☆THE SWEETEST HANDCUFFS☆ - 9 By Dingdi Pachuau

 ☆THE SWEETEST HANDCUFFS☆ - 9 By Dingdi Pachuau

"Aw, kàwm zauh zauh e; mahse, 'kàwm țhìn' tia sawi tùr êm zawng kan ni lo ang," ka tih chuan a meng hnuai raih mai a, a hmui chu a pet fan fan a, thil ngaihtuah tih hriat tak hian che lo hian a țhut ngai chuan a țhu reng phawt a. A hnu deuhah chuan," I duh loh zâwngin a che țhìn em? Ka thil zawh che hi mak pawh i ti maithei a; mahse, hriat ngei ka duh si a ni," a ti leh sap a.

"I rilru tihrehawm duh suh, engtin mah min ti lo, kan inkàwm mai a ni," ka lo ti vat a, a han thaw deuh huai a, min rawn en zawkin," Ka zawh chhan che pawh, ka phone-ah i number ka hmu a," a ti phawt a, chutah," Message pawh," zàwi tê hian a ti zui leh sap a, ka en ta reng mai.

Ni dâwn tak. Jakob-a a bo hnuah chuan ani ngei hian a taksa chu a rawn luah leh ang; mahse, Jakob-a khân amah ni lo, a hmêl ang pu mi dang ka hmu a niha min rawn pan a nih chuan mi lem an nih thu leh ring miah lo tùr khán min hrilh kha a ni a, amah Jakob-a chauh kha ring tùrin min ti bawk. A lo intlawhkhalh ve hman viau a ni, rinhlelhna lo nei hman lo ila chuan a thu sawi kha kei pawh hian ka ring ngeiin ka ring.

"Jakob-a khân min lo hre sa tawh ni àwm tak a ni, he laia ka lo awm hma ațang tawhin min lo hre tawh a ni ang," ka ti ve ta a, ani chuan," A ni maw? Chutiang chuan a hrilh che maw?" a lo ti vat a, kei chuan," Aw; mahse, kei chuan ka hre ngai hauh lo thung, min hai a nih te ka ring rum rum a," ka ti leh a. A chhan chu min hmu nia a sawina hmunte kha lo dik pawh ni ta teh rêng se, ka thuamhnaw hâk nia a sawite kha a mak êm a, a dik thei lo, kawr vâr chu ka ha pawh a lo ni maithei a; mahse, pawnfèn vâr ber kher chu ka fêng ngai lo.

Kan ngawi dùn vang vang a, kan ngaihtuahna erawh a inhlat vak lo maithei a ni. A hnu deuhah chuan amah chu rawn țawng chhuakin," Hetiang lam ka sawipui i ngai ta hi hrehawm ka tiin ka inthlahrung khawp mai a; mahse, i lo hre thiam lo ang tih ka hlau bawk si a, min hre thiam hrâm dâwn nia," a ti a, kei chuan," Inthlahrung duh suh, ka hre thiam che alawm," ka lo ti vat a. A nui sak a, a taksa leh a hmêl hi chu Jakob-a tho kha a ni a, a la hmêl țha reng mai; mahse, an chezia leh duh zâwng a inang lo êm a ni.

"A lan dànah Jakob-a chuan i pawi a la sawi lo niin a lang a, a làwmawm tak zet a ni. Hetiang lam hi mi dang chu ka la sawipui ngai hauh lo va; mahse, nang chu damdawi lama thawk i nih bâkah, keimaha tu emawin a kawm che i nih avàng hian hrilh ngei che hi ka tih tùr niin ka hria a, ka hrilh tawp mai che a ni," a ti dap dap phawt a, chutah," Eng emaw châng hian keimahah inthlâk danglam a awm țhìn a," a tih chhunzawm leh a, ngun zet hian ka lo ngaithla a, sawi zawm lehin," A chhan pawh ka hre chuang lo, engtik hun lai tak ațangin nge hetiang hi ka chungah a rawn thlen țan pawh ka hre tawh lo, i hre thiam kher lo ang, kei pawhin ka hre thiam chuang lo, ka hmêl ang chiah puin, keimah ni si lo, mi hrang hlak, rilru puthmang dang daih puin ka chhuak țhìn a," a ti leh ta a.

