☆THE SWEETEST HANDCUFFS☆ - 13 By Dingdi Pachuau

 ☆THE SWEETEST HANDCUFFS☆ - 13 By Dingdi Pachuau

A phone chu a khawih leh phawt a, ka number a hmet chhuak a ni chêk ang chu, ka phone chu a ri ta ral ral a, miin min rawn phone emaw tiin ka en ta vat a, ani erawh chu a lo nui suk thung a," Ka hming i save dàn chu ka duh chi tak!" a ti sup a, a  hmet tàwp zui ta nghâl a. A hming hi 'Jakob-a' tiin ka save lo va, mi bula ka awm laia min rawn biak palh thut tâkah tiin an hriat loh nân 'J-a' tiin ka save  zâwk a ni si a, ka save dàn rilru tak chu hria se chuan a lãwm vak kherin ka ring lo. 

"Ka save dàn che hi han en la?" a tih chuan ka en ve mai a, 'One & Only Kawaī Z💝' tiin min lo save teh rêng chu niin!!! Z chu Zonuni tihna a ni ngei ang a, Kawaī a tih kher chu eng tihna nge maw ni, miin lo hmu palh ta se keimah ka ni tih an hre kher bîk lo ang chu maw.

"Țha i ti em?" a tih leh chuan ka nui ringawt a," Nangman țha i tih phawt chuan a țha vek mai," ka ti zui a, nui sukin a han bu nghat a, chutah," Ka hming i save dàn kha ka tidanglam hret ang aw, pakhat chauh ka belh ang," a ti a, ka lo 'aw' mai a, a duh phawt chuan belh mai mai teh se, a edit leh theih tho alawm.

Ka phone a khawih lai chuan," Phone lock nân khân pattern ve tho em ni i hman a?" tiin ka han zâwt chhin a, ani chuan," Pattern hi chu ka hre rei thei lo va, ka hriat rei theih tùrin i hming leh ka hming ka kai kawp mai a, ka theihnghilh mai mai lo tawp ang," nui suk chung hian a lo ti a, ka phone chu a khawih chhunzawm mawlh mawlh a. 

Ka hming leh a hming a kai kawp, hriat reng a ngai dâwn a nih chu. Engtin chiah nge a ziah tih chu ka hre hauh lo; mahse, ka hre thuak tawh a, Zodina'n a risk ve tawh mai ang chu.

"Zanin chu inkhâwm ila?" tiin ka han sâwm chhin a, ani chuan," Inkhâwm hi chu ka chikat hlauh ka tih tawh kha; mahse, min sàwm tlat chuan ka zui peih maithei che a ni," a ti a, ka phone chu a khawih duh tâwk ta a niang, dawhkànah chuan a dah zui nghâl a. Kei chuan,"Min zui rawh, sangha mantu-ah ka siam ang che," nui chung hian ka ti a, ani pawh chu a lo nui ve hawk a.

Zànah chuan a rawn inkhâwm hlei lo va, a rawn kal ka ring lo sa ve tho bawk. Inkhâwm bànah chuan Kimi ka zui a, Biak in thlanga in lian fahran loah chuan kan lêng lût a, mi dang lêng be pawh an lo awm nual a; mahse, kum upa lam hlîr an lo ni a, putar pakhat phei chuan min hmuh ngai loh vàng nge, min lo fiam hlut zui a, kan nui dar dar mai. Nu ber chuan vaihlo a lo zial a, chu chu Kimi chuan țàwnsakin eng eng emaw an sawi a, kan awm rei phian zui a, kan haw meuh chuan dâr 9 a pèl tawh! Haw kawngah chuan Kimi chuan Pi Dâri bula awm tawh chuan kalsan leh nghâl mai a harsat thu chu a sawi sap sap a, ka hmuin ka hre thiam khawp mai. A tlai ve viau tawh a nia; mahse, Jakob-a'n min lo la nghâk! Veranda thim chinah lo dingin ka haw hun chu min lo nghâk reng a lo ni a!

