☆UNEXPECTEDLY YOU☆ - 36 By Dingdi Pachuau

 ☆UNEXPECTEDLY YOU☆ - 36 By Dingdi Pachuau

A lèn chhûng chuan rilru nuamin ka awm thei lo, ka țawng ve chiam ngai lovin ka nuin a titipui bawrh bawrh a, ka leh-àwl phian; mahse, chhûngril lamah ka lo țang ru țùng a, engtikah nge a sawi chhuah ang tih mawlh ka lo ngaihtuah thung. Ka rilru hre ve miah lo chuan tui takin an titi a, Bawihtea pawh chuan Chhanzuala chu a melh zauh zauh a, a pi nèna an titi lai chuan lo inrawlh a duh lo ve a ni maithei, a pi toilet-a a luh hlàn erawh chuan a be ve leh a, a thil sawi pawh ka hre lo, ka phone a rawn rîk lai tak a nih vàng a ni.

Dinpuia a ni a, ka kal sawn deuh hlek a, Bawihtea chanchin min rawn zâwt luam a, min be rei lêm lo. Ka țhutna ngaia ka lêt leh hnu chuan an lo titi dùn nasa mai niin, motor chanchin an lo inhrilh a, ka nu a lo la chhuak chiah lo bawk nèn, kei ngei pawh chuan an titi chu ka ngaithla ve ta hial a. Bawihtea chuan țawng fiah vak lo hian kahpah deuh deuhin zawhna chu a zâwt țhin a, ani lah chuan dawhthei tak hian a lo chhâng ve mai zêl a, tlêmin ka inthlahdul ta deuh bawk nèn, a ngaihnawm phian.

Zàn khatnaah chuan ka hlauthàwn thil chu a thleng ta lo phawt e. A haw hnu chuan ka thaw ve ta huai a, tunah chuan ka him rih ta phawt chu a nia; mahse, engtikah nge ka invènna kulhpui chu bomb chhiat a nih anga, ka inphenna ka phâw chu sah thlâksak ka nih ang le? Tunah him rih mah ila amahin 'hun tak' a tih hun a lo la thlen ka ring tho.

A tûk zànah a rawn lang lo va, a tûkleh zànah pawh a rawn lang chuang lo, min rawn be bawk si lo va, eng nge a chhan ni ang ? Boruak reh lutuk chuan ka ngaih erawh a ti țha miah lo thung, a reh mah mah a ni, hetiang indona kârah hi chuan boruak dài duk hian ngaih a ti țha hlawl lo, a rawn thawk na dâwn a nih ka ring.

Inrinni a ni a, Sêntei'n,"Vawiin chu thuamhnaw sale a tam ang, chhuak ila?" a rawn ti a, naktûk mai hi Krismas a ni tawh a, ani meuhin chhuak tùra min rawn sâwm chu ka ngaipawimawh viau rêng a, thuamhnaw lam hi a uar lutuk loh bâkah thuamhnaw sale lam phei chu hmãn ațang tawhin ka bulah hian a la sawi ri lo hrim hrim a, vawiin chu a țuah ve tawh ngang a niang.

"Thuamhnaw sexy deuh deuh ka enpui ang che, Châma'n a duh ngawt ang," tiin ka han fiam zauh a, ani chuan," Vawiinah dàwra rawn kal a tum a, ka hmuh duh loh vàngin a nia ka sàwm che ni," a rawn ti ta chiah a, ka nui chhuak hawk nghe nghe a ni.

Bawihtea hruai ka tum zet a; mahse, a puin Pûkpui lama hruai a tum deuh avàng leh ani lah a phùr êm sî avàng chuan keimahin ka chhuak leh ta a, ka nu chuan,"In lam chu rawn ngaihtuah miah suh, mawi deuh deuh kha i rawn lei țeuh dâwn nia, bazàr hun, chhuah vah hun pawh i neih khàt êm hi," tiin min thlah a, kei pawh chu ngaihțha deuhin ka tlãn chhuak ta nghâl a.

Sêntei pek chu, a inah ka han lam a, dàwrah chuan Châma'n a lo nghah a hlauh vàng a ni. Ka nuih a tiza viau mai a," Eng nge, hmuh i hreh viau? I ngei viaua i duh hlawl lo a nih chuan thuhran a nia," ka tih chuan," Ka ngei viau chuang lo; mahse, hmuh kha ka duh lo a ni tawp mai, ka zak, a hma angin ka en thei tawh dáwn si lo va, ani min en dàn tùr lah ka hre reng dâwn bawk si," a lo ti nuah nuah a.

