☆UNEXPECTEDLY YOU☆ - 38 By Dingdi Pachuau

 ☆UNEXPECTEDLY YOU☆ - 38 By Dingdi Pachuau

Nula thianghlim ka nih tawh loh mai bâkah fa hial nei tawh ka ni a, zãm tawh loh tùra ngaih chu ka ni ngei ang; mahse, a bulah chuan  ka la zãm êm êm tho mai. A chhan chu hrehawm ka tih thar leh vàng a ni, a tâna thianghlim taka invawn tum kha ka ni si a, nupa nun kan hman chuan ani pawh a rilru a thar ngei ang a, hlim lohna ka thlen ang tih ka hlau. Nupa nun hlimawm ka la hmang ngai lo va,  Bawihtea ka pai chhan lah kha ka theitui in tùra damdawi pawlh a nih vànga ka chêt theih loh vàng niin, duh loh vàngin ka țap nghe nghe a nih hi. Vawi khat chauh tak tak kha mutpui ka ni a, ka la vànduai zui lehnghâl a. Pakhat tê mahin a hlimawmna ka hre lo, ka ngaihtuah lêt leh phei hi chuan kha thil thleng khân min râp ngawih ngawih zâwk hial a ni.

"A mak vung vung e, i duh lo chung chu tihluih che ka tum chuang lo aw, i la chau deuh a nih phei chuan--" a tih lai mêk chuan," Ka chau tawh lo; mahse, coffee ka in châk tawh a," ka lo ti ve thung a, a nui hawk a, lu thing nak chung hian," Inneih zîng ațangin ka thaibãwih nghâl dâwn tihna a ni maw?" a ti a, a thil sawi awmzia chu ka lo ngaihtuah a, ka nghâwnga hmai phûmin a han mu vang vang a, chutah, inperh tho nghâlin," Ka'n siam ang e, i duh chen chen lo mu rawh," a ti a, inphih fai tùrin bathroom-ah a lût zui nghâl a.

Ka thil sawi vàng khân a tho chu a ni sia, thovin coffee chu kan pahnih tân ka siam anga, mutnaah ka pe ang chu ka ti zâwk a nia; mahse, a thawh tâkah chuan a pawi chuang lo ve, ka tho ve nghâl tho ang, inphih fai zo phawt se.

A chhuah hnuah chuan ka tho ve nghâl a, ka inphih fai a, hate ka nawh hnu chuan ka mutkawr nèn chauh chuan ka kal chhuak ta a, a vawt reuh phian, ke lâwngin ka la kal zui. Coffee a lo la buaipui a, a rawn hawi loh dànah min hmu lo a ni ngei ang, thãwm dim tak hian ka pan phei zêl a, a hnung lam ațang chuan a kâwngah ka va kuah dà dá a, a phu eih lo nia, min lo hmu ru reng a ni ngei ang!

"Min lo hmu ru reng a ni maw?" ka tih chuan," Hmu lo; mahse, i rim ka hre thung," tiin min lo chhâng a, coffee no hnih a thlit chhuah hnu chuan rawn inherin kan inhmachhawn ta nghâl a, ka nuih sak a, zãm lo tùr chuan ka infuih ru sauh sauh bawk a. Ka kâwngah a bân vei lamin min kuah a, lehlamin ka khabeah a rawn dawm zui zat a, kan inen hnai si a, váwt ka ti pah deuh bawk nèn, chhûngril lamah ka khùr deuh dar dar a.

A taksa si chêt chuan min kuah țha leh a, a mitmeng mawi ka tih deuh țhin chu a han zìm deuh a, rawn kûn hniam deuhin," Tunah tak hian coffee nge i duh keimah?" ka beng bul sêtah chuan a ti ta sup a, zã ka tih avàngin ka tawm deuh chãih a, a la nui hawk zui. Chutah, ka rin loh deuhin min thlah zui a, coffee no pakhat chu min rawn pein amah pawh chuan pakhat chu chawiin a in zui ta nghâl a.

