☆THE SWEETEST HANDCUFFS☆ - 7 By Dingdi Pachuau

 ☆THE SWEETEST HANDCUFFS☆ - 7 By Dingdi Pachuau

Kan țhianho ti ila, thawhpuite a ni zâwk mah ang chu, WhatsApp group-ah chuan lûtin zawhna ka han siam a, *Multiple personality chungchâng hi, eng nge in ngaih dàn? A awm theih tak tak in ring em?*  tiin.

Hannah-i, Ramthar vênga thawk chauhin min rawn chhâng a, mi dang chuan phone an khawih lo a ni maithei, ani lah chuan  *Dáwt mai mai, youtube lama mite pawh hian pawisa an duh vàng leh mite'n maksak min ti se tih an duh vàng mai mai a ni, khawvêl hi chu a chhe tawh khawp a*  a rawn ti duah a. Kei chuan  *Chutiang a ni ngawt thei bîk dâwn em ni? A àwm ang ve thei êm asin, an awka chhuak leh an chêtzia thlengin a danglam nghâl fo si a*   ka ti ve thung a, ani lah chuan *Kha kha an tum chu a ni rêng a ni, 'miin mak min ti se, ka channel hi en huai huai se, ka lemchan maksak deuh hmang hian pawisa la lût hiau hiau ila a ni mai' an ti ngei ang, pawisa lâk luhna hmanraw țha lutuk a nih hi*  a ti leh a.

A hnu deuhah chuan mi dang pawh rawn lang ve tain an ngaih dàn an rawn sawi ve ta luai luai a, a țhenin Hannah-i ngaih dàn chu rawn țâwm vein a țhenin an țâwmpui lo bawk a. Fiamthu duh zet mai, a hming tak pawha kan koh ngai loh Țhen-ni-lênga chuan  *I thawhna khuaah chutiang mi chu an awm em ni? Man hmiah la, pindanah i khung ang a, camera i dah ru bawk ang. Hannah-i sawi ang khian youtube-ah channel siamin i upload ang a, pawisa chu kan insem keuh dâwn nia*  a rawn ti a, ani pawh hi Amos-a ang maia fiamthu duh a ni a, kan nuih nasa thei viau a ni.

Thil mak danglam deuh thleng zui lo chuan ni chu a liam ve ta zêl a, khawpui lian taka awm ni bîk lo mah ila tuna ka thawhna khua hi chu a la thingtlâng ve leh chhâwng deuh bawk a, November thla tàwp lamah phei chuan Woofer nei țha deuh in ațang chuan Krismas hla a ri dup dup tawh a, nikum lama ka hun hman dàn ka hre chhuak vawng vawng mai. Tunah chuan mahni khuaah ka awm thei rih si lo va, khua a har ru vawng vawng mai. Nu leh pate tam zâwkte pawh an fate Krismas thuamhnaw leina tùr ngaihtuahin an phe vat vat hlawm a, an khaw sumo pawh December thla a rawn inher chhuah meuh chuan kâr khatah vawi hnih lai a service ve ta, ka haw duh hunah tak ka haw ve thei ngei dâwn e.

Rilruin Bethlehem lam a hawi ruih tawh a, kei ngei pawh kan vêng lamah ka ngaihtuahna chanve a awm tawh a, haw thuai thuaia nu leh pa bula awma, țhenrual țhate bula han titi ve nawk nawk pawh ka châk a ni. Urlâwk zàn hman dàn tùr pawh tûn ațangin WhatsApp group-ah phei chuan kan rêl leh țan tawh a nia, pâwn lam țhian kàwm tam lo mah ila, chhûngkhat laina hnai hi kan ngah ve a, inkàwm rual kan tam ve bawk nèn, mi hrang kan kàwm lo tluk a ni. Hmun danga awm țhenkhat pawh ka haw tum nîah chuan an haw ve dâwn a, kan tum hma nîah pawh haw tum an awm ve tho bawk, inhmuh khâwm ka châk viau tawhna chhan pakhat chu ka mithmul pawh a ngaih lutuk tawh vàng a ni, beautician ropui Rody, 'Țha-chungchuangi' inti deuh kherin min sawisa pahin min han pawhsak leh ang a...

