☆THE SWEETEST HANDCUFFS☆ - 1 By Dingdi Pachuau

 ☆THE SWEETEST HANDCUFFS☆ - 1 By Dingdi Pachuau

Ni sa vawl vawl leh kan chuanna sumo engine ri ring zet mai, kawng khuar deuh leh țițoh zual kan tlàn laia insawh ri leh chhawr chhawr țhìn chu a inhmeh tak zet a ni. Kan chuanna sumo hi țãwng ve lam tawh niin, a han insawh leh dawt dawt țhìn chu, boruak lum zet hnuaiah chuan sumo engine rî tih lohah chuan thãwm awm chhun a ni mai a, kan thãwm hriat pahnih chuan lung a tilêng fahran lo nain kan tum ram kan thlen theihna tùra min phurtu 'rimawi' siam a ni miau mai a, han sawisêl thei pawh ka ni lo. Kan tlànna kawng lah chu chhuk chho viau mah suh se, a kual kikãwiin kawng pawh a mâm lo hlê a, a tê viau bawk, motor dang min táwk zâwngin ran tlãn ta se, inpèl tùr pawhin an insãwi rem ve fé chu a ngai ngei ang, motor lian rahna hnu khuar zet zeta kan tlàn luh châng lah chuan vaivut khû a lêng chum chum a, sumo tukverh dârthlalang pawh hawn ngam a ni meuh lo.

A țawng lo tluan takngial dâwn emaw ka tih hnu chuan sumo driver chuan," Kan thleng țêp tawh a nia, dârkâr chanve vêl kan tlãn leh ang a, kan thleng tawh ang," a rawn ti chhuak ve ta a, ka thaw ve huai mai. Kan pahnih chauhin kan ni a, min be tuitam lo viau a, kei lah hi hmel hriat ngai loh biak hmasak harsat chi ka lo ni bawk nèn, Lunglei ațanga kan chhuah tirha kan inbiak bâk kha kan inbe leh ta miah lo va, tunah hian min be leh ta chiah a ni.

"Kan vêngah chuan tute inah nge i innghah ang?" a rawn ti leh a, kei chuan," Pu Rovate inah a niang, an in awmna pawh ka hre chuang lo va," tiin ka lo chhâng a, ani chuan," Pu Rochhînga, IV - grade kha em ni i sawi?" a lo ti vat a, kei chuan," Aw, ni e," ka lo ti thuai a.

Dárkár chanve tak tak kan tlàn leh hnu chuan kan tum ram chu kan lût ve ta a, a tlãn țhang bawk a ni ngei mai, kan thlen hun tùra a sawi kha a dik chat alawm. 

Ka sawi nawn leh ngai miah lovin Pu Rovate in kawtah chuan min thlah thlap a, Pu Rovate nèn pawh inbe sa kan nih avàngin an kawta sumo ding ta chu veranda-ah a nupui ni ngei tùr nèn an rawn chhuak vat a, ka bungrua leh thuamhnawte min hlàn thlâkpuiin in chhûng luh dáwn chuan driver chu thingpui in tùrin an sâwm zui nghâl a; mahse, ani chuan lo hnialin lo lama liam leh nghál a duh thu a sawi zui nghâl a.

An fel nupa khawp mai a, chanchin min zâwt siam siam a, a nupui Pi Vàni chuan inbual ka duh leh duh lohte min zâwtin tui an ngah thu leh inthlahrun a ngaih loh thute chu a sawi zui nghâl a. Tukin lam khân inbual tawh tho mah ila kan tlànna kawng kha a khu êm mai a, intleuh leh zawk chu ka duh viau tho mai.

Tlai lam eirawng bàwl lai chuan Pu Rova fate ni ngei tùr hi an rawn lût khap khap a, nula pakhat leh tlangvâl ve uaih tawh pahnih an ni a, hnathawh kawr an hâk avàng chuan hna an thawk ni ngei tùrah ka ngai. Pi Vàni chuan lo buaipui vatin thingpui a lo buatsaih nghâl vat a, thingpui pêk pah chuan tu nge ka nih tihte chu a'n hrilh pah zung zung bawk a, kan inbe hran lo nain kan innuih sak hlawm a, a tâwk tiu teu viau rih mai.

