☆THE SWEETEST HANDCUFFS☆ - 3 By Dingdi Pachuau

 

☆THE SWEETEST HANDCUFFS☆ - 3 By Dingdi Pachuau

Zah lutuk vàng hian bo daih theih se chuan a sawi zawh rual rual khân ka bo nghâl hmak ngei ang; mahse, chutiang chu a ni teuh si lo, ka biang lah chu a sa hat hat mai a, zak lo àwm ang tak chuan a kawr chu en lehin," I kawrah khân thil a kai emaw ka ti a," ka ti ve zaih a, a âwih kher lo ang, kei pawhin ka âwih chuang lo!

Țhutna ka kawh hmuh hnu chuan thutak zet hian," A hmasa berin i number min hrilh phawt teh, ka pu a buai deuh chânga an rawn biak duh tâk chein," a ti a, ka áwih chiah lo deuh a, ka en deuh reng lai chuan," Zànah office i kai tawh dâwn si lo va, i ina rawn kal buai ai chuan rawn phone lawk mai che kha a awlsam dâwn a," a ti leh a, ka hriat chian lêm loh, chutah tlangvâl hlauh phei hi chu ka number hi ka pe mai mai ngai lo va; mahse, tuna a thil sawi hi chu a case a dang deuh tlat, pu damlohna nei a nei a, buaina an tawh palh hlauh chânga an ràwn ve ber tùr ka ni, ka hna a ni tlat' tiin ka number chu ka pe zui ta nghâl a.

"Engtin nge i hming ka save ang?" a tih leh chuan," Zonuntluangi," ka lo ti vat a, a phone manto hmel zetah a han type zat zat a, ka lo en reng a, a kutțang sei thlurh leh a phone nalh zet mai chu inhmeh ka lo ti khawp mai; mahse, helai thingtlâng leh a hmêl, pianphung leh chezia zawng zawng ve thung hi chu a inhmeh lo tak zet ka ti thung.

Invêng ru tak, polite ru tho si chuan ka kàwm a; mahse,a hnaihah ka țhu duh hauh lo thung, hlim lo hmêl leh hlauthãwng hmêl pawh ka pu duh lo. A rûk tak chuan ka hlau deuh, ka zêp lo, tih lan loh hrâm erawh ka tum țàng țáng, ka hriat chian mi a ni lo va, bâkah, Kimi thil sawi kha ka hre ve reng tlat a, mi sawi theiha awm hi ka tum lo. A bulah țhuin han hnaih ila, ka hope ta emaw a lo ti maithei a, mi zíngah pawh min lo sawi daih thei tlat.

Thingpui ka pêk chu a in hlak a, chutah,"Thu pehhêl hi ka thiam loh bâkah ka tih ngai a ni lo, engati nge min hlauh tlat a?" a rawn tih chuan ka nui ringawt phawt a, ani lah chu nui hmel a pu ve lo nasa mai a, min en rùn thung.

"Ka hlauh che pawh ka hre lo," ka tih chuan," Dâwt sawi kher a ngai lo. Min hlau duh suh, i duh lo chung chu ka khawih hauh lo ang che," a lo ti ve thung a, a thil sawi erawh chuan min hnèm lo nasa, ka hlauh rûkna chu a zual sauh bawk. A khabe hmul chu a tuai a tuai a, a kutzungpui țhuina ni àwm tak la dam chian vak loh hmèl

chu ka hmuh chuan thla hmasa deuh lawka kutzungpui kak ka țhuisakpa kha ka hre chhuak zawk a, 'an kut tihhliamna chu a inang kher mai' ka ti rilru nauh nauh a, chutah, a rawn chek hluk a," Thu pehhêl ka thiam lo ka tih tawh kha, ka duh che tih zêp lovin ka sawi nghâl ni rawh se, mipa dang i melh loh pawh ka beisei nghâl bawk ang," a ti leh ta a.

Ka en chiang kher mai. He pa hi, zahna a pianpui ve lo a ni ngei ngei ang, a thil sawiin min țhàwnzia leh min tihhlauhzia hria se chuan a sawi lo tawp ang le. ka țhutnaah chuan khawng zetin ka țhu a, min rawn khawih a tum a nih hlauh teh chuan, ka tlãn chhuak ang a, ka au vak vak ang a, a mualpho ngei ang. 

