☆UNEXPECTEDLY YOU☆ - 34 By Dingdi Pachuau

 ☆UNEXPECTEDLY YOU☆ - 34 By Dingdi Pachuau

"Mi thu sawi, ngaithla ru dûk dûk mi pângngai an awm ngai lo," ka lo tihsak a, ani chuan," Ka ngaithla ru awkawng lo, hriat loh theih lohin in sawi a nih kha, i fapa ka pawm a, ka beng ka hup thei hleinem," a lo ti ve thung a, kei chuan," Kawngka bulah i ding deuh reng tih a hriat mai alawm," ka ti leh a, kan thu sawi a lo hre vek chu ka ngei deuh hlek a, lehlam takah chuan tlêmin ka thawa veng deuh tho bawk si, Dinpuia kha ka hnar ngei dâwn a, khami thu ka sawi hman lo kha chu fuh ka ti viau tho mai.

"A sawi leh a nih chuan ka tâ i nih thu hrilh ang che, ka tâ i nihzia chu Krismas hunpui chhûng ngei hian kan sawi fel bawk ang, i duh chuan min hnial thei; mahse, a sâwt chuang lo ang tih erawh hria la," muang deuh hlek leh chiang fek fawk hian a rawn ti chhuak ta a, ka en vat a, thutak hmel zet hian min lo en reng bawk a.

"Chhanzual, thil--"

"Ka hming i lam dànte hi ka ngai țhìn, ka bengah hian a ri nawn fo a, ka ngaih zual châng che phei hi chuan min ko rî ka lo record lo kha ka inchhîr țhin asin, ka hming i lam hian chakna thar ka nei țhìn a, ka hmaah eng thil pawh thleng se ka tawrh chhuah theih vek ka ring țhin bawk, hloh leh che hi ka duh tawh lo va, ka thî a nih ngawt loh chuan mi dang i neih pawh ka remti thei tawh lo bawk ang," a lo ti leh charh charh a, a thil sawi chu a ti mai mai lo ang tih a sawi dàn ațang chuan a lang reng mai si a, lãwm ru viau e ti lo chuan ka rilru a tihah ve leh tlat tho a, ani anga mal tlat  ngawt ka nih ve lohzia chu ka ngaihtuah a, thil tam tak ngaihtuah tùr ka nei a, ka fapa leh ka chhûngte... ka thaw hak a.

"Mutna tùr ka'n siam tawh ang e," tiin ka tho ta daih a, ani chuan," I rilru tihah miah suh, engkim ka ngaihtuah fel vek mai ang, ka kutah engkim dah rawh," a ti leh a, ka chhâng lo, kan ngaihtuahna inang lo lutuk vàng chuan ka chhâng duh lo, a dinhmun leh ka dinhmun a inang lo êm mai, pasal neih leh phei chu ka la tum chhin lo hrim hrim.

Mutna ka han phah tùr chu," Siam buai a ngai hleinem, țhutthlèngah hian ka mu thei mai ang," a lo ti a, phah mawlh mawlh pah chuan," A harsa lo," ka ti mai a, ka phah zawh chuan," I ina i khum ang chuan a nuam dâwn lo tih chu i hre sa tho ang a," ka ti leh a, ani chuan," I bul hnaia ka awm theih chuan a nuam a ni mai," a lo ti ve thung a.

Zanin zet chu a zia a dang angreng si a, a țawngkam leh a thil sawi zawng zawng nèn, a bula awm reng pawh ka inthlahrung ka ti dâwn nge, awm reng ka duh lo. Ka ha nâwta ka hmai ka phih zawh hnu pawh chuan ani chu a țhutna ngaiah a lo la țhu reng a, mak ka ti deuh hlek a," Mu rawh," ka ti ta nghe nghe a, ani chuan," A la chhuak lo alawm," a lo ti sup a.