Zànah chuan ka pain min rawn bia a, vawiin chawhnua ka intleuh hnu lawk khân ka nu ka be lawk mai kha a ni a, ka pa chuan report kimchang hriat a duh a lo ni. Report chu ka han pe zung zung a, sawi lang lo mah se min ngaihtuah viau ang tih ka hre ru khiau a, chuvàng chuan report ka pêk tàwp lamah chuan min ngaihtuah lo tùr chuan ka han hrilh zui zat bawk a.

Pu Rova fapa u záwk Puia'n a mutna khum min kian a, a làwmawm viau rualin a zahthlâkin a inthlahrunawm ka ti, keimah vàngin țhutthlènga a mut a ngaih phah dâwn ta si a. Ani erawh chuan," Hrehawm ti duh suh, zàn reia inkhèl en ka duh pah tho a," a ti mai a, Pu Rova pawh chuan," Ani zawng mipa a ni alawm, ngaihtuah a ngai lo," a lo ti ve bawk a, naktûk lama ka tih tùrte ngaihtuah rauh rauh chung chuan ka mu ta a, vawiin lamah motor-in min sawh nasa bawk a, ka meng rei lo kher mai.

A tûkah chuan hma takah tûkțhuan kan ei a, chaw ei lai chuan Pu Rova chuan tih tùr a sawi pah a, ka luah luh tùr Health Sub-centre Quarters chu min tihfaipuiin ka bungrua pawh kan thiar lût nghâl vek dâwn a ni. Ka inthlahrung khawp mai a," Keimah pawhin ka tifai thei ang," ka lo ti vat a, ani erawh chuan,"'Han tihfai nghâl chúk chúk chu' pawh i ti maithei a; mahse, thil hi chu tih dâwn rau rau chuan tih thuai hi a țha, kan lo tifai ve nual tawh tho a, a hautak hran lo ang chu," a lo ti a, ka sawi chhunzawm tawh lo.

Pu Rova fate pathum nèn chuan ka luah tùr chu kan tifai ta a, luah nghâl tawh tùr a nih avàngin hrûk fai ngai leh nawh fai ngai chu kan tifai a, mipa pahnih Puia leh Vâltea chu an țangkai zual khawp mai. Gas cylinder puin hman theih mai tùrin min fit-sak vek a, thil rit deuh hlek chu anmahni hlîrin chawiin an zâwn sawn a, Kimi nèn chuan hrûk fai lam kan ti ve thung. Ka khum tùr chu a awm sa mai a, dawhkàn lian vak lo leh țhutthlèng hlui ve deuh tawh pakhat a awm sa bawk a, plastic chair pahnih ka ken nèn țhutna lam chu a tâwk thei mai ang, bathroom pawh a zia khawp mai a, pakhat luah atân hrim hrim chuan a zau țha tâwk viau mai. Ka kal hma hian Pu Rova ka be hmasa hlauh a, ka mamawh tùr leh lei ngai tùr ka hriat theih phah a ni, vawilehkhatah nei nghâlin dah nghâl vek thei lo mah ila ka mamawh zualpui tùr chu ka keng thei tho a, bâkah, motor a kal ve reng tho a, muangchângin a dang chu ka la lei chhunzawm ve tawh mai ang chu.

Keimah chauhin luah dâwn mah ila Pu Rovate in ațangin ka in luah tùr hi a hla lo va, hmuh phâk reng a nih avàngin ka huphurh vak lo va, an khaw mite nungchang leh hawiher la hre lêm lo mah ila buaithlâk tùrah ka ngai lo ve ngawt. An sual bîk lo ang chu maw, ka pa khân min ngaihtuah viau a, thingtlâng a nih vàng leh ka la kal ngai lohna lam a nih vàng a ni pakhat a; mahse, boruak danglam han hìpa han dai ve chhin kha kei chuan ka châk a, ka țhiante a tam zâwk khawpui hnaih lam an post a nih pawh khân ka vui lo va, ka sawisêl lo bawk, min dahna hmun apiang kha lungawi tak leh thatho taka pan mai kha ka tum a ni rêng a ni.

