☆UNEXPECTEDLY YOU☆ - 43 By Dingdi Pachuau

 ☆UNEXPECTEDLY YOU☆ - 43 By Dingdi Pachuau

A tûk zînga ka harh chuan kan mutna chu ka hai lek lek a ni; mahse, ka hre chhuak leh vat a, min kuah chialtu chu thlêk zauhin ka nui sak a. Ka zêp lo, zîngah hian ka tho hma ngai lêm lo va, kan inneih hnu pawh hian chu chu ka la chhawm zêl a, ka thawh khalh khât viau; mahse, tukin chu kan in a nih loh vàng nge, a la harh miah lo, tûk dang chu ni se chuan a harh leh daih tawh ang a, a fate pahnih nèn an ri leh chùl daih tawh ang.

Dim têin ka tho țhem țhem a, ka han hawi lét leh a, chhuata an pafazaa an han mu dal mai chu an hmuhnawm bâkah thlìr manhla tak niin ka hria, naupang pahnih lah an mut kàwi deuh niai ka rin nèn, an mang a țha dùn phian a, nu mit ațang hi chuan a pasal leh thisena a hrin a fate tluka hmuhnawm hi an lo awm kher àwm lo ve.

Ka thawh hnu lawkah ka pa pawh a lo tho ve thuai a, ka nu erawh a la mu rih thung. Rawng ka báwl țan tihah Aisàmi a rawn tho ve a, min rawn pui nghâl bawk a, che zung zung pah chuan a țawng suam suam a," Rawn riak zeuh zeuh ula ka ti ngawt mai," a tih chuan," Engati maw?" ka lo ti vat a, ani chuan," A nuam ve alawm, ka hre thiam chiah bîk lo, i awm hi chuan a nuam a ni tawp mai, lo riak leh thuai r'u aw," a lo ti sauh sauh a.

Chaw ei khamah Chhanzuala chu a haw thuai a, keini erawh chu la awm rihin chawhma chhûng chuan ka nu  chu kan awm a, ani pawh a țawng peih viau a, naupang nèn kan ni bawk si a, ka duh aia tam a țawngin ka hria. A hnuah phei chu a țawng ve zêl avàngin ka țawngpui duh ta lo va,  chawhnu dâr 2:30 vêlah kan haw phei thei ve ta chauh a ni.

Ni tin kan kan zut thei bík si lo va, ka pa hnênah ka nu chanchin chu ka zâwt ziah thung a. Hma a sâwn chak lo viau mai chu mak ka ti a, a natna dik tak hi an la hre chhuak lo zâwk niin ka ring hial mai. Ka pa chuan,"A kum lam a tam ve tawh avàng leh damdawi a ei tam avàng hian a taksa a nghawng deuh lo thei lo va, han chak deuh se hmunpui lamah i unautehovin hruai thla se a țha ang, hmunpui nge nge hi chu doctor thiam an tam bâkah khâwl pawh a țhain a changkâng tawh a," a ti a, kei pawh chuan," Ni e, han chak chhuak deuh phawt se, amah pawhin a zuam viau hunah kalpui ngei chu a țha ang," ka lo ti ve a.

Chhanzuala pawh ka rin aiin a beng a vâr daih mai a, chhùn chawlh laite hian a lo va tlawh zauh zauh tih ka pa ka va biak châng hian min lo hrilh țhìn a, pasal țha tak ka neih avànga a làwmzia min hrilh ziah bawk. Ni e, ka pasal hi mi sual a ni lo va, mi làwm zâwnga thu sawi leh țawngkam țha deuh deuh hman erawh a ti ngai lo thung, a țawngkam chhuakin mi lêm hran lo mah se a rilru a chhe lo va, a țhatna hi an la hre chhuak zêlin ka ring bawk.

