a lo țhu chu a lo dâk chhuak a, ka hriat mi pawh a ni lo.

"Ka pi, D'Puii i ni em?" a lo tih chuan ka phu deuh zawk a. D'Puii. Chhanzuala min koh dàn a nia, ani lo chuan hetiang hian min koh ngai loh bâkah hetiang hian ka hming sawi a ni ngai lo bawk.

Dingin,"Aw, ni e, eng nge ni ta?" ka ti ve vat a, ani chu a nui deuh sak a, chutah," Kan lo nghâk che a," a ti leh a, a ngaihna ka hre lo ru khawp mai, 'Kan' a ti bawk si a, mi dang ka hmu bawk si lo, eng atân tak chuan min lo nghâk chu ni maw? Chutah, a hnung kawngkhàr chu rawn inhawngin Chhanzuala ngei mai chu zakdawh tiang nèn a rawn chhuak ta a. 

He pa hi, damdawi in khumah emaw inah emaw mu hahdam mai mai tùr a ni asin, zai a tuar a, hêng lai kawngah rawn tlânin a rawn insawh viau àwm si a, a va țûl lo tehlul êm! Eng nge maw a rawn tih dáwn ni? Thil pawimawh tak a awm zâwk em ni?

"Eng nge i lo tih dáwn?" ka ti hû a, ani lah chuan," Kan nghah rei che nèn, in chhûngah lût ve phawt ila maw le, ka hnungzâng a kham tawh teh a nia," a lo ti thung a, kawngka ka kalhna pawh ka la hawng lo tih ka hre chhuak chiah. Bag ațanga chahbi la chhuakin rang takin ka hawng zui a, tukverh hawng nghâlin parda ka hlîm zung zung bawk a, chutah, a lam hawiin," Lo țhu rawh, mut i duh záwk em? Țhutthlèngah khân a mut theih aw," ka ti leh zung zung a, ani pawh chu eng dang sawi lo chuan țhutthlèngah chuan ãwn deuh tak hian a țhu thla nghâl a.

"Khawnge i țhianpa kha?" ka tih leh chuan," Ka țhianpa a ni lo," a lo ti sup a, chutah," Lo luh ve kher a ngai hleinem," a ti zui leh a, kei erawh chuan," Thingpui ka'n chhuang nghâl ang e, in ril a țâm ang. Engtia rei nge min lo nghah tawh? Chuan, eng nge in lo tih dâwn a?" tiin ka zâwt zui zat a, bag chu dawhkàna dahin thingpui chhuang tùr chuan ka kal zui ta nghâl a.

"Ka rawn kal thei lo em ni?" a rawn ti ve thung a, kei chuan," Thei e, hei, in lo kal réng a. Eng nge in lo tih dâwn ka ti," ka lo ti ve leh a, thingpui ka chhuan hnu chuan a lam ka hawi ve ta chauh a, ani chuan," Kan rawn kal maw le, chhan dang vak eng nge awm se i tih?" a ti leh a, ka en deuh reng a, ka thaw deuh hawk a, ka zâwt peih tawh lo, an duh duh an rawn ti ve ang chu maw le, tlangvâl a la ni ve a, engah nge maw ka zawh sek ni?

Thingpui ka siam zo a, driver koh tuma ka han chhuah chuan ka han hmu miah lo va, beidawnga ka lût chu," Ngaihven vak suh, hmel hriat a nei alawm," a lo ti mai a, thingpui chu ka siam kêp si a, in se ka duh vàng a ni.

"I dam zêl maw? I inzaina chu a la na viau em?" tia ka zawh chuan," Aw, a la nâ," tiin min lo chhâng a, a fiamthu a nih ka ring a; mahse, nui hmel a pu miah lo, en ràn chung hian," Engah nge inah i mut mai mai loh ni? Hêng lai kawng sawtahte i rawn tlànpui a nia," ka lo ti hlak a.

"Min hnem ve dàn chuh!" a ti hluk a, thingpui no tlâng kual chu a tuai a tuai a, chutah," Zanin tlai chu chaw min chhum kêp mai a niang chu, nge kan nghei zâwk mai ang?" a tih chhunzawm leh a, kei chuan," I țhianpa nèn khân maw?" ka lo ti vat a, ani lah chuan," Ka țhianpa a ni teivet lo," a lo ti leh hmuk a, thingpui chu a in hlek a, min rawn enin," In ve ta che," a rawn ti zui leh hmuk a.

A hnuah chuan a kâwng chawr an zai dànte chu ka zâwt a, an zaina laite chu ka ensak ve nghe nghe bawk a, a hmela lungawi lo hmel lang reng chu ka haidersak hrâm hrâm a, thil dang pawh sawipui duh lovin a chanchin lam hlîr chu ka zâwt a. Chutia kan titi lai chuan Engmawia leh Bawihtea chu an rawn inzui lût a, Bawihtea chuan," Âma," tia rawn tlãnin min rawn pawm chang chang a; mahse, Chhanzuala a hmuh tâkah chuan a awm dàn chu a dang ta daih tih ka hre ve chiang viau mai.

"I ril a țâm em? Engmawia nèn khân thingpui in ve ula, ka siam ang che u aw?" ka ti a, ani chu a ngawi reng a, Engmawia ve thung chuan," Kawta mawtawi(motor)saw a mawi asin, ka khalh ve châk," a lo ti a, in chhûngah awm mah se páwn lam chauh chu a en ngar a. Ka nuih a tiza reuh khawp mai, ni e, he laiah hi chuan motor dang hi hmuh tùr a tam lo khawp a, sumo hi a ni deuh tlawng a, bike nèn, car hi chu hmuh tùr a vâng ve êm a ni.

