☆THE SWEETEST HANDCUFFS☆ - 15 By Dingdi Pachuau

 ☆THE SWEETEST HANDCUFFS☆ - 15 By Dingdi Pachuau

"A nih, tûnah kum eng zât nge i nih a?" ka tih chuan," Kum 19 ka tling țêp," a lo ti vat a, nui chung hian," A nih chiah chu, tûn ațang chuan min û char char tawh ang che," nui chung hian ka ti a, ani chuan," Tlangvâl ka ni ve tawh tho a, ka û duh teuh lo mai che," thutak zet hian a lo ti thung a. 

Thingpui a in lai chuan," A nih leh, i ke kha engtia i tihnat nge ni rêng rêng a?" tiin ka han zâwt chhin a, hre tho mah ila min chhànna hriat ka châk a ni, no chu dawhkàna a dah thlâk hnu chuan a ke chu a en leh vang vang phawt a, min rawn enin," Lui ka kalnaah lung nãlah ka tlu palh a," tiin a han nui a," Ka tlaw vàng a ni bík lo a nia, chêtsual châng hi a awm ve châwk a ni. Tunah hi chuan a na tawh vak lo, a vúng tawh mang lo bawk, min khawngaih em?" a ti zui zat a.

Eng eng emaw ka sawipui a, min nêl ve tawh a, a țawng duh ve viau tawh bawk nèn, titipui pawh a nuam viau mai. A nui duh a, a nui hmêl lah chuan pawi a sawi lo nasa mai si a, hmuh a nawm bâkah a mitmeng mawlh chu, pawi a sawi lo lutuk a, ka hmuh hmasak ber nîa a nungchang leh awm dàn zawng zawng kha tunah hi chuan a nâwt reh hneh tawh êm êm a ni.

"Kumin hian lo in nei ve em?" tia ka zawh chuan," Nei ve hlek e, a zau lo, chuan, loah i kal ve tawh ngai em? I kal pawh ka la ring chiah lo," tia min chhângin zawhna min zâwt zui a, kei chuan," Kal lëm nâng, lo kan nei ve ngai lo va," ka lo ti a, ani chuan," Ka rin dàn chiah, i kutte kha a no bawk sia, thingtlânga hna kan thawh ang chi hi i thawk ngai lovin ka lo ring rêng a, ka lo ring dik chiah a ni," bu nghat nghat pah chuan a ti leh barh barh a.

Ka nute pawh tluang takin an thleng a, ka pa erawh a motor chuang a chuang fuh zân lo a ni àwm e. Țhutthlènga a mu bûr ka hmuh chuan ka khawngaih roh mai mai. Motor ka ruih zauh châng hian," I ruihna man a to lo êm mai, bãkah, motor ruih zawng, a țhing êm mai, a motor chuan ngai loh thlâk," min ti ziah a, han fiam lêt ve sak ka duh viau a nia; mahse, a awm dàn ka hmuh avàng leh motor ruih hrehawmzia ka hriat chian tawh êm avàng chuan ka ti ta êm lo.

Lo lama an liam suau suau tâkah chuan lêng chhuak lêm lo mah ila khua pawh a reh ve deuh raihin a hriat a, Amos-ate pawh an lo lam kal an chàu deuh a ni ang, zànah pawh an rawn lêng khât ta deuh a, khua an tihar ve ruih mai. Chhùn lamah ni a sâ thei vawl vawl si a, nilênga thing buk rêng rêng awm lohna hmun kàngvâra feh chuan a chauhthlâk thei viau ang, ka la feh ve ngai lo nain ni sâ leh khaw lum tak hnuaia office-a țhut mai mai pawhin ka thlan dep dep thei a nia, kàngvârah phei chuan engtiang taka lum leh sâ nge a nih ang le? An chàu dâwn lutuk.

WhatsApp group lama ni hnih awh tùr training pawimawh an rawn post ka hmuh chuan ka thaw hawk a, a hun chu a teptèr viau a ni, naktip mai a ni tawh a nia. Kei chuan ni khat hun ka la nei a, kei aia post hla zâwk, la thingtlâng ve leh chhãwng hmuna awmte hi an ngaihtuahnaah hian a thleng phâk lo em ni le? An khua ațanga sumo service emaw lìrthei remchâng a awm loh phei chuan an rawn tel hman dâwn em ni? Ka ngaihtuah ang chiah chuan an rawn sawi ta laih laih a, a țhen chuan hetiang training pawimawh hi chu kâr hmasa lam daih ațanga post tawh ni se an ti a, thingtlâng pilril deuha thawkte chuan an rawn tel hman an rin loh thu leh an khuaa lìrthei han hman mai tùr a remchàn loh thute an rawn sawi tliar tliar bawk a.

