☆THE SWEETEST HANDCUFFS☆ - 4 By Dingdi Pachuau

 ☆THE SWEETEST HANDCUFFS☆ - 4 By Dingdi Pachuau

Office-a a rawn kal ațanga ka hmuh lehna hmasa ber chu Kimite inah a ni, zanriah ei hma deuhin ka kal zawk a, ani pawh chuan Puia leh Vâltea hlawhfaah a rawn sâwm a, a rawn sâwm ti ila a rawn hrilh nawn leh a ni mah zâwk. Min biak leh duh pawh ka ring lo va, ka beisei lo bawk; mahse, min rawn hmuh veleh chuan rin loh deuh hian," Ka kut i țhui kha a dam țha viau tawh asin," a rawn ti a!  Chhàn nachâng ka hre lawk lo zui nghe nghe a ni. Kutzungpui ka țhuisak kha amah hi a lo ni maw? Ka  ka lo hre miah lo! Lukhum kha a khum tlat sia, a hmêl kha chiang takin ka lo en lêm lo bawk nèn, ka lo hre lo pawh chu a àwm ve tho mai. Mak ti rilru tak chuan ka en deuh hâ reng a, Kimi chu lo inrawlh vatin," I lo intina a ni maw? A va bengvàr loh theih ve aw... A dam chiang tawh maw?" a lo ti vat a, ani chuan," Aw, a thúk lëm lo va," a lo ti leh mai a, Kimi chuan aw a han thian kharh a, ka en vat nghe nghe, ani pawh chuan min rawn en a," Kan nurse thar hian a hna a thiam riau a nih dâwn chu a," nui chung hian a ti leh a, chutia a tih tâkah chuan ka inngaihtuah harh ve ta thuai a," A dam tawh chuan a lawmawm hlauh a nih chu," ka lo ti ve ta thuai a.

A chhuah hnu chuan Kimi chuan," A kut a lo tina a ni tih pawh ka lo hre hauh lo. Tlêm lai deuh ațang khân hna hi a thawk ve leh ta deuh a, a fîmkhur sêng bík lo a ni ngei ang. Mipa phei hi chu an chak a, hna hi an thawk bawrh bawrh zêl a, Puia leh Vâltea pawh hi ka hrilh zing a nia, an fîmkhur tâwk loh hi ka hlau țhìn," a ti zui bawrh bawrh a, kei pawh chuan," Nia, fîmkhur sèn hleih theih loh hun hi a awm ve a, naupang deuh phei hi chu hrilh reng hi an ngai ve rêng a ni," ka lo ti ve a.

Zànah Remsiamate țhianho bawk chu an rawn lêng leh ta a, anniho hi chu ka nêl ve tawh lutuk a, thutak pawhin min be ngai meuh tawh lo, min fiam bawrh bawrh reng a, a chângin min tihder thùl, kei lah hian min tihder tih hre lo hian ka lo âwih ve ziah bawk a; mahse, a rei bîk lo, a hnuah chuan min tihder a nih ka ring ta ziah a, a lo ni ziah bawk a, chutiang chu kan boruak awm dàn a ni.

Kan hna lamah pawh Vaccine pêk leh report hrang hrang kan tih fel hnu hi chuan buai êm êm kan nei lo va, U Ropuia chu ni tin rawn kal lo mah se a rawn kal chhunah tih tùr țûl a ti fel zung zung a, ziah fel a peih a, a hna a thiamin a rang bawk a, a tizo zung zung mai. Khaw chhûng lama eng emaw zawh ngai leh house to house-a zawh ngai chi angah erawh ka àwl ve thung a, kei awmchilh ka awm a, ka tih tùr a ni bawk a, harsatna a awm lêm lo.

"A la hla deuh nain Krismas-ah chuan i haw ve ang tiraw?" a tih chuan," Haw ve àwm tak chu a nia," ka lo ti mai a. Ani chuan," Nge helamah pawttu che an awm tawh zâwk?" nui chung hian a ti leh a, kei pawh chu ka nui ve hawk a," An lo awm reng tawh a niang e," ka ti ve a, kan nui dûn hawk hawk a. Chutih lai chuan Jakob-a pu a rawn lût ve hrãwk mai a, a hming Pu Zuala a ni tih hre mah ila, "Lo lêng rawh, ka pu, eng thil nge ni i duh a?" tiin ka lo chiau-au vat a.

