☆UNEXPECTEDLY YOU☆ - 42 By Dingdi Pachuau

 ☆UNEXPECTEDLY YOU☆ - 42 By Dingdi Pachuau

Ka nu chu test chi hrang hrang neihpui a ni a; mahse, ka rin aiin test result lamah chuan a dinhmun chu a țha tlat, a zunkawng lamah erawh hnái a lo awm nasa a, a pumpui pawh a lâwng nasa bawk.  A zunkawng fel lo chuan a taksaah khawsik awmtîrin a tlun hial bawk a lo ni, damdawi ina admit ngai êm chu ni lo mah se țha taka enkawl a ngai thung. A ei tùra damdawi chi hrang hrang an chawh chu kan lei vek a, a zia chho thuai thei tùrah ka ngai. Amah enkawla nî tin kan tùrin nurse pakhat kan ruai tawp a, Aisàmi awm tho mah se a buaipui vek hman dâwn si lo va. Duata pawh school a chawlh lai a nih avàngin a pite in lamah a awm phei ve rih bawk a, a pi hian a ngai thei êm mai a, school chawlh lai a lo ni remchâng ve bawk nèn, a pa pawh râwn êm êm lo chuan ka pheitîr ta ringawt a, ani pawhin a lo hnial chuang lo va.

Duata riah phei zàna zanriah kan ei lai chuan kan inneih ațanga a vawi khat nân kan inhau ve deuh a, inhau ti ila inhnial ve deuh a ni zâwk ang chu. Duata pheitîr chu a lo rem ti vak lo ni ngei tùr a ni.

"Naupang chumchiap mai a la ni a, in pahnih kàr tawntîr hi țha ka tih zâwng a ni lo," a ti nghut a, thinrima țawng pawh a ni chuang lo va, han țawng deuh nghut nghut hi chu a hrât a, kei pawhin ngaia neih châng ka nei tam zâwk tawh rêng a ni.

"A chawlh lai a ni sia, bâkah, a pite'n an ngaiin an thlahlel ve bawk a tiin ka pheitîr a nih kha," ka lo ti ve mai a, ani chuan," A dik ang, nia, i kaltîr tawh a, tihngaihna a awm tawh lo," a ti leh nghut a, duh tâwk lo chuan," A la naupang a, pi leh pute enkawl tùr êm chuan a la nau bawk a, chuvàng chuan, a hun tam ber hi chu a nu leh pa bula a hman hi a fuh ber, a hma hun zêl atân," a tih chhunzawm leh a. "Ni e, a dik chiah mai, ni dangah chuan ka kaltîr tawh lo ang e," ti mai tùr ka nih lai leh ngawi ta mai tùr ka nih lai chuan ngawi ta mai lo chuan," A pi leh pu bula a awm pawhin a va sual phah kher chuang nâng, an duatin a pi leh pu dik takte an ni bawk a," ka lo ti leh a, a țawng zawm tawh lo, a tho vut a, a kut sil faiin a fanu bulah chuan a va țhu ta daih a.

A thin a rim deuh em maw ni le? A pi damlo kher lo se chuan kei pawhin riah pheitîr chu ka duh hran bîk lo asin; mahse, an ngai ve lawm lawm si a, a pi lah a lo damlo kher bawk si nèn, amah râwn hmasa lova ka riahtîr vàng chuan a lungawi lo a nih ka ring ta deuh hlek a. Rilru nuam vak lo chuan ka han melh ru deuh țhin a; mahse, naute chauh chu a làwm a, thinrim hmêl erawh a pu chuang lovin ka hria; mahse, nuam ka ti lo, a hma ațanga ka lo ngaihtuah reuh reuh țhin leh ka hlauhthàwn rûk 'Fa' chungchângah inhnial deuhna neiin tunah rilru nuam lo ru takin ka awm chu a ni ta si a.

Khumah chuan ngawi rengin a țhu a, a boruak chu hre lo derin ka han be lui a, min chháng tho nain a rùl tâwk chauhin min chhâng thung. Zanin chu kuah pawh ka hlawh loh hmel viau mai, hetiang boruak hi kan nei ngai si lo va, nuam lo ka ti tak zet a ni.

