☆THE SWEETEST HANDCUFFS☆ - 6 By Dingdi Pachuau

 ☆THE SWEETEST HANDCUFFS☆ - 6 By Dingdi Pachuau

A thil sawi chuan zàn ka mut dáwn thleng chuan ka ngaihtuahna a luah zui a, mak ka ti viau lo thei lo. Vawiina a țawng dàn ațang kha chuan Jakob-a chu a ni ngei mai a; mahse, kal lamah pawh khân ka hmu reng a, ani pawhin min hmu a nih kha, min biak chu sawi loh, min hria ang pawhin a awm lo va, a mood a fuh lo riakah ka ruat a; mahse, Arini bula a țawng dàn mawlh kha, a mak êm a ni, hriat thiam a har alawm. Arini kha chuan a țawng dàn kha a lo hriain khatiang hun kha a lo tawng zeuh zeuh tawh a nih ka ring.

"Hetiang zâwng hian min fiam ziah suh," a ti a nih kha, a fiam nìa a la inngai a nih chuan a zia viau, a kal sawn hnua a thu sawi erawh kha chu hria se chuan fiam angah chuan a inngai hauh lo ang le. Thâwk ka la hawk a, vawiin khân vànneihthlâk takin Arini bulah ka chunga a rilru put dàn a sawi lang lo hlauh a, min rinhlelh dun loh hrâm ka beisei. Han sawi lang zeuh phei se chuan Arini tân mai ni lo, ka tân pawh a zahthlâkin a hrilhhaithlâk duh dâwn êm asin.

Zanin khân a rawn lèn ka ring deuh hlek a; mahse, a mood a off leh tawh a nih loh pawhin a chàu deuh a ni ang, a rawn dîkdãk hauh lo va, rin loh lam Remsiamate an rawn lêng ve thung a, vawiin lam boruakte kha sawi chhuakin Jakob-a chu an fak rualin kei chu min han fiam ta thung a, Amos-a pek chuan," Spiderman kan ti dâwn nge, shaktimaan kan ti dâwn zâwk ni, a lo lan hun kha a fuh thlâwt a ni, lo lang thut lo se chuan zaninah pawh hian țawngthu chhe lo ah, kan tlaivâr hial maithei asin," a han ti kher a, kei chuan,"I sawi râpthlâk êm mai aw," ka lo ti vat a, ani lah chuan," Thil thleng thei alawm ka sawi le; mahse, Pu Vàna khian bawkkhup meuhin a lo thlîr reng zâwk che a, a thleng lo mai mai a nih kha," a ti leh a, Nunmawia chuan," Țawngkam hi a thiam thei a nia," a lo ti zauh a, ani lah chuan," Ka lo awm hnai ve lo kha chu a pawi ngawt mai, kuah theihna che chance țha lutuk a ni si a, chaw ka lo ei rei lutuk kha a ni pawi ta chu, engati nge maw ka lo ei rei bîk êm êm le?" a ti leh a, a âwm chu a han chùm tak ang dap dap a, thinrima lâk theih pawh a ni lo, kan nui țhâ hlawm a, Remsiama lah chuan," Ei tlêm deuh tùra ka hrilh ka hrilh che pawhin i zàwm duh lo a nih kha," a lo ti ve a, Amos-a chuan," He thil vàng hi alawm, engah nge a dawn hlâwk viau ni?" tiin a dul chu a'n bêng leh a, mi dang chu kan lo nui tlâwrh tlâwrh a, ani erawh chu a nui duh dér lo, thutak zet hian a dul chu a khât tâwk hian a han béng leh țhìn a, kan nui tàwp hlei thei lo a ni ber mai. 

Nâ ka nei lo ka ti tak nain ka mawng leh ka hnungah perhtêin min lo chhun ve niin, ka inbualin ka hre ve chiah, tui leh sahbawnin a chiah chiah khân a thîp ta vât vât si a, dàrthlalangah ka en nghe nghe, a vun a lo pilh ve nian a, nasa phei chu a ni lo.

