☆UNEXPECTEDLY YOU☆ - 44 By Dingdi Pachuau

 ☆UNEXPECTEDLY YOU☆ - 44 By Dingdi Pachuau

Hmun danga riak lovin ka bulah a riak leh ta rih a, a tûk zànah erawh chuan," Hna ka thawh chhûngin lo va mu lum la, ka han thawk thuai thuai ang a, ka rawn mu har lo ang," a ti a, Puipuii a ti muhìl tawh a, tih tùr dang awm hek lo, kan mu ve tawh mai ang chu ka tih laiin hna thawh tùr a lo la nei reng a nih chu.

"I va sawi har ve! Ka lo menpui dâwn che em niang?" ka lo ti ve a, ani erawh chuan," A ngai hauh lo, mut tam i mamawh kha, ka rei lo ang," a ti ve thung a, room  ațang chuan a chhuak zui ta nghâl a.

A lo mut lai ka hre miah lo, zun chhuakin min tihharh avàngin ka han meng a, zanin chu min kuah lo teh tlat a nih àwm hi. Dim light kan chhit avàngin room chhûng chu a êng ruai a, thovin a mutna lam chu ka han en a, ka hmu miah lo nia, a la mu lo tihna em ni ang? Dâr zât ka en  vat a, zîng dâr 1:30 a ri tawh! Chuti chen chen men tùr a ni lo asin, a rei loh tùr thu kha a sawi ve bawk sia, hna a ngah viau a nih pawhin naktúk lamah chhunzawm tawh mai rawh se. Zàn men rei țhat lêm lohzia ka hre ve tawh a, a țúl viau a nih loh chuan kei pawh ka meng rei ngai tawh lo rêng a ni.

In chhûngah chuan êng a awm tawh lo, computer pawh a êng tawh lo va, amah pawh a lo awm miah lo, khawiah nge a awm le? Ka rilruah ngaihțhat lohna a rawn lût nghâl vat a, khawiah nge a kal? Ka zun a chhuak a ni tih pawh ka theihnghilh  tawh, ani hian kan nufa chauha min hnutchhiahin min kal chhuahsan tihna em ni? Ni lo, a ni lo ang, a ni thei lo. Hlauthãwng ru zetin Puipuii room lam chu ka pan leh nghâl vat a, light ka han on a, khuma ka fanu tui tih hriat taka a muhìl sâk sâk leh a bul chhuata a pa mu chu ka hmu zui ta nghâl a. Light ka tih èn chuan Chhanzuala chu rawn mengin a rawn țhu chhuak zui nghâl bawk a.

"Ka zawng che alawm..."

Kan room lamah chuan kan inzui lût a," Ka rim kha i ngaithei si lo va, tui taka mu tùrin ka duh bawk si che a, chuvàngin ka mu sawn ta a ni," a tih chuan," Min tihlauthãwng alawm, kan nufa chauhin min kalsan ta emaw ka ti a," ka lo ti vat a, ani chuan min rawn hnaih vatin ka lut chu a rawn chelh a; mahse, a inthlahrung leh deuh a niang, țhen sakin a kut chu a la sawn zui nghâl vat a," Engtikah mah ka kalsan ngai lo ang che u, chutiang ngaihtuahna chu nei tawh miah suh, mu leh tawh rawh le," a ti zui zat a.

"Ka bula i mut loh khân mut pawh i muhil thei em ni?" ka lo ti leh a, ani chuan ban deuh chat hian,"Ka tum a, ka maimichhìn reng chuan ka muhil ve thei mai ang chu ka ti," a lo ti sup a, en pawh min en lo chuan a kun deuh chhal a, khawngaih rilru tak chuan ka en reng phawt a, chutah," Țawng tawh lovin mu ang, zàn a rei tawh," ka ti ta a, ka mutna lamah chuan kal zuiin khumah chuan ka han lâwn a, ani erawh chu chêt sawn zai rel lo chuan a la ding reng thung a, chu chu ka hmuh chuan a mutna lam chu ben thak pah hian," Lo kal rawh, i lo mu dâwn lo em ni?" ka han ti a, ani chuan,"Ka rim i ngaihtheih loh kha," a lo ti sup thung a, maimichhîngin ka thaw hak a," Lo mu thuai mai teh, vâwt ka tih bâkah ka mut a chhuak tawh a nia," ka ti leh a, chutah zet chuan rang zeta khuma rawn lâwnin ka bulah chuan a rawn inthawlh zui ta nghâl a.

