☆THE SWEETEST HANDCUFFS☆ - 16 By Dingdi Pachuau

 ☆THE SWEETEST HANDCUFFS☆ - 16 By Dingdi Pachuau

Kan han tlãn chhuak ta chu, a han sual thiam mai mai asin, kan tlãn chak viau pawh a ni chuang lo, a han ding thut a, a taksa chu ka nghèng dawt lo thei si lo va, chutia ka awm châng chuan nui hawkin," Min hnaih țha duh lo êm a nih kha," a tih loh leh," Khatiang kha nuam ka tih zâwng tak a ni," a ti a, ngei ru viau mah ila ka haw tak tak phal  bîk chuang lo, min duh tlattu hi kei pawhin ngainatna chin ka nei ve tlat tawh miau a ni.

Kan titi a, kan nui a, a tìrah khân han thinrim ve deuh mah se a rei hran lo, kan titi kan chawlh deuh lai chuan,"Kha pa khân a ngaizâwng che em? A ngaihmelh che em?" a rawn ti chhuak phawng mai a, ka en ngai enin, chhâng lawk lo chuan ka kuah reng phawt a, ani lah chuan dawhthei lo tih hriat tak hian," A kut hmâwr chauh pawhin a dek che em? A tawk che em?" a ti leh a, rang zet hian," Teuh lo mai! Engtin mah kan awm lo, Tûna min phurh ang  hian min phur haw a ni mai," ka lo ti vat a, ani lah chuan," Tuna kan awm dàn ang chiah hian maw? Ka phurh ang chiah che hian maw?" a ti leh a.

Hetia a awm cháng pawh hian amah hlauhna ka nei hran chuang lo, ka thil sawi a ngaithlain a âwih ngei ang tih ka hriat țhin vàng pawh a ni mahna le, thil awmzia ka sawi fiah hnu chuan," Nang hi chu hmân ațang tawha ka tâna Pathian min ruatsak i ni a, mi dang an lo tel ve hi ka remti thei ngai lo ang," a ti leh sup sup a, a kut vei lam chuan amah ka kuahna kut pahnih chu a rawn bawh thuahtîr a, kei chuan," I kut pahnih khân khalh mai mai teh, kan tlu palh ang e," ka lo ti vat a, a nui hawk a," Jakob-a ka ni alawm, hlau duh miah suh," a ti leh mai a.

Nipui lai ngang a ni bawk a, bike chuan tlàn chhúng a rei lêm lo, khaw èn laiin kan thleng var var a. Min hmutu apiangin min en zui deuh zêl tih ka hmuh chuan nuam chu ka ti chiah lo, ka kuah tawh lo nain a bike angah hi chuan inhlat takin a țhut theih bawk si loh a, Arini'n min lo hmuh loh hrâm beisei ngawt mai teh ang.

Jakob-a a ni miau mai a, zànah pawh a rawn lêng leh ngei a, tlaia pawisa pêk ka tum khân a la duh si lo va tiin kan ințhut hnaih deuh lai chuan pêk ka tum leh a, ani lah chuan," I phal rau rau a nih chuan pawisa ai chuan i hmui fawh kha ka duh zâwk," meng sawr sawr pah hian a han ti a, a frank mah mah țhìn si a, min ti zak chhe lo chauh chu a ni.

"Chutiang thu lawi lo sawi suh," ka tih chuan a nui hawk a," Thu lawi lo ni lo chuan, thil țha tak, châkawm tak leh phùrawm zet a ni zâwk," a lo la ti zui a, min en reng tih ka hre bawk si a, men ngaihna pawh min ti hre lo, zahzèlah chuan," Naktúkah eng nge i tih dáwn?" ka han ti a, ani lah chuan,"I hmel hmu tùrin ka rawn lêng leh ang chu," a lo ti leh a, maimichhîngin ka han rûm dat a, ka țawng chhunzawm tawh lo mai ang e, min chhãng dang hneh si.