A tûka kan inkháwm chuan țhut chu a nuam fahran lo a, ţhut pângngai pawhin ka țhu hlei thei lo, mawng ber kher a ni bawk si a, a fuh lo tak tak a ni. Mi hriat lohin mawngtam vei lam nghat țha ngam lo chuan inkhâwm chhûngin ka țhu a, thuhriltu thu sawi pawh bengah chuan a lût nain rilruah erawh a awm mawh khawp mai, bàn thuai thuai ka nghahhlelh ber țum a la ni hial ang chu.

Tàwpna hla sa tùra kan ding chu ka thaw huai mai a, zài pawh ka zâi tui ve ta deuh hlek e. Biak in ațanga kan chhuah chuan haw nghâl mai ka tum deuh a, Kimi bulah pawh ka sawi diam tawh nghe nghe a; mahse, Pi Vàni chuan min lo kovin," Pu Zuala khân hmuh che a duhin ka hria," a ti a, ka han hawi kual a, Pu Zuala chu ka hmuh mai loh avàng chuan," A zung ta lawk a nih kha, lo nghâk lawk mai rawh," a ti leh a, bet lo angreng tak chuan ka ding ta rih a.

Minute hnih hnu vêlah chuan Pu Zuala chu rawn kal ve tain," Min lo nghâk ngar ngar mai a ni maw? I lo ning viau em? Ka rei ta phian si a," inthiam loh hmel tak chuan a rawn ti a, kei erawh chuan," Rei lo ve, ka ding ve chauh alawm," ka lo ti thung a, ka han nui deuh hlek a, ani chuan," Nimin lama Zodina bek hliam kha maw le, kan lo hre lawk lo va, tukin lamah a piin a tihfaisak ve a, a tuamsak thiam leh tawh si lo va, nang nula mawng zãngah ka rawn țahawh tawp mai che a ni, rei pawh a ngai lo ang, ani phei chuan koh buai che ngai a ti miah lo va, ka hrilh che tih pawh a hre lo ang," a ti dap dap a.

"Ni dâwn tak! Aw, ka va bengvár lo ţhìn tak êm! Ka bul hnaia a lo awm hlauh kha ka vànneih phah tehlul nèn, aniin a tuar phah a. Chanchin ngaihven tùr leh eng nge a an zêl tih hre tùra rawn kal àwm tak hi ka ni a," ka lo ti ta vat a, a rûk tak chuan mãwl ka intiin zahthlâk ka ti khawp mai, phone-ah ka be hmasa ngam lo a nih pawhin an inah, a chanchin ngaihven tùr tala va kal chu tih ngêi ngêi tùr hi a ni a, mi bengvâr nihna pawh a ni a...

"A, eng tham a nih loh kha, tlangvâl tân te chuan chaw ei ti tui tham pawh a ni meuh em maw ni?" a ti phawt a, chutah,"I hman remchàn hunah erawh rawn kal theih hrâm chu tum la tiraw? A thlàwn pawhin ka ti hauh lo a nia," a ti leh a, kei chuan," A, a ngai teuh lo mai. Tunah hian hawin ka inthlâk ang a, ka lo kal dáwn nia, inah a awm ang em?" ka ti vat a,"A, chuti vut vut pawh a ngai chuang hleinem, chawhnu lama i rawn kal zawk hman chuan a țha a ni mai a," a tih leh pawh chuan kal ka tum ta tho a, haw a tum ve tawh tho bawk nèn, kan haw tlâng zui nghâl a.

An inah ka la kal lêm lo nain a awmna lai chu ka hre tawh a, min han hrilh ve leh luam a, min kawh hmuh pah bawk a, inah thuamhnaw inthlâkin Jakob-a lu tuamna tùr atâna thil pawimawh chu ka la khâwm a, ka chhuak zui ta vat a. Kawngah mi tawh tùr ka hmu lêm lo va, ding takin an in lam pan chuan ka kal ta vang vang a, khaw hmâwr bera awm an nih avàngin pan ve deuh vang vang a ngai a, ka kal chak ve deuh bawk a, ka hah ve țêp a ni.

