☆UNEXPECTEDLY YOU☆ - 40 By Dingdi Pachuau

 ☆UNEXPECTEDLY YOU☆ - 40 By Dingdi Pachuau

Duata a muhìl tawh a, keini pawh mut kan tum deuh tawh a, mut hmain kan fate muhil tawh chu kan en nawn leh a, naute kan kalsan dâwn chuan a kutah a vawnsak leh hman hrâm a, ani lah chu harh tum àwm pawhin a lo awm chuang lo va.

"A mak e, mi nung chu a ni ve tho bawk si a," a tih chhuah sup chuan ka nui hawk a, ka hmui ka hup zui nghâl vat bawk. Naute chu a harh mai ka hlau deuh a nia; mahse, ka nui hawk rî pawh chuan a tiharh zo chuang lo a ni ngei ang, a tãl chuang miah lo.

Kan kalsan hnu chuan," I pumah thla kaw chhûng i pãi a, hetia i neih chhuah tâk hnuah hian i zãng hawk àwm si a, a țan tìr lamah kha chuan i awm thiam lo deuh hial lo maw?" tiin zawhna maksak deuh chu min zâwt a, khumah chuan a lâwn zui nghâl zat a.

"Awm thiam lo lo ve; mahse, ril erawh a țâm duh deuh chuan ka hria," tia ka chhàn chuan," Tunah a țâm i tihna a ni em?" a lo ti vat a, kei chuan," A, tunah chuan ka ti kher lo, rài lai ai kha chuan tunah hian ka ril a țâm duh deuh zâwk e ka ti mai a nia," ka ti ve thung a. 

A tih dàn ngai têin mu pah chuan min kuah leh nghâl vat a, chu mai duh tâwk lo chuan a mal rit zet chuan min han khan zui leh nghâl zat bawk a, tih țhanah a nei tawh a, khaw lum êm êm lai pawhin min kuah a țhulh chuang lo, AC kan on rei thung  a ni mai.

"Muthilh hmain thil hlui sawi mai mai ang hmiang," a tih chuan," I duh phawt chuan," ka lo ti ve mai a, țawng leh ta mai lo chuan a ngawi leh rih phawt a, kan la têt deuh lai vêl kha a sawi chhuak dâwn a nih ringin," Sawi hmasa la," ka lo ti leh a.

"I u Kimi hi min chhan chhuaktu a nih hi," a rawn ti teh daih a! Teh daih chuan, mak ka tih avàng chuan a en chho hau nghe nghe a, ani pawh chuan min rawn en chhuk ve bawk a, chutah," Ani hi awm lo se chuan tuna kan awm ang hian kan awm dùn tawh kher lo maithei a ni," ati leh sup sup a. Kei chuan," Engtin? Engtin nge a chhan chhuah che a?" ka lo ti vat a.

"Pasal min neihsan hnua ka awm dàn kha chu sawi tam lo mai ila, hun thim kâra hun ka hman lai khân U Kimi hian min rawn be țhìn a, thil dang sawi tam lo mah se nang hian min hmangaih reng a ni tih hi min hrilh ziah țhin, vawi khat phei chu ka thin a rim nghe nghe a, kan inbiak lai chuan,'Min hmangaih tih thu kha min hrilh tawh suh, min hmangaih ni se engtin nge min kalsanin mi dang a neih theih?' tiin ka phone ka vawm chhe vek bawk; mahse, i u zaidamzia leh mi hriat thiamna a neih nasatzia ka hriat chhuah phah a, min hmu tùra a rawn kal lai phei chuan, tûn hnua ka ngaihtuah lêt hian ka zak zâwk, khâng kha a hrilh lo che em ni?" a ti sup sup a.

Khatih hun lai khân U Kimi khân eng thil mah, Chhanzuala kaihhnawih lam thil rêng rêng a sawi chhuak ngai hauh lo, min rawn tlawh fo va, ka țawng tam loh bâkah Chhanzuala chanchin lam ka zâwt ngai lo va, ka sawi chhuak ngai hek lo a nih kha, tûn hnu hetia kan inneih hma pawh khân eng mah a sawi chhuak lo.

