☆THE SWEETEST HANDCUFFS☆ - 12 By Dingdi Pachuau

 ☆THE SWEETEST HANDCUFFS☆ - 12 By Dingdi Pachuau

Zanriah ka ei kham ațang chuan ka awm hlè hlé thei tawh lo va, chhûng ril lamah ka dik thei lo a ni ber ang chu. Ngaihtuah duh lo teh mah ila vawiina office-a a awm dàn te kha ka ngaihtuah lêt lo thei lo va, ka ngaihtuah apiang lah chuan ka thin chu phut pângngai ni miah lo hian a phu dup dup zêl mai lehnghâl a, hetiang hian ka awm ngai lo asin le. Kawngka lam chu ka ngaihven ru sek reng a, helhhawlh an tih ang hian ka awm ni berin ka hria.

A lo lût ta ngei a, he pa tak hi chu aw... Thuamhnaw vâr hi a va ngaina tak êm! Zanin pawh, a rawn vâr leh tawh! A la inhmeh êm êm zui, he pa hian thil mawi leh a inhmeh tùr hi a hre tak zet a ni, a mit hi thuamhnaw lamah a lêrh ve khawp a nih àwm hi. Ni leh lo, thuamhnaw lamah kher lo pawh a lêrh tak alawm, min en dàn mawlh pawh hi...

Țha takin ka lo chhàwn vat a, ka bul hnaih chêtah a rawn țhu nghâl chat a. Mitmeng ngaihawm leh tawrh har zet hian min han en a," Ka hmuh loh chhûng che a rei loh teh rêng nèn, ka ngai hman tho che a nih chu!" a ti sup a, chutah," Zànin chu, zan dang zawng aiin i țha zualin ka hria," a han tihzawm zat bawk a, min en hnai set sawt bawk si a, ka lài chhe lo chauh chu a ni; mahse, lài deuh ang chuan ka awm duh lo lui ve tlat a.

"Nang pawh hmuh i nuam sawr sawr khawp mai, i inkhèl chu, i rawl em?" tiin thil dang chu ka sawipui nghâl daih a, ka en rei duh lo bawk. Ani chuan,"Engah nge maw ka rawl ngawt ang le? Ka fit alawm," tiin a han khi suk a," Mipa chu fit takin a awm reng tùr alawm, ni lo'm ni?" tiin  a han thluang dar dar a, kei pawh chuan," Ni chiah e, fit taka awm hian hrisèl pawh a awl alawm, nang pawh i taksa a fit viau chuan i hrisêl tihna a ni mai, fit hi chu a țha," ka lo ti ve a.

Thingpui ka pêk hnu chuan a bul chétah chuan ka țhu duh ta lo va, mi dang rawn kal ta thut se tih thlengin ka ngaihtuah a ngai a ni. Ani lah chu a lo chek hlak a," Min hlauh a ngai lo a nia," a lo ti sup a, kei erawh chuan," Ka hlau lo che, ka rawn hnaih lutuk che chuan thingpui i in thei lo ang tih ka hlau alawm," tiin ka nui sak ve thung a, ka nuih tlawn deuh pah a ni zâwk ang chu, he pa hi ka duh angin ka la hre chiang tak tak si lo va, chuvàngin, hnaih deuh tho si hian chîk deuh zâwka kawm ka la duh zâwk a ni, ani hi zawngin ka ngaihtuah ang te kha a ngaihtuah pha ve dâwn teuh si lo, ngaihtuah pha lo pawh ni lovin a ngaihtuah duh lo zâwk ang chu, hmeichhe tân zawng hmingchhiatna hi thil ho têah a ni si a.

