☆THE SWEETEST HANDCUFFS☆ - 10 By Dingdi Pachuau

 ☆THE SWEETEST HANDCUFFS☆ - 10 By Dingdi Pachuau

"Eng nge i lo tih dâwn?!!" 

Min en reng ringawt a, min chhàn tumin a lang lo. Ka nu chu lo inrawlhin," A vawh êm hi, meilum bulah va hruai phei rawh khai, vâwt a tih êm kha," a lo ti vat a, a thuamhnaw hâk ka han en chiang a, a inthuam lum fahran lo tawp mai tih ka hmu ta nghâl a, a chhan chu a hoodie hâk vâr sar mai chu a puan a chhah lêm loh bâkah a chhûng lum chi a ni tlat lo a ni. Tûn ang khaw vâwta hetiang chauh haa tei chhuah rêng rêng? Lèn chhuah pawh tum lo hi, thil eng emaw inthlâk vàngin a rawn lang thut a ni zâwk lo maw? Chu pawh chu ni se, engin nge maw a rawn kal rêng rêng ni? Chutah, a kut veilama helmet a ken chu ka hmu zui leh a, bike-in a rawn kal tihna a ni ngei ang. Eng nge maw tûn ang hunah a rawn tih dâwn ni? Naktûk mai khi Krismas a ni tawh zui a.

Ka pa sikri àina bulah chuan ka hruai phei ta vat a, a rawn tlàn tháwt vàng nge ni, amah lah chu a vawt thlur mai lehnghâl a, tlangvâl heti pui ni tawh si, a ngaihtuah thui lo lutuk chu mak ka ti a, țhutna ka pêk hnu chuan a in tùr thingpui siam tùrin ka kal sawn zui nghâl a.

Thingpui ka siam hlàn chuan ķa pa nèn an lo titi dùn ve ngei a ni ang, an bula ka va pheia thingpui ka pêk chuan ka pa chuan," A nih tak chu, i fel hle mai, min rawn tlawh chhuak vang vang a nia. Keini a nu leh pate hian a in pawh kan la rawn hmuhpui miah lo va, rawn kal ve kan duh viau laiin in chhuahsan hi kan harsat ve êm êm mai a, âr kan lo vulh ve bawk si nèn, hun kan nei hlei thei bîk lo a ni," a lo ti dap dap a.

A hnu deuha ka nuin ka pa a rawn koh tâkah chuan kan pahnih chauh chuan kan awm ta a, thingpui no chu dawmin," I haw dâwn tih min hrilh miah lo va," a ti chhuak ta sup a, kei erawh chuan,"Ni tho mai; mahse, min zâwt hleinem," ka lo ti ve thung a. A țawngka chhuak ațang chuan min dem angin lang mah se thiam loh ka inpe duh bîk lo.

"Eng nge i rawn tih dâwn rêng rêng? Khua a vawh tehlul nèn," ka ti leh a, ani chuan," Ka rawn zawng chhuak che maw le," awlsam zet hian a lo ti thung a, a tih dàn hi haw nghâl mai a tum hmel si loh a, zanin hi riah a tum ang em? Engtia awm zêl nge a tum ang? Zanina kan hun hman tùr te, naktûk lam hun te hi engtin nge ni ta ang le? A rawn thleng thut a, a buaithlâk zo ta vek.

Zanriah ei lai chuan ka nute chuan an be zauh zauh reng a, ani pawh chuan pângngai takin a chháng ve zêl bawk a, kei erawh chu ka ngawi reng thung, ka pa chuan min melh leh zauh țhìn tih ka hmu ru reng a, kei erawh chuan ka en duh lo lui ve tlat thung. Hun ãwl kan la neih loh avàng chauhin Jakob-a chanchin chu min la zâwt chîk rih lo tih ka hria a, chaw ei pah chuan engtin nge an hnênah chuan Jakob-a chanchin chu ka hrilh ang tih chu ka pah ngaihtuah rauh rauh a. Zanina kan hun hman tùrah khân hruai ve lovin chhuahsan ta daih ila a mawi ang em? Hruai ta ila eng mah hre si lovin ka bialpaah ngaiin ka unauteho chuan min lo fiam nasa dâwn tih ka hre bawk, kan boruak pawh a tidanglam vek ngei ang. Huiha, a va buaithlâk tak êm!