Naupang pahnihin toys an khalh lai chuan min rawn húi zauh a, ka lo meng phar ãk a, ani erawh a nui suk thung. Tûn hnai chhoa a awm dàn hi a danglam deuh hlekin ka hria a, engtin min ti pawh a ni chuang lo; mahse, min lo en leh reng țhìn a, ka lo hmu fuh thei êm êm zui, a hma pawhin duh tih hriat taka mi en vung vung hi chu a chîng viau a; mahse, tûn hnaia min en dàn hi chu a dang deuh hlek alawm, min khawngaih hmêl a pu țhìn ni berin ka hria. Lu thing deuh nak chuan ka zui ta vat a, Duata bulah erawh a nau lo en tùr chuan ka chah zui zauh bawk a, room-a ka zui luh chuan,"Ka lo ngaihtuah ngai miah lo va, kan inneih hnu hian thil ka leisak àwm che pawh ka la hre lo, a dik tiraw?" a lo ti sup a, kei chuan," A ngai hleinem, nang ka nei tawh che a, mamawh dang ka nei tawh hleinem," nui chung hian ka ti lêt a.

"Kha, han en teh le," tiin dawhkàna paper bag sendâng lian angreng tak chu min rawn pe a, ka rin loh lam daih thil a nih avàng chuan lâk mai nachâng pawh hre lo chuan ka lo en hû ringawt a, ka kuta rawn hmeh belin," Han en chhin teh, nangmah mitthlà rauh rauh chung chea ka lei a nih kha," a ti leh a, amah chu ka en leh vang vang hnuah chuan bag chhûnga mi chu ka en ta chauh a.

Mutkawr mawi zet hi a lo ni a, satin dum leh lace dum țhui pawlh niin a mawi bâkah a țhui dàn chu a sexy riau mai lehnghâl a, to pawh a to reuh ngawt ang. Hetiang lam hi ka la inbel ngai hauh lo va, ka hâk tùr pawhin ka la mitthlà chhin ngai hek lo. 

"Hâkna hun ka nei ngût dâwn em ni?" nui chunga ka tih chuan,"Ni ve tho mai, i ha ka hmuh hunah phei chuan ka hlihtîr rang dáwn si che a," a lo ti ve mai a, a nui ve miah lo thung a. 

A hnu deuha,"Han ha chhin la?" a tih leh chuan," Zàn mut dáwn hunah le, tuna ka hâk chhin chuan nalh min ti dâwn si a," tiin ka nui hak hak phawt a, chutah,"Naupang kan kalsan rei deuh tawh mah mah i ti ve lo maw?" nui chung vêk hian ka ti leh a, ani chuan," Ni dáwn tak e, i hâk hun erawh ka nghâkhlel tawh khawp mai," a ti sup a, min rawn kal pelh dâwn chuan ka bulah chuan ding deuh datin," Sexy dâwn nasa mai siah!" a ti leh sup a, room ațang chuan a chhuak zui ta nghâl a.

Chuta chin chu ka mamawh leh duh zâwng nia a rin thuamhnaw hi min rawn lei haw ta fo a, ka duh záwng leh inhmeh zâwng tùr lah chu a'n hre thei khawp mai a," A, hei chu ka thâwl deuh," tih emaw," Hei chuan min phuar deuh tlat," tih emaw ka nei ngai lo, ka tâwk chat theih ziah nia! Ka mamawh tak thil ni lêm lo mah se min duatna leh min ngaihsakna a lan chhuahtîrna a ni a, ngai ka ti lêm lo nain ka sawisêl ngai lo, lãwm takin ka la a, làwmthu ka hrilh mai țhin.

Zan khat erawh chu,"Thil min leisak tam tawh si a, thuamhnaw phei chu hâk pawh ka ha sêng tawh lovin ka hria. I thuamhnaw lam ti ve tawh thung ang," ka ti ve ta a, ani erawh chuan," I tân leh ka fate tân alawm hna ka thawh le, i pasal nia thil leisak thei chea ka awm hi ka lãwm a ni, ka tân leh ka fate tân i thawh nasat tehlul nèn i hnêna làwmthu sawi nachâng ka hre har zâwk a, pasal bengvâr lo tak chu ka lo ni," a lo ti ve thung a.

