☆THE SWEETEST HANDCUFFS☆ - 19 By Dingdi Pachuau

 ☆THE SWEETEST HANDCUFFS☆ - 19 By Dingdi Pachuau

In chhûngah chuan min zui lût ve nghâl a, lêng lût tùra sàwm loh chu a polite loh thlâk ve bawk si a, bâkah, min lo nghâk ve reng a nia.

"Min hmangaih ang em?"

Ka nui hak a, țhutna chu kawh hmuh nghâlin," Lo țhu phawt teh, thingpui ka'n chhuang nghâl ang e," ka ti daih thung a, ka thlalâk ka hawn chu dawhkànah chuan dahin thingpui ka chhuang zui ta nghâl a.

"Eng nge ni a hei hi?" a tih chuan ka hawi vat a, dawhkan chung lam chu a lo melh rulh a," Ka thlalâk maw le, Kimi cousin U Duhi pasal neih nîa mi kha a nia, min pe a," ka tih chuan," Ka en thei ang em?" a'n ti zui zat a, en phal loh ringawt thu va awm suh, ka lu ka lo bu nghat a.

A han la a, a hmasa ber chu a han thlïr vung vung phawt a, a hnuaia mi a en leh a, chutiang bawk chuan a thlîr leh vung vung a, a tàwp ber a thlìr lai chuan thingpui ka siamsan daih a, a awm dàn ka hre lo. Ka va pêk chuan," Cameraman hi i hmêl hriat a ni em?" tiin min lo zâwt khurh a, kei chuan a piah deuha țhut pah chuan," Ni lo ve, engati nge a?" ka lo ti vat a, ani chuan," I thlâ a hmehsak dàn ațang che hian a rilru a hriat nghâl ruak, inneihnaah i kal a, i hmêl hriat pawh ni hauh lovin hetiang hian thlâ a lâksak che a nia, i bula mite erawh an lang blur deuh vek, a veh viau che tih a hriat reng, han hmu ngat ila chuan..." a ti ta ngul ngul mai a. Ka rin loh dàn deuha a rawn sawi chhuah avàng chuan chhàn lawk ngaihna pawh ka hre lo va, ka en deuh hû ringawt.

Amah vêk chuan,"Pakhat hi chu ka lo kawl ang e," ti leh supin pakhat chu a jacket ipteah chuan a han ak zui nghâl zat a, kei chuan," Hralh chhàwna sum siam nân hman âwih miah loh," ka lo ti a, ka nui pah bawk a, ani erawh chuan," Teuh lo mai! Ka roh dâwn mahnâklaia," a lo ti thung a.

Light êng hnuaiah chuan a mit chu a sen deuh rûm tlatin ka hria a, chiang lehzual chuan ka han en a, ani lah chuan," Hetia chîk zeta min en hian nuam ka ti," a lo ti thung a, ka hmuh chian theih tùr chuan a han inher rem vêl a, zahna lam hi chu a hnai lo nasa viau a ni.

A pang khawihsak chu ka hreh deuh avàngin," I khua a sik em?" ka han ti ringawt a, ani lah chuan," Ka pang hi han dek chhin la?" tiin min rawn hnaih deuh zui nghâl a, tîm deuh hlek chung chuan ka han khawihsak a, a lo sa vur mai niin," I khua a sik a nih hi, damdawi i ei em?" tiin ka zâwt zui nghâl a, ani chuan," Ei lo, vâwt erawh ka ti deuh a nih hmèl," a ti mai a, tho vatin ka damdawi dahna lam chu panin, ka khua a sik chânga ka ei țhin Dolo chu mûm khat la chhuakin tui nèn ka pe nghâl a.

"Ei nghâl rawh, eng nge i ei țhin chu ka hre lo nain a chhâwk ngei chein ka ring," ka ti a, ani pawh chuan a ei ve nghâl mai bawk a, min hnial ka ring deuh hlek a nia; mahse, min hnial miah lo!

Rei mawi tâwk tak chu a lêng; mahse, a awm chhûng zawngin a damdawi ei chuan chhâwk àwm pawhin a awm lovin ka hria, min hmuh vawi khatna ațanga min duh thu leh hmangaihna thu lam hlîr min hrilh a, thil dang a sawi lo, a chiang chiah lo niin ka hria, a haw hnu chuan ka ngaihtuah rilru viau mai a; mahse, tih theih ka nei chuang lo, damdawi dang, a khawsik a reh loha ei tùr kha chu ka pe tho a; mahse, ei ngai lo se ka ti, a sâng ve deuh hlek si a.

