☆UNEXPECTEDLY YOU☆ - 41 By Dingdi Pachuau

 ☆UNEXPECTEDLY YOU☆ - 41 By Dingdi Pachuau

Hun a kal zêl a, Pathian zârah Puipuii pawh a hrisêl țha bawk a, thing delh loh lung delh loh na nâ nâ chu a rawn țhang lian chho ve zêl a, a han țhu thei  a, chhûngkaw hlimna thlentu zawng a ni chiang e. A han bawkvâk thei leh a, chutah, rei lo te hnuah a han kal thei leh mai a, a pa hian a intauh palh a hlau thei khawp mai a, ani han kal thei ve lah chu, a tlãn a ni nghâl deuh mai bawk si a, kan buai sauh emaw tih tùr a ni. A pa chuan a intauh nat a hlau si a, a intauh theihna tùr àwm zawng zawngah thermocol a bel chhuak vek ti ila a dik ber ang.

Zawmdikite chhûngkua pawh an rawn zin tawh a ; mahse, an châm rei thei lo thung a, naute a tak ngeia an hmuh châk vànga rawn zin an ni bawk a, an awm chhûng chuan ka chang hman lo, an fate chuan an pawm kual a, amaha kaltîr pawh an phal lo.

Châma leh Sêntei pawh an innei daih tawh a, fa erawh an la pai lo thung. An inneih nia kan buai vezia ngaihtuah chuan nei daih tawh tùr hi an ni asin le. Kha hun zet kha chuh, ka ngaihtuah lét pawh hian ka nuih a la zat deuh bâkah buaithlâk ka la ti. Puipuii a pain a lo awm a, inneih inkhâwmah pawh an pafazain an tel ve vek a, an țhu tlar țhám nghe nghe. Innei tùr leh a țhiante kan han ding a, kan din chhuah ațangin minute 5 pawh a la ral lo ang tihah chuan Puipuii chu a rawn țap ta, a aw ațang chuan ka hre chiang nasa mai si a, hawi lêt mai chi lah a ni si lo, a rûka ka buaizia kha, a bâng mai ang chu tih lai chuan a la rawn țap uar sauh sauh mai a, inneih inkhâwma mipui lo kal pawh a tibuai chiang khawp mai, a hnuah chuan a pain a chhuahpui ta niin ka hria, hrehawm a tih dàn tùr leh a buai dâwnzia chu ka ngaihtuahpui lo thei lo va, inneihna lamah pawh ka rilru ka pe hlei thei lo, a țah chhan tùr àwm ka han ngaihtuah lah chuan ka hre lo nasa mai si a. Sêntei'n min rawn nghawk rûk deuh tâkah chuan inneihna lamah chuan ka rilru ka pe ta deuh, inneih inkhâwm rei ka tihzia mai chu, chatuan tluk zet niin ka hre hial a ni! Kan chhuah veleh Sêntei chuan naute ngaihven nghâl tùr chuan min hrilh a, ka han tlãn zui nghâl bawk a, ka in-fitzia tak kha, pheikhawk sâng nèn ka tlãn ta kha a nia. Hnute ka han pe a, chuti chung pawh chuan a la țap faih faih reng a, a pa lah chu, a hmêl ațang chuan tihlan tum lo viau mah se, a fanu țap nasa lutuk vàng chuan a chîãi buai tih ka hre thei, ka khawngaih dùn lutuk a, kei pawh ka mittui a tla lo chauh a nih kha.

Min hringtu ka nuin min rawn bia a," Chawhnu ațang khân i pa hian a awm a nawm loh thu a sawi tawh a, zanriah pawh min kîlpui peih lo, ka ngaih a țha lo riau mai a," tia min rawn hrilh chuan," A ni maw? Min va hrilh har ve?! Tunah a mu reng em ni? A khua a sik em?" tiin ka han zâwt nghâl a.