"Engtia rei nge i lo din tawh?" ka tih chuan,"Nula lêng rei chu ka nghâk chhuak zo dâwn ta lo che emaw ka ti a!" tiin min lo chhâng thung a, miin min lo hmu ang tih ka hlauh avàng chuan in chhúngah ka luhpui ta vat a, ani erawh chuan,"Ka țhu lo ang, i lo haw hun nghah chhuah che ka duh vàngin a nia ka lo la awm ni, mut hma pawh i duh ve ang," rin loh deuh chuan a ti ve khauh mai a, mak tih vàngin ka en hâ a.

"A va mak àwm teh tlat ve!" ka ti nghe nghe a, a khi suk ringawt. He pa hi ka hre chiang viau lo na hian ka hlau lêm lo va, a thin a rim loh chuan ka tihna a ni. A hmel leh a taksa hi mi hrang pathum (ka hriat leh hmuh tawh chinah a nia ka tih) angin rawn awm țhìn mah se, amah ber (Jakob-a) hi chu min hre hmasatu leh min pawh hmasatu a ni a, rilrua a thawh dàn hi a dang lo thei lo a ni. Mi tân chuan hlauhawm pawh chu a lo ni maithei a; mahse, kei chuan hlauh ngaihna ka hre hran lo, bâkah, mi dang, Valpuia leh Zodina pawh ka hre ve ve tho a, Zodina phei chuan Jakob-a ang chiahin a chanchin pawh min hrilh ve nual tawh nghe nghe a nih kha, hlauhawm zâwng leh min tihnat tum zâwngin an awm lo va, chuvàng chuan mi hrang țhiau ni țhìn mah se ka tân zawng an hlauhawm tlat loh a ni.

"Ka duhna chauh ngaihtuah ni ta ila chuan i rethei ngawt ang!" a ti sup a, chutah, chiang zeta min enin," Mut hmaa i hmel hmuh leh duh vàng hrim hrimin ka lo la nghâk che a ni, tunah chuan ka hmu ta bawk che a, a tlai tawh bawk nèn, ka haw tawh ang e; mahse, min thlah la?" a ti leh a, min en vang vang hi chuan awm ngaihna hriat a har țhìn ka ti. Ka taksa chhûngril zawng zawng leh ka rilru thleng hian min en tlang vek ni berin ka hria.

"I tih tlat si chuan le," ka ti a, thlah tuma ka inher chu min lo chelh vat a, a lam hawia min kuaiin," Ka nghâk rei bawk che a, ka phû ve chuan ka hria," a ti sup a, rawn kûn hniamin ka chalah chuan a rawn fâwp ta zoh a, ka rin loh dàn deuha a chêt avàng chuan ka ding khawng reng ringawt a, amah vêk chuan," Pâwn thlenga min thlah a ngai lo ang, min zui chhuah hlauh chuan ka luhtîr phal tawh lo palh ang che," a ti leh sup a, chutah," Mut tui sûk sûk le," tiin dìm tê hian min thlah a, a chhuak zui ta nghâl a.

Second rei vak lo chhûng chu tihdanglamin ka awm! Ka che lo va, ka țawng hek lo, thlahna thu pawh ka sawi miah lo. Khatianga hnaia min dinchilh kha chuan, ka sawi thiam dàn ber chuan a zùnin min phuarin min aikaih a ni ber ang chu, ka che lawk thei ngai lo, a rim a tuiin a rimtui hman rim chuan mi a hîp ngawih ngawih zêl mai si a, kha vàng khân a ni ngei ang, ka chét lawk theih loh ziah ni.

Message tone-in min tiharh zawk a, ka che sawn ve ta chauh a ni. Ka phone ka han en chuan amah tho a lo ni a. 

*Next-ah chuan...*  tih tê mai hi a lo ni a, ka chhiar nawn leh a, a sawi awmzia ni àwm chu ka hre thiam ta vat a, ka ngaihtuah zâwng ringawt pawh chuan ka biang a rawn sa hat hat thei nia! Kei hi ka dik tlat lo, ka ngaihtuahna hi a hrisêl lo a ni, hetianga awm tùr hi ka ni lo asin, amah dik tak pawh a ni lo tih ka hre sa reng si a.

