☆THE SWEETEST HANDCUFFS☆ - 8 By Dingdi Pachuau

 ☆THE SWEETEST HANDCUFFS☆ - 8 By Dingdi Pachuau

"Nih, min hre sa tho si a, engati nge heta min hmuha min biak hmasak ber nî khân ka hming min zawh si?" ka han ti a, ani chuan," I hming pum  ka hre châk maw le," a lo ti mai a, in chhúng chu a han en kual dan dan phawt a, chutah, min rawn enin," Vawiin chu lëng ila? Office kài i ngai lo bawk a," mitko sàn deuh ãk chuan a tihzawm zat a. Ka nui deuh sak ringawt a, ka chhâng lêm lo. Han lèn chhuahpui na ila chuan, hmun tinah mit leh ka a awm si a, thingtlâng a la ni ve tho bawk nèn, miin inngaizâwng emaw te min ti rêu rêu ang a, Jakoba a nih loh hunah Zodina tân buaina tenau ka thlensak a ni ringawt ang, Arini'n a lo hriat ve phei chuan...

Mahse, a chanchin hi ka hre chiang zêl châk bawk si a, ka kawm ngeih hi a ngai tlat a ni. Zodina hi a bul tumtu, an taksa neitu ber a ni a, ani kher kher hi zawngin min rawn kàwm hmasa lo ang a, kei lahin a chanchin ka va zâwt chhuak lo tawp bawk ang. Min hnaihtu ber Jakob-a hi kàwm ngeih ila, ani hi chuan zêp leh ì a nei lo bawk a, a hnên ațang hian chanchin tam tak ka hre thei zâwk ngeiin ka ring.

"Lèn ai chuan ina inkawm hi a fair ber alawm, lo țhu rawh aw, ka inthlâk ang a, thingpui kan in dâwn nia," ka ti a, room-ah chuan ka luhsan zui ta nghâl a. Ani pawh chu țawng lovin a lo țhu ve reng a, room ațanga ka chhuah leh veleh chuan," Krismas leh kumthar inkárah hian zin ang hmiang?" a lo ti vut a, phâwk deuh hlek hian ka en a, amah vëk chuan," Ka hrilh tawh che kha, nangmah nèn ngei hian kan hostel hmun hlui kha tlawh leh ka châk a, a hmun a mawiin a fel fai si a, nuam i ti dâwn tih ka hre reng a ni," a ti leh a.

"Kan bo palh ang," nui chung hian ka ti a, ani lah chuan thutak zet hian," Fiamthu thawh kual vêl mai mai lo teh, nangmah vàng hian kum eng zât nge bialnu ka neih loh i hria em? Fiamthu thawh khum mai mai tùr chuan ka inphahhniam thei lo a nia," a ti ta nghut nghut a, a awka chhuak chu a chan deuh bâkah min en kur bawk si a, a nuam lo ve det ka ti.

"Ka'n fiamthu ve zawk a nih kha," tiin ka han nuih tlawn a, ka nuih tlawn chhan pawh a thinrim ka duh loh vàng a ni, thingpui tùr chhuang pah nghâlin," Hunpui laia zin daih te chu a tihchi nâng, hlim takin chhûngte, ţhen leh rualte nèn hun kan hmang ho ang chu," ngaihtuah vak lo chuan ka ti leh a, ani erawh chuan," Chu, ka bula hun hman chu i hreh viau tihna a ni maw? Ka bula hman ai chuan i chhûngte bulah...," tiin a han thaw halh a," Kei chuan ka hun pum pui hi i kianga hman ka duh asin," a tih zawm leh a, chhàn ngaihna min tihre lo, a thil sawi chuan min  tihlaih deuh bâkah chutianga min chhàn avàng chuan sawi ve mai tùr ka hre lo a ni.