"In rawh, i in châk kha," a tih chuan ka in ve ta vat a, a bula tlêma ka han naupangchhe thar leh chu zia lo ka ti, upa zâwk ka ni a, amah duat tùr zâwk ka nih tehlul nèn, ka han zãm thar leh a nia, sawi mai tùr lah chu ka hre hauh lo.

"Vâwt i ti em?" a rawn tih leh chuan ka thil hâk thêmhlèmzia chu ka hre chhuak zat a, ka inen chhuk vat bawk a, amah chu ka en leh a, min lo en ve reng avàng chuan ka biang chu a sa deuh hat hatin ka hria, coffee ka in vàng a ni ngei ang.

"A tui hle mai," tiin coffee chu ka han in leh kurh kurh a, ka hnungah rawn dingin a robe hâk lai chuan min rawn tuam tel ve a, a taksa lum ham ham ka han tawk chiah chu, nuam ham ham tak a ni! Chutiang chuan kan awm deuh reng a, ka rilru a insual bap bap hnuah intihuai luiin amah hmachhawn zâwng chuan ka inher zui ta nghâl a. Chutah, a nghâwnga ka bân pahniha kuahin dingdihlîp meuh chuan a hmuiah chuan ka han fâwp zui ngawr ngawr bawk a.

Ani pawh rei lo tê chhûng chu che lovin ding mah se, a che lo rei lo. Ka kâwnga min kuahin duhthawh takin min chhâng lêt ve a, a hnuah phei chuan min pawm kãng nawlh a, room lamah min pawm lût ta nghâl a. 

Kan thuam inbel chuan kan taksaah hmun a chang rei lo va, thuam inbel nei lo mah ila kan zak chuang lo, zîngkâr boruak pawh a vâwt a ni tih pawh kan hrechang tawh lo bawk. Nupa kan ni tawh a, kan taksain lumna kan inpe tawn a, nichîna vâwt ka tih ve deuh kha, tunah chuan lum ka ti ta mah mah mai.

A hnu deuhah chuan lungawi tih hriat tak hian ka âwmah chuan a bei thlar a, a sam chu ka chùlsak niap niap thung a, kan lungphu erawh a la pângngai lo. Tûn lawk khân nupa nun hlimawm takin kan chèn zo a nih kha. A mak ka ti a, ka ngai ropui viau bawk, nupa nun hi nupaa insiam hnu  chauha thleng tùra ka ngaih țhin a ni rêng a, ka tân chuan a danglam lo thei lo. 

"Ka lãwm e aw, D, Lawițhat zîng nuam taka min hmanpui vàngin, tunah chuan nupa dik tak kan ni ta bawk a, Ka taksa, thinlung leh thlarau nèn lam hian ka hmangaih che, i hriat tawh tho kha."

Tûkțhuan dâr 10-ah kan ei! Rawngbâwl tùra thawh ka tumin a phal si lo va, min kuai mu zêl a, chaw kan nghei thei takngial dâwna ka hriat avàngin leh kan ina rawn kal duh an awm ka rin thu chu chhuanlamah hmangin kan tho thei ta țâwk a, rawng ka bàwl chhûngin ka kiangah lo awmin a lo chimawm a, a țawngkama a chimawm loh kârin a cheziain chimawm a chhuah a, ka eirawng bàwl pawhin a sáwt loh phah. 

Chaw kan han ei chu," Tihian keimah chauha chaw ei tawh lovin ka bulah i awm ve zêl tawh dâwn tihna a ni si a," a ti a, a kut ding lam chu rawn phar chhuakin ka kut vei lam chu a rawn chelh a," Rin a harsa lam deuh chu a ni," a ti leh sup a, kei chuan,"I la âwih hlei thei nange?" ka lo ti ve a. Ani chuan," A tak ngei i ni tih hi chian fo ka la duh ang, ka mumang mai i ni lo tih hriat nân," a lo ti leh a, khawngaih ru tak si, hlim tak chung leh duh tak chung hian ka en vang vang a.

