☆UNEXPECTEDLY YOU☆ - 39 By Dingdi Pachuau

 ☆UNEXPECTEDLY YOU☆ - 39 By Dingdi Pachuau

Ka bula mipa awm a hmuh chânga a tih dàn, a awm dàn ngai tê, a ze ngai bawk kha a rawn chhuak leh a ni. Thîkthu chhiatna. Tuna a țawngkamte kha! Châma hi ka lo țhut hnaih deuh mah mah zâwk em ni? A awm loh lai a nia, Sêntei lah bathroom-a a luh hlàn a ni zui...

"Kan rawn lêng a, Sêntei nèn," Châma chuan a koki zâwn vêla sânga a kut pahnih phar chung hian a lo ti vat a, a nui pah deuh bawk a, kei pawh chuan," Ni e, ka thiante kha an ni ve a, chance nei pahin an rawn lêng a nih hi, lo țhu teh," ka lo ti ve vat a, ka bula țhutna chu ka han bêng thap thap a, ani erawh chu a la ding ngur mai a, min rawn hnaih pawh a tum chuang lo.

"Awii, bathroom dârthlalangah sàwn inhmuh țhat a va'n awl êm êm! Ka inhmu hmel țha ve lutuk! Min lo pe daih teh u," tiin, Sêntei rawn chhuak chu a rawn țawng chhuak làwng láwng a, kan lo en țhap a, Chhanzuala a rawn hmu ve nghâl vat a," I lo haw tawh elo?! Inhnaih tê e ti lo hian kan intlawh khât sia ka tia, Châma a lo remchâng hlauh nèn, nangni lah hi rawn lèn in tum mang bawk si lo, in innei hi in innei leh lutuk a," a rawn ti nghâl bawrh bawrh a, Châma bulah chuan rawn țhuin min rawn en a, kan boruak chu hre ve lo tih hriat tak hian Châma chu en lehin," Keini chu ni ve miah lo ang aw?" a ti zui leh zat a, a nuih sak zui a, a awm dàn leh țawng dàn chu, inzui ve ta viau mah se kan bula hetianga a țawng ka hriat vawi khatna a ni! A lo duh ve viau ta a nih dâwn hi, zah pawh a zak lo ve ta deuh bawk alawm.

Sêntei lo lan hnu chuan Chhanzuala pawh a lang pângngai deuhin a hriat a, kan țawng bawrh bawrh a, Châma pawhin Chhanzuala țawng kha a theihnghilh zui nghâl a ni maithei, a be zui tho a; mahse, kan bulah a awm rei ta lo hlauh zâwk a. Kei erawh chu țawng ve bawrh bawrh tho mah ila chhûngrilah erawh hrehawm ka la ti ru tho, a thîkthu chhe leh lutuk hi chu buaithlâk deuh châng hi a awm ve rêng a; mahse, nichîna a țawng dàn erawh kha chu a mawi lêm lo, Châma lah khân a hre chiang ropui bawk si a, a lo hre thiam hlauh a, buaina a thleng lo mai niin ka hria.

An haw dâwn chuan Sêntei chuan," Kan lêng rei ta phian a, in pa pawh i lo ngaihven vak hman si lo va, a lo lungawi lo hlauh ang e," a ti sap a, tlêmin nui hmel a pu deuh bawk a, kan bulah Châma a awm hnai lo hlauh a, a tihzia deuh.

"Ho mai mai, in rawn lêng a, in fel lutuk ringawt, zànah ka rawn be dâwn che nia," ka ti a, ka nuih lêt sak a, car-a an luh hnu chuan ka bye bye liam zui ta nghâl a. In chhûnga ka luh veleh chuan room lam ka pan nghâl a, khumah a lo țhu rùn a, pan hnãiin," Vawiin chu i nuamsam meuh lo em ni?" ka ti nghâl a, a thil sawi avànga ka chhûngril lam rihna erawh ka tilang duh lo va.

"In pahnih chauhin in lo awm dùn emaw ka ti a," a lo ti sup a, ding vutin min rawn en a," I bula mipa an awm hian thîk loh ka tum viau pawhin ka thei țhìn lo, i țhianpa pawh kha ka thîk tho tho, mipa a ni miau a," a ti leh a, kei chuan," Pasalah ka nei tawh che a, mipa dang rêng rêng chu i thîk a ngai lo asin. Châma kha ka țhian a ni a, ka țhiannu Sêntei bialpa a ni bawk, i lo haw lai taka kan pahnih chauha min hmu dùn kha a pawi ka ti; mahse, kan inkârah erawh ințhian țhatna bâk a awm lo, ka pasal chauh hi mipa ka hmangaih leh ka melh awmchhun a ni," ka ti ve ta dap dap a.