Thingpui chu inin kan titi pah a, a bul hnaih takah erawh ka țhu lo. Thingpui in tùra a no a chawi kãng chiah tihah chuan a phone chu a rawn ri ta ral ral a, a phun sup a, hetia a phun sup hian a thil sawi hi ka hre thei ngai lo rêng rêng, thingpui chu in phawtin a no chu a dah thla leh tê tê a, muangchâng hian a phone chu a phawrh chhuak a. Va en ve thu a awm lo va, rawn betu pawh ka hre lo. Phone chu en vung vungin a hmet tàwp ta hmak a, phun zui bul bulin," Ka hriat ngai mí pawh va ni suh, hming țenghneng tê tê lah hi a lo lang ve ziah," a ti hluk a, a hmeh zui mawlh mawlh dànah a delete a ni maithei, chutah, min rawn enin," I number ni lo, hmeichhe dang number rêng rêng he phone-ah hian a awm miah lo, i en duh em?" a rawn ti a, kei chuan," A ngai lo ve, ka ring ang che," ka lo ti thung a, ani erawh chuan," Min rin tak tak vàng a ni chiah em? Mipa hi rinawm an vâng asin, kei tih loh chu, kei chu min ring thei ang," a ti phawt a, chutah, chiang zeta ka mita min en pah chuan," I hriat reng tura ka duh chu ka hmél ang pu, hming dang nei an awm a niha eng eng emaw an zâwt chea hnaih che an tum chuan, chu mi chu, ring hauh suh ang che, keimah, Jakob-a bâk hi hetiang hmêl pu an awm lo, an lo awm palh hlauh a nih pawhin mi lem bâk an ni lo ang, chu chu i hre reng dâwn nia," a tihzawm leh a, a fiamthu emaw ka ti lek lek a; mahse, a mit pawh a khap hauh lo va, a thutak êm êm bawk. Chuvàng chuan ka nuih ngam lo va.

Thingpui kan in zawh hnu chuan lènpuiah min sâwm leh a, hnial dawt ngam lo chuan ka nèn nè deuh a, a mit fiah zet chuan min en reng bawk si a, nuam lo ka tihzia chu a. Chutah, a phone-ah chuan eng emaw hi a type mual mual a, ka phone chu a rawn nghawr dat a, ka ban ve mai a; mahse, amah a lo ni a.

*Khatia i nè nè kual vël khân i chhiat phah chuang hauh lo nia, tunah tak hian eng nge ka tih châk i hria em?*  tih hi a lo ni a, amah ka en nghâl zawk nghe nghe. A lo nui deuh súng a, chimawm zet hian a lo meng sawr sawr bawk a. Ka zah avàng chuan ka biang chu a sa hat hat mai, he pa hi chuan min tizak hneh ve thei chiang a ni, min chhaih ang hian tu mipa mahin min la chhaih ngai lo va, ka țhiante zînga ka kawmngeih ve deuh mipa pahnih Rokko leh A-ìa erawh chuan fiamthu hian bialnu bàwl chuan min bâwl ve țhìn tho a; mahse, Jalob-a țawngkam ang erawh hi chu an hmang ngai lo thung.

Ka lama rawn ãwn pheiin,"Ka fâwp châk che," a rawn ti ta sup a, ka hawi sawn rang lutuk ringawt! Ka thin lah chu a rawn phu rang nghâl dawt dawt mai a, he pa hi a hlauhawm ru tlat. Țawng insùm leh zêp kual vêl a tum bawk si lo va, ka zahzia leh ka hlauhzia chu hria se chuan hetiang hi a sawi chhuak hauh lo ang maw le.

"I ti râpthlâk êm mai aw," ka ti ta sap a, en pawh ka en duh tawh lo. Ani lah chuan," Râpthlâk nâng, a phùrawm lutuk zâwk alawm," a lo ti leh mai thung a, a la lâp thei bawk si a, hetiang zâwnga min chhaih a nih  chuan ka zak ziah dâwn a nih àwm hi.

"Thu zêp leh pehhêl taka thil sawi ka thiam ve lo ka tih tawh kha, thil phùrawm tak ka sawi chhuah avàng erawh chuan min hlau miah suh,  hmeichhe duh lo chung ka la khawih ngai lo a nia, anmahniin min sâwm a nih ngawt loh chuan," a ti leh a, ka en zawk a, fiamthu hmêl pu lo mah se a thil sawi chuan min hnèm hran chuang hauh lo.

