☆UNEXPECTEDLY YOU☆ - 37 By Dingdi Pachuau

 ☆UNEXPECTEDLY YOU☆ - 37 By Dingdi Pachuau

Krismas hunpui chu hlim takin chhûngkuain kan hmangho a, ka nute pawh an rawn lêng phei ve zut mai. Kan inpawh tlâng a, a zia phian, hetia kan inhmuh khâwma ka ngaihtuah chhuah zauh zauh chu Zda kha la dam se, tûn anga hlim hian ka nung chho ang em tih hi a ni; mahse, ngaihtuah chhunzawm duh lovin thil dang ka ngaihtuah lui vat țhìn, hetia pasala chhûngte nèna inpawh tawn hi a nuam ka ti, Bawihtea pi leh pu vàng hi ka ti lo thei lo, anmahni hmangaih lo thei lovin țhatna leh hmangaihnain min dawm a, chuvàng chuan ka hmangaih lêt lo thei lo a ni. Mihring rilruah chuan țhatna chu țhatna vêka rulh a ni lo thei lo, mi sual ber bera kan ngaihte pawh hi hmangaihnaa enkawl an nih chuan an sual rei thei tak tak lo an ti alawm.

Ka nuin," Lo kal lawk teh," a tih chuan ka pan vat a, bathlàra dingin thlang lam chu a lo thlîr vang vang a, a bula ka din chuan," Nizàn khân Chhanzuala rawn léngin, nupuia neih a duh thu che a rawn sawi a," tiin min rawn en a, ințhàwn lâwkna pawh a awm si lo va, ka va zak reuh mai mai tak! Ka biang chu a sa nghâl hat hat mai.

"I pa nèn kan lo sawi dùn thuak tawh a, keini thuneihna chu a ni miah lo va," a ti leh a, kei chuan," A rawn lêng tih min hrilh miah lo," ka lo ti sap ringawt a, min en vang vang pah chuan,"Ka lo ngaih naupan nèn, mak hi ka ti roh khawp mai a, keini min rawn pan daih pawh kha mak ka ti tho, Bawihtea pi leh pute thu thu a ni si a," ka nu chuan a ti leh sep sep a.

Zàna ka biakin," Kan inah i lêng tih ka lo hria a," ka ti țan phawt a, ani chuan," Lêng e," a lo ti mai a, chutah," An phalna dìl phawt ka duh a, hun remchâng hmasa berah in inah pawh khân ka rawn lêng leh ang," a tih chhunzawm leh zat a, kei chuan," I tum ve sia tiraw? I sawi chhuah dâwnah i zak ve tho em?" tiin ka han zâwt a, ani lah chuan," Zak nâng, huphurhna pawh ka nei lo, ka phûr zek zek zâwk," a lo ti leh mai bawk a, hei kher hi chu ka âwih chiah lo, chhûngrilah a huphurh ve tho ang.

"In nufain naktûk zànah chaw rawn ei ve tawh ula, i nulât laia ka ina chaw ei tùra ka sàwm tàwpna ber pawh a ni maithei tawh si a," a rawn tih leh chuan ka nui hak a," Ni maithei a ni tiraw?" ka ti ve a, kan nui dùn a; mahse," U Kimite'n min sâwm hlauh mai a, kan han ei ngei chu a ngaih hmel, Kan nufa chu kan va luck tak! Ka nulát lai ai pawhin ka luck zâwkin ka hria," ka ti leh a, ani chuan," I luck-zia i hre lo mai mai a nih kha, bâkah, nuthlawi chu an luck duh asin," a rawn tih chhunzawm ve leh zat a, huat enah pawh ka en bîk lo.

