☆THE SWEETEST HANDCUFFS☆ - Bonus Chapter

 ☆THE SWEETEST HANDCUFFS☆ -Bonus Chapter

By Dingdi Pachuau

Kimi chuan," Kob-a, engtik hunah nge in inkhelh dâwn?" tiin a han zâwt a, ani chuan," 2nd Match khèl tùr kan nia," tiin a lo chhâng a, Kimi chuan," A nih tak chu--" mi dangin an rawn koh avang chuan rawn kotu lam chu a ngaihven zui nghâl ta daih a, Arini chuan,"En a châkawm tawh viau a ni, a hmuhnawm ngawt ang, i thiam dâwn si a," tiin a lo fiam a, Jakob-a chuan bung vut hian," Kan hria ang chu," fiamthuna tel hauh lo hian a lo ti hmuk a, a awka chhuak vàng leh a awm dàn avàng chuan hrehawm ka lo ti ve ringawt, a chhan chu Arini tân a nuam dâwn lo êm a ka hriat vàng a ni.

Mahse, mak deuh maiin Arini chu a nui sak a," Țha deuhin i khèl dâwn nia," a ti sap a, a kal sawn zui ta nghâl a. Ka en zui deuh reng a, Jakob-a chu a phun sup a, chutah," A mitmeng awm dàn tùr ka hre sa vek, ninawm," a ti zui nghut nghut a, kei chuan," Zahngai," ka lo ti ve sap thung a, Kimi țawng làng lâng chu ngaithla zuiin, an inbiak zawh chuan kan țhutna tùr lamah chuan kan kal ve ta nghâl a.

Pavillion lamah țhutna a khat vek a, khua a lum avàng chuan ràngva hnuaia țhu ve peih lovin thing buk hlim hnuai belh tùr kan zawng a, mi pawh an lo țhu ve fir fer hlawm a, mi țhut loh deuhna lam chu Kimi'n a pan avàng chuan ka zui zël a, ka hnungah Jakob-a'n min zui leh bawk a. Field hi thing bukin a hual vêl a ni ber a, ni pawh sa deuh mah se thing buk hnuai belh tùr a tam a, a zia viau a ni. Țhutna atân chanchinbu hlui ka keng a, chu chu kan phah thlawp thlawp a, țhuthmun chu kan rem ve ta a. 

Dâr 9:30-ah hunserh țan a ni a, Upa Faka'n Pathian thu chhiarin a țawngțai a, chumi zawhah chuan YMA chhang, naupang fel tawh tak takte an rawn lâm a, chawnglaizawn làm a ni nghe nghe a, an thiam ve reuh khawp mai. An lâm zo chu au rî leh kut bêng rî a ring khawp mai a, commentator pawhin a fak thiam khawp mai, a sawi dàn ațang chuan nakinah an lâm leh dâwn a ni àwm e, a hmuhnawm leh khawp ang le. Chumi hnuah chuan football khelh țan a ni a, senior leh tleirãwl lamin an rawn khèl a, tleirãwl lamah chuan Vâltea pawh a tel ve nghe nghe a, Kimi pawh a lo țang khawp mai a, a lo au nasa, ka nuih ka nuih a, ani lah chuan," A țanawm ve alawm," a lo ti mai a, naute țana fuih phûr thiam tak a ni ngei mai.

Jakob-a chuan," Ka inkhelh hunah min lo țan ve ang em? I bula mi ang khân, min lo au ve ang em?" a han ti sup a, ka melh zauh a, a thil sawi chu Kimi chuan a hre pha ang tih hlau rilru deuh chuan Kimi lam chu ka en leh vat a; mahse, a hre lo a ni ang, a naute inkhèl lam mawlh chu lo enin a lo au bawk a, ka thaw deuh huai.

"Țan ang chu le," nui chung hian ka ti a, ani chuan," Tak zet maw? Chuti chu, ka theihtâwp ka chhuah ngei ang, nang meuhin min lo en dâwn si a," a ti leh sup a, a bag chu zen rak  rakin tengtere sweet pathum hi a rawn phawrh chhuak a, Kimi nèn min pe ve ve a, amahin pakhat chu a hmuam ve zui nghâl a.