Bawihtea nèn kan inbia a, zàn tina mu dùn țhìn kan ni a, nizàn lam kha chu a piin," Ka lo riahpui ang," a tih avànga riahpui ta kha a ni a, nizàn lamah a mu thei em tih ka han zawh chuan," Aw," tiin min chhâng a, a mumanga min hmuh thu chu a rawn sawi zui zat bawk a, kei chuan," A ni maw? Tute nen nge min hmuh?" tiin ka záwt zui a, a rawn sawi ve nuai mai a, a hnuah min ngaih thu a rawn sawi leh bawk a. Kei pawhin ka ngai, tu bulah mah la riak hrang ngai lo a ni a, a àwm viau mai.

"Chawhnu lamah kan rawn hruai ang che aw? Kan in tharah, kan bulah i awm ang a?" ka tih chuan a lo phûr nasa mai a, a au chùl nghe nghe. Ka nu nèn chuan kan inbe chhunzawm nghâl a, ani pawh chuan," Nia, i tih dàn dàn a ni mai, a khua a har tih ka hre ve tho nain i chanchin erawh min zâwt duh bîk miah lo va, mak hi ka ti reuh khawp a, ka khawngaih hial zâwk a ni," a rawn ti dap dap a. 

Chawhnu lamah kan va hruai ta a, a inkiltawih an hlauh vàngin ka nute chuan Chhanzuala chu an lo be nghâl bawrh bawrh a, thingpuite kan ina kan țhut muan ve deuh hnuah chuan haw tùrin kan chhuak zui ta a, ka nute chuan min thlah a, Bawihtea chu," Kan ngai dâwn si che a, rawn haw leh vat rawh aw," tiin an bye bye a, ani pawh chuan a vai lêt ve lauh lauh a.

Inlêng kan nei hran lo va, kan inlêng tùr ber kan țhiante chuan phone-a min rawn biak mai duh tâwkin," Kan rawn lèn chuan kan tibuai palh ang che u, ãm takin hun kha hmang rawh u," an rawn ti deuh kher hlawm a, Sam-a phei chuan," Țhianpa kha a țuah tawh a nia, a lo inkhâwl rei ve ngat ngat tawh bawk a, lo dawh țha hle rawh, kár khat chawlh kan pe a, in hman țhat loh vaih; mahse, in hmang țha leh lutuk ang tih chu a hlauhawm, in da kâwk thei hialin ka ring," a rawn ti pek a, chhàn vak dàn ka hre si lo,  thinrim si lovin ka ngei ru teh a nia.

Bawihtea chuan in chhûngah chuan a hmaa a khalh tri-cycle kha a khalh leh a, kei pawh min ngaihven chuang lo, a tleipui tak zet a ni. A bulah chuan Chhanzuala pawh a awm ve reng a, eng eng emaw a sawipui a, a chângin an nui a, a chângin motor tih dàn tiin an han vû dùn a, naupang ngaina lo zet kha a ni ve si a, a danglam ve ta viau mai hi mak ka ti lo thei lo.

Zànah a muthilh hma chuan kan inkârah a mu ve rân a, a titi luam a, Chhanzuala chu a chângin a han 'pa' a, a chângin a 'u' bawk a, kan nuih ru kan nuih ru mai, koh theih nghâl chat kha chu a har ve viau ang chu, an inhmu zing bawk si lo. A muthilh hnuah chuan ka sîr lamah ka sawn a, Chhanzuala chuan," Zanin chu han mu phawt se, zàn dangah chuan a mutna tùr kan siamsak dâwn nia," a ti a, hre thiam vak lo chuan ka en vat a, ani chuan," Naupang chu mut hrantîr thuai hi a țha, puitlin an zir chhohna a nih bâkah, kan laklawh deuh laia an lo harh palh hlauh chuan..." a ti a, sawi zawm duh lo chuan a ngawi ta daih a, sawi zawm lo mah se ka hre thiam nasa.