Kan inhmu lo leh ta vang vang a. Thil awm dàn nia ka hriat tâk chu ni khat leh zàn khat ang hi Jakob-a hian Zodina taksa chu a rawn luah a, chutiang a nih loh vêk pawhin hun rei vak lo chhûng chauh a ni, a túk lamah hi chuan Zodina pângngai kha a rawn ni leh țhìn niin a lang. A chhan chu Jakob-a rawn nih tawh phawt hi chuan hmuh tùr hian a rawn inlâr ve ziah a, chhùn lama ka hmuha zàna a rawn lèn hnuah, a tûk lamah hi chuan hmuh tùr awm zui lo hian a reh leh vang vang țhìn tlat a ni. Chuvàng chuan, a rei berah ni khat leh zan khat chhûng bãk hi a awh meuh lo tih hi ka pawm dàn a ni.

Pathianniah Biak inah ka hmu a, Biak ina ka hmuh dànah Jakob-a a nih erawh ka ring lo nghâl mai a, a dik ngei bawk tih inkhâwm bàna pâwna Arini nèn an ding dùn ka hmuh chuan ka hre zui nghâl. An inkâr a buai lo hi ka lãwm a, hmeichhe dang chu ni se buai neuh neuhna tùr hi a awm ve nual tawhin ka hria a, Thênzawla a rawn kal chungchângahte pawh khân, buaina an nei lo a nih pawhin Zodina thil sawi, a insawi fiahna a ring tihna a ni mai a, hei, tûn thlengin an la buai lo tihna a nia, an induh tawnin an inhmangaih tawn viau a ni ngei ang. Chuan, Arini pawh hi hmeichhe fel tak a nih ngei ka rin phah ta bawk.

Ka rin phâk miah lohin Zodina chuan min rawn ko ta tlat mai a, an lam chu ka hawi vat a, anni pawh kan lam panin an rawn phei dùn ta, Arini nèn an awm dun lai kher hi chuan biak ka duh lêm lo asin le, lo biak duh loh theih tawh hek lo le, nui hmêl puin ka lo en a, Kimi chuan a lo be vat a.

"Nangni pahnih hi chu aw..." nui chung hian a lo ti a, Arini pawh chuan," Kan inhmeh rawl rawl lo ti viau teh suh," nui sâng chung hian a lo ti lêt ve nghâl a, kan bul an rawn thlen chuan dingin Zodina chuan," A inthlahrunawm viau nain ka puin min chah tlat si a, chawhnu lam chu i hman chuan,' Rawn lêng teh se, ka ngai riau mai, thil eng emaw zawh tùr ka nei pah bawk a,' a ti che a," a han ti dam dap a, ka chhàn hma chuan Kimi chuan," A  lo ni maw! A țhutna a ruak ka lo ti rêng a," a lo ti vat a, Zodina chuan," A, chutia damlo nâ pawh chu a ni lo, a peihsam chiah lo a ni ber ang chu," a ti sap a, Kimi chuan," A nih chu, a zia lo hle mai, kum upa lam a ni ve tawh bawk sia, a taima in a hrisêl zâwk ngawt mai ka lo ti țhin a," a ti leh a. Zodina chuan," A nawmsam vak loh hi chuan damdawi lam hria hi a lam chûl zêl țhìn a, chuvàng a nia, Tluangtei pawh hi a lam sek ni, a ngaisâng a," a ti leh a, Kimi chu a han nui var var a," Țhiani hi chu, a luck thei a nia! Ani hi zawng tlangvâl mai ni lo, putar chen hian an ngaina mai a, eng emaw tak a awm a niang, a țha lo dâwn tlat," nui sûng chung hian a lo ti a, ka nui ve ringawt a.