"A hmaa i titipui dàn pângngai khân titipui la, a dik mai alawm, thil danglam deuh tak sawipui kher i tum a niang chu," ka lo ti ve thung a, ani chuan lu thing nar nar pah hian," Teuh lo, a hmel ka hmuh chuan sawi tùr a bo vek mai ang, ka thâ pawh a khùr dâwn chiang tih ka hria a ni," a lo ti leh a, dawhkàna a bag dah chu lain," Kal tawh ila? Scooty kha chu hnutchhiah daih ang aw, dahna a buaithlâk ang," a ti zui zat a.

Thuamhnaw chu ka rin aiin an la ti tlâwm vak chuang lo, bâkah, a hma angin inpho pawh an lo tam tawh lo va, kan kal kual ve dûm nain lei mai tùr ka hre lo. Sêntei chuan," Tlãi lam deuhah chauh an sale dâwn a nih hmel," a ti sar sar a, kei pawh chuan," Ni e, a la tlâwm vak chuang lo khawp mai," ka ti ve a, dàwr kawtah chuan kan ding vang vang a.

Dâr 12 a pèl tawh a, ni a sa țha vawl vawl viau mai, kan meng nûr nung mai nghe nghe a, Sêntei chuan," Kan chàwl rih phawt dáwn em niang? Ril pawh a țâm ve tawh tho a," a ti a, kei chuan," Nia, pawi lo," ka lo ti ve a, a chawlh duhna lam pan chuan kan kal zui ta nghâl a, message ka dawn avàngin ka phone chu phawrhin ka han en a, ka pain Bawihtea nèna an thlalâk, Pukpuia kan in sak thar chhûnga an lâk a rawn thawn a lo ni a, ka nui sak a.

"Ka duh lo!" tiin Sêntei chuan ka kutah min rawn man ding chawt a, min kai her zui nghâl bawk a,  a ngaihna hre lo zet hian ka en vat a, a hmui chu hupin chak zet hian kan kal tawhna lamah chuan kan lêt leh a," En lët miah suh," a ti phawt a, chutah," Keimahni tâwk zâwnga Châma rawn kal ka hmu a," a ti leh sap a, ka lo thaw hawk thung a.

"Pehhël reng tum lo la, engtia rei nge pehhêl theia i inrin?" ka ti ve ta thung a, ani chuan,"Tunah chuan ka la hmu duh rih lo," a lo ti mai thung a, chawlh kan tumna pawh chu kan sawn phah ta a nih chu.

Mahse, kan vànduai dùn a niang, kan chawlh hnu lawkah chuan Chhanzuala a rawn lût ve leh ta a, Sêntei chuan a lo ko lehpek a, kan țhutnaah chuan a rawn kal zui nghâl a," I va mal ve? Lo țhu ve la, hei, a la ãwl tho a," Sêntei chuan a lo ti vat a, ka bula țhutna ãwl chu a'n kawh hmuh zui zat a, ani pawh chu a rawn țhu zui nghâl hmiah bawk a.

"In lei mawi bawk em?" a rawn tih chuan Sêntei chu ka en a, chhàn tum hmel a put loh avàng chuan," Kan la lei lo," ka lo ti sap a, ani chuan," In duh khirh a niang, ti ila khirh rual chu in ni ve tawh hrim hrim a," nui duh miah lo hian a ti zui zat a, ka hmui ka lo ti pawrh zauh a, Sêntei chuan," Nuthlawi phei chu, khirh tak an ni," a lo ti ve leh a, ka chhâng lêt duh lêm lo, min chhaih an tum tih ka man thiam ve tho.

Kan ei zo țêp tihah chuan Châma rawn lût zân zân chu ka hmu fuh ve ta thung a, Sêntei tih ang chiah chuan ka lo ko ve vat a, Châma ka ko ri hriaa Sêntei hawi kual, min rawn ena a mit han meng lian phar kual vêl chu ka ngaihsak duh lo tlat a, Châma rawn nuih var var dàn ațang chuan a duh a hmu ta a nih ngei ka ring.

Sêntei bula țhutna ruakah chuan țhuin ei tùr a han lam ve nghâl a, a hlim hmel chu hmuh a nuam viau mai a, a țawng zui nghâl bawrh bawrh bawk a, Chhanzuala pawh chu a lo la hre ve reng niin," I dam zêl maw? Insawisèlna i nei em?" tiin a zàwt nghe nghe a, ani lah chuan a lo thîk ve khanglâng zui a, a rùl tâwk chiahin a lo chhâng a. Sêntei ve thung chu a ngawi reng a, dâk chhuak lovin a thil ei chu a ei mial mial a, Châma chuan," I ril a ţâm viau a ni maw? A dang i duh belh em? Ka han lam belh dâwn em ni ang?" tiin a han bia a, ani chuan uar zet hian a bân chu pharin," Âih, ka duh tawh lo," a lo ti vat a, Sêntei leh Chhanzuala awm dàn chuan ka nuih a tiza ru ngang mai.