A rim ka ngaihtheih loh lam chu ka sawi chhuak ngai ta lo va, ka insúm ve nasa viau bawk, inthlahrunga hmun danga a riah leh ka hlau a ni, ka bul ni lo hmun danga riah a hreh ngawih ngawih tih ka hre si a, bâkah ka thinchhe viau pawh chu min hriat thiamna chin nei mah se thinchhe bula awm a hrehawmzia hriain ka insúm ve hrâm hrâm bawk.

Duata pawh a pu hnênah awm chawt mah se kan kanin kan be reng a, ka ngaihtuah ve viaua ka inhriat nèn, kei aiin a pain a ngaihtuah zâwk a; mahse, a ngaihtuah dàn hi ka sawi thiam chiah lo, a ngaihtuah tih a sawi lang duh hauh lo va; mahse, chhùnah hian ka tel lovin a va kal fo tih ka hria, school lama a mamawh tùr nia a hriat thlengin a tihsak vek bawk a; mahse, Duata tih theih ve china a hriatah erawh inrawlh a tum chhin hauh lo thung, hmangaih taka enkawl siin puitling taka awmtîr a tum ni berin ka hria.

Chawhma lamah Puipuii ka bual a, ka bual zo tihah chuan a pi rawn langin an han inawm rèn ráwn a, chu hun țha chu remchângah lain hmanhmawh vak lo chuan thuamhnaw sûk tùra ka chiah chu suin ka tleuh fai a, ka pho nghâl bawk a, ka nu rawn kal hun chu fuh ka ti khawp mai.

"Kumin Krismas chu i pa bulah in hmang phei ang a?" ka nuin a tih chuan," Ka hre lo le, sawi erawh kan la sawi chhin miah lo va," ka lo ti a, ani chuan," Amah chauh a nih tâkah chuan hetia hunpui a rawn inher chhuah dâwn vêl hian a khua a har dâwn hian ka hre khawp a, i nu boralna lah hmânni lawk niin kum êm a la vei bawk si lo va, in va hman phei theih hlauh chuan tlêmin a khawhar pawh in chhâwk thei ang a ka tih vàng a nia, mihring chu borala ințhen vek tùr kan nih tho laiin i pa hi chu a khawngaihthlâk koh koh êm mai a," a ti leh a, nau a puak rei theih tawh loh avàng chuan Puipuii chu a pawm a, ani lah chu a lo awm țha zêk a, a muthilh thuai ka ring.

"A dik alawm, Chhanzuala tih dàn dán a ni mai," ka tih chuan a ngawi deuh vang vang phawt a, chutah," Ti ta daih ila, a pa hian a rawn be ngai em?" a rawn ti teh daih a! Chutiang zawhna chu ka rin loh lam tak a nih avàng chuan ka ngawi deuh dat phawt a, thu dik chu zêp chi ni hran hek lo le," Be ngai lo a niang, a sawi àwm ka hre lo," ka ti ve ta a. Ka nu pawh chuan," A nih tak chu, a rawn biak ka'n ring deuh ngawt a," a lo ti ve leh mai a.

Puipuii chu rei lo te hnuah chuan a muhìl ta mai rêng a, khumah ka mut nghâl thuai a, chhùn thingpui in hnuah ka nu chu a haw a, in ka tifel thuak thuak a, Puipuii bula tlûk zàl ve mai mai ka tum lai chuan doorbell a rawn ri a, a pa hi a lo haw leh tawh ang a, min fiam a tum a nih ka ring a," Lo lût mai mai la a nih chu a," ti nang nang chung chuan kawng chu ka hawng zui ta tho a.

Pâwn lama lo ding ka hmuh rual chuan ka ding khawng awtin ka ring, a hmêl hmuh hi ka beisei ngai hauh lo, he inah hlauh phei hi chuan. Ka en deuh reng a, amah zâwk chu țawng chhuak hmasaah țangin," In lo dam maw? Ka lo lût thei ang em?" a ti ta a. Ka harh chhuak zawk mai a, nui hmêl puin a lo luh nán kawng chu ka kian ta thuai a.

A hmel chu a lo upa ve ta hle mai, ințhenawma lo inhre chiang ngang ni lo phei ila chuan ka hai tawh ngeiin ka ring, a hmêl chu a dang viau lo nain a sam a țuak nasa viau tawh mai a, chu chuan a tilang dang deuh hlek a, chubâkah, a tilang upa zual a ni.