"Khatia awm kher kha a ngai lo, ka khawih dâwn lo che ka tih tawh kha; mahse, mipa dang i melh a nih hlauh chuan ani chu ka khawih thung ang," a ti leh nghut nghut a, tunah tak hi chuan a hmaa ka zahna kha a bo vek tawh, he pa hian tlêm tê pawhin min zahna a nei lo ni berin ka hria, áwm nêm zâwk hmeichhe chungah hetiang thil hi a sawi duh a nia! 

Inpetruh țeuh chung hian," Khatiang lam kha chu sawi tawh lo teh ang," ka ti a, ka țawng ring lo nain ka ti tak tak a ni tih ka aw chhuak ațang chuan a hre thei ngei ang, a hre duh a nih chuan. Nèlawm thei ang bera kawm zêl ka duh tehlul nèn, hlim hmêl pawh ka pu lui thei tawh lo. Mipa țawng duh ve tak a nih chuan tuna ka awm dàn hi a țhiante bulah a sawi ang a, min sawi mualpho thei tho ang tih chu ka hria; mahse, pawi ka ti tawh lo.

Thingpui chu a tlâk pawp a, ngawi rengin min en leh phawt tih ka hria, kei erawh chuan ka en duh tawh lo, ka en duh lo lui tlat, min țawng khum duh dàn kha ka ngaih dàn a ni lo ve tlat.

"Hmân ațang tawhin ka duh tawh che a, chhuah che ka tum loh bâkah khata țang khân hmeichhe dang pawh ka la melh chhin hauh lo. Vawi khatna ațanga ka beidawn mai chu i rin loh ka beisei ang," tiin a ding ta nghâl a," I thin ka tirim a nih pawhin pawi ka ti hran lo, ka nghâk thei che, i inpeih hma chu ka nghâk ang che," a ti leh sup a, a chhuak zui ta nghâl a.

Țawngkam țha pawhin ka thlah lo, ka thei lo, khatiang mi tlang lutuk leh zahna nei lo ka ti dâwn em ni, miin a chhe zâwnga an lo sawi deuh hat a nih pawhin a mawh lo ve, a thu sawi apiang tlang zêl tùra ngai chi, hmeichhe zah derna pawh nei lo. A, ka chek mil zâwng a ni lo ve, a hmel a chhiat loh tehlul nèn, a uiawm khawp mai.

Ka hmu ta lo vang vang. Biak inah pawh ka hmu ngai lo, biak in lam kher hi chu a hawi vak lo ang tih chu ka ring sa tho a; mahse, hetiang khua ve riang ruangah chuan Biak inah kher lo pawh, han hmuh ve zauh àwm tak hi a nia, a reh zui ta vang vang si a, a haw hnu khân a inngaihtuah harh ang a, a zak ve deuh ang a, a rawn inlâr ngam ta rih lo a niang ka ti ta ringawt. Kei lah khân ka chhâng țha lovin țawngkam țha takngial pawhin ka thlah lo kha a nia, ka lo ti mah mah deuh em ni zâwk? Ka hna thawhna khua a nia, nula ka nih avàngin eng ang mi pawh rawn lêngin min rawn rîm se, țha taka lo biak kha ka tih tùr chu a ni mai a, ka ti fuh chiah lo em ni zâwk? Chu pawh chu ni se, ani kha chuan a ti ve mah mah a ni, Remsiamate pawh an rawn lêng ve zauh zauh a, keimah chauha ka awm avàngin min zah lohna lam leh khatiang thu kha an sawi ngai hauh si lo, ani hi, a rilru a chiang chiah lo em ni zâwk? Ka lu chu ka thing nawk nawk a, kei lah hi ka ngaihtuahna hi  ka lo kalpui thui thei, a țûl lo thei a nia.

Remsiamate an rawn lêng leh a, Kimi rawn lèn lai tak a ni bawk a, an infiam hlut mai a. Amos-a chuan," Haw nghâl rawh, zàna nula lèn dáw dáw, a mawi lo hrim hrim, nula i rîm ve em ni?" a ti a, Kimi lah chuan," Luck loh thlâk! Ka lènnaah leh zél hi chuan min rawn lènchilh lo la? Chubâkah, nang aiin ka lêng hmasa daih zâwk tih hria la zak teh," a ti lêt a, an inngam bawk a ni, an țawngkam ațang hian an infiam țhang tih a hriat ngawih ngawih.