"Men rei chu a țha lo, hrisèlna atân pawh a țha lo," ka tih chuan," Ka hria, nang pawh a hma te chuan i men reì ve viau tho țhin kha," a lo ti ta thung a, ka men rei țhinzia ngaihtuah lêtin ka nui sak a, tunah chuan nu ka lo ni ve tawh bawk a, ka meng rei viau ngai tawh lo, engkim ka kutah a awm vek tawh si a, inthlahdah thei ka ni tawh tlat lo.

Ka mutsan a, mut hmunah erawh ka muhìl thei bîk lo, ka meng kar reng a, a thãwm chu ka ngaithla pah reng a, mu thãwm pawh ka hre chuang lo. A la țhu reng a ni maithei, thingtlânga zàn hun hmang ngai lo a ni si a, a mu thei rih lo a niang.

Ka phone chu a rawn ri țang a, ka lo silent leh lo pek a nih hi, ka han ban a, WhatsApp message niin a hnên ațangin a ni, lehpek chuan a.

*In khatah, ka piah lawkah i mu tih hre reng chung chuan mut a chhuak thei lo*   tih hi a lo ni, a va ho mai mai tak!

Chhàn ka han tum zuau a; mahse, ka țhulh leh ta zâwk, awmzia a awm lo, a tân chuan eng mah ka ni tawh lo va, beiseina thar nei thei tùr pawh ka ni lo, han sawi thar leh hluai mah ila, eng ram ropui mah min thlen chuang lo ang.

A hnuah message dang a rawn thleng leh a, hei ve thung hi chuan ngaihtuahna a tithui deuh. Kan pahniha kan inkâr hun hlimawm  chauh ngaihtuah a duh thu leh chumi bâka thil thleng rêng rêng chu nawh reh vek a duh thu leh kan hma lam hun atân pawh hun hlimawm chauh a ngaihtuah țhin thu a rawn sawi leh a, kan hma lam hunah eng chhuanlam pawh siam ka tum a nih chuan a pawm loh tùr thu a rawn sawi lang leh bawk a, ka chhiar zawh chuan ka hmui chu ka pet ka pet ringawt a.

A tûka ka thawh chuan a lo la harh lo va, a lo la mu tui viau a ni ngei ang, a lo thaw sâk sâk a, sîr zâwnga muin a bân dinglam chu a lo lukham zân a, a hmel hmuh pawh a hahdam viau mai, a la harh lo chu ka hre thiam reng, a thawh hun a la ni tlat lo, a inah pawh khân zîng lamah chuan a tho hma fahran ngai lo a nih kha.

Chaw ei khamah muangchâng lutuk lovin kan chhuak a, kan chhuah dâwnah Maduhite nufa an rawn lang a, nizàn lam khân an lo inbe nél viau hman a ni ngei ang chu, Maduhi chuan Chhanzuala chu a rawn be bawrh bawrh a, Engmawia pawh chuan a lo be ve reuh a, motor-ah pawh chuan rei vak lo chu a chuang ve leh nghe nghe a.

Bawihtea a rui tlat mai a, a fuh lo tak zet a ni. Kawng lakah pawh kan din zauh zauh phah, a luak ve țhin bawk nèn, Chhanzuala car hi a phui țha lutuk a ni maithei a ni.

Harsatna dang tâwk lovin Lunglei chu tluang  pângngai takin kan thleng a, tlàn chak viau theih a ni si lo va, kan tum ai chuan kan thleng tlai deuh hret. Chhanzuala chuan in thleng min thlah a duh tlat a, ka sawi buai lo nain mak ka ti deuh a, Bawihtea pa lo chènna țhin in chu hmuh a duh pawh ka ring lo a nia.

Inah erawh a rawn lût ve duh lo, ka nu chuan a lo la hria niin, lût ve rih tùrin a sáwm viau a nia; mahse, a lo hnial tlat thung, làwmthu kan inhrilh hnuah chuan a tlãn lêt zui ta nghâl a, ka nu chuan," A fel tehlul nèn, thingpui lumsak ka duh asin le," a ti zui vang vang a.