A lèn chhúng chuan ka rilru a chàwl lo ti mai ila ka thla a muang lo a ni zâwk ang chu, Chhanzuala a rawn haw hman ang tih ka hlau a ni, a rawn hawa a rawn hmu hman a nih hlauh chuan eng emaw chu a thleng ngei ang tih ka hre si a, chuvàng chuan ka rilru chu a hmanhmawh ru tlat a, rilru muang leh hahdam siaiin thukhawchâng pawh ka sawipui thei lo.

Mahse, ka awm dàn ațangin a hre thiam ve nge ni, a awm rei ta lo hlauh mai a, a chhuah dâwn chuan," Ka mi hriat záwng nupuia a nei che hi țha ka ti khawp mai, chanchin zâwtin ka rawn be zauh zauh thei ang che tiraw?" a ti a, kei chuan," Aw le, thei tehrêng mai," ka lo ti ve a, a haw liam hnu chuan ka thaw huai huai mai a, Chhanzuala a lo haw ang tih ka hlauh ber țum a ni ngei ang chu.

Zànriah kîl lai chuan vawiin lam chanchin chu han hrilh ka tum deuh ûk a; mahse, ka țhulh leh rih, a thin a rim ngei dâwn si a, chuan a thil ei lai a thawhsan ngei bawk ang, chu chu ka duh lo. Ei puar phawt se, nakinah chaw ei kham lamah ka hrilh mai ang, puar tawh hnuah chuan a pawi tawh lo deuh ang chu, han hrilh loh ngawt lah chu a dik meuhin ka hre lo va, han hrilh lo ta chiah ila hriat chhuah hun nei ta si se, chutih hunah chuan a thin a rim viau zâwk ang.

Chaw ei khamah pawh chuan ka hrilh leh ta rih lo, Puipuii nèn an infiam a, hlim taka a fanu nèn an infiam laia han hrilh chu ka duh leh ta lo. Duata ka be leh ta rih a, vawiin lama a pain an putua ei tùr a leisak thu a rawn sawi chuan," Tak tak maw?" tiin Chhanzuala chu ka han en a, ani erawh chuan a fanu chu a lo la chhaih nui ar ar a.

Mutna lamah chuan huphurh ru angreng tak chuan ka hrilh ta hrâm a, ka rin dàn chiah, thinrim tih hriat zet hian," Eng thil nge a hriat a?!! A va zak lo ve!" sehchilh zet hian a ti nghut a, chutah," A lo kal leh a nih pawhin kawng lo hawnsak tawh miah suh, a fapa ka ni lo va, ka pa pawh a ni lo, hmânah khân kan inzawmna a chat tawh, amah ngeiin a nih kha tichat nghe nghe ni, engmah rawn tih tùr a nei tawh lo," a ti leh ta nghut nghut a.

A pa țan zâwng chuan thu ka chhâk chhuak lo va, amah dem zâwng pawhin ka țawng duh chuang lo. An inkâr hi a khirh rih êm mai a, sawi fel mai chi a ni rih lo, inhmu ngai lo leh inbe ngai lo an ni a, an inkâr țhat ngaihna a awm rih lo a ni, hun han liam zêl se, hunin a rawn hril mai ang chu, kan nakin hun tùr tu mahin kan hriat theih loh hi, țha takin a rawn herpui zâwk tùrah beisei mai ang.

Krismas nuam tak chu ni hran lo mah se Ka pa lunglêng khawhar hnèmin kan va hmanpui a, kan dam tlâng a, a làwmawm e. Kei pawh ka zia chho ve zêl a, ei tùr lam erawh ka la ei thei hran lo; mahse, Chhanzuala hian min duatin min ngaihsak êm êm a, hei hian ka rilru a tihhlim bâkah thla a timuang a, taksa hah leh rilru hrehawmin ka awm lo va, chu chuan nasa takin ka hrisèlna a pui a, damdawi in lam panpui pawh ka ngaih loh phah a ni.

*******

Puipuii chhang tùr ka han hrin meuh chuan ka chàu chhe dér chu a ni. Engkim chu ka mang hriat riai ruai a, 'Naute a țap thei lo' an tih leh 'A pa a nih hi' an tih chu ka hre riai ruai a; mahse, chu thil chuan keimah nghawng a nei thei chuang lo, ka muhìl chawrh chawrh zui ni ta berin ka hria.