Amos-a kamliam kan ngaithla leh a, kan nui dar dar reng mai. Kimi haw tum pawh chu phal lovin,"Nang ber i chhuah daih chuan Amos-a'n a rawn zui nghâl àwm si che a, kan nui thei tawh nâng," ka ti a, Kimi chuan," A dâwt sawi hi tihian kan nuihpui mai mai chu a ni tak si a," tiin a han kâp leh sak a, ani lah chu a lo nui huk huk duh chauh a.

A hnu deuhah chuan a fiamthu thawh ațang chuan Jakob-a chungchâng chu a sawi chhuak a, Nunmawia chuan,"I boss hming sawi tel lo hi chuan fiamthu pawh hi sawi tùr i hre lo chu a ni tiraw?" a lo ti zauh a, ani lah chuan," Nangni nèn kan inkawm tak tak hmaa ka kawm ber kha a ni miau alawm le, khâng hun lai khân sual ve deuh angin lang mah ila, tûn hnua ngaihtuah lêt hi chuan a ngaihawm ve mai mai asin, bâkah, tihian fiamthu anga sawiin Lalkimbawngitehovin an lo nuihpui tlar tlar thei bawk a," a han ti leh kher a, Kimi chuan ner nâng hian a lo en a, chutah, nui chung hian," Ni ve leh tho mai, i va ti dik tak! I ti dik thei êm mai aw, Laltidiktheipa," a ti a, Amos-a dàrah chuan a han bêng a," Tikhân, pa dàrben i ni mai," a han ti zui a, ani lah chuan," Kal teh, pa pawh ka la nih loh hi, i zára pa dàrben nih lah ka duh hek lo," a lo ti a, an inchhâng tâwk thei si a, a nuih loh theih loh.

"Ti ta daih ila, tûn Inrinni lo awm tùr zîngkár khi, YMA hnatlàn hun kha a ni em kha?" Remsiama'n a tih chuan Kimi chuan," Ni lo'm ni? Whatsapp Group lamah kha chuan a nih ngei kha," a lo ti vat a, Amos-a pawh chuan," Ni e, a ni alawm, Park kan sam dâwn a nih kha," a lo ti ve leh a, Remsiama chuan," A hun hi a fuh vak lo ka ti, tûn anga sàm chu awmzia a awm àwm lo e ka lo ti mai mai a, ruahtui a la tla tho sia," a ti a, Nunmawia chuan," A, nakina sàm nawm nân a niang, thing phunho saw a la lian lo hlawm a, japanhloin a bàwm duh lutuk a," a lo ti ve thung a.

Ka lo hre ve miah lo va, chutia an sawi chhuah azârah chuan ka hre ve chu a nia, zîngkár a nih chuan ka hman ve alawm, kal ve ngei tùr a nih chu.

"WhatsApp group tih vêla post ringawt lovin an rawn âu ang chu maw?" Nunmawia'n a tih leh chuan," Loh theih nâng, an au ziah alawm, a la hma rih deuh an ti pawh a ni mahna," Kimi chuan a lo ti vat a, chuta țang chuan YMA hruaitute chungchângah an lût leh a, an titi tui leh khawp mai.

Inrinni zîngkàrah chuan ka hnatlâng ve ta ngei a, member pawh kan chhuak țha viau mai. A hnim chu a lo lian ve tawh khawp mai a, ka chem hriam vak lo chuan ka han sât ve a, a hneh fahran lo, chem țha tak a nih loh bâkah a bil ve deuh zui bawk nèn. Ka sât chât chât  lai chu Amos-a chuan min rawn hmu a," E, i sât thlu hlauh ang e aw," a rawn ti a, a țawng hre phaho chu an lo nui hak hlawm a.

Nui deuh chunga ka hawi chhuah chuan Jakob-a ka hmu ve ta tlat mai. Ani pawh chu a lo nui ve sak a, a hmel țha tak pawh chu hmuh a nuam viau; mahse, min hriat avànga nui a ang lo, Amos-a min fiamna avàng nui a nih hmel zâwk, a hawi sawn leh nghâl daih bawk a, en duh lo viau mah ila ka en zui deuh reng a, min rawn en nawn leh chhin tawh hauh lo, ka chík ru deuh reng a nia. A awm dàn hi ka hre thiam lo, a chângin min en rùn reng kha a nia, a châng lahin min hre àwm pawha awm lovin min en ngai hauh lo bawk a.