"Multiple Personality," ka lo ti sap a, ani chuan," A buaithlâk ber chu ka inthlâk danglam hnua mi dang, rilru dang ka put tâk hnu chuan eng thil nge ka va tih tih leh khawiah nge ka va kal tih ka hre ngai lo hi a ni. Ka thil va tih ka hre ngai lo a nih ber chu, vànneihthlâk takin ka phone hi ka lock ngai lo hlauh a, phone-ah i number ka hmu a, i number tih pawh ka hre lawk lo va; mahse, in thlalâk ka hmu leh a, Kimi ka hmuh tel ve avàngin i number ka zâwt chhin ta tawp a, tah chuan, ka hre chhuak ta che a ni," a ti dam leh dap a. Ni e, a phone-ah khân thla kha kan la ve nual a nih kha, loh theih loh hek le.

"Engtik hunah nge i inthlâk danglam ţhin i hria em? Ka tih awmzia chu, entîr nân, i chauh viau hun laiin emaw i rilru hrehawm deuh laiin emaw ka tihna a nia," tiin ka lo zâwt ve a, ani chuan," Nih pawh ka hre lêm lo, ka inthlâk danglam hmasak ber lai hun pawh ka hre tawh lo, ka harh chhuaha  ka nihna pângngai ka neih lêt hnu hian ka lo awmna chu mak ka tiin ka hai lek lek fo va, muhìl harh chhuak ang chiaha ka awm țhin vàng a nia. Zàna mut te hi ka huphurh phah fo a ni, a chhan chu a hnua ka ngaihtuah lêt hian ka muthilh dâwn lai ang hun chauh hi ka hriat chhuah theih hnuhnung ber a ni fo si a ni," a ti leh dap dap a.

"A nih tak chu, a manganthlâk duh ngawt ang le, i rin lohna deuh deuh hmuna i harh chhuah phei chuan. A nih leh, Jakob-a ni lo, mi dang angin i inthlâk țhinin i hria em?" tiin ka han zâwt leh a, ani chuan," Ka hre miah lo, Jakob-a pawh chu ka hriat chhuahna chhan chu miin min koh țhin vàng a ni. A tìrah chuan ka bo khawp mai a; mahse, ka awm dàn ka hriat thiam loh țhin êm avàng leh ka kal tih pawh ka hriat miah loha hmun dang danga ka lo awm țhin  vàngin ka ngaih a țha lo va, ka harh chhuahna hmun chu ka kal ngai lêm lohna hmun a lo ni țhìn bawk si a," a ti leh sap sap a

"Chuti, i kutzungpui min rawn țhuitîr pawh kha i hre hauh lo ang a?" tiin ka han zâwt chhin a, a hre hauh lo ang tih ka hria, amah ni tlat hek lo le. Ka rin ang chiah chuan,"Hre hauh lo, ka tihnat lai pawh ka hre lo va, ka nihna ngaia ka lêt leh hnua ka hmuh chuan  engtia ka tihnat nge ni ang tiin ka ngaihtuah nasa a ni; mahse, ka puin min hrilh ta hlauh a," a tih chuan," A nih tak chu, ni e, i tân chuan hriat chhuah a har țhìn ngawt ang, i danglam țhìn tih hi i pute hian an hre ve em?" tiin ka han zâwt leh nghâl zat a.