Kimi a rawn kal ve a, Jakob-a chu Zodina emaw tiin a han fiam nghâl bawrh bawrh a," Zanin teh tlat chu, hetah i lêng daih sia, beisei deuha lo thlîr rengtu che rilru a na àwm mang e," a han ti a, Jakob-a chuan," A, na tùr an awm phawt chuan lo na ve mai mai teh se," tiin fiamthu vêk hian a chhâng lêt a, thu dik takin a chhâng ang tih ka hlauhzia chu a, ani hi chuan Arini kha a hre ve àwm tawp si lo va.

Kan training chungchângte chu min zâwt kual a, ka chhâng a, eng eng emaw sawiin kan titi tui viau mai a, thingpui hâng siam lehin kurtai nèn ka chhawp a, an in zawh hnu rei vak loah chuan intiam rual ang maiin haw an sawi ta thut a, an haw ta thuai bawk a, Jakob-a haw thut chu  mak ka ti deuh hlek a; mahse, in a thlen hmain min rawn phone a," I chàu àwm sia ka ti a, ka lêng rei duh ta lo a nih kha," a rawn ti a, ama duhna chauh ngaihtuah lova min ngaihtuah tel chu ka lãwm khawp mai, bike ka chuanna kha ka bawp a rawl țhûm si a.

Miin ka training kal lam leh haw lam Zodina'n bike-in min phur tih kha an lo hmu ve nual si a, min fiam ta zauh zauh mai a, min fiamtute erawh min nêl ve tawhte an ni tlângpui a, Amos-a phei chuan," A bialnu i hlau lo em ni? Dam dapin a țim hrep mai ang che," a ti hial a, fiamthu tho chu a ni nain ka rilru chu a nuam chiah lo deuh hlek a; mahse, Arini hi nula fel tak a ni a, min țim hrep kher chu ka ring lo, an putu nèn kan inpawh ve tawhzia pawh a hriat vek tawh tho kha. A bialpain bike-a min phurh avàng maiin a bialpa chu ka chhuhsak ta tihna a ni lo va, ka bialpa a ni ta tihna lah a ni hek lo.

Pathiannîa kan inkhâwm bâng chu Arini chuan min ko ta chat a," Ka be lawk thei che ang em?" polite zet hian min rawn pan pah chuan a rawn ti a, Kimi chuan," Insawi fiahna," a lo ti sap a," Saw laiah sâwn ka lo țhu rih ang e," tiin a kal sawn zui ta nghâl a. Arini lo kal phei chu ka lo en reng a, a inthuamna chu a inhmeh tak zet a ni, helai thingtlâng nula hi a ni ang tih rin a har thei hial zâwk, a ngo a, a sam dum chuan a tilang ngo zualin ka hre bawk.

"Eng nge ni ta?" ka bul a lo thlen chuan ka lo ti a, ani chu hawi kualin," Helai hi chu a ualau mah mahin ka hria," a ti phawt a, chutah," Khulai thingbuk hnuaiah khuan ti mai ang aw," a ti leh a, chu lam pan chuan kan chhuk ta nghâl a, Biak in tuala țhutnaah mi dang chu an țhut deuh vek avàngin veivâk  pawh an awm lêm lo. 