A tûkah chuan keimah zâwkin ka va bia a, a tu ber nge a nih ang ka hre hauh lo; mahse, tu pawh chu lo ni se pawi ka ti chuang lo, a khua a la sik reng em tih hriat ka duh a ni mai.

Min chhâng lawk lo va; mahse, a hnua min rawn koh dàn ațang chuan Zodina a ni leh tawh tih ka hria a," I khawsik eng nge i an?" ka han tih chuan," Khawsik maw?! A awm tawh lo a nih hmèl, engtin nge i lo hriat a?" a rawn ti a, ka chhàn hman hma chuan," Ni dâwn tak e, buaina a awm loh ka beisei," a rawn ti zui leh zat a, kei chuan," Awm lo ve, i khawsik a awm tawh loh chuan a țha a nih chu, ka ngaihtuah deuh che a maw le," ngaihtuah chiang lo zet hian ka ti ve mai a, ani chuan," Min ngaihtuah deuh tih han hriat chu a nuam hle mai," tiin a rawn nui zui ta hak hak a, za lo zet hian ka nui ve ringawt, ka ngaihtuah tak te chu, sawi chhuah chi pawh va ni suh.

*******

Thingtlâng khua ngang a nih avàngin buh tuh a hun meuh chuan khua chu a reh deuh ruih maiin a hriat a, buh kher lo pawh an chîng hlawm ngei ang; mahse, fùr hunlaia thlai hralh tùr lam chi hi chu an chîng uar lêm lo a nih hmèl, a chhan chu an khaw kawng hi fùrah a chhe thei viau mai a, a lei hi a țhain a diak kawi thei hle mai si a, sumo ţãwng ve tawh lam pakhat chauh a service bawk si a, fùrah hi chuan loh theih lohah chauh khawpuiah an kal niin a lang, bialtu MLA lah hian a ngaihtuah  vak lo a ni maithei a ni. Huan neih erawh an uar, neih pawh an nei țha hlawm viau a ni. A țhenin Kuhva huan an nei a, Sèrthlum, Nimbu, Balhla, Avocado, Zawngțah leh Khanghu huante hi an nei fur hlawm a, lo nei pahin an enkawl tel a ni si a, hnà an thawk nasa viau a ni.

Kimite lo bul chiaha lo nei ve Pu Hluna ram riak chu damlo chungin a rawn haw a, office-ah pawh a rawn kal nghe nghe. Damdawi ei tùr ka lo pe a, thisen pawh ka lo lâksak a, zia lo ka ti viau mai. Ni a sa thei si a, ani upa ve lam tawh taksa chuan a zo lo a nih ka ring deuh ngawt a, ama sawi dàn chuan 'a fanu pahnihte eirawng lo bàwlsak tal pawh a țha alawm' a tih avànga riak lût ve a ni nghe nghe. Ka ngaihven zui deuh reng a, a tûk lamah pawh chuan eng a ang thei chuang lo, a khawsik a sâng angreng a, a rûk tak chuan ka ngaih a țha lo viau mai a; mahse, ka sawi chhuak lo, keimah ber ngaihțha lova ka lan chuan a dik lo; mahse, Lunglei lam panpui thuai țhaa ka rin thu erawh chu ka sawi lang zauh a, Pu Hluna nupui Pi Tei chu hlauthãwng hmâ chi a lo ni ve bawk nèn, Zirtàwpnî sumo service-ah chuan inentîr tùrin Pi Tei chuan a kalpui ta nghâl a.

Inrinnîah ram riakho an rawn haw thliah thliah a, zàn inkhâwmnaah Pu Hluna damdawi ina a awm thu leh țawngțaipui a ngaih thu chu ka han hria a, ka hawi phâwk lek lek a ni. Tukin zîng țawngțainaah ka kal lo va, ka lo hre ve lo a ni ngei mai. An lo admit chu ka thaw a veng deuh huai mai a, damdawi inah chuan a natna dik tak an lo hre chhuak ang a, damdawia enkawl a ni bawk ang a, damin a lo haw thei thuai ang chu.

A tûkah chuan kan inkhâwm a, chutah pawh chuan țawngțaipui tùrin an thawh leh a, a fanute pahnih bâkah a fapa tleirãwl ve țan tawh chu an inkhâwm ve reng si a, an rilru a hrehawm ngawt ang chu, ka khawngaih hlawm roh mang e. An chan chu ka chanah ka dah chhin a, ka pa damdawi ina awm anga ka han dah chhin pawh chuan hrehawm ka ti, ka ngaihtuah thui duh lo, thil hlui ka hre chhuak uar uar zui a, lu thing deuh nakin Pathian thu sawi lamah chuan ka rilru ka sáwrbing ta zâwk a.

