☆THE SWEETEST HANDCUFFS☆ - 17 By Dingdi Pachuau

 ☆THE SWEETEST HANDCUFFS☆ - 17 By Dingdi Pachuau

Inrinníah Kimite rualin an loah ka kal ve chhin a, min sâwm a, ka kal châk ve tho bawk a, chaw ei khamah kalin dârkâr khat deuhthaw kan kal hnuah kan thleng ve ta hlawl a. An lo hmun chu a lo nuam reuh phian a, an thlâm pawh a nuam khawp mai, an sakna hmunin a zir bawk a, a thengthaw nuamin ni sensa hnuai leh boruak lum tak hnuaiah pawh chuan thlîfîmin min rawn chhêm heuh heuh reng mai a, namthlâkah chuan nilênga țhut a châkawm thei mai dáwn alawm le!

"Lo i kal khât ve àwm sia, hmu ve hrim hrim tùra ka duh vàng chein a nia ka sàwm che ni," Kimi chuan a han ti a," Eng nge ang i tih? A lum nuam viau dâwnin i hria em?" nui chung hian a ti leh a, kei chuan," Lum nuam ham ham dâwn khawp mai; mahse, thlifîm hi a thaw reng a, a nuam ka ti, lungte pawh a lêng deuh dâwnin ka hria," ka han ti ve a, ani chuan," A ni asin, namthlâka han țhuta thlifîm a thâwt heuh heuh hi chuan hah hi a dam ve sawng sawng zêl a nia, tuna kan thlâm sakna phei hi chu a fuh viau nghe nghe a, kan ríte pawh hian,'Nangni thlâm chu a nuam bík e,' min tihsak ve ziah a," a ti leh barh barh a.

Puia leh Vâltea pawh an rawn thleng thuai a, namthlâkah chuan an rawn țhu ve nghâl a, anni hi chu huana kal tum an ni a, an lo bul lawkah hian huan zâu angreng tak an nei tho a, lìrthei nèn chuan an huan hi a hla hran lo; mahse, an bike a chhiat avàngin kein kan kal kha a ni a, kan kal rei mai mai zâwk a ni.

"Kan Vaimîm tuh a țo țha lo lutuk a, ka tuh hlànin thingpui lo chhuang la tiraw?" tiin min rawn en a, kei chuan," Ni bîk lo ve, ka lo tuh ve zâwk ang e," ka lo ti thung a, ani chuan," Ni a sa si a, hrehawm i ti lutuk ang," a ti leh a, kei chuan," Ho mai mai, ni khat ni sa hrehawm tawrh chu ka chhiatpui êm bîk nâng," ka lo ti leh a, Puia chuan," Ni e, han ti ve chhin hrim hrim rawh, thingtlâng míte hna thawh dàn pawh hi han hre ve rêng rêng la, i ngaih dàn pawh hriat a châkawm alawm," a lo ti ve bawk a.

Kimi Vaimîm tuh dàn chu ka en a, tuh pah chuan ka Vaimîm tuh inkâr hlat dàn tùr leh Vaimîm fang thlâk zât tùrte chu min hrilh thlap a, ka han ti ve chhin a, thil harsa a ni lo ve. A hmaa an Vaimîm tuh, lo țo ve tawh pawh chu ka hmu zeuh zeuh a; mahse, a țo khât viau thung, chumi inkárah chuan ka tuh ve zêl a. Thlâm thlang mual chu kan tuh chhuak a, Vaimîm chî pawh ka nei tawh lo, Kimi ka han dìl chuan," Ka rin aiin i tuh chak daih mai ka ti! Kei pawhin ka nei tawh bîk chuang lo va. Thlâmah han chho la, thingpui lo han chhuang tawh mai ta che," a lo ti a, kei chuan," Khawnge i kal dáwn? Eng nge i tih leh dáwn?" tiin ka lo zâwt vat a, ani chuan," Vàu hnaihah khuan Maî ka zu tuh leh lawk ang e, ka rei lo ang, tlêm té chauh a nia," a lo ti a, kei pawh chuan hnial lovin thlâm lam pan chuan ka kal ta nghâl a.