Lukhum a khum a, tunah tak hi chuan tlêm lai deuha a kutzungpui ka țhuisakpa kha a ang ka ti, tuna a lukhum khum ang chiah hi a rawn khum a nih bawk kha, Jakob-a hian nau mipa emaw u mipa emaw, amah ang tak a nei em ni zâwk le? 

Kan bâng har lo va, kan haw hnuah eirawng ka bâwl chauh, vawiin chu office kai a ngai lo bawk a tiin chaw ka chhuan laiin insûk tùr ka chiah a, chaw ei hmain ka thuamhnaw hrim hrim chu ka su zo a, ni a lan ve avàngin ka pho zui nghál bawk a. Chaw ei kham lah mutpuan lam chu ka su ve ta thung a, ka pho lai chuan Kimi'n min rawn ko va, an ina ka va luh chuan Nimbu a lo bâwl hluah niin, ka ei ta țeuh nghe nghe a. A thûr tui si a, ka duh aia tam daih ka ei mai.

"Ei tùr i hàwn ve dâwn nia, a tui pawh hi bottle khat hàwn la, i in zawh hunah a dang chu i rawn la leh mai ang a," Pi Vàni chuan a lo ti a, ka lãwm khawp mai. A châng chuan ka inthlahrung deuh tlat țhìn, a chhan chu Pi Vàni hi 'Ka nu' tiin emaw ' Nu Vàn' tiin emaw ko ve mai tùr ka nih tehlul nèn, Pu Rova ka koh dan ațang hian a dik thei tawh tlat lo va, a țan tìrah 'Pu Ro' tiin ka ko tlat tawh a, han thlâk leh kha ka thiam tawh loh bâkah ni lo deuh hûih hian ka hre tawh tlat a, Pi Vàni phei hi chu koh ka hreh phah deuh tlat a ni.

"Kárleh Thawhlehníah Pu Zualate'n vawk an talh dáwn a, i duh ve ang em? Ti ila, lei kher pawh a ngai lo ang, kan lei leh tho àwm si a, i rawn ei phei ang a," Pi Vàni'n a tih chuan ka chhàn hma hian Kimi chuan," Tu Pu Zuala zâwk maw?" a lo ti vat a, a nu chuan," Pu Zual-hausaa zâwk," a lo ti ve mai bawk a. Kimi chuan," Jokob-a pu maw? Vawk kha eng zât nge an vulh kha? An vulh tam viau tih chiah ka hria a," tiin a nu chu a zâwt leh a, ani chuan," A zât chiah ka hre ta hauh lo, a pui nèn 14 vêl chu an la vulh ang... ka ring," chiang chiah bîk lo tih hriat tak hian a lo ti leh a.

"An tifuh ve ngawt mai, bâkah, an taima bawk a, hlawhtling tùr hi chu an ni ve hrim hrim, Jacob-a hian hna chu a thawk lo berin ka hria a, a pu nèn, mi dang hi chuan an thawk nasa maw le," Kimi chuan a ti leh bawrh bawrh a, a nu pawh chuan," Ni e, an thawh peih man an têl a nih ber hi, sérthlum leh Dragon fruit hmun lah an nei zau si, mi taima hi zawng, hlawhtling tùr hi an ni rêng a ni," tiin a lo tuihnih ve bawk a.

Chuta țang chuan Jakob-ate chhûng chanchin chu an sawi chho leh barh barh a, Kimi chuan," I la hriat loh tâkin, Pu Zuala fapa upa ber, Jakob-a pa hi pastor a nia, Aizawl lamah an awm ta niin ka hria, a ni tiraw, Nu?" tiin a nu chu a han zâwt leh rih a, ani chuan," A nih àwm kha, a hma chuan Chhim lamah hian an awm ve reng țhin a; mahse, kan hriat țheuh angin, pastor hi zawng, awmhmun nghet hi an nei thei tak tak lo va, an awm sawn reng mai a," a lo ti leh a.