Biak in ațanga kan chhuak chu min kotu an awm avàng chuan ka han hawi kual a, Jakob-a a ni tih ka hriata ka hmuh chuan mak tiin ka meng kâwk a, a inkhâwm ngai hauh si lo, eng thil nge a hriata a rawn inkhâwm ve tâk ni? A kamis vâr sar mai, a taksa phuar lek lek chu a inhmeh tak zet, a lang fai sar mai a, hetianga smart taka a inchei hi la hmu ngai hek lo le, ka thlîr tlawk tlawk a, chutah, ka inhre chhuak thut a,  ani pawh chuan min lo thlîr re reng tho chu niin, Jakob-a mai mai chuh! Arini'n min lo hmuh hlauh chuan a fuh lo ngawt ang le, ani tân chuan Jakob-a ni ve dâwn hek lo, Zodina a ni dâwn tlat si a. Ka mit ka lèn kual nghâl a, chiang zeta min lo melh ngartu a mit lian leh dum zet  chu ka han hmu zui lehnghâl a, nuam lo duh tak a ni. Jakob-a min kohna lah chu hai der theih a ni mang meuh si lo, min rawn ko nawn leh a! Hm, ka chhâng ang, Zodina chu a bialpa mah ni se tuna min kotu hi chu Jakob-a a ni, min koh tlat chuan ka chhâng tùr alawm, thil țûlah min be duh a ni mai.

"Eng nge ni ta?"

"Nangmah vàng chauhin ka rawn inkhâwm ve êm êm a," a rawn tih nghut chuan," Zahngai," ka ti sap a, mi hriat leh hmuha inbiak tam hi ka duh lo, mi dangin Zodina hmuhin an hmu dâwn a, Jakob-a a ni tih an hre ve dáwn hauh si lo.

Ka haw ta nghâl thuai a, ani pawh chuan ka hnungah min rawn zui ve zêl a, biak in tuala inbiak ai chuan pawi ka ti lêm lo. Ina ka luh pawh chuan a rawn lût ve zêl a," Eng nge thil awmzia? Min be duh lovin min kalsan a; mahse, min kalsan theih chu beisei lo la," a rawn tih chhuak chuan thâwk ka la hawk phawt a, a hre thiam lo rêng ang. Mi hmuh laia biak tam kha ka duh lo a ni, tunah chuan miin min hmuh tawh loh bâkah kan țawng pawh an hre thei tawh lo bawk ang.

"Dârthlalangah i inen țhin em?" ka tih chuan min en kur a," En ve bawk ang chu," a lo tih chuan," I hmël leh pian hian mi pakhat hmêl leh pian a ang tih i hria ang chu maw?" ka ti leh a, ani pawh chuan," Kha pa kha sawi lo teh, mi dawihzep an hi ka duh hleinem, hei hi chu ka hmêl a ni," tiin a khabeah chuan a'n dawm a, a nui suk zui a.

"Miin kha pa kha emaw an ti tlat che a, a bialnu ngei pawhin a hre hrang lo che u a-" ka la sawi lai mêk chuan," Kha nu pawh kha sawi lo teh!" a lo ti nghut a, chhàn tuma ka àn zuau lai chuan," Nang hi chuan min hai ve ngai lo ang tiraw? Ka hria a ni, min hre chiang ve tawh bawk a, Zonuni, ka Kawaī duh tak kha i ni miau a," a ti leh sup a, ka en reng ringawt.

Phût tak taka min phût avàng chuan an in lamah ka zui phei ve a, a pu a lo awm a, kan inzui lût a lo hmuh chuan min lo nuih var var a," I rawn lang ve leh ta hlawl alawm, i dam țha maw?" a lo ti vat a, kei pawh chuan," Dam țha e, nang i dam țha maw?" ka ti zui ve zat a. In chung lama Jakob-a chho chu ding datin," I rawn chho ve dâwn lo em ni?" tiin a rawn hawi a, kei chuan," Han inthlâk rawh, ka pu hi ka lo titipui lawk ang e," ka lo ti a, ka pu chu enin ka nui sak a, a mi sawmna avàng chuan ka zak ru viau, ka pu a awm ve reng a, min biakna lah a lo hre ve vek bawk si a; mahse, hriat thiam hmël taka mit min rawn siai sakin," Ni e, eng eng emaw ka'n lo zâwt ang e, han inthlâk thuai la," tiin a tupa chu a be zui a.