Thingpui ka lum lai chuan ka phone chu phawrhin thlâm leh lo thlâ chu ka hmet a, lo lang chuan ka selfie pah bawk a, nakinah ka en lêt leh duh ang a, chubâkah, loah ka feh ve ngei tawh tih tihlan ka duh bawk ang a, ka ţhiante ka awhthîk duh bawk ang!

Kimi pawh a rawn chho har lo va, thingpui chu ka lo siamsak vat a, a hmeh tùr biscuits ka ken pawh chu phawrh chhuakin ka han chhawp nghâl a, Kimi chuan," A va tui dáwn ve! Ka ipteah pawh khân a awm tak ang," a lo ti a, a ipte chu a han ban zui nghâl zat a, kei chuan," Phawrh duh suh, ka chhawp pawh hi kan ei zo lo ang, Puiate hi an rawn pêng leh ang em?" ka han ti a, ani chuan," Pêng leh tùrah ka han ngai ngawt a," a lo ti ve a.

Thingpui kan in lai chuan Jakob-a chanchin chu sawi chhuakin," Ka sawi mai mai ang a; mahse, engah mah lo ngai chuang lo la, mi sawi sep sep erawh thingtláng a nihna angin a awm lo thei lo tih i hriat a ngai, tlai khat tlangvâl pakhat han kalpui teh, a tûk lamah chuan inngaizáwng chhuahin an chhuah mai ang che, chumi a nih vàng erawh chuan tlangvâl tawh phawt i lo kàwmserh ringawt ang e," a han ti phawt a," Jakob-a chu, Arini nèn hian an inkawp nghet viau niin ka hria a, a châng hi chuan inhre ngai miah lo ang erawh chuan an awm tho bawk a. Inkawpte inkâr pawh hi a țha reng bîk chuang lo va, eng emaw kâra inhmuh thiam loh leh thu inbah sual palhte hi a awm lo thei bîk lo, chutiang chu an tawng ve țhin pawh a ni mahna. Arini hian a duh hlum lo chauh a, an inkawp rei ve tawh bawk. Arini chu i hriat kha, a polite a, a fel a, a chhe lêm lo bawk; mahse, a duh lohna lamah chuan a duai vak lo a nia, chuvàng chuan, Jakob-a lakah hian fîmkhur la ka ti, in inngaizáwng ka ti miah lo a nia, ka ringhlel lo bawk che u, ka zêp lo ang, a bike-a a phurh vàng che khân mi sawi sep in kâi, hei tak hi dam takin  a en liam kher lo thei," a ti ta dap dap a. Kei chu ka lo ngawi reng a, amah vêk chuan," Hrehawm i tih phah nân ka sawi miah lo a nia, a bike-a i chuan chhan hre chiang bertu ka ni alawm; mahse, mi hi chuan an duh duh hi an sawi mai a, an sawiate rilru lam kha an ngaihtuah pha tawh lo. Nula i ni a, mahnia in luah i ni bawk. Tlangvâl pawh an rawn lêng ve ang chu, nula i ni a, anni lah i ina rawn lêng tùrin zalènna an nei bawk. Arini chu, i bulah thil sawi a lo nei a nih pawhin hre thiam la, chhâng lét lovin ngawi liam tawp tùrin ka duh che a ni," a ti leh dap dap a.