Thingpui a in lai chuan a phone chu a rawn nghawr dar dar a, a phun sup a, hetia a phun hian eng nge a sawi ka hre thei ngai lo. A phone chu phawrhin a han en vang vang a," A tu Arini chu ni maw? Hmeichhia chu a ni ngei mai," tiin a han hmet tàwp hmak mai a, chutah," Ka ning hlawm khawp mai, mi pakhat chauh tâ ka ni tih an hre hlawm lo em maw ni, zak lo hlawm lutuk!" tiin phone chu a han han khawih kual a," Block hmak zêl ang, hming hnaisailo zet zet lah hi hmuh tùr a awm ve ziah," a ti leh nghut nghut a, a block zêl a nih loh pawhin a delete zêl a ni maithei, phone-ah chuan a bûr ngur reng a, chutah," Khawnge kan pahniha kan thlalâkte kha, a lo delete vek pek a ni ngei ang, chu pa mai mai chuh," a ti leh nghut nghut a, min rawn enin," Kan thlalâkho kha min rawn thawn leh vek mai teh," a ti a, a mitmeng lang rum lek lek chuan min ti-awm nuam lo deuh.

"Ka phone khân ka la ve vak lo asin, pali panga bâk a awm lo ang," tiin dawhkàna phone ka dah chu ka la a,  ka han en a, ka hmuh chhun pahnih chu ka thawn ve nghâl mai bawk a, a dang erawh ka delete tawh bâkah ka phone hian ka la ve vak lo a ni.

"I number pawh..." tiin a han phun hluk a," Ngawi tak rawh, ka lock khawp ang, min khawihpui ziah mai!" a ti leh hluk a, a sawi awmzia tak chu man chiah lo mah ila Zodina khân kan thlalâkte delete tùra ka tih vàng khân a lo delete vek tawh a ni tih erawh ka hre thung, Arini nèn an inkâr a buai phah ka hlauh êm avàng khân delete vek tùrin ka ti a nih kha.

"Ti kha chuan phone chu min khawihpui tawh lo khawp ang le!" tiin a han nui huk a, min rawn enin," I number hi chu ka ngaihlu hliau hliau asin," a ti leh a, chutah, a wallpaper chu min han hmuhtîr leh a, nichina thlalâk ka thawn pakhat zâwk kha a lo hmang niin," Mawi i ti em?" tiin a mit lehlam chu a han siai pah sak a, țawngkaa chhâng lo chuan ka lu ka lo bu ringawt a.

Vànneihthlâk takin zanin chu Amos-ate an rawn lang lo hlauh mai a, ka thaw pawh a veng huai. Jakob-a rawn lèn lai hi chuan tu mah hi rawn kal lo se, min hmu dùn lo se ka ti, mi hian a nihna tak hi an hre ve vek àwm kher si lo va, chuvàng tak chuan rinhlelhna tùr awm hauh lo Zodina hian sawisep kai lo se ka duh a ni.

Titi dang tehchiam kan nei lo, Chapchàr Kût lo awm tùr chungchâng chu ka zâwt a, ani pawh chuan phûr takin min chhâng zêl a.  Football khelh nuam a tihzia leh a phùr țhinziate chu a sawi siam siam a, a hmêl, mitmeng leh țawng dàn ațang pawh chuan ka lo hre ve thei hialin ka hria! 

"Tlaiah hun remchâng i neih veleh kan practice lai pawh min la rawn en ve ang chu, tiraw? Chapchàr Kût nîah phei chuan office pawh i chàwl ve ngei ang a, nilëngin field-ah hun kan hmang ang chu," a tih chuan," Loh theih nâng! Naupang lâm tùrte pawh kha ka en châk tawh asin, an hmuhnawm ngawt ang," ka lo ti ve a, ani lah chuan," 'In inkhèl pawh' ti ve tal la, naupang lâm chauh i sawi lang bîk a," a lo ti nang nang a, a thil sawi dàn chuan ka nuih a tiza kher mai.

