☆THE SWEETEST HANDCUFFS☆ - 11 By Dingdi Pachuau

 ☆THE SWEETEST HANDCUFFS☆ - 11 By  Dingdi Pachuau

"Ka ti ve mai mai a nih kha, ka hre tak tak teuh lo mai; mahse, hetia en ai hian i lo luck zék tih erawh ka hre tawh," Amos-a chuan a ti leh a, kei chuan," A va làwmawm ve, kei chuan ka lo hre miah lo asin," ka lo ti ve thung a, Jakob-a kan ina a rawn kal avàng mai khân luck ta viauah min ngai a nih chuan, Jakob-a an tehna a sâng viau tihna a ni mai.

"Kob-a'n in khuaah a rawn tlawh che a ni maw?" a tih leh chuan," A rawn kal remchângin min rawn tlawh ve zawk a nih àwm kha, min rawn tlawh nachâng a hria kha fel ka lo ti khawp a, nangni pawh in rawn kal remchàn hunah chuan min rawn tlawh ve ngei ngei ang che u, ka phût tlat che u a nia," ka lo ti zung zung a, a sawi dàn ki ka hria a, min rinhlelhna anga chhàn lêt erawh ka tum hauh lo, hria ang pawhin ka awm lo ang.

Chutianga ka tih vàng chu nge ni," Loh theih nâng, mâkpa interview a ni pah thei bawk ang a," a rawn ti a, amah lah chu a nui súng bawk si a, mi dang pawh chu kan nui ta vek a, chutiang lam hawi chuan an fiam chhunzawm ta bawk nèn, a hnu lama kan titi pawh chu a pângngai chho ve ta viau mai, meinei takin min chhaih tawh lêm lo. Amos-a hi chuan mi chhaih hi a peih ve hrim hrim a, kei pawh hian engah vak ka ngai duh ngai lo rêng a, bialnu angreng deuh a nei ve tih pawh ka hria; mahse, min nêl ve laklawh tawh a, min chhaih hi a bànsan thei chuang lo. 

Khua a lian lêm lo bawk a, hun remchâng ka neih veleh Krismas leh Kumthar chhûng khân damlo leh harsatna tâwk an awm leh awm lohte zâwtin in ka han fang kual zawr zawr a, ka fan chinah chuan an lo awm lêm lo va, hritlâng ang deuh chu an lo awm zeuh zeuh thung, a țhenin Kumthar chibai min lo bûk lâwp lâwp a, min chibaitute hi kum upa lam an ni tlângpui a, hritlâng damdawi kan inhrilh láwp láwp bawk a, a nuam ve phian.

Zodinate in pawh fâl deuh hlek mah se ka va tlawh ve tho a, vêng hmâwr, hmun rem leh zâwl zâu lai a ni a, an țhenawmte nèn inhnaih viau lo mah se an in hmun hi a remchâng êm mai a, țhenawm hnai neih theih lohna tùr mah ni se, awm vang vangna tlâk a ni ka ti ve tlat.

Pu Zuala pawh chu a lo dam țha vak lo a lo ni, hnâng ațanga siam țhutna, mut theihna ni bawkah chuan a lo mu thluang zar a, an ina ka lût min lo hmuh chuan min lo chhàwn vat thung. Mi dang ka hmu lawk lo va; mahse, Pu Zuala nèn kan inbe thãwmah chuan in chung ațang hian nu pakhat hi a rawn chhuk a, damdawi ni àwm tak hi a rawn keng vâ bawk a.

"Ka pa, hei hi a ni tiraw?" tiin Pu Zuala chu a rawn pan hnai a, Pu Zuala bula ka lo țhut ve avàng chuan min rawn hmu ve nghâl a; mahse, min en rei lo, a pa chu a en leh nghâl vat a, Pu Zuala chuan," Aw, nih kha, tui min han thlit la, ka lo ei nghâl ang e," a lo ti a, chu nu pawh chuan damdawi chu Pu Zuala pein tui la tùr chuan a kal sawn zui leh nghâl a.