Duat taka kuah pah hian," Ka pasal tluka fel leh bengvâr hi khawiah mah ka hmu leh tawh hauh lo ang le, Duata pi leh pu pawh en hrang hauh lovin i ngaihven êm êm a, hetiang mi hi an vâng khawpin ka ring, i chunga làwmthu sawi dàn tùr pawh ka hre lo záwk hial mai, ka lãwm tak zet a ni," thutak zet hian ka ti a, a biangah chuan ka fawhsak zui zauh a, ani lah chuan,"Naute emaw ka nih i ti a ni maw?" a lo ti sup a, nui hak pah hian," Naute i nih loh tawp hi, i ni lo a ni lo'm ni?" tiin ka han chhaih zui zat a, ka chhaih rei hman lo kher mai. Khumah min bawh thlu a, nghet zeta min kuahin a rem lai laiah chuan min fâwp bawk a, ka chhaih fiam fuh nge fuh lo pawh ka hre thiam chiah lo; mahse, a hnu deuha lungawi zeta a âwma ka bei thlar tâkah chuan a lo fuh hlê a ni tih ka hre chiang ta viau mai.

"Kei hi damdawi ka ei ngai si lo va, Puipuii hian chhang a nei thuai lo ang tih a sawi theih miah loh a nia," ka tih chuan," Damdawi ei a ngai hauh lo! Ani pawh chhang nei thei tùrin a fel tâwk tawh," a lo ti thung a, kei erawh chuan,"An chhang a zin viau chuan hrehawm i ti viau mai ang aw?"nui deuh chung hian ka lo ti thung a, ani lah chuan,"A neitu tùr berin i pai leh tlat chuan lo zing deuh mah se pawi ka ti lo, nupa vànduai, fa neih châk si, nei thei bawk si lo an tam êm hi, kan vànnei leh zêl dáwn tihna a ni mai a," a lo ti leh zêl a.

Ka nu țhat chhuah hleih theih loh avàng chuan ka pa chuan hmunpui lam panpui tawh mai chu țhain a hria a, keini nupa pawh min ráwn thlap bawk a, kei chuan ka nu chu ka khawngaih deuh a, a la chak loh bâkah a lung a lêng dâwn hian ka hre khawp mai a, Chhanzuala erawh chuan," Amah berin kal a inhuam tho chuan țha ka tihpui mai, i pa lahin hmunpui lam a beisei tlat mai si a, a beiseina tihbeidawnsak chu a fuh ber lo ang, a zuk chauh phah viau loh beisei ila," a ti ve thung a, kár khat hnuah an thláwk thla ta rêng a.

Keini chhúngkua pawh Duata tel lovin ka nu thlah pah chuan Aizawlah kan phei lawk a, dàwr lamah buaipui ngai  a awm tho si a, remchângah kan la ta a ni. Thil țûl buaipuiin ni khat hun kan hmang a, a tûk lama haw phei nghâl ka ti deuh nain ani erawh chuan," Kan bazâr ve lawk ang chu," a ti teh tlat a, kan châm leh ta rih a nih chu.

Kan vah kualna MC-ah rin loh tak maiin Dinpuia ka hmu hlawl mai a, eng nge maw a tih ni? E, hei hi an dàwr a ni thei mai ang em? A patea sumdàwnna a puih tak kha, nge a bazâr ve zâwk ni ang? Amah pawh chuan min rawn hmu ve ta a, ka nuih sak a, a mitmengah chuan mak a ti tih ka chhiar thei nghál bawk.

"Eng nge in lo tih? In dam țha maw? Engtik thleng nge in awm dáwn?" Ka biak hma chuan amah zâwk chuan a rawn ti ta vat a, a nui sâng bawk a, 'i' ti lova 'in' tih a hman avàng chuan  ka bul lawka ka pasalin kan fanu a kai chu a hmu tel ve nghâl a nih ka ring.