"Min hrilh miah lo," ka tih chuan," Ka rin dàn a ni tho, ka chét dàn kha a chhuanawm lovin a zahthlâk êm mai a, khatih lai khân nang pawh hian min rawn hmu ve ngat ni la chuan min tlàn chhuahsan duh hialin ka ring," a ti leh dap dap a, kei chuan," Engah ngawt maw? Eng thil fakau nge i lo tih a?" ka lo ti vat a.

A thaw deuh hawk phawt a, chutah," A rawn kal lai chuan zu ûm nèn, a sehhmeh nèn, meizial nèn, beer nèn, nula nèn ka ni nuai mai a; mahse, i u chuan thinrim hmel leh min ten hmel pawh a pu lo, dawhthei zet hian min biak theih hun a nghâk char char mai a nih chu, tûn thleng hian i u hi chu ka la zah asin, hmuh pawh hi ka la inthlahrung ru deuh tlat," a ti leh a, ka hmui chu ka pet deuh fan fan a, U Kimi chuan a nun chhiat lai ber a hmuhsak pawhin ka bulah chuan a tlin lohna emaw min duhpui lohna emaw a sawi chhuak miah lo chu a nia...

"Ka hmangaih reng che tih a hriat tlat vàng a nih chu," ka lo ti sap a, ani chuan," Ni e, min hmangaih reng a ni tih thu kha min hrilh bâng lo va, nun bãwrãw tak khân nung mah ila ka harhfìm lai khân min hmangaih a ni tih thu khân ka inhnèm chho ta fo a, pasal dang nei mah la, ani chu hmangaih lovin kei chauh hi min hmangaih a ni tiin, chuta țang chuan ka awm dàn chu ka sim chho hret hret a, pângngai takin ka nun ka hmang chho leh thei ta a ni, khami hun chhûng zawng khân i u hian min thlahthlam lo, min rawn be reng țhìn a ni," a ti leh dap dap a.

"Kan inhmuh leh hmasakna berah kha chuan min ngei viau kha," ka lo tih chuan," Ka hmuh leh che khân mahni inkhawngaihna rilru ka pu thar leh alawm, bâkah, fapa i inla nei lutuk leh i duat lutuk kha ka ngei alawm, kei lo mi dang i ngaihsak leh i hmangaihna a dawng ta daih kha ka haw bawk a," a ti leh a, chutah, ka chal chu a'n fâwp zauh a," Tunah hi chuan ka hre thiam ve deuh ruak tawh," a ti leh sup a.

"Ka hmangaih vek che u alawm, ka pasal i nihna angin ka hmangaih che a, anni pahnih pawh hi ka hrin ka fate an nihna angin ka hmangaih bawk," ka lo ti ve thung a, a khabeah chuan ka fawhsak zauh a, ani erawh chuan chu chu duh tâwk lo chuan ka khabe chu dawm kãngin ka hmuiah chuan a rawn fáwp ta thung a.

"Zanin chu, kan ti thei tawh ang tiraw? Chawbêl bula țàmchhàwl hi zawng a hrehawm êm mai," a tih leh sup chuan ka nui sak a, chutiang țawngkamte chu a lo hre ve chu a nia. Nia, naute ka neihna pawh a lo rei ve ta a, ka inhliamna lah a dam fel vek tawh bawk a, pa ber a ni bawk a, a duhnate chu kan tihlawhtlinsak ngei ang chu, țàmchhàwl tùrin ka phal hauh hleinem.

Muangcháng leh min dìm tak chuan nupa nun chu min chenpui a, a hnua chàu zeta inkuah chiala kan mut hnu chuan," Naute dang neih leh thuai pawh duh viau mah ila tawk thei lo chea awm chhûng a rei si a, ka duh ta mang miah lo mai, bâkah, nau neih i har si a," a ti chhuak sup a, ka hmui chu liak huh tê têin," Kan nei thuai thuai ang chu ka lo ti mai asin, upat lam kan pan zêl si a, kan neih zung zung loh chuan nakin lawkah chuan neih ka harsat mai dâwn asin," ka lo ti ve thung a, ka nui pãt pãt a.