A tûk zàna U Kimite ina chaw kan han ei chu naute thil tùr an lo lei tam tawh bawk nèn, Bawihtea làwmah a tla a, toys chi hrang hrang chu a khàl a. Hmeichhia nge mipa an neih dâwn an hre si lo va, mipa làwm leh hmeichhe làwm tùr an lo lei lâwk tawp niin, kan han nuihpui vak vak nghe nghe a. Rinnunga pawh a phûr tawh bawk a ni, phûr zet zet hian a che vut vut reng mai a, kan han fiam leh rih bawk a, a fa hmasa ber tùr a ni bawk a, a àwm ngawih ngawih e. 'Rinnunga' ti hian ka sawi mai a, ka u pasal niin kei aiin a upa daih a, 'u' hliah hliah tùr ka nih tehlul nèn, ka thiam mang tlat lo, a hma ațanga 'Rinnunga' ti char chara ka lo sawi țhin vàng a ni ngei ang, chuvàng chuan han koh mai dáwn pawh hian ka inthlahrung deuh tlat.

Bawihtea a inkhualtelem malh malh lai chuan U Kimi chuan," Nau neih a hnai telh telh a, ka huphurh tawlh tawlh maiin ka hria, ka har viau ang tih ka hlau a," a ti sap sap a, kei chuan," I hlauthãwng mai mai a nih chu, i hrisêl țha a, naute pawh a țha a, țha takin i nei thei ngei ang," ka lo ti ve a, Rinnunga pawh chuan a lo hnèm ve malh malh a.

"Har lo ang, sakuh pumpui pawh kan kawl țhat khiau reng hi, a sa lah ni se i ei nual tawh bawk a, țha takin i nei ang tih ring tlat rawh, hmeichhe nau vei chu a nâ ang tih a rin theih a; mahse, hrisêl lo leh insawisèlna nei ve reng țhìnte pawhin țha taka neiin an tuar chhuak thei a, nang phei chu Pathian zârah i hrisêl a, i ngaihtuahawm miah loh, a lo pian chhuah hunah phei chuan hlimna hlîrin i khat tawh mai ang," a ti malh malh a, kei pawh chuan," Bawihtea ka pài laia ka hrisèl lohzia kha han ngaihtuah lêt teh, kei pawhin ka nei thei a nia, nang phei chuan țha takin i nei êm êm ang," tiin, Rinnunga thil sawi chu ka lo chhunzawm ve a.

Naute lo piang tùr chanchin hlîr mai chu kan sawi a, a neih hun tùr ni tamin a dang tawh lo va, a huphurh ve deuh pawh chu ka hriat thiampui ruak, a kum a lo tam chho ve tawh bawk nèn, ka khawngaih ru reuh khawp mai. A natzia lah chu a neih hunah chauh a hre dâwn si a, sawi maia fiah chi a ni lo, tawna hriat chi a ni; mahse, a nat êm avànga boral ta an awm bîk hleinem le.

Bawihtea mut a chhuak țan tihah chuan kan haw thla ve ta a, ka nute pawh an lo la meng a, a pi chuan a lo pawm vat a," Ka lo pawm muhìl ang e," a ti a, ka pa chuan,"In chaw ei chu in puar bawk maw?" a lo ti vat a, kei chuan," Um, puar e, kan puar viau e," tiin Bawihtea'n a unau lo piang tùr inkhualtelemna hmanrua a khalh vël dànte chu ka hrilh nghâl bawrh bawrh a.

A hnu deuhah ka pa chuan," Thu dang alaiin, Bawihi, zanin chu inlëng kan lo nei a," tiin Chhanzuala, kan awm loh hlàna a lo lèn dàn leh a a lo lèn chhante chu a sawi nghâl dap dap a, a rûkin ka lo îp deuh, ka zak a ni. An rilru tùr chu ka ngaihtuah nghâl lo thei si lo va, an fapa nupui ka ni a, an fapa awm tawh lo mah se, a nupui ka nihna a bo chuang si lo. Chhanzuala lah chu, kan awm loh hlàna a lo lèn kher chu ka ring lo asin le; mahse, ka awm laiin lo lêngin sawi chhuak ta se, hrehawm ka ti zual ngawt ang.