"Hre maithei, an sawi chhuak duh lo pawh a ni thei tho bawk; mahse, min rinhlelh tho chu ka ring, mi pângngai tân chuan rinhlelh loh theih pawh ka ni lo ang," tiin a han thaw hak a,"Ka awm dàn ang hi chu a case a dang êm a, khawvêlah pawh hian a vângin a common viau lo tih pawh ka hria, doctor han pan ngawt dâwn ila, hetiang lam doctor thiam tak an nih ngawt loh chuan doctor nazawng pan ngawt chi ni pawhin ka hre lo, Mizoramah phei chuan awm pawh an awm lo ang, khawvêl pum huap ang chuan an awm ve tho chuan ka ring a," a ti leh sap sap a. A țawngka chhuak leh a hmêl chuan khawngaih thlá a la ka ti a, hrehawm a tih ve tùrzia lah a hriat theih vek bawk si, ka khawngaih roh khawp mai.

Kan titi ațang hian mi inthlahrung tak ni mah se a țawng duh ve viau a ni tih ka hriat chhuah phah a, țawng duh viau tihah țawng phawr phawr chi erawh a ni hauh lo. Bâkah, mi pawisawi hlau tak a nih pawh ka ring. A nui duh ve viau tih erawh ka hre tawh a, a awka chhuak pawh a zaidam viau mai, mipa sual tak chu a ni lo chiang.

"Hun ka lo en miah lo va, a lo tlai duai tawh mai! I duh aia rei ka tibuai rei tawh che tih ka hria, ka haw tawh ang e, ka thil sawite dawhthei taka min lo ngaihthlâksak avàngin ka lãwm e," tiin a ding ta hluai a, kei pawh ka ding ve nghâl zat tho a.

Ka țawng ve hma chuan,"Engtikah nge haw i tum ang? Krismas hmang tùrin i haw tùrah ka ngai ngawt a," a tih zawm leh a, kei chuan," Um, haw dâwn e, Pathian zâra ka dam chuan naktûk khian ka haw ang," tiin ka chhâng a, ani chuan," A nih tak chu, tluang deuhin i haw dâwn nia, hlim takin Krismas leh Kumthar pawh hman i tum ang a, keimah ațang chuan buaina i tâwk lo tùrah beisei ang," țhen deuh sak chung hian a ti leh a, kei chuan nui chung hian," Buaina tâwk miah lovin nang pawhin i lo hmang dâwn nia. E, taka, ka number leh kan thlalâkte kha i duh phawt chuan delete daih rawh, i tân a țangkâi àwm lo êm mai, buainate i tawh phah rêu rêu ang e," ka ti a, ani erawh chuan min chhâng lêm lo chuan a țhen leh sak a. Ani hi, buaina a lo tâwk tawh rengte hi a lo ni lo maw tih ka ngaihtuah chhuak thut, a chhan chu Pathianni chawhnu lama kan lêng chhuak kha, Arini hmu lo mah ila, ani kher ni lovin min hmu nual a, an sawi darh ang a, an inkârah eng emaw neuh neuh a awm phah thei tlat a ni.

A lo tlai ruih tawh tak tak a, a haw hnu lawkah chuan tukverhte kalh țhain ka check leh vek a, chumi hnu chuan inah ka haw ve ta chauh a. Naktûk lama ka hawn tùr ka thuamhnaw ka siam fel vek tawh a, han siam belh tùr ka hre tawh lo. Rawng ka bâwl mawlh mawlh a, nichîna Zodina thil sawi kha ka ngaihtuah zui pah reuh reuh bawk a, ka hawsan daih dâwn si a, Jakob-a a rawn inlan leh hunah meuh chuan ka lo haw hman tawh ngei ang, ka haw dâwn tih kha ka hrilh miah si lo va, a hre miah lo bawkin ka ring. Buaina a lo thleng êm lo ang chu maw ti ila, heta ka awm hma pawhin ani chu a awm reng tawh a, buaina a thlen tih tu mahin an sawi hleinem. A khawngaihthlâk roh mang e, Arini nèn pawh an inkâra a buai deuh ngei ka ring ta khawp mai, an inpawh viau tawh phei chuan....chuvàngin ka number leh thlalâkte pawh kha delete ngei ngei se, message phei kha chu mi dangin an chhiar ang tih a hlauhawm ngawih ngawih, Arini'n a hmu a nih ngat chuan, tu hmeichhia pawhin a bialpa phone-ah khatiang thu ziak kha a tân ni lo, mi dang tân a bialpain a thawn a ni tih hmu ve ta se, thinrim lo leh thîk lo an awm thei dâwn em ni? Mi pângngai tân chuan rinhlelh rual lohin thinrimna a rawn kal nghâl ngei ang.