Puipuii leh Duata ka pawm lakah chuan a dang ta zak mai. Ka vei reia neih ka har tehrêng nèn, a fel deuh ang chu tih laiin, a sual reuh tlat mai a, kei lah hnute tui ka han nei lo zui bawk nèn, a fuh lo vêl vek a ni mai. Kut lum a hre nghâl a, chhùn lamah mut duh viau mah se zàn a lo thlen dêk dêk tawh hi chuan nghate rèp ang maiin a meng ker a, pawm loh phei chuan a țê deuh țhat țhat zêl a, han pawm hi chuan tlêmin a zia deuh mai a, khumah han țhutpui ila a rei deuh hnuah chuan țah a tum leh nghâl zêl bawk a, tûm țum kan fapa zet chuan min tirethei ngawih ngawih. Kei chu ka la chêt țhat theih loh avàngin khumah ka mu mai a, a pa hi ka khawngaih țhìn. A buaipui vek lo thei si lo va, Puipuii sèn laia kan buai lohna zawng zawng kha a rawn let thawk ka ti mai, buaipui loh theih lohin a khawsa reuh a, han hauh chi lah a la ni meuh si lo, a pa a tirethei lutuk chu ka ngei ru viau țhìn a ni. Ani lah chuan sawisêl lo leh ning hmêl pu hauh lo hian a buaipui a, a àwi a, a pawm a, chau hmêl leh lunghnûr hmêl pawh a pu ngai lo.

Thla khat a tlin hnuah a zia mai ang chu kan ti a, thla khat a tlin hun mawlh chu ka nghâkhlel a, thla khat a han tling ta chêng a, a zia phah chuang hauh lo, kei erawh ka zia ve tawh thung a, tlêm chuan a zia, a pa ka chhâwk ve thei hlek hlek ta si a; mahse, ani erawh chuan," Chhâwk ka ngai lo, ka fapa a nia, engah nge ka enkawl theih loh ang? Ka chau lo va, ka ning hek lo," a lo ti mai a, han pawm chhâwk ka tum pawh chuan a phal dér lo. Hetia kan buai êm êm lai hian Puipuii erawh a lo fel hlauh a, zànah ni se a pa mutpui kher ngai lovin țhutthlèngah, a nih loh pawhin kan khumah a lo muhìl ve mai a, a hnuah a khumah kan sawn mai țhìn.

Ka pa(Chhanzuala pa) pawhin min rawn be zauh zauh a; mahse, chhùn lamah a ni tlângpui a, Chhanzuala awm loh lai a ni hlauh țhin a, min la man chhuak rih lo chu a nia, naute thlalâk pawh ka thawn ve nghe nghe a, a rawn nui kar kar nghe nghe a.

"A pa sènlai chiah chiah a nih hi, an inan dàn êm êm hi, a duat ngawt lo maw?" a rawn tih chuan," Duat ve bawk ang chu," tiin ka nui a, ani pawh chu a rawn nui ve leh a," A sènlai khân buaipui kha a ngai ve khawp mai a, a nu kha a tirethei thei teh asin, kei kha chuan zànah te khân ka menpui ve țhìn tho nain zei lo chi kha ka ni ve a, han pui ve țhin mah ila a tàwpah kha chuan a nu khân a buaipui leh nge nge țhìn," a rawn ti leh a. A pa sènlai a lo chhun vàng chiah a nih hi buaipui a lo ngaih êm êm ni.

Mahse, mak tak maiin thla thum a tlin chiah zàn ațangin a mu țha ve thei ta a, keini a nu leh pate kan mu țha thei lo thung a, a chhan chu kan la ngaihven reng tho si a, a harha a men leh ker kan rin vàng a ni. Chuta țang chuan zàn lamah pawh mu țhain a zia chho ve ta zêl a, a mu țha chho ve thei ta bawk nèn, amah pawhin a ngeih chho viau mai a, a taksaah pawh chu chuan nghawng rawn neiin a duhawm chho ve ta viau mai. A hma kha chuan a chum lêm lo va, amah rawn entu tam zâwk pawhin," A u a tluk lo deuh a ni maw?" an rawn ti zêl kha a ni a; mahse, tunah tak hian rawn hmu leh hlawm ta chiah se mak an ti ve tawh viau ang le.

