☆THE SWEETEST HANDCUFFS☆ - 14 By Dingdi Pachuau

 ☆THA SWEETEST HANDCUFFS☆- 14 By Dingdi Pachuau

"Nizàn chu ka muhìl țha thei si lo va, ka duh dàn tak chuan awm ni ila, nang pawh i muhìl thei bîk kher lo maithei a ni," a ti a, a mit chu zìmin tlêmin a thle deuh bawk a, thingpui ka in hlak phawt a, chumi hnuah chuan," Engati maw? Nangmah hi a ni lo'm ni rawn kal phal lo kha? Nge, ka hre dik lo em ni zâwk?" ka han ti ve zat a, hetia min han chhaih, han chhaih lêt vêl sak hi dâwt sawi lohah chuan, nuam ka ti tlat mai a nih chu! Zahthlâk hian a.

Ka en țha duh hauh lo nain min rawn en reng a ni tih ka hre tho. "Ni lo, ka tihna chhan kha chu... i hre thiam lo a nih chu. Zankhuaa biak che kha ka duh hial asin, rawn biak harh che ka hreh ve tho bawk si, kan thlalâk ka en ka en ringawt a, chu lah chuan min hnèm lo nasa, ka ngaihna che a zual sauh a," a ti sap sap a, chutah," Ka ke a han na kher kher chu ka va ngei tak! I rawn lèn ve chhunah pawh ka lo buaipui thei lo che a nia," a ti leh a, ka en vat a, a hmui chu petin a ke an tuam bûr chu a en vang vang a.

"A pawi lo, buaipui ka ngai hleinem, i dam hunah a ni mai," tiin ka han nui sak a, a thingpui chu kâwkin," In rawh, a dai mai ang," ka ti ta daih a, kei pawh chuan ka in zui nghâl zat a, ani chuan," Mahse, kawng lehlam takah chuan hetia ka han nâ pawh hi a țha ve tho mai, i rawn lèn phah a, na lo ila chuan rawn lèn i tum miah lo ang," a lo ti leh a. Kei erawh chuan," Tum tho ang, ka lêng kual fo alawm," ka ti thung a.

Ka lêng rei ve reng mai. A phone chuan thla a la deuh reng a, video nèn lam a ti thùl, a chângin a inla pangchang deuh ka ti mai, a phone chu min pein," Ka lu a na ngut mai a, news kha min han chhiarsak mai teh," a ti bawk a, Jakob-a a nih vàng chuan kei pawhin ka hnial duh bík lo, ka chhiarsak ve mai bawk a. Fiamthu ka chhiarsak pah bawk a, ka chhiar chhuah lah chu a lo nuihzatthlâk hlawm kher bawk nèn, kan nui dùn bãwk bãwk a.  

Chaw ei ve nghâl mai tùrin min sâwm nasa mai a; mahse, ka hnial thei ta hrãm. Min thlah a tum pawh chuan," Step-a kal a ngai dâwn, i ke i tihnat belh palh ang, lo dam vat vat tum la, ka rawn kal leh hunah chuan dam deuh vara rawn hmuh che ka inbeisei tawh ang," ka ti a, a la remti vak lo chung chuan tlawh leh vat intiamin, haw tùrin a room chu ka chhuahsan zui ta nghâl a. 

In hnuaiah chuan ka rin loh lutukin Arini ka hmu a, Pu Zuala nèn chuan an lo titi dùn a, min lo hmuh chuan," Haw i tum tawh mai elo? Chaw ei ve nghâl mai la?" Pu Zuala chuan a lo ti vat a, nui chung hian," A, chaw ka heh si, ka țàm chhuah palh ang che u," ka ti phawt a, chutah," Ka'n haw ve tawh ang e, ani pawh a dam vat tùrah ngai ang," ka ti a. Arini pawh chu lo ding ve nghâlin," Kei pawh ka haw ve tawh ang e, Zodina chu ka han hmu kher lo mai ang," a lo ti ve zat a, Pu Zuala chuan an kawt zau zet tàwp thleng chu min thlah a, chumi hnu ațang chuan Arini nèn chuan kan kal dùn ta a.

Biak dàn tùr ka ngaihtuah rauh rauh lai chuan," A dam vat theiin i ring tak tak em?" a rawn ti chhuak ta sap a, ka en deuh hau a. Ani pawh chuan min rawn enin za lo tak hian a nui deuh sak a," Nimin lama a lan dànah kha chuan a nat vak hmèl si loh a; mahse, rin aiin a lo nâ a nih hmel ta sia," a ti leh a, kei chuan," Nia, a lo na deuh a ni ang; mahse, Pi Hmingi chuan a hlauhthàwnawm loh thu a sawi niin an sawi a," ka lo ti ve thung a.