Min kuah vang vang a," Sêntei bialpa a ni tih ka hriat loh vàng a nih chu, ka țawng kha a ngai hua ang em?" a ti leh sup sup a, kei chuan," A hre thiam ang, i thîkthu a chhia tih a hre ve tho a," ka ti ve zaih a, nakinah ka bia ang a, ka hrilh fiah mai ang.

Bawihtea chu min hringtu ka nuten chaw eia an sàwm avàngin kan pahnih chauh chuan kan awm rak rak a, mi dang erawh kan ngai lo viau thung. Naute thla nga lai a nih ve tawh avàngin ka puar ve ãk tawh a, zàn mutnaah ka dul hi a chúl hoh hoh ziah a, thil dang vak a sawi ngai lo," A lo pian huna ka hmuh hunah ka làwm ve tho ang em le?" a ti ziah a, a eng zâwk nge lo piang se a duh tih lam hi a sawi ri ngai lo, ka zawh chhin pawhin a sawi ngai lo. Zîng lamah ni se thawh hma hian min chùlsak leh ziah a, kan pahniha kan inbual dun châng pawhin ka dul puar hi a thlêk nasa thei khawp mai, mak a ti ve pawh a ni mahna.

"Sêntei inah lêng thla ve lawk ang hmiang?" a tih chuan ka en zauh a, kan inneih hnu hian lêng chhuak tùr hian min la sâwm ngai miah si lo va, mak ka ti ve deuh hlek a, chuan, ka hlim rilru viau bawk a.

"Pawi miah hleinem, i peih phawt chuan," ka ti ta vat a, ani meuhin min sàwm chuan tihhlawhtlin ngei ka duh. Ka tho ta vat a, kawrlum ka han ban nghâl vat a, ani erawh chu a la țhu reng thung a," I inha ve dâwn lo em ni?" ka tih chuan," In chhûngah tho alawm kan awm dâwn," a lo ti mai a, kei chuan," Ni tho mah se, páwnah kan chhuak dáwn tho alawm," ka ti leh a, a hâk tùr jacket chu ka lâk chhuahsak zui nghâl a.

Min lo hmu chu Sêntei chuan mak a lo ti khawp mai a, lo meng phâwk kualin a lo au deuh chùl bawk a, a rin phâk loh a nih vàngin a lo hlim viau bawk tih a hmelah a lang a, zuk țhàwn pawh a manhlã viau e.

"'Ka rawn bia ang che,' i tih vàng khân in rawn lèn hi ka ring phâk lo hrim hrim, thil mak tak a thleng niin ka hria! In rawn lêng ta rau rau, rei deuh lêng ang che u," Sêntei chuan a ti sauh sauh a, kei chuan,"Vawiin lama i thil sawi khân kan thinlungah hna a thawk nasa hlê a nih àwm hi," nui chung hian ka lo ti ve a.

Kan titi dùn bawrh bawrh a, Chhanzuala erawh a dàn ngaiin a ngawi deuh a, Sêntei'n a biak châng erawh chuan a țawng ve zauh zauh thung, thingpui hâng inin heater kan ai pah a, vâwt ka ti lêm lo nain Sêntei'n a lo ai sia, kan ai ve ta ringawt a ni.

"Engtikah nge Duata(Bawihtea a koh dàn) kan lam dâwn?" a rawn tih tâkah chuan," A la hma alawm, la lam rih s'u," Sêntei chuan a lo ti vat a, kan lam hmà leh kan lêng kan haw hma dâwn tihna a ni a, chu chu a hre chiang ve ngang a ni.

A hnu daihah amahin Bawihtea va lam tùr chuan a chhuak ta a, a kal hnu chuan Sêntei chuan," Vawiin khân eng emaw dik chiah lo a awm tiraw?" Sêntei chuan a ti zui nghâl a, kei chuan," I hre lo emaw ka ti?!" ka lo ti vat a, ani lah chuan,"Hria ang chu maw le, ka hai der mai mai a nih kha, ka tum loh dàn deuhin ka la awm phah zui a," a ti leh a, kei chuan," A thîkthu chhiatzia chu i hriat kha; mahse, min hauh êm vàng hi a nia, min chân leh mai ang tih hi a hlau tlat a, mipa dang hrim hrim hi chu a thîk vek a ni mai," ka lo ti ve leh a.