"Ka rawn lêng ve lawk dâwn a nih hi, ka damdawi ei tùr hi zawh chian leh che ka duh deuh a, eng damdawi ber nge tih ka hre chhuak thei ta tlat lo mai a," a tih chuan a damdawi rawn khai chu ka lo lâksak vat a, țhutna ka pe nghâl bawk a. Damdawi ka en lai chuan U Ropuia lam chu hawiin," Nang hi kan nula-i thawhpui thar kha i ni ang maw? Khaw'nge, ka lo chibai teh ang che, a làwmawm êm mai," a ti chuar chuar a, U Ropuia nèn chuan an inchibai a, a hnuah phei chuan an titi zui luam nghe nghe a.

Ka pu chu a țhu ve deuh reng a, inah haw lawkin flask-ah thingpui ka dah a, ka lêt leh ta vat a, thingpui ka han pêk chuan," Aw, ka va tibuai mai mai tak che êm! A tui ngawt ang chu!Tluangtei maw i nih kha? Nula mawng zãng tak chu i nih dâwn hi," a lo ti luam a, min faknaah chuan lãwm ru viau mah ila ka zak ve tho a; mahse, zak lo ang tak chuan," Ka lâwm e," nui chung hian ka ti phawt a, chutah," I damdawi chu engtika i lei nge ni rêng rêng a?" tiin a damdawi lam chu ka sawipui ta daih a.

A haw dâwnah," E taka, Zodina kut i țhuisak kha, thiam a tih viau che kha, a țawng tam lêm lo a nia, i kut dam a tih thu leh i hna i awlsam thu kha a sawi ve tlat," tiin a ding leh rih a, kei chuan," A va lawmawm tak êm aw... Kan kutte hi dam lo viauin an hria ang a, kan chìu te hi an huphurh hlur mai ang tih ka lo hlau ţhin asin, a làwmawm lutuk e," ka ti leh a, a damdawi chu bp sâng damdawi a nih thu hrilh țha lehin ei dan tùrte pawh chu ka hrilh țha leh a.

A chhuah hnu chuan U Ropuia chuan," I luck riau mai, putar tê tê pawhin an rawn hêl che a nia, Krismas-ah pawh i haw theih ka ring ta lo tawp mai," nui hak hak chung hian a ti a, kei pawh chuan nui chung vêk hian," Bâwngpui tar pawhin luang no tho alawm a duh le, mihringte phei chu bâwngpui tar aiin kan la fing zâwk lehnghâl a," ka ti ve zat a, ani chuan," Nangmah chauhin i awm lehnghâl si a, i ngaihtuahawm ta riau mai," a ti leh a, chutiang lam hlîr chuan min fiam a, kan nui dùn bãwk bãwk a.

Thingtlâng tih takah, leilet nei an awm lêm lo a niang, lo erawh an nei deuh fur a, a țhen phei chuan," Buh vèn a ngai," tiin lo lamah an riak lût nghe nghe a, DDT lam min rawn dîl tâwk lah bo lo, nu țhenkhat lahin chhang khàtna min rawn dîl nawlh nawlh bawk a. A, a țha vek mai e, piang țeuh țeuh zâwk se tih pawh duh viau mah ila min dil miau si chuan lo pêk duh loh ngawt thu lah awm si lo.

Kan biala tel ve khawper pakhat Saisihah chuan vaccine pe tùra kal kan ngai a, U Ropuia chu a phûr angreng phian, kei chu kawng chho hlîr kal ngai a nih avàng chuan ka huphurh ru deuh khawp mai a; mahse, a hriat leh hmuhah erawh chuan phúr lo leh peih lo ang chuan ka awm duh bîk miah lo. 