"Hunpui laia nawmsam loh hi chu a hrehawm duh ngawt ang le; mahse, hei, dam lam i ni tawh a, i dam țha vat mai ang," ka tih chuan," Ni e, ka dam vat ang, Kumthar ruai ka han țheh ve vàng vek kha a ni, khami zàn ațang khân ka awm a nuam lo chho țan kha a nia; mahse, ka dam thuai ang," a lo ti ve thuai a, a fanuin tui a rawn pe ta bawk a, damdawi chu a ei zui nghâl a.

Rei awm tum pawh ka ni lo va; mahse, thingpui in tùra min tih tlat avàngin ka hnial hlei thei lo, in loh ka han tum zet a nia; mahse, a fanu (Zodina Nî) chuan min rawn pe chawpchilh zui bawk nèn, ka țhu ve ta reng mai. Pu Zuala lah chu mu chung chuan a titi luam a, Krismas leh Kumthar ka hman dànte min zâwt a, ka hrilh ve zêl bawk a, kan bulah chuan Zodina Nî pawh chu a lo țhu ve a; mahse, a țawng ve mang lo.

Ka haw dâwn chuan an kawngkaah chuan Zodina a rawn lût ve chiah a, kei haw tum tawh ka ni bawk nèn, kan intâwk chiang khawp mai. Hna a thawk a ni ngei ang, hna thawh kawr a ha a, ipte lian pui a ak puar lung bawk. Min en vang vang hnuah chuan a rawn nui ta suk a," Nurse, kan inah i rawn lêng ve a ni maw?" tiin a lu chu a han bu deuh nghat a.

Hei chu Valpuia a nih hi.

"Aw, lêng ti ila, damlo awm leh awm loh ka han tlawh kual a ni, eng nge i tih a?" tiin ka han záwt a, ani chuan nui sâng chung hian," Huanah ka kal mai mai a, chuan, engtikah nge i lo kal ve theih ang? I hman țêp tawh ang em?" tiin min han zâwt lêt ve leh a, kei pawh chuan nui chung hian," Ka hre mai lo le, a hmanhmawhthlâk viau chuang em ni? Hun thâwl ka neih hun tùr hi ka hre thei mai rih lo va," tiin ka han chhâng a, ani pawh chuan," Hmanhmawhthlâk lo ve, i hman hun hunah a ni mai," a ti leh a.

A chhûngte tân pawh hian hriat thiam chu a har ve ngawt ang le. A chângin an fapa, an tupa dik tak angin a awm ang a, a chângin mi dang daih rilru a rawn pu ang a, mak an ti ve țhìn ngawt ang, kan khuaah min tlawhin a rawn kal a ni tih pawh kha an hre ngeiin ka ring a, kan inngaizâwngah an ngai ngei ang, nichin lawkah lah khân nêl takin kan inbe leh bawk si a.

Zanriah chawhmeh tùr ka siam laiin Kimi a rawn kal a, chaw ei tùrin ka han sâwm ve chhin a, ani chuan nui hmêl pu chung hian," I chawbêl a tê êm mai, kan kham lo ang," a han ti a, cooker chu kâwkin a han nui hak hak a, kei erawh chuan," A hmêl en ang hi a ni lo, a leng tam a nia, kan kham hrim hrim ang," ka lo ti thung a, Alu chu ka chan chhunzawm leh a, ani lah chuan," Han en rêng rêng pawh khân a leng tam lo tih a lang vek alawm le," a lo ti leh a, chutah," Arini i hmu tawh em?" a rawn tih zawm ta zat a.

Ka en vat a, ani erawh chuan ka cooker chu a lo la en reng thung a, ka hmui liak huhin," Ka la hmu miah lo, eng nge ni a?" tiin ka han zâwt zui a, ani chuan," A, eng mah ni lo ve, ka han zâwt mai mai che a nia. Nih, Kob-a i hmu tawh em? Ani chu i hmu tawh ang chu maw?" a ti leh a, a thil min zawh chuan a ngaihna min tihre lo hle, Arini leh Jakob-a chu eng atân nge ka hmuh ngawt ang? Jakob-a pawh ka la hmu chuang lo, ka hmuh kha chu Jakob-a a ni lo va, Zodina pawh a ni chuang lo.

