☆UNEXPECTEDLY YOU☆ - 33 By Dingdi Pachuau

 ☆UNEXPECTEDLY YOU☆ - 33 By Dingdi Pachuau

Bawihtea chu țhutthlèngah, min nghèng chialin a țhu mu a, a chhíngmit kawpza a rûl țan tih hriat tak hian a meng lep lep tawh a, a muhìl thuaiin ka ring, ka kuah vat a, Chhanzuala a awm ve tawha awmpui dang a neih loh hi chuan a ți dâk mai a, ka bul chêtah awmhmun a rem ve ziah. Ka thaw hak a, Chhanzuala hian riah chu a tum tak tak loh hrâm ka beisei; mahse, haw dâwn ta ni se, nakin deuhah pawh ni se, a tlai tawh viau mai a, tunah hian haw nghâl pawh ni se, Lunglei a thlen meuh chuan a tlai ve tawh ngawt ang. 

"Riah chu i tum tak tak lo ang tiraw?" ka ti leh a, ani lah chuan," Tum e," a lo ti mai a, ka en phei a,  kei min en lo chuan Bawihtea chu a lo en leh rùn tawh a, a rilruah eng tak awm ang maw? Ka ngaihtuah lêt a, pen a châk thu a sawi a nih tak kha, tunah pawh sâwn pen mawlh a ngaihtuah ang chu!

"Khawiah nge i riah ang?" ka tih leh chuan min rawn en ta thung a," In i nei a, khawiah nge riak se min tih a?" tiin khap hauh lo chuan min en ta rùn mai a, min tihrilhhai țêp a ni; mahse, lantîr duh lovin," Ka hre chuang nâng, motor-ah pawh i mu thei ang chu," ka ti leh a, a chek hluk a," Chu chu rem i ti thei ang maw?!! Min ngaihtuah dâwn lo em ni? Min khawngaih miah nange?" a rawn ti chhuak nghut a, a aw chhuak lah chu lungawi lo âwka a ni tih a hriat hliah hliah bawk a.

"Tûn ang hunah chuan tlai deuha rawn kal loh mai tùr a nia," ka la ti țálh tho. Ni e, ka khawngaih tho ang, engin nge a rawn kal chu ka hre lo nain bike chu a nih ka'n ring lo ringawt a, car-a a lo kal a nih phei chuan zàn riah nân ém chuan a nuam vak lo khawp ang.

"Kha pa kha zàn tin a lo lêng țhin em?" a rawn ti leh daih a, Bawihtea muhìl chu enin," Tlangvâl a ni alawm," ka ti mai a, ani chu a lo rûm nghut a; mahse, ka en duh lo ve tlat thung a. A lo meng rum leh emaw kha a ni ang a, a nih loh tal pawhin lungawi lo tih hriat tak khân min lo melh leh reng ang chu.

"Ka riak dâwn!" Kha maw, a lungawi lo chiang, ka chhàn dànah khân a lãwm lo a ni, riahah min han vau leh ta a ni a, 'vau' han ti ila ani chuan 'vau' chu a ti duh hauh lo ang, a lung a awi tawh loh hi chuan luhlul thiam ve tak mai hi a nia.

Bawihtea chu a muthilh chian tawh avàngin ka pawm a, khua a vawt ve deuh tawh nèn, khumah ka va mut a, mutpui nghál chu duh teh mah ila inlêng inthlahrung lo ka nei rih tlat si a, ka chhuak leh ta poh a, pindan kawngkhàr pâwn lamah chuan a lo ding reng tawh niin, chuta a lo din chu ka rin loh lutuk avàngin ka su lo chauh a ni! Ka en chho hau a; mahse, inhre chhuak vatin," Haw i tum chu a ni lo maw?" ka ti ta daih a, kal pelh mai ka tum chu, ka bânah a rawn man ta chat a.

" Haw tur chuan min duh tak tak em?"

Duh lutuk, nichîn ațang pawh khân riak lo tùrin ka ti char char a nih kha. Rual pâwl viau lo mah ila mi sawi theiha awm hi ka duh lo, nula țhalai leh pângngai pawh ka ni tawh lo va, chuta kára sawisep kài chu ka duh hauh lo, thil hre chiang mang lo va thu dik ni àwm taka sawi duh kan awm zêl bawk si.

"Aw..."