Chhûngte bul kan thleng leh ta chu a ni a, rilru a nuam leh ta siai siai e. Maduhite ka han bia a, tluang taka kan thlen thu chu hrilhin Krismas an rawn bazàr huna min rawn tlawh ve ngei tùrin ka hrilh tel bawk a, Dinpuia pawhin min rawn be zawk a, tluang taka kan thleng thei chu làwmawm a tih thu rawn sawiin Bawihtea chanchin min rawn zâwt tel a, a ruih deuh thu ka hrilh chuan," Aw, a ni maw? Ka va khawngaih reuh êm! Motor ruih hi chu a hrehawm si a, a chàu vek dâwn a nih chu," a rawn ti a.

Dinpuia hi ka ngei thei hauh lo. Tlangvâl fel tak a ni a, Bawihtea min ngaihtuahpui êm êm bawk, ka fapa min ngaihsakpuitu hi engtin nge ka ngei theih tehlul ang? Ka khawngaih zâwk a ni, a chhan chu min duhna hi ka chhâng lêt ve ngai dáwn si lo va, ngaihzâwng neih ka tum loh bákah a aia hma hian hmangaih ka lo tawng tawh a, ani lo mi dang hnêna pêk tur hmangaihna ka nei tawh lo a ni. Ka hmangaihna zawng zawng mi pakhat hnênah ka hlàn tawh a, a dang ka nei tawh lo. Hmeichhe fel tak tawng se tih hi ka duhpui a, ka beisei bawk a ni. Kan nufa chungah a țha êm êm mai si a, nupui țha tak neiin fapa țha tak nei bawk se, amah hmangaih ngawih ngawihtu leh ani ngei pawhin a hmangaih lêt ve ngei hmeichhia nei se ka ti tak zet a ni.

Krismas lo thleng tùr chu khawpui lamah chuan an lo urlâwk nasa viau tawh mai a, thingtlâng lam ngawt ai chuan rilru pawhin Bethlehem lam a hawi deuhin ka hre bawk; mahse, thingtlâng lama Pholêng leh Japanhlo pâr vul chûk khân Lal piang tùr chu an làwm ve niin ka hria a, pangpár mawi tak ni hran lo mah se thinlung lamah awmzia an nei a, thu an sawi ril ka ti a, mi â ber tân pawh an pàr hun hian Lal thar lo piang chu a rawn hril chiang viau a ni.

Ka nute kan tlawh a, U Kimi pawh a puar nasat viau tawh avàngin a tân rawn kal a buaithlâk a, kan han tlawh a, a pum chu a puar lian khawp mai a, nau a lian viauin ka han ring ringawt a. Inzo lo viau mah se amah a hlim a, hmuh a hahdam tho, a nu lah chuan a lo duat hmel êm êm zui a, tuna a pasal Rinnunga hi a nei fuh ka tihpui hlê a ni, U Tluanga a lo țhen pawh kha Rinnunga tân, an pahniha tân a lo nih chiah hi ka tih phah hial a ni. Nupa induh thiam leh induat thiam tak an ni si a, U Kimi hlim hmel mawlh chu hmuh a nuam, chhûngrilah hian nuam ka lo ti ve êm êm ringawt mai a ni.

Ka nute ina kan nufaa chaw eia min sàwm chuan ka nu chuan U Kimi chanchin chu a sawi luam a," Nau a neih hun a hnai tawh si a, tlêmin a kum lam a lo tam ve tawh bawk nèn, țha tak hian a nei thei lo ang tih ka hlauhpui êm mai," a ti sar sar a, kei chuan," A, i lo hlauthãwng mai mai a nih chu, hlauthãwng suh, amah a hrisêl țha a, nau lah a țha bawk a, țha takin a nei mai ang, ka beisei tlat a ni," ka lo ti ve thung a, ka pa pawh chuan," Ni e, țha takin a nei tùrah ngai ang, i nu hi a hlauthãwng tlat a, i u hriatah hian a sawi chhuak ang tih te a hlauhawm zâwk a ni, 'țha takin a nei thei ang' tia fuihtu tùr ber a nih zâwk nèn," a lo ti ve a.