"A nu leh pate bula awm ai chuan a pi leh pute bula awm nuam a ti záwk tihna a ni maw?" ka lo ti ve a, Kimi chuan," A ni ta ber a niang, awmhmun hi an sawn ve reng țhin bawk sia, chuvàng chu a ni maithei, țhian nghet a neih hman dáwn si loh a," a  ti ve mai a, chutah," A nu tak tak kha a boral tawh an ti bawkin ka hria, ka hriat sual loh chuan," a tih chhunzawm leh a. Chuti a nih chuan, nu leh pa uapna ni lo hnuaia sei lian a ni ngei ang a, nungchang pângngai lo deuh leh eng emaw deuh a lo nei a nih pawhin a àwm ve thei viau ang, a pi leh pute'n an duat àwm si a.

"A pi leh pute hian an tu hmuh hmasak ber a nih vàng hian an duat ve bawk a, mi rethei tak an ni lo bawk nèn, a châng chuan hetia a awm ţhin pawh hi ka hriat thiam phah fo a ni," a tih leh chuan," Engtin nge a awm ţhin a?" tiin ka lo zâwt zauh a. Ani chuan," Engtin a awm vak phei chu ka hre lo va, tleiràwl chhuah chhoh laia han eng emaw ve deuh hi chu a awm lo thei bîk lo va. Englo a nia, ka hre thiam chiah lo, a nungchang leh awm dàn hi a thlâk kual nasa țhin ni berin ka hria. A châng phei chuan rei tak tak a zin chhuak țhin, ka sawi thiam chiah lo, Amos-a'n a sawi thiam ang, zâwt chhin rawh,  a hre chiang deuh bawk ang, an inkàwm ve nasa ţhin alawm," a ti ta daih a.

Mak ka tih leh ka hriat thiam loh ang deuh tho khân ani pawh hian a hre thiam lo ve tho a ni ngei ang, a awm dàn a thlâk kual zung zung țhin a nih chuan hlimna tak tak a nei ngai lo a ni maithei a ni. A awm dàn ngai renga awm kha a ning țhin ang a, hmun ngai renga awm pawh a ning țhin a ni thei tho, a zin chhuah țhin chuan. A chhûngril lamah mal riauin a inhria a ni thei, chutia a nu, amah hringtu berin a boralsan tawh phei chuan, nuhrawn/ pahrawn hrawn chu a nuam dâwn lo êm asin. 

Ka lo ngaihtuah thui leh ta.

Inngaihtuah harh thutin ka hriat duh tak kha zawh hun niin ka hria a," A nih, unaute a nei ve em? A neih chuan hetah an awm ve em?" ka han ti a, ani chuan," Nei ve bawk e, a nu boral hnua a pain nupui dang a neih leh tâk nèn chuan a pa chuan fa 3 a nei leh a, nau pathum a nei tihna a nih chu; mahse, hetah erawh an awm ve lo," tiin min chhâng a.

*******

Vànneihthlâk takin thawhpui tùr ka nei thei dâwn e. A hming chu Lalropuia a ni a,  Rahsivêng, Lungleia chêng niin, nupui fanau nei tawh a ni àwm a; mahse, pawi ka ti lo, thawhpui neih hrim hrim chu ka châk tawh, hetah a awm nghet ve duh lova thei lo a inti a nih pawhin a pawi chuang lo, kár khata ni hnih khat tal a lo kal ve pawhin a țha tho, mahni chauha thawh ai chuan ka duh tho tho.

A fuh khawp mai. A rawn kal țantirh pawh chuan kan sawi dùn a, ani chu nupui fanau nei a nih avàngin heta riaha awmchilh chawt chu a tân a harsa deuh hlek rih dâwn a, lângin a rawn kal ţhin dâwn tih a sawi chuan," A, i i huam dàn kha a țha a ni mai, nang zawng ke i nei a, lânga i peih mah te chuan," ka lo ti ve a, ani chuan," Vaccine lâk tih vêlah ka àwl vek ang che, i tân chuan a buaithlâk viau dâwn si a, bâkah, in khuaa han haw ve zauh i duh châng pawhin hetah kei ka lo awm thei a, pahnih nih chuan a zia tawh hrim hrim," a ti a, nupui fanau nei tawh mah ni se a la upa bîk lo va, kei aiin a upa hret tih chauh a ni. Amah a fel bawk a, ka titipui bawrh bawrh nghâl thei mai rêng a ni.

A zia leh zêlna chu a rawn kal dâwnah eng emaw mamawh a chah zauh zauh theih bawk a, amahin min rawn hrilh hmasa țhin bawk a, kei pawhin làwmthu sawi nân thlai rah eng ilo ka lo leisak ve țhin a, kan inpui tawn a nih ber chu, Remsiama pawh ka tihbuai loh phah sawt a, a zia viau a ni.