"I thin a rim em ni?" tia ka zawh chuan," Rim lo," a lo ti mai a, en erawh min en duh lo. A țawngkam chauhin a thin chu a rim lo a ni ngei ang, a awm dàn leh a hawiherah a hriat vek tho si a, dâwt sawi thiam lo tak chu a ni. Kei rêng rêng pawh, Duata ka kaltîr hma khân a pa hi hrilh hriat ve phawt  tùr a nia, chhûngkaw pa ber a ni a, râwn thlap tùr ka ni asin, chu chuan amah ka dah pawimawhin ka ngai pawimawh a ni tih a tilang thei ngei ang.

"Keima thua Duata ka riah pheitîr vàng khân i thin a rim a ni tiraw? Ka tihpalh liau liau a ni," ka ti phawt a, a la ngawih ngur avàng chuan," A pa thu hmu lova ka kaltîr ngawt kha ka tisual chhiava a ni, tûn hnuah chuan ka ti leh tawh miah lo ang. Chuan, thinrim tawh lo la, aw? I thinrim ngai si lo va, a hrehawm êm mai," ka tih chhunzawm leh nghâl zat a.

"Ka thin a rim lo," a lo ti sup thung a, kei chuan," I thin a rim lo a nih pawhin tlëmin i lung ka tiawi lo tal a ni ngei ang, i lungawi loh chuan a hrehawm êm mai, naktûkah Duata chu kan ko lêt leh mai dâwn nia," ka ti leh a, Duata ka kaltîr ngawt mai kha a lungawi loh chhan ber chu niin ka hria a ni.

"A pi leh pute bula awm alawm a nih," a lo ti ve ta thung a, a țawng chu lungawi lo țawngkam a ni pawhin ka hre lo; mahse, koh lét thu ka sawi a, min hnial deuh chu a ni bawk sia, ka hre thiam lo. 

"Hetiang hian awm lo teh, hrehawm ka ti a nia, ka thiam loh, ka tihsual ka tih tawh kha, a thleng nawn tawh lo ang," ka ti leh a, zangthal âta a mu chu ka hnaih phei sauh a, kuah dà dá pah hian," Zanin chu min kuah si lo va, ka kuah hmasak che i phût deuh niin ka hria," ka ti sap a, ka pasal lungawi lo thlèm chu ka tih tùr a ni, a lungawi lohna chhan lah ka hre bawk.

A la ngawi deuh ngul tho a; mahse, ka kuah loh phah chuang lo. Kuah pah chuan ka ngaihtuah zêl a, kei aiin a naupang a, amah hrilh lova ka thu ka titlang ringawt kha amah ka namnùl niah a ngai ve thei tlat, kei lahin chu chu ka lo ngaihtuah thleng pha hauh si lo.

"Duata hi ka fapa a ni a, amah hringtu ngei a pa ni lo mah ila i fapa a nih chhûng chuan ka fapa a ni reng ang, a pa tak tak ni lo anga min hmuh hi ka duh lo a ni," a rawn tih chhuah dût dût chuan a hmel chu ka en vat a, ani pawh chuan min lo en ve chiah bawk a, thutak zet hian,"Ka lâwm thar leh e, Duata'n pa atân nang a nei che hi chu a vànnei tak zet a ni, ka hmangaih che," ka ti sap a, tawlh chho deuhin a hmuiah chuan ka han fawhsak a.

Pakhat zâwkin thil thlengah tlâwm záwk leh thiam lo zâwka ka insawi tâkah chuan thil chu a dik ta thluam mai. Inbe duh lovin tlâwm duh ta lo ila chuan zàn hun nuam lo takin kan hmang ang a, a tûk thlengin boruak țha a awm thei miah lo ang. A tu emaw zâwk zâwk tlàwm hi a lo pawimawhin a lo va țha tehlul êm! Zàn hun pawh nuam tak leh inpawh takin, pângngai leh zângkhai takin  kan hman theih phah leh ta si a.