Kei pawh ka inngaihtuah vang vang a, vawiinah sumo a kal a, Zirtàwpnî, kan training ni hnihna tùrah a kal leh daih ang a, engin nge ka kal ve tâk ang le? Mahse, kei chu, Lunglei kan la hnaih deuh a, motor a remchàn loh leh ke pawhin a kal theih a, ni khat chhûng ka kal chuan ka thleng ngei ngei dâwn tih ka hria; mahse, motor nei ka be kual ve phawt ang chu. Ka ngam ber Pu Rovate bike lah chu a la țha lo reng a, ka ngam tlâk deuh deuh pathum Remsiamate țhianhoah lah hian bike nei an awm si lo va, a nei hnai ber Remsiama lah sumo a ni bûr bawk si.

Kimi a feh lo hlauh a, ani'n min ngaihtuahpui a, motor nei chu awm mah se motor pui pui chu ka tih chiah loh avàng chuan ke hnih nei lam kan zawng deuh a, nei deuhho lah chu lo lama feh ngai leh eng eng emaw thil pawimawh tih tùr nei an ni deuh fur zêl a, a buaithlâk khawp mai.

"Zodina chiah a bãng ta, kan be chhin ve mai dâwn em ni ang?" Kimi'n a tih chuan," A ke kha a dam chiang tawh em le? Han ti ila, Bike khalh a lo la zuam lo maithei asin," ka lo ti vat a, ani chuan," Kan zâwt pah dâwn nia," a lo ti mai a, a han phone ta nghâl a; mahse, a rawn chhâng thei lo va, a tihnawn leh pawh chuan a rawn chhâng chuang lo," A hman lo remchâng rih a ni maithei, message ka'n thawn tho ang e," a ti leh zat a. A hmanhmawhthlâk tho nain naktûk hun ka la nei a, zanina ka hmuh loha naktûk zîng thlenga kalna tùr lìrthei ka la hmu lo a nih chuan chaw ei khamah kein ka kal tawh mai ang chu.

Zànriah ei tùr ka rèl lai chuan ka inngaihtuah vang vang a, ka hlawh hi tlëm tlêmin khâwl tum ve ta ila, scooty thar ka lei thei lo a nih pawhin secondhand la țha tak lei tum ve ta ila tiin, túnlaiah chuan țha tak tak, to vak lovin lei tùr a awm ve țeuh tawh a, hmuh fuh phei chuan a thar ang deuhthaw hial pawh hmuh theih a ni. Ka nei ve thei hlauh a nih chuan training dáwnah pawh mi dang biak buai zêl a ngai tawh lo ang a, mahniin duh hunah ka chhuak theuh thei ang a, a țha dâwn êm asin.

Kimi'n min rawn bia a," Ka phone min chhãng thei chuang lo, lo try ve chhin rêng rêng teh, be hreh suh, i mamawh ëm kha," tiin, min buaipui viau chu ka lãwm khawp mai, keimah mai chuan eng ka ni dáwn hauh si lo va. Zodina biak chu ka hreh ve reng, Arini ka ngaihtuah chhuak nghâl zat a, hei vàng tak hian ka hreh zual a ni; mahse, ka mamawh bawk si. Lehlamah chuan Kimi pawh a chhâng thei lo a nia, kei pawhin ka biak pawh theih ka ring bîk chiah lo.

Mahse, ka han ti ve ta tho tho a, rin loh deuh hian vawi hnih a ring hnuah min rawn chhãng ta tlat mai, min rawn chhâng hma lutuk a, sawi tùr ka haihchham lek lek hial zâwk a ni. Zahzèlah a ke chungchãng chu ka zâwt phawt a, a hnuah ka harsatna chu sawiin a hman remchàn theih dâwn leh dâwn loh chu ka zâwt ta nghâl a, ani pawh chuan," A nih tak chu, hetia ka ke a nih hnu hian bike chu ka khalh chhin leh tawh miah lo va; mahse, ka thei mai ang, a pawimawh bawk si a," a rawn ti a, ka thlâ a muang deuh huai mai.