"Kan dam e, kan rawn bazâr ve lawk a, naktûk khian dam chuan kan haw phei tawh ang. In dam țha zâwk maw?" tiin a zawhna chhângin zawhna ka han zâwt zui ve ta zat a, Chhanzuala chuan min rawn hnaih sauhin Puipuii a kaih lohna lam chuan ka kut chu a rawn chelh zui nghâl zat bawk a, lu thing deuh nakin ka nui sak a, a awmzia ka hre chiang leh pek si a, ka nuih a tiza leh tlat țhin.

"Aw, dam țha e, kan dam țha e, inhmuh a khât hle mai," Dinpuia chuan a ti leh a, kei chuan," A làwmawm hle mai, dam țhat hi a hlû a nia," ka lo ti ve a, chutah," Hei hi ka pasal Chhanzuala leh ka fanu Puipuii an nih hi, ani hi chu i hmuh tawh kha. Chuan, in nu hi a awm hnai em? Ka hmu ve châk ngawt mai," ka tih chhunzawm leh a, ani pawh chuan nui sâng chung hian Chhanzuala leh Puipuii chu enin," Pasal țha tak leh fanu hmel țha tak i nei a, ka lawmpui che," a ti a, min rawn en leh a," Ka nupui chu a hna lamah a kal a, han hmu hman ve la a țhat teh rêng nèn, kan inhmu khât leh tawh àwm si a tiraw?" a ti leh a, a hmel nui sâng chu hmuh a nuamin amah pawh a hlim viau a nih ka ring.

"Ni e; mahse, Pathian zâra kan dam te chuan, kan la inhmu leh țhìn ang chu... Taka, zawh àwm ni lo pawhin ka hre chuang lo, in nu chuan nau a pai tawh em?" ka ti leh a, ani pawh chuan," Zawh àwm lo ni lah lo ve, thla hnih mî kan pai ve mêk e," a lo ti ve vat a.

A lo awmna chu an dàwr chu a lo ni bîk lo va, han titi zêl pawh a chákawm viau rualin keini bazâr tùr kan la ni a, bâkah, kan bulah țawng duh miah lovin Chhanzuala a lo awm ve reng bawk si a, a hmelah eng mah tilang lo mah se mipa ka biak tawh chuan awmphung pângngaiin a awm thei tawh țhìn lo. Tih tùr țûl nei kan ni ve ve bawk a, kan kalna tùr lah a inang bawk si lo, kan ințhen dâwn chuan kan inhmuh leh tawh loh inringin kan inmangțha zui ta nghâl a.

Kan inbiak chhúng zawngin ka kut a chelh a, lehlamin Puipuii a chelh bawk a, Dinpuia nèn pawh khân an inchibai lo rêng a ni. Puitlingin patling ve viau tawh mah se mipa dang ka biak hi chuan a puitling hlei thei țhin lo, a puitlinna rilru kha a bo nghâl daih zêl a nih ka ring, a hahthlâk thei a nia, kan han țawng țha duh lo ngei bawk a...

A awm dàn chu hai der tlatin," Kei chu thuamhnaw lei ka ngai tawh lo va, nangma tâ tùr leh naupang pahnih tâ tùr lei a ni mai, jacket lam em ni kan en ang?" tiin ka be zui daih a, ani lah chuan," Kha pa khân nupui a nei tawh tak tak em?" a lo ti ve daih thung a, kan zawhna inchhâng lo lutuk leh kan thu sawi inpèrsan lutuk chuan nuih a tiza thei hial mai.

"Nei tawh e, Aizawlah hian an awm alawm," ka tih chuan," Phailênga ka hmuh kha a ni lo em ni?" a lo ti leh a, bûk nghat pah hian," Ni e, ka thawhna School Head fapa kha a nia, kan hming a inang chiah bawk," ka lo ti a, a ngawi vung vung phawt a, chutah," I hming ang pu ve si-a ka ngei ber a la ni ngei ang," a ti ta nghut a.

Ho thei a nia. "Shh, i fanu khân a hre rêu rêu ang e," tiin ka khap vat a, ani lah chuan," Amah vàng khân ka biak theih loh phah che a nih kha, ka la hre reng alawm," a lo ti leh vut a, thil lah hi a hre rei thei si a aw...