Țhulh ngawt theih ni bîk hek suh, ka nu chuan," Zanin chu a unauteho nèn urlâwk zàn an hmang dâwn a, i va telpui ve a niang chu, an phawk hlawm viau mai a, an lo fiam zak maithei che a ni," tiin, nui chung hian Jakob-a chu a han han melh a, ani lah chuan," A nuam ngawt ang chu, chutiang bula hun ka hman lohna pawh a rei ta viau mai," a lo ti mai a, a lo nui ve sûng a, ka rin dàn chuan a lo hnial mawi ve ka ring deuh a nia. 

Ka rin lâwk ang chiahin Jakob-a nèn kan inzui lût min lo hmuh chuan an lo meng phâwk hlawmin Rody phei chu a mitmeng a lian bawk si a, a lang hlauhawm lek lek thei hial mai! Thil min zawh țan hma hauh chuan ka kalpui chu Jakob-a a nih thu ka han sawi nghâl zat a, polite takin an chibai zui nak nak bawk; mahse, chuti chung pawh chuan awmze nei zet leh zawhna zâwt mitmeng hian hmeichheho chuan min rawn melh leh țhìn, mipa ka kawm ngai lohzia an hria, mipa chungchâng rêng rêng ka sawipui ngai lo hlawm bawk nèn, mak min ti mitmeng  pawh hi ka dem hauh lo.

Mahse, ka unauteho hi zawng, an fel hlawm a, Jakob-a chu an be nêl nghâl bawrh bawrh a, ani pawh chuan nuam a tih hmel riauin ka hria; mahse, min kal hlatsan lo, min en vung vung reng ţhin pawh chu ka mitsîrin ka hmu zauh zauh bawk, ka bul hnaiah zêl a awm a, a awm dàn ațang hian inla fing deuh Rody leh Muanpuii chuan thil an intihre leh pek khawp ang le! Naktûk lamah chuan zawhna hlîr mai... Ka peih lo sa.

Hlim ve pângngai tak chuan urlâwk zàn chu ka tlingtla ve thei mai a, Jakob-a pawhin nuam a ti ve viau chuan ka hria. A rawn lang thut hian min tihamhaihin biak dàn pawh min tihre lo a ni a, ka be tam viau lo tih pawh ka hre reng; mahse, chuti chung pawh chuan ani erawh chuan ka boruak chu a hre thiam lo der nge, a hre thiam duh lo zâwk, boruak pângngai rengin min bia a, kan haw kawngah pawh chuan," Naktûk mai khi Krismas chu a ni tawh mai si a, i bula ka hmang thei tùr hi ka hlim tak zet a ni, ka lo nghah ve ngar ngar chu a lo inher chhuak dáwn ta chu a ni ta mai si a," a ti sup sup a, ka chhâng lêm lo. In kan thlen chuan ka nute pawh an lo mu tawh a, a àwm ve viau mai, a tlai ve deuh tlat tawh si a. A mutna tùr room ka kawh hmuh chuan," Mut ka va peih lo ve le!" a ti sup a, ka en vat a, ani erawh chu a lo nui suk a, chutah," Ka muthilh hunah chuan ka hmu thei tawh dâwn lo che a," a ti leh sup a.

A va ho tak! Muthilh hnuah tu mah kan inhmu thei hleinem, mumangah kan inhmu te a nih ngawt loh chuan. Mu nghâl mai rawh se, zan a rei ve tawh bawk si, naktûk lamah kan tho har palh ang, han menpui deuh chu a beisei viau tih ka hria; mahse, nu leh pate mitmei vèn a nat bâkah ka bialpa pawh a ni chuang lo va, ka nu leh pate min rinhlelhna belhchhah tùrin awm ka duh lo bawk.

Ka mu tùrin phone ka han en chu missed calls ka hmu ta țeuh mai! An va han nghal hlawm tak! Ka lo silent hlauh chu a va tihzia tak êm! Nakinah group lamah ka sawi fiah mai ang chu. Ka țawngțai phawt a, ka zawh hnuah chuan muangchânga muin ka phone chu ka khawih chhunzawm leh a. Call a rawn kal a, Jakob-a a ni tih ka hriat chuan ka thaw hawk a, he pa pawh hi a nghal ve pângngai, ka chhâng duh lo, chhàn chi pawh ni nghâl lo chuan.