Kan hmaa lum a nih miau avàngin kan kal ta ngei a, zîng dár 6-ah kan chhuak a, chaw ei kham lamah chuan ni a sa tawh dâwn a, Pu Rova'n kan chauh viau min hlauhpui vàng a ni. Kawng pêng dang, han bona tùr a awm lêm loh vàng leh a kawng awm dàn min hrilh fiah vek tawh avàng chuan Pu Rova'n min kalpui a tum deuh pawh chuan kan hnial a, amah a upa ve deuh tawh si a, kan khawngaih bâkah ngai kan ti lêm lo a ni. Kawngah chuan harsatna kan tâwk lo va, han pênna tùr kawng dang pawh kan hmu lo. Níin min rawn chhun hran lo mah se thlan erawh a tla țha duh khawp mai, exer atân phei chuan țha tak tùr hi a ni a; mahse, a hahthlâk lam deuh chu a ni, ka hnârahah ka thâw a lêng lo a ni ber mai, kan ding kan ding nghe nghe.

Mi ina chaw han ei buai kan duh loh avàngin tiffin kan pai a, khaw chhûng luh dàwn tak takah chàwlin tiffin chu kan phawrh a; mahse, ka ei thei lawk lo, ka hah lutuk a, chawlh deuh reng phawt ka ngai. U Ropuia chuan min hre thiam khawp a, ani hi chu mipa a ni a, kei ai thláwt chuan a fit ngei bawk ang, a hah lutuk lo ni pawhin ka hria.

"Chàwl dar dar phawt rawh, in khua  phei chu chho han kal tùr îk awm lohna hmun a ni a, i hriat thiamawm lutuk ringawt, inthlahrung duh miah suh," a ti a, a tiffin pai chu ei duh bík lo chuan a țhu thluang ve duai a, minute 10 vêl zet kan țhut hnu chuan ka hah pawh a dam chiang ta, ka mal erawh a rawl dâwn chiang khawp, tunah pawh hian a rawn rawl țanin ka hria, a ni deuh țûng mai.

Tiffin kan ei zo tihah chuan naupang țawng nawk nawk thãwm a rawn awm 

a, ka hawi kual nghâl thuai a, khaw chhûng luhna tùr kan chhak lam kawngah chuan naupangho hi an rawn lang țhâm țhâm a, min hmu lêm lo a niang, an țawng nak nak a, chutah, tawlailìr siamchawp chungah chuan rawn chuang thlain chak zet hian min rawn tlàn pèl ta hlawm a, kei phei chuan ka lo hlau khawp mai, an accident ka lo hlau a ni, an tlànna kawng  a chhuk ve tho si a. U Ropuia erawh chuan," A nuam reuh ngawt ang!" a lo ti duh chauh a, kan rilru a inang lo ve khawp mai.

Khaw chhûngah chuan kan lût ta ngei a, mak ka ti ru khawp mai a, ka hawi ka hawi mai a, hetiang khua hi Mizoram chhûngah a lo la awm a ni maw ka tih phah hial a ni. Thingtlâng khua dik tak a ni a, motor leh lìrthei pakhat mah a la lût lo ngei bawk ang chu, in chungah pawh dî an la hmang fur a, school leh biak in ni àwm tak chung erawh chu ràngva a ni thung. Khua hi ka la kal tam lo khawp mai a, ka kal ve chhun chu Lunglei ațanga Aizawl inkâr hi a ni deuh mai, chu pawh motor-in kan tlãn tlang zêl a, 'kal' pawh ka ni chiah lo. E, Champhai lamah ka kal tawh bawk tak e, Rihdîlah ka kal ve tawh alawm.

Min lo dawngsawng tùr deuha kan ngaih an khaw hruaitu ve deuh chu ramah a lo riak daih a, Middle School Head-in min lo dawngsawng ta ringawt a, vaccine pawh an school-ah kan pe dâwn nghe nghe. A inah thingpui kan in phawt a, chumi hnuah chuan school lam chu kan pan a, kan hriattîr lâwk vek tawh avàngin hrilh nawn leh an ngai bîk lo, vaccine la tùr chu an nute'n an rawn pua a, an bàl ve khik khek hlawm reuh sia, ka khawngaih hlawm tawp. Naupang dang rawn kalte chu sweet kan sem diat diat a, an lãwm ve hlawm viauin ka hria. U Ropuia a bengvâr hlauh a, sweet kan sem pawh hi a rawn lei niin," Thingtlâng deuh hlekah chuan hetiang ei pawh hi a khât a, hmuh tùr a awm zen zen lo nèn, an duh viau ang," a tih vàng a nia, a ti fuh khawp mai; mahse, min en duh hlawm viau erawh nuam ka ti vak lo.