Kan inchènchilh rei ve telh telh a, Chhanzuala rilru lo puitlin tawhzia leh min duatzia chu ka hre chiang telh telh a, a thinchhe viau pawh kha a lo sim ve ta viau bawk a nih hi, kan inneih ațanga thla hnih chuang a ral hnuah pawh chuan a țawngkam vîn ka la hre miah lo va, a thinrim àwm pawh ka la hre chuang lo.

Ka hna ka bànsan mai loh chuan kan chhûngkua chu kan ințhen darh reng a ngai dáwn si a, chu chu țha kan ti lo a ni, kan chhûngte lo buaina ber pawh a ni a, nupa ni ve si, awm dun theih loh hi ka pate pahnih ngaih dàn a ni lo va, ' a nupui fanaute chu a pasalin a châwm ang' tih ngaih dàn nei ve ve an ni bawk a, ka bànsan ve ta a ni. Phailêng lam chuan min ui der ve viau mai a, min ui chhan ber pakhat chu  kei ka bàn daih chuan ka aia awm tùr sawrkâr lamin an dah vat an rin loh vàng a ni, a àwm viau tho e.

Ka hna ka bànsan chu pawi ka ti viau lo, session tharah Bawihtea school kaltîr a theih ve tawh ang a, a paina hruai theih loh chângin keiin ka buaipui thei ang a, ka fapa leh ka pasal chu kawng engkimah ka enkawl dùn thei dâwn a ni.

U Kimite fapa Lalpekhlua pawh chu a duhawm chho hle tawh a, Bawihtea pawhin a làwm ve lutuk, a biang a puar ve reuh tawh si a, kan han tlawh châng hian a chùlsak nasa thei khawp mai. Thla lìna a hmang chho ve țan tawh bawk a, a hrisêl ve reuh tho bawk nèn, amah zâwk hian lawm loh theih loh hian min lo chhaih ka ti mai, lawm loha kalsan a har țhin.

Chhanzuala hian a chanchin hi min hrilh tam lo viau mai a, computer zirna an hawn ațanga a sum lâk luh leh in luah man ațanga sum a hmuhte hian a inchãwm mai emaw ka lo ti char char a, kan inneih hnu, ka hna ka bànsan tâk hnu lawk khân Aizawlah dàwr changtlung tak a nei tih ka hre ve chauh a, chu pawh chu phone-a mi  a biak ațangin a ni zui a, a hnuah ka záwt chhuak ta chauh a ni. Ani lah chuan," Min zawh loh te chuan sawi chiam chi a ni hleinem," a la ti zui a, ka hriat loh kâr khân a lo thawk nasa viau a lo nih dâwn kha.

Pasal neihsan daih mah ila ka nu leh pate chu kan tlawh reng reng tho a, min en hrang lo va, kei pawhin ka en hrang chuang lo. Chhanzuala hian nu leh pa chu nei se chuan Bawihtea pi leh pute hi tlawh hreh deuhna leh inthlahrun deuhna chin chu ka nei mahna, amah Chhanzuala ber pawh hian eng mah a sawisêl lo va, ka nu leh pate pawhin an ngaina der ve hlêin ka hria. Bawihtea pawhin a 'pa' ve tak tak tawh a, eng emaw hlekah a ko chhên tawh a, hre ngai lo tân pawh a rîla rah a ni lo ang e tih pawh a hriat tawh loh, eng kim a tihpui a, min àwl dèr tawh mai a ni.

Ching lo ta chu, kan inneih ațanga thla 5-na, July thla chawhnu lamah nau ka pai tih kan hria a, kan lãwm dar dar viau mai. Chhanzuala a lãwm fâl bîk a, a țhiante leh ka țhiante chaw eiah a sâwm vek a, lawmna chawhlui kan kîlho a ni, kan nupa chuan min fiam dùn reng a, Sam-a a over lehpek a,"In bei ngawrh bawk a, in hlawhtling ta mai alawm, tih dàn tê hi a awm ve a," a ti a, amah chu a nui huah huah a, a thil sawi ai chuan a nui chuan kan nuih a tiza zâwk. Ani hian fanu a nei tawh a, an inneih hnu lawk khân an nu kha a rai zui nghâl a ni àwm e.