Chanchin chu Kimi ka hrilh ta vat a, heti a nih chuan naktûk lamah pawh ka la office thei rih ang, naktûka kal nghâl chu ka peih chiah lo, zîng dâr 10-a țan tùr a ni a, a tûkleh zîng dâr 6 vêla kan chhuah pawhin țan hun chu ka nang hman tho dâwn a ni.

A tûk zànah chuan Zodina chuan min rawn bia a," Naktûk chu dâr eng zâtah nge kan chhuah ang?" tiin, ka lo hrilh miah lo tih ka hre chhuak ve chiah, ka ngaihtuahna ka lo kalpui lutuk a lo ni. Amah zâwkin min rawn zâwt a nia, ngaihtuah thui lo ka inti ru kher mai.

"Dâr 6-ah ti ila, a hma i ti em?" ka tih chuan," Ti lo ve, i tih hun hun kha a ni mai," a rawn ti leh a, a lo remchâng thei hlauh tùr ka làwmzia chu hrilhin kan inbe tàwp ta thuai a, ka rilruah erawh chuan Zodina ni lovin Jakob-a kha rawn ni thut se tiin ka ngaihtuah zui a, ani chu han ni se chuan tlêmin ka inthlahrung lo deuh hlek ang a, a hnunga min phurh hunah pawh nêl ve deuh takin ka hnaih ngam deuh bawk ang a tihte chu ka ngaihtuah kai zël a; mahse, chutiang chu a ni ringawt thei bîk si lo, inlêng ka nei lo bawk a, hma takah mu mai teh ang, ka bag ken tùr lah ka siam fel vek tawh bawk nèn, thâwk khat chu a veng ta phawt e.

A tûkah chuan dâr 6 rîk hma hretin a rawn lang a, thingpui lo pêk ka tum chuan a in tawh thuin min chhâng a, kei lah ka lo intifel vek tawh bawk nèn, kan tlãn chhuak zui ta thuai a. Ka bâwr hran lo va, ka inthlâkna tùr thuamhnaw bag-a ah a ni deuh mai, khua kan pèl fel tihah chuan bike-a chuan chu a hrehawm leh hrehawm loh min han zâwt a, a hrehawm loh thuin ka lo chhâng vat a.

"Arini lakah ka inthlahrung viau nain tihngaihna dang ka hre hlawl bawk si lo va, min hre thiam hrâm mai a ni ang chu," fiamthu ti tak deuha ka tih chuan min chhâng lawk lo va, ka sawi sual em maw ni ka ti hman deuh a; mahse," Chutiang lam chu ngaihtuah duh suh," a rawn tih tâkah chuan tlëmin ka awm chu a nuam leh ta deuh a, zawhna dang zâwt zuiin," Keimah vàng liau liaua kal i ni sia, kan thlen veleh i haw nghâl mai dâwn tihna em ni ang? Tih tùr dang i nei em?" ka han ti a, ani chuan," Nei lêm lo ve, petrol ka la ang a, ka haw zui nghâl mai ang," a lo ti a.

Kawng chu a khu ve viau mai a; mahse, motor dang tlãn an awm ve hran lo a, a khu lam lah chu kan tlãnsan lam zêl a ni bawk a, a zia viau. Kan tlãn chak viau lo va, kan tlãn muang chuang lo. Bike khalh pawh a lo thiam ve phian hi, kawng khuar rêng rêng kan dâi lo va, a tlãn țhang ve tawh bawk a ni ang, hêlna lai tùr a hre thei êm mai. Vawi khat erawh kan ding thut mai a, ka lo inring hran lëm lo bawk nèn, ka va nghèng dawt a, kan bu dùn nghawng mai, a ngaihna hre lo tak hian," Eng thil nge ni ta?!" ka ti phawt a, chutah," Ka tih palh lutuk, ka lo inring lo va," ka ti leh niah niah a, ani erawh chuan," Ka lu a rawn hai deuh thut vàng a nih kha," a lo ti thung a, kei chuan hlauthãwng ru zet hian," A va zia lo ve aw, tunah a la hai em? Chàwl vang vang rih ila?" ka ti vat a, ani erawh chuan," Chawlh a ngai lo, hlauthãwng duh suh, i duh hun takah chuan ka thlenpui hman dáwn che," a lo ti leh a, a hnuah kan tlãn chhuak leh ta a.

