☆THE SWEETEST HANDCUFFS☆ - 5 By Dingdi Pachuau

 ☆THE SWEETEST HANDCUFFS☆ - 5 By Dingdi Pachuau

DID te zawng, Mizote zîngah phei chuan nei an awm hauh lo ang, he khawvêlah pawh hian he natna chi khat, mak zet nei hi an awm tak tak lo bawk ang, thawnthu-ah leh film-ahte chuan nei an lo awm pawh a ni mahna, chu pawh a lem vek, phuahchawp mai mai a ni, a takah zawng, awm thei pawh a ni lo, ani pawh hian a nei hauh lo ang.

Mahse, ka ngaihtuah ngun poh leh ka rinhlelhna chu a zual telh telh mai si a, lehkhabua ka chhiar țhin leh youtube lama ka en țhinte ka han ngaihtuah chhuak leh a, chan chawp han ti ila youtube lamah chiang tak takin hmuh tùr a awm reng a, an awm dàn leh Jakob-a awm dàn hian inanna riau an nei ka ti a; mahse, chutiang tùr chuan ka ring phal meuh lo deuh bawk si, ni lo tùra ka duh vàng pawh a ni mahna. Ka ngaihtuah nasat avàng chuan ka mut lah chu a chhuak thei dêr lo mai lehnghâl a, rilru nasa taka ka sèn kualna lamah hostel kan awm laia ka roommate Sapna-i thu sawi, thawnthu ang maia ka ngaih țhin chu ka hre chhuak ta zawk a. A sawi țhin lai khân thawnthu ngaihthlâkin  ka ngaithla țhin a nih kha, Kristian a ni si lo va, bâkah, a pa thil sawi a sawi chhàwn mai mai kha a ni bawk a, ka ngai thutak ngai lo. A pain an zinna lama nu pakhat, amaha mi pali rawn inlâr țhin a sawi țhin thu a sawi a nih kha. Amaha rawn inlâr țhìn pakhat phei chu thinchhe zet leh sual zet mai a ni nghe nghe a, a àn a chhe bawk si a, mite pawhin chutianga a awm châng chuan an hlau thei viau niin a sawi a; mahse, a rawn pângngai leh hnuah a țhiante leh chhûngte'n a awm dàn leh chêt dàn an hrilh chuan hrehawm a tiin a zak viau țhin a, pâwnah pawh a chhuak ngam lo țhìn niin a sawi.

Mahse, Jakob-a hi chu chutiang chu a ni ve hleinem, min biak loh chhan kha chu a mood a off a ni ve mai a, kei pawh ka mood a off fo a, țawng pawh ka peih ngai lo a nih kha. Mi zîngah min hria anga awm a duh lo ve a ni mai a, mi zînga min biak chuan miin kan inngaizâwng angin an ngai ang tih a hlau pawh a ni thei. A, multiple personality zawng a nei lul lo ang, Mizoah nei kan la awm lo tawp ang, kan la tlêm lutuk!

Chutiang lam hlîr mai chu ni tin mai chuan ka ngaihtuah chho ta a, ka ngaihtuah chhan hi ngaihzâwng lam vàng a ni lo, amah hmuha han chîk leh zual pawh ka duh țhin viau a; mahse, hmuh tùr a vângin  kei lah ka lêng chhuak hman meuh bîk bawk si lo, chîk deuh taka a chanchin mi han zawh dâwn lahin miin min ringhlelin thil dik lo eng emaw a awm an rin ka hlau ve bawk si a, ka rilru erawh a chàwl lo khawp mai thung. Kimi leh Amos-ate'n a chanchin an sawi tam tak ațang leh mit ngeia ka hmuh ațang pawh hian thil dik lo chu a awm ve ngei a ni tih chu ka ringhlel lo va; mahse, ka ring duh lo a ni ber zâwk ang chu.