Mahse, a ute ang a ni ve lo, Israel-a hi chu a dang hlak. A han vâk thei a, a kal theih hnuah phei chuan a hleiin engkim hi a bawh buan buan a ni ber mai, a hmuh theih leh khawih theih chin hi chu tihchhiat vek a tum ni berin ka hria, a ute pahnih an nungchang a țhat tehrêng nèn, ani hi zawng ka hre thiam lo, buaipui tham a tling tak zet, hah pawh ka hah phah asin, a ban phâkah thil keh thei leh chhe thei dah ngam chi a ni lo, a toys chi hrang hrang, motor lem plastic ațanga siam rêng rêng pawh hi vawm chhiat loh a nei lo, amah a chak buan buan si a, a vawm chhe hneh lutuk ringawt. A u toys a hmuh fuh chânga an han inchuh pawh hian amah hian a chang zêl a, a tichhe leh nge nge țhìn, a u hian a lo ui ve țhìn bawk si a, an inkârah inremna siamin kan inthlèm châng lah a tam, hahthlâk ve țhin tak a ni.

A pa lah hian thinrim tâk aruangin  a hlimpui hlauh thung a," Tlangvâl chak tak, a nu leh pa leh unaute tâna chhuanawm leh innghahna tlâk a la rawn ni dâwn a nih hi, a chak bian bian êm mai," a ti țhìn a, chutianga a tihna chhan chu ka hre ve hauh lo, a chak êm avàng leh thil a khalh apiang a tih chhiat zêl avànga a chhûngte tâna innghahna tlâk a nihna tùr chu ka man phâk ve lo; mahse, a pa sawi ang chu rawn ni lul teh se, beisei ang.

Israel-a kum hnih a rawn tlin tâk hnuah phei chuan a u nèn an inkhing tâwk ta khawp mai a, Puipuii thil hi a chuhpui ve țhìn bawk si a, hauh lah hi awmzia a la awm tam lovin a la hre thiam chiah bawk si lo nèn, amah chauha awm melh melh hi a thiam lo ka ti mai, a u bulah hian a tei hrut hrut a, ani lah hian a tìrah hi chuan a lo duat viau a, a hnu lama an thil duh an inchuh tawh hi chuan an inngeih rei thei tawh țhin lo, pakhat a ri fawk a, pakhat lahin a thil ken a han paih ri țhawk a, pakhat a țah tawh hi chuan pakhatin a  han zui nghâl zat bawk a, an inkhing tâwkin an inngam tâwk bawk si nèn, ka rilru hi a hrehawm hĺuah hluah țhìn.

Zàn mut hun hi ka hah chawlh hun, muang taka ka awm ve theih hun ka ti mai. Naupang pahnih muthilh hnuah ka pasal nghèng chialin ka han mu a, ani'n duat taka min kuahin min chûl hliau hliau a, a âng chhûnga ka awm hi chuan ka him țhin.

"Chhùn lamah hian i hah țhin ngawt mai tiraw? Naupang enkawl hi chu a hahthlâkin rilru sèn a ngai bawk si a, i chauh dàn tùr hi ka hriat thiampui phâk lo zâwk che, ka chhuang tak zet che a ni, nupui fel tak niin kan fate tân nu țha tak i ni si a," tiin min fak melh melh a, kei erawh chuan," Ka lãwm e, pasal țha tak leh fel tak ka neih vàng che hian ka lãwm țhìn; mahse, a harsa ka ti, ka zép lo, ka mangang țhin, Israel-a danglam bîk lutuk hi, a luhlul bawk si a," ka ti sap sap a.

"Nikhua a hriat hunah chuan hetiang reng hi a ni bîk nâng, unauah pawh hian danglam bîk hi an awm ve țhin a nia, kan la enkawl chho dáwn chauh a, tûn ațanga mangan thu i sawi mai chuan le, a fuh nâng," a ti dap dap a, kei chuan," A u pawh hi a tikhawlo vek mai dâwnin ka hria," ka tih chuan a lo nui hawk a.

"Khaih khaih, insûm teh, naupang chumchiap leh chhia leh țha pawh la hre lo an ni a, an len deuh hnuah chuan an zia mai ang, an nu hian i enkawl thiam ang tih ka hria a ni, ka ring tâwk bawk che a," a ti leh dap dap a, ka chalah chuan a fâwp zauh a," Ka hmangaih leh ka tâna rinawm, min phatsan ngai lotu nu an nei che a, an tân hian ka ring táwk êm êm che a ni," a ti leh sup sup a.

"Sawi chhuak lo teh, ka phatsan reng che kha, kha thil kha hriat chhuah leh țhin pawh hi ka duh tawh lo a nia," ka lo ti ve thung a, ani chuan," I rilruin min phatsan ngai lo tih ka hria alawm, i taksa chuan min lo phatsan a ni maithei, chu pawh lo dang tùra i chét theih loh vàng chauh a ni," a rawn ti leh ta supsup a, a thil sawi chu mak ka tih êm avàngin mak ti zet hian ka en chho ta hau mai a!