Lèn a rawt tlat avàng chuan eirawng bàwl tak tak hma tiin Kimi kan sâwm tel ve a, ani pawh chu a phûr ber berah lo țangin, Jakob-a chu a be bawrh bawrh a, an kiangah chuan țawng ve mang lo chuan ka kal ve zêl a, Kimi a tel ve bawk a, mi sawisep kan kai lo deuh tùrah ka ngai; mahse, min hmu apiang chuan min lo en duh hlawm khawp mai, ka lêng chhuak ngai lo miau a, mak an ti ve pawh a ni mahna.

Tlângah kan lêng a, ni a la sa țha viau nain thing a tam a, ni sâ kan tuar lo zâwk. Nula tlangvâl lèn hun a la ni lo deuh nge, lêng hmuh tùr pawh an awm mang lo, naupang pali vël hi an lo awm ve a, min lo en hâ hâ hlawm a, a hnuah phei chuan an haw ta daih nghe nghe. Tlâng chhîp ațang chuan hawi vêl pawh a nuam khawp mai a; mahse, hmuh theih chin hi a zau lo ve hrim hrim a, Saisih tlâng chu chhak lamah chapo fê hian a to lûrh a, Chhim leh hmàr lamah ni se tlâng lian pahnihin min phèn bawk a, thlang lam chu tlêmin a hawi ve theih deuh tih chauh a ni; mahse, a hmun tê hi a nuam ve hranpa riau.

Pipe hmanga an siam țhutnaah chuan țhuin thlâte kan la a, thing buk a tamin a nuam reuh a, thing  ding thelh sung chu han en rêng rêng pawhin kum tam an lo ding ve tawh tih a hriat theih a. Kimi chuan helai hmun neitu leh enkawltu Pu Lianthangate chhûng chanchin chu a sawi barh barh a. Anmahni mimal ram niin hetiang hmun atân hian an siam a, Pu Lianthanga sawi dàn chuan," Nula leh tlangvâl mai ni lo, a mimirin lènkhawthawnna hmun kan nei lo lutuk a, mikhual chu sawi loh, khaw chhûng mi tân pawh len a remchàn bâkah, ram humhalh nân leh thing leh pangpàrte'n boruak țha min siamsak bawk a, kan khua lum lutuk tùr pawh a véng ve pah thei bawk ang," a ti a ni àwm e. An siam țantirh chuan miin mãwl an ti a, an sawisêl a, 'Awmze nei lova ram tichingpen, hei ai hian mi dang kutah hlànin in sakna tùr ram țha nei lo te'n in sak nân hmang zâwk se'  tiin an sawisêl a; mahse, tûn hnuah erawh chuan mi tin deuhthawin an fak ve ta thung a, a hun laia an sawisèl nasat tehlul nèn, chhâng lêt lova an lo tuar fan fanna rah kha hmu taah inngaiin Pu Lianthanga pawh a lãwm hle ni àwm a ni a; mahse, amah tak chu a boralna pawh a rei tawh tih a'n sawi tel nghâl zat a. A sawi chhunzawm zêl a,  pangpâr leh thing țâwi buk lii liai, hniam tê tê hi chu hmun dang ațanga an lâk luh niin an phun chawp vek a ni a, an enkawl țhat hle thu chuan a thu sawi tlâng chu a kàwm a, hetia en mai pawh hian an enkawl ngun tih chu a hriat reng, hmuh a nuamin kei phei chuan  YMA Park ai khân a nuam ka ti zâwk daih.