Ka rai tih kan hriat hnuah chuan a theih chin chinah min àwl a, chét ve ka tum pawhin a phal tlat lo," I hah palh ang, i hah chuan nautein a tuar dáwn asin," a ti tlat a, ka chêt a phal loh avàng chuan a bulah dingin a chetla chu ka lo en kual ve a, chu pawh chu phal lovin min țhuttîr a," I din reng chuan i lu a hai ang a, i tlu palh ang," a ti leh a, awm dàn tùr pawh hriat thiam a har. Ka han hrilh fiah ve ngial pawhin a bengrawngah a thun duh lo va," Naute insiam lai a nia, i indim a ngai alawm," a ti tlat tho. Doctor hnêna kan inentîr țumin doctor hnênah chuan a rûkin kan awm dàn chu ka hrilh a, ka pasal chu thil awm dàn chu hrilh fiah tùrin ka hrilh tawp ringawt. Ani pawh chuan a lo hre thiam ve khawp mai a, nui sâng chung hian," A duat mah mah che a ni maw? Hetiang hi an awm ve châwk alawm, i vànnei tho tho e," a lo ti ve a, Chhanzuala hnênah chuan a hrilh fiah ta vek a, doctor thu sawi a ni bawk a, a âwih ve tawh ngeiin ka ring.

"A nih, doctor, thil pakhat ka lo zâwt lawk ang che, nau an pai țantirh ațang hian engtik hun chhûng nge nupa nun hman loh tùr?" a tih chuan ka en reng ringawt! Chutiang zawhna chu doctor pawh chuan zawh a lo inring lêm lo a niang, a ngawi deuh dat a; mahse, a ngawi rei lo. 

*******

Inah awmin kan inneih thlalâkte chu ka en kual vêl a, Phailêng lama ka chhûngte leh school-a thawhpui hluite hmel han hmuh leh meuh chuan mitthlaah Phailêng a rawn lang zut zut a, kan in tê kha tuin nge luah ang le? Nge luah lohin a la awm reng zâwk ang? School-ah khân ka aiawh tùr an dah leh tawh em? Chanchin ka hriat lohna a rei ve ta deuh a, phone chu lain Maduhi number chu ka han hmet chhuak a.

Kan inbe rei ve viau mai. Kan in chu tu mahin an la luah lo va, school lamah erawh kei ka awm tâk lohah chuan zirtîrtu an indaih si lo va, aikala ka chhawr kha zirtîrtu leh mi țhahnemngai zualte pawisa thawh khâwm ațangin an lo chhawr zui niin, chutiang thu ka han hria chu hrehawm ka tih rualin naupangte hmakhua ngaia chutia mahni pawisa pawh ui thei lova zirtîrtu an chhawr belh chu an ti țha ka ti a, tluk lo ka intiin an ngaihsànawm ka ti bawk. Sawrkâr beng thleng vat se, khawpui lama zirtîrtu tam lutuk, inêk beng țeuhte hi mamawh an nihna hmunah sawn chhuak dàwr dáwr se, thingtlâng lam naupang pawhin zirtîrna țha an dawng thei ngei ang a, hmasâwnna ropui tak a awm thei mai dáwn a ni. Thingtlângah zirtîrtu indaih lohna a nasa si a, khaw țhen khata Primary school-ah phei chuan zirtîrtu pahnih chauhte an awm a, naupang an buk ve bawk si a, pahnih chauh tân chuan ni tina class lî lai han awi chu, a buaithlâkin a harsa ngawt ang.