"Aw le, ka lo hre reng ang e," ka ti sap a, ani chuan," A rawn sawi kher ang ka ti lo; mahse, 'a rawn sawi hlauh chuan' ka tihna a nih chu aw, ka rèl thil pawh ni lovin, ngawi teh, mi chanchin dik taka sawi chhuah pawh hi rêl chan kan chang a, ka rêl tihna a nih ber chu," tiin a han nui leh rih a, chutah," A nu hi mi pakhat a tling ve a maw, zahpah nei lo an tih ang hi a ni ve a, Arini pawh hian tlêm chu a kâi ve a," a ti leh a, kei chuan," A hlauhawm e," ka lo ti vat a, nui leh hakin," Hlauhawm ve tho e, inbakkaihpui atân phei chuan thlanawm loh tak a ni," a ti leh a, chuta țang chuan Arini nuin mi a bakkaihpui tawh dànte chu a sawi chho a, ngun zetin ka lo ngaithla a.

Kan haw har hran lo va, in ka thlen veleh ka inbual nghâl a, ka inbual zawhah vawiina ka thuamhnaw hâk su nghâlin, chumi zawhah eirawng bâwlin ka buai chhunzawm leh zat a, ka hmai chu vawiin lama ni sa ka tawrhpui vàng chu a ni ngei ang, a sa hat hat reng a, dárthlalanga ka en pawhin a sen țûn tih ka hmu bawk.

Kawngka kik rî awm chu ka chhàwn vat a, ka rin loh lutuka Arini rawn lût ka hmuh chuan ka phu zawk lo chauh a ni, Vawiina Kimi thil min hrilh kha ka ngaihtuah chhuak zawk bawk a, biak lawk nachâng ka la hre lo zui, amah zâwk chuan nui sâng chung hian," Vawiin chu i office lo a ni maw?" a rawn ti hmasa ta a, harh chhuak vatin," Um, Inrinni hi chuan ka office ngai lo va, lo țhu rawh khai, eng nge i duh ve teh tlat a? Vawiin chhùn lamah eng nge i tih?" tiin ka be ta sawk sawk a, ka Dãl kan chu tui leih belhin ka chhìn zui nghâl a.

"Eng mah ka ti lo, rawn lèn lawk ka duh a, eng emaw han hrilh che ka duh a ni ber ang chu," a ti a, ka piah lawka plastic chair-ah chuan a țhu zui nghâl a, ka in chhûng chu melh kualin a exam ni berin ka hria.

"Eng thil nge ni ta? Chumi hma chuan thingpui in lawk ang aw?" ka ti a, thingpui chu thuk lehlama chhuang sa lehin no pahnih ka ban zui a, ani erawh chuan," Ka rawn kal hmain ka rawn in tawh a, ka duh lo mai ang, nangmahin i in duh a nih loh chuan kei chuan ka duh lo aw," a lo ti a, a in dâwn loh chuan ka in duh  bîk lo va, ka off leh ta daih a, ka țhutna ngaiah chuan ka țhu leh ta a.

"Rei awm pawh ka tum lo va, ka sawi nghâl mai ang. Zodina nèn hian in inkârah eng thil chiah nge awm tih ka hre duh a, mi sawiah ka buai lo, i kâ ațang ngeia hriat hi ka duh a ni," a han tih fak fak chuan chhûngrilah hrehawm ka tiin ka lo zak chem chem mai, hrehawm ka tih avàng chuan chhàn mai ngaihna ka hre lo hial nghe nghe a, amah vêk chuan," I hriat tawh angin ani nèn hian i lo awm hma ațang daih tawha inkawp kan ni a, keima kâ ațang kher lo, mi kâ ațang pawhin kan inkawp thu hi chu i hre tawh ngeiin ka ring, inneih lam pawh kan sawi ri țan tawh a, kan inkârah hian mi dang an awm kan ring ngai lo va, phal lah kan phal hek lo. Nula fel tak i niin ka hria a, mi sawi anga mi inkára tlazep duh chi i ni pawhin ka hre lo, tlâkzeh lah i duh hek lo ang," a tihzawm leh ta kalh kalh a.