Min en vung vung a," Min ngaihtuah lo hle mai," a ti chhuak sup phawt a, chutah," Riak lo tùra min duh viau si a nih chuan--" tih leh rawn kùn hniam thut a rual nghâl a, lo thlêk sawna lo chêt sawnna hun pawh a awm lo, min rawn fâwp thut a nih ber chu. Ka hamhaih chiang asin, chêt sawn emaw lo dan emaw pawh ka tum hman lo, ka dawh tawp. Ani lah chuan 'Ka duh ka hmu ta' ti ni ang hrimin min hrem nân a niang chu, na zet hian min fâwp bawrh bawrh a; mahse, nâ ka ti phal lo, kha leh chen kha amah ngai chung leh min fawh suangtuah rauh rauh chunga zàn ka muta ka mangphan kha a tam ém asin, min fawha a duhthawh dàn lah a la ngai reng si, a tìrah chuan min fâwp dìm lêm lo mah se a hnuah erawh dam tak leh duat takin ka thluak a buai nuai nuai thlengin... Ka thluak a rawn fìm telh telha ka inngaihtuah harh meuh chuan ka lo fáwp lét ve țan reng tawh niin.

Ka tàwp chiang kher mai, ani erawh chuan min la fáwp ngar ngar tho a, dam leh duat takin a ni min la fawh ni, min tàwpsan chu a tum lo ve khawp mai; mahse, ka harh fîm tawh miau mai, a âwmah ka nem sawn ta nghâl a.

"Khatiang thil kha a thleng tawh tùr a ni lo," ka ti sap a, ka aw chu khùr lo tùrin ka thunun nasa; mahse, a khùr tho, ani pawhin a hre tho ang. Hai der theih ni mawlh hek lo le, ka inzilh ru mawlh mawlh a, nunhluia lêt leh thei ka nih lohzia inhrilhin ka tûn dinhmun, pasal nei tawh ka nihna leh fapa enkawl tùr ka nei tih leh nula anga awm thei ka nih lohna theihnghilh miah lo tùr pawh chuan ka inhrilh ru mawlh mawlh bawk a.

"Thleng ang, a thleng leh fo ang, tûn lawka kan awm dânah pawh khân ka hria a ni, ka tân chuan i la pângngai reng, D'Puii kha i la ni reng a ni, chu chu eng thil mahin a tidanglam thei ngai lo ang," a ti ve thung a, ka kut chu a la chelh reng a, phelh tumin țang ve teh mah ila a vuan nghet lutuk tlat si.

"Haw tawh rawh!" țawng tùr ka hre lo lutuk chuan ka ti ta ngawt a, ani erawh chu a ngawi vung vung reng a, kan kut erawh a insual deuh fat fat reng thung a, a hnu deuhah chuan," Riah ve mai chu i remti thei thláwt si lo a maw? Umm, a țha e, ka riak lo ang," a ti ta sup a, ka kut a vawnna chu thlahin," Mipa dang tân hun lo insiam miah lo la, i rilru pawh pein ngaihtuah hek suh ang che, ka sawi hi hre reng la, kan pahniha hma lam hun tùr chauh ngaihtuah ang che," a ti leh a, thil dang sawi tawh lo chuan kan in ațang chuan a chhuak zui ta nghâl a. 'Mang țha' pawh min ti lo va, kei pawhin ka ti chuang lo, chutiang teh thuta min hawsan chu ring bîk hek lo le!

Ka muhìl thei lo zui lehnghâl a, a thlâ chu ka hau ka hau ringawt mai a ni, sâwt erawh a sâwt lêm lo khawp mai thung. A châng leh ka hmui chu ka han khawih leh ringawt a, chutah, duh lovin ka hmui chu ka han bêng leh bawk țhin a, ngaihtuah zui loh ka tum lah chuan ka thei hauh lo lehnghâl a, ka thin a rim hlur mai.

Ani'n kan pahniha bul țan leh chu duh mah se thil theih loh a ni. A lo ti tak tak a nih pawhin khap dàia thil theih a nih lohzia hrilh tùr ka ni, thil theih a ni lo hrim hrim, he khawvêlah hian hmangaihte chauh an innei thei bík lo va, hmangaih loh pawh an innei fo va, chutiang chu ka chungah thleng vein vui dáwn mah ila awmzia a awm lo. Ka hmangaih ber tân ka thianghlim zo tawh lo va, tunah phei chuan nula pawh ka ni tawh lo bawk, min la duh reng niin a inhre mai mai a ni, a tân zawng hmangaih tlâk ni tawh lovin mi bawlhhlawh, phatsantu, na tak tuar tùra kalsantu leh hrehawm taka siamtu chauh ka ni zâwk.