"Chhanzuala hmel ațang khân ka hre thei alawm, Châma erawh chuan eng mah a sawi chhuak lo va, zawh pawh ka zâwt chuang lo, ka lo lènpui kha ka ti fuh chiah lo chu a nih dâwn kha," a tih leh chuan," Fuh lo a awm lo, ka țhiante in nia, in lo lêng thei alawm, bâkah, in inkawp tih a lo hre pek lo va. In inkawp hma, a hnêna inentîr tùra ka hruai pawhin a thîk tawh a, vawiina a thíkthu a han tichhe ve leh deuh pawh kha ka hre thiam tho," ka ti leh a. 

Sêntei ina ka awm chhûng chuan Châma chu ka phone a, vawiin lam boruak kha ka han sawi chhuah chuan," Ka lo hre leh tawh hleinem! Ho lutuk! Theihnghilh daih rawh u, a nupui a hauh na ve hle che tihna a nih kha, kei pawh Sêntei kha ka neih hun chuan khatiang tùr tho kha ka ni," a rawn ti a, loudspeaker ka on avàng chuan Sêntei chuan a lo hre ve vek a," Zahngai, zahngai, ni lul suh se, i thîkthu i pêk chhiat viau chuan kan innei lo ang," a lo ti ve thung a, kan han nui leh rih bawk a, Châma'n a lo hre thiam viau mai chu ka lãwm khawp mai.

Tûn țum ka rai chu ka haw lêm lo khawp mai a, rilru a hah tawh lo bawk a, duh ber bula awm ta chu ka thil ei a tuiin huat pawh ka nei lo va, ka kaa lût apiang chu ka ei tui thei zêl mai a, ka ngeih bawk a niang, ka thau chak viau mai. Krismas a han rala kum thar kan chuan kai hnuah phei chuan ka puar lian bawk nèn, ka awm mai mai pawh hi ka hah ni maiin ka hria. Doctor hnênah, a hun takah ka in-check zat zat a, nau a lianin a hrisêl a, kei pawh naute ang maiin ka lianin ka hrisêl bawk a, țha taka neih theih pawh ka inring.

"Ka khawngaih viau na chein thil thleng țhìn a ni bawk si a," tiin ka dul chu a chûl hoh hoh a, naute che dawt dawt țhin chu dawmin eng vak sawi lo hian," Ball pèt i thiam dâwn a ni ngei ang," a ti ziah a, a chângin ka dul chu ka tai bâwr vêl ațang hian min chàwipui țhin a, chu kher chu nuam ka tiin ka thlahlel țhin, ka dul a rit si a, chutia a kut pahniha min dawmpui châng chuan làwmthu sawi nân a nghâwngah hian ka fâwp ziah bawk. 

Sênteite pawhin kumin ngeia inneih an tum ve a; mahse, nau ka neih hnu, kumin kum chawhnu lamah a ni thung ang. A hmaa ka sawi ang deuh khân amah dinpui tùrin min duh si a, min nghâk pah deuh a nih chu, a inthlahrunawm ka ti, Châma hmuh pawh a inthlahrunawmin a hrehawm, inneih thuai duhtu kha a ni si a.

"Engah nge hrehawm i tih? Țha tak khân nau nei la, chhang zin erawh tum rih lo ula, kan inneihnaah i lang mawi lo palh ang," Châma chuan a ti a, kei chuan," Aw le, Boss, chhang zing lo tùrin ka lo îp țàng țâng ang," ka lo ti ve a, kan nui dun hawk hawk a, Sêntei chuan," Naute hmeichhia, ngo deuh leh lian zet hring chhuak ang che, a pa erawh chhùn lutuk lo se, a thîkthu a chhiat ve hlauh zawngin..." nui chung hian a ti a, ka bula awm ve reng Chhanzuala pawh a nui ve suk ringawt.

Nau ka neih dàwn hnaihah chuan ka ke a vúng nasa hle a, in chhûng dungah chuan ke lâwngin ka vei țhìn a, chu chu an hmuh apiangin an pafa chuan ka tih dàn chu rawn zawmin ke lâwngin an rawn kal ve nghâl țhin. Kan chhûngkuain kan vei ta țhìn a nih chu, Bawihtea lah chuan nuam hi a ti thei khawp mai a, kal mai mai pawh ka harsatzia leh  ka hahzia hre thiam lo lêk hian kal chak deuh tùr hian min tur fo țhin.