Tlai khat chu Pu Zîka damlo kan kàwi pah chuan field-ah chuan ka dâk pah ve a, field bul lawk hi Pu Zîkate in a nih vàngin han dah ve lawk pawh chu a remchâng êm a ni. Inkhèl en ve dang pawh ka hmu nual a, keimah chauh ka ni bîk lo tih ka hmuh chuan ka nui deuh sak a. Ka han hawi kual a, Jakob-a ka hmuh àwm pawh ka hre lo, ka hmu mai lo nge ni zâwk; mahse, ka en kual ngial pawhin ka hmu chuang lo, ani hi a practice lo a ni ngei ang, a hman lo ve te pawh a ni mahna!

Haw pah chuan dàwrah ka pêng kãwi leh a, Alu leh artui ka lei a, pawisa kan inpêk lai chuan Arini a rawn lût ve a, min rawn hmuh chuan a nui deuh sak a, dàwr neitu chu a be zui nghâl a. Min nuih khân hlim vànga nui niin a lang lo, polite vàng a ni zâwk ang chu, kan inbe ngai lêm lo va, inbe ngai tùr pawhin kan inhmu ngai êm êm lo bawk, inkhâwmnaah hian a ni deuh mai a, inbe lêm lo hian kan innuih sak mai țhìn a ni.

A tûka Office-a U Ropuia nèn kan țhut lai chuan Pu Zuala a rawn pên lût chhat chhat a, ka lo chiau-au vat a, țhutna lo kawh hmuhin a duh leh mamawh ka lo zâwt nghâl vat bawk a. Ani chuan," Tluangte, nang nula mawng zãngah, min han tlàwmngaihsak leh mai la ka tia. Zodina khua a sik tlat mai a, a tho chhuak peih lo bawk nèn, ka rawn ko tawp mai che a ni, thisen rawn lâksak la ka duh a, ani phei chuan a duh miah lo ang a," a han ti charh charh a, muangchâng hian țhutna ka kawh hmuhah chuan a țhu zui nghâl a.

"A va zia lo ve aw... Engtik ațangin nge a khua chu a sik a?" tia ka zawh chuan," Zàn hnih zet chu a ni tawh, i lo kal thei ang tiraw?" a lo ti leh a, kei chuan," Aw, thei e, ka hman reng alawm," ka ti a, ka tho chhuak zui ta nghâl a. Thil țûl tùr la zuiin U Ropuia hnênah chuan ka kalna tùr chu ka hrilh a, pu ber meuhin min rawn ko si a, ngaihpawimawh loh theih pawh a ni lo.

Inah chuan mi dang an lo awm lo niin, Pu Zuala chuan," Mi dang tirh mai tùr an awm si lo va, ka rawn kal tawp mai a ni," a ti charh charh a, kawnga a kalna chu a la hah deuh a ni ang, a la thaw ham ham reng a, ka lo kalpui chak deuh a ni maithei a ni.

"A nih tak chu maw le, i tlangvâl hle mai; mahse, kan kal chak deuh mah mah a nih hmêl," tiin ka han nuih a, chutah," Khawnge Zodina chu a awm a?" ka tih zawm zat a, ani chuan in chung lam chu kâwkin," A room-ah a mu a," a lo ti ve mai a. A hahdam deuh hnu chuan in chung lamah min chhohpui ta a, Zodina room ni ngei tùr kawngkhàr chu a han kik dat dat a, a hawng zui ta nghâl a.

Khum zau angreng takah chuan Zodina chu a lo mu bâm a, min hnungchhawn zâwngin a lo mu a, a pu nèn kan lút pawh chu min lo hmu thei lo ngei ang. A pu chuan a han ko a," Hei, Tluangtei a rawn kal a, i thisen kha lâktîr ila?" a han ti a, a lo muhìl lo a ni chêk ang chu, muangchâng hian a rawn inher a, min rawn hmuh chuan," A ngai lo asin, ka pu leh ngawt țhìn hi chu aw," a ti sap a, a pu lah chuan," Ngai lo ti ziah suh, i khawsik chhan hriat a ngai alawm," a lo ti thung a.

