☆UNEXPECTEDLY YOU☆ - 35 By Dingdi Pachuau

 ☆UNEXPECTEDLY YOU☆ - 35 By Dingdi Pachuau

"Min hmangaih tih ka hria a, chu chu ka tân a tâwk viau a ni, a hma khân pasal neiin min kalsan a ni mahna; mahse, tunah chuan engkim a danglam tawh a, pawmlai nei i ni tawh lo, i pasal thlànlung lah in phun tawh bawk a, i zalèn tawh, tu ma sawisèl theih i ni tawh lo. Hei hi ka lo nghâk hrâm hrâm a nih ka ring, kan inkâra harsatna awm thei tùr a awm ka hre tawh lo, chhuanlam siam tum pawh ni la i siam hlawhtling chuang lo ang, kan tàwpna chu a thuhmun tho ang, chuvàngin, min hnar kha chu tum buai lo mai rawh, ka nghâk rei ve tâwk tawh che alawm," a rawn ti a, ka hnial theihna tùr khàn àwmah chuan a rawn indaikhalh vek mai si a, chhàn dàn tùr, han hnial lêt dàn tùr pawh ka hre mai lo.

"I pasala nu leh pate kha i hmaizah a niha kalsan i huphurh a nih chuan anni thleng pawh khân ka vãihmà vek mai ang, ka hreh hauh lo. Nang ka neih theihna tùr che a nih phawt chuan eng mah ka hlau lo va, ka huphurh hek lo. Ka huphurh ber chu i tel lovin nun hman a ngai leh ang tih hi a ni; mahse, chu chu ka thlentîr tawh hauh lo ang, kei hian ka hming chhâlin ka tiam thlap tawh a ni," a rawn tih leh phei chuan ka rilru a tibuai nasa zual a, ka ngaihtuahna fïm pawh ka hmang thei lo," Duh tâwk phawt teh ang," ka ti ta ringawt a nih kha.

Ni e, ka hmangaih alawm, ani chauh hi mipa a nihna anga ka hmangaih a ni a, ka thinlung hian a hre chiang bal a ni; mahse, chumi a nih vàng erawh chuan pasalah ka nei kher tùr tihna a ni lo. Mite pawhin hmangaih an nei a, an hmangaihte nèn khân nupa an ni vek kher chuang lo, an hun tawnin a zir loh phei chuan ka tawn ang tho kha an tawng ve ang. Mahni hma sial takin ani hi ka vuan thei lo ang, na takin ka siam tawh a, ka thu tlûkna hmang ngeiin pasal ka neihsan a, hetia nuthlawi ka nih tâk hnua amah pan leha pawm leh tho te chu, ani tân pawh a tlàwmthlâk lutuk, a khawngaihthlâk. Mite'n eng angin nge an ngaih ang? 

Ka ngaihtuah chhunzawm zêl pawhin rem ka ti thei lo, ka phal lo, a hun laia a nat dàn tùrzia kha... ka lu ka thing nak a, keiin ka remtih loh tlat chuan a tân pawh tihngaihna a awm vak lo ang, kan inkârah thil tam tak a thleng tawh a, ka duhãm lutuk tùr pawh a ni lo, mihring nun dàn tùr pawh a ni lo, a hre chiang apiangin min dem mai ang, keimah pawh ka indem bawk ang. Nula thianghlim ngei nei se ka duhpui a ni, kei zawng a tân ka thianghlim tawh loh bâkah mi dang fa paiin ka nei tawh a, a duh angin lo awm dùn thei ta teh rêng pawh ni ila, a lakah ka insit dáwn lutuk, zànah kan han mu dùn ve ang a, nupa ni ta na nâ nâ chu, nupa nun kan chen dun hunah... ani'n hrehawm a ti ang a, keiin hrehawm ka ti bawk ang, chu chu a rûka kan tawrh ve ve tùr thil a ni a, sawi chhuah a rem dâwn si lo, chuvàng tak chuan kan inkawp leh thei tawh lo ang.

Chhûngkawhovin chaw kan ei khâwm leh a, kan hlim dar dar viau mai. Ka pa hian hetiang thil tih hi nuam a ti a, dam taka inhmuh khâwm hi nuam a ti țhìn a, sum lamah buaina a awm lêm lo bawk nèn, Zda boral ațang khân dam tlàn hlutzia hi a hre chiang tawh ka ti mai, kum tàwp lamah hian kan inhmu khâwm ta ziah a, chhûngteho lah hian min en hrang lo bawk a, anmahni ang chiaha min enin hmeichhia, kum naupang lam deuh phei hi chuan an thurûkte thleng hian min hrilh ve hial a, kei pawhin tu mah ka en hrang chuang lo, ka thurûk erawh ka hrilh ngai lo thung.