"Tam deuh neih kher a ngai chuang lo, fapa pakhat leh fanu pakhat kan nei tawh a, tunah pawh hian tâwk ka ti viau tawh mai asin, nau i vei chhûnga ka rilru hrehawmzia ngaihtuah lêt leh phei kha chuan nei tawh miah lo mah ila pawi ka ti hran miah lo," a ti leh a, ka chhâng zawm tawh lêm lo. Duata pawh a fapaah a ngai ve hmiah mai a, a fa tak ni lo mah se en hranna a nei hauh lo, a châng hi chuan a huat êm êm, amah kalsan hiala ka neih tâk fapa a ni si a, a hmel a hmuh hian a pa kha a ngaihtuah chhuak hian ka ring  ve țhìn, a chhan chu Duata hian a hmêlah a pa Zda kha a chhùn ve êm mai si a; mahse, ani chu naupang mai a ni a, tihsual a nei lo va, huatna chhan tùr a awm hek lo. Nau pai leh pai loh lam hi chu kan thuneihna a ni tho nain thuneih lohna chin kan nei ve tho a, țawngthuchhe lovah, nakinah rài duh viau mah ila ka rai thei miah lo thei tho a, chutiang vêl chu a ni, hunin rawn herpui zêl teh se.

U Kimite an rawn lêng hman reng bîk si lo va, phone lamah erawh kan inbe reng reng thung. Chhanzuala thil sawi erawh kha chu sawi chhuah ka tum hran lo, thil hlui han sawi chhuah leh kha chu thil nuam tak pawh a ni lo va, rilru na takin hun hrehawm a pal tlang a ni tih chu hriat reng ka duh tawh lo, tûn hhuna hlim taka kan chèn tawh chuan hnung lama thilte chu theihnghilha paih bo vek ka duh tawh zâwk.

Zawmdikite lah chu an rawn zin mai thei rih bawk si lo va, kan in-video call zut reng mai bawk a. Ani zawng, fate a nei lian tawh a, pasal a nei hma bawk nèn, ka chhangchhiat ve meuh ani chuan tu hmêl a hmu thei lo chauh tawh a nia! Kan fate inthlau lutuk chuan ka nuih a tiza țhìn zâwk, nupui pasal neih hma leh neih tlai inthlauh theihzia chu ka ngaihtuah phah fo țhin.

A țhiante nèn Computer zirna kha la buaipui reng mah se a hun tam zâwk in lama a hman tâk avàng chuan," I țhiante'n an këp reng che tihna a ni si a, a zia lo lam deuh lo maw?" tiin ka han sawi chhin a, ani lah chuan," Kêp êm êm pawh a ni chuang lo, ka duty ka hlen ziah tho alawm," a lo ti mai a, ni tin hi chuan a chhuak ve ziah tho a, a lo haw hma deuh țhin e tih mai a nia, a duty chu a va hlen țhìn pawh chu a ni maithei bawk.

Zan khat chu ka nu leh pate an rawn lêng a, ka pa chuan Duata chu eng eng emaw a tihpui a, water colour hmangin milem chi hrang hrang an chei a, ka nuin Puipuii a pawm bawk a, a muhìl leh daih tawh bawk, láksak ka tum erawh chuan," Ka pawm khàt êm hi, pawm kher ngai lovin mu chiah chiah se tih chu duhthusàm ni mah se pawm ka la kham lo," a ti tlat a, an lèn chhûng chuan a pawm ta a nih ber chu.

"E, ka lo mangnghilh țép a ni, vawiin lamah Puipuii puin min rawn be ve teh tlat mai a! Khawi ațangin nge ka number a lo neih ni, in chanchin pawh hi a lo hria a," ka pain a rawn tih chuan Chhanzuala chu ka en vat a, țawng lovin a mit chu a khap fak fak a, a hmel insehruh deuh ațang çhuan a pa chanchin chuan a tihlim lêm lo tih ka lo man thiam nghâl mai a.

"A nih chu, a dam țha ang chu maw?" tiin ka lo zâwt a, Chhanzuala'n lo chhàna lo 'um e' a tum lêm loh avàng chuan ka lo zawhsak a ni ber ang chu, amah hringtu a pa a ni a, haw viau mah se a pa a nihna a bo chuang tlat si lo va, a chanchin hriat pawh chu a sual chuang hleinem le.