Arini chuan Zodina bân chelh pah chuan," Chu, putar lamah pawh a lo tla na viau elo?" a lo ti ve a, kei chu lo inrawlh ve ta vatin," A ti ve mai mai a nih kha," tiin Zodina chu ka en a," Aw le, ka lo kal dâwn nia, a damdawite a ei țha ang chu maw?" tiin ka han zâwt zui zat a, ani chuan,"Ei țha e," a ti phawt a, chutah," A upa ve tawh a, a damlo pawh a ni chiah lo, a dam țhat pawh hian ngaihsak lo deuh nia a inhriat chuan damlo ni hian a inhre tlat țhin a," nui deuh sak chung hian a han ti a, nui chung hian ka lu ka lo bu nghat a," I rawn en ang a, a dam țha a ni tih i hrilh chuan dam țhaah a inngai theiin ka ring," a ti leh a.

Kimi chu ka sâwm ve a, kal pah chuan a titi barh barh chu ka lo ngaithla reng a, khua a lum chhoh ve tawh avànga tui a tlèm tawh thu chu sawiin," Naktûk chu, luiah lo kal ve la? Tui a tlêm tawh a, a nuam viau tawh asin," tiin min han sâwm a, kei chuan," Ka châk ve reng; mahse, duh duhna hmuna thên thei ka nih loh hi, ka châk vezia chu a," ka lo ti vat a, ani chuan," Ni dâwn tak! Kâr tàwp lamah kan kal dâwn nia, office kài ní chuan i tân zawng a tihchi loh, țha taka office i kài tluk hi a awm lo, i hna rinawm taka i thawh hi a Pathian thu êm êm a ni," a ti leh barh barh a.

Pu Zualate ina kan va luh lai chuan an lo awm ve nual a, thingpui an in lai tak a la ni zui a, Arini pawh ka hmu tel bawk. Zodina chuan min lo hmuh veleh chuan lo dingin min lo chiau-au vat a, Kimi pawh a țawng nghâl bawrh bawrh mai, kei erawh chu tlêmin ka tîm deuh a, min biak erawh chuan țha takin ka chhâng lêt tho a.

"Ka pu chu a room lamah a awm a; mahse, a hmanhmawhthlâk loh a nia, thingpui in phawt r'u aw," tiin tu emaw hi a ko a, thingpui no hnih siam tùr chuan a hrilh nghâl bawk a, hnial hman pawh a ni lo, an bul hnaihah chuan kan țhu ve ta rih a. Mi dang chu an titi chhunzawm leh bawrh bawrh a, chhûngkhat hnai vek an nih leh nih loh ka hre lo; mahse, an inngamin an infiam bawrh bawrh a, an țawng dàn ațang chuan inkàwmho țhìn an nih ngei ka ring teh ngawt a.

In lamah thingpui in tho mah ila min pêk tâkah chuan kan in leh a, kan in zawh chuan a pu room lamah chuan min hruai a, Kimi leh Arini pawhin min rawn zui ve bawk a, a pu chu khum bula chair-ah chuan lo țhuin, tarmit vuahin lehkhabu hi a lo chhiar a. Min lo hmuh veleh chuan," E, in va zahawm khup khup ve? Kimtei pawh i lo tel ve thei a ni maw? Sàwm kher loh hi chuan min rawn tlawh in tum mang si lo va, lo țhu r'u," tiin țhutna chu min lo kawh hmuh zui nghâl a. Kei chuan,"Ni e, beng hi a vár lo lutuk a, i lo damlo tih pawh kan lo hre pek lo va," ka lo ti a, khum bula long chair-ah chuan ka țhu zui nghâl a, Kimi pawh chuan," Ni e, biak ina i țhutna lam ka ena ka hmu lo che kha mak ka lo ti rêng a, i lo dam țha lo reng niin, inkhâwmnaa hmuh tùr i awm loh hi chuan engtizia nge ni ang aw ka lo ti țhìn a," a ti barh barh a.