"Hmu lo ve, eng nge ni ta?" ka ti leh a, ani chuan," A, ka han zâwt mai mai che a nia, kan khua hi zawng, thingtlâng ngang hi a la nia, miin i hriatah eng eng emaw an sawi a nih pawhin engah vak ngai duh lo ang che, mênah i thlâk dâwn nia," a ti duah a, ding chhuakin," A tlai mai dâwn, nauate pawh an rawn haw dâwn tawh ang, ka'n haw tawh ang e," a ti a, kei chuan," A la hma e," ka lo ti ve a; mahse, a haw zui ta tho a.

Kimi thil sawi chu ngaihtuah zui duh lo viau mah ila ka rilruah a awm reng mai a, ka paih bo thei lo. Amos-a min chhaihnate kha ka han ngaihtuah kai zêl a, ka thil duh loh tak kha a thleng ta ni tlata ka hriat chu le! Kan khuaa Jakob-a rawn kal kha Arini'n a lo hre ve a ni chiang mai, an inkârah eng thil nge thleng ta? Engtin nge Zodina a insawi fiah tâk ang le?

Kawngka kik thãwm a rawn awm avàng chuan ka ngaihtuahna ram ațang chuan harh chhuakin ka han chhàwn vat a, Zodina lo lût ka hmuh chuan makti rilru tak hian ka lo en a, inthlahrun hmel deuh taka a nui

ka hmuh chuan amah ngei a ni tih ka hre zui bawk.

"Lo kal rawh, eng thil nge i duh ták? Lo țhu rawh," tiin ka lo be vat a, mi inthlahrung tak a ni tih ka hriat avàngin biak bawrh bawrh hi a ngai tlat a ni. Ani pawh chuan," Ka rawn tibuai leh lawk mai che aw," a ti sap a, ka țhutna piah deuha plastic chair-ah chuan a țhu a, a inkuangkuah thãn zui a.

"Tibuai lah lo ve, thingpui ka'n thli lawk ang e aw," tiin ka tho a, ani chuan," Ngai lo mai rawh se, ka lãwm e, ka hmanhmawh deuh hlek a. Englo a nia, ka pu drip min lo khaisak lawk hman ang em aw ka ti a," a lo ti ta vat a, kei chuan," Uai, a zia chho ta emaw ka lo tia?" ka ti vat a, ani chuan," Aw, zia ve reng tawh e, amahin a duh tlat a, 'naktûk lamah ni mai se' kan tih pawhin zanin ngeia khai a duh tlat si a, 'Chak thuai ka duh alawm' a ti a, a inthlahrunawm viau mai a; mahse, i hman lo chung chung chu-" a la tih lai mêk chuan," Hman e, tih tùr ka nei hleinem, thil țûl ka han la khâwm ang e," ka ti a, hetiang hun vêla hman tùr hi inah hian ka chhawp sa hlauh a, zàna office hawn buai ngai lo tùra ka tih vàng a ni pakhat a, a tihzia hlauh mai.

Kan chhuah hnu chuan," Rawn kal hah kher ngai lovin min rawn phone mai tùr a nia," ka ti a, ani chuan," A pawimawh si a, phone-a inhrilh ai chuan ka ti deuh maw le," a lo ti thung a, inbe lo chuan kan kal leh ta mawp mawp a, kan kal chak deuh bawk a, kan thleng har lo.

Pu Zuala pawh chu a hma ai chuan a zia tih a lo țhut dàn ațang chuan a hriat theih a, min lo nuih a," Ka rawn koh buaitîr che a, min lo hre thiam mai a niang chu, a thlàwn tùr pawhin ka ti miah lo a nia," a lo ti charh charh a, kei pawh chuan nui chung hian," Pu berin min ko a nih chuan kan ngaipawimawh lo ngam nâng, thil tih lai kan lo nei a nih pawhin kan rawn tlànsan dàwr dáwr mai ang chu," ka ti ve a, a pangte chu ka han dehsak a, bp pawh check tùra min tih avàngin ka check-sak bawk a,  a hniam deuh hlek a lo ni.