Zànah chuan Pu Rovate inah ka léng phei lawk a, min lo chiau-au țha khawp mai, naktûk maiah ka haw tawh dâwn a, naktûkah chuan ka tlawh hman tawh dâwn lo, sumo a chhuak hma țhìn si a ka tih vàng a ni. Kimi lah chuan min lo fiamin," A haw tawh dâwn si a, a phûr tawh lutuk helhhawlh vàng a nih hi," tiin a lo nui sâng a, Pu Rova pawh chuan," A àwm ve tho alawm, kum chanve zet a haw lo a nia, an khaw lama mi pawh a lung a lêng tawh viau ang chu," a lo ti ve a. Kei chuan," Nia, ka chhûngteho chuan min ngai ve tawh reng mai," ka lo ti ve thung a, ka nui zui pãwt pãwt a. 

Kan titi luam a; mahse, ka lêng rei duh lo, sumo a chhuak hma thei si a, thawh tlai ka hlau a ni. Ka haw tùr pawh chu min fiam zui nak nak a, tluang taka haw tùra duhsakna min hlànin kan inmangțha ta a, kei pawh ka haw tùr chu ka rilru a hlim tawh bawk a, ka zêp lo, ka ke pên pawh a zãng haih tawh maiin ka hria.

Mut hmunah chuan ka in ep chiah ina Krismas hla an play dup dup chu ka ngaithla pah reng a, anni hian khua an tihar lo ka ti a, mu pahin nuam ti takin a ngaihthlâk theih a, rei ka meng thei ngai lo, min àwi mu țhìn a ni. Zànin erawh tlêmin zàn dang ai chuan an hot deuh a, Boney M an play a, an làmpui pawh a ni maithei, chhuat ni ngei tùr hi a ri leh țak țak țhìn a, nui rî pawh a hriat theih bawk. Ngaithla pah chuan Zodina thil sawi kha ka ngaihtuah pah a; mahse, ka ngaihtuah rei lo khawp mai, ka muhìl ta thuai a.

Thawh hai ka hlauh lutuk vàng nge, ka harh sek mai a, khua chu vâr har hi ka ti mai mai khawp a, dâr 5-ah chuan ka tho vang vang tawh, a vawh êm avàng erawh chuan blanket ka sin chhuak hlûn a, kumin chhûnga ka thawh hma ber țum a ni chiang alawm. In chhûng chu ka phiat fai leh vek a, khum chu a khuhna hlai zetin ka khuh hlûn a, boruak bàl pawhin a lo bawm theih loh nán ka ti a ni. Gas pawh regulator-ah ka off thlap a, phawi chhuah kher erawh ngai ka ti lêm lo, a ngaihtuahawm lo tùrah ka ngai bawk. Kimite an hla hran lo va, ka awm loh chhûnga lo melh zauh zauh tùrin ka chah ve bawk kha maw.

Dár 6:30-ah kan chhuak a, chhûm a zîng deuh chuai a, a váwt ve khawp mai. Sumo chu a khat țha khawp mai a, seat a full vek bâkah Remsiama bulah pakhat a țhu a, mi pali țhutna tùrah panga kan țhu bawk; mahse, pawi ka ti lêm lo, ka haw theih phawt chuan. Bâkah, inhre sa vek, khaw khat vek an ni a, Lunglei kal tum ve ta chu driver tân pawh hnar kha a nuam lo ve ang a, a chuantîr ve ta pawh a ni maithei.