"Hetiang hi thil nih dàn tùr dik tak a ni, i nu leh pa kan ni a, kan fanu i ni reng a, pasal dang pawh nei mah la, kan fanu i nihna leh Bawihtea nu i nihna hi a bo chuang lo ang. Chhanzuala pawh kha ka rin aiin a puitlin hmel daih mai, a thil tih dàn kha a common lo viau nain a huaisenthlâk ka ti a, a duh tak zet che a nih pawh ka ring nghâl bawk a ni, keini chu vènthàwn kan ngai lo, i rilrute kha a lo hrehawm ngawt ang e, i duh phawt chuan kan duhsak êm êm zâwk che a ni, Bawihtea pawhin 'Pa' tia koh tùr a nei thei dâwn ta tihna a ni a," a ti leh dap dap a. Ka nu pawh chuan,"Ni e, pasal nei lova awm reng tùr hian kan duh hauh lo che, i hlimna hi kan duh a, kan fanu i nihna angin, kan in ngei ațang hian pasal pawh i nei chhuak bawk ang," a lo ti ve a, chutah, min rawn ena nui chung hian," I nau emaw ka lo ti char char a, a bengvàr loh theih êm mai," a ti zui leh a, ka nui ve ringawt, ka biang erawh a sa hat hat mai.

Chumi hnuah chuan ka pa pawh chuan min rawn fiam chhunzawm zui ta a, Chhanzuala thlâ chu an sawisa tel pah bawk a, thil nuam tak chu a ni miah lo; mahse, an fel ka ti ve thláwt, ka zah an hlauh avàngin min han fiam chhunzawm a nia, an rilru hi a zauin heti khawpa min hmangaiha fanu tak tak anga min en theitu nu leh pa Pathianin min pe hi ka lãwm ngawih ngawih, làwmthu sawi mawlh mawlh tùr ka ni.

Kum thar hnu lawk ni 5 zànah palai hmêl kan hmu ta chiah mai, dàn pângngai angin ka nu leh pate chuan lo chhàwnin thil engkim hre sa vek an ni bawk a, dàn lo ang deuhin rem tih thu an lo sawi nghâl a! A hmain ka nu leh pate nèn an inbe sa vek tawh tho a, inràwn khâwm leh chiam kha ngai an ti lêm lo a niang, bâkah, Chhanzuala hmanhmawh ve tawhzia an hai lo va, a hun leh ni pawh an tifel nghâl vek! Thil nih dàn phung a ni lo tih chu ka hre ve tho a; mahse, puitling zâwkte'n an tih chuan keia lo inrawlh vena tùr pawh a ni lo, an thu hnuaia awm mai ka nia.

Kan inneih hun atân a hma thei ang ber tùra an hun ruat chu February thla tàwpah a ni. Chhanzuala chuan a sawisêl ngam hauh lo ang a; mahse, rei a ti viauin ka ring. Kei chuan rei ka ti hran lo, inbuatsaihna hun ka nei rei thei deuh tihna a ni mai a, ka pasal neih vawi hnihna tùr mah ni se țha taka inbuatsaih ka duh a ni.

Phailêng lamah a chhoh leh loh theih loh a, kan nufain kan han chho leh ta nge nge a; mahse, ka hreh chhan ve deuh ber Dinpuia Aizawlah a phei hman tawh a, a zia deuh hlek. Zàna Maduhite ina kan lèn chuan an hre thuai dâwn tho tiin pasal ka neih dâwn thu chu ka hrilh a, mak an ti viau a ni ang, phâwk zet hian min en hau a; mahse, a rei lêm lo, min lawmpui thu min hrilh zui nghâl a, Rosanga pek chuan," Țhianpa chuan damlai lu a sûn dâwn ta zuk nia!" a lo ti bauh a, Maduhi pawh chuan," A khawngaihthlâk reuh mang e! In inneih theih mai ka lo ring ve a nia," a lo ti ve a; mahse, a nui zui leh nghâl vat a," Pathian ruat loh hi chu induhsak viau mah ila a inneih theih miah loh asin, ani pawhin a tâna Pathianin a ruatsak ngei a la tawng thuai mai ang," a ti zui leh zat a.