A thaw hak a," Nia, chu chu beisei ang," a ti sap phawt a, chutah thaw leh huaiin," A châng hi chuan ka hre thiam lo țhìn a ni, min ngaihtuah êm ëm a, a hnu lawkah min hre ngai lo ang maiin min ngaihsak leh dêr lo bawk a, a châng chuan min tihder a nih loh pawhin a fiamthu a ni ang ka ti hial țhìn, a ni rêng bawk a, min biak duh loh vang vang hnua min rawn biak hian min fiam thu a rawn sawi ţhìn rêng a; mahse, ka rilru hi a tihrehawm tlat țhìn, min hre lo leh min ngaihsak lo deuha awm tawh lo tùr leh min fiam tawh lo tùra ka hrilh pawh hian a bànsan thei chuang lo; mahse, ka hmangaih êm avàng hian hetiang hi ka chungah ti țhin mah se, ka haider lui zêl a, ka ngaidam leh zêl bawk a, tawrh chhuah hun ka la nei ngei ang tiin ka infuih țhin a ni," a ti leh ta sap sap a, a thil sawi chu ka ngaithla kar a, lo sawi ve tùr pawh ka hre ve lo, chutiang thil min han hrilh ve duh mai chu a rilru a hrehawm thawkhat viau a nih ka ring, ka thil hriat lah hi a bialpa berin a hrilh bawk si loh chuan hrilh chi niin ka hre bawk si lo.

Kan ngawih vang vang hnuah chuan min chhàn dàn hriat ka châk vàngin, " Amah hmu lovin i haw leh daih a! Chanchin ngaihvena kal i ni lo em ni? A lo beisei reng àwm si che a?" ka ti chhuak ta phawng mai a, a ngawi leh vang vang a, a duh loh zâwng tak ka zâwt a nih ringin ka inthiam lo deuh hlek a," Ka tih palh, zawh loh tùr che ka zâwt a nih ka ring," ka ti leh ta sap a, ani erawh chuan,"Ni lo ve, ka pu kha a chanchin chu ka zâwt ta mai a nih kha, engkim ka hre thei vek tho a. Chuan, Zodina chu, ka phone-in min chhâng thei bawk si lo va, min chhâng thei lo ti ila min chhâng duh lo a ni zãwk ang chu, hetia ka phone a chhàn duh loh leh min hre lo anga a awm tlat hun lai angah hi chuan ngaihven viau țhin mah ila, amah hmuh loh hi a him ber, ni hnih khat hnuah chuan a zia ve leh mai țhin bawk a; mahse, ka rilru hi chu a tihrehawm ve țhìn a ni," a ti leh sap sap a, a thil sawi hi a dik tih ka hria, hrehawm pawh a ti ngei ang, ka khawngaih phãk chu ni hauh lo mah se ka khawngaih reuh karh karh khawp mai.

Message-in min rawn ûm zui chuai chuai a, a kè chu na mah se a hlim thu leh ka lèn avànga ni hlimawm leh chhinchhiah tlâk tak a hman thu rawn sawi telin ka hawsan dâwna min fawh a châk thu pawh zak map lo chuan a rawn sawi tel! Thlalâk a rawn dah nual bawk a, vawiina mi vek a ni. Ka han en chiang hlawm a, a țhen phei hi chu ka hriat loh laia min lâksak a ni, posi lài angreng taka ka awmna pawh a awm nual mai a, amah lah chuan *I dawh fuh hlawm khawp mai*  a rawn ti zui a, delete vek tùra ka tih chuan  *Ka phal teuh lo mai, ka roh hlawm teh a nia, min rawn kan leh hunah phei chuan hei aia tam hi ka hmehsak tawh ang che*  a rawn ti leh a.