An compound chin chu a lo hriat khawp mai, kawngpui bulah chuan thingpui kûng hi a intlar phei țhât a, a rual phei țhât si a, hmuh a nuam khawp mai. Huan pawh a fai a, an in panna kawng sîr tawn tawnah pawh chuan thingpui kûng hi  ngîl taka insi țhapin a intlar leh zui mai a, an in bul hnaiah erawh a kual rûih ve ta thung a, hmuh a nuam tak zet. An kawt záwl zâu deuhah chuan phùl a țo chhuak deuh vek a, kea rahna tùr leh motor tlànna tùr tih loh chu phùl hmun a ni mai, phùl chu enkawl ngun tih a hriat hle a, an cut-na pawh a la rei lo a ni ngei ang.

Han hawi kual vak vak chu ka hreh deuh avàng chuan in chu ka pan ding ta a, kawngkapui ber lo inhawng mah se ka han kik a, ka kik ruala ui lo bauh thãwm ka hriat chuan ka phu nasa kher mai, ka hmanraw ken pawh ka thlauh lo chauh chu a ni!

Ui hau thãwm ka hre nghâl vat a, ka pu a rawn lang zui nghâl bawk. Min rawn hmuh chuan a nui var var a," I nih ka ring rêng a. Lo lút rawh khai," a ti a, ka zui lût ve nghâl a. In chhûng chu pâwn lam ațanga en aiin a lo zau daih a, a fel fai phian bawk a, a chhûng an chei vêl dàn pawh a tâwk tiu teu viau mai. 'Thingtlânga hetiang in han neih chu' tiin a rûkin ka lo ui rilru a, Pu Zuala chuan," Țhu rawh khai," tiin țhutna min kawh hmuh a, mawng lehlam dinhmun hre ràna ka țhut hnu chuan," I rawn hmanhmawh si a,  thingpui pawh i in hman tawp lo ang, kan in dâwn nia, muangchângin le, tih tùr dang i nei lo ang chu tiraw?" a ti leh a.

Ka hnial ve viau nain thingpui chu min rawn pe lui ta tho a, chutih lai chuan in chung ațangin Jakob-a chu step-ah chuan a rawn pên thla ta chhak chhak a, a inkhâwm loh vàng nge ni, ka hmu chul deuh rap nia. T-shirt dum, rawng da ve deuh tawh lam leh kekawrbùl a ha a, batta slipper a bun leh bawk. Min rawn hmu lawk lo a, a puin a koh tâkah chuan rawn hawiin min rawn hmu zui ve ta nghâl bawk a, pawisawi loh hmel zet hian a han nui deuh sak a, a puin,"I lu kha tuam loh ringawt zawngin, bàl leh bawlhhlawh a lût thei si a tiin ka ko ta ringawt a nih hi," a tih chuan inthlahrun hmel tak hian," A, a ngai hleinêm, ka pu, kak nasa pawh a ni lo va, dârthlalanga inenin ka tuam ve thei reng asin," a lo ti vat a, a awka chhuak leh a nui hmêlah chuan Jakob-a ka hmu leh tawh lo, Jakob-a ni tùr chuan a inthlahrung mah mah ka ti bawk.

Thingpui inin kan piah deuhah chuan a țhu ve a; mahse, a țawng ve mang lo, Pu Zuala chu a titi bawrh bawrh reng a, ka lo inrawlh zeuh zeuh a, a chângin kan nui a, a rûkin Jakob-a chu ka chík deuh reng a, kan nuih laia a nui ve deuh sak sak tih lohah chuan awm pângngaiin a awm a, min ngaihven ang pawhin a lang lo.