A bp ka check-sak a, khawsik a neih leh neih lohte pawh chu ka check vek a; mahse, țhat lohna a nei lo, a lo țha vek. Zodina thil sawi kha ka hre chhuak zawk a,"Ka pu, thingpuite i in ve tawh em?" tiin ka han zâwt a, ani chuan a in tawh thuin min chhâng a. Kei chuan," Peihsam lo chung chuan lehkhabu hi chhiar loh tùr asin, chhiar i duh chuan ka lo chhiarsak dâwn che em ni ang?" ka han ti leh a, phûr tih hriat fahran hian ani chuan," I peih phawt chuan le," a lo ti vat a, chutah," Bawiha, lo va chhuak tawh ula, heta in awm ve reng zawngin inlêng dangte khân nuam an lo ti lo palh ang," a ti leh a, Kimi pawh tiamin an chhuak ta dial a.

Khumah țhu-mu deuh chuan a awm a, chair chu khum lama pawt hnaiin ka țhu sauh sauh a, ka chhiarsak ta zar zar a, Upa Thuhla thla hmasa chhuak a lo ni a, ngaihnawm tih hmel zet hian ngawi rengin a lo ngaithla a,  ka la chhiar ngai loh chanchinbu a nih avàng chuan kei ngei pawh chuan ngaihnawm ka ti ta phian mai a. Article pakhat 'Sazuk kah thu' tih phei chu ramhuai lam a tel deuh lehnghâl a, âwih chiah lo mah ila a ziaktu lah chuan 'Ka tawn ngei' a ti ve tlat bawk a, ka chhiar zawh chuan ka chàwl deuh hlek a," Ka pu, a tawn ngei a nih i ring tak tak em?" tiin ka han zâwt chhin a, ani chuan meng duar duar chung hian,"Patling țhankin zet tawhin dâwt thu a ziak dâwn em ni?" a lo ti thung a, kei ve thung chuan," A, a mak êm a, ka âwih chiah lo deuh hlek a ni," ka ti leh a, ani erawh chuan," A tak a ni thei ang, khatiang deuh hlek kha ka tlangvàl laiin ka tawng ve tawh a ni,"  a lo ti ve leh a.

Phâwk zet hian ka en a," A ni maw?! Chuti, ka pu, i tawn chu ziak ve la, chanchinbuahte hian chhuah ve ta la? A taka tawn ngei chhiar phei hi chu a ngaihnawm piah lamah a ngaihlutawm bík a," ka ti vat a, a hmai vun chuar nâng chuan a han nui sak a,"Chutiang lam chu ka lo la ngaihtuah chhin ngai hauh lo nia, i han sawi chhuah tâkah chuan thil àwm lo tak pawh a lo ni miah lo," a lo ti a, chutah, min rawn enin," Miin an lo chhiar duh ve i ring chiah em?" thutak zet hian a rawn ti charh a. Kei chuan," Ring teh rêng mai, nichina kan chhiar pawh kha ngaihnawm kan tih êm kha, thu pângngai tak tak ai chuan hetiang lam hian mi bengte hi a verh duh asin, ziak ve chhin tak tak rawh aw," ka ti sauh sauh a.

Chutiang lam sawi chuan kan titi zui zêl a, kawngka rawn rìin Zodina a rawn lût a, a pu nèn chuan kan lo en rual ve ve a. Apple zai sa hi plate-ah rawn kengin kan țhutna bul dawhkànah chuan a rawn chhawp a, țawng lêm lo chuan a chhuak zui leh mai a, a chhuah hnu chuan plate chu lain Pu Zuala lamah chuan ka han ban phei a, lêp khat chu a lo la ve mai a, ei nghál mai lo chuan," Kan pahniha ei tùr a nih kha, nang pawhin ei rawh, i ei loh chuan ka thil hrilh tùr che pawh ka hrilh lo ang che," a ti a, a thu chu hnial lovin pakhat chu ka la ve nghâl zat a.