Țhutna a awm loh avàng chuan kan ding a," Ih, ngaih loh lamah lo ngai lo la, ka ringhlel chuang miah lo bawk che, tûn țum phei chu lìrthei neitu hrang hrang pawh i be hlawm tih ka hre nghe nghe. Zodina nèn kan chungchâng pawh ka hrilh vek tawh che kha; mahse, i hriat angin kan khua hi chu thingtlâng a ni a, mi sawi hi kan peih a, kan bula miin an sawi sep sep hi chuan a lo hriat loh theih bîk loh a, bike-a a phurh vàng che kha a ni tih pawh ka hria, i bulah chuan an sawi lang ve kher lo ang, i lo hre ve tawh maithei bawk, engah mah lo ngai lo la, eng emaw boruak awm deuh hlek nia an ngaihruat hi an sawi an sawi hi chuan a takah an chhuah mai țhìn tih hriain thu dik ni lo erawh a tlo loh miau avàngin tu mahin an sawi rei peih lo, hrehawm i lo ti palh ang tih ka hlau deuh a," a ti ta dap dap a, kei chuan," Ka lãwm e," ka lo ti sap a, amah vêk chuan," Zodina nèn hian kan inring tâwk a, kan inhmangaih a, kan inkârah mi dang an tla zep thei lo ang tih pawh ka hria a ni; chu chu mi dang hian an hre ve si lo, ngaihruat thil hi an sawi leh mai țhìn si a, thu tak emaw i lo ti ve hlauh ang tih ka hlauh vàng a ni," a ti leh a.

Nula fing tak chu a ni, a thil min hrilh chu ka ngaihtuah ka ngaihtuah a, a thil sawi dàn chu ka hma ngai deuh siin warning min pe tel ni tlatin ka hre tlat a nih chu. Zodina nèn an inkâra inrawlh lo tùra warning. A dik ngei a ni, min ringhlel ve tho te hi a ni lo maw? Hei hi em ni Amos-a'n 'Dam dapa țim hrep' a tih kha, a ni thei ngei ang, a lo hre chiang viau zâwk a lo nih chiah hi. A thuhrimah, vawiin rêng rêng pawh hi, Zodina a va rawn inkhâwm lo teh tlat ve! Nge, Jakob-a a la ni reng zâwk? Chu zawng, ka ring chiah lo, la ni reng se chuan min rawn biak loh vêk pawhin nizàn lamah pawh khân a rawn lêng ngei ang.

Jakob-a chu a reh leh ta vang vang a, a reh deuh vang vang hi chuan ka ngai ru veng veng țhìn nia, ka duh lo viau nain tihngaihna dang a awm bawk si lo. A laka inthiar fihlîm tùr hi chu ka ni chiang alawm, a chanchin ka hre vek a, mi tak tak a ni lo tih thlengin; mahse, ka thinlung ka thunun hlei thei tawh si lo chu a nih hi, Zodina lakah chuan a ni lo, amah Jakob-a lakah chauh a ni, bâkah, ngaih loh theih pawh a ni hleinem, min ngaihsakin min ngai ve a, min thlahlel viau bawk, chutah, min la duh êm êm zui, a awm dàn hian tu mipa mah la hnìmhnai ngai lo thinlung hi a hneh tâwk êm êm a ni.

Ni khat chu U Ropuia chuan," Kârleh lam chu Saisiha kan han kal leh ngei chu a ngaih hmèl," a han ti a, kei chuan," Kan kal leh ang a ni mai alawm," nui chung hian ka lo ti a, chutah," Han kal leh pawh a châkawm tawh alawm, thlan a tla țha leh khawp ang chu," ka ti leh zat a, ani pawh chuan," Ni e, thlan a tlâk hian ngaih a țha duh deuh alawm, tûnlaiah chuan khawiah emaw han chhuak ila, kea kal a awm tawh si lo va, lìrthei nèn kan ni zël tawh a, lìrthei kal theih lohna hmuna thlan tla dapa ke ngeia kal hi a țha, a hrisêl," a lo ti ve leh a. 

Ka peih lo khawp mai a; mahse, kan hmaa bet tel tlat leh kan tih tùr a ni si a, peih lo chung pawha kan tih ngei a ngai a ni. U Ropuia chu a vànnei ka ti dáwn nge, a vànduai ka ti zâwk dâwn ni, kan kal tum hma nî chuan a khua a sik hluah mai a, vaccine la tùra ka rin tawh avàngin vaccine chu a rawn dah hrãm thung a, a rawn dah lai pawh chuan a khua chu a la sik hluah mai a, ka khawngaih roh khawp mai. Rawn thawn tùr a hriat loh avàng leh naktûk lama vaccine chu pêk ngei a ngaih si avànga peih lo chung chunga rawn kal a ni. 