"Ka lâwm e, thil awm dàn ka'n sawi ang e. Ka training dâwn khân lìrthei hman tùr kan dap kual nasa a, Kimi  sáwn min zawnpui nghe nghe. Motor êm chu be duh lovin bike nei lam kan hrút deuh a, Ningànîa training tùr ka nih vangin sumo chu rem thei hek lo le, bike nei kan biakte kha an hman remchãng lo zêl a, Zodina kan han biak chhin khân a lo remchâng ta hlauh a, ani phei kha chu a tàwp bera kan biak a ni nghe nghe," ka tih chuan," Kha lam kha chu sawi duah a ngai chuang lo, a chunga i rilru put dàn a nia ka hriat duh ni, ka bialpa a ni tih chu i hre sa tiraw?" tiin a lo inrawlh vat a.

"Aw, hria e."

"Chuti a nih chuan, mi sual tak anga mi inkâra tlâkzeh tum chu i ni êm lo ang chu tiraw? Health Worker i ni a, damloh nikhuaa koh phar ber tùr i ni, Zodina puin a koh phar ber leh a nèl tak i nih avàng maiin a tupa lakah i beiseina i tihsàn kher chu a tih chi lo ang, chutiang rilru i lo pu a nih phei chuan paih bo daih rawh. A pu hi mi fel a nia, a fel avàng hian a tupa tân a duh che tihna a ni lo, kei hi a tupa tân ka awm tih a hria a, ka phatsan ngai lo tih a hre bawk a, a mo ni tùtin min pawm hmiah tawh bawk. Chutiang chu kan dinhmun a ni a, mi pângngai rilru pu pha inti tân chuan kan inkâra beisei lo neih ve leh lo inrawlh ve hi thil zahthlâk tak a ni ngei ang," a ti leh ta siah siah mai a, a sawi chhûng zawng chuan hrehawm  ka ti leh ka zak chu ka lo îp chãwih chãwih reng a, ka zak lutuk chu men ngaihna ka hre tawh lo a ni ber, ani lah chuan tàwp mai a la tum lo a nih hmel.

"I lo beisei ve tih leh mi sawisep amah ngeiin a hriat hma ngei hian i rilru siamin boruak hi ti tàwp vat ang che, a lo hriat hlauh chuan a tân a zahthlâk dâwn bâkah men ngaihna a hre lo ang, a puin a nêl ve si che a, i laka zilhna țawngkam neih phei chu a duh hauh lo ang; mahse, a ngaih dàn che chu a mak tawh viau ang," a ti leh a, ka ngawi reng a, ka zah avangin ka kûn deuh chal tawh a, ka hmui chu ka pet deuh fan fan bawk a.

"A tàwp nân, sawisep kai hian lo awmpui tawh lo hrâm rawh, ka hrilh che a nih chu, 'hrilh che' ti ila last warning angah i ngai dâwn nia, ka duhnaah chuan ka kawlh ve thei zêk a, zahpah ka nei vak lo. Bãkah, nula mahni chauha in luah i ni a, hmun dang ațanga rawn awm i ni bawk a, i hming hi a chhe hma thei viau ang tih i lo hre reng bawk dâwn nia," a ti leh a, a ding a," Huat lamah i ngaih loh ka beisei, thil awm dàn ka hrilh mai che a ni, ka haw tawh ang e, chaw ei tui le," a ti a, ka che lo va, ka en zui lo bawk, kawngka lama a thãwm chu ka hria a, a chhuak ta nghâl a ni ngei ang. 

Ka țhut ngai chuan ka țhu reng a, ka che sawn hek lo. A thil sawi chuan min tinâ em tih ka hre chiah lo va; mahse, ka zakin hrehawm ka ti tih erawh chiang takin ka hria, a zahthlâk êm alawm, miin lo hre ve phei se, ka zak zual ngawt ang, mahni chauha ngaihthlâk pawhin ka zak a, ka țhutna bulah khân lei kak lo awm thut se, pil daih ila tih kha ka duh asin, anih loh vêk pawhin mei khu anga zàm ral daih ka châk bawk.