"In chuang châk em?" ka rin loh deuha Chhanzuala'n a rawn tih chuan ka en a, Engmawia chuan rang zet hian a lo 'aw' vat a, Bawihtea erawh chu a ngawi reng a, ka han en chuan min rawn en chho a," Âma," tiin min kuah chãih chãih a, kei pawh chuan duat tak hian ka kuah lêt ve a, a samah chuan ka fawhsak zauh a.

Chhanzuala sawi chu a dik nge ni, driver chu a pil bo vang vang mai a, zanriah ei dâwnah a rawn lang ve hrãwk a, chutah chuan, râwlthar chhuak deuh hlawt a ni tih ka hre chiang chauh, a la nui duh êm êm zui a, Bawihtea pawhin a nêl vat mai. 

Oliver-a a ni a, zanriah ei chhûng chuan ka titipui a, a țawng duh viau mai, Chhanzuala erawh a ngawi kur thung. Chaw ei kham hnuah a chhuak leh a, Chhanzuala hnênah chuan," Zanin in riak dâwn ang tiraw?" tiin ka zâwt a, ani chuan," Riak dáwn lo, dâr 8: 30 -ah kan haw ang," a lo ti a, an riak dâwn emaw ka lo ti char char a, mutbu ka nei vak si lo nèn, a rûkin ka lo buai hman viau asin.

Bawihtea chu ka bulah țhuin Dinpuia rawn hawnsak JCB lem chu a khàl mai mai a, Chhanzuala chuan a en duh khawp mai. A têt lai a ngaihtuah chhuah phah pawh a ni ve mahna, a khàl ve țhin tho àwm si a.

"Eng nge i lo tih ber?" ka ti chhuak leh ta nge nge a, ani chuan," Tlangvâl inlêng eng zât nge i neih țhin rawn hriat ka tum maw le," tiin min chhâng mai a, a țhut dàn chu siam remin," Ka inzai hnu khân ka chanchin ngaihvena min rawn biak ka lo beisei țhìn a... mahse, ka lo beisei sâng lua a ni tiraw?" a ti leh a.

"Ka rawn biak reng che kha, doctor-in bike khalh an phal loh thu pawh min hrilh nghe nghe kha," ka lo ti ve thung a, ani lah chuan," Vawi khat chauh," a lo ti sup a, chutah," Nia, beiseina ka lo nei sâng lû deuh a ni, ka màwl vàng mai mai a nia," a ti leh a, a thil sawi chuan inthiam lohna min neihtîr ve det mai. Amah ngaihsaktu mi dang a nei lo tih hre reng chungin vawi khat chauh kha ka han be ve bawk kha a nia, ka thiam loh a ni, va biak ka inthlahrun vàng kha a ni ve pakhat a, ka biak a lo beisei ru reng ang tih ka lo hre miah lo.

"I dam chho zêl a, a làwmawm, tûn hnuah chuan nâ i neih rêng rêngin tuar tlawk tlawk tawh suh ang che, inentîr vat la, nâ rêng rêng a țantìr hi enkawl ran a nih chuan a dam hma záwk tih hria la, a nasat hnuah chuan tih dam pawh a hautakin hun pawh a duh rei țhin tih hre reng ang che," tiin ka hrilh ve duah a, ani lah chuan," U ang chuan min hrilh lo teh, ka u i ni lo a nia," a lo ti thung a.

"I u țhiannu--" ka tih lai mêk chuan," Ka u țhiannu angin ka en thei lo che, sawi tawh miah suh," min lo tih khalh a, a aw chhuak chu a dam fahran lo nèn, Bawihtea chuan min rawn pan vat a, a hlau deuh a ni maithei, Chhanzuala chu ka melh vak a, ani erawh chuan a hmui a chîp hmak a, a lung a awi lo tih a hriat hliah hliah.

Bawihtea muthilh hma chu a țawng ta miah lo va, a muthilh hnu lawkah dár 8: 30 chu a rawn ri zui a, Oliver-a pawh a rawn lang nghál thuai a, haw tùrin an chhuak zui ta a, Bawihtea pawm chung chuan kawngka ațangin ka thlah a, Oliver-a a awm ve avàng chuan pângngai takin ka thlah a.

Zàn dár 12 dâwnah min rawn be tehrêng a nih chu, ka phone ka lo silent hlauh a, a ri țawng țawng lo zâwk a, chuti chu ni lo se chuan ka hlau ngawtin ka ring. Chhàn loh ka han tum zet a; mahse, ka chhâng ta záwk a.

"Min ngaihtuah tih ka hriat vàngin ka rawn bia che a nih hi, ka mutna pawh a la rei lo, zanin khân ka duh ang eng mah ka sawi chhuak thei si lo va, i fapa duh tak vàng khân," a rawn tih chuan ka ner deuh sak a, a țawngkam hman dàn hi chu aw... ka fapa ka duatzia a hria a, a bula țawngkam țha lo leh vîn awka hman ka duh lohzia thlengin a hria. Zanin pawh khân a awki kha a sâng leh deuh a nih kha, a thiam loh a ni alawm, engah nge ka fapa chu a rawn puh leh deuh tlat ni?

"Zàn a rei tawh, in thleng tluang a, a țha e, a pawimawh viau loh chuan..." ka han ti ve salh a, a rawn thaw hawk a, chutah," Pawimawh teh rêng mai, tûn țum chu tu mipa dang lakah mah ka chhuah tawh dâwn lo che, chu chu ka thu tlûkna a ni, mipa dang lo melh hlek suh ang che, i hria maw?" a rawn ti ta charh charh a.

*TIHSUAL PALH I NEIH CHHÛNG CHUAN MIHRING I LA NI VE RENG TIHNA A NI MAI*