U Ropuia chu phût chi a ni ta hauh si lo va, tu nge ka kalpui tâk ang le? Hun a teptèr tawh si a, Kimi ka sàwm mai loh chuan, lo hman hrãm se, a nih loh tal pawhin Puia tal pawh ni thei se, ani chu mipa a ni a, hmeichhe kalpui ngawt ai chuan thlâ a muang duh zâwk ngei ang.

Kimi chu ka be ta ngei a, a lo hman hlauh mai, Pu Rova erawh chuan," Hmeichhe pahnih ngawt zawng," a lo ti a, min kalpui a lo tum zui ta bawk a, kan phuisui dáwn khawp e. A hmaa kan tih dàn ngai têin mi dang tibuai lova mahni ei tùr ken leh ni se kan ti a, zîngah ni tlângsàn hmaa chhuah ni se tiin, chutiang chuan rem kan ruat chhin ta a.

A tûkah chuan kan han kal leh ta ngei a, a hma ai chuan tlêmin ka hah lo deuh chuan ka hria, Kimite pafa erawh chu hah àwm hmêl pawh an pu lo; mahse, Pu Rova chu a thlan a tla nasa thung.

"Kein kan kal khât ta deuh a, kan lo upa ve ta bawk nèn, ka hah ve ta hle mai," a han ti a, kei chuan," I la fit țha hle mai, kei ve hi, ka hnârah pawh ka thaw a lêng lo a nia," ka lo ti vat a, Kimi chu enin," Ani phei hi chu, fit tak a ni ringawt," tiin ka han nui a, ani chuan," Kan feh kawng leh kan huan kawngah a kuma kum tél han kal ve ngat la chuan i fit ve khawp ang," nui chung hian a lo ti a, Pu Rova chuan," Kan tih țhan loh vàng hian kan lo fit lo mai țhìn a lo ni, he khuaa chêngte pawh hi an fit kan ti a, an dinhmunah hian dingin awm ve ngat ila, kâr tin kan khuaa chiseh la tùrin chhuk țhìn ni ngat ila chuan kan fit ve viau tho ang, an ti țhang tawh a, an taksain ngaiah a nei tawh a, an hah lo mai a ni," a ti dap dap a.

Vaccine pêk tùr an tam lo bawk a, rei lo teah kan zo thuai mai rêng a, Pu Rova chu mi tlawh tùrin khua kan thlen veleh khân a kal hrang nghâl daih a, kan zawh hnu chuan kan phone a, Kimi nèn chuan haw thei mai tùrin kan lo inpeih at tawh a. A rawn thlen chuan," In va inpeih at at tawh ve! Kal nghâl mai in duh deuh tihna a ni em?" a rawn ti nghâl a, Kimi chuan," Ni mai e, lènna tùr kan hre ve bawk si lo va," a lo ti a.

Ka rin aiin ka rawl lo va, a tihzia tak tak a ni; mahse, mut dâwnah erawh damdawi ka ei ta tho a, Kimite pafa erawh chuan rawl pawh an sawi ve lo. Mutnaah chuan WhatsApp message ka en pah a, ka chhiar a, ka clear bawk a, group awmna ka nei ve neuh neuh a, an active thei si a, clear zauh zauh hi a ngai ve tlat.

Rokko-a'n min rawn text teh tlat a!