"Mi țhate leh ngaihtuahna nei thuite hi chu an thih hnu hian fak an hlawh duh viau asin, anni hi chuan vision hi an lo nei thuiin a zau huau mai bîk a, a tìr lamah erawh mi ngaihtheih an ni lêm lo thung," Jakob-a chuan a ti chhuak sup a, a thil sawi leh amah chu a inhmeh loh êm avàng chuan ka en deuh reng nghe nghe a. Kimi chuan,"A dik alawm, thil țha duha khawtlâng hmangaihna tak tak rilru pu leh khawtlâng tâna rilru tak tak sêng  chin hi chu mi nâwlpui hian an ngaithei lo țhin a nia, a chhan chu khawtlâng țhatna an duhna lamah mi ţhenkhat rilru an tihnatna chin a lo awm a, thingtlângah phei hi chuan kan lo inchhûng kual diat diat țhin nèn, rilru-naa khân țhenrual a lo nei ve lo thei lo va, a rilru natna an hnêna a han sawi khân an lo lainat a, an vuipui a, khawtlâng-țhatna-duhpa kha an haw lel thei tlat mai a ni; mahse, mi țha na nâ nâ hi zawng, a tìrah dingchang lo mah se a tàwpah erawh an tihdikzia hriat chhuah a ni lo thei lo, khawtlâng tâna ro han rèlte hi harsa deuh mai tùr a ni asin," a ti leh bawrh bawrh a.

Chutiang lam hlîr chu an sawi a, kei chuan an thil sawi chu ka lo ngaithla kar a, ngaihnawm ka tih bâkah thil an hria ka tiin tluk lo ka inti kher mai. Jakob-a pawh ka rin ang a lo ni miah lo, thil a hre zauin a titi dàn rêng rêng chu thil a hre zau tih a hriat a, a inchhiar zau a ni tih a lang reng mai. Chuvàng tak chuan, amah chu ka hre chiang châk zual ta sauh mai, lérh leh thinchhe ve tak, inla ve angreng tak nia ka hriatna chu a her danglam ta deuh tlat a ni. A lêrh ang lêrh chu; mahse, tlangvâl lu zo tak leh hawiher zau ve tâwk tak a ni tih a lang tlat.

Nula tlangvâl lêng chhuak e ti lo chuan khawtlâng leh ram hnuk khawih thil daih a ni kan titi tâk chu. Kimi pawh ka rin aiin thil a lo hre ve reuh a, thingtlângah a tawm chawrh chawrh ang a, eng vak a hre lo ang tih laiin, 'mi fate hi an lo va mak êm aw, eng vak ni lova ka ngaihte hi ka lo tluk lo hle mai' ka tih phah hial a ni.

Eirawng bâwl tùra kan haw pawhin min zui zêl a, kan inah kan inzui lût ta dial a. Thingpuite kan in leh hnuah Kimi chu a haw ta a, a chhuah hnu chuan," Chance ka nei ve ta," a ti chhuak hluai a, ka en phei vat a, ani lah chuan," Kan lêng chhuak ve êm êm a, hun fâl ka neihpui theih miah loh che kha maw... Ka duh zâwng tak sawipui che pawh ka duh ve a, a awm ve tlat bawk si a, a vêng tlat che a ni hial lo maw?" a ti leh a, kei chuan," Âwihawm loh e, ka kawm ve ber leh ka țhiannu ber a ni a, eng aiah nge min vèn ngawt ang? Vèn ngai ka ni em ni?" ka ti thung a.

"Ka lak ațang hian a vêng che a ni ang chu ka ti mai," a tih chuan ka nui hak a, rin loh deuhin ani pawh chu a rawn nui ve suk a, a nuih hian a hmêl hi chu a țha a ni, a lang nèlawmin a ngaihawm hliah hliah ni berin ka hria!

Kan titi chho leh zêl a, Japan rama a zin dàn leh China rama a zin dànte chu min hrilh pah chuan," Hun thâwl kan neih hunah kan la kal leh dâwn nia, nang nèna kal dun hi ka châk ber a ni," a ti a, hun remchâng la vatin," Engtik hun laiin nge i han zin a? A nuam ngawt lo maw?" ka lo ti vat a, ani chuan,"Nuam ve reng mai, nikum kum laihâwl vêl, July leh August thla khân a nih tâk chu," tiin min chhâng a. A hmêl chu a thutakin dâwt sawi hmêl rêng a lang lo, hei pawh hriat reng tùr chi a ni. 