Chaw ei kham veleh kan lêng phei a, ka pa chu a lo mu bâm reuh a, a khua a sik a ni ngei ang, rizai a lo sin hlûn mai a; mahse, Duatate unau a hmuh erawh chuan hlim nui hmêlin a lo làwm ve hrâm hrâm thung. Kan thlen hnu lawkah U Kimite an rawn lang zui ve bawk a, ro kan han rêl zung zung a, ka nu nèn chauh an ni bawk si a, zànkhuaa chutia khawsik han tawrhtîr ringawt ai chuan tiin damdawi in lama inphurh luh nghâl mai chu țha kan ti a, a tûk lam han ngaihchàn leh rih pawh chu țha viau mah se a kum lam a lo tam ve deuh tawh bawk si a, kan ngaihtuah lo thei lo a ni.

Naute nèn kan nih nuai avàng leh zàn thil a nih bawk si avàng chuan Chhanzuala chuan inah min dah phawt a. "Lo ngaihven viau duh suh, eng êm a ti lo ang, chanchin ka lo hrilh vat ang che, an lo admit ta thuta riahpui a ngaih tâk pawhin ka rawn haw leh lawk tho ang," a ti a. Thil țûl tia a che vat vat han hmuh chu nuam ka lo ti a, ka pa pawh ka ngaihtuah lo deuh sawt bawk.

Kan khumah chuan kan nufaza chuan kan mu dal a, Duata chuan a nau kut vawnsak ràn chung chuan a pu chanchin chu min zâwt a, kei pawh chuan dik taka hrilhin," Doctor-in a lo en dik ang a, a khawsik tih rehna tùrin damdawi a lo pe bawk ang, a dam vat mai ang," tiin ka hrilh fiah ve a, ani chuan," Àpu chu ka khawngaih e," a ti reuh a, kei chuan," Ni e, a khawngaihthlâk khawp mai; mahse, a dam leh vat ang a, an inah pawh kan lêng leh thuai mai ang," tiin ka lo hnèm ve a.

Chhanzuala chuan min rawn be ta ngei a, ka pa chu an lo admit ta ngei a, ka nu nèn ringawt riahtîr ai chuan tiin riahpui chu a tum dâwn ta a, a rawn haw ta thuai nghe nghe a. Kan fate pahnih chu an muhìl tawh a, thil pawimawh tùr ka siamsak zung zung a," I hreh em?" tia ka zawh chuan a hreh loh thuin min chhâng ve mai a; mahse, min la riah chhuahsan ngai lo va, riah chhuahsan chu sawi loh, chhùn lamah pawh hian ina awm tam dàn mawlh ngaihtuah țhìn a ni a, a hreh ang tih chu ka ring tho.

"I awm dâwn loh chuan khum a ruak  dâwn sia, Duatate pahnih ka lo mutpui mai ang aw," ka ti leh a, min en vang vang a, thil dang mah sawi lo chuan a thaw deuh hak phawt  a, chutah," Kawng kalh țha ang che," a ti sup a, kan fate pahnih chu mang țha nân an biangah a han fâwp ve ve a, kei nèn pawh chuan kan han inmuah vawng vawng a, a kal zui ta nghâl a.

Ka pa chu a zun kawng lam fel loh vàng a lo ni a, ka nuin awmpui tho mah se amah mai chuan a inring tâwk zo lo deuh a, a mâkpate pahnihin inchhâwkin an riahpui a, an ti țha khawp mai. Kár khat chuang zet damdawi ina a awm hnuah chuan a chhuak ve thei ta a, a chhuah ni chuan ka nu leh pa(Duata pi leh pu) pawh an rawn kal ve a, damdawi ina a awm lai khân vawi hnih lai an han tlawh bawk, anni pawh hi an upa ve tawh tho a, ka ngaihtuah dùn țhìn khawp mai. Duata hi kum 10 chuang ni ve tawh se ka ti țhìn, a pi leh pute hian an ngaiin an thlahlel ve si a, an khawhar hnèm atân an bulah awm se, chanchin engkim kan hre zung zung thei bawk ang a, phone-a han inzawh leh ngawt țhin ai chuan a zia záwk ngeiin ka ring.