A tûk zîngah a message ka hmu a, data ka off vàng a lo ni, nizàn lama tluang taka in a thlen thu leh a thil sawi hre reng tùra min chahna a lo ni  a, ka chhãng lo, nizàn lam message a ni tho a, bâkah, chhàn loh hi a țha, kei pawh a theih ang angin a lak aţangin ka inthiar fihlîm ang, chu chu kan pahnih tân a țha, min la duh rengah a inngai mai mai a ni, kan inkârah thil tam tak a thleng tawh a, hmána mi ang kha kan ni tawh lo, kei phei chu keimah chauh inngaihtuah thei ka ni tawh lo zui.

Zàna Dinpuia lo lêng chuan nizàn lam chanchin kha a sawi chhuaha Chhanzuala chu tu nge a niha a chanchin min zawh ka ring deuh a nia; mahse, a sawi chhuak miah lo, a hma ang chiaha titiin Bawihtea chu a infiampui leh a, boruak a pângngai leh thlap tho.

Lungleia kan chhuk dâwn hnaihah chuan Chhanzuala chuan min rawn biain," Mi dang lo be miah suh, ka rawn hruai ang che u," a rawn ti ta tlat mai a, biak ka la nei chuang lo nain min rawn hruai a tum kher chu țûl ka ti lo khawp mai a, sawisèlsak ila a tuang a tichhah sauh emaw a ni leh ang a... he pa hi chuan min va tibuai tak, kan dam țhat hi chuan inngaihsak viau tùr kan ni lo asin le.

Zirtàwpnia chhuk thlâk tum kan ni a, Ningàni chawhnuah a rawn chho a, zàn chu rawn riah a tum ta ngei e. Thil thleng thei leh a hnu lam tùr hi a ngaihtuah phâk ve si lo, nge a ngaihtuah duh lo zâwk ni? A, rawn thleng phawt mai teh se, ka ngaihtuah lâwk peih tawh bík lo ve.

School ațanga kan bàna in ka thlen chuan a lo la thleng lo va, ka inthlâk fel hnu chuan motor ri ka hre zui a, kawtah a rawn ding zui ta dat a. Min rawn hruai tuma lo kal ve ta chu lo ngaihsak loh theih ni bîk hek suh, ka va chhuah chuan motor ațangin a lo la chhuak lo va, min rawn enin," Kha hei hi lo la teh, dìm la," tiin parcel ni àwm tak hi polythene-in a rawn khai chhuak a, ka lo la ve mai a, eng tak chu ni ang maw ka ti rilru a.

Thingpui ka lumsak nghál a, a rawn luh chuan," Cake a nih kha, helaiah chuan ei duh mah ula, in duh duh hunah in ei thei àwm si lo a," a rawn ti a, kei chuan," A ngai hleinem maw le, i va insêng nasa dâwn êm!" ka lo ti a, ani lah chuan," Min rùl leh vek ang chu," a lo ti mai a, a fiamthu ve a nih ringin ka en vat a; mahse, fiamthu thawh hmel rêng a pu lo.

"Tehréng mai."

Bawihtea leh Engmawia lo haw chuan cake chu kâwkin," An ei duh ang," a ti sup a, thingpui siamin ka pe ve ve a, cake an hmuh chuan an han lãwm mai mai khawp a, an nui dùn var var mai. A ni lah tak a, hetiang cake hi helaiah hian an siam ve ngai em tih ka hre lo va, Lunglei ațanga kan lei haw a nih ngawt loh chuan hmuh tùr a vâng ve êm bawk a ni.