Chhanzuala pawhin min rawn tlawh zut a, thingtlâng khaw lian lo a ni bawk a, lênglâm lo viau mah ila khawtlâng titi tui ber kan ni tih ka hre chho zêl a, inneih kan tum thu an hriat hnuah phei chuan thingtlâng zia tih takah min sawi duh viau mai. Dinpuia pawhin a lo hre lo thei lo va, a hma pawhin a lo hre ru tawh maithei bawk a, min rawn bia a," Pasal i nei dáwn tih ka lo hria a, ka lawmpui khawp mai che, i pasal tùr kha mipa vànnei tak a ni, nupa hlim tak leh inhmangaih tak in ni ngei dâwn nia," tiin lawmpuina thu min rawn hrilh thei a, ka rilru a tinuam sawt, biak ka inthlahrungin ka hreh ru viau kha a nia; mahse, tunah chuan ka hreh tawh lo ang.

U Kimi nau nei tùra damdawi ina a luh thu min rawn hrilh ațang chuan an chanchin chu ka ngaichâng reng a, ka phone sek bawk. January ni 25 tlai lam dâr 3:40-ah fapa duhawm tak, kg 3.200 laia rit a sang chhuak tih Rinnunga'n a awka chhuaka phùrna tinrêng lang chunga min rawn hrilh chuan ka hlim lutuk a, Rinnunga tluk  zet chuan ka hlim ve hialin ka ring, a nu chanchin chu ka zâwt leh vat a, a țha tih min rawn hrilh phei chuan ka rilruin Pathian hnênah làwmthu ka sawi nghâl mawlh mawlh a. Fapa an nei si a, an lãwm zual dâwn hian ka hre khawp a, a bîkin Rinnunga. Sawi chhuak lo mah se fanu ai chuan fapa a awh ngei ka ring a ni, an fa pakhatna a ni zui bawk si a.

Beng chhungawng viau mah ila Maduhi hnên ațangin mi min sawina chu ka hre ve nual a, a țhenin 'A rai tawh a niang, mipa hian a rawn kan ngun êm mai' an ti a, a țhen lahin 'Krismas hma lawka an haw dâwn pawh khân a inah zàn a riahtîr a, a ni lo thei lo' an ti bawk a, a țhenin 'An inhmeh dun ngawt mai', 'A mipa hi a naupan hmel e, nuthlawi mai mai nei tùr atân chuan ka ui' lo ti tâwk an awm bawk a; mahse, eng mah ka sawi ve lo va, țûl pawh ka ti lo, hei hi chu ka tawn tùr alawm ka ti mai a, engtin pawhin min sawi se, a chhe ber thleng pawhin min sawi mah se thu dik chu thu dik a ni a, a ngêt thei chuang lo va, rin dàn sawi mai mai hi thu dik a ni lo, ka an nei a, an rin dàn chu an sawi thei alawm. Nakin lawkah chuan thu dik a rawn lang chhuak ang a, min sawi reng peih lo ang tih ka hre ve tlat, a hun lai a ni ve a, mëna thlâk thiam a țha ber.

School lamah pawh min fiam zauh zauh a; mahse, anni zawng mi puitling chin an ni a, kei pawhin ka nuihpui mai mai. Inneih sàwmna 'cial' tak ka pe vek a, anni pawhin lo kal theih ngei an tum thu min hrilh ve vek bawk. Kan inneih hun tùr lah a fuh ve bawk a, Zirtàwpni niin, class lâk tam loh ni a ni a, an lo kal thei tùrah ka ngai ve tho bawk.

Kan inneihna atân kâr khat hun a la awm tihah chuan chawlh ka dîl ve ta a, chawlh dîl ti ila aikal dah erawh ka tum tho a, Pu Head-a erawh chuan min hre thiamin chawlh min phalsak a, aikal dah kher pawh ngai lo a ti nain ka duh lo va, ka dah lui ta tho a, a rûkin inbuatsaih viau tawh mah ila kâr khat chhûng chawlh lâk hi chu a loh theih loh ve tlat, phone ațanga tih theih loh thil tam tak a awm ve si a.