Châma chuan a ei tùr chah chu a ei rei lêm lo, a ei chhûng chuan mi dang pahnih chu an țawng țha duh si lo va, kan pahnih chuan kan titi dùn char char a. A ei zawh hnu chuan kan tho a, Chhanzuala leh Châma chuan ei man chu pêk an han inchuh deuh a; mahse, a hnuah chuan pahnih pahnihin an insem a, ka ei man chu Chhanzuala'n min pêk kêpin Châma'n Sêntei a pêk kêp bawk a.

"Sênte, i țhiannu hi rei lo tê a fâlin ka'n be lawk ang aw," tiin Chhanzuala chuan ka kut chu a rawn vuan zui nghâl a, Séntei chhànna pawh nghâk lo leh hnialna hun pawh awm hman lo lêk chuan min kài sawn zui nghâl bawk a, min kài dàwr dáwr a ni ber ang chu. Ka zak angreng khawp mai a, lehlam takah erawh chuan nuam ka ti ru phian bawk, ka awm dàn chu ka inngei ru viau mai. Sêntei chu kan kalsan ta daih sia, hmuh a duh loh tak mai bulah kan la kalsan zui, hrehawm a ti ngawt ang.

"Khawiah nge min hruai dâwn?" ka tih chuan a ngawi ngul mai a, min chhàn tumin a lang lo. Châma kha a thík tih ka hria a, ka nuih tiza viau mah se nuih hun a ni bawk si lo va, bâkah, min hruaina tùr ka hre bawk si lo nèn, ka han tãl deuh a.

"Min hnial tum lo teh! Mi tamna laia ka au vak i duh loh chuan min zui rawh, tunah tak hi chuan eng mah tih hreh ka nei lo a nia," a ti nghut nghut a, ka en vat a. A dikin ka ring, zah pawh a zak hek lo ang.

"Eng nge kan tih dâwn?" ka tih leh chuan," Lût phawt rawh," tiin a car kawngkhàr chu a han hawng zui a, a hmel insehruh țeuh mai ka hmuh chuan hnial zui duh bîk lovin ka lût a, a rawn luh veleh kan tlãn chhuak zui nghâl a. A in kan thlen chuan pâwnah ka han tãwi khawmuang deuh hlek a; mahse, a hnuah chuan ka lût ta tho, sawi thuai thuai ila kal vat ka duh mai, Sêntei chu Châma bulah a awm a, ngaihtuah hran lo mah ila ka chhuahpui a nia, kan inzui leh ang chu.

"Khawi maw, i phone min pe teh," a tih chuan hnial buai duh lovin ka pe ve mai bawk a, drawer-ah khungin," Vawiin, tûn dârkâr ațang hian i haw tawh dâwn lo, tihian, kan awm dùn nghâl ang," a tih chuan phâwk zet hian ka en nghâl vat a, mak ka tihna chu hlauhthàwnnain a zui nghâl zat bawk a.

"Eng thil nge tih i tum?"

A thinurna insûm hrãm hrãm hmel a pu, a thaw hawk hawk phawt a, chumi hnuah chuan," Tihian, ka rù che tihna a nih hi, kha doctor kha i hmuh ka phal tawh lo, chuan, i hma thawhna khuaa i ina rawn lêng țhin pawh kha, a rawn biak che ka phal lo, ka nupui i ni tawh a, mipa dang rêng rêngin an rawn biak che ka rem ti lo bawk ang," a ti nghut nghut a, sitting room-ah chuan a vei thuak thuak a, a lang hlauhawm tawp maw le.

"Chhanzual...!!"

A kâwng dawm meuhin a ding chut a, min rawn enin," Zàninah palai ka tîr nghâl ang, hlauthãwng duh suh, phal lo thei dinhmunah an ding bîk lo," a ti leh sup sup a, kei chuan," Ni lo, i ti tak tak hauh lo tiraw?" ka lo ti thung a, ani lah chuan," Ti tak tak lovin min hria em?" a lo ti ve leh thung a.