Kan unau Group lamah chuan min lo rêl nasa tawh niin, lawmpuina thu pawh ka hmu nual, zanina kan thlalâk țhenkhat pawh an lo post nual tawh a, ka han en ve zuai zuai a, chumi hnuah chuan Jakob-a chungchâng chu ka han sawi fiah ve ta chauh a; mahse, a nihna tak chu ka sawi chuang lo, sawi vek kha ngai ka ti lêm lo. Min rawn fiam leh nak nak tho a, a țhen chuan inhmeh min tih thu leh min lawmpui thu an la rawn zep tel leh hrâm bawk a. Hmm, an duh duhin lo ngai mai teh se.

Jakob-a message pawh chu ka han chhiarsak zawk a, zanina ka unaute bula ka hruai ve duh chu a làwm thu leh min duhna a belhchhah sauh thu chu a rawn ziak uar leh khawp mai, ka thin a tirim chuang lo, ngun taka ngaihtuah phei chuan thinrim lam aiin khawngaih lamah a kal zâwkin ka hria, a tak tak a ni hauh si lo va.

A tûka ka harha ka men chhuah ve meuh chuan dâr 7 a lo pèl tawh a, ka han zi mar ian ian a, nizàn lama kan hun hman dànte ngaihtuahin Jakob-a ka hre chhuak zawk mai a, nizàn khán a rawn kal ve tak, ka tho chhuak nghâl zawk a, inphih sawk sawkin ka room ațangin ka kal chhuak zui ta nghâl a.

Ka nuin eirawng a lo bâwl a, ka pa erawh ka hmu lo, ka han hawi kual ruai ruai a, Jakob-a pawh ka hmu chuang lo. Ka nu chuan min lo hmuh veleh," I lo tho thei maw? Thingpui i duh em?" a lo ti nghâl vat a, kei chuan," A, tuilum ka lo inthlit zâwk ang e," tih leh flask lam pan chu ka rual nghâl zat a," Tukin chu ka va tho tlai tak! Ka mu tui hlê a ni ngei mai," ka ti leh a.

"Ka kai tho duh lo che a nih kha, i țhianpa khân kai thawh che a remti tlat lo va, hmanhmawh takin an khaw lam panin a haw ta a nih kha," ka nuin a rawn tih chuan a lam chu ka hawi nghâl dáwrh a, Jakob-a chu a haw ta daih maw?! Nizàn lam kha chuan haw tum hmêl a put si loh kha le, engati nge le? Ka phone chhin dâwn em ni ang? Ani hi, a lêng kual mai mai te hi a ni zâwk lo maw?

"Engtik hunah tak nge a haw a?" tia ka zawh chuan," Ka thawh hnu lawk khân a rawn tho ve nghâl a, thingpui pawh a in hman ta lo a nih kha, a hmanhmawh angreng si a, thil dik lo eng emaw tak an chhûngkaw chungah a thleng a ni ang ka ti rilru deuh ringawt a; mahse, ka zâwt duh chiah lo va," ka nu chuan a lo ti leh mai a. 

Ka hmui pet fan fan pah chuan ka rilru chu ka han sâwrbing deuh bawk a, Jakob-a kha Jakob-a a ni lo leh thut a ni thei ang em? A harh khân Zodina rawn ni leh daihin, a zak lutuk ang a, min hmachhawn ngam lovin a haw nghâl daih tihna a ni mai lo'ng maw? Thil ni thei lo a ni miah lo,  chuti a nih chuan a țha a ni mai a, buaina tùr a awm lo tihna a ni ang.

"Nakin deuhah ka lo zâwt chhin dâwn nia," ka ti ta ringawt a, chutia ka tih mai loh chuan ka nu chuan ngaihțhat lohna a nei ang tih ka hlau a ni, kan in meuha min rawn kalchilha hmanhmawh taka a tûka min hawsan lehtu chanchin han ngaihsak loh zui viau chu thil dik pawh a ni chiah lo, ka nu ngaihah a nia ka tih ni; mahse, kei chuan a takah erawh chuan phone ka tum teuh lo, Zodina a lo nih tawh tak tak phei chuan...