Zàn lamah pawh min rawn be tho a, Amos-ate rawn luh lai erawh chuan ka be tàwp hrâm a, ka phone chu ka mute ta tawp. Amos-a chuan min fiam leh zuk zuk a, nimin lama a bialnu ve deuh reuh Kimi'n min kawh hmuh chu mitthlaa hmu rauh rauh pah chuan kei pawh chuan ka'n fiam lêt ve a, a hming bul chu ka'n sawu lang dêk dêk a, Remsiamate pahnih chu lo nui hawk hawkin," Eu, i va hre thei bîk ve a! A chhe lo em?" an lo ti a, Amos-a pawh chuan nui hui chung hian," A, duh aiin i hre mah mah dâwn tlat, duh tãwk teh ang, min puan zo dâwn takngial e," a ti a, kan nuiho dar dar a, a hnu lamah chuan amah a insawisa chho a, ka nui nasa lutuk a, ka dulthuar pawh a na vek, an lêng rei lo ta hlauh zâwk a, chuti chu ni lo phei se chuan ka nuihna lamah ka chàu chhe vek ang chu!

Mutnaah chuan Jakob-a message bawk chu ka chhâng leh ta a, thil awm dàn chu ka hrilh fiah a ni. A missed calls leh message a lo awm nual si a, thil awm dàn chu sawi fiah a phût tlat si a, kan inchhàn dànah hi chuan inngaizâwng, inkawp kan nih lohna a awm miah lo. A phone ka chhàn loh avàng chuan a lung a awi lo va, keiin ka chhàn loh chhan chu ka hrilh fiah a, a hnuah erawh a lungawi ve leh ta mai bawk a, rei fê kan in-text nghe nghe, a message tàwpah  *Naktûk zîngah message thlum tâwk ka lo hnutchhiah dâwn che nia, chuan, min rawn kan leh ngei ka beisei bawk ang, mut tui sûk sûk le, Kawaī*  a rawn ti a.

Kan in-text rei deuh bawk a, zíngah thawh ka la hai deuh zui a, a chìn tam chi loh khawp mai. Min mamawh lo awm ta thut se a zahthlâk dâwn lutuk si a, ka thawh hnu rei vak loah chuan kan vêng lam dàwr neitute pî hi a rawn kal ta chiah mai a, a tunu a kaw lam a chian loh thu leh chutiang tâna damdawi ka kawl leh kawl loh chu min rawn zâwt a, ina ka kawl loh avàngin office chu ka va hawng tak rawk rawk a, a haw hnu chuan ka thaw huai mai, tlêma tlêmah ka mualpho lo chauh chu a ni.

Chaw ka ei laiin Jakob-a message kha ka hre chhuak zawk a, tho hluaiin ka phone chu ka va la leh rih a, ka han check a, ka hmu miah lo. Thlu thlum tak chu ka chhiar ve chhin châk asin le, ani hi, dâwt min hrilh a ni lo maw? Zàn hmasa lamah a mu hlei thei lo va, a theihnghilh ve pawh a ni mahna le. Nge, Jakob-a kha a bo leh tawh zâwk ni ang? Chu chu a rinawm viau, Zodina a nih leh tawh chuan ani chuan a hre ve tawp nâng.

A reh leh ta vang vang a, va biaka va kan pawh ka duh deuh viau nain va biak hmasak chu ka hreh a ni, Arini rilru puthmang ka hria a, ka tân chuan Zodina hi hnaih tam viau loh a țha, mi inkâr ka tibuai thei tlat si a, Jakob-a a nih leh tawh loh phei chuan Zodina ngei pawhin min lo ning thei, Jakob-a a nih chhûng erawh chuan mi pawi a sawi loh nân hre thiam taka ka kawm erawh a țha ang, Zodina'n min rawn be hmasaa nih loh chuan ani hi chu be hmasa lo teh ang.

A hnuah erawh Pu Zuala ka hmu remchâng ta hlauh a, Zodina chanchin chu ka zâwt a, ani pawh chuan a zia chhoh ve viau thu chu min hrilh ve mai a, chutah," A, rawn kan ve leh hrim hrim la, i bulah a hlim a ni tih hmuh kha nuam ka ti a ni, ka tupa a ni a, a chanchin pawh ka hrilh tawh che kha, a mal țhìn hle mai a, i bula a awma hlim taka a nui rî hriat leh a hlim hmêl hmuh kha nuam ka ti tak zet, khatiang taka a hlim hmêl kha ka la hmu ngai hauh lo," a ti leh charh charh a.

A pute hian an tupa chungchâng hi an hre chiang bîk hauh lo va, Zodina kha chuan a hrilh ve tawh ngei mai a, a sawi dànin; mahse, anni tân chuan hriat thiam ngaihna a awm lo tawp ang le, ka dem hauh lo, ka hriat thiampui lutuk, hetiang phei hi chu a takah kei ngei pawhin a awm ka ring ngai bîk lo, thawnthu-ah leh film vêlah bâk a awm ka ring pha bîk lo a nih kha, Mizoah hlauh phei chuan... A, a hla lutuk ringawt, ka ngaihtuah chhin ngai lo; mahse, ka hmaah, ka hmuh theih leh hriat theih ngeiin, a lo awm ngei chu a nih si hi.