"Dam țha e, an chhûngkuain an dam țha a tih kha, khawi laiah nge an awm a tih tâk kha aw, ka theihnghilh leh tawh, khawpui chhûngah chuan a ni lo phawt mai a," ka pa chuan a ti leh a, an awmna khaw hming hriat chhuah chu a tum a niang, a chal chu a'n chuar deuh nâng nâng a, kei chuan," An dam țhat chuan a tihzia hlauh chu, dam țhat loh hi chuan inngaihtuah hi a na ve țhìn si a," ka lo ti leh a.

A pa chanchin sawi chhuah a nih ațang khân a țawng tlêm ta riau mai a, a thinrim chu ring êm lo mah ila a pa chanchin chuan a tihlim lêm lo tih ka hria a, han titipui mai tùr pawh ka hre lawk lo nghe nghe a; mahse, mutnaah chuan," I pa chanchin sawi chhuah a nih vàng khân hlim lo hmêl pu kher lo la, i hlim hmêl hi hmuh a nuam ber si a, kan naute phei kha chuan khatianga i hmel kha a hmuh vawi khatna a ni hial ang, a pa hian hlim hmel pu reng se a duh ngei dâwn si a, zanin chu a mu tui thei lo maithei a ni," ka han ti a.

"Pa ka nei lo, nu chiah ka nei," a lo ti mai a, a hmel thutakzia ka hmuh chuan," A pawi hle mai tiraw? Ka pa khân a rawn sawi chhuak kher kher a, i mood pawh a ti-off zo vek mai, i hre thiam hrâm dâwn nia," ka ti lét vat a, ani chuan," A zahthlâk hle mai, ani chanchin hnaisai lo zet ka beng hriata sawi chhuah a nih vàng maia hetianga ka awm ni, ka tân chuan awm ve lo ang mai a ni tawh si a, ani tân lah a fapa ka ni tawh lo  bawk ang a," a ti leh sup sup a.

A lu chu ka chùlsak hliau hliau a, a pa a thinlunga a huatna hi a la reh hauh lo tih a lang chiang hle si a, chu chuan a thinlung erawh a ei chhiat loh hrâm ka beisei, fanu a nei a, a hlim êm êm a, a hlim êm êm kárah a pa chanchin a han hre thar leh thut a, chu chuan a thinlunga huatna awm, muhìl tawh chu a rawn kai tho thar leh chu a ni si a. Hnem dàn ka thiam lo va, a pa huatna rilru pu lo tùra ngen lah ka tum rih lêm lo, a huatna hi a reh thut lo ang tih ka hre ve tlat a ni. Hun a kal ang a, kan hmangaihnain kan chãwm chho ang a, a fate leh a nupuite hian hmangaih taka kan enkawl chhoh zêl chuan huatna chuan hmun a chang tlêm tial tial ang a, a thinlung ațang pawhin nèk chhuahin a la awm thei mial mahna.

*******

Chawhma lamah Puipuii ka bual a, ka bual zaehna pawh a la rei lo tihah chuan min hrilh lâwkna awm miah lovin Maduhite nupa an rawn lang thut mai a, inneihnaa an rawn kal ve avàng khân kan in awmna zawng an hre chiang ve viau mai si a, kan han inhmu chu kan țê chùl lo thei lo. Maduhi pawh a lo puar ve tawh niin; mahse, thla tam a la ni lo tih erawh a hriat viau thung a, kan han infiam nghâl bawrh bawrh a. An car ngatin an rawn kal a lo ni, an va changkãng tawh tak!

"Zanin chu riak ngei ngei r'u aw," tiin thingpui ka siamsak nghâl a, Rosanga chuan," Nizàn lamah loh theih loh vàngin kan riak tawh a, vawiin chu kan haw ngei a ngai tawh ang," a lo ti a, en vatin," Nizànah in riak tawh maw? In va ti mak tak! Engati nge min rawn tlawh miah loh a?" tiin ka chhuahchhàl zui nghâl a.

Maduhi chuan Puipuii làwm pah chuan," Ka training a, kan bâng tlai bawk sia, kan riak ta ringawt alawm, kan rawn hre chhuak tho na chein kan tlai deuh tawh sia kan ti a," a rawn ti ve a, kei chuan thingpui no chawi phei pah chuan," In ho e, zanin chu riak leh hrâm mai ula?" ka ti leh a, no chu dawhkànah ka dah zui nghâl bawk a. 