Kan zo thuai a, U Ropuia'n," Haw nghâl vat lovin khua hi fang ve rih ila tiraw? A lunglènthlâk ve alawm," a tih avàng chuan khua chu kan han fang kual ve a, a zau lêm lo khawp mai. In ding hi 40 vêl chiah chiah a ni a, a fâl deuha awm pawh an awm lêm lo, záwl zau ve deuhah an inhnawh kháwm a ni ber. An mual pawh a zau lêm lo va; mahse, a nuam reuh thung. Phùl a țo khat tlat a, a hring dap reuh bawk si a, thlìr a nuam viau a ni. Thla pawh ka la nual nghe nghe, chutia phone ka khawih mawlh mawlh lai chuan vawk ngûk rí ni àwm tak hi ka hria a, rî ka hriatna lam chu ka hawi nghâl vat a, ka lam pana vawk lian angreng tak pahnih rawn kal phei ka hmuh chuan ka phu deuh zawk a, hlauhnain min rawn tuam nghâl a, U Ropuia awmna lam nia ka hriatah chuan chak zet hian ka tlãn zui ta nghâl a.

Lung phun bulah a lo ding a, a bula thaw hlawp hlawpa ka ding chu," Eng nge ni ta?" a lo ti vat a, țawng lo chuan vawk ka hmuhna lam chu ka kâwk ringawt a, a lo hre thiam ve nghâl mai bawk a," A la thingtlâng ve êm mai a, ran pawh an la khuahkhirh lo a nih dâwn hi," a ti a, a sawi zo deuh chiah tihah chuan vawk dang pawh kan hmu zui leh nghâl zat a, ka hlau hnuhnawh kher mai. Nichîna khawlaia kan kal kual kha chuan ran êk kan hmuh àwm ka hre si lo va, ran an khuahkhirh loh chuan êk pawh hmu nual tùr kan ni asin le.

Kan haw dâwn chuan Head Pu Hmaa chuan thingpui inah min sâwm leh a; mahse, kan in tawh lo, kan tihek tawh êm mai a, a inthlahrunawm kan ti a ni. Tlânga awm an ni a, tui a vàn hmèlin a chàwina lah chu a hlat hmèl bawk si a, kan ril lah a țâm êm êm chuang lo nèn. Kawtchhuah thleng chuan min thlah a, làwmthu kan hrilh mawlh mawlh bawk, ani hi awm lo se chuan kan buai viau ngei ang le. 

Haw lam zawng ka hah tawh bîk lo va; mahse, ka rawl ve ta thung a ni. Ka ţhen sak sak mai a, kawng chhuk leh rawl chu a lo inhmeh lo viau a ni, U Ropuia chuan," Zanin chu i rawl viau ngei ang le, i neih chuan zo-artui leh nachhâwkna i ei ang a, i mu hmak dâwn nia," a ti a, a thil sawi chuan ka nu min tihre chhuak vawng vawng thei nia. Ka rawl deuh chânga ka nuin ei tùra min hrilh țhin a nia, zanin chu ka hre chhuak vawng vawng dâwn chiang mai.

Zanriah ei khamah ka mu nghâl mai ang ka ti rilru ve a nia; mahse, thlèng ka sil laiin inlêng tùr an rawn lût a, ka mu nghâl thei bîk lo; mahse, ei tùr zo-artui leh nachhâwkna ka nei tawh a, mut dâwnah ka ei ang a, ka zia mai ang chu maw. Vànneihthlâk takin Amos-ate chu an lêng rei lo ta hlauh a, an haw hnu lawkah chuan ka mu zui thuai a.