Arini a rawn lût ve hlawl mai a, a la  inthlâk ve loh avàng chuan ina haw lovin he lamah a rawn kal nghâl tih a lang reng mai, a ngaihtuah viau a ni ngei ang chu. Pu Zuala chuan hlim hmel takin a lo chiau-au vat a, thingpui a lo pe nghâl vat bawk. Kan bulah pawh țhu lo chuan Jakob-a lamah chuan kal nghâlin ngaihven tih hriat tak hian a chanchin chu a zâwt nghâl vat a, nimin lam boruak kha chu a theihnghilh vek tawh a ni ngei ang, pakhata pawh chuan țha deuhin a lo chhâng ve leh mai bawk a.

A pu a awm ve reng avàngin em ni țha takin a biak le? Nimin lam te kha chuan mi dang an awm lêm lo bawk a, mitmei pawh a vêng lo a nih kha, tunah hian a pu mitmei a vêng tihna em ni ta ang? Pakhati lah hian a duhin a ngaihven hmel si, chuti ni lo se chuan  nimina a tih dànah kha chuan han tihtauha han thinrim khum ve deuh àwm tak a nih tehlul nèn, pakhata pawh hian tunah tak hi chuan khatiang khân a țawng khum theu ang tih ngaihtuah phâk a ni hauh lo! 

A lu pem chu ka han tifai leh a, damdawite hnawiha ka tuamsak leh hnu chuan,"A làwmawm viau rualin a inthlahrunawm ka ti khawp mai, ka tibuai ta zêk si che a, ka pu hian a lo koh che ka lo ring pha hauh lo asin le," a ti sap sap a, kei chuan," Tibuai lo ve, tihbuaina a awm lo, keimah vànga tuar i ni záwk a, ngaihven zui tùr che ka nih tehlul nèn, ka bengvâr lo lutuk a," tiin thuphâ ka han châwi ve niah niah a, chutah," Zànah a hrehawm em? I mu thei em?" ka tih zawm zat a, ani chuan," Mu thei e, ka mu tui lutuk, kak nasa a ni lo va, harsatna ka nei hauh lo," a lo ti leh a.

Ka tuamsak hnu chuan ka awm rei ta lo va, ka chhuah dáwn chuan," I hming kha Tluangtei a ni tiraw kha? Kan tibuai si che a, i hah manah," tiin pawisa min pêk a han tum a, kei chuan," Ka duh hauh lo a nia, a ngai miah lo bawk, keimah vàng liau liaua hliam tuar i la ni zui a," ka ti a, ka la duh hauh lo. Pu Zuala chuan," La mai mai teh, ni dangah pawh kan la rawn ko leh țhìn dáwn che a, i lâk loh chuan kan ko ngam tawh nâng che, la hrâm mai rawh," a lo ti ve bawk a; mahse, ka lâksak chuang lo, keimah vàng liau liaua hliam tuar a ni si a.

Haw kawngah chuan inkhâwm bângho pawh ka tâwk ta nual mai a, min be ve thliah thliah hlawm a, kei pawhin ka chhâng ve zêl a. Min hre vek tawhin ka ring a, kei pawhin an hmêl ka hre ve deuh vek tawh a, kum naupang tê tê hi an hming ka hre lo deuh a, chubâkah, hmun danga awm ka la hmuh ngai hauh lohte pawh ka hre lo bawk ang, chutiang tih lohah chuan an hmêl chu ka hre vek tawh a ni, a tam zâwk pawh an hming ka hre  ve tawh bawk.

Veranda-a țhu dar dar pah chuan thil thleng chu ka han ngaihtuah leh a, nichîn kha chuan a nungchang a danglam leh tawh a nih kha, ka hming pawh kha a chiang vak lo a nih hmel, Jakob-a kha chuan min hriat viau si kha, a chângin min hre lo der a, a chângin min ngaizâwng der a, a châng lahin min hre ve leh tho bawk si a, a zia hi a mak a ni ringawt mai, a tider a ni ang han ti dâwn ila a tihder mai mai  peih chu ka ring chiah bawk si lo.