Thawh a tum chuan," Thawh kher a ngai lo a nia, mu hahdam rawh," ka lo ti vat a, ani erawh chu a rawn țhu chhuak ta tho a," Engtik ațangin nge i khua chu a sik a?" ka tih chuan a pu chuan," A inkhelhna kha a nih ka ring, a taksa rawl lutuk vàng a ni ber ang chu," tiin min lo chhâng vat a. Thisen lâkna hriau ka phawrh chhuah chuan a lo tîm deuh chãwih a ni tih ka hmu nghâl a, hriau hi a hlau a ni chiang mai, ka nuih a tiza angreng khawp a, han nuihna chi lah a ni meuh si lo.

Thisen ka lâksak hnu chuan a pu chuan," Asha pawh an awm ve reng tih chu ka hria; mahse, nang hi chu ka ngam tlâk ve tlat che a, chuvàng a nia ka rawn koh nalh che ni," a lo ti leh a, kei chuan," A pawi lo, a dik reng alawm, min rawn ko zêl rawh," ka lo ti ve vat a. 

A pu in hmuai lama a chhuk hlàn chuan," Ka pu khân a rawn koh che ka ring pha miah lo va," a ti sap a, kei chuan," A țûl a nih phawt chuan min rawn ko hmiah zél rawh se, inthlahrunna tùr a awm lo, bâkah, min rawn ko tùra rawn kal kher ngai lovin, awlsam zâwkin phone-ah min rawn hrilh mai tùr a nia, kawng a thui tham ve si a," ka lo ti ve thung a. Thâwk a han la hap a, meng hnuai deuh raih chung hian," Phone ka unlock thei lo alawm," a ti ta sap a.

Ni dâwn tak! Jakob-a khân a lock a nih kha, thlalâk delete a nih vàng leh a rawn lèn laia Arini'n a rawn phone vàng khân a thin pawh a rim viau a nih tak kha. Zodina chu ka en reng a, ani pawh chuan a hmui chu a pet fan fan a, chutah," Ka dawhkàn bula drawer kha han hawng lawk mai ta che," tiin meng dul raih hian min rawn en a, a kawhna lam chu enin ka va hawng ve nghâl a, paper hi a lo awm a, la chhuakin ka pe nghâl a, ani erawh chuan," Chhiar rawh, kha kha min hnutchhiah a nih kha," a ti leh sap a, paper vár thianghlim taka pentui sen ngata 'THLALÂK LEH PHONE NUMBER HI LO DELETE TAWH NGAI SUH ANG CHE' tih hawrawppui ngata inziak ka han chhiar chuan thil awmzia ka hre thiam nghâl uar a; mahse, lo delete leh pawh tum se a lock tlat tawh a, tihngaihna a vâng àwm e.

"Zawh chhuah ka lo tum chhin dâwn nia," ka tih lai chuan a pu chu tray chawiin a rawn lût a, ka lo pui vat a," A ngai lo asin le aw, ka tibuai hle mai che, a tui ngawt ang," ka lo ti sawk sawk a, ka thil sawi kha a rawn hriat hman loh hrâm ka beisei. Zodina hian a chhûngte'n a natna vei hi an hriat leh hriat loh kha min hrilh miah lo va; mahse, hre chiah lo pawh ni se rinhlelhna chu an neih ve tho ka ring a ni, a awm dàn inthlâk hi hre bertu an ni dáwn si a.

Min siamsak tawh miau si a, in sak loh chu thil mawi pawh ni nghâl lo chuan, kan han in ta poh a. Thingpui in lai chuan Pu Zuala chu a titi suam suam a, ka lo inrawlh zauh zauh tih lohah chuan Zodina chu a țawng ve hauh lo, a meng kun deuh lap reng a, nuam a ti vak lo a ni ngei ang.