An inkhelh dâwn chuan,"Ka bag-ah khân ei tùr leh tui ka dah a, in duh chuan in lo eiiin in lo in dâwn nia," a ti a, a khelhpuite lam pan chuan a kal zui ta nghâl a, ka en zui deuh reng a, Kimi chuan," A mak e, Arini bula a kal kha ka ring a nia, engati nge kan bulah a awm tlat le?" a ti zui sap a, kei chu ka lo ngawi reng thung. A chhan ka hria a; mahse, sawi lan mai a rem si lo va.

An han inkhèl chu, ka rin ang a lo ni miah lo! Inkhelh chu a thiamin tlàn pawh a tlãn chak viau mai a, striker a lo ni nghe nghe a! Kimi bulah chuan," Ka rin aiin a thiam daih mai," ka ti chhuak nghe nghe a, ani chuan," A tih țhat duh hi chuan a thiam ve alawm, a ti țha duh lo êm zâwk a," a lo ti ve mai bawk a, nakinah Zodina la zawh chian tùr a ni.

An inkhelh chhûng chuan ka lo țang ve khawp mai a, ka tum lâwk a ni miah lo tih ka hria; mahse, Jakob-a inkhèl han hmuh chiah chuan a țan loh theih loh ni berin ka hria. Amah lah chu a țang nasa mai si a, fit pawh a fit viau mai. Hun a tàwp chuan 2-1 a ni a, Jakob-a'n goal hnih a khung laiin lehlamin goal khat chauh an khung thung a, an chak avàngin nakinah an khèl leh thei dâwn tihna a nih chu. 

Kan bula a rawn țhut chuan," I va che țha ve!" tiin Kimi chuan a lo fiam chùl a, kei pawh chuan," Bon țuah țuah viau a ni," ka lo ti ve a, ani chuan," Tak tak maw? A làwmawm e," a ti a, bag ațang chuan tui bottle la chhuakin a in ta nghâl a, chumi hnu chuan," In ril a țâm tawh em? Ei châk in nei em?" a ti zui zat a, kei chuan," Țâm lo ve," ka lo ti vat a, Kimi pawh chuan," Țàm a la hun hleinem, bâkah, nakinah thingpui leh a hmeh an sem dâwn a ni lo'm ni? An sem hunah kan in ve dáwn nia," a lo ti ve a.

Inkhèl kârlakah naupang tel ve theihna tùr item chi thum an zep tel ve a, a hlimawm dar dar khawp mai, hmeichhe lam tân kawi inkahsiak an buatsaih a, programme buatsaihtute hian an ngaihtuah kim thiam ka tiin an fakawm ka ti khawp mai. Kawi inkahsiakah chuan Kimi pawh a tel ve nghe nghe a, kei erawh chu ka la tih ngai loh a nih avàngin ka tel ve ngam lo, ka kâp fuh dâwn lo chiang si a, ka zak lâwk a ni.

"I tel ve lo va?" Jakob-a'n a tih chuan," Ka kâp thiam lo, kawi pawh hi ka la dek chhin lo hrim hrim," ka lo ti a, ani chuan,"A pawi loh chu, tihian hun kan nei thei zâwk tihna a ni mai," a ti sup a, chutah, a phone chu la chhuakin," Thla la lawk ang," a ti a, Kimi rawn lêt leh hma chuan kan selfie ta zuai zuai a, chutah, min enin," I khabe hnuai, ding lamah khân khuavàng i neiin ka hre sia?" a rawn ti chhuak ta sup a. En rengin ka khabe chu ka han tuai zoh a," Ka neih àwm ka hre lo, ka ngháwngah erawh ka nei ngei mai a," ka lo ti a, ani pawh chuan," Ka hriat sual a nih dâwn chu," a ti ve leh mai bawk a.