Kimi rawn kal chuan," Ka nuin Pu Zualate ina i kal thu kha a sawi ve sia," tiin ka bulah chuan a rawn țhu ve nghâl zat a, kei chuan," Nia, ka lo haw tawh a," ka lo ti ve mai a. Ani chuan,"Kob-a lu kha em ni?" a ti leh a, hre thiam tak chung hian ka lo bu nghat a, ani chuan,"A pu hi chuan a duat ve bâkah a ngaihtuah ve a, eng emaw hliam a neih hlek hi chuan a buaipui ve thei a nia, a tupa hmuh hmasak ber kha a ni ve a," a ti leh barh barh a.

"Jakob-a hming pum hi eng nge ni?" tia ka zawh chuan," Zodinsanga a nia, 'Zodin' tiin kan ko ber, 'Jakob' tih hi chu a tleiràwl chhuah țantirha a inphuah ni àwm tak a ni, a awm țhat duh loh deuh lai chho a ni nèn, a țhian kawmte lah chuan,' A inhmeh e, Jakob tih chu bumtua tihna a ni a, mi a bum fo si a,' te an ti mai mai a, ani pawh hian a haw lêm lo a ni chêk ang chu, bâkah, amah koh duat nân 'Vâlpuia' ti pawhin a inphuah tho, a ti maksak mai mai asin," a ti ta duah a.

"A nih mai mai chu a; mahse, Jakob tih hi a inhmeh berin ka hria," ka lo ti ve a, ani chuan," A châng chuan hming danga koh duh miah loh țum a nei a, 'Zodina ka ni lo, Jakob-a ka nih hi,' a ti țhin, a châng lahin,' Ka hming pawh in hre lo, Vâlpuia ka nih hi,' a ti thùl, kan ko kual vêl ta mai mai niin ka hria, nuihna hi a ti tam ve a," a ti leh barh barh a.

Nui chung hian," Kei pawh Zonuntluangi ka nia, a țhenin,' Tluangte' min tia, a țhenin,' Zonun' min ti bawk a, ka chhûngte chuan 'Bawihte' min ti leh daih a, a inang vêl viauin ka hria," ka lo ti a, ani pawh chuan," Um, chutiang deuh chu; mahse, ani chu mi koh dàn ni lovin ama inphuah a nia, a case a dang deuh hret," nui chung vêk hian a ti ve a, chutah," Vawi khat chu school-ah an class-a mi lehkhabu hi a lo ak pek a ni ang chu, lehkhabu neitu chuan,' A bo daih a, a rûk a ni ngei ang,' a ti a, Kob-a lah chuan,' Ka ru lo, ka la ringawt mai a ni,' tiin a țang tlat thung a, Head pawhin tihngaihna a hre miah lo, 'rûkrûk case' ni lovin 'la ringawt mai case' an awrhtîr țêp chu a ni, zirtîrtute pawh an nui tawp asin," a ti leh a.

"Ru lo a intih miau si chuan tihngaihna chu a vâng ve khawp ang, țan tak têa a țan hlauh phei chuan," ka ti a, ka nui zui hak hak a, ani pawh chuan," A ni alawm, a țang ve tlat bawk si a; mahse, lehkhabu chu a tâ a nih loh miau avàngin a pe lét leh ta tho a, chanchin hi chu a ngah ve asin. Amos-a pawhin a sawi țeuh tawh kha, a mood inthlâk chânga a nungchang danglam hneh lutuk hi mak ka ti ve deuh țhìn. Arini nèn hian an inkawp ve deuh ber a, ani pawh hian a hre chiang ang, Arini chu i hria ang tiraw?" a ti a, kei chuan," Aw, hria e, vawiinah pawh khân Pu Zualate inah khân a rawn kal ve a," ka lo ti vat a.