Kawng chu a zia viau tawh a; mahse, a la khu reng tho. Mi dang chu an titi suah suah reng a, kei chu ka ngawi deuh reng a, Jakob-a ka ngaihtuah rauh rauh a. Ka mitthlaah chuan a inthuamna mawi leh changkãng zet, thianghlim sawr sawr deuhte chu a rawn lang awn awn a, ani hi chu mitthlaah chauh ka hmu tawh rih dâwn a nih hi, tûn hunpui chhûnga Zodina tân buaina a thlen loh hrâm beiseipui bawk ila...

Vànneihthlâk takin Lunglei ka thlen hnu rei vak loah chuan kan vênga phei tùr Gypsy ka hmu fuh ta hlauh mai a, ka lãwm kher mai, naktûk kher nghah ka ngai dáwn ta lo ve. Ka pate ka phone vat a, anni pawh chuan vànnei min ti khawp a, ka tum aia hmaa ka thlen dáwn avàngin ka nu chuan," I rawn thlen phei dâwn chuan i chawhmeh thûlkhung tui deuhin ka lo siam dâwn nia," a ti a, a sawi chu ka hre mai, Freezer-a Bàibîng kan dah țhat țeuh chu ka mitthlaah a rawn lang nghâl vat a, ka ei châk tawh, a tui leh pek dâwn si a.

Kan vêng kan thlen chuan a la hma phian a, kàwnah ka pain rickshaw-in min lo hmuak a, ka inpeih hnuah chuan kan in lam pan chuan kan tlãn ta vang vang a. Ka pa chuan eng eng emaw min zâwt kual a, min fiam pah bawk a. Kan in kan thlen chuan ka nu bâkah kan in bul chiaha awm ve, ka pa chhang chiah Ni Biaki a lo awm ve bawk a, ka lût chiah chu min lo chibai lãwp lãwp a.

"Sawrkár zém zen Vah hmêl chhe lo tak ka nei hi ka inchhuang hlê a ni," tiin min lo fiam a, kei pawh chuan min tih dàn chiah chuan," Kei pawh, sawrkâr zêm zen chiah lo mah se min duat êm êmtu Ní hmêl țha tak ka nei hi ka lãwm," ka ti ve a, chutiang chuan kan infiam chho a, kan nui bãwk bãwk a. A hnu deuhah chuan Kimi ka bia a, tluang taka kan vêng ka thlen thu chu ka hrilh nghâl a, ani pawh chuan chutia ka thleng tluang chu làwmawm a tih thu leh ka awm lo ta chu a reh rawih thu chu a rawn sawi ve nual a.

Zànah chuan chhûngteho chu kan inah chuan an rawn lêng țak țak hlawm a, vawiin lama rawn haw ve tho Muanpuii leh Jori pawh an rawn lang a, anni hi chu Aizawl lam ațanga rawn haw an nia, kei aiin an thleng hma a, lehkha zir lai an la nih avàngin leh anni chu kei aia an thlen hma zâwk avànga rawn lêng an ni. Kei chu thingtlângah hna thawkin ka awm a, ka duh hunah ka haw ve thei tawh si lo va, ka chanchin chu hmaichhan ngeia ka sawi an hriat châk vàng pawh a ni tho bawk.

Mahni inah ngei chuan thlamuang siaiin ka han mu leh thei ta a, ka hlim veng veng a ni mai. A tûk lamah chuan rawn haw thar an awm leh a, unau ka ngah ka tih tawh kha, kan han inhmu khâwm chu kan ri chèl chûl mai a, tu dang mah kan ngai lo. Kei chu thingtlâng ațanga haw ka nih vàngin thil thar han hawnsak tùr ka nei ve lo va, mi dang chu khawpui záwk ațanga rawn haw an nih vàngin eng eng emaw min rawn hawnsak liam liam a, nuam ve reuh tak a ni.