*******

Zodina result chu a țha vek a, amah pawh a zia chho ve ta bawk. A khawsikin a kiansan a, vawi khat ka va tlawh leh hnuah phei chuan ka tlawh leh tawh lo, a number ka nei a, ka phone zâwk ta mai, a chanchin ka záwt chauh tak tak a ni. Bialnu nei lai a ni a, ka fîmkhur ve a ngai a ni, thil an hriat chian loh phei chuan keimah zâwkin ka phone hmasa si a, ka ngaizawng emaw tiin buaina a awm thei, Jakob-a nèn kan awm dùn an hmuh hlauh phei chuan... Thil nihna dik tak an hre ve dâwn dèr si lo va, fîmkhur theihtàwpa ka fîmkhur a ngai a ni.

Mahse, ka fîmkhur ve riau nia ka hriat chu a ni lo lamah a rawn inher lét ve ta thung a. Inrinni chawhnu dár 2 vêl a nih ka ring, ka inah Zodina a rawn kal a, ka lo hmuh veleh chuan," Lo kal rawh, kha, i va dam țha tawh tak ve! Lo țhu rawh khai, eng nge i duh ve tâk mial a?" ka lo ti vat a, țhutna ka kawh hmuh bawk a, a lo kal tâkah chuan tiin ka buhfai hai lai chu dawhkànah chuan ka dah rih a, țhu ve mai tùra ka rin lai chuan a țhu ta miah lo, a din tlat avàng chuan ka en chho leh rih a, min lo en kur reng a, Zodina a ni lo tih ka hre ta chiah! Thuamhnaw vâr lam hlîr a ha țhin kha a ni sia, tunah lêm, a vár a ha miah si lo!

"Eng thil nge thleng a?" ka ti ta ringawt a, Jakob-a ni lovin Zodina emaw ka tih vàng a ni. Ani lah chuan min melh rùn chung chuan," Eng thil nge thleng i hre záwk ang chu, eng vàngin nge kha pa kha i biak a?" a rawn ti ta! Makti tak leh a ngaihna hre lo tak chuan ka en reng a, ani lah chuan," Min chhâng rawh, eng vàngin nge kha pa kha i biak? I bia tih zawng, pha duh hauh suh," a lo ti leh nghut nghut a.

Engtin nge maw a lo hriat ni? Khawi ațangin nge a hriat? A hriat theihna tùr àwm ka han ngaihtuah kual thuak thuak a, a phone a check a ni ngei ang, chu pa mai mai chuh!

"A dam loh vàngin a chanchin ka zâwt a nih kha," ka ti ta ringawt a, a dik chiah bawk a.  Ani erawh chuan," Chu chauh chu maw? Thil dangte?" a lo ti leh a, a awka chhuak chu a nèlawm loh bâkah a mitmeng mawlh chu, thinrim tih hriat tak hian a rum ùl mai a, a hmel pawh a lang chang bàng mai, a lang hlauhawm thei hial a ni.

"A chanchin ka zâwt ka tih chu, ka hna a ni tlat alawm," ka ti leh a, hlau ru deuh hlek mah ila hlau angin ka awm duh lo va, thinrim pawhin ka chhâng lêt chuang lo, awka pângngai thei ang berin a ni ka chhàn ni. A hmêl a rum si a, thinrimin ka chhâng lêt duh teuh lo, tuna a lan dànah phei hi chuan kut min thlâk mai pawh hreh lo hmêl a pu hialin a nia ka hmuh ni!