Lungleia ka innghahna tùr kan thlen chuan," Lo lút ve rih rawh aw," ka ti a, ani chuan," Ni lo ve, ka tibuai rei zâwk ang che, ka kal nghâl mai ang," bike-a la țhu reng chung chuan a ti a, ka purse phawrhin pawisa ka han pe dãwn a, a lo la duh hauh lo!

"Mamawh lai taka inpuih theih tluka hlû hi a awm lo a nia," a lo ti mai a, pêk luih ka han tum ngial pawhin a la duh chuang lo," Petrol man tal chu la rawh," ka tih leh pawh chuan," Kan tibuai ngun tawh che a, min mamawh ve chhuna puih che hi chu kan tih tùr liau liau a ni," a lo ti leh tlat a, kan inpe hlei thei lo chu a ni.

"A nih, i lu kha a hai leh tawh rih lo tihna em ni?" tiin ka zâwt ta daih a, ani chuan," Umm..." a lo ti a, en vang vang pah chuan," Doctor ràwn a va țha àwm ve, Lungleia i awm remchàn lai a ni tho sia, ngaihthah ringawt hi chu a țha vak lo asin, hrisèlna hi a pawimawh si a," ka han ti leh a, a nui suk a," Min ngaihtuah vàngin ka lãwm e, lût tawh rawh, i tlãi palh ang," a lo ti daih thung a.

Kan training programme ninawmzia chuh, chawhma dâr 10-ah țanin dâr 12:30-ah 'thingpui in chawlh' kan nei a, dár 1-ah țan lehin dâr 3 thleng kan țhu leh chawrh chawrh mai a, mawng a nâin ninawm tak a ni. Puitling ni ve tawh mah ila ka ning tho, training kaihruaitute lah chu nutling leh patling un pui pui niin, an țawng muang chiar chuar chuan mut a ti chhuak ngawih ngawih bawk. Mi sawisèl hrât tak ka ni ngai lo asin le, tún țum training zet chu, a ninawm a ni tawp mai, ni hnihna tùr pawh chu a huphurhawm ngawih ngawih tawh mai. Zàn lamah WhatsApp group lam pawh a lùn viau, mi frank tak tak an tam a, training chu ho an tih thu leh kaihruaitute boring an tihzia chu an han sawi bawrh bawrh a, tih theih awm chuang hek lo le, an nin thu leh an sawisèlna thu chi hrang hrang chu kan chhiar kan chhiar a ni mai.

A ni hnihna erawh chu a zia ta deuh hlek e, an sawisèlnate an lo hre ve ni maw tih tùr a ni. Kan zo tawh dâwn bawk a, a zia tawh hrim hrim e. Khaw lum tak hnuaiah chuan chawhma chhûng chu kan han țhu leh phawt a, thingpui in chawlh kan neih lai chuan ka phone a rawn nghawr dar dar a, ka han en chuan Zodina a lo ni a, mak ti ru tak chuan ka han chhâng a. Lungleiah a rawn kal leh niin, a ruala ka haw theih tùr thu chu min rawn hrilh a, hotute dîlin sumo ruala haw mai ka lo rilrûk deuh a nia; mahse, Zodina ruala ka haw theih chuan hotute dìl buai a ngai dáwn lo tihna a ni, inthlahrung ru viau mah ila min duhsakna chu ka hnial phal lo mai.

Dâr 3 a pelh chuan kan training-na hmun ațang chuan kan chhuak ta dam dam a, țhiante nèn chuan kan haw dàn tùrte inzâwtin kan ìnbe ve hlawm a, ka rilru chhûngril erawh a hmanhmawh viau. Zodina'n min lo nghâk reng awm si a, chu chuan min tihmanhmawh lo thei lo, Hannah-i nèn kan inbe zo kawngpuia ka kal  țan chiah tihah chuan ka hminga min rawn ko rí chu ka hre zui ta nghâl a, Zodina chuan a bike nghèng hian min lo en thlîr reng niin.

"Rei min ti em? Min lo nghâk rei tawh em?" ka han ti a, ani chuan," Rei lo ve," a lo ti mai a, ka innghahna Pa Dingteate in lam pan chuan kan tlãn ta nghâl a, thingpui kan in leh rih phawt a, chumi hnuah chuan haw tùrin kan tlãn chhuak zui ta nghâl a. Bike mai a ni a, thil lei haw theih pawh a ni lo bawk nèn, kan tlãn char char a ni mai.