"Ka nu leh pate chuan mâkpa nei fel an inti ngawt ang chu," ka tih chuan ani chuan," An phû alawm," a lo ti mai a, a nui miah lo lehnghâl a. Ka en deuh reng hnuah chuan," I riahpui zàn apiang khân i muhìl thei ngai lo tawp tiraw?" tiin ka han zâwt zui a, ani chuan," Engtin nge i hriat theih a? Min lo enthla a ni lo maw?" a lo ti duh lek chauh a.

"Ka hre thei mai, i hmelah pawh a hriat theih vek alawm," ka tih chuan a hmai chu a'n tuai puat a," Ka muhìl thei lo tak tak! I taksa nghèng chiala mut loh chuan muthilh tum chu har tak a ni," a lo ti vat a, nui deuh hlek chung hian kei chuan," Ka nu nghen mai tùr alawm, a nih loh tal pawhin ka pa--" ka la sawi lai mêk chuan," Tlaivàrte zawng, ka hnehsawh alawm, tlangvàl lài ațanga ka hnehsawh ve thil kha a nia," a lo ti a, a nui vei suk bawk a.

Ka nuin min hrilh a," Chhanzuala kha a muhìl ngai lo a niang, zàna ka muhìl ka han țhangharh châng khân a lo la meng thei ziah mai a, 'I la mu nange?' tia ka zawh lahin,' Ka mu dáwn chiah,' a tih loh leh,' Ka harh lai tak a nia,' a ti ziah a, i pa lah kha zàna han menpui ngai leh mu thei lo tùr khawpa ngaihtuahawm tak kha a ni mang bawk si lo va," tiin, ka záwt chhin ang ka ti rilru ràn a, ka záwt ta chiah a, min hrilh țhat duh pawh ka rin loh nèn, a sawi țha duh phian zui.

"Ka lãwm tak zet a ni, hah leh hrehawm tih pawh sawi hauh lovin damdawi inah, muhìl thei lo chung chung pawhin ka pate i riahpui a, mi fel tak pasal atân leh fate pa atân ka lo nei che hi chu ka vànnei tak zet a ni, ka nu leh pate tâna mâkpa fel tak i ni pawh hi ka lãwm tak zet zet a ni," tiin làwmthu ka han hrilh a, ani erawh chuan eng danga min chhâng lo hian," Khawvêla mipa vànnei ber ka ni," a lo ti thung a.

Vànduaina leh harsatna kan tih hi mihring kan nih chhûng chuan kan tawn vek theih a ni a, natna kan han tâwk a, thihna hial pawh. Hlimni hmêl kan hmu tawh ngai lo ang a tih tùr khawpa lungngai leh vànduai nia kan inhriat pawh hian hringnun hi chu a lo mak khawp a, kan hma lam hunah hian hlimnain min lo hmuak leh țhìn. Kan hlim êm êm lai pawhin harsatna a lo thleng ve leh tho bawk a, hei hi hringnun chu a ni. A inlumlet kual a inlumlet kual mai a ni.

Duata school chawlh laiin Aizawlah kan zin phei a, ka kal khát ve ta deuh bawk a, a lo danglam ve tawh viau mai. Mizoram khawpui ber nge nge hi chu khawpui dang tân pawh hian el chi pawh a ni lo, dàwr kan han tlawh a, a lo phuisui viau mai lehnghâl a, a chinchâng hi chu min hrilh fo mah se ka la hmuh miau loh avàngin ngaihruatna bâkin la hmu hek lo i. Chhanzuala lo thawhrim dàn tùr chu ka ngaihtuah nghâl vat a, ka rilru pawh a vák thui viau mai. A hma kha chuan tlangvâl awm țha fahran lo leh rui ve țhìn, insual peih at reng mai hmuhin mi zawng zawng khân an hmu ngei ang chu; mahse, mihring rilru leh nungchang inthlâk danglam theihzia hi, amah ațang hian a chiang khawpin ka hria. Ruih peih leh insual rawn avànga khawtlâng hruaitute pawhin an zilh hial kha a ni a, tunah zawng, kha thil kha a áwihawm loh hial tawh zâwk a ni. 

