☆THE SWEETEST HANDCUFFS☆ - 2 By Dingdi Pachuau

 ☆THE SWEETEST HANDCUFFS☆ - 2 By Dingdi Pachuau

Chhùn lama khua a țhat chuan zàn rei lamah ruah a súr a, chhùna khua a țhat vak loh chuan zàn rei lamah khua a thiang ve deuh thung a, a inthlâk thleng a nih ber chu. In ka hnaih ve bawk avàngin chhùn lama ni a rawn lan dét dét tawh hi chuan ka thuamhnaw sûk ka pho chhuak ziah a, inhem rona leh sikri tih vêl ka nei si lo va, zàn lama thuamhnaw huh zàr hulna tùr tlângbàn lah chu tãwi tê chauh ka nei bawk si a, inpho taimâk a ngai khawp mai. Thlaleh lam chu table fan lei tum ila a țha ang, nipuiah a țangkai dâwn tho si a, fùr lai lahin thuamhnaw huh chhêm rotu atân a țangkai tho dâwn bawk a, ka thil ngaihtuah chhuah chu țha ka tih êm avàng chuan ka nui sak a.

"Mak vur vur ve! Thil țha deuh i hmu a ni lo maw?" 

Kimi a lo ni a, a nui sâng a, kei pawh chuan nuih lêtin," A, thil ka lo ngaihtuah kual mai mai a. Lo kal rawh, lo țhu rawh, eng nge ni i duh ve tâk mial a?" ka lo ti thuai a, ani pawh chu țhu ve nghâl thuaiin," Zanin chu hla zirnaah lo kal ve la ka tia, YMA-in lêngkhâwm hla kan zir dâwn a, ka rawn sâwm ang che aw," a ti ta nghâl a. Kei chuan," A nih tak chu, membership fee pawh ka la pe lo asin," ka lo ti thung a, ani lah chuan," In vêngah member i nih tho te chuan a ngai kher em ni?" a ti phawt a, chutah," Ngawi teh, thil harsa pawh a ni hleinem, kan zâwt pah dâwn nia, ka lo bengvár lo deuh a ni, lo zawh daih tawh tùr hi a nia," a ti niah niah a, a inthiam lo tih ka hriat chuan," Mai mai a, inthiam loh a ngai miah lo a nia, pêk kher pawh a ngai lo maithei asin, a lo ngaih tâk leh kan pe nghâl mai ang a," ka lo ti ve vat a.

"I chhuak vâk tam lo ve si a, bâkah, hetiang nikhuaah hi chuan tel ve hrâm tum hi a țha, thingtlâng kan ni a, thingtlângah chuan mi insawi kan peih êm hi, mi sawi loh theih ang ber tùra awm hi a țha, YMA leh kohhran thil tihna lamah hi chuan han tel ve zêl ila, rual pàwlna a ni bawk nèn, mi pawhin min sawi lo ber," a ti leh barh barh a, kei pawh chu ka lo bu ve nghat nghat a, kan vêngah YMA member ni tho mah ila ka inhmang tam lo hle mai a, kohhranah lah chuti bawk, a hming chauh tak takin member ka ni ve mai. Lehkha zirin hmun dangah ka awm a, ka training chhunzawm leh zêl bawk nèn, inhmanna hun ka nei vak lo ve bawk atin a ni.

Zànah Kimi chuan min rawn sáwm ta ngei a, ruah a sûr lo hlauh a, khua pawh a váwt hran lo. YMA member an tam tham ve tawh a, Community Hall lamah kan kal ta nghâl a, mi pawh an lo awm nual tawh a, Kimi chuan an hruaitu ni àwm tak chu a bekbawr nghâl a. Min lo hre tawh tho mah se ka hming leh kum leh nu leh pa hmingte chu min záwt chiang a, thuphâ chawi pahin," Rawn kal vat tùr hi kan ni zâwk a, ka lo mangnghilh ve bawk a ni, min lo hre thiam hrâm dâwn nia," a ti zui a, patling pui tawh a ni si a, a thil sawi chuan min tilài a, chhàn ngaihna ka hre lo lel zâwk hial a ni.