"Kob-a hi a buaipui hneh ve a, hmeh pawh an inhmeh ka ti, an hausa dùn bawk a, an hmel pawh a chhe lo; mahse, Kob-a hian a hnê leh thut țhìn em maw ni chu aw ka ti, a chhan chu i lo awm hma deuh hlek khân vawi khat chu an inhau inhnial lai deuh ka hre ru tawh a, Kob-a hian,' Min kalsan teh, ka hriat ngai che pawh ka hre lo, min thlah rawh,' a ti a, a thinrim vàng a nih loh chuan a hnê thut a niang ka ti mai a, Arini pawhin a kalsan ve mai a; mahse, a duhnain a ur thlu ngang a ni ang chu, a hnuah țha takin an inbe leh tho a, pakhata lahin a laka a thil sawi kha a hrechang leh tawh lo nge ni, tûn thlengin an la inkawp chu a nia, an ințhen tawh kher pawhin ka ring lo," a ti leh bawrh bawrh a.

Ni khat chu Office chhûngah awm peih lovin pâwnah ni lum âiin ka țhu a, ziah tùr awm ka ziak zo tawh a, vawiin chu U Ropuia a rawn kal lo va, ka mal viau. Pu Rova a rawn kal khât ta deuh bawk nèn, kei pawh mahni chauh chuan in chhûng vâwtah ka awm peih lo a ni.

"Nurse, vâwt i va ti àwm ve a?" tih ri ka hriat chuan ka en vat a, Jakob-a chu ka piah deuh lawkah chuan a lo ding reng tawh a, a lo nui deuh suk a, a lu a bu deuh zauh bawk a; mahse, a aw chhuak kha Jakob-a aw chu a ni lo deuh tlatin ka hria, lukhum kun deuhin a khum a, a mitmeng pawh ka hmu thei mang lo. Ka chîk ru deuh bawk a, a inthuam dàn pawh chu Jakob-a inthuam țhin dàn a ni lo, Jakob-a chuan a vâr a ngaina a nih kha, hnatlànnaah pawh khân a thuamhnaw hâk kha a vâr lam tho, rawng thianghlim zet tho a ni. Tuna a hâk lai Jersey rãng deuh phei hi chu a ngainat zâwng a ni lo tawp ang le.

"Ti angreng e, khawiah nge i kal dâwn a?" tiin ka han be zui nghâl a, ani chuan," Dàwrah ka kal lawk dáwn a. I awm hi ka ring rëng a, ka rawn pêng lawk a ni, hmân deuha ka kut i țhui pawh kha, hei, a dam chiang tawh asin, i țhui thiam bawk a," tiin a kut chu a rawn lek lang a, a nui pah suk a. Hei pawh hi Jakob-a nungchang leh chét dàn a ni lo tawp mai, ani chu ni se min hmuh tawp lo ang a, sawi pawh a sawi chhuak lo ang.

"Hun remchâng i neih hunah kan huanah lo kal ve ta che, nurse ni mah la, office chawlh hun in nei ve tho àwm si a, ka kut i țhui dam manah chawhmeh tùr thlai eng eng emaw i hàwn țeuh ang a tiraw? Ngawi teh, ka la rawn lawhsak ang che, i phû hrim hrim," tiin a kutzungpui chu a han lek kual leh vâ vâ a, chutah," Kan la sawi țha dáwn nia, dàwrah chuan ka'n kal tawh ang e," a ti a, min rawn enin a lu a bu leh nghat a, a inher a, a kal sawn zui ta nghâl a.

Rilru buai zet chuan ka en zui vawng vawng ringawt, tuna min betu kha Zodina em ni a nih? Nge Jakob-a? Nge Vâlpuia? Nge min fiam? Nge a mood inthlâk danglam lai ka nang fuh? Nge intih maksak a tum? Ka rilru a tibuai nuai mai.

*CHAPO LEH SUAL TÙRIN HAUSAK KHER A NGAI LO, CHUTIANG CHIAH CHUAN INNGAITLÂWM LEH FEL TÙRIN HAUSAK KHER A NGAI LO*