Thil țûl a tih zawh hnuah kan lêng chhuak a, Aizawl khawpui fangin kan han tlãn kual a, Duata pawhin ropui a tiin nuam a ti khawp mai, a vawi khat kalna a ni bawk a, zawhna pawh a ngah e, a pain dawhthei takin a zawhna zawng zawng chu a chhànsak vek a, ka lo inrawlh zauh zauh chauh. Bazárah kan han kal a, Puipuii chu a phûr ngang mai a, pawm a duh hauh lo, a tãl pît zél a, a chak but but reuh bawk si a, a tàwpah zawng a pa chuan a kài ta tawp a, a phûr bawk a, a țê rai rai reng mai.

Hotel-ah kan thleng tawp a, a zia phian, buaina tùr a awm lo va, eia in leh mut leh tawp a ni deuh mai. Kan dàwr chung chiah kha a hma chuan Chhanzuala'n a luah țhin a; mahse, chhûngkaw member pali tân chuan a tét dâwn bâkah, tunah phei chuan kan dàwra thawk pakhat leh a nauin an luah tawh a, anni pawh an tâwt lek lek a ni.

Chhùn lama bazâra kan kalpui vàng kha a ni ngei ang, naupang pahnih chu an mu hma khawp mai. TV kan en peih lo va, tih tùr a awm lêm lo bawk a, kan tih ngai loh tak mai games kan khèl dùn a, kan hlimpui phian mai, a chak zâwkin a duh angin a châk lo zâwk thuamhnaw a phelhsak ang tiin amahin a sawi hmasa a, amah a chak chho zêl si a, min phelhsak apiangin a nui suk ziah a, keiin ka lo melh râwm ziah thung a, vawi nga vêl a chak hnuah phei chuan thuam inbel alawi pawh ka nei tawh lo. 

"Trick i hmang a niang?" ka tih chuan a nuih a za khawp mai a," Fair lo taka thil tih chu ka duh bîk hleinem," a lo ti mai a, chumi hnua game-ah chuan ka chak ve ta a, phûr zet hian a kekawr hâk lai chu ka phelhsak a, ani lah chuan," I chak zêl tawhin ka ring," a lo ti sup zui a. Kan han khèl leh a, a sawi ang tak tak chuan ka chak leh ta a, ka chak chho ta zêl mai a, ka ringhlel leh si," A fair lo, i chak lo der a nih kha," ka ti a, ani lah chuan," A mak! I thiam vàng a nih kha, min ringhlel reng suh," nui sûng chung hian a lo ti a, boxer nèn chauha a awm ve tâk hnu chuan," Duh tâwk tawh ila, i lung a áwi thei tawh mai ang em? Nge min phelh ruah thlengin kan ti dâwn?" a ti a, a nui sûng hmel ka hmuh chuan," A lum e, inbual daih ka duh," ka lo ti thung a. Ani lah chuan," Inbual rual ang, naupang lah ngaihtuah ngai lovin an muhìl tawh lehnghâl a," a lo ti vat a.

Aizawla kár khat deuhthaw kan chàm hnu chuan kan haw phei leh ta a, kan thlen tlaia Duata'n a pite a han biak chuan a puin a lo chhâng a, a piin a chhàn loh avàng chuan a pi chanchin chu a zâwt vat a, a dam lo a ni àwm e. Ka han be chiang vat a, ka nu chu nizàn hmasa ațangin a lo dam lo tawh a, inentîr a duh si lo nèn, inah a lo tuar tawp mai ni àwm a ni. 

"Ka pa, chutiang chu min hrilh vat tùr alawm le," inthiam lo ru angreng deuh chuan ka han ti a, ani chuan," In zin tih ka hria a, ka rawn hrilh che u chuan in rawn ngaihtuah viau ang tih ka hlau alawm, in zin chhuah ve chhuna rawn tihbuai che u kan duh lo bawk a," a rawn ti a," A va ho mai mai tak!" ka ti hlak a, an inthlahrung ru ve viau tawh pawh chu ka hre thiam tho mai; mahse, ka khawngaih, enkawl tak taktu tùr an nei tawh si lo.