"Riah chi ni tawh nâng, nizàn lamah pawh phone-a kan inbiak pawhin Engmawia a rawn țap deuh pùr mai a, kan riah chhuahsan ngai si lo nèn, buaithlâk tak a ni," Rosanga'n a tih chuan," A nih chu, a khawngaihthlâk reuh e a. Vawiinah in haw dâwn a nih pawhin in haw hma chu lêng reng rih tal rawh u," ka la ti țâlh a.

"A hmel țhain a duhawm hmuah hmuah reuh ngawt mai," Maduhi chuan a ti a, Rosanga pawh chuan," A ngoin a chum țha khawp mai," a lo ti ve a, chutah, min rawn enin," A pain a làwm ve em?" a rawn ti zui a, kei chuan," Làwm ve e, a kut hi a thlahsak phal mang lo țhin a," tiin nui deuh chung hian ka chhâng a.

An khaw chanchinte chu ka zâwt zawr zawr a, zirtîrtu an awm kim tawh thu leh Pu Head-a ai pawh Headmaster dang  a rawn awm tawh thute an sawi chuan mak ka tiin ka lawmpui khawp mai. Ka buai buaiin ka buai ve a, an chanchin lam ka lo ngaihtuah thui vak lo tih ka hre chhuak nauh nauh a, pasal han neiha fate han neih meuh tawh chuan ngaihtuah tùr apui hi a lo tam tawh êm mai a tiin ka han inthiam ru deuh ringawt a.

"Țhianpa pawhin nupui a nei dáwn asin," Rosanga'n a rawn tih chuan," A ni maw?! A va lawmpuiawm ve! Aizawl lam mi a ni ngei ang maw?" ka lo ti vat a, ani chuan," Aw, ni e, thlaleh ni 25 khian kan vêngah an innei ang, in rawn kal ve ang chu?" a ti leh a, kei chuan," A lawmpuiawm tak zet a ni, rawn kal ve pawh a châkawm; mahse, heti nuai hi chuan a harsa ve tawh e, Bawihtea school a kal ve tawh bawk si a," ka ti duah a, chutah," A nupui tùr chu a fel ngawt ang chu?" ka tih chhunzawm leh a. Maduh chuan," Fel ang, a hmel pawh a chhiat loh hmel reuh lutuk, hmaichhanah tak chuan la hmu lo mah ila a thlalâkte kan hmu fo a, phone pawhin kan inbe zauh zauh a, zaidam hmel zet hi a ni reuh a," a lo ti ve a.

"A țhat hlauh chu, Dinpuia a fel bawk a, a nupui tùr pawh mi fel tak a ni lo thei lo, ka lawmpui tak zet a ni," ka ti leh a, ka rilru tak tak a ni ka sawi ni. Ka tum sa ni lêm lovin keimah vàngin a rilru a na tlat si a, nupui țha tak neiin fanu fapa tam tak nei se tih ka duhpui a ni.

An haw hma chu an awm ve ta reng a, Chhanzuala leh Duata lo haw lai pawhin an la haw lo va, Chhanzuala pawh a țawng duh a chhuak ve a, Rosanga nèn chuan an titi luam mai nghe nghe a. An haw dâwn chuan Engmawia tân ei tùr leh hâk mai mai tùr T-shirt pathum lai kan hawntîr a, Engmawia tel chung ngeia min lo tlawh leh vat an intiam hnu chuan haw tùr chuan an tlãn chhuak zui ta nghâl a.

Maduhi'n a pawm tlat avàng khân a mut dàn a suakbãk deuh a, a pa chuan a pawm zui leh nghâl a, rei lo te hnuah a muhìl zui leh mai bawk a. An pafaa an han inawrh hmuh hi chuan an hmuhnawm ka ti lo thei lo va, Puipuii kuttin sei sàl mai chu enin a humsak a, a muhìl hmel chu thlîrin hmuhnawm a tih thu a sawi chhuak leh bawk, heti êm êm maia a fanu a han duh mai hi thil mak tak a ni, fapa kha lo hrinsak ta zâwk ila tûn ang tho hian a duh ang em tih ka ngaihtuah fo țhin.