Kâr khat hnuah chuan, chawhnu lamah ka va kal ve leh ta hrãm a, mi damlo leh natna neite chu ka tlawh tùr alawm tiin thiam ka han inpe chawp a, a pu sawi ang ngeiin a lo zia viau tawh tak tak a! In chung ațangin in hnuaiah  a rawn bãi thla suih suih a, a ke vûng pawh a zia ve viau tawh bawk. Pu Zuala chu a țawng charh charh reng a, Zodina erawh chu a inthlahrung deuh a ni maithei, a țawng vak lo va.

"I zia chak viau kha a. Ruh ulh leh auh lam hi chu tliak ai hian a dam har deuh hlek a, dim pawh a ngai viau ţhìn, nang pawh inkhelh lam chu i chawlhsan rih a ngaih hmel viau a ni," ka tih chuan a pu chuan," Eng emaw châng hian a ti vak zêl a, a châng lahin a chawlhsan vang vang bawk a, inhliam phei hi chu fit lo hna hi a ni deuh a," a lo ti vat a, Zodina erawh chu a lo ngawi reng  thung a.

"Ngawi teh u, kei hi ka lo titi tui mah mah a ni, upa pâwl lamin pawisa khawn tùr kan insem a, khawn a hun tawh, naktûk lamah chuan theh luh vek a hun tawh tlat a ni," tiin Pu Zuala chu a han ding nghâl thuai a, min rawn enin," Lêng reng rawh aw, kha, Bawiha ke pawh kha, i lo lêng  remchâng hlauh bawk a, i lo tuamsak mai a ni ang chu, a nî ram lamah a chhuak daih si a," a ti a, a room lam pan chuan a kal ta nghâl a. A rawn chhuak leh thuai a, lehkha a rawn hûm chhuak a," Ka rei deuh maithei a, eirêl tùrin Matei a rawn haw ang. Tluangte, lêng reng rawh aw, inthlahrung hauh lo la, thingpui pawh in duh hunah i lo siam leh mai dâwn nia," a rawn ti leh a, a chhuak zui ta nghâl a.

Kan pahnih chauha kan awm hnu chuan awm dàn thiam a har duh angreng. A ke chungchâng lah ka zâwt tawh si, eng lam nge ka sawipui ang aw ka tih rilrûk rauh rauh lai chuan," Ka ke chu tuamsak ka ngai hran lo a nia, ka ti ve thei lutuk," a rawn ti chhuak ta a, kei chuan," Thil harsa a ni hleinem, thingpui chu i duh em?" tiin ka han zâwt zui zat a, ani chuan," Nangmah kha i ril a țâm tawh ang, i hreh loh chuan no hnih han thlî la, nichîna kan in kha chu a dài deuh mah mah tawh a," a lo ti niah niah a, thawh a tum chuan tho ve vatin," Eng nge tih i tum? Ka lo ti ang," ka ti vat a," No dahna i hre lo ang ka ti a," a lo tih chuan," A, ka hmu zo ve êm ang chu maw," tiin ka han nui a, choka lam pan chuan ka kal zui ta nghâl a. Ka hmu ta thuai a, flask ațanga thingpui no hnih ka thlit hnu chuan tray-ah ka cháwi phei a, a bul dawhkàna ka dah chhuah chuan ani chuan," Gas stove chung chiah ding lama drawer kha va han hawng la, kurtai a lo awm bawk ang, ka tîr leh mai che  a niang chu," a lo ti a, choka lamah chuan ka va phei leh ta vat a.

Chu Kurtai siamchawp chu a tui kher mai, anmahni siamchawp a nih ngei pawh ka ring, ka han zawh chuan a nî siam a nih thuin min lo chhâng vat rêng a," I nî chuan a siam tui tak zet a ni, ka nu pawhin a siam ve țhìn a, kurtai pângngai ei peih hauh si lo hian hetiang bâwnghnute ațanga siamchawp ngei hi chu ka ei țeuh thei nia," ka lo ti vat a, ani pawh chuan," Ni e, hetiang hi chu a tui ve reuh tlat," a lo ti ve a, kurtai chungchâng chu kan sawi chho ta zêl a, kurtai chu an lo nei lo ang tih ka hlau, titi tùr a rawn hring chhuak ta țeuh si a, a tihzia tak tak a ni.