Remsiama, Nunmawia leh Amos-ate'n Krismas chibai min rawn bûkna thu chu phone-ah ka han chhiar a, ka nui deuh var var a, ka han chhâng lêt ve nghâl a. Chutih rual chuan Pu Rovate chhûng chibai bûkna pawh chu Kimi phone-ah ka han thawn tel ve zat a, țhian dangte chu group-ah kan inchibai tel tel a, a tâwk kan ti mai, a awlsam viau mai. Jakob-a number pawh chu ka en reuh reuh a; mahse, chibai bûkna chu ka thawn ve ta lo.

Ka rin lâwk ang chiahin, inkhâwm bànah chuan Rody leh Muanpuii chuan Jakob-a chungchâng chu min han zâwt chîk khawp mai a, ka hrilh leh mai a, nizàn lama ka sawi dàn bâkin ka sawi chuang lo. Anni pahnih erawh chuan min ringhlel tih hriat tak hian," A ni thei lo, in inkârah eng emaw chu a awm a ni. A melh dàn che kan hmu a, kan hre vek, nang pawhin i melh ve tho," an ti ta tlat mai a, kei chu ka nui hawk a," Melh ve bawk ang chu, nangni pawh hei ka melh tho che u hi," tiin an pahnih chuan ka han melh tawn ralh ralh a, anni erawh chuan," Keini min melh dàn leh ani i melh dàn kha chu a dang daih, nulain tlangvâl a melh dànin a ni ani kha chu i melh ni," an ti leh tlat a, an țawng thei dùnin an țang rual dùn bawk si a, ka hnial hneh lo, a hnuah phei chuan," Nia, in ngaih dàn dàn le," ka ti ta ringawt mai a, an mi rinhlelhna rilru ka tihdanglamsak dâwn chuang lo tih ka hria a, ka sawi peih tawh lo.

Zànah Kimi'n min rawn text a, thil min rawn zâwt a ni zâwk ang chu. Nimin lama Jakob-a, kan khuaa a rawn kal leh kal loh chungchâng a ni nghe nghe, thil pawiah ka ngai lêm lo bawk a, dik takin ka chhâng a, a rawn kal thu chu ka hrilh hmiah. Ani pawh chuan  *Ka rawn zâwt mai mai che a nia*  a rawn ti ve mai bawk a, a chhan ka zâwt zui bík lo.

Hlim takin Krismas hun chu kan hmang zo a, Krismas leh kumthar inkârah kan unauho chuan lêng chhuakin motor neiin an thawh a, ei tùr leina thawh ve lo ho chuan petrol leh diesel leina lam kan tum ve thung bawk, mipa motor khalh tùr leh min vêng tùr an awm ve tho avàng chuan kan nu leh pate pawhin min ngaihtuah lutuk lo deuh a, fîmkhur tùr erawh chuan min chah leh hlawm tho. Hmeichhe hlang chu ni ngat ila chuan kei pawhin ka duh hauh lo ang, kan unau mipaho lah hi nu leh pa hmuh loh chinah pawh ngaihtuahawm an awm ngai hauh lo lehnghâl a, thlâ hi an timuang thei a nia.

Tûn țum chu Muanpuiite huanah a ni ve thung, kan kal khât ta deuh bawk a, an lo enkawl hnûm tawh bawk nèn, a nuam khawp mai. Tih tùr vak kan nei pawh a ni chuang lo, chaw eina hmun kan sawn a ni deuh mai a, bâkah, unauhoa han lèn chhuah ve hrim hrim kha kan châk chu a ni.

Kan kalna hmun hi Thenzawl ațangin a hla ve deuh hlek a, thim hma ngeia haw hman tumin ei tùr lam buaipuitute pawhin an buatsaih sauh sauh a, hmeichhe hman deuhho chuan thlahrâng bu chhiarin kan ngaithla a, kan hlau lo hlawm viau a ni ang, kan nuihpui vak vak a, a hnu deuhah phei chuan a chhiartu Jori chuan," In ninawm, in hlauh loh pawhin lo hlau der ve tal ula? Ka chhiar peih tawh lo," tiin a lehkhabu chhiar lai chu thlâm chhuatah chuan a han theh thla țhak a, Adawnga chuan a lo hre pha a ni chêk ang," In ti ang lo ngawt mai, hlau der ve tal rawh u," a rawn ti a, a nui sûng bawk a.