"Hmãn zàn khân ka záwt hman ta lo che a, thil hlui tawh mah ni se ka hre châk leh thut țhin. Zda i neih thut dàn chhan kha, kan inkawp reng lai a nih bâkah inhauhna emaw han inhnial intihtauh khum tih vêl emaw kan nei hauh si lo va," a ti sup sup a, dàn ngai tèin min kuah leh rãn tawh a, he hun hi a lo thlen ngei ka ring țhin; mahse, sawi chhuah ka duh loh ber thil a ni thung si, thil kal tawh, hun kal tawh mah ni se he thil hi sawi chhuah ka duh hlawl lo. 

Ka ngawih deuh reng avàng chuan," Sawi hrehawm tak a nih chuan ka ti lui lo che a nia, thil hlui, hun kal tawh a ni a, tunah chuan engkim kan nei dùnin hlim takin kan awm dun tawh a, khâng thil thleng kha kan inkâr tinghettu atân hmang hlauh zâwk ang," a rawn ti leh a, ka hnung chu a chûl hoh hoh a.

"Phatsana i awm lai khân he thinlung hian a theihnghilh chhin miah lo che a, nangmah ngaiin a rûm vawng vawng zâwk a ni. Chu chauh chu ka sawi mai ang aw," ka ti sap sap a, ka aw zawihzia chu; mahse, a hre chiang viau tho ang tih chu ka hre tho, ngun takin a ngaithla miau a.

A ngawih vang vang hnuah nghet zet hian min kuah bet a, min thlah phal tawh lo ang e tih tùr khawpa nghetin min kuah a, eng thil mah a sawi chhuak lo thung. A thinphu ri leh ka thinphu ri chu a inchhàwn dat dat a, eng tak a rilruah chuan awm ang maw tiin ka ngaihtuah a.

"Ka hmangaih reng che a, ka thinlung hian a phatsan ngai lo bawk che, nangmah ngaihtuahin a rûm tlawk tlawk a, hlim nî a hmu ngai lo," ka tih leh chuan," Sawi tawh suh!" a rawn ti chhuak sup a, hrehawm tak tuara rawn țawng chhuak a ang.

"Hnung lam thil theihnghilh vek tùrin ka pui chein hmangaihnain ka enkawl ang che, ka fanu leh ka fapa nèn, mi țha ber chu ka ni hauh lo; mahse, i tân chuan a țha ber nih ka tum tlat ang, chu chu ka tiam che a ni," a ti sup sup a, a thil sawiin min tihhlimzia chu, ka mittui a tling pam nghe nghe.

Mi țha ber ni lo mah se ka tân chuan ani tluka mi țha an awm lo, ani hi rin loh deuhin ka tawng leh a, ka rin loh piah lam a ni. Mak takin kan han inkawp a, ani ber kher ka han kawp kha mak ka tiin keimah ngei pawh mak ka inti țhin a nih kha, kan inhmangaihnain in ropui sak kan tum chho țan tihah thlipui na zetin min rawn nuaiin min rawn nam sawk sawk a, keima lamah phei chuan a foundation  zawng zawng nèn lam sãwi chhiat vek a ni, a chhe hneh lutuk a, sak chhunzawm pawh ka duh lo ta rêng a; mahse, ani ve thung hi chuan thlipui leh ruahpui kârah pawh a lo sak chhunzawm mial mial a, beiseina a nei tlat a, chu beiseina chuan a tàwpah pàr a rawn chhuang ta a, hlim takin a in lo sak tawh sa chu ka sakpui chho ve thei ta chauh a nih hi.

"Ka hmangaih reng ang che. Rin loh takin nang nèn kan awm dùn leh thei si a, ka kalsan tawh ngai lo ang che."

"Kei pawhin le, min kalsan ka rem ti ngai tawh lo ang, eng harsatna pawh tàwn ngai dâwn se, nang leh ka fate  ka kianga in awm phawt chuan eng thil mah ka hlau lo," a ti ve sup sup a, chu thil a sawi zawh chuan rawn kûn hniamin duhthawh zet hian kan infàwp zui ta vawng vawng a.

*THIL RÊNG RÊNG HI A TAKA TAWN CHINAH CHIAH HIAN A NIHNA A LANG CHIANGIN HRIAT FIAH A AWL ȚHÌN*