A ke chu ka tuamsak lui ta tho a, ka tuam hma chuan a ke la vûng deuh al chu ka han hmet dan dan a, ka mit chu ka han khap deuh sak sak a, ani pawh chuan min lo ngaichang ve deuh a," A dam thei lawk lovin i ring em?" a rawn tih chuan ka en vat a, nui chung hian,"Dam ang, a dam ngei ang; mahse, dam țha tùr chuan hun erawh a duh ve deuh ang chu, i dim thiam a pawimawh bawk ang a," ka ti a.

"Kei hi chuan ka dìm thei mai ang a; mahse..." tiin a ngawi zui ta daih a, ka tuam mawlh mawlh a, a thil sawi tum chu ka hre thiam chiang mai a," I nat chhûng hi chu nangmah kha nih i tum hrâm hrâm dâwn nia," ka han ti ve ngawt a,"Keia duha duh loh theih ngawt pawh a ni lo," a tih chuan a ke ka tuam chu chàwl meuhin amah chu ka en vat a, a hmel ka hmuh chuan ka inthiam lo deuh a," Ka tih palh, ka sawi sual liau liau a nih kha, engtik hunah hian nge an rawn lan tlângpui i hre thei em?" ka ti ta vat a, ani chuan," Ka hre lo ka tih tawh kha, mak ka tih deuh erawh chu a hma aiin tûn hnai chhoah hian an rawn inlâr zing a, a hma kha chuan eng emaw châng zeuh, kum khata vawi hnih vawi thum ang vêl kha a ni mai țhìn a, tunah hi chuan thla khatah pawh vawi hnih vawi thumte a rawn ni ta," tiin a han thaw hap a.

"Hetia i awm țan chhoh hun kha i hre lo tiraw?" ka tih leh chuan," Aw, ka tét deuh lai ațang tawh khân a ni tih chiah ka hria a, eng vàng nge tih erawh tún thleng hian ka la hre lo a ni," a lo ti leh a, ka lo bu nghat a, hei hi chu Jakob-a zawh chi a nih hmêl, ani khân a hre ngei ang. 

*******

Ka nu leh pate'n ka in leh ka thawhna khua chu min rawn hmuhpui ve ta. Kan inbe reng a, rawn kal hi chu an tum ve fo a, fùr lo thlen leh hmaa rawn kal ngei an tum thu an sawi chuan ka ring ngam chiah lo va, in lamah ár vulh buaiin ka nu a buai țhìn tih ka hre ve tho si a, ka pa lah ka nu tel lo chuan a chhuak thei mang lo va, bâkah, hna a lo nei ve tho bawk nèn, chawlh a nei thei mang bîk si lo va, hetia an rawn lang hrãwk pawh hi mak ka ti rêng a ni.

Tlaia Kimi rawn kal laiin  ka nute chu an rawn thleng thut a, min hrilh lâwk bík si lo va, mak ka ti viau rêng a ni. An rawn kal dâwn tih min hrilh lo ta chu, eirawng báwlin ka buai ta map map a, ka rilru erawh a hlimin ka thlâ a muang tak zet a ni. Ka nuin min chêtpui a tum pawh chuan ka phal lo va, an chawhmeh rawn lei chu phúr zet hian ka siam sauh sauh a, Kimite nèn chuan titi bawrh bawrhin, ani pawh chuan an chanchin chu a lo zâwt ve bawk a, zâi rát rát chung chuan thingpui hâng ka han siamsak a, ka nu kurtai siam, min rawn kensak ngei chu ka han chhawp tel bawk a.

Zanah Pu Rovate nupa an rawn lang vat a, an chanchin ka sawi nasa țhin bawk a, ka pate pawh chuan an nupa chuan an lo chibai vat a, ka in luah hi a lian lêm lo bawk a, ka room tih loh hi chu pindan dang pawh a awm hran lo va, kan inhmu vek a, thurûk pawh inhrilh dâwn ta ila, a inhrilh theih loh ang tih tùr hi a ni rêng a, ring vak lo pawhin sawi mah se a hriat loh theih loh tih theih khawpin a zau lo a ni.