"A tui in ti em?" tia ka zawh chuan lu an bu dun nghat nghat a, Engmawia chuan," A tui, a dang ka duh leh," a lo ti a, Bawihtea pawh chuan min dîl ve leh a, lian vak lo pahnih chu ka zai thla leh a, ka pe dùn leh a," In ei zawhah cake rawn leitupa saw làwmthu in hrilh dâwn nia," ka ti a, Chhanzuala lam chu an en dùn zak zak a. An ei zawh chuan ka rin loh deuhin an pahnih chuan a bulah chuan va kalin," Cake leitupa, a tui lutuk," an va ti a, en chu châk viau mah ila duh lovin ka ngaithla ru thung a, ani chuan," Tui in ti tak tak maw?" a lo ti ve ngei a, Engmawia chuan," Aw, a tui lutuk, lo lei ziah rawh aw," a ti tak sauh sauh a, ani pawh chuan," Lei ang, Ânu thu in âwih phawt chuan ka rawn lei zêl ang," a lo ti ve leh a, Bawihtea chuan," Lian deuh, tam deuh lo lei rawh aw," uar zet hian a ti ve a, Chhanzuala chuan,"Um, lian deuh, tam deuh leh tui deuh ka rawn lei leh ang a, in ei leh țeuh dâwn nia," a ti leh a.

Naupang a ngaina lëm lo tih ka hria, Bawihtea phei hi chu a ngaithei lo viau a nih nghe nghe kha, amah phatsana pasal atâna ka neih tãk Zda fapa a nih vang a nih ka ring a, a dik ngei pawhin ka ring bawk. Naupang hian anmahni ngaithei lotu leh duat lotu na nâ nâ hi chu an lo hre ve a, Bawihtea pawhin a ngainat bîk miah loh hi; mahse, vawiin chu an inbe ve tlat mai, a hnuah phei chuan an pathum chuan an chhuak ta dial a, khawiah nge an kal dâwn tih pawh ka zâwt hman lo.

Motor-in a lo phur kual niin, an rawn haw chuan naupang pahnih chuan lollipop hmuam chung hian hahîpin nuam an tih thu chu an rawn sawi hlut a, an hmel aţang chuan an hlim tih lah a hriat bawk a, mak ka ti viau a ni.

Zànriah ei khamah chuan thuamhnaw ken haw tùr ka siam țha leh a, ka insiam nual tawh nain a țhen ka phawrh leh a, a dang ka dah lút leh a ni, Engmawia mut chhuak chuan haw a duh ta tlat mai a, Chhanzuala chuan," I țhianpa nèn hian kan thlah ang che aw, motor-ah kan chuang leh ang a," a lo ti vat a, Bawihtea chuan phûr zet hian a lo 'aw' vat a, a phùr êm avang chuan ka lo inrawlh duh lo va, an inzui chhuak ta hlawm a.

Ka insiam malh malh a, Bawihteate chu an rei loh hrâm ka beisei, Engmawia a mut a chhuak hma si a, ani pawh a chhuak ve thuaiin ka ring, ka insiam zo ta tihah chuan Dinpuia a rawn lût a, a rawn phûl hlut a, Bawihtea a hmu lo chuan a awmna min zâwt a, ka hrilh ve mai bawk a," Naktûk chuan in chhuk dâwn ta maw?" a ti leh a, kei chuan," Aw, chhuk mai loh chuan kárleh lam daiha chhuk a ngai àwm sia," ka lo ti a, ani chuan," Hetah Krismas hmang ve mai ula ni tùr a nia; mahse, helai chu a nuam lo ve êm mai a, hrehawm in ti ang," a ti leh a.

"Hrehawm tihna chhan tùr a awm hleinem, Bawihtea hi a pi leh pute hian an ngai thei êm mai a, chawlh lai hi chuan an bula awmtîr hrâm hrâm hi ka duh ve a," ka tih chuan," A dik alawm, ka ti mai mai a nih kha," a lo ti vat a, chutah, a ngawi deuh dat a, a aw a han thian leh té tê a," Dinpui, thil hrilh tùr che ka neih kha ka hrilh tawh ang che, mipain hmeichhia a duh ang hian ka duh che a ni," a rawn ti chhuak ta a.

Chutiang tehtawla min hrilh ran chu ka lo beisei bîk hauh lo va, chhàn mai ngaihna pawh ka hre lo, ka ngawi deuh reng a, amah vêk chuan," Min chhàn har i tih ka ring rêng a. A hma daih ațang tawh khân hrilh che ka duh țhìn a, hmaichhanah lo pawh phone hmang pawh hian hrilh che ka tum nasa țhìn; mahse, ka ngam ngang lo țhìn; mahse, ka tläi mai ringin ka hlauthãwng tawh bawk si a, ka hrilh rãwih ta che a ni, ka tlãi tawh em tih phei chu ka hre lo va," a ti leh chat chat a.