Chaw ei khama kan țhut khâwm lai chuan Bawihtea chu an fiam a, zawhna hrang hrang an zâwt bawk a, Bialtei chuan," In khua Phailengah khân zànah tlangvâl an rawn lêng țhin em kha?" nui deuh țhâ chung hian a rawn ti chhuak ta a, ani lah chuan," Aw, " a lo ti mai a, chutah," Âpa Dinpuia," a tih chhunzawm leh a, an inbiakna hre pha chinho chu an lo nui hak a, Bialtei vêk chuan," I va'n hre êm êm! Âpa Dinpuia chu a hmêl a țha em?" tiin a zâwt leh zat a, ani lah chuan," Aw," a lo ti leh a, a chhàn țhat êm avàng chuan mi dang pawh chuan thil dang, eng eng emaw an rawn zawh belh zêl a, min puan ta vek a nih ber chu.

Mi dang haw hnu chuan ka pa chuan," Kan han nui dar dar tak nain Bawihtea thil sawi khán ka ngaihtuahna a tithui khawp mai a, hetia pa nei lova a awm reng hi ka khawngaih a, keini'n hmangaihin keh thei dawmin dawm mah ila a pa dinhmun kha kan luahsak thei lo va, pa nihna chanvo ang kha kan luahlum zo lo a ni. Nang ngei pawhin nu leh pa nih fàwm tum mah la i thei chuang lo, i enkawl țha lo ang ka tihna a ni miah lo a nia. Ngun takin ngaihtuah la, hmêl duh zâwng emaw  i neih phawt chuan inthlahrung miah suh ang che, kan fanu i ni a, i duhna kawng engkimah kan thlâwp ang che, kan tupa hian pa a mamawh ka ti a, keimahni hmaizah vàng emaw kan mitmei vèn vàng emaw te hian in lo mal nufa viau ang tih ka hlau a ni," a ti dap dap a, Bawihtea a muhil tawh a, a pi chuan a mal chungah pawmin a chûl hliau hliau reng a, chutia ka pa a rawn țawng chuan rawn hawi chhuakin," Ni e, in nufa hian kan ngaihtuah êm êm che u a, in nufaa hmangaihtu che u pasalah nei leh la kan lo ti țhìn, nei leh ta pawh ni la kan fanu i nihna a bo dâwn lo va, min en hran pawh kan phal hek lo ang, ngin takin ngaihtuah ang che, i duh loh zâwngah erawh nawr luih che kan tum miah lo a nia," a lo ti ve charh charh a.

"Ka nu, ka pa, min ngaihtuah suh u, Bawihtea sawi kha in lo la thutak mai mai a ni, a lo lêng ve țhìn ngei mai a; mahse, keima lam ațang chuan Bawihtea kalsana pasal dang neih hi ka tum lo hrim hrim a, bâkah, thingtlâng nun chu in hria ang a, an ngaihzàwn lêm lohte inah pawh an lêng ve fo alawm," ka lo ti ve thung a, ka pa chuan," Nih pawh a lo ni ang; mahse, hetia Bawihtea țùlpui ringawt tùr hi chuan kan duh lo che a, kan phal lo che a ni. I la upa lo va, duh pawh tawng leh thei i ni, kan bula awma kan chelh tlat che avàng hian hrehawm i lo ti ang tih kan hlau a, kan fanu dik tak i ni a, i duh zâwng, nangmah duhtu i tawng a nih chuan keini lamah chuan harsatna a awm lo tih i hre reng dâwn nia, mawi hnai taka i chhuah loh lah kan duh hek lo ang," a ti leh dap dap a.

Heti taka min ngaihtuaha min hmangaihtu nu leh pa ka nei hi mi vannei tàwpkhãwk chu ka ni, làwmthu sawi mawlh mawlh tùr ka ni bawk, lehlamah vànduai leh chan chhia kha inti viau mah ila lehlamah ve thung chuan mi vànnei tak ka ni lawi si, kan hma lam hun zêl tùr erawh Pathian chauhin a hria a, a kuta innghah tawp mai loh chu tih theih ka nei lo.