Inthlahrung ru ve tak chuan an chanchin chu Chhanzuala ka hrilh ve a, ka rin phâk loh hian ani chuan," Zaninah va kan ila? An ngai ngawt ang che u, enkawltu an nei tawh si lo," a lo ti khiah mai a, chutiang rilru a lo pu chu ka rin phâk loh a nih avàng chuan ka en hau ringawt a, a hnu deuhah thung chuan," Mi fel ëm êmpa, ka pasal i ni hi chu ka va nihlawh tak!" ka ti chhuak hliai a, ka lãwm tak tak a ni. Ani lah chuan," Thil țha ka hmu che hi ka lãwm daih zâwk!" a lo ti thung a.

Kan va thlen phei chuan ka nu chu khumah pawh mu peih lovin țhutthlèngah a lo mu a, Duata a han hmuh chuan a lo kuah nghâl vang vang a, a mittui pawh a tla hial mai, a lo ngai tak zet a nih dáwn hi. Aisàmi chuan Puipuii chu a lo ban vat a, ka pe ve mai a, a la muhìl rih lo bawk a, pawi lo mai rawh se.

Kan țhut muan hnu chuan ka pa chuan,"Vawiin lamah in rawn haw phei chauh a ni si a, in chauh àwm nèn," inthlahrung tih hriat tak hian a ti a, kei chuan," Chau lo ve, motor-ah kan chuang alawm le, țhalai tân chauhna tùr a awm lo," ka lo ti vat a, Chhanzuala erawh a dàn ngai têin a țhu ngawi leh tawh a, rinawm taka a lo țhut ngawih mai mai pawh hian min tiphuisui tho, amah avànga lêng thei alawm kan nih le.

Ka nu chu ka han be chiang a, ka han sawipui fê hnuah chuan inentîr chu a duh ve ta mai a, Châma be chhin ila, naktûk lamah a hnénah chuan kalpui ta mai ila a țha ang, hetia tawrh tlawk tlawk mai chu a fuh lo, kum upa a ni tawh lehnghâl a, enkawl vat a țha.

Mutnaa ka sawipui chhin chuan Chhanzuala chuan," Nangin i kalpui lohin tuin nge kalpui ang? An fanu i nia, an innghahna ber i ni bawk, Puipuii chu ngaihtuah a ngai lo, ka lo awm thei mai ang, nangmah chauha i kalpui hreh pawhin kan pafain kan kalpui thei tho bawk che a," a lo ti dam thluam a. Ka rin loh deuh deuha min chhàn țhin avàng hian ka en reng lo thei țhìn lo, ani lah chuan," Min en peih chhûng chu min en thei ang, nuam ka ti alawm," a lo ti leh mai a, kei chuan,"Mak ka ti êm che a ni, i rilru zau lutuk hi, mi țha tak chu i lo ni," ka ti a, a hmuiah chuan ka fawhsak zauh a.

"Khatiang lek kha ka duh khawp lo."

Nupa nun hlimawm zeta kan hman hnuah chuan chau hnâpin a âwma bei tlãn chung chuan ka maimichhîng a," Kei mai ni lo, ka chhûngte leh Duata pi leh pute chung thlenga rilru zau tak i pu thei leh an chunga ngilneihna i lantîr thei hi ka lâwm tak zet," ka han ti leh sap sap a, ani chuan," Nang ka neih vàng che hi a ni, chu vàng chauh chu," a lo ti lêt ve a, ka chalah rawn fâwp zohin," Muhìl tawh rawh, i chauh êm kha, naktúk lamah chuan chak taka i awm a ngai dâwn a nia," a ti a, inkuah rial chunga muin rilru hlim tak leh thlamuang tak chung chuan ka muhìl ta siai siai a.

*CHHAN LEH VÀNG AWM MIAH LOVA INȚHENNA HI THIL LUNGCHHIATTHLÂK LEH TAWRH HREHAWM TAK A NI A, CHHAN LEH VÀNG AWM MIAH LOVA INHMANGAIHNA ERAWH THIL MAWI BER A NI THUNG*