Zànah ka inkhâwm a, ka inkhâwm hnuhnun ber tùr a ni tawh si a, vâwt ve viau tawh mah se ka han present hrâm a ni. Ka inkhâwm bâng ka haw chu ka kawtah chuan Jakob-a chu a lo ding reng tawh niin," Engtia rei nge i lo din tawh? A vâwt si a, engati nge, hmun dangah te lo lèn rih tùr alawm. I dinna a rei tawh em?" ka ti sawk sawk a, chahbi la chhuakin kawngka chu ka pan nghâl a, ani lah chuan," Rei tawh lutuk, thu sawitu a ding țan vêlin ka ring," a lo ti mai a. Chuti chen chen chu eng atân nge maw min lo nghah ni? A va țûl lo tak! Vawiinah min hmu reng tawh a, zaninah chuti chen chen min lo nghah leh... Hmm, a buaithlâk a nih hi.

Ina kan luh hnu chuan,"I in lo chu lènna tùr hmun dang ka hre lo, bâkah, nang i awm chuan khawiah mah lèn ka tum lo, nula dang ka melh ngai lo tih pawh ka hrilh tawh che kha, nang pawhin tlangvâl dang melh..suh.. ang.. che," a ti kalh kalh a, a thil sawi chu ngaih thutaksak lëm lovin ka nui ringawt. A phone a rawn ri a, en pawh en lo chuan a hmet tàwp hmak a; mahse, a rawn ri leh nghâl zat tho, kei chuan," A pawimawh a niang, chhâng la?" ka lo ti a, ani lah chuan," A pawimawh lo, number ringawt chu ka tân thil pawimawh a ni thei lo," tiin a hmet tàwp zui leh nghál a, a rawn ri zui ta bîk lo. Kan titi tak tak hma chuan inlêng dang an rawn lût ve ta hlauh zui a, Mual vêng tlangvâl pahnih kha an lo ni nghe nghe a.

An lo luh ve achinah chuan Jakob-a chu a țawng ve ta mang lo, Lawma leh Awma erawh chuan an be zauh zauh a, chuti chung pawh chuan a rùl tâwk chiahin a chhâng. A ngawih tâk deuh reng avàng chuan ka melh zauh zauh lo thei lo va, ka va melh zauh lai chuan chîk zet hian min lo en kur zêl mai a, mit pawh a khap ngai lo, ka hawi sawn rang thei khawp mai, mi dang inlêng ka neih vàng hian ani hi a lungawi vak lo a ni mai lo maw? Hah, âwihawm loh theih teh e, mipa rilru tê tak leh thîkthu chhe zet a nih ngawt loh chuan...

Ka muhìl țêp tihah a message a rawn thleng a, ka nuih a za ngang mai. Min duhzia chu a rawn sawi țha leh a, chutih rual chuan mipa zawng zawng a huat vek thu a rawn ziak tel bawk, a emoji hman mawlh chu, thinrim hmai sen lai tlar tuar chuan nuih a tizã a, a nuih loh theih loh, naupangchhia roh lutuk... Ka lu ka thing nak nak a, a titi vêl dàn ațang hi chuan rilru puitling viau leh upa ve viau tawh niin a lang si a, zanin zet chu, ani pawh a puitling hlei thei bîk lo a nih àwm hi.

A tûk ațang chuan a reh leh ta vang vang mai a, mi dang a ni leh tawh a ni ngei ang. Kei pawh haw thei mai tùrin ka insiam țan tawh a, haw chu ka châk viau tawh mai a, unauteho ka hmu châk tawh a ni; mahse, chutiang ka ngaihtuah chuan Jakob-a ka hre chhuak leh zawk țhìn, ka haw hlàna Jakob-a a lo chhuah leh hunah engtin nge a lo awm ang tih ka ngaihtuah kual mai mai a, ka haw dâwn tih ka la hrilh hauh lo a nih kha, ani pawh khân a hre kher lo maithei.