Mutnaah ka khum ka kian a, ka pa chuan," Chhuatah kan mu thei alawm," a tih chuan," A, inpui sâng kài manah, chhuata mut te chu a tih chi nâng,"ka lo ti a, ka nu chu a lo nui a, ka pa chuan mut tlàn vek a han rawt leh a, khum chu han dawh zawm tùrin ka țhutthlèngsei neih chu a hniam tlat mai si a, bâkah, khum aiin a tawi deuh bawk a, keimahin țhutthlèngseiah chuan ka mu ta a ni.

Thingtlâng mah ni se mi hi an lo bengvâr hi ka tia, ka nu leh pate an rawn zin tih hriain inlêng kan han nei nak nak a, patling nutling lam an ni deuh vek thung. Ka office hlànin in lamah an lo inkàwm ve a, mahni chauhin ka awm rak rak ta rih lo va, office ațanga haw pawhin ka nu leh pate hmêl ka hmu thei a, nuam ka ti tak zet a ni.

Mahse, an châm rei thei bîk lo. Nilainî-ah an rawn kal a, Inrinní lamah chuan an haw leh dáwn ta, a rûk chuan ka huphurh khawp mai a; mahse, ka tilang duh miah lo thung. Anni pawhin min hawsan chu an hreh ve tho ang tih ka hre ve kar a, ka tihlan hlauh chuan an rilru a hrehawm ka hlau a ni.

An rawn kal lam kha chuan Lunglei ațangin taxi an rawn hmang mai kha a ni a, haw lamah erawh chuan sumo service-ah an haw thei ta thung a, fùr hunpui a la inher lo va, kawng pawh a la țha rih viau a, an haw ta pawh chu an ngaihtuahawm lo ve; mahse, ka ngai ngawt ang.

Zîngkârah ah ka pate kha an haw kha a ni a, chaw ei khamah inah mahni chauha ka awm rak rak lai chuan," In awm em?" tih rî ka han hria a, kawngka lam chu hawi vatin," Awm e, lo lût rawh," tiin ka lo chhàwn vat a, Zodina rawn inhawl lût ka hmuh chuan," Teh tlat che chuan, lo țhu rawh, kha, i ke chu a va dam tawh àwm ve a?" ka lo ti vat a, ani chu a nui sak a," Kan inhmu khât hle mai tiraw, Nurse?" a rawn ti ta a.

Nurse min ti. Zodina ni lovin Valpuia a ni ngat mai.

"Lo ţhu rawh khai, ni e, inhmuh a khât hle mai, eng thli chhiain nge rawn chhêm lût ve teh tlat che a? Lo țhu rawh, thingpui ka lo thlit vat ang che," tiin ka han nuih a, ani chuan," Ka hmu khât êm mai che a ka ti maw le, tûn ang hun lai hian luia kal a nuam asin, ka kè hi dam se chuan kan huana kal pahin luiah kan han kal tawh tùr hi a nia," a ti a, a ke chu a en vang vang a, kei chuan," E, a dam hunah kan kal tak tak tawh dáwn nia," ka ti a, thovin a thingpui tùr chu ka han thlitsak nghâl a.

Ka va pêk lai chuan," Nula ina thingpui han in ve ngawt chuh," tiin pawisawi loh hmel tak hian a han nui a," Mahse, nurse fel tak thingpui siam han in pawh a châkawm tho a," a ti leh a, kei pawh chu ka han nui ve a, chutah," Valpui, lui kal leh huan kal lam hi nuam i ti viau a ni maw?" tiin ka han zâwt a, min hmuh hian min zâwtin min sáwm ve ziah si a.

Ani chuan," I va'n hre thei êm êm! Ka têt tê ațanga nuam ka tih a nia, ka nu leh pate nèn pawh kan kal nasa țhìn alawm, Kaikuang leh sangha man te, chèngkawl khawrhte hi nuam ka ti a. Nurse, nang pawhin nuam i ti viau ang tih ka hria a ni," a lo ti vat a, a sawi pah chuan a lu chu a han bu deuh nghat nghat bawk a, chutah," Kei aiin kum lamah chuan upa deuh hlek mah la, lui kal leh huan kal lamah chuan ka upa zâwk thung ang," nui sak chung chuan a ti leh ta a.

Ka rin dàn sa a ni tho. Valpuia hi chu a țawngkam leh a chezia hi a la naupang deuh hlek a, tuna a thil sawi pawh hi ka ring khawp mai.

*ȚHIAN ANGA LEMCHANG DER MI AI CHUAN HMÊLMA RINAWM TAK PAWH AN ȚHA DAIH ZÁWK*