Pathiannîa kan inkháwm bâng chu pâwnah chuan Jakob-a ka hmu ve leh nawlh mai. A inchei dàn chu a smart zaih mai a, amah a sâng țha tho bawk nèn, a inhmeh kher mai, denim jacket phuai deuh fup kha chu mitthlaah pawh a lang pha tawh lo. Ani pawhin min rawn hmu ve a ni chêk ang, min rawn nuih deuh sak a, engtin emaw tak hian ka la awm zui ta dah a! A han nui sak hi a mawiin a inhmeh êm a ni; mahse, a hawi sawn leh ta thuai a, a bula ding, Primary Headmaster fanu Arini chu a be zui nghâl a, ani pawh chuan en chho hau pah hian eng emaw hi a hrilh bawk a, ka en deuh reng nain a rawn hawi tawh lo.

Zànah chuan inkhâwm ka tum lêm loh avàngin ka muang dawr dawr a, Pathianni zàn dangah hi chuan ka hman ngang lo a nih loh chuan ka inkhâwm ve zêl a nia, zanin chu ka hman lo pawh a ni lo, tih tùr țûl deuh lah ka nei a ni hek lo, ka off ve tawp mai a ni. Ka nu ka bia a, ani pawh chuan ka inkhâwm loh chhan min rawn zâwt ta chiah rêng a, chhuanlam pawh ka siam chuang lo. Eng eng emaw sawiin kan nui dùn bãwk bãwk a, ka nu biak hi chu a hlimawm țhin a ni. Kan inbe zo deuh chiah tihah kawngka a rawn ri zui zat bawk a, 'Tu tak chu ni maw? Ka inkhâwm loh hria a ni ngei ang chu' ti rilru chung chuan ka chhâng vat a. Jakob-a ngei mai a rawn pên luh tâkah chuan ka nu nèna kan inbiak avànga ka rilru hlimna chuan min țìnsan chawpchilh zui nghâl a. Ka lo en reng a, a rawn lêng ta lo vang vang bawk a, a chunga ka thinrimna pawh kha a reh ve tawh; mahse, a chanchin chiang taka hriat  erawh ka châk khawp mai thung. A mitmeng leh cheziaah chuan vawiina ka hmuh Jakob-a kha ni lovin, hmân zàna lo lêng Jakob-a chezia leh mitmeng dik tak kha hmuh tùr a awm leh tawh a, lèrh hmel zeta min enin a han meng deuh sar sar phawt a, chutah," Kan inhmu khât hle mai tiraw? Kan inhmuh loh chhûng zawng khân vawi khat mah ka theihnghilh ngai loh che bâkah ka ngaihtuah char char țhìn che a ni," a rawn ti ta a.

A chezia, țawng leh mitmeng engkim chu ka theihtâwpin ka chîk a, ka zak duh bîk lo," A va làwmawm àwm ve!" tiin ka han chhâng a, ani chuan," Min lo la theihnghilh bîk lo tih ka hre mai e. Min lo ngai ve tho em? Kei chuan engtiklai pawhin ka ngai che ni maiin ka hria, hmuh che ka tum nasa thei a nia; mahse, hun remchâng ka nei thei tlat lo va," a ti leh dap dap a, mak ti ru deuh tak chuan a thil sawi chu ka ngaithla reng a, a awki chu a hniam chhek chhawk viau nain a țawng chhuak hrim hrim chu ril raih kan tih ang hi hi ni berin ka hria, a ti lui pawh a ni maithei.

"Hmãn zàna ka lo lèn lai ai kha chuan i bula awm pawh a nuam sawt ka ti, hmãn zàn kha chuan min hlau deuh tlat a tiraw?" tiin a'n nui deuh a, kei chuan," Hlau hran lo; mahse, i thil sawi dàn kha i nunràwn hmèl lutuk a," tiin țha takin ka chhâng leh a, ani chuan," Ka nun hi chu a rãwng alawm, ka duh loh zãwnga awmte chungah chuan," a han ti phawt a, chutah," Mahse, i chungah chuan ka rãwng thei ngai lo ang, ka duh ber kha i ni tlat a," a ti leh zat a.