*I thawhna chu nuam i ti viau a nih ka ring, i reh êm mai, pathlawi an tam em? An tam a nih chuan a nuam dâwn sa*  a rawn ti a, ka nui zui hak. Amah hi a rûka pathlawi a ni a, nupui zàn khat atân a ru ve ni àwm a ni, 'Pathlawi' tiin an ko fiam țhìn a, ka koh fiam ve hi chuan min dêk  pah hian," Chutiang chuan min ko leh ang em?" a ti țhìn a, dèk ka haw si a, ka tlâwm leh nge nge ţhìn.

*Nuam e, lo zin rawh, i duh chi pawh an tam*  tiin ka han chhâng a, ani lah chuan  *Nangmah ang maw? Nang kha chu lo inserh hrang tlat ang che, khalai thingtlâng tlangvâl tu emaw kha tivànnei hauh suh, ka duh lai i nih tawh kha*  a rawn ti pek a, thinrim hmai sen lem 10 lai ka va thawn, a nui leh nasa khawp ang.

A tûkah chuan Office-ah Zodina a rawn lang nawlh mai a, Zodina a nih miau avàngin ka lo be sawk sawk a, ani pawh chu țhu vein," Khawnge i thawhpuipa kha? A rawn kal lo tihna a ni maw?" a han ti a, kei chuan," A dam lo va, a rawn kal thei lo a nih hi,"ka lo ti vat a, ani chuan," A nih tak chu, a va zia lo ve, i khua a har sawt dâwn tihna a nih chu," a ti leh a.

A lo kal chhan ka zawh chuan," Nula i awm tih ka hria a, ka rawn rîm che maw le," tiin min han fiam ve ngei a, a inhmeh lo ka ti ru khawp mai. Tunah hi chuan a zakzum lutuk kha a zia deuh tawh niin ka hria, nge kan inhmu ngun ve tawh a, min nêl ve tawh zâwk? Chu chu a nih ka ring, kei erawh chu tlêmin ka inthlahrung deuh, Arini ka hre chhuak lo thei lo.

"Ka phurh che avàng khân harsatna i tawh phah em?" a rawn tih chuan ka en phei vat a, ani pawh chuan min lo en ve reng tawh a. Rei en lo chuan ka mit ka la sawn a, nui chung hian," Harsatna tawh phah tùr ka ni em ni?" ka ti lêt thung a, ani chuan," Sawi hreh suh, rilru nuam lo deuh leh hrehawm ti tak hian hun i lo hmang ang tih ka hlau a ni," a ti leh a, ka va en leh a, fiamthu hmêl a lang hauh lo.

"Chutiang eng mah a awm lo," ka han ti a, ani chuan," Tak tak maw?" a lo ti leh a, 'Aw' tih nân ka lu chu ka bu nghat a, ani chuan," Thingtlâng khaw tê a nih vàng hian eng eng emaw sawi hi kan peih a, an thil sawi vàng chuan hrehawm i lo tih phah a hlauhawm a; mahse, chutiang a awm loh chuan a țha a nih chu, mi tu pawhin i bulah eng thil pawh sawi se engah mah ngai lo tùrin ka duh che a ni," a ti leh dap dap a, ka en reng a, amah vêk chuan," Mi tu pawh ka ti a nih chu aw, mi tu pawh," a ti nawn leh sap a.

A haw hnu chuan ka ngaihtuah zui rauh rauh a, ani thil rawn sawi pawh kha Arini thil sawi nèn khân a inzûl riauin ka hria; mahse, ani kha chuan Arini nèn an inhmangaih thu leh an induh tawn viau thu a sawi lang ve lêm lo chu a nih kha; mahse, ani pawh hi ka hnaih tam loh a him, mi inkâr tibuaitu ka ni thei si a.

Jakob-a ka hmuh leh hmasak ber chu zàna ka ina a rawn lènin a ni.  "Eng emaw thil thleng a awm em?" tiin min zâwt a, a ngaihna hre lo zet hian ka en a, ani chuan," Miin i bulah thil sawi an nei em?" a ti leh a, Arini leh Zodina ka hre chhuak zawk a; mahse," Neih pawh ka hre lo, engtizia nge ni?" ka han ti lêt a, ani chuan," Eng mah a ni lo," a ti sup a, ngun zeta min enin," Ka awm loh hlànin thil țha lo a lo thlen palh ka hlau a," a ti leh a.