Ni khat chu office-a ka awm laiin min rawn be ta hlawl mai a, phone number ka pêk ațanga min rawn biak vawi khatna a ni nghe nghe, a phone number ka nei ve si lo va, ka chhâng hreh ru viau nghe nghe a.

"Aizáwl ațangin ka rawn haw dâwn chiah a, eng nge ka rawn hawn ang che? Duh deuh bík i nei em? Ei châkte pawh i nei ngei ang a, i duh ber han sawi teh le," a rawn ti a, a aw ațang chuan amah a ni tih ka hriat nghál avàng chuan mak ka ti kher mai. Engtik laiin nge maw a lo va kal ni? A reh vang vang ka lo tih chhan hi Aizáwl lama a lo va kal daih vàng a lo nih chiah hi.

"Eng mah ka duh hran lo ve," ka tih chuan," Han sawi teh, eng zât man pawh ni se ka rawn hawn ngei ngei ang che, pawisa lamah chuan 'no problem'," a rawn ti leh a, 'no problem' tih a sawi dàn chu a nuihzatthlâk angreng lutuk a, ka nui chhuak hak nghe nghe a, a rawn thaw hak a. 

"Ka hmuh châk tawhzia che hi, tunah tak hi chuan thla neih ka châk ber, ka rawn bir chak khawp ang," a rawn ti leh a, a rawn sawi thutak ve bawk si a, lo nuih chu ka ngam chiah bîk lo, pângngai takin zawhna ka zâwt ta zâwk a.

"Eng nge Aizawlah chuan i tih rêng rêng a?" tia ka zawh chuan a phun sup a, a sawi erawh ka hre chiang lo, eng tak chu sawi ni maw tia ka ngaihtuah lai chuan," I duh ber chu han sawi phawt teh, rawn haw thuai ka duh a nia," a rawn ti leh ta daih a, eng mah ka duh loh thu ka han hrilh leh chuan a thin a rim dâwn dâwn ta maiin ka hria, min rawn záwt nawn leh tho a, "Aizawl sweet," ka ti ta ringawt a ni, chu chu buaithlâk lo ber leh pawisa hek lo ber tùrah ka ngai tawp mai.

Min rawn biak kha dâr 10 bàwr vêl a ni a, tunah zanriah ei kham a ni tawh a, a rawn thlengin a rawn tluang em tih pawh ka hre lo, amah zawh lah ka duh teuh si lo, ngaih dàn mak a lo nei palh ang, bâkah, amah kher lo mi dang pawhin min lo chhâng thei tlat bawk.

Mut ka tum lek lek tawh tihah a rawn lang leh hlawl mai a, ka han hmu chu ka meng phar ãwk mai nghe nghe, thuamhnaw vâr hi a ngaina viau a nih ka ring, tunah pawh a vâr a ni a rawn hâk leh tawh ni, a inhmeh êm êm bawk a. A thuamhnaw hi sûk a huphurhawm țhin ngawt ang, súksaktu pawhin a huphurhin a ning ve ngawt ţhin ngawt ang chu. A chhan chu helai phei chu thingtlâng a la ni ve a, motor khû chu tam ve lo mah se vaivut khû a tam ve thung a, tunah phei chuan khua a ro țan tawh lehnghâl a, vawi khat lek hâk chhuah pawhin a bàl chak dâwn lutuk a ni.

Min en vang vang a, kei pawhin ka en vang vang tho; mahse, ka en dàn hi chu a dang, hmeichhiain mipa a en dàn angin a ni lo, ka chîk vàng a ni, zanina lo lêng hi amah ngei niin a lang, min en duh dàn ațang hian.  