"A chhiartu aw ațang hian a hlauhawm thei lo hrim hrim," tiin Rody chuan Jori chu a'n kâp sak a, ani lah chuan," I chhiar peih loh a nih hi ka chhiar aw, i duh leh chhiar rawh," a lo ti hmak a, a'n titau der zui baqk a. Rody chuan," Chhiar hlauhawm der ve tal la chuan kan lo hlau der ve tùr hi a nia," a ti leh a, lehkhabu chu chharin a kûn zui nghâl zat a. A aw chu thianin a han chhiar ve ta a, a sawi ang deuhin Jori ai chuan a chhiar ngaihnawmin a chhiar thiam a, a aw thûm deuh hlek nèn chuan a lo inhmeh phian ni tùr a ni, kan ngaithla țhap a.

Tihtak zeta kan ngaihthlâk țhap lai chuan Adawnga kan bulah a rawn kal ru țhem țhem a ni ngei ang, kan bul lawk ațang chuan min rawn barakhaih thut mai a, kan phu chiang kher mai, Rody phei chuan a lehkhabu chhiar lai chu a paih dâwrh nghe nghe a, phu chiang hlawm viau mah ila a hnuah erawh chuan kan insawisa a, kan nui leh ta tlâwrh tlâwrh a.

Kan haw dâwn meuh chuan khua pawh a lo tlai viau tawh mai a, unau hmêl hai hun vêl a ni hial tawh ang chu, ka pain min ngaihtuah avàngin min rawn be nghe nghe a, thlâm țha taka kan khàr hnu chuan motor-ah lût sang sangin kan tlãn chhuak zui ta nghâl a. Thla bial zàn chu a la ni chiah lo deuh nain a bial tawh kher mai a, motor ațang chuan ka thlîr pah deuh reng a. Mi dang erawh chuan an en ve lêm lo a ni ang, hla play-in an zàwm dual dual thung a.

Jakob-a ka ngaihtuah chhuak a. Mi tak ni hauh lo mah se ani hi mipa min hnaih hmasa bertu leh a lang a pauva min hnaihchilh ngamtu ber a ni a, ka ngaihtuah chhuak lo thei lo. Lêrh tak angin lang mah se ka bulah erawh hmeichhe dang a melh ngai lo va, min duh tak tak anga a insawi pawh hi dâwt a nih ka ring lo. Mi tak tak niin a insawi ang tak hian min duhin min han âtchilh mai se...

"... ngur ngur chuan! Hei, eng nge i lo ngaihtuah vung vung? Jakob-a kha a ni ngei ang chu?" tiin Rody chuan min rawn sáwi deuh nak nak a, ka ngaihtuah ram ațanga a tak ramah chuan lût nghâlin," Eng thil nge ni ta?" ka han ti chhuak hluai a, ani lah chuan," Ka koh nasat che nèn, Bumtua i ngaihtuah nasa lutuk a nih kha," a lo ti vat a, chutah," A chhia ka ti hran miah lo; mahse, thingtlâng lehzuala awm chu ka peih lo, hna thil vànga awm pawh a peihawm loh tawh teh rêng nèn, pasal neia han chèn reng nân chuan..." a han ti zui a, Mary chuan," Mahse, duh berte nèn chuan," a lo ti sap a, Rody chuan," Duh berte nèna bahra khur laih ai chuan duh berte nèna khuang chawi a nuam záwk," a lo ti leh vat a, amah ber chu a nui zui hak hak a, kan chuanna motor khalhtu Laltea chuan," I sawi fuh fuk fuk riau mai, vawiina i sawi fuh ber a la ni hial ang," a lo ti a, Rody chuan," Ni ang chu, kei chu ka lan dàn ang ai hian ka fing a nia," a'n ti zui a, a thil sawi chu a inhmeh lutuk a, kan nui zo ta vek a. Nula lian pui a ni a, a têt deuh lai chuan a mãwl thei si a, amah lah a chum tûrh reng bawk si nèn, fiam a hlawh thei hle a, a taksa lenna hi fiam chîkah neiin," Tûn thleng pawh hian i la chum chhunzawm zêl chu a nih hi," an ti ţhìn a, amah lah hian," Màwl pawh ka la chhunzawm zêl," a ti ta țhìn a, a intih-nulât hnu pawh hian he a țawngkam hi fiam zui nân an hmang țhìn a, amah hmuh kher phei hi chuan nuih loh hi a har ve êm a ni. Tunah chuan a mãwl lutuk tawh bîk lo va, mahni pawha inchãwm thei tawh niin bialpa hial pawh a nei tawh nghe nghe a, a bialpa pawh hian a làwm thei ngawtin ka ring a ni.