A hnuah chuan Amos-ate'n an khèl leh a, Jakob-ate pawh chu Saisih nèn an inkhèl ve leh a, Saisih hi kan bial tel ve, kan khawper kha a ni a, țhalai pawh an lo awm ve nual a lo nih hi, thingtlâng mi, hna hrâm thawk țhang tih takah an zam a țhain an chak hlawm khawp mai a, an inkhèl pawh a hmuhnawm viau mai, ball a rangin an innawr tawn nasa viau a ni; mahse, Saisih chu an mual tétna a lang ka ti mai, mual zau deuhah an khèl ngai àwm si lo va, mual zau deuha khelh chu an thiam chiah lo deuh niin a hriat, hun tàwp dâwn thleng pawhin goal a lût hlei thei lo va, minute khat vêl chauh a awm tawh tihah Jakob-ate lam chuan corner an hmu ta hlauh a, pakhatin a han pêt a, defender sâng chêr ve tak Beiseia chuan a head goal ta hlauh mai a, au rî a ring hluah hluah khawp mai, hun a tàwp zui ta mai nèn, an vànnei tak zet, final an khèl thei tihna a ni.

Final chu tlai dâr 3-ah an khèl a, an khelh hma deuh ațang chuan haw ka duh tawh viau nain Jakob-a chuan haw a phal tlat lo va," Min en loh chuan," a ti tlat mai a, Kimi lah haw tum hmêl a pu bawk si lo, bet vak lo chuan ka han țhu ve leh rih a, an inkhèl zui ta bawk a, ka en leh ta a nih chu.

Game chu rin aiin a țang a, Jakob-a pawh a țang khawp mai tih a hriat a, a lehlam lehlamin an khèl chu a fet mah mah em aw tih tùr a ni, yellow card pawh an hmu chho zut mai a, Jakob-a'n an pâwl tân goal a khung hnuah phei chuan ball lam pawh tum lovin mihring chu an intum ni berin a lang, boruak a ri hluh hulh bawk nen, mual pâwn lam ațang lahin pàwr zet zet leh ring zet zeta lo au nawmnah pâwl an lo awm nèn, en nuam pawh ka ti tawh lo.

Jakob-a ball chang, lehlam goal lama a khalh phei chu defender pa lian angreng tak leh sa nghet tlut chuan lo chhuh tumin a taksa hmang chuan a lo nêk lêng lawp mai a, Jakob-a chu a tlu chiang kher mai, paih ang thlawrh a ni ber ang chu. Boruak a țang zual a, referee chuan whistle a hàm tuar a, ka thin chu a lo phu dup dup a, Jakob-a, thinrim hmel zeta bãi chunga rawn tho chhuak chuan chu pa chu khawih a'n tum nghâl a, mi dang chuan an lo chelh ta laih laih a, en hrehawm ka ti ngei mai.

An buai deuh laih laih a, chu pa chuan red card a hmu a, Jakob-a pawhin a khèl chhunzawm thei lo, a tlûk zâwng khân a ke kha engtin emaw tak leiah a vaw fuh palh a ni ang, kal pângngaiin a kal thei lo va, a țhiante chuan an kuah chhuak a, a aiah pakhat a lût zui ta daih a. 

Health worker awm ve ta chu, min rawn ko ve a, Kimi nèn chuan va kal hnaiin ka va ensak a, nâ a lo ti viau mai a, pâwn lam a ni bawk si lo nèn, tihngaihna a vâng angreng viau mai. Ruh lam khawih thiam/zût thiam nia an sawi Pi Hmingi an panpui ta ngawt a, zui zêl thu a awm si lo va, inkhèl pawh en zo lo chuan keini pahnih pawh chu kan haw ta daih a.

Jakob-a chu ka ngaihtuah angreng khawp mai a, zanriah ei khamah phei chuan chanchin zâwtin ka va phone ta tawp a, amahin min lo chhâng hlauh a, rei biak tum pawh ka ni lo a nia; mahse, tihtàwp a phal tlat lo a nih chu.