Thingtlâng chengker tak a ni lêm lo bawk a, a mi chêngte pawh an polite hmel hlawm viauin ka hria. Nula ka nih vàng nge phei chu ka hre lo va, mi pawh ka be hmasa hman ngai mang lo, anmahni lamin min be hmasa zêl a, ka hming pawhin min ko thei nghâl zél mai bawk! Mikhual chan ka chan deuh vàng pawh a ni mahna, Pu Rovate chhûng duhsakna pawh ka chang nasa malh malh khawp mai, chawhmeh tùr eng eng emaw an neih remchàn apiang hi  min rawn pe deuh reng mai a, eitu tùr keimah chauh ka ni bawk si nèn, min pe ngun si a, chawhmeh lamah hi chuan min chãwm ni berin ka hria, dah țhatna tùr fridge ka neih loh vàng hian dah țhat chiam ngai lo chi Dãl, Alu leh Artui ka lei mai a, mahni chauh phei chuan thil ei tui a har si a, ka heh lo khawp mai.

Thla khat dâwn zet ka awm hnu chuan kei pawhin hriat ka nei ve ta nual a, ka in bul hnaia mite phei chu ka hre deuh vek tawh hial a ni, in ding hi 100 vêl chiah chiah niin record a ni a, a mi chêng erawhin 400 an pèl daih thung, in tlèm ngaihtuahin a mi chêng an tam ka ti a; mahse, an hrisêl țha hlawm a ni chêk  ang, min rawn pana damdawi min rawn dîl pawh an awm hran lo, a làwmawm lamah ngai ang.

Health Sub-Centre hi ka in luah bul lawka awm a ni a, ni tin ka kal ve țhìn a, tih tùr erawh a vâng thei khawp mai thung. Pu Rova pawh a rawn kal ve reng reng a; mahse, tih tùr a nei hran si lo va, a haw leh thuai țhìn. Ni tin chhuak ve mah ila ka in luah bul lawk a nih vàng hian hmun dangah ka chhuak ngai lo va, Pathiannîa ka inkhâwm hi hmun danga ka chhuah ve hun chu a ni mai a, Biak in lah hi ka hlat lutuk hran bawk si lo va, awm hmuna țhut tlawk tlawk hi ka hna chu a ni deuh mai.

May thla chawhnu lama hna zawm kha ka ni a, thawktu keimah chauh ka ni a, a châng chuan ka bangbo ve țhìn khawp mai, chubâkah, khawper ang reng deuh hi ka vil tel bawk a, chu phei chu motor pawh a lût thei lo, kea kal a ngai a, chu achhapah, chho char chara kal a la ngai zui; mahse, a hla lo hlauh a, tlêmin a zia deuh. 

Ni khat chu office-a ka awm laiin chawhnu lamah sikul naupang pakhat, a khûpa insât palh, țhui ngai hi an zirtîrtu leh a țhianpa ni ngei tùr hian an rawn hruai a, an zirtîrtupa chuan thil awm dàn chu a sawi zung zung a, hna an thawhna lamah a lo insât palh niin, naupang pahnih hlauthãwng hmêl chu an khawngaihthlâk reuh khawp mai, insât palh zâwk chuan a hmui a pet fan fan reng a, a sahna lai chu a thî duh reuh khawp mai lehnghâl a, ka thiam ang tâwk chuan ka hnèm ve malh malh a.

A khûp vun chhah lai a nih vàngin țhui chu a har reuh phian zui a, nat pawh a na reuh khawp ang; mahse, a thûk lo hlauh a, a zia deuh. Ka țhui lai chuan țah chu a hreh ve a niang, a inpetruh nasa ve mai a, a țhianpa kut chu nghet zet hian a hmer ngat ngat bawk a, a thlan erawh a tla ve bat bat reuh a, chhel ka ti reuh tak tak a ni.

Zanriah Pu Rovate inah ka ei a, min sàwm vawi hnihna a ni tawh nghe nghe. Vawiin lamah Broiler âr lian deuh an talh a, a țhen an kang a, a țhen buh nèn an chhùm a, Anthûr rêp an thlâk a, a rimtui si a, tui pawh a tui khawp mai. Chaw ei lai chuan an titi nak nak a, an nui leh țhìn bawk a, kei erawh chu min bia a nih loh chuan ka țawng lêm lo, chaw ei laia țawng hi ka thiam vak lo va, ei mawp mawp hi ka thiam záwk.

"Zàn lamah hian inlêng i nei nual țhìn lo maw?" Pu Rova'n a tih chuan," Nei nual lo, min hlau a ni ang," tiin nui chung hian ka chháng a, ani chuan," Kan vêng tlangvâlte hi chu an dâwih khawp a, kan vênga sawrkar hna thawk lo awm nulate hi chu chhuah tum miah loh tùr hi a ni ngai a; mahse, rìm tinah leh beisei tinah hian an tin lo a niang, an mãwl hlawm tak tak a ni," a ti leh bawrh bawrh a.