Kumhlui thlah zànah erawh Biak In lamah hun hmangin țhalai hun hmanna lamah kan kal diak a, kan țawngțai a, kan zaiho bawk a, Pathian thu kan ngaithla bawk. Zàn rei tak men erawh țûl kan ti lêm lo va, kumthar tûka mut kham lo taka inkhâwm kan duh lo a ni.

Kum a han thar a, ruai kan han țheh mup mup a. A tûkleh ațang chuan mahni buai buaiin kan buai chho leh țan chu a ni mai a, kan unauho erawh kan la inhmu khâwm lât lât reng a, kan awm khâwm theih chhûng chuan tu mah inphatsan áwih loh kan ti a ni. Kan titi khâwm nak nak a, kan awmna hmun țheuh pana kan chhuah hun tùrte chu kan sawi khâwm a, kei pawh ni 7 vêlah chuan ka kal mai a ngai leh tawh ang. Kei aiin Rody chu Aizawla a phei hma a ngai dâwn a, ni 6 zînga a phei ngei ngei a ngai dâwn a ni, kan inhmu khâwm har leh tawh dáwn si a tiin inthlah nân chaw ei khâwm kan rawt thlu leh dèr mai.

Ni 7-ah Lunglei lam panin kan tlãn leh ta vang vang a, Lungleiah zàn riakin a tûkah motor remchâng ka hmu hlauh a, ka chuang leng ve bawk nen, mi pahnih chauh an la chuang zui a, vànnei ka va inti tehlyl êm! Remsiamate sumo kha chu a la tlãn rih si lo va, chutia motor remchâng ka hmu chu ka lãwm kher asin.

Ka ina ka han lût leh ta chu ka thaw huai a, a lo la hnawk hran lo viau a; mahse, ka bag chu dahin tukverh ka hawng  hmasa te te a, hmun ka han phiat a, puanchhiain țhutna ka han hru fai thuak thuak a, ka mutpuan pawh ni a la sat țhat avàng chuan ka pho chhuak zui a. Kimi lêng chhuakin min lo hmu a, min rawn ko chûl a.

"I lo haw tawh a ni maw? Vawiinah em ni? I lo thlenna a rei tawh em?" a rawn ti a, a rawn pêng zui nghãl a, kei chuan," Rei vak lo ve, motor remchângah ka rawn chuang thei hlauh a, ka vànnei lutuk, thingpui ka'n chhuang ang e, țhu ve reng rih rawh aw," ka ti sauh sauh a, thingpui tùr chu ka chhuang zui nghâl a.

Krismas leh kumthar kan hman dànte chu kan inzâwt dùn a, thingpui a so chuan ka siam zui nghâl zat a. Thingpui ka siam zawha ka han pêk chuan," Jakob-a'n i rawn haw tawh tih hi a hria ang em le?" a lo ti chhuak sap a, kei chuan," Ka hre hauh lo mai," ka ti ve mai a. Kan khuaa a rawn kal hnu khân inbiakna kan nei tawh lo hrim hrim a, tu mah ka haw phei hun tùr ka hrilh lo va, Kimi ngei pawh hi ka hrilh hek lo. E, taka, Remsiama ka be tak, an sumo tlàn dàn ka zâwt a nih kha; mahse, ani pawh ka haw phei hun tùr tak chu ka hrilh dawt chuang lo.

Eirawng bãwl lova an ina chaw ei ve mai tùr chuan min han sâwm zui nghâl nain chawhmeh ka hawn nual avàng chuan ka han hnial ve a, ani pawh chuan," A, i khua a har àwm êm mai a ka tih vàng a nia, i nu leh pate bulah i va awm a, rei pawh awm lovin hetah nangmah chauhin i rawn awm leh a, a khawharthlâk dâwn hian ka hre khawp a," a ti ve a, kei pawh chuan," A dik reng mai; mahse, naupang chhia pawh kan ni tawh bîk lo va," tiin ka han nui sak a, ani pawh chuan," Nula țhankin zet tawh zâwk maw le," a lo ti ve a, kan nui zui hak hak a.