Ni khat chu Office-a kan țhut lai chuan kal thãwm a rawn awm a, ka hawi chhuak nghâl vat a, Jakob-a a rawn lang ta, a inthuam dàn chu, zàna ka ina a rawn lèn lai leh YMA-in hla kan zir laia mi nèn kha chuan inang lo tak a ni. T-shirt dum hlui ve tawh lam hi hain, awm mai mai kekawrbùl țial a rawn ha bawk a, Bata slipper a bun chu a inhmeh phian lawi a, chutia ka lo en chîk leh pek chu ka inthiam lo nghâl zat a. U Ropuia chuan thil pawimawh a ziah mawlh mawlh avàng chuan ka lo chiau-au ngei a ngai, ka phûr fahran lo kher mai.  Ani lah chu kawngka bulah chuan inthlahrun hmèl deuh hian a la ding a," In awm maw? Ka lo tibuai lawk mai che u aw," inthlahrung tih hriat tak hian a ti a, nui hmel deuh hian min rawn en a, a duh chu sawiin kan kawl leh kawl loh chu min zâwt zui nghâl a. A țawngka chhuak, hmêl lan dàn leh chezia chu ka ina a rawn lèn zàn nèn a inan loh êm avàng chuan mak ka ti ru deuh hlek a, a mitmeng ni se lérh mitmeng pawh a pu lo va, lêrh chu sawi loh, inthlahrung leh pawisawi lo mitmeng a pu hial zâwk a ni. Inthlahrung derin a țawngka chhuak a tidanglam lui a ni ngei ang, Kimi pawhin a inthlâk danglam nasa țhìn a tih kha, tunah pawh hian min hria angin a awm miah loh hi.

Ka en chîk rûk deuh avàng chuan a chal lai taka ser lian vak lo, ãwn lek leka inrîn thla awm chu ka hmu a, zàna a lo lèn khân ka hmuh àwm pawh ka hre lo ka ti, tuna a ser ka hmuh lah hi tûn hnai lawka a tihser chu a ni lo chiang mai a, a rei ve deuh tawh ngei ang. Ti ila, a rawn lèn khân chîk zetin ka lo en vak bîk lo, a inthuamna tih loh kha chu. Bâkah, ka thin kha a tirim ve deuh tlat a, a hmêl phei chu ka en chîk peih lo a nih kha, tunah hian a chalah ser a nei tih ka hriat phah chauh.

A chhuah dáwnah chuan," Ka lâwm lutuk e," a ti a, U Ropuia nèn chuan min rawn en tawnin a nui leh deuh sak a, a chhuak chu ka en zui deuh reng phah hial a ni. Polite vàng mai maia khatianga làwmthu sawi kha a nih hmèl si loh a, a țawngkam hrim hrim danglam daih chuan mak min tihtîr lo thei lo.

Amos-a'n," Kob-a kha chu a châng chuan kei pawh khân ka hre thiam lo deuh țhin. A châng chuan sual ve deuh ang khân a awm a, a chângin nungchang țha theihtawpin a awm bawk a, a pi leh pute a bum duh vàng  a nih ka ring țhin. A châng chuan kawm theih miah loh țum pawh kan nei țhin, vawiinah naktûk lama tih tùr rawt ila, a tûka kan va sàwm chângte hian a lo țhulh hmin dèr ka ti mai, a lo hrechang tawh ngai lo. Tûn hnuah hi chuan kan inkàwm ta lo êm a, khatiang khân a la awm țhìn em tih pawh ka hre tawh lo; mahse, a châng hi chuan khatiang khân a la awm țhìn niin ka hre deuh bawk a," a tih bawrh bawrh chuan ngun zet hian Jakob-a nungchang tùr àwm dik tak chu ka lo ngaihtuah a, ani erawh chuan ngaihtuah zui lêm lo tih hriat tak hian fiamthu sawi hnanin mi dangte nèn chuan an nui zui leh bãwk bãwk a.

*LEHKHA CHHIAR TAM RAWH, CHUTI LO CHU I MI NGAIHSAN ZÂWNG LEH I MI RIN DEUHTE THU SAWI KHA PATHIAN THU TLUK ZETIN I RING NGHET BUR PALH ANG E*