A mutna room-ah chuan lûtin drip chu ka khaisak ta a, pawimawh tùr chu ka keng ve nain an lo nei sa vek a, Zodina Nî leh a fanu ni àwm tak, tleirãwl ve thuak tawh hi kan bulah chuan an awm ve reng a, a fanu lah chuan min en duh êm êm zui a. A pu chuan," Duati, i va han en duh ve a?" a ti nghe nghe a, ani lah chuan," A hmel țha êm alawm, Au Arini ai chuan hmel țha ka ti zâwk daih," a lo ti a, tilàwmawm viau mah se min tizak țhelh a, ka nui ringawt.

A pu chuan," Chuti em ni? Hmel țha pawh ka lo ti ve hran hleinem," a lo ti thung a, nui hmel a put avàng chuan min fiam a ni tih ka hre ve tho a, a tunu bawk chuan," Àpu hi chu i hmãnlai tawh êm a, hmel țha pawh i hre tak tak tawh lo a ni," a lo ti leh a, phone rî a awm avàng chuan a tlãn chhuak zui ta nghâl a, a pu chuan a nuih zui var var a.

Drip far zawh thleng nghah thu va awm suh, bâkah, a zawh huna hriau phawi mai mai te chu an thiam ve reng bawk a, rei tak awm lovin ka haw ve ta a. Ka haw dâwn chuan pawisa min pêk an tum a; mahse, ka la duh lo va, Pu Zuala chuan," E, la ta che, i hna a ni tawh lo va, office hour lah a ni tawh hek lo, kan rawn ko buai bawk che a, i la ngei tùr a ni, i lâk duh loh chuan kan tibuai ngam tawh nâng che," a ti tlat a," Min rawn tihbuai leh hunah zâwk le," ka ti ve thung a, kan innawr ve nasa a; mahse, a tàwpah chuan a lungawi loh ka hlauh avàngin min pêk an tum zâtve chu ka lâksak ve ta hrãm a. Zodina chu min thlah tùra a tih chuan ka lo hnial a, a ngaih loh thu leh ka hlauh loh thu ka sawi pawh chuan," Nula mahni chauha zàna chhuah chu a țha ngai lo," a ti leh tlat a, Zodina nèn bawk chuan kan inzui haw leh a.

Kawnga kan kal lai chuan," Urlâwk zànah khân thil pawi a thleng êm lo ang chu maw, a thleng lo tiraw?" a rawn ti chhuak sap a, kei chuan," Aw, thleng lo ve, hrehawm ti duh suh," ka lo ti vat a. Ani chuan," A tûka ka harha ka mutna hmun ka hriat thiam lohzia kha, ka phone ka en a, ka hre chhuak thei ta chauh a ni, ka zah êm avàngin eng mah pawh sawi lo khân ka haw ta daih a," a ti leh sap sap a, kei chuan," Ka rin dàn chiah a nih chu, khami tûk khân ka tho tlai angreng a, ka hmu ta si lo che nèn, i harh chhuak a nih ka ring rêng a," ka lo ti ve a.

Ka zah lohna zawng zawng sâwm khâwma Arini nèn an inkár a buai phah em tih zawh ka duh viau laiin a zah ka rin deuh avàng chuan ka țhulh leh ta záwk a, sawi hrehawm pawh a lo ti maithei si a, keiin ka zawh chuan min chhàn loh a hreh ang a, hrehawm ti chung chungin a sawi chhuak ve thei tlat, thil thleng a awm a nih chuan a thleng tawh tho a, ka siam țha thei tawh chuang lo.

U Ropuia pawh a rawn kal ve leh tawh a, office-ah titipui tùr a awm ve leh ta a, a khawharthlâk lo ta deuh. Ani hi zawng, titi tùr hi a hria a, thu bengvàrthlâk deuh deuh lam a sawi țhìn bawk nèn, a bula awma a titi ngaihthlâk hi nuam ka ti viau mai. Pu Rova pawh a rawn kal zauh zauh a, Office bul leh ka in luah bul hi a tifai reng a, a hna deuh ber a ni bawk nèn, a fai hluau reng mai a ni.