Dawhkànah chuan paper bag hi a dah a," Aizâwl sweet tui ber ber chi," a ti sup a, thil khai a nei tih pawh ka lo hre hauh lo. Dawhkànah lah chuan a dah ta mai si a, han duh loh leh lâksak loh chi a nih tawh loh avàng chuan," Ka lãwm e, a tui ngawt ang," ka ti ve ta a, en pawh ka tum chuang lo. Ani erawh chuan," I en chhin dâwn nange? I duh záwng a ni meuh hlawm em han en chhin la?" a lo ti a, chutia a tih tâkah chuan nuam lo ka ti ta deuh a, ka han en ve ta a. Sweet chi hrang hrang a lo ni a, han en réng réng pawhin a tlâwm fahran hlawm lo ang tih a hriat theih nghâl mai a.

"A va tam êm êm ve!" ka han ti hlut a, ani chuan,"Pakhat kha han ei chhin teh, lollipop phei kha chu a cial viau a nia, ka hmuh hmasak ber che pawh khân khatiang lollipop kha i fâwp a nih kha, ka la hre reng," a ti leh a, ka en hau ringawt! Lollipop hi ka ngaina hran lo va, mi hmuh lai phei chuan ka fâwp mang lo ang, sweets lam hrim hrim pawh hi ka ngaina lutuk lo, ei pawh ka ei khât rêng bawk a, lollipop ka fâwp lai min hmu anga a insawi hi thil mak tak a ni.

"A ni maw?!! Khawiah nge min hmuh a?" tiin chîk zet hian ka en a, ani lah chuan," Pakhat tal kha han ei teh, tui i ti ngei ngei ang, a cial hlawm ka tih tawh kha," a lo ti daih thung a, kei pawh chuan chutia min rawn hawnsak ve ta chu tiin pakhat chu ka han la chhuak a, a káwr ka han kheh chuan a chhûngah mûm hnih a lo awm niin, pakhat chu ka pe ve nghâl zat a. Amah hi hlauhna ka nei tawh lo va, hlauh ahnêkin amah hriat chian châkna nasa tak ka nei tawh a ni.

A lèn chhûng chuan chîk takin amah chu ka ngaihven reng a, min en leh reng țhin erawh ka zak ru ve tho; mahse, hetia min en hian amah dik tak ngei kha a ni tih ka hriat chian phah thung a, zak lo ang takin ka awm a, ka be bawrh bawrh a. A haw har vak lo, a hnu lawkah ka mu zui nghâl a, ka muhil țêp tihah chuan ka phone a rawn êng pap a, ka han en leh hrâm a, *Gudnite, Kawaī*  tih hi number ringawt ațangin ka dawng a, peih lo zet hian ka nui ringawt, min rawn thawntu ka hria alawm, vawiin lam khân min rawn biak tawh kha, chuan, zaninah pawh a rawn lêng bawk a, vawiin chu nilêngin Jakob-a dik tak a ni ngei e.

Kan khuaah lo kan nei ngai lo va, lo pawh ka la vât ngai lo bawk. YMA member chu mimal ni chiah lo, mi pathum infin khâwm lo vát tùrin kan inhlawh dáwn a, a hun chu Inrinni, ka hman nî a nih vàng leh YMA member ka nih ve miau avàng chuan Kimi'n min sàwm pawh chuan ka lo aw vat rêng a. Lo vât ngai lo mah ila ka kal ve châk tho a, ka vah vawi khatna tùr a nih avàng chuan ka phûr ru viau zâwk a ni. Ka thiam lohna tùr pawh ka hre lo, 'Mau sah tlúk kha a ni mai a' tiin, huphurh lo fê chuan hnatlâng tùr chuan ka insiam chhuak ve ta a. Inhliam palh kan awm thei tiin damdawi Betadine leh a tuamna tùr hmanrua leh lapua ka ak chhuak mai mai a. Remsiamatehovin min lo hmuh chuan min lo fiam nasa mai a, Amos-a phei chuan," I chak àwm ropui si, i bulah ka bung duh miah lo a nia, ka sawi lâwk a nih chu," a lo ti vat a, a nui duh miah lo zui, mi dang chu an lo nui dar dar a, he pa hi zawng, mi fiam hi a thiam ve a, a huat theih bawk si loh, melh ralhin lei ka chhuah khum ringawt a.