Lunglei a rawn kal leh chhan chu zawh duh viau mah ila ka hreh deuh hlek a, chipchiar taka han zâwt thlap tùrin kan la inpawh lo mah mah, bâkah, ani lakah phei hi chuan invènna tùr, vènthàwn tùr ka la nei zui. Ngawi rengin kan tlãn mawp mawp a, Lunglei kan chhuahsan fel ta maw tihah chuan," In training chu, i hlâwkpui em?" a rawn ti chhuak ve ta a.

"Aw, ninawm ve viau mah se a bengvàrthlâk khawp mai," tiin ka lo chhâng ve mai bawk a, a lo nui hak a," Ninawm i lo hre ve a ni maw?" a ti leh a, ka nui ve ta thung a," Engah nge ka hriat loh ngawt ang? Mawng na hlûiin kan țhu reng a, kan țhutna chair kha țhut reia mawng na duh chi a lo nia, kha kha ninawm ber chu a ni," ka ti leh a.

"Ding lawk ang aw," a tih chuan a ding chu a ni nghâl mai. Eng emaw insiam țhat duh lai emaw zun lawk emaw a duh a nih ka ring a; mahse, bike ațanga kan chhuk hnua kawng sîra a lu a dawm ngawih ngawih tâkah chuan pan vatin," Engtizia nge? I lu a nâ em ni?" hlauthãwng zet hian ka ti a, a bânah chuan ka va dawm a; mahse, min ngaihtuah lo chuan a lu chu nghet zet hian a hmer a, a han rûm deuh kâwk bawk a, chutah, a han zawi deuh hnak a, a kut pawhin a lu chu a dawm tawh lo, a la maimichhîng reng thung a, hlauthãwng leh a ngaihna hre lo tak chuan a bân chu ka la dawm reng a.

Chutah, muangchânga rawn mengin a han khap fak fak a, min rawn en a, a mit pawh chu a sen deuh râm hial mai, a lu kha a na tak zet a nih ka ring. "A la nâ em?" tiin ka han zâwt sap a, a han nui suk a," Engtin nge ka awm a?" a rawn tih chuan chhâng lovin ka en hau ringawt! A aw chhuak chu a dang nghâl daih, tu dang ni lovin Jakob-a aw a ni!

"Helaiah hian eng nge kan tih a?" tiin a han hawi kual a, chutah, min rawn en lehin," Eng thil nge kha pa nèn khân in tih a? In pahnih chauh lehnghâlin, thil pawi a thleng em? A khawih che em?" a han ti zui zat a, ka bân tawn tawnah chuan chelhin chiang zet hian min en chhuk kur a. Kei chuan," Eng thil mah a thleng lo, i zia tawh chuan kan kal tawh mai dâwn em ni ang?" ka han ti thung a, ka rilru chhûngrilah erawh chuan mak tihna leh zawhna tam tak a rawn lût zut zut a, a inthlâkthleng dâwn hian khatiang khân a awm țhìn tihna a ni ngei ang a, a hrehawm viau ang em? Zodina khân a lu kha nâ a tih hmel viau si a, khatiang kha a thleng ziah tihna em ni le? A va hahthlâk dâwn em! A bulah mi an lo awm fuh hlauh phei chuan an hlau țhin hial lo maw?

"Min en teh!"

Ka ngaihtuahna buai nuai ațang chuan harh chhuakin ka han en chho a, chîk zet hian min lo en chhuk rùn mai a, nuih lui sakin," Jakob, ka hria che, harsatna i neih loh chuan kal tawh ila?" ka han ti a, țawng lova min en leh reng hnuah chuan," Insawi fiah hlek chu a la ngai ang," a ti sup a, bike lam chu kan pan zui ta nghâl a.

Bike-a ka han lâwn chu," Min rawn hnaih rawh," a'n ti nghâl a, nichîn kha chuan deh hlau tak khân ka chuang ve a nia, tunah chuan hnaih a ngai, ka hnaih hret chu duh tâwk lo chuan,"Ka kâwngah min kuah rawh," a ti leh a, inhnial thui ka peih lêm lo, bâkah, amah Jakob-a a ni leh tawh bawk a, kuah pawh chu pawi ka ti tehchiam lo, a sawi ang chuan ka kuah ve nghâl mai bawk a.

*FINNA HI A HLUI THEI LO VA, MIN CHEITU PAWIMAWH BER A NI RENG FO BAWK*