Lo an vât zo vek tawh a, a țhen phei chuan Krismas hma daih khân an vât zo tawh bawk a, hna thawh tùr an nei vak lo a ni ang, lui kal an uar viau mai a, tlai lamah ni se mualah football an khèl țhìn a ni ngei ang, Puiate unau inkhèl tùra an kal lai hi ka hmu ve ziah bawk. Field hi ka hnaih lëm lo va, vawi khat erawh ka kal tawh thung, a nuam reuh phian a, phùl a țo chhuak vek a, hmuh a nuamin inkhelh pawh a nuam viauin ka ring.

Nunmawia chuan," Tlaia ka inkhelh ve chhinna chu ka rawl ta phian mai ka ti," a ti a, a ke chu thluangin a han chùm deuh dat dat a, Amos-a chuan," Chutiang nula bula sawite chu a zahthlâk e a, a in-fit loh thlâk  êm mai," a lo ti a, a han nui pût pût a. Nunmawia chuan," Nang angin ka hman ve hleinem maw le," a lo ti vat a, ani lah chuan," Nia, nilêng lênga nuthlawi bula tawlh hrut hrut reng chuan hman ngaihna a awm lo a ni," hnehsawh zet hian a han ti leh a, Remsiama a lo nui kur kur mai.

"Nuthlawi bulah maw?" ka lo ti vat a, rang zet hian Nunmawia chuan," Eng mah a hre lo, a ti ve mai mai a nih kha," a lo ti vat a, Amos-a lah chuan," Ni e, eng mah hi ka hre lo, vawiinah pawh khân lui in kal a ni lo maw?" a lo ti leh a, Nunmawia hmêl ațang chuan Amos-a thil sawi chu a dik a nih ka ring," Engtik laiin nge min lo hmuh pek a? Nang hi, min lo zui ru reng a ni lo maw?" a han tih chuan za zet hian Remsiama leh Amos-a chu an nui kur kur a, Nunmawia pawh chu za lo zet hian a nui ve a.

"Tak tak chuan, ka hmu lo che u a nia, ngaihțha tak khân awm phawt mai teh. Tlai lamah erawh chuan rawn inkhèl ve tawh la aw, rawl sawi áwih tawh loh, nuthlawi bulah phei chuan in-fit țhat hle  a ngai a nia; mahse, kei ai chuan i hre chiang zâwk ngei ang chu," Amos-a chuan a han ti leh kher a, kan nui țhâ hlawm a, Nunmawia chuan," I châk ve vàng a nih kha," a lo ti a, nui huah huah chung hian Amos-a chuan," Ka tlin ve lo ang, bákah, hrin loh fate'n min pa ang tih mah hlauh nâklaiin, ka duh teuh lo mai!" a ti leh a, a sawi zo chiah chu kan nui ta vek a, a sawi dàn leh a hmêl kha a inhmeh êm mai a, Nunmawia pawh nuihza ber berah a țang ta hial a.

Chapchàr Kût hman an lo tum a lo ni a, chutah chuan, football hmanga inelna an nei dâwn a, YMA chhang lam pawhin hnam làm an zir tlut tlut bawk a, a nuam reuh ngawt ang. A khua hi a lian lêm lo nain intihlim tham țhalai an awm ve nual si a, bâkah àwl lai a ni rih bawk nèn, an inkhèl ngawrh viau a nih ka ring, tlai tin practice tùra an inzui hmuh tùr a awm tlat. Naupang lam lah ni se, ràlkhat ațangin hnam làm an zirna khuang rî hriat tùr a awm reng bawk a, an khuang ri a țang țha thei bawk a, a nuam ngawt ang. Kei pawhin ka thiam ve nual a, a châng phei chuan an khuang ri rual chuan ka lo che ve a, mi min hmuh erawh ka hlau thei viau thung.

Arini leh Zodina chu an buai zui ta lêm lo a ni ang, mi țawngkamah pawh ka hre lo va, an han sawisep tùr àwm pawh ka hre lo. Inkháwmnaah pawh Arini chu ka hmu a, engtin mah a awm àwm ka hre lo, min rawn hmu ve tho a, min haw àwm pawhin a awm lo. Vawi khat phei chu Zodina nèn an indinchilh lai ka hmu nghe nghe a, an buai lo a ni ngei ang, a țha e, thaw an ti veng huai thei alawm.