Damlo an awm avàngin an inah ka kalchilh a, drip ka khàisak a, office lam a rawn thleng peih chiah lo a lo ni. A nupuiin thingpui min rawn pêk avàng chuan ka țhu ve rih a, an in chhûng chu ka han hawi kual a, an khawsa thei lutuk bîk lo tih a lang ve reng a, an nu lah chu hna a thawk nasa tih a hmelah chuan a hriat ngawih ngawih a, naupang chu ka hmu miah lo nain an tlângbàn ni àwm taka naupang kawr hlui ve zet zet tawh inzâr dal  ka hmuh chuan fa la nuaupang ve tak tak an nei ngei tih pawh a hriat theih mai.

Thingpui in pah chuan an pa nat dàn chungchâng chu a sawi malh malh a, a pum lam chiangkuan loh thu a sawi ve reng țhìn ni àwm a ni. An pawisa neih chhun chhun pawha entîr mai chu duh țhin mah se an pa chuan a duh lo țhìn a, 'Pawisa a hek mai mai, damdawi ka nei a, ka ei ang a, a dam mai ang' a ti țhìn ni àwm tak a ni. Damdawi chuan a han chhâwk ve ngei bawk a, a han dam deuh chuan hna a thawk lo thei țhìn bawk si lo nèn, a thawh hah deuh chuan a pum nâ chu a chhuak leh țhìn a, tunah pawh hian an fate Krismas thuamhnaw leina tùr tiin an inhlawh ve ţauh țauh laiin a nâ chu a chhuak leh ta sí a ni.

Ka haw hnu chuan chu mite chhûng chu ka ngaihtuah zui reng mai a, mi harsa tak tak leh thawk ve țâwk țâwk, thawh loh chuan buai mai tùr hi hi an lo awm ve reng a lo nih dâwn hi ka ti. Pathian zârah kan chhûngkua hi mi hausa ni lo mah ila kan nghei bîk lo va, mi awt lutuk lovin kan awm ve bawk. Tam lo mah se thla tina lût a lo awm ve chuan kan nghei lo va, tunah phei chuan kei ngei pawhin thla tin ka lo la lût ve thei ta bawk a, kan vànneihzia chu ka ngaihtuah rauh rauh a, Pathian zârah hrisèl lohna leh han insawisèlna lah kan nei mang bawk si lo, Pathian hnêna làwmthu sawi mawlh mawlh tùr hi chu kan lo ni.

Zànah Amos-a leh Remsiama an rawn lêng a, an rawn luh hnu lawkah Mual vêng tlangvâl pahnih an rawn lût ve leh bawk a, zàn dangah an rawn lêng ngai si lo va, mak ka lo ti ru deuh nain țha takin ka lo chiau-au a, Amos-a phei chuan a lo fiam nghâl bawrh bawrh a, anni pawh chu zum dûk bîk lovin an țawng ve nghâl siam siam a, Amos-a a țangkai khawp mai.

Mual vêng tlangvâl pakhat zâwk Lawma chu YMA Executive Committee member a lo ni a, Remsiama'n," Kumin hian Krismas Carol kha kan nei leh ngeiin ka ring a, engtikah nge in ruahman chhin le?" tia a han zawh chuan ani chuan," Hmun danga awmte rawn haw kháwm deuh hun melhin ni 19 zànah khian kan ti ta a nih kha, a la hma deuh bawk a, an la au lo a ni ngei ang," a lo ti vat a, Amos-a chuan," A țha reng alawm, hmun danga awm tleirãwl no nalh tak tak bulah chuan Carol pawh a phùrawm zual ang chu," a lo ti leh pek a, a nuih loh theih loh. Ani lah chuan," Ngai leh ngai inhmuh rengte hi chu a ninawm ve a, chuvàng alawm i inah pawh kan rawn lan zut ni. U Ngaihtei leh Mabiaki bula tawlh tawlh ai chuan i bula tawlh pawh a nuam daih zâwk a," a'n ti leh a, U Ngaihtei leh Mabiaki hi ka hmu ve ve tawh a, nula senior ve ve niin hna an thawk nasa ve bawk a, an hmai a duk pah bawk nèn, an lang upain an hriam rût mai a, hre ngai lo tân phei chuan nula an la ni ang tih pawh rin thiam a harsa ngawt ang.