Puia'n chem min ken kêp a, hriam takin a lo tât sa vek bawk a, a hmun kan zu thlen hma deuh chuan kan vah lai tùrte chu an kàwk kual a, YMA member kan awm ve nual avàng chuan kan zo hma ngawtin ka ring ve ngawt a; mahse, hmeichhia chu vah ve an lo rem ti lo va," Eirawng lo báwl mai r'u," an ti ta daih a, hmeichhe thawk chhuak kan awm ve nual a, hruaitu upa lam deuhte nèn phei chuan eirawng báwl tùr ringawt pawh chu sawm thum dáwn kan awm nghe nghe a.

Hmeichhia chuan hmarcha kan râwt a ni mai, chaw lah chhum ngai lovin fûn sa kan keng vek a, chawhmeh atân Dãl leh Alu an kan pawlh a, Anthûr tui an lum bawk a, a tui ve reuh ngawt ang chu. Chaw ei hma chuan hmeichheho chuan tih tùr kan nei si lo va, a țhen kan thlang luiah kalin a țhenin Tumbu an zawng bawk a, kan indaih bawk nèn, kan vãk suau suau a ni ber mai.

Mipaho lo vât chu an thãwm a nasa ngei mai, mau an sât rí, thing tlu rí leh mau puak pawp pawp rí te chu hriat tur a awm reng a, a țan tìrah phei kha chuan ka hlau deuh nghe nghe; mahse, a hnuah erawh chuan ka hlau ta lo, lo vát thãwm ka lo la hriat ngai loh vàng mai mai a ni.

Chhùnchaw fâk tùra an rawn kal kháwm chuan kan awmna bul deuh mai chu an rawn vát thleng tawh a, hmeichhe țhenkhatte phei chuan an lo au chèl chúl mai nghe nghe a, a aw sîn zâwkte'n an lo auh avàng chuan Amos-ate pawh an rawn uang phei nasa khawp mai a, an rawn nui phei bãwk bãwk hial a ni.

Jakob-a pawh kan kal lam khân ka hmu ve kha a ni a; mahse, min hria anga a awm leh tawh loh avàng leh min biak loh avàngin ka be duh bîk lo va, nula dangte nèn an kal tlâng bawk a, a mizia a thlâk leh tawh bawk nèn, ka be pawp duh ta lo a ni. 

Chaw kan fâk lai chuan thlifîm a rawn thaw har har a, kan awmna lai tak hi chu ní a sa lêm lo va, lum pawh ka ti hran lo bawk; mahse, lo vah vànga thàw sâ mipaho chuan," A țha, thaw zêl rawh," an lo ti a, a țhen chu chaw bàr chàwl meuhin an han faifûk bawk a, thlî pawh chu mak takin a rawn thaw chhunzawm ve zêl a. Ka ril a la țàm loh êm avàng chuan chaw chu tlêm ka ei a, ka duh tâwk thuai a, Kimi chuan," I va ei tlêm ve? Chawfâk zawhah hi chuan kan vát ve tawh dàwn asin, ei țeuh rawh, i chau palh ang," a ti a; mahse, ka ei lui peih chuang lo, ka chauh phah lêm lo ang chu maw.

A tam zâwk chuan an la ei a, ka ei kham tawh avàngin ka tiffin chu tleuh tùrin tui awmna lui lam chu ka pan a, ka tleuh zawh chuan ka lét leh nghâl a, mi dang pawhin an awmna zâwna tuiah chuan an tiffin chu an tleuh ve bawk a, chutih lai chuan thlî chu a rawn thaw leh har har a, nuam hiau hiau tak a ni, ràl lehlama mau leh thingte pawh chu an kúr suau suau hlawm a. Chutah, eng emaw ni hi a rawn ri țhat țhat a, thlíin mau a chhèm kùl a tliak dáwn ni tùrah ka ngai mai a, ka ngaihven lêm lo; mahse, vawilehkhatah a ri ta dup a, a thaw suau a, ka nghîng deuh lawih nghe nghe, au deuh chûl ri ka hria a, per deuh lawpin ka tlu ta niin ka hre leh a, eng emaw hian min rawn delh bet ta bawk. Ka maimichhìn tlat avàngin min delhtu chu eng nge a nih ka hre mai lo va, ka hlau pah bawk nèn, ka meng ngam lawk lo nghe nghe.