Lêngkhâwm hla hi ka hre tam lo viau a, mimal leh zaipâwlin TV-a an sak làr leh mi play hi ka hriat chhun chu a ni mai àwm e. A chhan chu lehkha zira hmun danga ka awm daih țhin avàngin, chutah pawh hostel-ah lehnghâl ka awm a ni a, chhiatnî țhatní-ah ka kal ngai lo tluk a ni a, ka tân chuan hriat a har ve êm bawk a ni.

YMA member an tam bawk a, Hall chhûngah chuan kan ri nuai nuai mai a, Remsiamate țhianho pawh chuan min rawn pawhin min rawn be luam nghe nghe a; mahse, hruaitute an din hnuah erawh chuan kan thãwm chu a reh ta țhap a. President-in țawngțaia Pathian hnêna hun a hlan hnuah kan hla zir tùr chu a copy tlangvâl paliin an rawn sem ta nghauh nghauh a, kan inchan vek loh avàng chuan Kimi nèn chuan kan inen țâwm a, ka thiam zâwng a ni hauh lo mai. Zai hi chu nuam ti ve țhìn viau mah ila ka thiam vak lo va, ka aw hi a țha tehchiam lo bawk nèn, mi zai ngaihthlâk hi ka duh mai țhin rêng a ni.

A thiamin sa hmasain kan lo ngaithla a, a hlathu kan lo en pah zêl bawk a, châng khatna chu kan sa thiam ve ta thuai a; mahse, a thunawn lam erawh a har ta viau mai a, thlûk deuh nghelh ngai lai a awm bawk nèn, kan han sa ve chhin chu, kan nui nghâl hum hum mai a, a thunawn hi zawng kan thiam har deuh hlek dâwn a nih àwm hi.

Zàn dâr 9: 30 thleng kan zir a, châng khat leh a thunawn chu bel vak lo chuan kan sa thiam ve a, thiam tam hman lo mah ila member-te hnênah President chuan làwmthu sawiin zir leh hun tùr a sawi pah nghâl a, fuihna thu tlêm a sawi leh hnuah țawngțaiin kan bâng zui ta nghâl a. Remsiamate țhianho chu ka inah an rawn pêng zawk hlawm a, thingpui lumsak ka tum chuan an duh lo va," Kan awm rei dáwn lo," an ti tlat a, rei pawh an awm ta lo rêng a, an haw hnu chuan kei pawh ka mu zui ve ta thuai a.

Hun ãwlah chuan ka tel ve ta zêl a, mi dangte pawh chu an hming pawh ka hre chhawm ta zêl a, anni pawhin ka hmingin min ko ve ta nawlh nawlh hlawm bawk a, chutia țhalai zînga ka han chetla ve ta chu nuam ka tiin ka hlâwk takzet a ni. Lêngkhâwm hla ka thiam phah bâkah mi hming ka hriat belh phah țeuh a nia, ka hlâwk ka ti lo thei lo. Mi hming hriat loh tlat chuan innêl taka inbiak bawrh bawrh hi a harsa ve tlat si a, innêla inbe bawrh bawrh thei tùr chuan hming inhriatsak hi a pawimawh tlat a ni.

Zan khat chu hla zir kan țan hma deuh chuan Remsiamate nèn kan țhu khâwm a, eng eng emaw sawiin kan nui dar dar a, Kimi chuan," In ninawm, sawi tawh lo teh u, ka pum a na zo vek tawh," a ti a, a pum chu a dawm pah bawk a. Amos-a chuan," Nui ve tawh lo la ni mai alawm, lo ngaithla ve tawh suh," a lo ti vat a, chumi pah chuan Kimi beng chu a hupsak zui ta nghâl a, ani lah chuan," Min thlah vat rawh, tu emawin min rawn hmu palh hlauh ang e, ka hlau teh mai a nia," a ti chùl a, Nunmawia chuan rang zet hian," Chutiang an lo awm elo? Kan va hre ve châk ve!!" a lo ti ve a, Remsiama nèn chuan an nui deuh țhâ a. Amos-a chuan," Mai mai a, sawi sawi chi pawh ni lo chuan," tiin Kimi beng a hupsakna kut chu la sawnin," Ani hian eng mah a hre lo, a ti ve mai mai a nih kha," a ti zui zat a. Kimi chuan," Tak tak maw?" a'n ti zui a, a nui zui pãt pãt a, Amos-a tihngaihna hre lo chu a'n thaw huai ringawt a, chumi pah chuan Kimi chu a melh rum pah bawk a, a hmel chuan nuih a tihzat ém avàng chuan kan nui dar dar a.