Kimi chuan,"An inthlahrung a niang chu," a lo ti ve thung a, Pu Rova chuan," Inthlahrun vàng pawh a ni lo, an ngam lo zâwk a ni. High School zirtîrtu nula pahnih pawh kan chân tawh, sawrkár hna thawkte chu lo pâk huam zâwk tùr hi a ni ngai a nia, dáwih hlawm leh lutuk mai!" nui pah deuh hian a ti leh a, Pi Vàni chu lo inrawlh vatin," Ani pawh hi ti hian huai hmèl deuhin a țawng ve a, a hun lai khân a ni bîk teuh lo a nia," a lo tih tâkah chuan Puia chuan," A ni maw?!! Han sawi chiang deuh teh, ka hre châk a nia," a lo ti vat a, rang zet hian Pu Rova chuan," A ti ve mai mai a nih kha, huai viau lo ila chuan i nu pawh hi ka chang tawp nâng," a lo ti leh a, a nui sûng bawk si a, keiniho pawh chu kan nui țhâ hlawm a.

Tlangvâl inlêng chu vawi hnih chu ka nei ve tawh ngei mai a; mahse, chu chu ka țhiante ve ve an ni thung. Chu pawh chu kan khua Thênzâwla kan inah a ni, hetah hi chuan tlangvâl inlêng ka la nei lo va, keimah chauha awm ka ni bawk si a, lo lêng lo mah se pawi ka ti lêm lo, ka duh duh hunah ka mu thei tihna a ni mai.

An sawi dànin Kimi nèn hian kan kum a inrual chiah a, tunah hian kum 24-na ka hmang chho ve mêk a, Puia leh Vâltea erawh hi chu an la nau deuh hlek a, Kimi nèn kan inrual avàngin min 'u' ve mai bawk a, Puia hi chu a țawng duh ve deuh a, Vãltea erawh hi chu biak hmasak loh chuan min be lo tluk a ni. An chhûngkua hi ka belh hmasak ber an ni bawk a, ka chungah an felin nu ber Pi Vàni pawh hian min en hrang lo viau, a ma tâwkah chuan min duat ve khawpin ka hria, min duhsak viau bawk.

Buaithlâk ta chu Lungleia training tùra kal chu a ni ta. Sumo service hi awm ve mah se kâr khatah vawi khat a kal a, chu pawh Thawhlehniah chauh a la ni zui. Private motor nei chu an awm ve tho a, two wheeler nei pawh an awm țeuh mai; mahse, Fùr a ni tawh si a, kawng a chhiain a nãl si a, Lungleia kal an awm ngai mang lo. Sumo lah chu a kal chhunah an khat theiin an bâwr thei si a, kawng a chhe bawk si nèn, ka rilru a tihah hluah hluah. Zirtàwpnia training tùr ka ni a, Thawhlehnia han kal nghâl vut lah chu, ka thlennaah inthlahrun a na duh dâwn si, kâr tìr ațangin ka rilru a lo hah lâwk tawh a ni.

Mahse, vànneihthlâk takin ka ti dâwn nge, Sumo chu Zirtàwpnîah a kal leh dâwn hlauh mai a, thlai phurh tùr a tam deuh tawh vàng a lo ni, tihzia ka tiin chanchin làwmawm tak niin ka hria a, motor emaw bike emaw han hire mai tùr zawn dâwn lahin kawng chhia nèn, ka huphurh ru lutuk kha a nia, tunah zawng rilru dam takin ka awm thei ta.

Kan kal nî chuan ruah chu a sûr lo nain nimin lama ruah súr vàngin kawng erawh a nãl țha viau mai a, kawng khuar laiah tui a lo tling leh țhìn bawk nèn, motor han tlãn kãwi leh zawk zawk țhìn chuan ka thin phû a tirang thei khawp mai, nghet zetin ka țhutna seat chu ka chelh ringawt a, a châng chuan ka thaw lo lek lekin ka hria. Mi dang chuang vete lah chu an titi tak bawrh bawrh a, an buai ve chhin lo rêng rêng, kan driver chu an ring tâwk viau a ni mahna le.