"U Ngaihtei leh Mabiaki'n YMA min han awp khar hian kan phuisui bîk riau asin, pasal neih duhpui viau mah ila, han nei ta chiah se chuan khua a har ngawt ang a, kim lo ta riauin kan inhre bawkin ka ring," Lawma'n a tih chuan Remsiama chuan," A dik chiah, anni pahnih hi kan tleiràwl chhuah hma ațang tawha nula tawh kha an ni ve a, YMA-ah lah hian an la tel peihin an mawng lah hi a la zãng țha phian mai a, taimâk lamah ni se, an taima dùn nasa mai sia. Amos, U Ngaihtei hi nei la, i inchhîr miah lo ang, a chãwm hneh ngawt ang che," tiin nui duh miah lo hian Amos-a chu a han en a, ani chuan," A khai, ka kian zâwk ang che, kei chu hei ka nei țha tawh lutuk, nula dangah ka pènsan thei tawh lo," a lo ti thung a, nui duh miah lo chuan a'n hawi kual vêl a, a țawngkam ai mah chuan a hmêl tak hian a nia nuih tiza țhìn ni, mi dang chu kan insüm zo ta lo va, kan nui ta dar dar a. 

"Tluangtei chu, heta Krismas hman chu i tum lo ang tiraw?" Lawma'n a tih chuan," Um, Amos-a hian min sâwm duh mang si lo va," tiin nui chung hian Amos-a chu ka han en a, ani chuan," A, hman i tum lo sa tih ka hria a, sàwm tinah pawh ka tin lo che a nih kha, sâwm che pawh ni ila i hmang dâwn chuang lo va," a lo ti ve thung a, Remsiama chuan," I sâwm chhin lo ve bawk a nih kha, inti hauh viau si, hauh ngam tak tak bawk si lo," a lo ti ve leh a, Lawma rawn lènpui Awma pawh chuan," A insawi ang hi a ni nange?" a lo ti ve bawk a, kan nui zo leh ta vek mai. Amos-a hi zawng, fiamthu hi a duh êm mai a, mi zawng zawng fiam ngam a nih ka ring hial mai.

A tükah chuan Office-ah Kimi a rawn lêng ve a, hna thawh tùr an nei tawh lëm lo va, a inla-ãwl ve deuh ta bawk nèn, a rawn kal zauh zauh, rei tak erawh a awm ngai lo thung. Kan titi luam a, lehkha a zir chhoh dànte chu a sawi chhuak a, lehkha thiam thei lo tak ni lo mah se a hrisêl lovin exam dâwnah a damlo thei viau ni àwm tak a ni a, matric pawh damlo chungin a exam a, a pass ve țâwk țâwk a. Higher-ah phei chuan class pawh kal țha thei lovin a damlo deuh reng a, hmun danga awm a ni bawk nèn, a pa(Pu Rova) chuan 'Kàrhlâ ațang chuan inngaihtuah a na si a' tiin school chu a chawlhtîr ta tawp ni àwm a ni. A naute chanchin pawh chu a sawi zêl a, anni pawh hmun danga awmin hostel-ah an awm si a, in lam an ngai thei lutuk a, zirna chu an bànsan ta tawp niin a sawi a, hmun danga lehkha zira ka awm laite chu ka hre chhuak ve uar uar a.

An khuaa a rualpui zir sâng deuhte chu an hming a han sawi ri nghauh nghauh a,College kal chin a han sawi leh a, Jakob-a hming a sawi rîk ve loh avàng chuan," Jakob-a a va tel ve lo ve?" ka lo ti a, ani chuan," Ani pawh Lungleia cl - xii a pass khân a duh tâwk ta ringawt a, lehkha thiam thei lo pawh a ni lo va, a pu lahin a chãwm zo nasa bawk si, a han chàwl ta daih kha ka lo ui khawp mai a," a ti leh barh barh a.

Tlëm lai deuh khân hmun danga a zirna chungchâng min hrilh tawh a nih kha, tuna Kimi thu sawi nèn hian a inang lo tlat mai a, ani kha chuan phaiah college kal ang hialin a insawi bawk a nih kha, dáwt min hrilh tihna em ni? Kimi hi chuan dáwt min hrilh êm chu ka ring lo va, a sawi dik zâwk ngei ang, Jakob-a hi a lo insawi thei ve pawh a ni mahna, kei mikhual ve mai tân chuan a chanchin ka hriat chhuah chu a ring lo pawh a ni thei tho bawk.