"Saw, i boss hluiin a en reng che a nia," ti sapin Remsiama chuan Amos-a chu a kheuh zauh a, Amos-a chu a hawi vat a, a hawina lam chu ka en ve vat a, kan piah deuh lawkah chuan a lo țhu ve reng niin, kan lam a rawn hawi reng bawk a.

"En vek kher suh u," Amos-a chuan a ti sap a, mi dangin an en ve leh en ve loh pawh ka hre lo, kei pawh ka hawi sawn vat a, ka hmuh vawi khatna a ni ngei ang, ka hmuh àwm ka la hre tlat lo.

"Zanin chu a rawn 'Kob-a' leh riau mai," Nunmawia chuan a ti sap a, a awmzia ka hre thiam ve hauh lo mai. Remsiama leh Amos-a erawh chu an nui deuh a, Kimi erawh chuan," A ti țha hle mai, hla a rawn zir ve dáwn a nia," a lo ti thung a. Kan titi rei tak tak hma chuan hun țan chuan min rawn nangchîng zui ta a.

Kan hla zir chu kan thiam ve viau tawh a, kan han sa leh țhap țhap a, hruaitute an rawn kal țha thei bawk a, min uap hnehin an thu pawh kan âwih țha viauin ka hria, hruaitute an fakawm ka ti khawp mai. Țhalai mipa an awm ve nual si a, mi țha tak tak kârah lo in nam ve deuh phawlh pâwl an awm lo thei bîk si lo va; mahse, ang khat vekin min en a, hauh bîk leh duat bîk pawh an nei chuang lo. Kan thiam tawh êm avàng chuan hla dang kan en leh a, hei chu solfa lam a ni ve ta thung. Hla copy min pe tawh lo va, blackboard lian puiah ziah chhuah sa vek a ni a, chu lam chu kan en țhap mai.

Ka han thiam lo lailêng khawp a, keimah chu ka innuih ka innuih ringawt a, harsa ti taka tlar hnih kan thiam deuh sawlh hnuah chuan kan chàwl zawk a, chutia kan chawlh zawk kára ka hawi chhuak chuan min lo en rengtu chu ka hmu zui ta nghâl a. Kan mit chu a intawn chian êm avàng chuan zak rilru deuh hlek mah ila ka hawi sawn vat duh bîk lo, amah star-ah min ngai palh ang.

Nichîn khân ka en zawk chauh kha a ni a, a hmel pawh ka hre chiang hman lo rêng a ni. Tunah erawh chuan ka hmu chiang ta, tlangvâl hmêl chhia a ni miah lo mai; mahse, a lérh hmèl thung, tlêm pawhin a sual hmèl. Ka en lai ngei ngei pawh chuan a mit chu a'n meng zîm deuh ser ser a, a melh sawn chuang hauh si lo, a mitmeng chuan mi a lêm vêl ni berin ka hria. Ka mit chu ka khap sak sak a, ka melh sawn zui ta nghâl a. A khawsa zia kha tlangvâl lérh khawsa zia dik tak a ni, Amos-a thil sawi kha ka han ngaihtuah lêt a, a rilru a huaisen ang a, sual pah thoin a luhlul tel pawh ka ring. 

Kan zai leh hnu pawh chuan hawi sawn châng a awm lo thei lo va, tum loh deuhin ka va en leh țhìn a, min lo en hman ziah. Zài pawh a zâi ve lo a ni ang, a hmui chu a chîp reng mai a,  a bula mite an zài pawhin a hmui chu a che lo rêng rêng.

Châng khat kan thiam hnuah chuan kan bâng ta a, nichin tlaia ruah a sùr avàngin khawlai chu a la huh viau mai a, phone light kan ti êng far hlawm a. Khaw chhûng kawngpui hi chu blacktop ni mah se kawngpui bulah vek an awm bîk lo va, lane kawng țhenkhat phei chu a lei a țha si a, a diak kawi ve thei khawp ni àwm a ni. Ka in luah kawng erawh chu vànneihthlâk takin a lung reuh a, ruah a sùr pawhin a diak ve thei lo.