A hun takah ka thleng thei hrâm a, chaw pawh ka ei hman lo, kan thil training lah chu an sawi pawimawh ang hùin ka hmu pawimawh ve lo lehnghâl a; mahse, a țha tho tho e. Chawhnu dâr 3 thleng training tùr ka ni a; mahse, chawlh laiin hotute bulah ka harsatna chu sawiin haw hma ka dîl ta ringawt a, a chhan chu sumo chhuah hun kha dár 2 a ni si a, ka nan hman loh chuan kàrleh Thawhlehnî nghah daih ka ngaih dâwn vàng a ni.

Pu Rova hnên ațangin kan driver Remsiama number chu ka nei a, ka hman veleha ka phone chuan an lo chhuak ve țêp tawh a lo ni a, ruah a tla serh serh reng bawk si a, rickshaw lain a dinna counter lam ka pan nghâl vat a, ka mamawh ka lei zo vek tawh bawk a, ka thaw pawh a veng ve huai tawh e.

Ka pain min rawn bia a, min ngaihtuah hi ka hre thiam viau a ni. Kan véng lamah chuan ruah a sûr nasa tih a sawi a, chuvàngin min ngaihtuah a, min rawn bia a lo ni. Ka chanchin ka hrilh chuan," A nih tak chu, tluang deuhin in haw dâwn nia, i thlen hunah min rawn hrilh la aw," a rawn ti leh a. Ani hi zawng, naute ena min en hi a bànsan thei dâwn lo a nih hi, keimah chauha ka awm hi min ngaihtuah êm êm mai a, ka khua a har a hlau a, hrehawm ka tih a hlau bawk a, hna thawka hmun danga ka awm dáwn pawh khân a rem ti lo lek lek hial a ni; mahse, kei chuan ka lo tum ve țàng țâng a nih avàng leh hna thawh ka duh vànga zira training ka nih avàngin thawh loh chu ka tum miah lo va, ka nuin min puiin kan hrilh fiah dùn nasa viau nghe nghe a ni.

Kan haw lam chuan kan chuanna sumo chu a lãm hi a ni hawt mai. Kawng hi a zâwl ém hlauh záwk a, chutiang chu ni lo phei se chuan hlauhawm tak tùr hi a ni. Kan kal lam kha chuan ruah kha a tla lo va, vawiin lamah a tla ta si a, a tla tam lutuk bawk si lo nèn, a diak kãwi tâwk chiah a ni. Motor seat vuan chuan ka inpetruh ngar ngar a, ka hlauh avàng erawh chuan vawi khat tê mah ka au chhuak chhin lo, nula pakhat rawn chuang thar awm ve erawh chu hlauh avàngin a țê chèl chûl mai a, mi dang chuan an nuih vêl mai mai niin ka hmu, kei ai chuan a hlau zâwk a nih hmèl viau mai.

Khua kan thlen erawh chuan ruah a tla tawh lo va, bungrua ka neih ve nual avàngin Remsiama chuan ka in bul thlengin min thlah a, mi dang an chhuk vek tawh a, keimah chauh ka nih tawh avàngin polite chhuahin thingpui inah ka han sâwm  a, ani erawh chuan,"Zanriah ei tùr i siam a ngai tawh dâwn bawk si a, ka tibuai rih lo mai ang che, i phal chuan zànah kan rawn lêng zâwk ang?" nui deuh chung hian a ti a, a nuih avàng chuan ka nui ve mai a," Phal e, in duh phawt chuan," ka lo ti ve mai a.

Fiamthua chhâng ka ni nain zanriah ka ei khama țhiante nèn kan in-text kual lai chuan kawngkhàr a rawn ri ta karh karh a, phâwk zeta en chung hian ka chhâng ta vat a, Remsiama leh a hnunga tlangvâl pahnih rawn inzui lût ka hmuh tâkah chuan," Lo lêng r'u," tiin țhutna chu ka lo kawh hmuh ta thuai a, Remsiama chuan," I țawngkam țha úmin kan rawn lëng ta ringawt mai," nui chung hian a ti a, a țhu zui ta nghâl a.

An țawng duh a, sawi tùr an hre phian bawk a, a hlimawm phian mai. Remsiama rawn lènpuite chu Ames-a leh Nunmawia an ni a, Ames-a chu a țawng duh ber a, fiamthu sawi tùr a hriat bâkah a sawi thiam bawk a, kan nui dar dar reng mai. Remsiama lah chuan a tâwk tê hian a fuih phûr thiam a, zahmawh lam sawi tel hauh lovin a chét chhiatnate chu a sawi suah suah a.