Ni 21 nî chuan Sêntei'n," Dàwrah rawn lêng ve teh u, thil hrilh tur che ka nei, phone-a sawi chi lah a ni si lo va," a tih avàng chuan ka chhuak a, Bawihtea hruai ve ka tum deuh nain ka nuin hruai ve kher chu rem a ti lo va," Tikhân, chhuak harh ve rawh, nau i hruai tel ve zêl chuan tlangvâlho pawhin an melh ngam nâng che, bâkah, heta in awm theih chhúng hi chuan awm tam ve kan duh alawm," a ti tlat a, chuvànga hruai ta lo chu ka ni. Sêntei dàwr lam pan chuan ka tlãn vang vang a, eng thil tak min hrilh ang maw tiin ka ngaihtuah pah rauh rauh a, phone-ah pawh min hrilh duh lo chu a nia, a serious viau a ni maithei, ka hre châk tù tú mai.

Amah maiin dàwr chu a lo nghâk bîk lo va, chhawr a nei ve a, Krismas a hnaih ve tawh avàngin an lo buai ve khawp mai lehnghâl a, luh pawh chu a inthlahrunawm lek lek mai ka ti.

Mi dang kârah chuan a thil zawrh chu ka han en ve a, min rawn ngaihsak hman lo tih ka hriat ve kar avàngin han chhaih fiam chu ka tum ve a ni. Hmeichhe kawrlum dum chu zàr pharh pah chuan ka aw chu tidanglam deuhin," Hei hi eng zât man nge ni?" ka han ti a, Sêntei chu a rawn hawi a, ka lo en duh lo tlat a, ani chuan,"Kha kha maw? Chêng za nga man a nih kha, a mawi reuh asin, a to lo phian bawk a," a rawn ti a, ka bul chiaha miin a biak avàng chuan chu chu a ngaihven leh ta rih a, kei erawh chuan," Ka rin aia a to chu a!" ka lo ti hlak a, chutah chiah chuan min rawn en nawn leh a," I va hmêl chhe tak!" a rawn ti ta a, kei pawh inthup tawh lo chuan ka nui chhuak ta nghâl a.

Buai viau mah se chawhnu chawlh hunah erawh chuan a indah ãwl lui ve a, ka inthlahrung viau nain amah zâwk chuan," Zànah i rawn chhuak thei dâwn si lo a, hmaichhan ngeia thil hrilh che ka duh si a, i tân nuam tih lohna tùr a awm lo," a ti tlat a, kei chuan," Inhralh a nawm hun lai a ni sia," ka lo ti ve thung a, ani lah chuan,"Ni khat chhûng tih pawh ni hlei lo, naktûk lamah leh a tûkleh lamah te kan dam phawt chuan kan la hralh țeuh dáwn alawm," a lo ti leh mai a.

Ka en vang vang phawt a," Min hrilh tawh la, eng lam nge ni? Ka hriat châk tawhzia chu a," ka han ti a, ani chuan min rawn en zawk a, a hawi sawn leh ta daih a, a biang chu a sen deuhin ka hria! Eng vàng tak chu ni maw?

"Ho i ti ngawt ang!" a ti ringawt a, kei chuan," Engah ngawt maw?  Ho lo ang, sawi thuai teh, ka hre châk!" ka lo ti vat a. Min rawn en leh a, sawi chu a hreh deuh niin ka hria, kan ngawi dùn deuh ràn rán phawt a, a hnuah chuan," Ih, englo a nia, Châma kha i hria tiraw?" a ti sap a, kei chuan," Tu Châma maw? Dr Châma em ni i sawi?" ka lo ti vat a, a lu bu nghat ka hmuh chuan," Eng nge chu chu?" ka ti leh a.

"Min duh thu a sawi a, ngaihzàwng atân mai ni lovin nupui atân, ka âwih lo va."

Ka en reng ringawt! A thil sawi chu mak ka ti a, Châma'n a hrilh tak tak a nih chuan ani pawh hian a hrilh tirh chuan mak a ti dâwn lutuk! Kan têt deuh laia school kal tlâng ni mah ila kan nulât tlangvàl hnu hi chuan Châma hi chu kan kàwm meuh tawh lo va, a zirna hmun a dang daih si a, tûn hnuah hian kan inbe pawp thar leh hlawm a, chutia a duh thu a han hrilh pawh chu thil àwm lo tak niin lang mah se han ngaihtuah cheuh cheuh chuan nula leh tlangvál an la nia, a àwm lo êm êm chuang miah lo.