A haw hnu chuan ka nute pawh ka phone leh a, ani pawh chuan," Min rawn be har ta sia, kan lo ngaihtuah angreng khawp che a," a rawn ti a, chutah," I thlen tluan chuan a làwmawm a nih chu, i pain rawn biak che a tum ûk ûk a, ka khap rih a, i buai lai tak a nih ka ring deuh zâwk a," a rawn ti leh a, kei pawh chuan thil awmzia sawiin ka phone lawk loh chhante chu ka han hrilh bawk a.

Zànah kan țhianho WhatsApp group-ah chuan Multiple Personality chungchâng chu Rokko chuan a rawn sawi chhuak zauh a, nimin lama a thawnthu chhiar Sydney Sheldon ziah chungchâng rawn sawiin hetiang natna nei hi an awm tak tak a rin thu chu a rawn sawi a. Mi dang dang pawh chuan an rawn sawi nak nak a, group hnihah leh bawk kan ințhen leh ta a, ring leh ring lo pâwl kan awm a, awm ring lo pâwlah Hannah-i a rawn țang huai leh viau mai, kei erawh chuan ka hnial ve lêm lo nain ka sawi ve vak peih lo, an thil sawi erawh ngun takin ka chhiar chhuak dap thung.

Zan khatnaah chuan tu mah an rawn lêng lo va, a tûkleh zànah erawh Amos-ate an rawn lang nghâl zat a, a rawn luh pah chuan," I lo haw tih engati nge i zêp tlat a?" a rawn ti lût nghâl bawrh bawrh a, kei chuan nui chung hian," Ka zêp tih engtin nge i hriat?" ka lo ti ve vat a, ani lah chuan nui duh hauh lo hian," Ka hre thei mai maw le, tu emaw hnênah chuan i hrilh bîkin ka ring deuh ngawt a, a hmêl hmuh pawh ka inbeisei deuh ngawt bawk a," tiin a han hawi kual vêl a, chutah," I thukru te hi a ni lo maw?" a ti leh a, kei chuan," Thukru ang chu maw le, i hmuh ve ka phal hleinem," ka lo ti leh zat a, fiamthu a duh ang bawk hian fiam lét hi nuam ka ti ve tho a, ani hian khawhar lovin min siam țhin rêng a ni.

An țhut fel hnu chuan," I inzêp thei si," a ti leh a, kei lah chuan," Zêp thei ve bawk ang chu, inpuan zuah zuah te chu a finthlâk loh e," ka lo ti leh a, Remsiama chu lo inrawlh ve ta vatin," Engin nge i rawn haw a?" tiin thu pângngai deuh zâwk hian min rawn zâwt ta a, kan inbiakna țawngkam pawh a pângngai thei ta chauh a ni.

Eng eng emaw sawia pângngai taka kan titi hnu chuan Amos-a chuan," I luck e," a rawn ti chhuak leh a, en ran rán pah chuan," Ni e, tlangvâl pathum laiin min rawn rîm a nia, ka luck ngawt mai," ka ti lét sak a, ka nui duh bîk miah lo va, ka nuih erawh a za khawp mai a, nui lo tùr erawh chuan ka insûm hrâm hrâm a. Ani lah chuan," Ka ti tak tak alawm, in khaw lamah hial rawn ûm zuitu pawh i nei tih ka hria a nia aw," a ti leh a, chu thu zet chuan ka nuihza deuh chu a titàwp chiangin mit pawh khap lo chuan Amos-a chu ka en ta ràn a, han sawi mai tùr pawh ka hre lo. Jakob-a rawn kal thu kha an lo hre ve vek tihna a ni chiang mai, Lalpa leh!!

*MITE NUNA VA BUAI CHIAM LO HIAN MAHNI NUN HI INENFIAHIN INBUAIPUI TA ZÂWK ILA, SIAM  ȚHAT NGAI LAITE SIAM ȚHA ILA, HMA KAN SÂWN ZÂWK NGEI ANG LE*