Jacket lum lutuk lo, mawi tak si hi ka thlansak a, to pawh a to ve viau bawk; mahse, a inhmeh tak zet a, a tâna an țhui ni àwm tak a ni, to deuh mah se nâ ka ti phal lo, a inhmeh hlê si a. Naupang pahnih kawr tùr pawh chu kan lei a, kan leina dàwr nghâktu lah chuan," In naute han duhawm êm êmzia chu!" tiin a biangah a piaisak leh ţhin a, kan awm chhûng chuan a chhaih deuh reng a, a kawr tùr kan leisak pawh chu a man pângngai aia tlâwm daihin min leitîr bawk," A duhawm nasa mai si a, a inhmeh dâwn êm mai," a ti ringawt mai a ni. A pa hmel chu ka thlëk țhin a, a hmêlah chuan lungawina leh hlimna ka hmu thei a, a fanu miin an han fak chu nuam a ti tih ka hre chiang viau bawk, a țha e, a hmel pawh hmuh a nuam ta alawm, Dinpuia kan hmuh lai nèn chuan a inang tawh lo viau.

Ka nute pawh Mizoram House ațangin damdawi inah an lût fel tawh a, ka nu chu a la chak tâwk loh avàngin damdawi țha deuhin an enkawl phawt ang a, chumi hnuah test chi hrang hrang an nei chauh ang. Ka pa khân kalpui loh kha a han tum zet kha a nia; mahse, a ngaingam leh ngang lo va, Lunglei ațangin Bialtei'n a zui leh bawk a, khuta awm sa Aisàmi u Hmingmawii nèn, nula pahnihin ka nu chuan an buaipui thei ang a, ka pa chu a hah vak lo ang chu maw...

Computer zirna lamah a kal regular lo riaua ka hriat avàng chuan a chhan ka han zâwt a, ani chuan," Kal vak lo, a pawimawh chin chu in lam ațangin a thawh theih vek alawm," a lo ti mai a. Ni e, ina a awm hian computer hi a țhutchilh fo a, a dik ang, a hna lam hi ka hriatpui vak lo va, inrawlh lah ka tum hek lo, țha taka ka fate leh amah enkawl hi ka tih tùr chu a ni mai. A țhiante mitmei ka lo vènpui ve vàng deuhin a nia kha zawhna pawh kha ka zawh ni, anni an hah viau laia ani regular vak lova hna a thawh bîk chuan fuh dâwn hek lo le.

Ka nu test result chu a chhuak ta a, a pumpui lâwng nasa chuan pân a lo siam tawh a, chuvàng chu a lo ni àwm e. Mak ka ti ru viau mai, ka nu hi  taksa hrisèlna ngai pawimawh leh invawng fel tak a ni a, zûk leh hmuam lam phei chu a ti lo hrim hrim. Hrisèl pawh a hrisêl viau țhìn a, Zda dam lai, kan inkawp lai pawh khân Zda khân a sawi fo țhìn a nih kha. Zda boral hnu ațang khân a taksa hrisèlna kha a tla hniam ta tlat mai a, a fapa boral kha a tuar êm mai a, kha khân tuna a natna pawh hi thlen a ni thei ngei ang.

Ka nu chu doctor-te chuan zai dam theih an inring a, ka pa pawhin a beisei ve tho bawk a, rawn haw chho lova zai theih veleha zai nghâl mai an tum dâwn a ni. Ka nu chu ka ngaihtuah viau mai, a lung a lêng ve bawk si a, amah tak pawh biak ka hreh țhìn, kan inbiak chhunah erawh chuan hlim taka biain lunglêng lo tur chuan ka hrilh ve a, a taksa a chak chhoh chak chuan a rawn haw chho hma thei dâwn a ni tiin ka fuih ve sauh sauh bawk a.