"Engtin nge i chhan?" ka tih chuan," Ka chhâng lo, zawh phawt che ka duh a," a lo ti thung a, ka nui hawk a," A duh thu che a hrilh a, i duh ve leh duh ve loha thu a ni mai alawm, kei min zawh kher a ngai hleinem," ka ti a, ani chuan," A, ka hre lo alawm, chhàn ngaihna pawh ka hre lo va, ka zak êm êm ringawt mai a ni, nimin piah khân min hrilh a, vawiinah pawh phone-a min rawn biak a tum a, ka chhâng ngam lo va, biak chu sawi loh hmuh pawh ka hreh phah zo vek!" a ti leh zung zung a.

A țawngkam leh a hmêl chu inhmeh ka ti lutuk a, ka nuih a zã a nia aw... mahse, han nuih chiam ka duh lo va, hrehawm a ti ve bawk si nèn, bâkah, hetiang lam hi a ngaihtuah lo va, dawnsawn dàn pawh a thiamo ngei ang tih ka hria, ka ngawih deuh vang vang hnuah chuan," I va ho tak!" ka ti phawt a, chutah," Châma chu a fel alawm, bâkah, hna ţha tak a nei a, i hriat ngai loh mi pawh a ni chuang lo va, kei chuan i duh lêt ve chuan țha ka tihpui ang che," ka ti leh ta a.

Ani chuan,"Fiamthuin kan inhmuh chângin kan inbe bawrh bawrh a, tunah chuan amah hmuh ka hreh bâkah fiam pawh ka fiam ngam tawh lo ang, min hrilh loh mai tùr hi a nia, ka ngei roh tlat," a lo ti ve thung a, nuih hak pah chuan," A duh ve che a ni mai a, i thunun theih thil pawh va ni suh," ka lo ti leh a.

"A, min lo duh a nih pawhin min hrilh kher lovin pãi ve mai mai zâwk se ni tùr a nia, hetiang chuan ka nunkhua a nuam thei tawh nâng, amah hmuh hlau rêng rêngin dàwr ka nghah a ngai tawh dâwn a, zanah ni se min timuhìl thei lo, ka ngaihtuah ngut ngut lo thei lo va," a tih leh chuan ka nui var var a, ani pawh hian a haw hran bîk lo tih ka hre thiam ta mai. Ngaihzâwng a nei ngai lo va, a rilru tùr chu ka hriat thiamsak ruak mai. A țha e, tunah chuan hetiang hian a la awm rih mai mai ang a, nakinah erawh chuan a la inhre chhuak chho chhawm ang a, ngaihzâwng nei hran lovin pasal țha tak a nei thei mai dâwn a ni.

"Ngaihzâwng lam i neih ngai loh vàng a nih kha, hun a kal deuh ang a, i hre thiam ve mai ang," ka tih chuan," Inla hre tawh mai mai asin!" a lo ti vat a, ka nui lo thei lo. Nui hawk hawk chung chuan," Hre ve tawh ang chu, fapa hial ka nei tawh a nia," ka lo ti ve thung a, ani chuan," Eng nge Chhanzuala nèn in chanchin zêl?" a rawn ti ta vat a.

"Eng mah a awm lo," ka lo tih chuan," Zêp hi nei ziah suh, kei pawhin ka zêp loh hi," a lo ti vat a, min en kuau mai si a, nuam lo ka ti ru ve viau mai. 

"A hma anga inkawp leh kha a duh a, kei chuan ka duh ve lo a," ka ti ta nge nge a, ani chuan," Engati maw? Harsatna a awm em ni?" a lo ti leh a, lu thing nak pah chuan," A, ka duh lo a ni tawp mai. Ka ngaihtuah cheuh cheuh hian thil ni thei niin ka hre lo a ni, ka tuartîr nasa tawh a, phubâ lâk a duh vàng em niang aw tihte ka ngaihtuah hial a," ka ti leh a.

"Âwihawm loh! In inhmangaih tawn êm êm a, harsatna awm lova in inkawp theih ka lo beisei ve tawh asin, Chhanzuala hian rilru chhia a pu lo tawp ang, a hmangaih che tih i hre ve reng tho a, in nunhlui zawng zawngte kha han ngaihtuah lêt la," a rawn tih chuan," Nia, min hmangaih a, kei pawhin ka hmangaih bawk, ka ringhlel hauh lo; mahse, kei chu a tân ka tling tawh lo va, amah kalsantu, a huat leh a thîk viau țhin laka kalsantu niin nuthlawi fa chhawm nei lehnghâl ka ni tawh a, a hma ang kha kan ni thei tawh lo alawm, bâkah, nuthlawi chhãi tùr chuan ka khawngaih, ka phal lo," ka ti duah a.