"Zànin chu ka phût lo ang che, chu pawh zàna nangmah chauha i chhuak tùr ka ngaihtuah vàng chauh chein aw, naktûk lamah erawh chuan ka lo beisei thung ang che, i hmêl hmuh hun ka lo nghâk reng dâwn a ni."

Kan inbe rei viau. Chhuanlam tùr inlêng ka nei bawk si lo, thil ho mai mai a sawi a, dârkâr deuhthaw kan inbiak hnuah a titàwp ta chauh a, a thinrim hlau lovin a ke kha nâ ti viau lo se chuan khatiang chen chen kha chu ka be hauh lo ang le. Mut dâwnah message-in a rawn chhu zui hrãm a, ka tlawh loh chu a hlau ve khawp mai maw.

A tûkah chuan ka office phawt a, U Ropuia a rawn kal lo va, a nupui a damloh avàngin a rawn kal thei lo a ni. Ani rawn kal theih loh avànga office kai loh chu ka duh hauh lo va; mahse, chawhnu lamah erawh Zodina kan tùr chuan ka chhuak ta daih thung a. Zodina a ni leh tawh ngei àwm si a; mahse, a pawi chuang lo, thil han sawipui hrim hrim pawh a țha tho alawm.

Khumah a lo mu ràn mai a, a ke chu a lo tina viau a nih hmèl, an tuam lûk a, a vûng nasa viau bawk, min lo hmuh chuan a lo nui suk a," Ka lo beisei reng che a; mahse, ka lo beidawng țêp chu a ni, lêng reng rawh aw," a lo ti nghâl vat a, ka en vang vang ringawt. Mak ka ti alawm, Zodina a ni miah si lo va, engtin nge Jakob-a a la nih reng theih? Ni khat leh zàn khat ang bâk kha a ni ngai meuh si lo.

"Office ka kai phawt a," ka ti a, a khum chu bêng thap thapin," Hetah hian rawn țhu rawh," a tih chuan nui sakin," Hetah záwk hian le," tiin a dawhkàn bula plastic chair chu banin ka țhu zui ta nghâl a. Ani chu a lo rûm nghat a," Min hlau mah ta che, ka ke ka tihnat hi, i duh loh ang záwng pawhin ka che thei lo ang, ka duh ang pawhin ka che thei lo a nia," a lo ti ve thung a, min en ngur a.

"Doctor lamah kal i tum lo em ni?" tiin ka zâwt ta daih a, ani chuan," Ruh lam doctor țha an awm lo," a lo ti mai a, chutah," Pi Hmingi khân a hlauhthàwnawm loh thu a sawi a, ka ring viau bawk," a tihzawm leh a, kei chuan," A țha alawm, nia, i dim thiam phawt chuan a dam thuai mai ang," ka lo ti ve a. Nizàn lamahte a khua a sik em, a mu țha thei em tihte chu ka zâwt kual ta a, a khua chu a sik lo nain mut erawh a har viau tih a sawi chuan ka lo khawngaih rilru khawp mai, nu leh pa bul lovah, nâ a neih ve pawhin pangchanna tùr nei lovin heti hian a tuar chhuak ve mai ţhìn chu a ni àwm tak si a.

Anîin in tùr min rawn pe a, a pu pawh a rawn lút ve zawk a; mahse, a awm rei lo. Ka lèn luh lai phei kha chuan hmuh pawh ka hmu miah lo bawk, a lêng chhuak ve a ni ngei ang.

*MI HMUH LEH HRIAT LOH LAIA THIL ȚHA TIH HI NUN TIHLIMTU A NI FO A NIA, HLIM VENG VENG I DUH CHUAN THIL ȚHA TI FO RAWH*

(Zanin chu dah loh ai tak tak)

[ I nun hlui/ i hun hman chu eng pawh lo ni se, kumin a liampui dâwn ta, thil țha tiin nge i zial fel dâwna, thil țha lovin? Inchhút teh le]

KUM HLUI THLAH NUAM U

KUM THAR CHIBAI VEK BAWK U🤝