Tûn țum chu kàwn chei pawh kan fang ta lo, U Kimite an thei tawh si lo va, Sêntei lah a lo hman lo ve bawk si nèn, Bawihtea nèn kan in kan chei leh a, a hlim êm êm tho. Kan in chei chu mawi hi a'n ti êm ëm khawp a, Engmawia kan phone pawhin a hmuhtîr ve thlap a, chutiangin Dinpuia pawh, Dinpuia lah chuan," I va chei thiam ve a! In lo lét hunah kan in min cheisak ve rawh aw, a mawi êm mai," a rawn ti a, nuam a tiin a phûr sârh sârh khawp mai.

Kumin chu a thuamhnaw tùr online lamah ka chahsak lo va, bazârah lei ve tawp mai a ngai. Ka peih lo ru khawp mai a, mi tâwt deuh deuh kâra inzeh kual ber kha ka peih lo va, Bawihtea ka hruai tel zêl a ngai dáwn bawk nèn, ka huphurh ru khawp mai, amah lah chu a la phûr viau zui a, kal thuai thuai ngènin min tur sek mai a, a tàwpah chuan peih lo zet chuan ka chhuahpui ta a.

Mahse, Bawihtea hi chu a fel ve a, thuamhnaw phei chu lei a ngèn ngai lo; mahse, motor lem hi kan kal pèl hlei thei țhin lo va, kal pelh hi kan harsat ziah, lei ngèn chuan a țap ngai chuang miah lo nain a awt tih ka hre ve reng mai si a, nu rilru ațang chuan fate awt ngawih ngawih ta chu ka leisak leh nge nge țhin, chu chu vawiin pawh hian kan tawng leh ta a ni. Motor bàwrin kan báwr leh ta a, 'fapa pakhat chauh alawm ka neih le' tiin kei pawh ka inthiam chawp a, nakinah, kum li kum nga a ral hnuah chuan tuna kan lei ang hi leisak leh pawh tum mah ila a duh tawh tawp nâng.

"Âma, cake leitupa saw," tia ka cardigan hâk tlânga a rawn pawh chuan ka en vat a, a hawi lam chu hawi ve vatin Chhanzuala'n a lo hûi lauh lauh chu ka hmu zui ta nghâl a, 'cake leitupa' han tih deuh kher chu, nuih a tiza reuh mang e!

"In báwr si a, ka lo thlah ang che u aw, Sir?" tiin Bawihtea chu a han en a, ani chuan," Motor kan lei ţeuh a," tiin a lo chhâng a, a țih dâk tawh miah lo, engtin nge maw an lo innèl tâk ni?

"In inlei zawh tawh chuan lo kal r'u le," tiin ka thil khai pakhat chu min rawn chhuh nawlh a, hma a hruai zui ta nghâl a, hnialna hun pawh a awm lo rêng rêng, Bawihtea'n a zui nghâl avàngin ka zui ve lo thei lo.

A motor-a kan chuan hnu chuan kan in lamah min tlànpui mai dáwn emaw ka ti a, inherin a in lam panin kan tlãn ta vûk vûk mai a," Khawi lam nge kan pan dáwn a?" ka ti lui ve ngat a, ani lah chuan," Sir kha Lunglei ka'n fanpui ang e," a lo ti mai a, Bawihtea lah chu a lo phûr khawp mai a, a nui var var a.

A ina lût nghál mai lo chuan kan tlãn kual leh rih a, hmun hrang hrang an lo chei vêlte pawh chu kan hmuh theih phah a, chhùn ni èn lai a ni nâin an cheina hmanrua hrim hrim chu naupang tân chuan a hmuhnawm tho a, Bawihtea pawh chuan a sawi zui nasa, hmuhnawm a ti viau tho a ni.