Kan chhuk thla chu ka buai viau ta rêng a, Sêntei a fel êm zâwk a, hetiang lamah hian tawn hriat nei lêm lo mah se ama tâwkah a beng a vârin min buaipui reng a, chutah, Remlali leh Famkimi pawhin an hman chângin min rawn pui bawk. Mi pahnih ai ngawt chuan mi pali ngaihtuahna chu a lo chak zâwk bawk a, Sêntei nèna kan ngaihtuah chhuah loh thlengin an ngaihtuah chhuak a, an awm lo ang tih ka hlau tak zet a ni. An chungah pawh ka lãwm, thil tiha ka làwm loh tehlul nèn, chutiang ngaihtuahna nei hauh lo chuan phûr takin ŕem min ruatpui zung zung a, thil an ti zung zung bawk a, anni pawh hi ka tân chuan țhian țha tàwp chu an lo ni, ka chunga an thil tih hi ka rùl sêng hauh lo ang le.

Kan buai ve bawk a, Chhanzuala nèn pawh inhmuhna hun kan nei tam lo kher mai. Harsatna awm lovin hun chu a liam ve zêl a, kan inneih ni pawh a lo thleng dâwn ta, ka phûr a, ka helhhawlh a, lehlamah chuan ka huphurh ru ve tho bawk si.

*******

Kan inneih zàna ka chauhzia mai chuh, rilru nasa tak sênga engkim kan buaipui hnuah vawiin lamah inneihna hun kan hmang a, mipui hù hi ka zo lo țhìn rêng a ni, khaw lum hun lai a la thleng lo hlauh zâwk a, chuti chu ni lo phei se chuan ka chau zual ngawt ang, ka taksa leh rilru a chau tawngkhawng tawh bawk a, khumah chuan ka bawk thlawr a, ka dam deuh suai suaiin ka hria, ka muhìl lek lek tihah chuan ka dàrah na lo tê hian min rawn sâwi a.

"I chau a nih kha, inphih fai la, i mu dâwn nia," Chhanzuala chuan a rawn ti sup a, thawh chhuah leh pawh chu ka peih lo tak zet a ni. Ka la bawh deuh reng avàng chuan min han pawm tho a," Ka naute lian hi chu aw, pangchang thei bawk siah," tiin min han chhaih a, meng chhuakin ka hmai chu ka han chûl a.

"Ka mut a chhuak lutuk!" ka tih sap chuan,"Innâwt fai la, kan mu dáwn nia," tiin min pawm tho a, bathroom-ah chuan min luhpui ta nghâl a,  dárthlalang lian pui hmaa kan toothbrush tùr lo awm țhiang rial ka hmuh chuan ka nui sak a, ka làwm reuh lutuk, ka rilru chu a tleirãwl țha leh ni mai hian ka hria, chu lam chu dah țhain toothbrush pakhat zâwk chu ka ban zui ta nghâl a.

Room-a kan lët leh chuan tlêmin ka harh deuh tawh a, khum pan hmain dárthlalang hmaah chuan ka ding leh phawt a, ka hmaiah night cream ka han hnawih leh rih a. Ka hnungah chuan rawn dingin dàrthlalangah chuan min rawn en chhuk ve reng a.

"I inhnawih ve duh em?" ka tih chuan a mitko a sàn ãk a," Zanin atân chuan duh lo phawt mai ang," a ti a, ka inhnawih zawh chuan min pawm kãng lehin khumah chuan min nghat zui a, Sêntei'n uluk taka a phah mutpuan chungah ngei chuan kan tlu dùn rial a. Vawiin lamah a u Zawmdikite nupa kha hmu mah ila zanin atân hotel lamah an riak chhuak daih a, kan pahnih chauhin kan awm ta a nih chu.