Kan han inhmu kháwm chu Urlâwk zàn hman dàn tùrah leh bawk chuan kan buai leh a, kan duh dàn a inang hlei thei lo a ni ber ang chu, kei chu ka harsa lêm lo va, an duhna hmun apiang kha pawi ka ti lêm lo va, ka sawisêl ve lo bawk. An han sawiho nak nak a," Nang chu sawrkâr hna thawk i ni bawk a, in tùr lam i tum ang," an ti a, ka hnial lêm lo, a hmingin sawrkár hna kan thawk ve miau bawk si a, hlawh chhuah tam viau lo mah se sawrkár hna thawk ka ni tlat si a ni.

Kan unauho hi kohhran lamah kan inhmang ĺutuk lo va, a chhan pawh hmun danga awm kan tam vàng hi a ni ve a, mahni khua ni lova khawpui zâwka awm phei chuan inhman hi a har ve deuh bawk a, kan haw châng erawh hi chuan Pathiannia inkhâwm, fellowship leh țhalai thiltihah chuan kan tel ve ziah tho, mi sawisep tùr chuan kan awm ngai bîk lo.

Tunah chuan Krismas hman pawh ka phûr ta zak mai. Ka mithmul pawh fai a ni tawh a, facial min tihsakin ka kut leh ke pawh a fai țha e, unaute zîngah hetiang lam ti thiam an lo awm hi ka tân vànneihna a ni. Kei chu ka chemkal lohna lam tak a ni a, mit line ringawt pawh hi ka buaina a tling a, lehlam ka line dik a nih pawhin lehlam chu a dik ve ngai lo, a inang thei lo, chuvàng chuan ka line duh lo va, awlsam chi Eye shadow ka hmang mai țhin.

Ni 24 a lo inher chhuak a, chhùn lamah chuan zàn lama kan ei tùr leh in tùr lei felin kan hmanna tùr Jorite inah chuan kan dah fel nghál vek a, mipa lamin ár erawh zànah an puah chauh ang, puah sa an peih tlat lo va, zàn lama buai an duh zâwk ni àwm a ni.

Enghelh nei lo chuan ka zâi rát rát a, ka inbual zo chiah a ni a, tuilumin inbual mah ila ka kut leh ke chu a hit țha khawp mai a, ka pa sikri ai ling sen huam lamah chuan ka phei ta vat a, ani chuan chanchinbu hi a lo chhiar a, veranda a nih avàngin thli erawh a thaw leh deuh her her țhìn, in chhûng lama chhèm kan phal meuh loh avàngin veranda-ah hian kan ai mai țhìn a ni.

Nuam ti taka meilum ka ài dardar lai chuan ka nuin min rawn ko a, ka chhâng vat a, ani chuan," Rawn phei lawk teh," a rawn ti leh a, kan in hi kawngpui lam ațang chuan sitting room a hmasa ber a, chuta țangin room hnih a péng a, choka ni lehin veranda hi a ni leh ta a ni. Ka nu chu sitting room lamah a awm  tih ka hria a, meilum ui ru zet chuan ka chhuak phei ta a, sitting room ka lût chiah chu," Eng nge ni t-" Jakob-a hmêl ka hmuh tâkah chuan ka țawng tàwp chawt lo thei lo, mak tiin ka en ta reng a, biak nachâng pawh ka hre lo, eng nge a rawn tih dáwn? Engti tùrin nge a rawn kal? Vawiinah em ni a rawn kal? Engtik laiin nge amah hi a rawn nih leh tak? Zawhna hlîr mai.

*MI CHAPO TAK HI AN FING NGAI LO, AN FIN LOH VÀNG TAK HIAN A NI, AN CHAPO ȚHIN NI*