Mahse, thil dik lo chu a awm a ni. A chângin min hre êm êm a, helaia ka awm hma ațang tawha min hmu tawh niin a insawi a, a châng lahin min hre thuak thuak a, min hre deuh chè ché bawk a, maksak ve deuh mai chu a ni, hriat thiam a har. Ka ngaihtuah ngun poh leh nei lo tùra ka duh ëm êm Multiple Personality hi a lo nei reng a nih ka ring deuh deuh țhin; mahse, a ni chiang a ni ti tùr erawh chuan hun rei deuh zâwk nghah ka la duh, nei lo hrâm se ka duh fan bawk, a râpthlâk dâwn êm mai, hrehawm a ti dâwn bawk si.

Ka ngaihtuahna ka kawm vang vang lai chuan Kimi chu han khuh kharhin," Ka titi leh ta hlut mai, hun pawh ka lo ngaihtuah lo va, a lo tlai leh tawh viau a ni, nang pawh haw tawh rawh," tiin a tho zui nghâl a, kei chuan," A la hma alawm, hna thawh tùr i neih chuan loh kha," ka lo ti ve thung a, a chhuak dáwn chiah tihah chuan Jakob-a a rawn lang leh ta hlawl mai; mahse, a inthuam dàn ațang chuan Jakob-a, ka ina rawn lëng țhìn kha a ang lo, hei chu a kutzungpui ka țhuisakpa inthuamna ang chi kha a ni.

Ka rin ang chiahin," Nurse, damdawi rawn dìl che ka tum a," a rawn ti a, a lukhum chu a khum kun leh khawp mai a, Jakob-a aw chhuak a nih loh bâkah Jakob-a'n," Nurse," tiin min ko ngai lo hrim hrim bawk. 

Kimi chuan," Vawiin chu hna i thawk lo a ni maw?" tiin a lo be vat a, ani pawh chuan," Aw, thawk lo," a lo ti ve mai a, kei chuan," Eng damdawi nge i duh le?" ka lo ti ve mai a, he pa hi tu nge a nih chiah ka hre duh khawp mai. Jakob-a chu a ni lo chiang a, Zodina a ni mai ang em? Mahse, ani zawng, inthlahrung tak a nih kha, țawng pawh a țawng phawr phawr lo va, a polite viau bawk. Tuna ka biak mêk hi chu a chét dàn tlêmin a naupan deuh bâkah a tìrah nèlawm vak loh mah se min hmuh min hmuh tâkah chuan min nël ve ta viau niin ka hria.

Damdawi a duh ka pëk dáwn chuan," I hming le?" tin pen chu ka hûm ràn a, register-ah chuan a hming chu ziak tùr ang takin ka awm bawk a. A hming a sawi hunah a chiang vek ang chu ka ti a ni. Ka rin lâwk ang deuh chiah chuan," Vâlpuia," a rawn ti ta chiah a, ka kut a en ve reng avàng chuan a hming chu ka han ziahsak ta tho a, a hming ziah kher hi a țûl lêm lo; mahse, ka hre duh tlat a ni.

"Nurse, engtikah nge huanah chuan i lo kal ve theih ang?" a ti leh ta a, kei chuan amah en vang vang pah chuan," Krismas a hnai tawh sia, kuminah chuan ka hman tawh loh hmel, nakkum lamah ti ta mai ila?" ka han ti a, a nui ta suk a," A pawi lo, i hman hun hunah a ni mai," a ti a, a lu chu bu nghatin rei awm lo chuan a chhuak zui  leh ta mai a.

Ka lu chu ka dawm vang vang a. Duh lovin pawm tum lo viau mah ila thil dik ngei niin a lang tlat. Jakob-a, Zodina, Vâlpuia. Zodina hi ka hmu tam lovin kan inhre lo ber a, Jakob-a hi chu sawi a ngai rih lo va, Vâlpuia erawh hi chuan min nêl ta viau thung a, a kawmngeih zâwng tak ka ni pawh chu a lo ni maithei a ni. A tu ber hi nge amah dik tak chu ni ta le? Zodina hi a nih chuan amah mi inthlahrung mi a ni si a, mi pahnihte vàng hian buaina hrang hrang a lo hmachhawn tawh țhìn ngeiin ka ring, chuvàng chu em ni a inthlahrun dâk ni? Pawisawi lo hmel pu chung siin, Jakob-a a rawn lan tawh hi chuan a tibuai hneh thei ngawt ang chu. 