"I chauh êm kha, muthilh tum rawh," a rawn tih chuan," Ngawi lawk, țawngțai dùn phawt ang," tiin ka tho chhuak ta nghâl a, ani pawh chuan min hnial miah lo, piangthar țha ber ni lo mah ila Pathian hnêna làwmthu sawi leh inkawltîr hi chu ka bànsan phal lo. Pasal țha tak min pe a, làwmthu sawi paha nupa inhmangaih tak kan nih chhoh theih nân leh kan hma hun zêl tùr A kuta innghah ka duh a, chutiang chuan ka dîl bawk, a țawngțai ve em tih phei chu ka hre lo, ka țawngțai zawh veleh chuan," Pathian hnênah nang min pêk avàng hian làwmthu ka sawi ve a," a lo ti sup a. Kei chuan," Kei pawh pasala nang min pêk vànga làwmthu sawiin kan hma hun tùr pawh A kutah ka hlàn nghâl a," ka lo ti ve vat a.

Kan mut thlâk hnu chuan," Zanin chu chêt ka thawh lo ang, i chau si a, muhìl phawt mai rawh," a ti a, min kuah zui nghâl zat a, kei chuan," A pawi ka ti--" ka la sawi zawh hma chuan," Pawi tihna tùr a awm lo, ka hlim êm êm zâwk a ni, ka nupui i ni ta mai hi mak ka ti a, ka mumang mai a ni anga harh rualin i bo nghâl daih ang tih ka hlau zâwk. Hunte chu kan la nei dáwn chauh alawm," a lo ti vat a, ka chalah chuan a fâwp zui zat a, a thinphu dat dat ri chu ka hre chiang khawp mai. 

Ka chau tih chu ka zêp zo lo alawm, pasal neih zàn, Lawițhat zàn mah ni se eng dang mah ngaihtuah thei lovin ka muhìl zui ta thuai rêng a, ka hma ka sial pawh chu a ni maithei; mahse, chau chung chunga min chétpui chu amah pawhin nuam a ti lo ang. A sawi dàn ang deuhin hun kan la nei dùn dâwn chauh alawm.

Zîng hma deuh takah ka zun chhuakin min tiharh a, ka tho țhem țhem a, ka zun hnu chuan dìm takin a kiangah chuan ka mu leh rih a, thawh nân chuan a la hma deuh ka tih vàng a ni. A lo la mu tui ve khawp mai a, ani pawh hi a rilru leh taksa a chau ve a ni ngei ang, ka khawngaih roh mang e.

Muhìl zui tawh lo chuan thil hrang hrang ka ngaihtuah a, nimin lama kan inneihna hun min rawn hmanpuitute chu ka han mitthlà lêt a, Phailêng lam ațang pawhin an rawn kal țha viau a nih kha, keima lam ațanga kan chhûngte chu an kim viau a ni, ani erawh hi chu a mal ve a, a ute nupa leh a ţhiante, ka hriat veho chu an kim ve viau, a pa hi a la dam chiah em tih ka hre lo va, a sawi chhuah ngai loh avàngin ka zâwt duh ngai bîk lo a ni.

"I harh reng tawh elo? I muhìl țha thei nange?" tiin min rawn kuah a, ka nghâwngah chuan a hmai chuan a rawn nâwk zui nghâl zat bawk a, zã ka ti a, ka țim deuh ar ar mai.

"Ka harhna a la rei bîk lo," ka ti ve zaih a, parda kan zâr phui deuh hlek bawk a, khua a vâr chiang viau tawh tih a hriat hran loh, sana en lêm loh chuan hun a hai theih khawp ang le.

"I chau a reh deuh tawh em?" a rawn tih leh chuan," Ka mu tui êm a, a reh vek tawh," ka lo ti leh a, ani lah chuan," Chuti chu, Lawițhat zîng kan hmang nghâl mai dâwn em niang?" a rawn ti zui zat a, ka meng pãwng  zãwrhin ka ring.

*LUNGAWINA HI ROSUM NEIH TAM LEH TAM LOHAH A INNGHAT LO*