☆THE SWEETEST HANDCUFFS☆ - 20 By Dingdi pachuau

 ☆THE SWEETEST HANDCUFFS☆ - 20 By Dingdi Pachuau

Han hamhaiha chíài buai chiam hun pawh a ni lo tih hriain, hmanhmawh takin Pu Hlunate in lam pan chuan kan kal ta nghâl a, Kimi ka phone a, ani pawh chuan a lo hre ve tawh a, kal tùra in ațanga a chhuah chiah thu chu min lo hrilh ve a.

An in kan thlen hma ațangin țap ri rãwih rãwih kan hre țan a, ka lung a zîng, hrehawm ka ti, hetiang boruak hi hrehawm ka ti thei hle a, hriat loh hrâm hrâm ka tum țhin. Kan thlen hnu lawkah Kimi pawh a rawn thleng ve a, tlangvâl thleng hma deuh  țhenkhat chuan an pindan bang tlêm chu an lo țhiat tawh a, chu chu a thleng thar apiangin puiin a țhenin YMA țhutthlèng an pu hlawm bawk a, an chhûngkaw bungraw hrang hrang, hnawksak pha deuh tùra rin chin chu hmeichhehovin thiar chhuakin hmun kan phiat fai bawk a, an hmun hnawk loh dàn ațang chuan mi che fel tak chhûng an ni chiang mai. Hmun kan tihfel lai pawh chuan Pu Hluna fanute pahnih chu an țap reng mai a, ni e, an chan hi ka hre thiam reng mai, hetiang thil êm hi chu thleng tùrah an ngai bîk hauh lo ang, a na dâwn êm asin.

Hmun kan tihfel zawhah nu leh pa, kum upa lamte an rawn lang phak phak a, Ruang a la rawn thleng rih lo  va, zài lam pawh an la tintuah rih lo. Tlaivàr a ngai dâwn si a, tlangvâl lam pawh chuan naktúk lama tlaivàr hnua thlàn laih ai chuan tiin thlàn lài tùrin an haw ta phak phak a, Jakob-a pawh ka hmu zui tawh lo, thlàn lài tùrin a haw ve a nih ka ring. Kimi nèn kan haw a, eirawng bàwl a ngai si a, Kimi pawhin ei a rêl ang a, a nu a kaltîr ve thung dâwn a ni.

Ei rêl pah chuan ka nute ka bia a, thil thlengte chu ka han hrilh ve a, kan inbiak tàwp dâwnah chuan an pahniha lo inenkawl țha tùr chuan ka han chah zui a. Ka ngaihtuah zui a, mihring nunna hi zawng, a hlu viau na hian a rei lo va, chhûm rei lo tê lo langa ral leh ang mai nun kan neihzia pawh Bible-ah kan hmu a, mihring dam hun chhûng rei lohzia ngaihtuah cheuh cheuh hi chuan mi dang huatna leh an chunga rilru sual pua khawsa hman pawh hi kan ni meuh lo asin le; mahse, khawvêl a ni miau mai si a.

Zànah pawh inkhâwm a awm lo va, tlaivâr tùr kan nih avàngin kan kal  hma duh lêm lo, nu leh pa, kum lama upate tân hmun kan la kian rih a nih ber chu. Dâr 9 vêlah kan kal ve ta chauh a, Jakob-a pawh Jakob-a a la ni reng a, min rawn sâwm phei a, Kimi nèn kan pathumin kan kalho a, kan va thlen chuan mi dang pawh an lo awm ve nual tawh, pâwna ding khawtlai lovin kan lût ve nghâl a.

Zài a hrehawm ka ti, a chhan chu Pi Tei leh a fate chu an țap nasa a, chu chuan rilru a khawih lo thei si lo va, kei phei chu ka zai lo, ka phun sep sep chauh a ni. Chuta kârah, min hmachhawn zâwng takin Arinite an țhu a, kùn renga țhut thu awm hek suh, hawi chhuak chiah ila, a hmuh loh thei si loh a, nuam lo ka ti khawp mai.

Țhalai kan tam ve bawk a, dâr 10 vëlah chuan kum upa lamte chu an haw ta phak phak hlawm a, an țhutna ruak chu pâwn lama țhalai awmte'n an rawn luah khat zung zung bawk nèn, in chhûng kan khat ta hmur mai. Kan han zai a, țhalai awm khàwm han zâi ta chu, boruak pawh a zia chho ta viau. Hlã an hre hlawmin an zai țha hlawm bawk a, thiam pawh an thiam ka ti, zai thiam viau lo mah ila thiam ve ta riauin ka inhre ve hial mai; mahse, mipaho chu kan hma lamah an țhu a, Jakob-a a langsàr bawk nèn, nuam ti ru viau siin nuam lo ka ti tlat pek a, a chhan chu han hawi phei ila min lo en kur țhìn si a, ka en ngam lo a ni.

Dâr 2 chho vêlah chuan ka mut a rawn chhuak țan a, hrehawm ka va ti tak! Ka mit chu ka han khap sak sak ringawt a, intihharh nân ka han insik ru vâwt vâwt bawk a; mahse, awmzia a nei tam lêm lo khawp mai. Zài chawlh deuh laiin pâwnah intiharh tùrin kan chhuak a, pâwnah chuan ka harh ve leh ta viau; mahse, in chhûnga kan luh hnu rei lo têah a ngai tê bawkin ka mut chu a rawn chhuak leh selh selh tho.