"Ka lungawi lohna ber chu Duata pa ang hian min en lo niin ka hria a, a pa dik tak chu ka ni lo tih ka hria; mahse, chu chu lantîr ka tum ngai lo thung. Ka nupui i nih chuan i fa chu ka fa a ni, Puipuii nèn hian en hranna pakhat mah ka nei lo va, en hran lah ka duh hauh lo bawk; mahse, min dah hrang riaua ka hriat deuh bâkah a pi leh pu 'dik tak' i ti kher khân min tihlim lo a ni," a hnu deuha a tih chhuah tâkah chuan," Ka tihpalh liau liau a nih chu, a hringtu a pa ni lo mah la ka dah hrang hauh lo che asin, ka pasal i ni a, kan fate nèna kan innghahna i ni, ka țawngkam khân i rilru a ti nâ ang tih ka lo ngaihtuah phâk hauh lo va, min ngaidam hrâm dâwn nia," ka ti ve leh ta a. Kan lungawi lohna sawi chhuakin ngaihdam kan indíl tawh bawk a, kan boruak pawh a țha leh vek tawh e. Nupa kâra harsatna awm thei leh inhriat thiam lohna pawh inpawh taka sawi duna titi dun a pawimawhzia ka hriat chian phah leh ta bawk.

Ka nu chu a dam chak vak lo va, keini pawhin kan tlawh ngun khawp mai, țhenrual an ngah bawk a, inlêng pawh an nei thei viau bawk a, kan va lèn lai pawh hian mi dang lêng an lo awm ve ziah. Chhûngte leh țhiante pawh an ti țhain chanchin min rawn záwt ve reng reng bawk. Ka nu lah chuan a damdawi eiho kha a ngeih lêm lo a ni ang, rin aiin a dam chak lo tlat. Ka pa chuan," Han zia chak deuh se, hmunpui lama kal mai pawh hi pawi ka ti lêm lo asin le, tunah chuan a taksa a chak tâwk loh bâkah amah pawhin kal a inzuam rih àwm si lo va," a ti charh charh a, a ngaihtuah ve si a, an upa dùn ve tawh deuh nèn, ka nu chu dam thuai thuai se ka ti kher mai.

Ka nu chu kan buaipui lo thei si lo va, in hranga awm tawh niin pasal dang nei tawh mah ni ila ka enkawl kher a phút tlat a, Chhanzuala lah hi a'n en hrang lo khawp a, a fanu pasal, a mâkpa tak tak enin a en ka ti mai, a lakah pawh a inthlahrung duh hauh lo. Chuvàng tak chuan," Min rawn kan reng reng tho si a, in tân rawn kal chhën a buaithlâk mai mai, zàn hnih khat tal chu riak ve mai rawh u?" a ti leh mauh mai!

Ka bulah phei chuan a sawi ve lo hrim hrim a, Chhanzuala bulah a sawi hmasa a, a hnuah kan va tlawh leh țumin kan zavaia hriatah a lo sawi leh a, kei chu ka lo inthlahrun deuh bâkah Chhanzuala thu lo chuan thu pawh chah ka tum lo hrim hrim, pa ber a awm a, lo inrawlh ka tum lo.

A hnial ka rin tehlul nèn, ka nu hnênah chuan," Nakzànah kan rawn riak dáwn nia," a ti ta tlat mai a! Mak ti zet hian ka en hau ringawt a, ka pasal hluite in a ni a, kan lèn châng pawha a țawng tam lohzia ka hria, chhûngrilah nuam a ti lo ang tih ka hre ve tho a; mahse, chuti chung chung chuan ka nu bulah meuh chuan zàn kan riah tùr thu a hrilh bawk si.

Ina kan haw hnuah chuan," Ka nu kha dâwt hrilh lovin thu dik tak hrilh mai tùr che a nia, ani pawhin kan riah chu a ring pha tawp nâng," ka ti a, ani chuan," Thu dik alawm ka hrilh, kan riak ang chu, min sáwm alawm," a lo ti mai thung a; mahse, ka ring chuang lo, ka nu rilru tihhlim nân a sawi ni maiin ka hria a ni.