Thingpui ka pêk lai chuan a kut chu ka han en deuh kher a, a kutzungpui ka țhuisak kha ka hmu chiang khawp mai. En deuh vang vangin," I kut kha engtiklaiin nge i lo tih hliam a? A rei deuh tawh a ni ngei ang, a dam hmel tawh êm mai," ka han ti a, ani chuan a kutzungpui chu enin," Zei loh thlâk lutuk!" a lo ti hluk a, chutah," Mi fîmkhur lo zâr ka zo a nih hi," tiin a nui leh sak a, thingpui no chu chawiin a in zui zat a.

A titi a pângngai chho viau a, ka hna thawh dàn chungchângte min zâwt chho a, kei pawhin ka hrilh ve mai bawk a. Ani pawh chuan ka rin loh deuh hian lehkha a zir chhoh dàn leh lehkha zira phai vêla a chéttlat dànte chu a sawi luam a, ngun zetin ka lo ngaithla a, zawhna pawh ka zâwt zauh zauh bawk. 

"I hman hunah, hna a tlèm deuh hunah zin ang aw. Kan hostel hmun hluite kan fang ang a, nang pawhin nuam i ti viau ang, hmun nuam ber pâwla an sawi a ni ve a, nang nèn phei chuan a nuam zual ngei ang," a tih chuan," A châkawm khawp mai; mahse, hna hi tlèm hun a awm thei ngût ang e maw le... han dam phawt ila," ka lo ti ve a, amah hnial zâwng leh a titi kal lai ti tàwp záwnga thil lo sawi ka tum lo.

"He khua hi i ning ve țhin em? Ka awm tirha ka ninzia mai chu," a tih leh chuan," Ning hran lo ve, nuam ka lo ti ve viau tawh asin," tiin ka chhâng a, ani chuan," Tunah chuan nang i awm ve tawh bawk a, nuam ka ti ta riau. Helai hmuna ka hmu leh thei che hi ka vànnei takzet a ni, hmuh tuma ka zawn nasat theihzia che chu hria la, min khawngaih ve ngei ang. Ka hmuh leh tâk che avàng tak hian hloh che ka tum tawh lo. Chuvàng chu a nia nangmah hnìm hnai deuhtu che chu ka en liam mai mai thei lo ang ka tih chhan kha. Ka hloh hlen tawh dáwn che emaw ka ti a; mahse, hmuh leh ngei che hi ka inbeisei tlat tho bawk a, ka beiseina a thâmral loh vàng a ni ngei ang kan inhmuh leh theih ni," a ti leh sap sap a, ngawi rengin ka lo ngaithla a, a thil sawi rêng rêng chu hriat hmaih neih ka tum lo bur.

A haw hnu chuan khumah muhil thei lovin ka mu meng kar a, zanina lo lêng kha Jokob-a ngei a ni a, hmân zàna lo lêng nèn khán thuhmun an ni. Vawiina biak ina ka hmuh ve kha chu mi dang daih a ni thung tih hi ka ngaih dàn a ni, a nungchang leh awm dàn a thlâk țhin tih Kimi khân a sawi ngei a, a awm dàn ngai reng hi lo ning pawh ni se a lang a pauva a thlâk zung zung erawh chuan eng emaw thil dik lo a awm tihna a ni. Zanin pawh khân kan inhmuh khàt thu a sawi a nih kha, vawiin lamah pawh Biak inah kan inhmu reng a, kâr hmasa lawkah Kimite inah pawh kan inhmu a nih kha, inhmu khât kan ni lo. A rilru a buai a nih loh vêk chuan thil dik lo a awm tihna a ni ngei ang; mahse, a rilru hi buai àwmin a awm miah si lo va, eng thil chu nge ni ta ang? 

Ka rinhlelh rûk deuh hi chu ni lo hrâm teh se. DID maw? Ni lo, a ni lo ang, a theih loh, thil thleng thei a ni lo.

*THIL HRIAA ZIR BELH ZÊL TÙR KAN NIH VÀNG HIAN THIL ȚHA LO LAM HI CHU HRIAT RENG LOH TUM TA ZÂWK ILA, HMA KAN SÂWN ZÂWK NGEI ANG*