Eng emaw ri deuh chawrh chawrh ka hriat tâkah chuan ka harh chhuak ta vat a, ka Dãl kan chu a tui a lo kang deuh vek tawh niin, gas chu ka off zui nghâl a, kanbêl sâah chuan ka bân ka dep zui lehnghâl a, ka harh chiang kâwk kâwk ta viau a ni. 

Zàna inkhâwm pawh chu tlai lam boruak khân min tiphûr lo zo vek mai a; mahse, Kimi'n min rawn sáwm si a, ka kal ta poh a, ka țawng tam lo viau, ka rilruah a riak reng lo thei lo, khatiang taka inhmachhawnna zahthlâk kha ka la tawng ngai si lo va, ka hna thawhna khuaah niin chu pawh nulât tlangvàl kawngah a la ni zui, a zahthlâk ngawih ngawih.

A tûkah pawh chuan phûr lo zetin ka inkhâwm a, Arini emaw Zodina emaw ka hmu ang tih mawlh ka hlau a ni; mahse, ka hawi kual lo va, Biak in kawngah ka kal mawp mawp a, biak inah lûtin ka țhu a, ka zâi a, thu sawi ka ngaithla a, bàn veleh páwna țhu khawmuang lovin Kimi bulah chuan haw nghâl mai ka duh thu ka sawi a, ka haw leh nghâl mai bawk. Mi zînga awm tam loh ka duh, tuna ka rilruah tak phei hi chuan ka bulah tu mah awm lo se, keimah chauhin awm ila ka duh.

Mahse, ka duh dànin a awm theih bîk loh, miin ka ina lo lèn an duh a, min biak an duh bawk a, lo lêng lo tùrin ka ti thei lo va, min be duhtu ka chhâng lo thei lo bawk. Hna neia awm ka ni a, ka hna kaihhnawih thilah miin min be duh a, damdawi lam thilahte min ráwn duh bawk a, hmel hlim tak leh hawihhâwm taka ka biak an ngai. Arini thil sawi vàng khân ka nihna leh ka nungchang a danglam vek tùr a ni lo tiin ka infuih sauh sauh a; mahse, hlim hmel put luih chu a har ka ti, ngaihtuah loh tumin thil dang ngaihtuah tum mah ila ka fail țhak, ngaihtuah loh tum chu a har lutuk, mahni chauha awm phei chuan a ngaihtuah loh theih loh.

"Niminan khân tu lovah nge i feh ve a?" Amos-a'n a tih chuan," Engtin nge i hriat theih a?" ka lo ti vat a, ani chuan," Hriat loh ka nei hleinem," a lo ti mai a, Nunmawia chuan," I hriat loh avàngin tu lo nge tiin a fehna i zâwt emaw ka ti, nge kei hi ka lo hre sual em ni? Kei hi chuan hriat loh hi ka ngah khawp a," a lo ti ve vat a, Amos-a chuan," Lo inrawlh ve lo teh, i lo tel ve hi chuan a buai vek zêl," a lo ti ve thung a, an fiamthu hi a na thei ka tih tawh kha, Remsiama chuan," Kimite lo a nih kha, an thlâm awm dàn ațang khân. Hriat loh nei lo pawh hian eng emaw châng hi chuan hriat loh an lo nei ve tho a nih hmèl, a thluak a expire țan a ni maithei bawk a, " tiin Amos-a chu a'n kâp leh sak a, kan lo nui a,  ani lah chuan tlàwm tum lo tak hian," Ka memory storage hi a full deuh tawh a niang, thil țûl lo, entîr nân, tu emaw bialnu nuthlãwi angte leh tu emaw sumo țãwng deuh tawh khalh angte hi delete a ngai a ni," a lo ti leh a, Nunmawia pek chuan a lo làwm khawp a, a lo khêk tuarh a, chu chu Amos-a chuan a nuih lét ve thung a. An lo lèn avàng leh mahni chauha ka awm loh avàngin ka ngaihtuahna ka kawm loh phah a, hlim takin ka nuih phah thei bawk. 