Tlai khat chu Office ka bàn hma deuhin Zodina a rawn lût hlawl mai a, haw ka tum tawh avàngin tukverh pawh ka khâr tawh a, U Ropuia phei chu a haw daih tawh nghe nghe a. Ka lo chiauau vat a, a inthuamna ka hmuh chuan a inkhèl ve dáwn tih ka hre thiam nghâl a," Eng nge i duh tâk? Lo țhu rawh," ka lo ti vat a.

"Eng nge kei hian ka duh tih min zâwt maw? Nang lo eng nge duh se min tih?" 

A țawngkam chhuak ațang chuan Jakob-a a ni tih ka hre nghâl vat a, ka en nawn țha leh ngat a, chutah, nui chung hian," I inkhèl ve țhin elo? Hetia en ringawt che pawh hian i thiam hmèl tawp ka ti!" ka han ti a, Zodina ni lovin Jakob-a ka bia tih ka inhrilh ru mawlh mawlh bawk a, ani hi chu ngam deuh hlek leh hre tak anga ka biak a ngai, Zodina anga mi inthlahrung kha a ni ve tlat lo va, bâkah, amah hre lo ang leh Zodina nèn ngaihpawlh anga min ngaih chuan a fuh lo ngawt ang.

"Min rawn en la, i hre mai ang. Ka hmu khât deuh che a, ka ngaih che a zual tlat, hmuh zin theih dàn tùr che ngaihtuah a ngai a nih àwm hi," tiin min han en vang vang a, a mit chu a tih țhin dànin a'n tizîm deuh sawr sawr pah a. Chutah," Khawi maw," tiin a kut ding lam hi a rawn phar chhuak a, a ngaihna hre lo deuh hian ka lo en reng ringawt a. Ani chuan," I kut min lo pe," a ti leh sup a," Eng atân?" ka han tih chuan," Min han pe phawt la?" a lo ti thung a.

Ka en deuh reng hnuah chuan tîm deuh hlek hian ka han pe a, a lo la kãng vat a, ka kut hnung lam chu dìm fahran hian a han fâwp a, chutah a biang dehtîrin a han maimaichhîng vang vang a. Mit khap hauh lo chuan ka en chho reng a, a chêt dàn chuan min tihamhaih a ni. A mithmul dum buk chhah zet chu a inhmehin a tilang pà zualin ka hria a, ka en hnai bawk a, a mithmul pawh chu a lo sei angreng viau a ni tih ka hriat phah.

Rawn mengin ngun zet hian min rawn en chhuk a,"I kut chelh theia ka awm hi ka lâwm a ni, ka vànnei tak zet, zaninah ka rawn lêng ang aw, ka tân hun lo insiam la," a ti sup a, chutah, ka kut chu thlahin," Ka kal phawt ang e, mual lamah min mamawh ve tho si a, zaninah hun kan nei dâwn tho alawm tiraw? zanin chu aw, min lo beisei dáwn nia," tiin a han khi sak a, a chhuak zui ta nghâl a.

Rei zet ka dinna ngaiah ka din phah. Ka chunga a chêt dàn leh a țawngkamte khân min tihamhaih zo vek a, chét sawn nachâng pawh min tihre lo a ni, ka vài riai ni berin ka hria, a mitmeng mi hîp zet leh a awka chhuak sexy leh ngaihawm zet si kha, ka biang chu na lo têa bêngin ka lu chu ka thing nak nak a," Harh teh, harh teh, nangmah kha inbum suh," tiin ka inzilh mawlh mawlh a, zaninah rawn lèn a tum thu a la sawi zui. Nichin lawka kachunga a chêt dàn han ngaihtuah lêt phei chuan ka tân mi hlauhawm tak tùr a ni tlat a ni, ka invèn a ngai, a zùnah ka uai thei lo ang, mi tak tak pawh a nih loh hi.

*PHUBÂ I LÂK KHER A NGAI LO A NIA , THEI ȚAWIH TAWH PAWH HI A INKHAI REI NGAI LO, AMAHIN A TLA MAI ȚHÌN*