Ka tum dàn chuan Zirtàwpniah Lungleiah ka phei ang a, a tûkah kan vêngah chuan ka phei ang. Ka kal loh chhûnga U Ropuia pawh a chawlh ve tawh dâwn avàngin office leh a vêl chu Pu Rova nèn kan tifai a, office chhûng pawh ka tifel nawn leh thlap a, chutiangin ka in luah bul pawh  ka tifai nawn leh vek bawk. Ka awm loh chhûngin a lo balh lutuk loh beisei ang, a bul hnaia thing ding hnah ro erawh a lo tla lo thei lo ang a, hnawk lutuk, hmuh hrehawm chu a lo ni hman lo ang chu maw.

Ningàni chuan 'Rei vak lo chhûng chu  office kai leh teh ang' ti rilruin ka kal leh a, tih tùr țûl kan tifel vek tawh a, U Ropuia phei chu vawiin pawh hian a rawn kal tawh dâwn lo. Mi tin mai chu Krismas boruakin a chènchilh tawh avàngin rawn kal tum pawh an awm tawh lo ni berin ka hria, kei pawh kal loh ai tak tak a ni ka kal ni, ka la haw rih chuang bawk si lo va tiin. Chhuah ka tum țêp tawh tihah chuan ke pên rî ka han hria a, ka la chhuak hman lo chiah chiah chu a vànnei a, kei pawh vànnei ka inti tho, kan vànnei dùn chiah chiah e.

Jakob-a hmêl a rawn lan hlawl tâkah chuan pháwk zet hian ka lo en a, ani erawh chu zah hmel deuh tak hian a nui deuh sak a, a melh hniam nghâl raih bawk a, Jakob-a a ni lo tih ka hre chawpchilh nghâl. Chutah," Min lo hre thiam hrâm mai teh, ka tihbuai loh hrâm che ka beisei bawk," a rawn ti chhuak ta sap a, a aw chhuak pawh a dang leh ta.

"Tibuai lo ve, lo țhu rawh khai, eng thil nge i mamawh tâk le?" ka lo ti vat a, he pa inthlahrunzia hi a awm dàn ațang hian a hriat ngawih ngawih mai si a, chuvàng chuan ka tân chuan lo biak sawk sawk kha a pawimawh tlat a ni, a duh zâwng leh mamawhte min dìl a inthlahrun loh nân.

"Titipui lawk che ka duh a, 'lawk' han ti ila hun a duh rei thei tho bawk a, hun i neih chuan, khawngaihin, i buai erawh chuan sawi hreh lo la, thil sawi țûl ber pawh a ni chuang lo va," a rawn tih duah chuan," Buai lo ve, eng mah tih tùr ka nei hleinem, ka ãwl lutuk zâwk a, hun chu ka ngah lutuk," tiin ka han nuih a, dawhkàna ka lehkhabute chu ka dah țha zui a, a lam hawiin," Eng thil nge ni ta le?" ka ti zui zat a.

A ngawi vang vang phawt a, thaw deuh hakin min rawn en a," Zodina ka ni tih chu i hre tawh ang chu tiraw?" a rawn ti chhuak ta a, kei chuan țawngkaa chhâng lovin ka lu ka lo bu nghat a. A nervous a nih loh vêk pawhin a thil sawi tùr chu a sawi hreh deuh a ni maithei, a hmui chu a'n liak huh leh tê tê phawt a," Keimah ni si lo; mahse, ka hmêl ang chiah pu nèn in inkàwm ţhin tiraw?" a rawn ti chhuak leh ta sap a.

Ani pawh hian a lo hre ve vek a nih chiah hi.

*I THLÂK DANGLAM THEIH MIAH LOH, I NUNAH HARSATNA I TAWNG A NIH PAWHIN THIL ȚHA BER ZIR CHHUAK THEI TÙRIN I THIL THLÌR DÀN THLÂK DANGLAM ANG CHE*