Ka mut dâwn chuan Jakob-a message ka dawng thut a, mak ka ti kher asin, vawiin lamah ka hmu miah si lo va, zaninah lah a rawn lêng bawk si lo.

*Ka ngai reuh che, Kawaī*  tiin. Ani bâk hian 'Kawaī' tih thumal hi ka hriatah a hmang ngai lo va, khitiang 

thu min rawn thawntu chu amah bâk a ni thei lo. Jakob-a phei chu ka hmuhna alo rei ve leh deuh tawh a, hmuh ka châk, tunah tak pawh hian a bula awma thil dang ngaihtuah nei lova nuihpui leh mai mai ka châk.

*Jakob, i awm a nih chuan engati nge zaninah i rawn lèn loh a?*  tih thu chu type-in ka thawn lêt ve nghâl a, ani hi min duhtu chu a ni, Zodina ni lovin, Arini khân a hre sual a; mahse, dem vak theih pawh a ni lo, ani tân chuan hriat thiam theih a ni tlat si lo, a hre miau si lo va, a chungah khân thinrim viau tum mah ila, ka thei lo rêng a ni.

*Engati nge? Min ngai ve a ni maw?😊*  tiin min rawn chhâng lét leh a, ka nui sak a. A hmêl chu mitthlaa hmu rauh rauh pah chuan  *Min ngai sia, ngai ve bawk ang chu*  tiin ka chhâng leh a. Ni e, ka ngai alawm, ka pa tih lohah chuan ka mipa ngaih awmchhun a ni hial ta ve ang.

*A nih, min ngaih si chuan, tunah ka rawn lêng dáwn em niang?*  a rawn ti leh a, ka nuih chu a tiza angreng. A ti tak tak lo tawp ang.

*Dâr zât en la*  tia ka chhàn chuan ani chuan  *Dárah ka buai ve vak hleinem, min ngaiha lêng tùra min duh chuan engtik hunah pawh ka rawn kal thei alawm*  tiin min rawn chhâng ta thung a.

Ngai viau mah ila Arini thil sawi kha ka hre chhuak thut a, a taksa leh a hmel hi Zodina a ni miau si a, mi tân chuan hriat thiam theih thil a ni tlat lo, min hmuh dun chuan min sawi leh ang a, ka bula awm chu Zodina a ni lo tih tu mahin an hre ve dâwn si lo.

*Ka mu tawh alawm, nang pawh i mu ve tawh ang chu?*  ka va tih leh chuan *Mu tawh tho e; mahse, rawn lêng tùra min duh chuan...* tiin min rawn chhâng leh a. A tlai tawh êm mai, bákah, ani pawh a mut tawh chu, tûn ang tlaia a rawn lèn chuan a haw hunah a tlai lehzual dâwn tihna a ni a, zàn men rei a ngai viau ang, a fuh lo, bâkah, miin an lo hriat palh réu réu chuan... chutah, Arini beng a lo thlen leh phei chuan...

*Ngai lo mai, mu rawh, tui takin i mu dâwn nia*  tiin ka chhâng ta zâwk a, ani pawh chuan  *Ka mumangah lo hmuh ngei che ka tum ang, nang pawh mut tui sûk sûk le, Kawaī*  a rawn ti leh a, hre chhuak zawkin *Kawaī hi eng tihna nge? Eng nge a awmzia?*  tiin ka han zâwt leh rih a, ani erawh chuan *I hming atâna liau liaua ka phuah maw le, Kawaī Zonun💝*  a rawn ti deuh hnâp a, hmangaihna sign hi chu a duh ve ngawt mai.

*FAKNA HI HMANGAIHNA LAN CHHUAHTÎRNA A NI KHER CHUANG LO VA, SAWISÈLNA PAWH HI HUATNA VÀNG A NI VEK KHER CHUANG LO*