Kan haw tùr chu mi dang chuan an veranda thlengin min thlah a, Pu Zuala erawh chuan an compound tàwp thlengin min thlah thung a, kan ințhen dâwn chuan," I hman hunah min rawn tlawh zauh zauh rawh aw, Kimtei pawh ka ti tel che a nia," a han ti a, "Aw le, teh rêng mai," tia kan chhàn hnuah chuan kan ințhen zui ta nghâl a.

Zodina kha a phone password hrilhna hun ka nei miah lo va, a phone chu a la hmang thei lo chhunzawm rih mai a ni ang chu. A buaithlâk ve khawpin ka ring, engtin nge Arini bulah a sawi ve ang aw? Ti ila, a chanchin hi a hrilh ve vek tho tak ang chu maw le, ani pawh hian hetiang hi a ni tih hre vek chungin a kawp chhunzawm zêl a ni ngei ang, ni e, hmangaiha hre thiamtu a mamawh alawm, Arini phei chu nula fel tak a ni lehnghâl a, hmeh pawh an inhmeh viau hi.

A pu thil sawi chuan ka ngaihtuahna a luah zui rauh rauh a, mak ka ti a, zàn inkhâwm chhûng zawng pawhin ka ngaihtuah zui nia maw le! Eng a ti nge ka hre bîk lo, heti tak hian min ringin min nêl ve êm êm mai chu a nia, a tupa duh tak Zodina chanchin a hriat zawng zawng te hial min hrilh kha a nia; mahse, tu bulah mah ka sawi chhuak lo ang, thlàna ka liam thlenga ka vawn tùr thu a ni min hrilh ni.

A tûk lamah Office-ah Zodina chu a rawn lêng lút a, Zodina a ni tih ka hria a, ka lo be vat a, a duh zâwtin a pu chanchin chu ka zâwt vat a, ani erawh chu U Ropuia a awm ve vàng nge, a țawng tlêm angreng a; mahse,  kazawhna erawh min chhãng zêl thung a. U Ropuia kal sawn lawk hlàn chuan a phone unlock-na tùr ka hriat theih tâk leh hriat theih tâk loh chu min zâwt ta sap a, hei vàng hian a rawn kal a ni ngei mai, ka hriat ang chuan ka hrilh nghâl vat a," Chutiang bâk chuan ka hre bîk lo va, i risk fuh a ngai dâwn a ni," nui chung hian ka ti a, U Ropuia rawn țhut hnu rei vak loah chuan a haw leh ta a.

"Nula i la ni bawk sia, hetah hian pasal i neiin ka ring tlat," U Ropuia'n a tih chuan ka nui hak a," Teh ngawt chuan, nula ka nih avànga heta pasal ka neih rin ringawt, tu hianin nge min duh se i tih a?" ka han ti lêt a, ani chuan," Hetiang hi hna an thawhnaah hian nupui pasal an nei duh châwk a nia aw, lo ngai reng mah rawh, tlângvâlho hi an mãwl viau a nih loh chuan an chhuah miah lo ang che, chhuah atân chuan i uiawm lutuk," a lo ti leh a, a thutak nasa mai si a, ka nuih kar kar reng a.

Zodina pawh chuan a phone chu a hawng thei ta a ni ngei ang, min rawn be zawk a," Min hriat thiam mai zêl ka ngai a nih àwm hi," a rawn ti sap a, kei chuan," E, hre thiam e, engah mah ngai suh," ka lo ti ve a, phone a han check ang a, a rilru a hrehawm ve ngawt ang, lehlamah Arini a awm ve bawk si a, invêng reng leh hlauthãwng rêng rêngin a hun a hmang dâwn si a, a khawngaihthlâk roh ka ti.

Zan khat chu ka inah Zodina a rawn lêng ve teh tlat a! A inthuamna leh a awm dàn ațangin ka lo hre nghâl vat a, ka lo be sawk sawk a, thingpuite ka pêk hnuah chuan inthlahrun hmel tak chuan Jakob-a chungchâng chu min zâwt a, ka chunga a awm dàn, a nungchang leh awmphung hrim hrim chu min zâwt a ni ber ang chu, kei pawh chuan ka hriat ang ang chu ka hrilh ve zêl a, a thinchhe ve deuh hlek țhìn tih ka hrilh lai chuan," Ka ring a ni, i hlau țhìn em?" a lo ti vat a, kei chuan," Hlau hran lo ve; mahse, a duh loh zâwnga chêt palh erawh a hlauhawm ve thei viauin ka ring," nui deuh chung hian ka ti a, ani pawh chu a lo nui ve mai a.