Room-a a inthlâk hlàn chuan a pu chuan," Engtin nge Zodina nèn in rawn inzui ve ngawt le? Arini han thîktîr che a tum chu a ni lo maw? Tûnlai tak hian an boruak hi a fuh vak lo niin ka lo hria a," ti sap sapin a han nui zui kar kar a, ka hmai chu a sen nasa ngawt ang, a sa vur maiin ka hria. Ka han dawm a, a lo sa vur tak tak a!

"Ka pu mai mai hi, a âwihawm loh e," ka han ti thla rawk a, kei ngei pawh chuan ka âwih chuang lo. Ani lah chuan," Ka hrilh tawh che kha, a awm dàn hi thlâk thut thutin maksak deuh hleka han chêt châng nei mah se ka tupa a ni a, ka hmangaih a, ka hre thiam êm êm bawk a ni, nang pawh hi mi fel tak i ni reuh a, ka ngainat che ang tho hian a ngaina ve viau che ni pawhin ka hria," a ti leh a, kei chuan," Ka lâwm e, nia, a rûk tê hian kan inkàwm ngeih ve a," nui deuh chung hian ka lo ti ve a.

"I bulah hi chuan a ngaihtuahawm lo tawp ang tih ka hria a, in lo inkàwm ngeih hlauh chu a làwmawm e. A chanchin pawh ka hrilh vek tawh che kha, dawhthei hrãm hrãm la, eng maw chânga maksak deuh taka a che țhìn a nih pawhin hriat thiam zêl i tum ve mai a niang chu," a tih leh sap sap lai chuan in chung lam ațanga in hnuai chhukna step-ah  chuan a rawn pên thla ta thoh thoh a, chumi pah chuan," Min lo rêl a ni maw?" a rawn ti zui a.

"I níte an la rawn haw si lo va, in tùr lam i buaipui mai loh chuan," a puin a tih chuan," Thei tui in tùr a awm kha," a lo ti vut a, kei chuan," Ka lo buaipui ang e," ka lo ti vat a, ka tho zui nghâl a. 

In tùr chu ka buaipui a, ka pu chu ka pe hmasa ber a, Jakob-a chuan," He lamah hian aw," tiin in tùr leh no chu a chuh vat a, choka lama kawngkapui pakhat inhawng huaiah chuan a chhuak zui a, hmeh tùr kengin ka zui ve nghâl zat a, an in hma lam kawt zâwl ai chuan a lo zîm deuh a; mahse, a nuam khawp mai. Ka han hawi kual a, Nihliap lian pui hnuaiah hian dawhkàn leh țhutna inzawm hi a lo awm a, chu thil chu a rei tawh ngawt ang chu, han en thuak pawhin a hriat tlat; mahse, țhut a nuam dâwn lutuk. Leiah chuan phùl a lo țo chhuak dap a, chu lah chu enkawl ngun tih hriat tak hian a hring dap a, tûn ang hunah chuan ro rì rê tawh àwm tak hi a ni a; mahse, a ni hauh si lo. 

Țhutnaah chuan țhuin min lo en phei a, ka hawi kual vêl chu nui deuh suk chung hian,"Rawn dah ve phawt la, i dah hnuah i duh tâwkin i thlîr kual zâwk dâwn nia," a rawn ti a, ka ner deuh nâng a; mahse, a thu chu ka zàwm tho. Amah hmachhawn zâwng chuan țhuin ka han hawi kual leh a, boruak chu a thengthaw nuam a, ni sa deuh ar mah se thlifîm a thaw heuh heuh tlat mai a, a nuam reuh tlat.

"A va nuam reuh tak!"

"Ka pu khân eng nge a sawi?" a rawn tih chuan ka en ve ta chauh a," Eng vak mah a sawi lo," tiin ka chhâng zui a, ani lah chuan," A khawngaihthlâk reuh asin, a tupa tak tak emaw min ti tlat a, a tupa dâwihzep tak kha chu ka ni hauh si lo," a ti leh sup sup a.

'Dâwihzep' ti hian a sawi ve ziah a, a chhan dik tak min hrilh duh bawk si lo. Zodina hi eng kawngah nge a dâwihzep ni? A pu thu min hrilh kha ka han ngaihtuah lêt a, ka hre thiam mai lo.