Thingpui ina a chawlh dat lai chuan,"A nih, Kob-ate nèn in chét chhiat țum kha," Nunmawia chuan a lo ti zauh a, Thingpui a lem fel hnu chuan Amos-a chuan," Ani nèn hi chuan chanchin hi kan ngah ve khawp mai a, nuihzatthlâk tak tak pawh a tam mai. Kan chet chhiat ber erawh kha chu sangha kan man țum khân a nia, mi pathum kan ni nghe nghe. An sangha dîla mi sangha țhenkhat kan man phawt a, chumi kan buaipui hlàn chuan ani, Saisih lui humhalh laiah tak khuan bomb a lo zu vawm pek a niang chu, kan zu thlen thlâk ve chuan duty-ho nèn an lo indinchilh ràn tawh mai a. Pu Sanga chu in hriat kha, a pa têt ang bawka rilru tê a nih ve nghe nghe khu, a lo pàwr khawp mai a, an han chhuahchhalh viau pawh chuan Kob-a chuan dam thluam hian,' In hriat sual a nih kha,' a lo ti mai a, Pu Sânga lah chuan,' I ipteah pawh a dang i la ak reng alawm, phâ phâ lo mai rawh, engati nge maw dáwt i la sawi ngam zâwk le? Heti khawp hian kan inman chiang tawh a,' pàwr zet hian a ti a, ani lah chuan,' Ka vawm lai in hmu em ni? A ri pawh in hria em?' a lo ti leh mai a, an lo hmuin an lo hre chiah bìk lo a ni chêk ang chu, an chhâng fak ngam ta lo va. Pu Sânga erawh chuan,' I vawm lai hmuh kher a ngai lo, i ipteah a dang kan hmu a, nangmah i awm bawk a, khu, lui lah khu bomb vawmna hnu a ni bawk, min chhâng min chhâng lo mai rawh,' a ti leh khar khar a, a pa tê reuh si a, a thinrim hmel phei chu a hmuhnawm reuh a nia aw. Ka mitthlà lêt pawh hian ka nuih a la zã," tiin a han nui kar kar phawt a, chutah, sawi zawm lehin,"Kob-a erawh chuan dam thluam tho hian,' Ka iptea a dang i hmuh vàng ngawtin ka vawm tihna a ni lo, tunah pawh hian paracetamol pawh ka ak tel reng tho alawm, chumi avàng chuan ka damlo tihna a ni lo va, ka ei tihna lah a ni hek lo, Condom pawh ka pai reng a, ka pai reng avàngin ka hmang tihna pawh a ni chuang lo,' a ti leh tlat mai a, a thinrim duh bawk si lo va, an buai ve teh a nia. Keini pahnih chu min han zâwt ve leh a, eng mah kan hre ve si lo, sangha kan man ve lah chu dìl sangha a ni tih a chiang bawk si a, tihngaihna dang awm hek lo, an puha ber lahin a tih a nih loh thuin a chhâng tlat bawk si a, thinrim țûnin an haw ta a nih kha; mahse, kei chuan bomb kha a vawm ngei a nih ka ring tho," a ti dap dap a.

"A hnuah in zâwt lo em ni?" Nunmawia'n a lo tih chuan," Zâwt lêm nâng, zâwt mah ila min hrilh chian pawh ka ring chuang lo, Pu Sânga a chhàn dàn ang tho khân min chhângin ka ring," tiin a chhâng leh a. A han indap rak rak a, chutah min rawn enin," Mei zu ta ila a pawi viau ang em?" a han ti leh a, kei chuan," Pawi lo ve, inthlahrung duh suh," ka lo ti vat a.