"A làwmawm hle mai, ka chunga chutiang rilru i lo pu chu ka phû loh a ni a, zahawm ka ti bawk che, kei chu min hriat angin hei, nula pângngai pawh ka ni tawh lo va, fa ka nei tawh bawk, ka dinhmun hre sa veka min la duh thei chu làwm loh rual pawh a ni lo--" ka sawi lai mêk chuan kawngka a rawn rì a, Chhanzuala chu Bawihtea muhìl pawmin a rawn lût zui ta nghâl a. Sawi zawm zël chi ni tawh hek lo le, ka ngawi zui ta a.

Eng chena rei nge kawngka bulah chuan a lo din tawh ang? Kan thu sawi kha a hre vek ngei ngei ang le, he pa hi, a va ngeiawm tak! 

"A muhil a ni maw? A muthilhna a rei tawh em?" ka ti ta vat a, ani chuan," Rei vak lo," ti ringawtin min chhâng a, a țawng chhuak ri aţang chuan a hlim lêm lo tih ka hre thei nghãl mai, Dinpuia lo lèn vàng hi a nih ka ring a.

"Ka lo mut nghâl ang e," ka ti a, ani chuan," A harh ang, a mutna tùr min hrilh mai rawh," a lo ti thung a, room-a luhpui chu ka duh loh avàngin," Khumah khân mut tawp mai rawh," ka ti ve leh a, ding chungin min rawn melh viau tih hre reng mah ila ka ngaihsak duh hauh lo, a hnuah erawh room-ah chuan a lût ta tho a.

"Zanin chu a mu hma hle mai, chhùn lamah a tãl hah deuh a niang," Dinpuia chuan a lo ti a, kei pawh chuan," Ni leh maithei a ni, naupang hi zawng, an chhel êm mai a, an dam țhat ík hi chuan che lo hian an awm hlei thei lo țhin a, an duh tak han tih phal loh lah hi a ni mang bîk si lo va," ka lo ti ve a.

Chhanzuala rawn chhuah hnu chuan kan pathum inkár boruak chu sawi chhuak lo mah ila engtin emaw kan awm vek tih a lang reng a, Chhanzuala phei chu a ngawi tlat a, Dinpuia chuan a be zauh zâwk a, chu pawh chu a rùl tâwk chauhin a lo chhâng, a awm dàn puitling lo lutuk chu hahthlâk ka lo ti a, ka nuih pawh a tiza deuh hial a ni.

Dinpuia mi ã nilêng a ni lo a, kan boruak chu a man thiam ve bawk nèn, rei vak lo hnuah chuan a ding ta uaih a," Naktûkah chhuk in tum ta mai sia tiin ka rawn tlawh lawk che u a, mu hma rawh u, chuti lo chu kawng sawtah in tlãn dáwn si a, in chau lutuk palh ang, tluang takin in zu chhuk dâwn nia, chanchin kan inhrilh zêl ang chu," a ti a, kei chuan," A la hma alawm," ka lo ti vat a, nui suk chung hian," La hma deuh mah se vawiin lam ka hna thawk ka chau ve deuh a, mut hma ka duh deuh tlat, in chhuk hmaa rawn tlawh hrâm che u ka duh a, ka rawn kal hrãm a ni," a ti leh a, kan inmangțha hnu chuan a chhuak zui ta nghâl a.

Țawng lovin kan țhu reng phawt a, a hnu daihah chuan," Hmangaih biahthu dí in inhlan lai ka rawn tikhaihlak ta si che u a, khaihlak han tih lêmah ka rawn chhanchhuak che a ni zâwk mah ang chu, i duh tak tak dáwn hauh si lo va, chuvàng chuan ka rawn luh hun kha dik chat chat i ti viau lo maw?" a rawn ti ta chiah a, min lo ngaithla ru reng a lo nih chiah hi.

*HE KHAWVÊL BUAINA KÂRAH HIAN KAN TÂNA MI ȚANGKAITE TÂN CHAUH HUN NEIH TUM LOVIN ENG MAH MIN TIHSAK VE THEI LOTE TÂN PAWH HUN INSIAMSAK ŢHIN ANG U, CHU CHUAN ENGTIANGIN NGE AN NUNAH THU A SAWI THÛK KAN HRE PHÂK HAUH SI LO*