A ina kan luh chiah chuan Bawihtea khalh tâwk lek tùr tri-cycle hi bang kil sîrah chuan a lo awm reng a, chu chuan a mit a la nghâl chat rêng bawk a, Chhanzuala chuan," I chuang chhin châk em? Lo kal la?" a ti a, ani lah chuan phûr tih hriat zet hian a thil ken lai chu min rawn pein Chhanzuala chu a zui ta nghâl a.

Kan awm chhûng chuan chu tri-cycle chu a kalsan lo, kan haw har phah bawk. Awm rei ka duh lo a nia; mahse, haw ka duh hunah pawh chuan haw a la remti ve tlat lo va, in chhûngah chuan a tlãn kual ruai a, Chhanzuala lah chuan," I duh tâwkin khalh kual rawh, i lo lèn apiangin i khalh ziah dáwn nia," a lo ti a, dârkâr khat chuang zet kan lèn phah a ni.

"Naupang i lawm loh nèn," ka tih chuan," Ka lawm a ngai miau si alawm, nang ka duh che chuan i fapa ka duh tel a ngai a, a fapa ka duat miau chuan a nu tân pawh hnar ka har țalh dâwn bawk a," a lo ti heu mai a, zêp lah hi a nei lo bawk si a, a rilru dik tak a nih ngei pawh ka ring.

"Nang nèna inkawp leh hi ka duh lo," ka ti chhuak ta phawng a, heyia ka sawi chhuah loh chuan beiseina sâng tak a nei ang a, chu a beiseina chu a hlawhtling dâwn si lo va, amah bawk a na leh dâwn a ni, kei chu han na leh chuang tùr ka awm tawh lo va, thil a nihna angin ka en liam mai mai thei tawh ngei ang.

"Ka hmeichhe duh fa chu ka ngaihtheih a ngai a, chutiang tùr chuan hma pawh ka la rêng a ni, kan inkâra harsatna a awm leh hi ka remti dâwn lo va, harsatna awm thei tùr nia i rin deuh apiang chu min hrilh hreh lo la, ka vãihmà zêl mai ang, nang chu i lo inrawlh ve a ngai hauh lo bawk ang. Mipa ka ni a, mipain thil ka tum chu tihhlawhtlin a ni ngei bawk ang," a ti ve thung a, ka thil sawi ve kha chuan ngaihpawimawh a hlawh lo ve chiang khawp mai.

Bawihtea chu ka en phei a, hlim zetin a lo la tlãn kual a, ning àwm hmel pawh a lo la pu lo, a hlim lai han pawh chahsak chu ka duh meuh si lo; mahse, Chhanzuala nèn hun fâl neih dun hi ka duh vak bawk si lo, a bula ka awm tam chuan ka thil tum ve kha ka hlen lo ang tih ka hlau a ni, a lama ka thinlung awm dàn hi a la ngai reng si a, chu erawh hriattîr loh dàn ka la dap hrâm hrâm zêl chu a nih ber hi.

"Thil thleng lo tùrah i beiseina nghat suh," ka tih ve pawh chuan ka thil sawi chuan a ngêng a chhun hlawl lo tih hriat tak hian," Kumin chu kum dang zawng aiin a vawt lovin ka hria, December thlaah hian khua kha a vâwt ve țhin viau tawh khân ka hria asin le, nge ka bula awm hian i zir vàng zâwk? Chu chu thil ni thei tak tùr a ni," a ti daih a, ka thil sawi ve a ngaipawimawh lo lutuk chuan ka thin a tirim lek lek a ni.