"I nâ em?" 

Ka meng chhuak ta nghâl a, Jakob-a aw dik tak a ni. Engtia rei nge ka maimichhìn pawh ka hre lo, nâ ka neih àwm ka hre lo va, min delhtu erawh a rit deuh hlek thung, mihring lo niin Jakob-a a lo nih nghe nghe hi.

"Eng nge ni a?" ka ti chhuak ta sap a, ani erawh chuan," Nâ i nei em?" a ti leh thung a, nâ ka neih àwm ka hriat loh avàng chuan," Aih, ka neih àwm ka hre lo," tiin ka chhâng a, chutah, a awm dàn chu siam remin nâ ka neih leh neih loh chu min han check-sak thuak thuak a, mak ka la tih avàng leh a ngaihna ka hriat loh avàng chuan ka lo awm mãwl tawp ringawt a.

"Ka lâwm e, ná i nei lo hlauh chu,ka hlauhthàwnzia chu a," a ti a, țhu chhuakin min han kai tho zui ve ta nghâl a, a hawi kual a, amah ka en reng avàng chuan a bek lama thisen rawn hnâm chhuak chu ka hmu a," I bek kha a thī a nia," hlauthãwng tak hian ka ti a, a phun deuh sup a, a bek chu khawihin," Eng tham mah a nih loh hi," a ti thung a.

Mi dang chuan min rawn ngaihven lat lat a; mahse, hlauhthàwnawm leh hliam nasa kan tuar lo va, a tihzia khawp mai. Thli thãw khân an lo vahnaa thing lian pui ding, an sah rèk tawh, tlu thei mai tawh tùra an kalsan chu a lo titlu a lo ni àwm a, chu thing chu a tlûk lohna lam tùrah thli chuan a rawn chhëm tlu a, thing dang rawn vuain chu thing tlu chuan min rawn vaw phâk hi a lo ni a, ri suau kha thing tlu ri ngei chu a lo ni. Ka piah lawka Sawmi erawh chu vaw pha lo chiahin a lo tlãnchhe hman chiah chiah bawk a, vànneihthlâk takin ka ti dáwn nge, ka bul hnaiah Jakob-a a lo awm remchâng a ni chêk ang chu, min rawn bawhthlu a, amah zâwk chuan ka tuar ai a tuar ta a nih ber chu.

Pem hliam ka nei lo va, hlauhna pawh ka nei lëm lo; mahse, a hnua thil thleng ka han ngaihtuah lêt chuan ka thâ chu a khùr nasa ta thung a, a bek ka tihfaisak lai pawh chuan ka tha khùr chu a la reh thei lo. "Chàwl lawk teh, thâwk han la hawk hawk phawt la," a ti tawp nghe nghe a, thisen chhuak ka hlauh vàng lam ni lovin thil thlengin min țhàwn vànga khùr ka nih a hriat thiam ve tho ka beisei.

Ka chàwl deuh vang vang a, ka tha khùr chu min tihrehsak a tum ve nge ni, ka kut chu a rawn vuanin," Hlauhawm a zo vek tawh a nia," a ti sup a, chutah, thaw hawkin," Tu phiangsenin nge maw thing kih thlûk loha khatianga hlauhawma dah rêng rêng ni! Mãwl hlawm lutuk!" a ti ta hluk a, mak ti zetin ka en dâwrh nghe nghe a. 