Nau neih a lo hun a, nei tùra damdawi ina ka lûh chuan ka nuin min awmpui a, Bawihtea chu a pain a lo awmpui thei tho nain a pîin," Kan lo awmpui ang, a pa chu thil țûl eng emawah chhuah thut thut a ngai àwm si a, keini lah kan khua a harin awmpui kan lo châk ve bawk si a," a tih vàng chuan a pite bulah chuan a awm ta zâwk a, a fuh phian mai. Nau ka han neih dâwn tak tak chuan Chhanzuala chu a tlãn kawi nasa mai a, ka vei rei ve bawk si a, inah pawh a awm thei bîk lo, damdawi in kawtah a lo awm a, nau ka vei chhûng chuan a lo vei tawn sek reng a ni àwm e.

Nilaini chawhnu ațangin ka vei țan a, zànkhuaa ka vei hnuin a tûk zîng dâr 6:30 -ah ka hring chhuak ve ta hlawl a, nurse pakhatin," Awi, a lianin a ngo bawk sia, a duhawm lutuk! Hmeichhia a la ni zui," a tih ri chu ka hria a, ka chauh lutuk avàng chuan ka meng hlei thei lo va, naute aw lian angreng zeta a țap ngâwk ngâwk ri ka hriat tâkah chuan ka meng deuh kâwk káwk a, nurse pakhat chuan," Hei, naute hmel țha zet tùr," tiin min rawn pe a, chàu zet chuan ka lo pawm ve nghâl a.

Damdawi inah chuan kâr khat zet kan awm a, nau ka neih tûkah Chhanzuala chuan Bawihtea rawn hruaiin naute en tùr chuan an rawn kal a, hmeichhia ka hrinsak avàng chuan a lunghnûr deuh ang em aw ka tih rûk lai chuan ka rin loh deuh hian, Chhanzuala'n naute a han hmu chu a en ngawih ngawih mai a, hnute ka pêk lai a ni ve bawk a, hmun dang rêng a hawi sawn thei lo. Chutah, naute kut te reuh tê chu dìm zet hian a rawn khawih a, ka lo en reng a, a mittui a rawn far ta zãih mai, ka mit vài emaw ka ti hial!

"Naute chu a tê e!" Bawihtea chuan a lo ti a, ka lo nuih sak a, a pa erawh chuan eng mah a sawi ve lo, a mit erawh naute lak ațang chuan a la sawn hauh lo va, a kut chu a khawihsak a khawihsak mai a ni.

Kan chhuah hmain naute hming chu a pi leh pute chuan an sà a, ' Heti ang naute duhawm Pathianin min pe hi kan tân a hlu êm mai' tiin 'Lalhlupuii' an ti a, lãwm takin kan pawm hmiah mai. Kan han chhuak chu inah banner nèn an pafain min lo hmuak a, hawrawp nalh zeta 'Welcome home' tih inziak hi an lo keng a, boruak an tinuam dangdai ve khawp mai. Chumi zànah chuan kan inah ka nu leh pa, Bawihtea pi leh pu leh Sênteite chuan chaw rawn eiin Pathian hnêna làwmthu sawina hun kan hmang bawk a, Chhanzuala u Zawmdikite nen pawh kan in-video call zak zak bawk. Naute an hmu ve châk si a, an khawngaihthlâk zâwk,  hun remchâng hmasa berah rawn zin an tum thu an rawn sawi nghâl a. 

Ka inhliam nasa lêm lo va, ka zia chho viau. Țhianteho an rawn lêng sap sap a, naute thar tân thilpêk țha tak tak an rawn keng zêl bawk si a, nuam ve tak a ni. Naute lah chuan mut a han duh khawp mai a, bual lai pawhin a muhil thei nia! Zànah harh châng nei mah se ka tho hmasa hman ngai lo, a pa hi a bulah ngawi reng hian a lo ding hman ziah a, a châng chuan ka nuih a zãin ka khawngaih țhìn zâwk. A làwm thiam lo va, a kut erawh a vawnsak ziah thung.

U Kimite pawhin an rawn en ve a, Immanuel-a pawh kum khat a lo chuang ve tawh a, a tlangvâl viau tawh mai nghe nghe a, a pa a chhùn fuh viau mai. Tlêmin a inti mikhual deuh a, a nu mal chung chu a bèl deuh chawt mai a, a hnu deuha Bawihtea'n a toys a phawrh chhuahsak tâkah erawh chuan a tlângnêl chhawm ve ta deuh.