Min hringtu ka nu leh pate, U Kimi leh Sênteite pawh chuan ka nu chanchin chu min rawn zâwt ve reng a, ka nute phei chu an rawn lêng zauh zauh hial a, Sêntei leh U Kimi erawh anmahni tâwkah an buai ve tawh a, min rawn tlawh hman tawh bîk lo, keini pawh kan chhuak khât ta viau mai. Kan chhuahna țhin ber ka nute an la rawn haw chho rih si lo va, an rawn chhuah hunah erawh kan chhuak leh zauh zauh thei ang chu.

Ka nu chu ka țawngțaipui ve nasa țhin a, min hmangaiha a fanu tak tak ang hiala min entu a ni bawk a, kei pawhin min hringtu ka nu tluk zetin ka hmangaihin ka ngaina rêng a ni. Heti taka min hmangaiha min en hrang lotu nu ka nei hi ka vànnei thlâwt a, hun hmasa lamah vànduai riau bîka inhriatnate han nei tawh mah ila tunah hi chuan mi vànnei berte zînga mi ka ni ka ti lo thei lo, min hmangaihtute hian min hual țhup ni maiin ka hria.

Mahse, hringnun leh țawngțaina hi thil inang deuh hi a nihna chen a awm ve a, hringnun hi kan duh dàn angin a kal lo fo va, kan țawngțaina pawh kan duh dàn angin chhàn kan ni lo fo bawk. Ka nu tân theihtâwp chhuahin țawngțai mah ila, Pathian min chhànna chu hriat thiam har ka ti, Bialtei'n ka nu boral thu min rawn hrilh chuan ka țhu hnawk a, Pathian chu zawhna ka zâwt mawlh mawlh mai a ni. Ka nu tâna damna dîla ka țawngțaina chuan pàr a chhuang ta si lo va, ani ang mi țha lutuk mai hun lo taka a han boral mai chu ka hre thiam lo a ni, ka pain a la mamawh êm êm bawk si, a tel lo chuan engtin nge a awm ang le? Nupa inngeih tak an ni a, an fapa an chân tawh a, tunah chuan ka pa chauh a ni tawh dâwn asin.

Ka pain ka nu chanchin a sawi laia a lunglèn êm êm thu a sawi chuan min vèl lo thei lo. Natna khuma a mut lai khân he lam a ngai êm êm a, Duata pawh a be ãwl lo rêng a nih kha, hetiang hian min kalsan dáwn tih chu lo hre lâwk thei ila chuan kei pawh khân ka pa chauh be lo khân amah pawh kha ka be ãwl lo ang a, ka hmangaih a ni tih leh nu fel leh țha tak a nih thu kha ka hrilh reng bawk ang; mahse, thihna chungchângah hi zawng, thu kan nei lo êm mai a, thi tùrin kan lo piang tih hi hre reng mah ila a hun a lo thlen meuh hi chuan hriat thiam hi a har țhìn zawng a nih hi.

Ka nu boral hnu chuan ka pa pawh chu a hrisèlna a tla hniam ve sawt sawtin ka hria a, tuar thiam viau angin lang mah se upa lam a ni tawh a, ka nu hmun ruak chu tu mahin kan luah thei ngai dàwn lo tih pawh ka hria, chuvàng tak chuan ka ngaihtuah tak zet a ni. Amah tihlim theitu tùr ber Duata chu a pain a pu awmpui tùrin a pheitîr ta hial a, keini pawhin kan tlawh kan tlawh lo thei lo, Puipuii a ngai a, a che vêl leh țawng zir chho chuan a tinui ve thei țhin si a, kan phei loh deuh hlek chuan min rawn be deuh reng mai a ni.

*******

Tunah chuan ka nu lung pawh phun a ni tawh a, ka pa pawh a lang tar ve ta bâwih mai. Lung kha phun thuai a duh a, a duh ang takin kan buatsaih chûk chûk rêng bawk a, ka nu puala hun hnuhnung a nih tawh avangin ropui taka tih a duh nèn, kan buai ve map map viau rêng a ni. Ka nu boral kha a tuar ve tak zet a, a hrisèlnain tlâk hniam phahin amah pawh a chér viau a, a kum a upa chho ve bawk nèn, tunah chuan pâwnah pawh a chhuak ta meuh lo, Duata chuan a awmpui chawt tawh a, kan bulah pawh a lo phei tawh lo. Aisàmi a la awm ve reng bawk a, keini pawh kan hman chângin kan phei ve zut bawk a, in pahnih kan kàr tawn a nih ber chu.