Chutah," Nang kher i lo ni hi chu ka lãwm ngawt mai--" a tih lai chuan kawngka kik ri a rawn awm a, ka chhâng vat a, Amos-ate an rawn luh chuan," Lo țhu r'u, in va hlauhawm khup khup ve," ka lo ti vat a, Zodina a rawn hmuh chuan Amos-a chuan," Teh tlat chuan! Kan rawn tibuai lo che u maw?" nui chung hian a rawn ti nghâl var a, ani chuan," Tibuai lo ve, ka pu damdawi chungchâng ka lo zâwt a," tiin a lo chhâng thên a.

Titiin Chapchàr kút chungchâng chu an sawi a, Nunmawia chuan," Tunah chuan ka fit ta deuh bawk a, inkhelh tak tak a châkawm tawh ngawt mai, Amos, kan intum dâwn em kha?" a han ti a, ani chuan," Tum dâwn e, lo inla fit zêl rawh khai, kan inkhelh huna i thâwk hlawi hlawi chuan ka lo zak dáwn si a," a han ti leh kher a, ani lah chuan," Ka thaw hlawi hlawi kher lo ang aw," a lo ti ve a, mi dang chu kan lo nui țhâ hlawm a.

"Jakob, nangni kha tute nèn nge in intum dâwn kha?" Remsiama'n a tih chuan Zodina chu ka en vat a, ani pawh chuan min rawn en zauh nain Remsiama lam chu a en leh ta zâwk a," Nunpuiate nèn niin ka hria," a lo ti ve mai a. A hming ni hauh lovin an ko a; mahse, a hming ang maia a pawm tho a ngai si, Jakob-a a nih lai hre miah lo mah se Jakob-a thil tih apiang chu a thil tih a ni zêl bawk si, a tân thil a buaithlâk dàn tùr hi...

Hun a liam ve zêl a, Pu Zuala pawh hun ka neih chuan ka tlawh ve zauh zauh a, Zodina sawi ang deuhin ngaihsak lo nia a inhriat chuan damlo niin a inhre tlat a, min nêl bawk nèn, chaw eiahte hial min sâwm a, vawi khat phei chu ka va ei ta nghe nghe alawm, ei loh theih pawh a ni lo, min sâwm ngawrh lutuk tlat.

Chapchàr Kût nîah chauh Jakob-a nèn chuan kan inhmu! Zîngah phone-ah min rawn bia a,'Tluangte' ti lova 'Zonun' min rawn tih avàngin Jakob-a a ni tih ka hre thei nghâl a, chaw ei khamah, Mual lama kal tùra min rawn sàwm tùr thu min rawn hrilh pah chuan," Ka hmu châk tawh viau na chein hei, Lalpua hian min tîr rih tlat a," a rawn ti a, Lalpua a tih chu Pu Zuala a ni ngei ang.

Kal dun chu ka duh lo ru viau nain ka hnial lo va; mahse, Kimi kan kalpui tel thung a, ani a awm hi chuan mi pawhin min lo hmu mah se min sawi lo deuh ang a, min ringhlel lo bawk ang chu, ka inphenna a nih ber chu.

Mual kan han thleng chu Arini pawh kan hmu nghâl, a lo intichhe lo tak zet a ni. Nui hmêl puin Kimi chu a lo bia a, Jakob-a erawh chuan a ngaihsak hauh lo, a ngaihsak lo mai ni lovin melh pawh a melh lo va, awm ve lo ang hmiahin a ngai ni berin ka hria.

*SAWI TÙR CHIN THLIAR HRANG THIAM LA, MI FING I NI MAI*