"I nu hmêl ka hmuh hian ka nu kha ka hre chhuak leh tlat țhìn, an inang pawh a ni tawp si lo va, ka khawngaih thlâ a la deuh pawh a ni mahna!  Țha takin dam chhuak leh se ka ti viau a ni, pakhat zâwk zâwk an inkalsan chuan a kalsana a khawngaihthlâk dáwn êm mai," a ti leh duah a, kei erawh chuan," A dam leh vat mai ang," ka lo ti thuai a, ani pawh chuan," Han beisei phawt ila, mihring chu beiseina neia kan nun loh chuan nun hian awmzia a nei thei hleinem," a ti leh a.

Ka nu hnêna a thil sawi kha a tih tak tak ka rin phâk loh tehlul nèn; mahse, a lo ti mai mai hauh lo tih chu a tûk zànah ka hre ta. Kan riak phei ta tak tak a! Aisami  chu a lo lãwm kher mai, Duata lah chu a'n hlim mai mai khawp a, chutiangin Puipuii pawh a hlim ve bawk, an unau chuan infiamin an nui leh rawi rawi țhin a, an inúm kual nasa bawk, khap ka han tum ngial a; mahse, ka nu chuan khap a phal  hauh lo," An hlim ve a nih kha, an chetlá vêl hmuh a nawm bâkah an hlim nui ri hriat a nuam," a ti tlat a, a hnu deuhah chuan a nau zâwk chu a chau ve ta deuh a niang, ka pain a pawm deuh hlù hlú hnuah chuan a muhìl titih ta mai a, ka lâksak ta thuai a. Duata pawh a pain a lo pawm ve tho a, ani pawh a mit khap dàn a dik tawh lo.

Room-a kan luh chuan," Khumah khân mut ka duh lo a nia," a ti nghut a, a duh loh chhan àwm chu ka ngaihtuah chhuak thiam nghâl zat ve tho. Zda nèna kan khum kha a ni ve a, mu tlâng lo mah ila mi zawng zawng ngaiha kan nupa khum a ni miau si a, a mu duh lo pawh chu ka hre thiam. Chhuatah mutna ka phah dul a, kan fate pahnih kan muttír hnu chuan," Lo awmpui rih mai ta che, ka va meng rei hran lo ang, i lo nin deuh pawhin lehkhabu chhiar tùr a tam khi," tiin ka kawhhmuh zui a, ani pawh chuan," Aw le, va kal thuai rawh, kei ai chuan an lo thlahlel zâwk ngei ang che," nui deuh suk chung hian a lo ti ve a.

Ka va chhuah phei leh chuan ka nu taksate chu ka va hmehsak a, ka zút bawk a, zàn rei tak pawh ka menpui chuang lo, ka nu chuan," Min menpui tùrin riakah ka sâwm lo che u, va mu tawh rawh khai, in pa pawhin hrehawm a lo ti tawh ang e," a ti a, ka pa pawh chuan," Tihian, kan muhìl thuai mai dâwn alawm, na hluah hluah pawh a ni lo va, men reina chhan tùr a awm lo,"a lo ti ve a, anni pawh mu thuai se ka duh avàng chuan  ka hnial zui lo.

Chhanzuala chu a lo la meng reng a, ka intih fai hnua a bula ka va mut chuan a dàn ngai têin min lo kuah leh vat a, ka nui hak nghe nghe a, a inhmeh tawh êm mai a, 'min kuah' hi a tã bík hliah hliah ni àwma mawi a ni tawh!

"Ka lãwm e aw, hrehawm i ti ru viau ang tih chu ka hre reng; mahse, ka nu i ngaihpawimawh vànga hrehawm pawh pawisa lova a duhna i tihhlawhtlinsak vàng hian làwmthu ka hrilh mawlh mawlh che, ka lãwmin ka chhuang tak zet che a ni," ka ti sar sar a, ani erawh chuan eng mah a sawi lo, nghet angreng takin min kuah reng ringawt.

*TU EMAW NÈN HARSATNA IN NEI A NIH CHUAN A HNÊNAH KAL LA, SAWI DÙN RAWH U, MI DANG DANG HRILH CHHÀWN KHER A NGAI LO VE*

(Zanin chu dah loh ai tak tak, ka hman har reuh lutuk a, lo ning s'u, a tàwp teuh tawh lutuk ringawt)