Doorbell a rawn rîk chuan ka ngaihtuahna ram ațang chuan ka harh chhuak nghâl kâwk a, tho chhuak nghâlin tûn ang hunah tu nge lo kal ang aw ka ti rilru vang vang a, kawng ka va hawn chuan Sêntei leh Châma lo ding dùn ràn chu ka hmu zui nghâl a, Châma chuan nui var var chung hian,"Kan rawn tihbuai loh che u kan beisei," a lo ti vat a, kei chuan," Keimah chauhin alawm ka awm, lo lût r'u, in rawn intiam rual a ni lo maw?" nui chung vêk hian ka ti lêt a. Kan inneih nî khân Châma pawh hi  a rawn tel ve a nih kha, present țha tak pawh min pe nghe nghe. Tunah chuan an inzui chiang ve tawh a, anni pawh hian an tih har vak loh ka ring ve tawp bawk.

An țhut hnu chuan," In fel e, rawn lèn nachâng in hria a," ka ti țan nghâl a, Sêntei chuan," Fel ang chu, pasal i nei dêk dêk a, min rawn tlawh pawh i tum lo nghâl ringawt a," a lo ti ve thung a, Châma chuan," A khai khai, țap nghâl ringawt lo la," a lo ti vat a, Sêntei lah chuan," Pasal neih hi țhiante thlauhthlâkna a nih dâwn chuan kei chu pasal nei lovin ka awm mai ang," a lo ti leh a, Châma vêk chuan a kutah a va dawmsak vat a," Zahngai! Zahngai!" tiin, chutah, min rawn enin thutak fê hian," Ni e, pasal neih hi ngeih viau lutuk lo teh, in in hnuai lawkah Duhlaii a awm a, lêngin kan inneih hun tùrte zu sawipui ve țhìn tawh rawh, tawm tlut tlut suh," a rawn tih chhunzawm leh a.

"Okay, ka tlâwm e, ka tlâwm e, ka sim hmak ang," ka lo ti vat a, tlâwm tih entîr nân ka bân ka phar dû bawk si a, chu chuan Sêntei nuih a tizâ a ni ngei ang, a rawn nui chhuak ta hak hak a, chutiangin Châma pawh chu a nui ve a," In pa awm loh hlàn hian lo vau hlê che ila a ni mai, thingpui han siam vat teh, ka chhãwl a hãl tawh teh a nia," a ti zui zat a. Ka kal tùr chu Sêntei chuan min lo ti ding vatin," Ka'n lum ang e, lo țhu rawh, in pain a hre rêu rêu palh ang, a duat ropui mai si che a," a ti a, thingpui lum tùr chuan a kal sawn zui ta nghâl a. 

Thingpui chu kan in a, titi pahin kan inneih thlalâkte chu kan en nawn leh a, Châma chuan Sêntei chu fiamin," Mo ai pawhin i chhe lo zâwk, mo i nih ve hunah phei chuan aw..." a ti vang vang a, kei chuan," Mo ni ve vat tùrin ka duh a; mahse, ka dinpui ngei a ngai àwm si a, ka dul a lian ve tawh bawk si nèn, ka rilru in tibuai," ka lo ti thung a.

Sêntei toilet luh hlàn chuan Châma chu engtikah nge tih huk an tum ang tih chu ka zâwt chhin a, ani pawh chuan," Ka hre thiam lo, a inpeih chhuah hun hi nghah mai loh chuan, keiin duh hma viau mah ila ka nawr chuan harsatna ka siam thei tlat si a," a lo ti ve sap sap a, chutia khùnkhàn taka kan titi lai chuan kawngka a lo ri a, Chhanzuala a rawn lût hrãwk mai. Pháwk zet hian ka lo en a, tûn ang hunah a lo haw ngai si lo va, a dam țha lo em ni ang, dam țha lo hmel lah chu a puin ka hmu meuh si lo.

"I lo haw hma hle mai!" tia ka lo nuih chuan min nuih lét ve miah lo, Châma nèn chuan min melh tawn sek mai a, a ngawih rùn rún hnuah chuan," He pa hian ka awm loh laiin eng nge a rawn tih a?" a ti chhuak ta nghut mai! 

*TUIFINRIAT HIAN 'FÂWN' HI A TIH TÙR A NIH SI CHUAN KEI PAWHIN NANG NGAIHTUAH RENG CHE HI KA TIH TÙR CHU A NI MAI😊*