U Kimi chuan naute chu pawmin," Awi, pawm a va nuam thlup thlup ve! A harh duh miah lo lehnghâl a, a va duhawm hnûp hnûp tak!" a ti mawlh mawlh a. A ni lah tak a, a harh miah lo va, a tãl hran bawk lo va, a mu chiah chiah reng mai a ni.

"A pa hian a làwm ve em?" a tih leh chuan," Làwm lutuk ang chu; mahse, a lawm dàn hi a tilang ve thiam lo va, zàna a harh ve chângte hian a bulah ngawi renga dingin a kut hi a vawnsak țhin a," ka ti a, ani chu a lo nui hak hak a.

"Kan va inang lo ve le! Keini chu țawng thiamtîr a tum nghâl mai asin, a be nasa thei a nia," tiin Rinnunga chu nui chung hian a en phei a, ani pawh chu a lo nui ve a," Țawng rî a hriat khân amah maiin a awm lo va, awmpuitu a nei a ni tih a hriat bâkah rî a hriat tam chuan eng rî nge tih kha a man chak dâwn bawk a," a lo ti ve a.

Naute kan neih hnu ațang chuan ka lo chîk lehzual deuh a, thil pawimawh tia Chhanzuala chhuak rêng rêng hi a rawn haw thuai thuai ni berin ka hria, naute bulah ngawi reng chung hian a tawlh reng a, a kuttin sei sèl te chu hmuhnawm ti tak hian a thlîr reng peih ni maiin ka hria! 

"A chhùn chein i hria em?" ka tih chuan," Ka fanu a ni alawm," a lo ti mai a, kei chuan," A duhawm reuh tiraw?" ka ti leh a, ani pawh chuan," Naute ka hmuh tawh zawng zawngah a la duhawm ber, a aia duhawm an awm thei tawh lo ang," a lo ti leh a.

"Het, miin an lo hre rêu rêu ang e!" nui chunga ka tih chuan," Thu dik alawm ka sawi, a duhawm a, a hmel a țha a, a engkim mai hi ka hmangaih vek bawk," a lo ti a, naute hmui tichê a hmuh chuan," A ril a țâm a ni ang, hnute han pe vat teh," a tih zawm zat a.

Naute thla khat a tlin chuan 'lawm' a ti tlat a, ngai ti lêm lo mah ila ka sawisêl lo va, ka hnial duh lo. Chhûngte leh țhiante nèn chaw kan ei khâwm a, chumi tûk ațang chuan naute chu a pawm ve ta a, a hma kha chuan a pawm duh hauh lo," Nâ a ti ang," a ti tlat a, thla khat a tlin ni tûkleh ațang chuan pawm reng a tum ta ni maiin ka hria, tlêmin a làwm thiam ve ta bawk a," Ka va hmangaih tak che ém!" a tih loh leh," Ka fanu i nih hi," a ti a, chutiang bâk chuan a làwm chuang lo; mahse, hmasâwn tak chu a ni tho tho. 

A duh dànin naute chu kan khumah a mu ve lo va, Bawihtea pawh kha kan bulah khân a mu rei lo rêng a ni. Khum khatah mu lo mah ila a ngaihven reng a, a muhìl ngai lo a nih te ka ring hial zâwk! A chhan chu naute vàng ni kher lova zàna ka han harh zauh châng pawh hian naute bulah hian a lo țhu hman ziah a, muhìl lo hian a vêng țhìn a nih ka ring! Ka han zawh châng lah hian," Min ngaiin ka hria a," a ti mai țhìn. Ngaihvena vêngtu pa a nei țha bawk a, a ngaih a țha ngang țhìn a niang, Puipuii (A pain naute a koh dàn) pawh a mu țha thei khawp mai.

Zan khat chu," Damdawi ina in pafaa in rawn kala naute i hmuh khân i mittui kha a tla tiraw?" tiin ka sawi chhuak zauh a, ani chuan," Khawvêla thil hlu ber zînga pakhat ka han hmu kha ka mittui ka dang zo lo a nih kha, khatiang i pum chhûng ațanga a lo chhuak thei kha mak ka ti a, ka lãwm bawk a," a ti duah a, kei chuan," I mittui tla ka hmuh vawi khatna a ni hial ang," ka ti leh a, ani lah chuan a fanu kut vuan ràn chung chuan," A duhawm êm mai a, mittui tlâk kha a phû ngawih ngawih a ni," a ti leh sup sup a.

*MI DIK TAKTE HIAN NGAIHHLUT HLAWH VIAU ȚHÌN MAH SE A TAK TAK RAMAH HI CHUAN MI Â NIH AN HLAWH LEH ȚHIN*