Kumin atâna he khuaa Pathiannî ka hman tàwpna ber ni tùrin ka han inkhâwm leh a, kan inkhâwm chhúng chuan," Kárleh tûn angah hi chuan kan véngah ka awm tawh àwm sia," tih mawlh ka lo ngaihtuah pek a, ka hna thawhna hmun a ni a, ngaih loh pawh tum mah ila ka rilru khawi laiah emaw chuan a awm ve rengin ka ring. Thisen zawmpui chhûngte nei lo mah ila țhenrual fel tak tak ka nei tawh a, lung chu an tilêng ve tho ngei bawk ang.

Ina ka luh dáwn chuan," Vawiin chu lêng ila?" tih ri ka han hria a, en lo mah ila Jakob-a aw a ni tih ka hre ve viau tawh mai. Ka inher a, min rawn zui tih ka hre miah lo chu mak ka ti, a pên thãwm pawh hriat ve àwm tak a nia.

Meng sawr sawr chung hian," Min ngai ve tho tihna a ni em?" tiin min rawn hnaih deuh a, kei chuan," A, ka sawi duh lo, i inkhâwm ve nange?" ka han ti zat a. A inkhâwm lo tih chu ka hre reng tho, tuna a inthuamna phei hi chu inkháwmnaa hâk chi pawh a ni meuh lo, 'Páwn lam inthuamna aiin thinlung lam alawm pawimawh chu' ti fo mah ila mihring kan nih chhúng hi chuan pâwn lam inthuamna hi kan en zêl tho ang.

"Inkhâwm hi chu, ka chikat hlauh," tiin a han nui hak a, chutah," I inkhâwm tho a, ka ring ve tawp mai ang che aw," a tih zawm leh zat a, kei chuan," Phakar viau lo teh, a inrin kêp theih hleinem," ka lo ti ve thung a, tala chu hawngin kan inzui lût ta nghâl a.

Ka be chhe duh lo, chiang takin a chanchin hi zâwt chhuak ta zâwk ila, nakinah mi dang a nih leh hunah, chu chuan buaina a hmachhawn loh nân pângngai taka kawm hi a pawimawhin ka hria; mahse, miin kan inkàwm a ni tih hi hriain min hmu tam lo se ka duh thung. Arini min hmuh phei chu ka duh hauh lo, thil eng emaw hriat sual palh awm thei a ni a, chutiang chu thleng tùrin ka duh lo.

"Rawng vâr hi chu i ngaina ve ngawt mai tiraw?" tiin a inthuamna thianghlim tak chu ka han en a, a chung zâwka a hâk, tlêma rawng engin a tih țial deuh hlek tih loh chu a dang zawng chu a vâr a ni a, a pheikhawk thlengin a vár, a thianghlim ser sawr viau a ni. A țhi leh a bâna a bun tlereuh erawh rangkachak niin an langsar dùn viau bawk.

"A mawi alawm, ka ngainatna chhan pawh ka hmuh hmasak ber che khân kawr vár i ha a, i pawnfèn pawh a vâr a nih kha. Ka rawng ngainat sa a lo ni bawk nèn, ka thlah phal lo a ni, tunah pawh a vâr i ha ve leh tho bawk a," a lo ti duah a, a ni lah tak a, vawiin ber kher hi eng nge maw ka hriat ni, coat vár ka hâk chhuah ni ber kher a lo ni a, he coat kher phei hi chu a thianghlim teh vawr lutuk a, ka ha chhuak vak ngai lo nghe nghe.

Ka nui ta ringawt a," Ni ve tho mai, a nih, engtik nge  min hmuh hmasak ber kha? Ka hre tawh miah lo nia,"  ka han ti a, ani chuan," I hre ve tawp nâng, min hmu ve hek lo che," a ti phawt a, chutah, a nui sak a," Lêngpui Airport-ah, taxi i nghâk niin ka hria, a hnuah chuan i lût ta daih nghe nghe a," a ti leh ta a, mit khap hauh lo chuan min melh vang vang a, chumi hun lai chu a ngaihtuah lêt leh a ni ngei ang. A mi hmuh chu ka ni lo tawp ang le, Lengpui Airport-ah țum hnih chu ka kal ve tawh ngei mai a, kan kal țum lah chuan taxi ni lovin private motor-ah a ni kan chuan ni.

*RILRU CHHIAT AVÀNGA MI RÈL HMANGTE HIAN MI FEL AWM ȚHA HLÈ HLÈ LAI TIH CHHIAT DÀN MAWLH AN ZAWNG ȚHÌN A NI*