Kimi nèn kan haw a, kal pah chuan kan titi a, Kimi chuan," Zanin chu solfa a ni bawk a, Lêngkhâwm hla ai chuan tlêm chuan kan harsat deuh chu a nih kha tiraw?" a ti a, kei pawh chuan," Nia, kei phei chuan ka harsat zual a, sak pawh ka sak rîk țhat ngam loh kha," ka lo ti ve thuai a. A ni lah tak a, zanin zet kha chu ka zái ri mang lo tih theih a ni.

A túka Office-a ka awm lai chuan ka pain min rawn bia a, eng eng emaw sawia kan nuih hawk hawk lai chuan nizàna min en rengtu, Remsiama'n Amos-a hnéna 'I Boss hlui' a tih ngei mai kha a rawn pên lût ta khauh khauh mai a, nizàna a thuamhnaw hâk chiah kha a rawn ha leh a, a inhmeh viau, ka lo en deuh reng nghe nghe. A hnuah erawh harh chhuak thutin ka pa nèna kan inbiakna pawh chu ka titawp zui ta nghál a.

"Lo țhu rawh, eng nge ni i duh tâk le?" tiin hawihhâwm tak chuan ka be vat a, țhutna ka kawh hmuh zui bawk a, ani erawh chu țhut pawh a tum lêm lo a niang, ding chunga min en ràn pah hian," Tu nge i hming?" a ti teh daih a!

Ka en deuh hau a, mak ka ti tih pawh a hre ngei ang chu; mahse, hawihhàwm chhuah zuiin ka han nui sak a," Zonuntluangi ka nia, lo țhu la," ka ti leh a, Kimi'n thingtlâng nun min hrilh nasat tawh avàng leh hmun dang ațanga awm ka nih miau avàngin mi sawi theiha awm ka duh lo va, theih tâwp chhuahin ka hna nèna inmil tùra nèlawm ka tum rêng a ni.

"Ka hria che alawm," a ti leh lawi a, mak ka ti zual sawt mai! Khawiah nge maw min lo hriat ni? Kei lahin hriat chu sawi loh, ka hmuh àwm pawh ka la hre si lo va, helai khua lah hi ka vawi khat kalna chauh a la ni bawk si nèn, mak ka ti tak tak a ni.

"A ni maw?!!" ka ti ringawt a, khawi ațang emaw chuan min lo hre ve a ni mahna, min en chîk ropui mai si a, ka awm pawh a nuam lo lek lek hial mai ka ti.

"Jakob-a ka nia, tunah chuan nang pawhin min hriat ve tawh ngei ka beisei," tiin a nui suk a, meng sawr sawr chung chuan a chal chu a'n chuar a, a khabe hmul chu tuaiin a'n thle deuh bãk a," I hmêl țha ka tih thu hi hrilh che ka tum țhìn a; mahse, hun remchâng ka hmu thei lo va... i hmêl hi a țha hlê a ni," tiin a han ngawi deuh vang vang phawt a, chutah, rawn sawi zawm lehin," Tunah erawh chuan i hre ta bawk a, ka kal tawh ang e," a ti leh a, a nui leh suk a, inher vutin a chhuak zui ta nghâl a.

A thil sawi zawng zawng ka hre vek, a hmêl awm dàn pawh ka hria; mahse, a thil sawi khân min țhâwng lutuk a, țawng ngaihna pawh ka hre lo, mit pawh khap lo chuan ka țhu tlawk tlawk a, a chhuahna kawngka lam chu ka thlîr reng ringawt mai a ni.

A chiang chiah lo a ni lo maw? Nge min tihzah tumin a rawn kal ve hrim hrim zâwk? Min hria ni khân a insawi a, keiin ka hre dêr si lo. A, ngaihtuah lo teh ang, min chhaih pahin a che danglam ve a nih kha, chêt maksak tum hi an awm ve a, chutiang mi chu a ni ngei ang.