"Ka chunga i rilru puthmang ka hriat chian lehzual hnu hian ka zah sawt che a, ka hmangaih phah sawt bawk che, ka tân i lo rinawm reng si a, hre lova ka diriam kual nasatzia che kha..."

"Engtin nge i hriat?!!" ka tih chuan," Duata pi leh pute ina kan riah hmasak ber zàn khân kha thil inziahna lehkhabu kha ka la chhuak hlawl mai a, ka chhiar laia mak ka tihzia leh hrehawm ka tihzia kha, ka thin a rim a, ka lâwm bawk a, ka awm dàn kha ka hre thiam chiah lo zâwk, ka rilru kha a vâk kual nasa asin; mahse, mak tak maiin lehlamah chuan a hahdam siai thung lawi a," a ti sup sup a.

Khami zàn kha, chuvàng chu a lo nih chiah chu, kan muta ka țawng bawrh bawrh pawh khân țawng ve lovin, ngawi rengin nghet zetin min kuah ringawt a nih kha, a lo chhiar ang tih  ka ring phãk hauh lo!

"Sawi chhuah ka tum ngai lo, tu mahin an hre lo va, hriattîr pawh ka tum hek lo, ka thu tiam a nia," ka tih chuan," Tu mahin an hre lo ang, hre lo tura i duh chuan," a lo ti sup a, ngun zeta a mita en kar pah chuan," Thil pakhat chauh ka ngèn ang che aw, khatiang kha thil thleng ni mah se Duata hian thiam loh a nei lo va, thil a tisual ve miah lo a nia, chuvàng chuan en hrang--" ka sawi zawh hma chuan ka hmui chu a rawn hup ta hmiah mai.

"Shhh...Chutiang chu sawi chhuak tawh miah suh, i fapa a ni a, i fapa a nih chhûng chuan ka fapa a ni, en hran ka tum ngai lo hek lo. Naupang fel tak a ni a, ka hmangaih êm êm bawk a ni, ka fapa dik tak a ni bawk, Israel-a leh Puipuiite nèn hian ka fa dik tak an ni," a ti dap dap a, a thil sawi chu a sawi mai mai loh tih ka hriat avàng chuan ka lâwm tak zet, ka mittui a lo hnai zui zat bawk a.

"Ka lâwm e, ka hmangaih kumkhua ang che, nang kher ka lo tawng che hi chu Pathian hnénah làwmthu awm mawlh mawlh teh se," ka ti sap sap a, ka mittui chu a rawn luang thla lum pap a, ani pawh chuan a lo hmu ve reng a, dìm têa a kutzungpuia min tuaisak pah chuan,"Kei pawh ka lãwm e, i tân leh ka fate tân pasal țha leh pa țha ber nih ka tum zêl ang, mi famkim chu ka ni hauh lo; mahse, ka nupui leh fate tâna innghahna tlâk nih hi ka tum chu a ni, ka hmangaih che, ka fate nu, min phatsan ngai lotu, kumkhua leh chatuana ka hmangaih reng fo tùr," tiin a rawn kûn hniam zui zat a.

Kan hma lam huna thil lo thleng tùr chu kan hre hauh lo; mahse, beiseinain thil țha lam chu kan thlîr a, thil țha lam vekin min ûm kher lo ang; mahse, thil țha lo pawh lo thlengin lo tâwk dâwn ila ka bulah ka pasal min hmangaih êm êmtu a awm tlat chuan huaisen takin ka hmachhawn thei ngei ang, ani chuan min kalsan ngai dâwn si lo. Rin loh takin beidawn hnuah ani kher ka tawng leh a, Pathianin ka tâna a ruat kawng hi a lo mak êm kher a, a mak tih mai loh chu sawi dàn pawh ka hre lo, ka tâna Chhanzuala a lo dah tlat reng mai pawh hi thil mak tak a ni. Mi țha tak a ni si a, mi țha tak ni mah se a famkim bîk lo, a pa a huatnate hian engtikah emaw chuan kian zai a la rêl ve ngeiin ka ring a, chumi atân chuan he hmunah hian Pathianin min dahin dinhmun pawimawh tak min chelhtîr ni ngei pawhin ka ring, remna siamtu atân min dah a ni ngei ang, a hlawhtlin hun ka va nghâkhlel si êm!!!

*LOVE IS JUST A WORD UNTIL SOMEONE COMES ALONG AND GIVES IT MEANING*

*******FIN*******