Kan inkàwm rei ve bawk a, haw tura dàwr ațanga ka chhuah chuan a lo tlai ve ruai tawh mai nghe nghe a, kan inthlah tùr kan inbiak vêl lai chuan Chhanzuala aw ngei mai hian min rawn ko ta vau vau mai a, ka hawi vat a. A chhiat lohzia mai chu, a  lu tlêma buk ve deuh hlek tawh kha a lo mét fai leh vek tawh a, hoodie dum hlang hlak, rawng dangin a pawlh hlek loh hi a ha a, a kekawr hâk chu kekawr lum a nih ngei ka ring, a hoodie ang chiaha rawng dum hlak tho a ni a; mahse, a kekawr hma lama gold rawnga Nike sign awm erawh chu a langsàr viau mai, a mah a vun a hàng hran lo va, mi zîngah pawh chuan a langsàr larh maiin ka hria, a inthuamna zawng zawng nen, a va hmêl ţha tehlul êm!

Kan lam panin a rawn kal a, Sêntei chuan," Fuh dâwn e!" ti sapin dàwrah min luhsan ta daih a, koh ka han tum zuau a; mahse, ka koh leh hma chuan Chhanzuala chu ka bulah a rawn thleng zui ta nghâl a.

"I chhuak a...Lo pêng lawk la."

Hei hi ka hlauhthàwn thil a ni, kan pahniha hun fâl neih hi ka duh lo, a bula awm chu ka châk alawm, ka ngam lo zâwk a ni, keimah hi ka inring ngam lo, a bula ka awm tam chuan ka rilrua ka lo tum rilrûk ve zawng zawng kha a thãm ral vek mai ang tih ka hlau a ni.

"A tlai tawh e, haw ka lo tum tawh a," ka ti ve thung a, ani chuan," Ka rawn hmu fuh chat thei che kha a mak hle mai, i chhuah ka ring pha miah lo a nia, a vànneihthlâk hle a ni," a lo ti daih thung a, ka thil sawi ve kha chu a bengrawngah chuan a thun lo ve chiang a ni.

A luhlul si a, ka hnial hneh leh ta lo. A laka ka rilru a nèm zêl avàng leh ka lo inlâk paukhauh venate'n min thlawh bosan zêl avàng hian hmuh tam loh tawp hi ka tân chuan a țha a ni mai, ka thu tlûkna anga awm ka tum a nih chuan hmuh tam loh hi thil țha ber a ni.

"Nawr che hi ka duh dàn chu a ni miah lo va; mahse, kan inkârah hun a tlâk tam tawh avàng leh keima lam ka hmanhmawh ve deuh tawh avàngin kan inkâr hi tih fel thuai ngai ka ti tawh a ni, a hmaa ka sawi ang khân hun rial rei hi ka duh lo va, kumin Krismas chhûng ngei hian inbuatsaih la ka duh a ni," a ina kan awm hnu chuan a ti zui nghâl a, sofaah kan ţhu a, a coffee siam kan in pah bawk a, thu han pehhêl kual vêl pawh a tum lêm lo.

"A theih loh!" ka han ti tâwng a, chu bâk chu ka sawi zawm lo. Ani chuan chiang zeta min rawn en pah hian," Eng chu maw?" a rawn ti nghâl vut a, ngawih daih chi a ni tawh lo tih hriain," Nang nèn hian kan inkawp leh thei tawh lo ang, i duh dàn ang ringawtin thil a kal thei tawh lo, thil thleng tam tak a awm a, thil tam tak ngaihtuah tùr a awm tawh bawk," ka ti leh a, mit khap lo lêka min en reng chu nuam ka ti lo khawp mai.

"Chutiangah chuan buai suh, ka tifel vek ang, min ring rawh, ka sawi fel vek mai ang," mahni inringtâwk fê hian a rawn ti ve thung a, ka lu ka thing nak a, sawia fel duak mai thei ni se chuan e, ka sawi fel daih tawh ang.

"I hre thiam lo a ni," ka han ti leh ringawt a, ani lah chuan," Hre thiam e, i rilru tibuai duh miah suh, chuan, min ring tùrin ka duh bawk che a ni," a lo ti leh thung a, chutah," I fapa chungchângah buai lo la, i chhûngte chungchãngah pawh buai hek suh, kan pahnih chungchângah hian buai zâwk teh ang, engtikah nge palai ka rawn tirh ang?" a rawn ti ta heu mai!