"Hetiang hian ti suh, mi ã ber tih dàn a nih hi," ka tih leh chuan," Nia, ka ã tawh, min ti ã zo vek tawh a ni. Nang hloh che hi ka tum tawh lo, chu vang chuan ka theih dàn angin ka che ta a nih hi," awlsam zet hian a lo ti leh mai a. Thlêm titih, tlawn titih deuh hian," Hetiang lo deuh hian ti ang, kawng dang a awm ngei ang, chutiang chu ngaihtuah ang," ka ti a, ani lah chuan," Hei hi kawng awlsam leh kawng hnai ber a ni," a lo ti nghut a.

Rilru tih fìm tumin ka han ngawi rih a, ani chuan," Ka hmangaih che a, nang pawhin min hmangaih a, engin nge min dãl? Vawi khat min kalsan tawh a, vawi hnih kalsan nih ka tum tawh hauh lo, i haw tawh dâwn lo," a lo ti leh nghauh nghauh mai a, min rawn pan hnai a, kei ka lo tawlh sawn deuh thung a.

"Min hlau a ni maw?" a tih chuan inti huai luiin," Hlau lo," ka ti a, a rilru a fìm loh deuh vàng erawh chuan 'thil țha lo' a tih duh mai ka hlauthãwng deuh hlek thung. Ani chuan," Ka khawih nat che ring suh, fawh che ka tum mai a nia, ka hmeichhe hmangaih hi kum nga chhûngin vawi khat chauh ka la fáwp a nia!" a ti sup sup a, min rawn hnaih sauhin ka kut chu a vuan a, kei pawh insang marin ka lo tawlh sawn duh ta bîk lo va, infawh mai mai vàng chuan, a rai theih loh tih ka hre tho. 

Min rawn fâwp ta ngei a, hnial ka tum bîk lo, kei pawhin ka ngai ve tho a, vawiin kher chu, ka thu tlûkna kha dah bo rih teh ang, min ngaih ve êm hi, thil pawi tak a ni bîk nâng.

Kan infâwp a, dìm leh duat takin bul kan țan nain a rei deuh hnu chuan kan duhthawh dùn ta viau mai a, kan thaw pawh a ring dùn  ta viau mai, boruak pawh kan tlachham lek lek a ni, chumi vàng erawh chuan tàwp hmasa zâwk nih kan tum chuang miah lo niin a lang.

"D, ka hmangaih che, ka nunna ai pawhin ka hmangaih che, min neih chu remti hrãm rawh aw, inchhîr miah lo tùrin ka siam ang che," kan infawh kârlakah chuan a ti sup sup a, a thil sawi hi ka ringhlel lo, min hmangaih tih ka hre chiang alawm.

A kut pahniha ka bek tawn tawna dawm chung hian chiang zetin min en a, kei pawhin hmangaihnaa khat mitmengin ka en lêt ngei ang chu.

"D, innei ang, min nei rawh, engkim ka kutah dah la, ka ngaihtuah fel vek ang, i tel lova nun hman hi ka duh tawh lo a ni," a ti leh charh charh a, a sawi mai mai lo tih ka hria, ni e, a thil sawi chuan ka thinlung a hneh tak zet, ka tel lovin rei tak hun a hmang a, engtianga hrehawmin nge hun a hman kha ka hre hauh lo nain a hrehawm tâwk ngeiin ka ring thung, kei pawh ka nih ve chiah kha. Ka inlâk hranna leh ka inkulhna bang hi a tân chauh, ka hmangaih tân chauh keimah ngei hian ka țhiah a ngai, a tuar rei tawh alawm.

"Chhanzual--"

"I fapa pawh ka fapa ang chiahin ka en ang, ka hmangaih ber fapa a nih miau avàngin engtin nge ka en hran theih tehlul ang? In nufain ka hmangaihna thla zàr hnuaiah in awm ang a, him takin ka enkawl che u ang a, ka theihtâwp ka chhuah bawk ang, ka nu hming chhâlin ka tiam e."

A thil sawi, a țawngkam tin mai chuan ka inkulhna bang chu a țhiat heuh heuh reng mai a, a tàwpa a thil sawi phei chuan min ti tliak hnâwp a ni ber mai, heti khawpa ka tâna huam thui hi kei hian ka hnial thei tawh lo, Pathian pawh a zahawm, eng mah ka nih loh nèn, heti taka hmangaihtu min pe hi mi vànnei chungchuang ber ka ni hial ang.