"Tak tak a ni em?" tlêmin a awka chhuak pawh a rum lo deuh, melh lét ràn pah chuan," Ni e, i phone kha han en lêt leh mah la, kan inbiak hun chhûng rei zâwng pawh i hmu ngei ang chu, minute khat vêl bâk a ni lo ang," ka ti kalh kalh a. A phone chu phawrhin a check a ni ngei ang, min rawn en a," I tidik chiah, ka thaw a veng deuh huai e," tiin a rawn thaw chhuak hawk hawk a, chutah, min rawn pan hnai deuhin," Zonun, min hre thiam rawh aw, kha pa i biakna ka hmuh khân ka rilru a hrehawmin min tihrehawm vek a, thâwk pawh ka thaw țha thei lo hialin ka hre nghe nghe asin," a ti leh sup sup a, a âwm chu dawmin," Ka thin a rim a, min phatsan ta emaw ka ti hial a," a ti leh sup a, thâwk a han la leh kâwk a, a awm dàn chuan a ngaihna min tihre lo viau mai a, a mitmeng leh hmêlah ni se, dâwt sawi hmêl pawh a puin ka hre lo.

"I bialnu pawh ka ni rêng rêng em maw--" ka sawi zo hman lo, ka bân tawn tawnah chuan min rawn vuan nghâl chawt a," Ka bialnu i ni, nang bâk bialnu ka nei lo, he khawvêla ka duh awm chhun i ni, nang pawhin min hnar thei bîk lo ang, a ni em? A ni tiraw?" a rawn ti ta mawlh mawlh mai a, a chêt dàn teh thut chuan min tihamhaih zo a, mit khap nachâng pawh hre lo chuan ka melh chho hau ringawt a. Min rawn din hnaihin kan inen chiang dun bawk a, a mitmenga min duhna tinrêng lang chhuak chu hmu theiin ka inhria!

Ka kut chu la kãngin a âwmah a nghat a,"Ka duh che, Zonun, nang chauh hi ka nunna i ni a, chuvàng chuan mipa dang an rawn inrawlh hi ka phal lo, ka phal ngai lo ang," a ti leh sup sup a, a thinphu dat dat pawh chu chiang takin ka hria, dâwt a sawi ka ring miah lo, mi tak tak ni hlauh se aw...

"Tluangte, Tluangte???..."

Pâwn lam ațanga ka hminga min rawn ko ri ka hriat avàng chuan ka hawi chhuak ta nghâl a, kan boruak ațanga harh chhuak nghâlin ka kut chu ka la sawn vat a, kal sawn nghâlin kawngka chu ka hawng a, Kimi'n ka in piah deuh ațang chuan min lo ko niin, ka va che sual teuh tak!

"I awm lo emaw ka ti țêp a, zanin chu inkhâwm bànah lêng lawk ang aw, min lèn kualpui lawk la?" a rawn ti a, ka thaw huai mai.

In chhûnga ka luh leh hnu chuan pãngngai takin ka awm thei ta a, ani pawh chu țhutthlèngseiah țhu duaiin ka che vêl chu min lo en reng a, thingpui ka siamsak a, ka va pêk chuan," I va fel tak êm aw!" tiin min lo chhaih fiam a, chutah,"I rem tih chuan i phone ka lo en thei ang em? Message chhiar rûk ka tum miah lo a nia, eng thil mah ka tidanglam lo bawk ang," a lo ti a, kei chuan," Chuti, eng atân nge en i tum si?" ka ti ve thung a, ani chuan," Ka hming i save dàn ka en duh," a ti ta a.

Thil ka hriat chhuah zawk avàng chuan ka nui deuh sak a, hei bâk bâka hun remchâng hi a awm thei lo ang. Phone chu lain ka pe a, ani chuan," I lock tlat a, hawng phawt la?" a ti a, kei chuan," Hawng ve mai rawh, ka pattern chu L a ni mai," ka ti thung a, a hreh deuh hlek a ni maithei, min rawn en a, nui chung hian," A ho êm mai, ti mai mai teh," ka lo ti thung a.

*A HMËL A DANGLAM A NI THEI, A INCHEINA LEH KHAWSAK PAWH A DANGLAM A NI THEI; MAHSE, A NIHNA DIK TAK CHU A DANGLAM VE HAUH LO ANG*