Mi dang rawn lêng an awm loh avàng chuan," Thil ka záwt ang che aw?" ka han ti hluai a, ani chuan," Yes, lutuk!" a lo ti ve thuai a. En lêt vang vangin," Engati nge 'Zonun' ti hian min koh tlat a?" ka han ti a, ani chuan," I hming a ni alawm," a lo ti mai a, ka sawi zui lo.

"Ka zâwt char char dâwn che a nia. A nih, kha pa bialnu kha i hria em?" ka ti leh a, khap hauh lova min en karin," Kha nu Arini tih kha a ni em? Eng thil țha lo nge i chungah a tih?" a lo ti vut a, bân phar vatin," Engtin mah min ti lo," ka ti vat a, chutah," I hria a ni maw?" ka han ti leh a, ani lah chuan," Hriat loh theih pawh a ni lo, a rawn be fo va, kei pawh min rawn bia, ka ning a, a number ka block ziah a, kha pa lah khân a lo unblock ziah bawk a," a ti leh mai a.

Um, a bialnu a ni miau a, engah nge a block tlat ang? 

Inhmuh tawh loh rawt chhin ta ila engtin nge a ngaih ang le? Ka hre châk khawp mai; mahse, ka ngam lo, thil dang zâwtin,"Engati nge min duh tlat a?" ka tih leh chuan," Engah nge ka duh loh ngawt ang che?" a rawn ti ve thung a, min chhànna chuan min tihamhaih dèr nia! Ka rin loh lutuk chhànna a ni tlat. 

"Ka hmuh tirh ațang tawh chein ka duh nghâl che ka tih tawh kha, ka tâna Pathian ruat ngei i ni, Pathian awm hi chu ring tehchiam țhin lo mah ila nang ka tawn ațang che kha chuan Pathian hi awm ngeiin, nang hi ka tân a ruat ngei che a ni tih ka ring thlap mai a ni," a ti duah a," Chu chu nang pawh hian ring ve tùrin ka duh che, ka kalsan ngai dâwn lo che, min kalsan tùr pawhin ka duh lo bawk che," a ti leh a.

Kan ngawi vang vang phawt a,  a thutak si a, a thin ka tirim ang tih chu ka hlau viau; mahse, zawh ngei ka duh bawk si, "A nih leh, Zodina hi engtin nge i hriat?" ka ti leh ta hrãm a, ani chu a lo thaw huai a, kiai sak pah hian," Ka lo yes ve laklawh tawh bawk si a," a ti sup a, ka lo nui sak a," Duhawm deuha min han zawh chuan chhàn loh theih pawh i ni lo. Kha pa kha, a dáwihzep lutuk vàng a nih kha, puih a ngai a," a rawn ti chhuak ta a.

"Eng thilah maw?" ka lo ti vat a, ani chuan," Hre lo zâwk rawh, awmzia a awm lo, ani pawhin a hre lo, hria se chuan..." a ti a, sawi zawm lo chuan a chek zui tlak tlak a, a ngaihna ka hre lo kher mai.

"Kha pa kha hnaih suh aw, i lamah hian rilru dik lo a put vaih chuan ka dìm hauh lo ang," a ti leh ngul ngul a," Zahngai, zahngai," ka lo ti vat thung a, ani lah chuan," A bialnu kha a vèn țhat loh phei chuan, hmeichhia mah ni se harsatna a siam che chuan ka dìm lo ang, nêl miah suh ang che," a ti zui leh zat a.

*MI PAHNIHTE PAWIMAWHNA A INBÙK TÃWK CHIAH HIAN INLAICHÌNNA ȚHA A AWM THEI ȚHÌN*