Ka hmu leh ta miah lo va, zàna hla kan zirnaah pawh a rawn lang lo a niang, ka hmu lo. Tlangvál hmel chhe lo tak a nih vei nèn, awm țha duh se, che maksak lo se, lérh lo bawk se, a hmel leh pianah hrim hrim phei chuan nupui ţha tak hmu thei ngei tùr a ni.

Ka lo ngaihtuahpui thui mang e.

Pathiannî inkhâwmnaah ka hmu leh tlat mai. Putar pakhat nèn an țhu dùn a, putar chu a țawng mawlh mawlh a, ani chuan ngun deuh hian putar thu sawi chu ngaithlain a lu chu a lo bu leh nghat nghat țhin a, ka en deuh reng nghe nghe. Office-a ka hmuh lai nèn khân a inthuam dàn chu a inang lo ta êm mai a, a hmêl chu hre chiang hman viau lo ila chuan amah a ni lo emaw ka ti ngei ang chu. Vawiin chuan a smart zaih mai a, a hairstyle pawh a dang, lêrh hmêl pawh a pu tawh lo, tlangvâl nungchang țha leh fel tak hmêl a pu daih tawh!

Kimi nèna kan haw tùra kan kal chu putar chuan," Nula, lo ding lawk teh, kan narsi thar chu i ni ang maw? Ka lo chibai teh ang che, ka va hmu ngai lo che ve?" a lo ti a, ka ding deuh hlek a, keimah min sawina a ni dâwn lo emaw ka ti deuh a; mahse, min lo ena a kut a phar chhuah avàng chuan 'Nula' a tih kha keimah ngei a tihna a ni tih hre chiang tain nui hmêl pu chung hian a kut chu ka vawnsak ve ta nghâl a.

"Miin,' Kan narsi thar chu a la naupan hmel nain a fel reuh,' an ti zêl che a, i hmêl pawh hmuh a nuam khawp mai, tu nge i nih le?" a tih leh chuan biang sa deuh pap pap chung chuan ka hming chu ka hrilh a, chutah, amah vêk chuan," Naktúkah i 'awfisi' ang tiraw? Damdawi rawn dìl che ka duh dáwn a nia," a ti leh a, kei chuan," Aw le, i lo kal dâwn nia," ka ti ve a. Putar nèn kan inbiak chhûng chuan Jakob-a chuan min rawn en hauh lo, en chu sawi loh, a phone a la chhuak a, a hmet nauh nauh reng a.

Kan kalsan hnu chuan ka ngaihtuah lêt nauh nauh a, min be miah lo kha mak ka ti ru viau a ni. Nge mi hriatah min be duh lo ni ang? En pawh min en duh hauh lo a nia. Hla zirnaah lêm, hmun dang hawi lêk lo khân min en chu a nih si kha, Office-ah chuti tho, nichin kha chuan a bulah ka awm a ni tih hre hmêl pawh a pu lo a nih kha.

Kimi'n min rawn nghawk deuh salh tâkah chuan ka harh chhuak zawk a, ka en nghâl vat a, ani chuan," Eng nge maw i lo ngaihtuah vung vung ni? Ka thil zawh che pawh i hre hauh lo a nia," a lo ti a, kei chuan," Thil ka lo ngaihtuah mûk lutuk a," tiin ka han nui phawt a, chutah," Eng nge min zawh chu?" ka ti zui zat a, ani chuan," Zanin chu damlo kan ve ila ka ti maw le, na tak phei chu a ni lo va, nimin khân damdawi in ațangin an rawn chhuak a, kan la tlawh ve miah lo va," a ti leh a.

Zàn inkhâwm bànah chuan damlo kan tùr chuan kan kal ve a, mi pawh an lo awm nual tawh a, nula tlangvâl hmuh tùr pawh an awm, in chhûngah chuan lútin țhutna áwlah chuan kan țhu ve nghâl a. Damlo chu a zia viau tawh a ni ngei ang, inlêngho chu an titi mur mur a, bengchheng over chu awm lo mah se in chhûnga mi, chuti zozai titi ta chu a bengchheng lo thei lo a ni, țawng ngaihthlâk tùr ber awm bawk si lo hian a ri mur mur mai si a; mahse, nakin deuhah chuan pa upa lam deuh tawh hian in neitunu ni ngei tùr hnênah chuan damlo chanchin chu a han zâwt a, ani pawh chuan a lo chhâng thuai a, a thil sawi chuan beng a verh deuh ta hlawm a niang, an ngawi ve ta deuh hlawm a.