November thla a lo inher chhuak a, ka awm dàn ațangin ka inringhlel a, ka lo ruak lo ta chiah bawk. Ka ruak lo leh ta chu chhûngte an hlim khawp mai a, a bîkin Chhanzuala.

"Ching lo na nâ nâ chu, a làwmawm e. Puipuii anga hmel țha leh Duata anga fel i han hring chhuak leh ang a, kan chhûngkua chu kan hlimin kan phuisui leh sawt dâwn tihna a ni," a ti a, a che sauh sauh reng a. Ka rai leh ta lawm nân chuan kan inah chaw kan ei khâwm a, țhiante'n min fiam nak nak a, Puipuii chhaih paha," U i ni dâwn chu a ni tak si a, ka va khawngaih reuh che êm!" an tih chuan ka melh rawlh hlawm țhìn a, u a nih dáwn tâk avànga lawmpui tâk aruanga an khawngaih chu mak ka ti, an lawmpui thu hrilh ve mai se, țha hle hle mai tùr.

Tûn țum ka rai zet chu, Duata ka pai lai kha ka hre chhuak lo thei lo. Ka thin a chhiain thil rim ngaihtheih loh ka ngah a, ngei leh huat ka ngah bâkah thil ka ei thei lo va, chuvàng tak chuan ka chêr viau bawk. Zàna ka bula Chhanzuala mu țhin lah chu ka ngaithei tlat lo va, a lam hawi pawhin ka mu ngai lo. A rimte chu ka ngaithei lo niin ka hria, a lam ka hawi duh tlat lo țhin chu a hre thiam lo țhìn khawp a; mahse, thinrimah erawh a la ngai lêm lo thung. 

Zan khat chu mutnaah inthlahrun hmel tak hian min rawn kuah dà dá a, a han ngaichang leh phawt a, a kut ka theh sawnsak loh avàng chuan a ngaih a ngam ta deuh a niang, min rawn hnaih sauhin," I lo țeu deuh hlar ka lo ring a, ka lo ring sual chhiava a ni," a ti sup a, tûn țum ka rai hi chu ka thinchhiat êm avàngin chutianga a lo ngai pawh chu ka thin a rim hran chuang lo.

"Lehkhabuah ka chhiar fuh hlauh a, hmeichhe rai țhenkhatin thil rim an huata an ngei theih dàn leh a pasalin chutiang chu hriat thiam a ngaihzia leh rilru zau tak put a ngaih thu ziahna a nia, chutiang chu tûn țumah hian kan tawng ve ta niin ka hria, eng pawh chu lo ni se, thla kaw chhûng zet min ngei tùr erawh hrehawm ka ti ngawt ang! Kei lahin ka thlahlel êm êm reng si che a," a ti sup sup a.

"I rim hi ka ngaithei lo alawm," ka lo ti a, ani chuan," Eng rim nge ka nam a?" a lo ti vat a, kei chuan," Ka hre lo, i rim kha ka ngei a ni tawp mai," ka lo ti leh a, a chek tlak a," A nih leh, Puipuii room-ah ka riak ve daih mai dáwn em niang? Ka rim i hriat loh chuan i mu tui thei bawk ang a," a lo ti leh a.

Chutiang êma han awm tùr chuan ka ngaingam meuh si lo, bâkah, a fanu room-a mu tùr chuan ka khawngaih sa, ka bula a mut loh chuan a mu tui thei lo ang, a mu hrang ngai si lo.

*HUN HARSA TAK TAK TAWNTÎRTU CHE BULAH KHÂN FÎMKHUR THIAM ANG CHE; MAHSE, AMAH KHA HAW CHUANG SUH, HRINGNUN ZIRTÎRTU CHE A NI SI A*