A hma aia tlêma ring deuh zâwk hian," Nang chuan beiseina i nei thei a ni mahna, kei chuan beiseina neih ka tum loh bâkah kawppui neih leh ka tum tawh lo hrim hrim," ka ti leh a, ani lah chuan," Chutiang țawngkam malsâwm lo lutuk chu chhâk chhuak lo teh, hmeh pawh i inhmeh lo, i fapa sâwn a hre rêu rêu ang e," a lo ti thung a, chutah, thoin Bawihtea chu a pan phei a," Chuan a nuam bawk em? Thu i âwih viau phei chuan sakawr lem, chuan theihna pawh ka leisak leh maithei che a ni," a va ti a, ani chuan," Chutiang chu a awm maw?!!" a lo ti a, Chhanzuala chuan," Awm teh rêng mai, an zuar țeuh alawm, i lo lèn leh hunah chuan ka lo lei hman tawh maithei, i rawn lêng leh thuai ang em?" tiin a zâwt leh a, ani chuan phûr zet hian," Aw, chaw kan ei zawhah kan lo lêng leh ang," a lo ti vat a.

"A țha, Áma thu âwih la, Àpi leh Àpu thu i âwih bawk ang a,  i lo lèn leh hunah i chuang ngei ngei ang," Chhanzuala'n a tih chuan," Kan haw tawh mai dâwn em niang, Bawihte?" tiin ka lo inrawlh ta vat a, ani pawh chuan," Aw le," a lo ti ve mai a; mahse, a chuanna cycle ațanga chhuk erawh a hreh hmel khawp mai.

A nu Sêntei tlawh leh lawk kan duh avàng chuan kan haw ding nghâl thei lo va, ka remti lo chung Chhanzuala chuan min hruai leh a, Bawihtea kalpui lo ila chuan ka hnial fithla thei ngei ang; mahse, a hriat laia inhnial ka duh loh vàng chauhin ka zui leh ta hrâm a ni.

Sêntei chu a lo buai ve khawp mai a; mahse, hun a lo insiam vat a, inhralh duhthawh hun lai a nih vàngin rei erawh ka awm duh lo va, kan ințhen dáwn chuan," Zànah ka rawn bia ang che," tiin awmze nei zet hian min melh pah ralh a, Chhanzuala a tel ve bawk sia, min ringhlel nghâl tih ka hria, ka ngaihsak duh lo lui zâwk a.

In kan thlen dâwn chuan," Ka nghâk rei ve ta che a, a nih ang anga lan hi a hun tawhin ka hria, i nu leh pate pawh ka rawn be hreh miah lo a nia, kan pahnih tân a nih phawt chuan eng mah tih hreh lah ka nei hek lo, i nu leh pate hi i vêngthãwng niin ka hria a," a rawn ti chhuak ta a, rang zet hian," Ni lo, ni lul lo mai, ti lul suh," ka lo ti vat a, ka duh aiin ka awki a sâng, Bawihtea chuan min rawn en vat a, nuih sak pah hian," Âma kha maw, a țawng kha a ring mah mah a ni tiraw? Puitlingte pawh hi a châng chuan kan țawng ring ve țhin a," ka ti a, a lu chu ka chùlsak a.

In kan thlena kan thil leite kan lâk thlâk vek hnu chuan," Sir, ka kal tawh mai ang e aw, lo lêng leh vat ula, cycle kha chuang tùr an awm si lo va, a lo nghâk reng ang che," tiin Bawihtea chu a en a, chutah, min rawn enin," Zànah ka rawn bia ang che," a ti leh sup a, a tlãn chhuak zui ta nghâl a.

Zàna min rawn biak chuan Bawihtea a muhìl tawh hlauh a, a zia. Kan inhnial a ni mai si a, inhnial nasa viau mah ila ka țawng ring ngam si lo, ka hah hluah hluah. Hriat thiamna chen chu ka nei ve tho; mahse, a, a buaithlâk, a buai nuai mai. A thu chu tih tlang a tum ngei ang, kei hian ka dang zo thei ang em? Ka thunun theih a ni bawk si lo, engtin nge ka tih tâk ang?

*SUM TAM TAK HMAN SÈN LOH NEI CHUNGA NEI LO NIA INHRE TLAT, A MAMAWH LEH EI CHÂK ZÂWNG PAWH LEI PHAL LO MI CHU A RILRU A RETHEI TAK TAK A NI*