Zozial ngei mai a țan hnu chuan," Vawi khat leh pawh a rei deuh tawh a, Pu Zâmate sèrthlum kan lo ru pek alawm le, lungmuang takin țhu hahchàwl dar dar pah chuan kan ei a, kan piah lawka a neitupa Pu Zâma ngei mai kan han hmu thut mai chu, mi dang chu kan tlãn chhe titih nghâl  mai a, ani erawh chu a che sawn eih lo, Pu Zâma chuan,' Kan sèrthlum in lo ru a ni maw?' a rawn ti ta ngei a, kan ngawi țhap mai a, kei phei chu ka thin a phu nasa lutuk a, ka hlau bawk nèn, zun ka cheh lo chauh hi a ni tawh a. Kob-a erawh chuan,' Ka pu, sèrthlumte chu kan nei ve reng alawm,' a lo ti mai a, amah chauh chuan a chhâng ngam a ni. Pu Zâma chuan,' In lo ru a ni ngei ang, lawh rûkna ni àwm tak leh maua hawlhna pawh ka hmu alawm,' a ti leh a, kan ei lai ngei min hmu bawk si, min man chhuak chiang hi ka lo ti tawh khawp mai a, inpuan mai tuma ka kâ ka àn zuau lai chuan,' Chûng chu keini pawhin kan hmu ve tho a, mi dang lawh rûknaah kan lo ngai hmiah mai asin,' a lo ti leh a, a hlauthãwng ve eih lo a ni ngei ang, a hmêl leh mitmengah danglamna a awm miah lo. Huaisen hi ka'n ti mai mai khawp a," tiin a nui zui var var a.

"Khatih hun lai kha chuan in Boss kha chu a ni ve chiang alawm," Remsiama'n a lo tih chuan ani chuan," Ni mai e, a huai bawk si a, țawngkam a thiamin a thluak a țha bawk nèn, mualphona tùr ngei ngei lakah pawh min chhanhim fo rêng a ni," a lo ti leh duah a.

An lêng rei lutuk lo ve. An haw hnu chuan hmun ka phiat a, chhuat ka nawh fai leh hnu chuan kawngka leh tukverh zawng zawng ka kalh țha vek a ni tih chian leh vekin ka mu ta chauh a, mut hmunah chuan zanina ka inlëngte thil sawi chu ka ngaihtuah lêt a, keimah pawhin ka nui ka nui mai, Amos-a hmêl leh a thil sawi kha inhmeh ka ti a, a țawng dànin a zir mai bâkah a hmêl leh action nèn lama bei a ni bawk a, a nuihzatthlâk bîk êm a ni.

A tûkah chuan bungrua ka hawnte chu Office-ah ka dah lût a, ziah fel ngai ka ziah lai chuan Pu Rova a rawn lût ve a, a rawn titi luam a, kei pawhin thil ziak pah chuan ka lo zàwm zauh zauh a, rei awm lo chuan a chhuak leh ta thuai a. Office-ah hian tih tùr vak a nei hran si lo va, a awm dàn hi ka hre thiam ve reng tho mai.

Ka haw țêp tihah chuan tlangvâl pakhat hi a rawn lût ve leh a, lo be vatin eng nge a duh tih ka lo zâwt a, ngawi deuh rùn chuan min en vung vung phawt a, 'tlêmin a chiang lo deuh a nih dáwn hi' ka ti hman țêp tihah chuan a kut veilam hi a rawn phar chhuak a, a kutzungpui vun chu a lo tithlér deuh hlek a lo ni a.

"Țhui i duh tihna em ni?" ka tih chuan a lu a bu nghut ringawt a, thil țúl ka han la khâwm zung zung a, chutih chhûng pawh chuan a lo la ngawi reng  a, țhui harsa a ni lo va, kak deuh hlek chauh a ni bawk a, ka țhui zo ta thuai mai rêng a.

"Lo thawk thar i ni maw?" 

"Aw; mahse, thla khat chuang zet chu ka awm ve tawh," tiin ka chhâng a, ani chuan," Nula i la ni ang maw? I la naupan hmel riau mai," a lo ti leh daih a, mak ti rilru deuh hlek chung hian," Aw, ni e," ka ti a, tlêm chuan ka nuih a za deuh hlek, 'nula leh tlangvâl chutiang zawhna han inzawh chu' ka ti rilru deuh hlek bawk a.

"Ka kut chu kak zau lêm lo mah se han țhui hian a dam hma duh a," tiin a tho ta ta thuai a, chutah," Ka rin aiin i awlsam daih reuh lehnghâl a," a ti leh a, a chhuak zui ta nghâl a, ka en zui vang vang ringawt. 

*TU EMAW VA DUH TÙR HIAN MINUTE KHAT LEK A TÂWK A, HMANGAIH TÙR CHUAN DÂRKÂR KHAT; MAHSE, THEIHNGHILH TÙR ERAWH CHUAN DAM CHHÛNG HUN A DUH ȚHÌN*

 

(Kan han țan leh ta chu a ni a, eng nge maw kan an dâwn ni? Han comment teh u🙈)