Phâwk zet hian ka en phei a, a fiamthu a nih ka ring deuh a, ani lah chuan," Mak ti hmel kha pu lo teh, ka nghâk rei tâwk tawh che alawm, i thawhna khuaa i chhoh leh hma ngei hian engkim tih fel hman ka duh, kha pa khân rawn lèn leh a tum rêu rêu palh ang, ka tã i ni tih hria se ka duh, lungmuangin ka awm thei lo palh ang," a ti leh a, a fiamthu miah bawk si lo va, ka rilru a tihhahzia chu a...

"Chutin i ti ngawt thei lo," ka han ti leh ngawt bawk a; mahse, a thil tum chu a tum tlang ngeiin ka ring bawk si, min hre chiang si a, ka hmangaih a ni tih a hriatna tak hian a tihuai zual niin ka hria.

"Nang nèna kan awm dun theihna a nih dâwn phawt chuan engkim ka huam a, ka ti ngei bawk ang. Kan inkâra hmangaihna hi par chhuang lova vuai ral mai mai tùrin ka phal teuh lo, pàr chhuang tùrin theihtâwp ka chhuah ang," a ti leh a, chhàn ngaihna hre lovin ka en tawp mai, țawngkam a lo thiam ta viau mai leh a huaisen ta viau mai chu mak ka ti a, tunah chuan hmangaihnain a bual ât mihring, a hmangaih tâna engkim huam ka hmachhawn ta niin ka hria.

"I la inpeih zân lo a nih chuan ka nghâk thei ang che; mahse, a tàwpna chu tihdanglam theih a ni chuang lo ang, ka chân dâwn tawh lo che a, kan inkârah eng buaina mah a awm ka remti lo bawk ang, chhuanlam i siam pawh ka âwih dâwn lo tihna a nih chu," a ti leh nghat nghat a, kei chuan," I inringtâwk mah mah lo maw?" ka ti ve thung a.

"Inringtâwk mah mah e," a lo ti mai a, kei chuan," Ka duh tlat loh chuan?" ka ti leh a, ani chuan," I duh ang, i duh tlat ang, nang hian hrehawm ka tuar i phal thei tawh lo ang tih ka hria a ni, chutiang chiah chuan nang hian hrehawm i tuar ka phal lo bawk," a ti leh a.

Ka rilru a tibuai tak zet a ni. Thu mûm pawh kan nei hlei thei lo. Ka haw dâwn chuan," Zaninah ka rawn lêng ang," a ti zui a, ka ring lêm lo, min tihhlauhthàwn a tum mai mai a ni. Amah kalsana ka neih tâk Zda chènna țhin inah hian a rawn lèn duh ka ring lêm lo va, a hma pawh khán a rawn lût duh tawh lo a nih kha.

Mahse, a lo sawi mai mai awzàwng lo tih zanriah kan ei kham hnu lawk chuan ka hre chiang ta ngang mai. A rawn lût ka hmuh chuan phâwk zer hian ka lo en a, lo biak mai nachâng pawh ka hre lo hial mai. Ka nuin a lo la hre hlauh a, a lo chhàwn vat zâwk a, chutah, Bawihtea pawh chuan lo hre vatin a lo be ve reuh a, keimah ber chuan biak nachâng ka lo hre lo a nih chu.

Thingpui ka han thlitsak vat a, ka pêk pah chuan sehchilh deuh hian," Eng nge i rawn tih dâwn?" mi dang hriat theih loh tùr khawpa zàwi hian ka ti sep a, ani lah chuan," I nu leh pate hnênah ka rawn dîl dâwn che maw le," tiin min lo la chhâng lêt zui a! Râpthlâk ti zet hian ka melh a, ani lah chu a nui suk duh chauh, a ti leh duh tak tak ang tih ka ringhlel tawh miah lo, a tih tak tak chu ka hlauthãwng ta zek zek mai a, rilru nuamin ka awm lo zui nghâl bawk.

*I KA AȚANGA THU CHHUAK AI KHÂN  I NUNGCHANG KHÂN THU A SAWI RING ZÂWK, I KA AȚANGA CHHUAK A ȚHAT VIAU LAIA I NUNGCHANGIN A ZIR CHUAN SI LOH CHUAN A RING THLÀWN MAI TIHNA A NI ANG*