Ka kuah a," Ka hmangaih che, ka hmangaih lutuk che, ka nei bawk ang che," ka ti ta mawlh mawlh a, ani pawh chuan nghet zet hian min kuah a, ka rilru chhûngril a hlim êm avàng chuan ka mittui a lo hnai a, ka khap per chhiai a; mahse, ka pawisa lo, ka hlim êm a ni. Ani pawh a hlim tih ka hria, kan inkuah a, kan infâwp a, kan nui a, kan infâwp leh a, kan inhmangaih thu kan inhrilh leh rih bawk a.

A hnu deuhah erawh chuan pângngai takin thil kan sawi dùn thei ta a, haw leh ka tum chu a phal lo viau mai a; mahse," Inrûka bul țan ringawt chu a fuh lo, pasal ka neih hmasak dàn chu i hriat kha, nang nèn chuan rûkrûka bul țan ka duh ve miah lo," ka ti ve tlat a, chu chu kar nân ka hmang a, ani pawh chuan," Min hre thiam rawh, ka lo ngaihtuah tlêm deuh a ni; mahse, chàn leh che ka hlau tawh êm a ni," a lo ti ve sup sup a, kei chuan," Min chân dáwn hleinem," ka lo ti vat a.

Ka thu tlûknaah chuan ka inchhîr lo ang. Hun kha leh chen kha min lo nghâk ve tawh a, ka thinlung hian a hnar zo tawh lo a ni, duh leh zahna leh sawisèlna chu kan phur dùn mai ang a, ani ka kianga a awma kei a kianga ka awm tlat chuan chûng te mai mai chu engah mah ka ngai lo ang, kan awm dun tawh miau chuan a țha vek a ni mai.

Sêntei nèn kan inhmu zui tawh lo va, ka biak dáwnin a phone a chhâng thei bawk si lo, missed call chu a hmu ve êm ang chu maw, zàna biakah tiin ka dah ta daih a, scooty ka zuk lâk pawhin inah chuan a lo la awm lo, dàwrah a tlang nghâl a ni maithei a ni, ka tlãn haw zui vat a, eng mah lei lovin ka haw a nih tâk ber chu.

Zàna ka han biak chuan," Vawiin tluka Chhanzuala ka ngei kha ka la hre lo!" a rawn ti hmasa ber a, kei chuan," A pawi khawp mai; mahse, khatiang hun kha i mamawh alawm, in inbe ve nasa em?" ka lo ti thung a, ani chuan," Biak loh theih ni hek lo; mahse, rin ai tak chuan ka țawng ve nasa, amah kha a țawng duh ve hrim hrim a," a rawn ti a.

"A țhat nasat chu, in inhmu ngun deuh deuh ang a, i zia zêl mai ang, hmuh duh loh ngawt kha chu a dik lo, hmuh a châk dâwn che nèn!" ka tih leh chuan," Zanin pawh rawn lèn a tum ve hle a nia; mahse, damlo an awm thut a, a hman leh ta lo a nih  àwm hi, doctor hi zawng, a buaithlâk," a rawn ti ve leh a. Țha tê têin inkawp chho se ka ti tak zet a ni, inhre sa an ni a, innêl sa leh inpawh êm êm an ni bawk a, an tân pawh thil harsa a ni lo ang.

Chhanzuala nèna kan chanchin chu ka hrilh chuan a rawn au rãih rãih a, "Ka lawmpui tak zet che u a ni, in tuar dùn tam tâwk tawh a, a hma thei ang berin innei ang che u, Chhanzuala chu ka'n fuihpawrh teh ang," hlim tih hriat tak hian a rawn ti a, țhiannu fel tak leh min hmangaihtu, kawng engkima a țha lama min duhsaktu ka nei hi ka vànnei ve thlâwt a ni.

Chhanzuala chuan a rang thei ang bera inneih a duh a; mahse, a duh ang ngawtin thil a kal thei bîk lo, bâkah, Krismas hunpui laite a ni bawk a, thil tih nghâl rum rum theih a ni bîk si lo va, kâr khat chhûng leka tih fel theih lah a ni hek lo. 

U Kimi pawh kan chanchin chu ka hrilh a, min lawmpui khawp mai. Nau a neih hun a hnaih tawh avàngin min rawn tlawh thei tawh lo va, min rawn hmuh ngei erawh a châk khawp mai; mahse, a nu leh Rinnunga'n chhuah an rem ti vak lo va, a tlûk sual an hlau ni àwm a ni. A inzo si lo va, a àwm ve viau tho mai.

*RAM LEH KHAWTLÂNG SIAM ȚHA TÙRIN MI DANG AIIN NANGMAH KHA, NANGMAH NGÈI KHA I PAWIMAWH HMASA BER*