A la duh tâwk mai lo. "Eng nge, an mãwl alawm, khatianga hlauhawm thei te chu engah nge sawi pawh an sawi chhuah loh? Tu emaw tal delh hlum se an ti em ni zâwk? Rilru hrisêl lo hlawm lutuk mai! Ka hriat chhuah hun chuan an châk lo ngawt ang, nang hian hliam tuar phei la chuan... ka phîn darh vek ang," a ti leh ta tùn tún mai a, a țawng chu mi dangin an lo hria ang tih ka hlauh êm avàng chuan a hnu leh lam tùr ngaihtuah lo lêk chuan a bân chu ka vawnsak ta vat a.

"Zahngai, insûm teh khai, tu thiam loh mah a ni lo a nia, hei, kei phei chu ka vànnei a, engtin mah ka awm loh hi, nangmah vàng chauhin ka him tih erawh ka hria a, i chungah hian ka lãwm tak zet a ni. Le, i bek chu han chhunzawm leh tawh ang hmiang," ka ti ta daih a, a thinrim tak tak ang a, tih loh loh tùr tiin buaina a thleng palh ang tih ka hlau a ni. Thing kittute pawhin nichina thil thleng kha thleng thei tùrin an ngaihtuah pha tawp nâng, thli lo thaw kher khân a zâr leh a hnah a chhêm che lo thei lo va, rin loh deuhin a lo tlu ta tih a lang reng a ni. Tu thiam loh mah a ni lo ve.

A bek thî kan tihfai zawha damdawi ka hnawih lai chuan Arini kha a rawn kal hnai ve a," A na viau em?" tiin ngaihtuah tih hriat tak hian a rawn zâwt a, ani erawh chuan a lo chhâng hauh lo va. Arini vêk chuan," I hliam na vak lo hlauh a, a làwmawm ngawt mai, ka lo hlau lutuk a," a ti leh a, Jakob-a chuan,"Min lo ngaihtuah viau duh suh, ka na lo. A thuhrimah, min lo ngaihtuah viau tùrin ka eng nge maw i nih rêng rêng le?" a lo ti ta daih a, an inbiaknachu hre lo ang hmakin ka awm, a chhan chu Jakob-a chhànna chu Arini tân chuan a zahthlâk dâwn hle si a, ka ngaihtuah lo der tawp, ka khawngaih ru viau a ni.

"Zodin, i ti mak thei êm mai aw, hetiang zâwng hian min fiam ziah suh," Arini chuan a ti leh a, a țawng chhuak ațang pawh chuan a rilru a nâ tih a hriat mai a, pakhata lah chuan," Eng aiah nge ka fiam che nia i ngaih ni? Jakob-a hian nula ka fiam mai mai lo a nia, ka fiam lo che, ka hrilh che a nih chu," a lo ti leh mai a, hrehawm ka lo tihzia mai chuh, awm loh daih ka lo châk! 

Arini chu a inher ta nghauh a, a kal sawn zui ta nghâl a, ka khawngaih reuh kher mai. Jakob-a thung chu a chek tlak tlak a," A tu chu nge maw a nih ni? Min ngaizâwng tih hriat reng, ka duh zâwng a ni hauh lo, ka bula i awm ve reng laia khatia a rawn tih ngam ni, a huaisen hle mai, zilh hlak a ngai a nih dâwn kha," a ti leh bul bul mai a, chutah, a han nui hawk a," Zodina emaw mi ti ziah hlawm mai, Zodina chu mi lem a ni, mi lem nih hi ka duh hleinem, dáwihzep si," a ti leh bul bul a, mak ti zetin a thil sawi chu ka lo ngaithla kar ringawt.

*KAN BEISEI THIL HI KAN RIN LOH LAI TAK TE HIAN A LO THLENG VE FO A NIA, CHUVÀNG CHUAN, BÀNSAN MAI LOVIN LO NGHAH HI PEIH TA ILA...*