Jakob-a pawh ka hmu ve leh tlat mai. A hma khân ka hmu miah si lo va, kan ep lam deuhah, paho zîngah a lo țhu ve reng niin, ani erawh chuan min hmu ve àwm pawhin a awm lo. Kamis vár hlak hi a ha a, a inhmeh kher mai, a hmêl leh mitmengah chuan office-a a lo kal lai kha a lang tawh hlawl lo. Ka en ru zauh zauh zâwk a, ani erawh chuan min rawn en chhin loh bâkah min hre àwm pawhin a awm lo, a awm dàn hi mak ka ti tak zet a ni.

A tûkah chuan nimin lama putar ka hmuh kha Office-ah chuan a rawn kal tak tak a, ka lo chhàwn vat a. Ani chuan nui var var chung hian," Helai ka tlawhna pawh a rei ve leh ta, ka vànnei a, Pathian zârah ka hrisêlin ka dam thei a, a làwmawm tak tak a ni," a ti a, kei pawh chuan," Ni e, damna hi a hlû a, hrisèlna nèn hian Pathian malsàwmna liau liau a nih bâkah, damna leh hrisèlna aia hlu hi chu a vâng viau a ni," ka lo ti ve a.

A titi barh barh a, Pu Rova a rawn kal hnuah phei chuan an pahnih chuan an titi a, tûnlai khawvêl boruakte an sawi chho a, an tui dùn khawp mai. Kei chuan an titi ngaithla pah tho chuan thil pawimawh ka ziak a, damdawi min rawn dîl an awm zauh bawk a. Chhùn chawlh a hun dáwn hnai ta maw tih vêlah ruah a rawn tla thut a, ka thuamhnaw pho seng tùrin ka tlãn chhuak nghâl a,  veranda-a ka thil seng ka zàr hnu chuan thingpui lum nghâlin flask-ah ka dah a, no pathum keng telin nihliap khum chung chuan Office lam chu ka pan zui leh ta a.

Thingpui ka thlitsak chuan," E, kan va tibuai che ve aw... kei lah hi ka titi a kal tawh hi chuan hun hi ka lo en tawh țhin lo va, khua hawi nachâng lah ka lo hre hek lo," a ti leh barh barh a, Pu Rova chuan," Narsi hmêl țha thingpui lum i in dáwn tihna a ni mai alawm," nui chung hian a lo ti a, ka nui ve mai a. Putar pawh chuan," Ni ta mai a nih hi, a buai lohna tùrah kan tibuai ta hrep a nih àwm hi," a ti ve leh a.

Vitamin damdawi ka pe a, damdawi awm a tam lêm loh avàngin Lunglei kal leh hmasak berah chuan Office-a dah tùr eng emaw zât chu lei a ngai ngei dâwn a ni. 

Zànriah ka ei kham hnu lawkah kawngka kik thãwm a rawn awm a, ka lo chhàwn vat a, ka rin loh lutuk lo lût ka hmuh avàng chuan biak lawk nachâng pawh ka hre lo hial a. Amah zâwkin," Țhutna min kawh hmuh dáwn nange? Nge ka ding reng zâwk dâwn?" a tihah chuan ka harh chhuak zawk a, țhutna tùr chu ka kawh hmuh ta vat a. 

A chhîp sam tlêma sei deuh hlek chu a tiphir țha khawp mai a, denim jacket pãwl dâng, a țhen lai lai tih phuai luih ni àwm tak hi hain a hnuaiah T-shirt var a ha a, a kekawr hâk pawh a vâr țha khawp mai.  A kut veilamah gold rawng sana a bun a, a dinglamah ve thung chuan țhifang ni àwm tak, a dum leh a vàr hi a bun bawk a, amah hi a lêrh hmèl bawk a, tlereuh pawh a uar hmèlin a inhmeh zâwng pawh a hre zêk a nih dâwn hi.

"Min en zo tawh em?"

*TU MAH HI A PÀWNG APUIIN NGAINÊP NGAWT SUH, TLUK LOHNA TAM TAK I NEI VE THO ANG*