"Eng nge a dâwihzepna? Min han hrilh la?" ka tih chuan,"Nakînah le, in rawh le," tiin thei tui no chu ka hmaah chuan a rawn hûng a, amah pawh chuan a in nghâl a," He lai hmun nèn hian i hmêl hi a inhmeh ka ti, i awm ve chiah hian a màwina a zual sawt bawk," a ti zui zat a, no chu la kãngin ka han in ve a, ka laih deuh avàngin no chuan ka hmai chu ka hliah pah deuh a.

"I laih deuh pawh hian i ţha zual sauh," a tih leh chuan," Min tilai mai mai lo," tiin chhang chu ka han ban a, ani lah chuan chhang dahna chu lo la sawnin ka kut chu a lo man chat a," Eng maw i sawi kha? Han sawi țha leh teh," a ti sek a, kei erawh chuan," A thunawn ka pai lo," ka lo ti ve thung a," Chuti maw?" min melh sawr sawr chung chuan a han ti leh a, a ding zui nghâl a, ka kut pawh chu a la chelh reng, en chho hau pah chuan," Min thlah teh, miin min hmu réu réu ang e," ka ti sap a, kan bul vêl chu ka melh kual pah bawk a.

"Min hlau deuh hlek tùra ka siam che i ngai dáwn a nih hi," tiin a han nui suk a, hlauthãwng leh a ngaihna hre lo, mahni invêng ru tak chuan ka en chho a, ani lah chu induh tãwk tih hriat tak hian a nui suk suk a, a ngaihtuahnaah thil țha deuh a awm pawh a ni mahna, nge thil țha lo zâwk?

"Eng thil țha lo nge i ngaihtuah?" 

"A țha lutuk zâwk!" tiin a han nui leh suk a, a kut lehlama chhang dahna a ken chu dawhkànah chuan a han dah tê tê a, rawn kùn hniam thut leh a lama min pawh hnaih chu a rual ta zat a, a hmui chuan ka hmui chu a rawn bawh thuah zui zat bawk a.

A chèt dàn vàng chuan ka hamhaih a, chêt sawn nachâng pawh ka hre lo, ka meng lian ve ngawt ang chu. Ani erawh chuan rei lo tê chhûng chu ãm zet hian min rawn fâwp ngawr ngawr tih ka hria; mahse, kei chu ka hamhaih êm a, ka chhâng lo va, ka nam sawn chuang hek lo, rei lo tê chhûng chu che lovin ka khawng a ni ber.

"Tûn hnuah chuan ka thu i âwih ve deuh tawh ang chu," tiin min han thlah a, nui zui sukin a țhu thla nghâl a. Kei chuan," Eng thil nge i tih?" ka han ti ringawt a, ka en kar a, ani lah chuan," E, ka fâwp zawk che maw le," a lo ti awlsam êt a. Chutah, hre chhuak thutin ka hmui chu ka han hup a, ani lah chuan," Ka dâwihzep ve lo ka tih tawh kha, ka thil duh hi chu ka ti mai țhin," a lo ti leh a.

Ka ngawi ta rauh rauh a, lum ka ti up up kher mai. Thlifîm lah chuan ka awm dan chu hre ve lo ang maiin a chàwl  daih lehnghâl a, chhûngril lama zahna nèn, ka ni up up mai a, ka thlanfîm a bawl țiam țiam ngei ang chu. 

"Ngawi daih kher lo la, induh leh inngaizâwngte inkârah chuan khatiang thil kha chu a thleng fo țhin a, thil pângngai tak a ni," a ti a, sawi zawm lehin," Kha, chhang kha ei rawh, ka lâksak tawh lo ang che," a ti leh zat a, boruak danglam a nei ve lo rêng rêng.

Țawng lovin chhang chu ka ei ta thuai a, ka ei thuai loh chuan ka awm dàn chu a lài kual vêl vek tawh a, chhang chuan ka lài chu a tiziaawm mahna ka ti a ni, a lam hawia a hmel en pawh chu ka hreh tawh viau mai. Min fawh avàng khân ka haw miah lo; mahse, ka zak.

"Bawiha, in awm maw? Hluna a boral an ti a nih chu, an in lama in kal ve nghâĺ mai a va țha àwm ve?" Pu Zuala'n a rawn tih chuan," Tu Hluna?" a ti sup a, kei erawh chu makti zetin ka ding thut a," Pu Hluna a thî maw?!! A va mak ve! A mak teh thut e! A rang hle mai," ka ti mawlh mawlh thung a, ka mitthlaah office-a a rawn kal lai leh an ina ka va kal laia țhutthlènga a lo mu bâm lai chu ka hmu chuai chuai a.

*THIL ȚHA SAWI LEH A TAKA NUNPUI INKÂR HI A VA ZÁU SÍ  ÊM!*