Kan tih tùr a nih miau avàngin mut chhuak chung chung chuan kan han tlaivâr a, zînga țhalai kan kal darh hma, nu leh pate rawn kal khâwm tak tak hma chuan hmun kan han phiat fel leh phawt a, tual pawh kan phiat fai vek. Chumi hnuah chuan a tlàwmngai zual deuhte chuan mitthi chhûngte, khual ațanga rawn kal tùrte tân eirawng an bâwl a, Kimi chu a tel ve miau avàngin ka awm ve nghâl a, ka tlàwmngaih vàng pawh a ni lo, ka hawpui tùr ber Kimi a awm ve vàng chauh a ni.

Dâr 9: 30 vêlah kan haw ve ta chauh a, Kimi'n an ina chaw ei ve mai tùr chuan min sãwm nain ka lo hnial a, chaw ei ka tum lo, mut hmak ka tum zâwk a ni. Tukin eirawng kan bàwl kha rin aia mikhual an tam tâk avàngin chaw kan ei ve nghâl thei lo va, ni dangah chuan rawngbâwltute chuan an lo ei nghâl zêl a ni àwm e. In ka thlen veleh chuan ka hmai phihin ka ha ka nâwt a, ka thuamhnaw thlãkin khum chu ka kâi nghâl vat a, rei maimichhìn a ngai lo, mumang nei hauh lo chuan ka muhìl ta bawrh bawrh a.

Dâr 3 a pèl hret tihah chuan ka harh a, ka pum ri rawih rawihin min tiharh ni berin ka hria, dârkâr 5 vêl zet chu ka muhìl tihna a nih chu; mahse, ka han tho chhuak chu ka harh vâk phah pawhin ka hre lo. Ei tùr ka han buatsaih nghâl a, hun lo viau mah se ril a țàm miau chuan ka ei poh a ni ang chu.

Zànah chuan khawhar inah kan kal leh ta a,  Jakob-a'n min rawn biak loh avàngin kan kalsan a. YMA-in zàn thum chhûng hun hi kan chan deuh avàngin țhalai lam hmêl deuh chauh hmuh tùr an awm a, nu leh pa hmêl hmuh tùr awmho chu an chhûngkhat hnai tak takte leh mikhual lamte an ni a, chubâkah, YMA hruaitute an ni leh mai. Arini'n hlã a hril a, hla hril pawh a thiam viau mai a, zài pawh a nuam dap dap e. 

A tûk lamah chuan YMA member tawh phawt leh tlàwmngai thei apiang chuan an hna thawhsakin buh kan tuh a, ka vawi khatna a nih vàngin ka han thiam lo khawp mai a, ka bul chiahah Amos-a a bung ve hlauh a, ani chuan ka hma chu min rawn chehsak zung zung a, a chak viau mai. Mipa chu sawi loh, hmeichheho pawh chu an chak hlawm bawk a, an ruala tuh hman loh hlauin ka hmanhmawh ve a, ka rin aiin ka hah daih mai. Mi dang chu an hah ve pawhin ka hre lo, buh tuh an thiam bîk vàng a ni ngei ang.

"I tuh chak hle mai," tia Amos-a'n min fiam chuan," Ngawi mai mai teh, ka bulah i bung lo ang tih ka hlauhzia hi," ka lo ti hap thung a, kan tuh tawhna hnu lam chu hawi thlain záu tawh hi ka ti khawp mai a, engtin nge anni unau hnih chauh chuan an enkawl hneh ang aw ka ti rilru rauh rauh a, mipa chu ni ve ve se ka hre thiam deuh hlek, nula ve țan chho chiah an ni mai si a, an hmabâk chu a ko tak zetin ka hria.

Member thawk chhuak kan tam a, mipa țhenkhatin tuahthing tùr an tansak bawk a, buh tuh lam chu kan tam daih zâwk avàngin kan zo ta thuai nghe nghe a. Kan haw lamah chuan tuahthing tùr an tan chu kan phurh hàwsak leh ta vek a, a rit lêm lo va, kan hahpui lêm lo, kawng erawh chho deuh euh euh lai a awm ve zeuh zeuh a, ka rawl ve lehpek maithei a ni.

Ni sensa hnuaia hna thawk kan ni bawk a, in ka thlen chuan ka rin aiin ka chàu daih tih ka hria. Ka inbual thuai a, zaninah khawhar inah kal leh ngei a ngai dâwn si a, chàu viau mah ila zanin  YMA hun tàwp zàn a ni tawh a, kal ngei a ngai.

Vawiin khân Jakob-a ka hmu miah lo va, tuahthing tan lamah khân a awm a nih ka ring deuh kha a nia; mahse, a awm chuang lo, engati nge maw a rawn kal ve loh ni?  Ani hi, tu pawh chu lo ni teh rêng se, vawiin ang hunah hi chuan rawn thawk ve ngei tùr a ni asin le. Nge ani hi a lo damlo zâwk êm ni? Ka phone chu ka han tuai ka han tuai a; mahse, ka be ta êm lo, harsatna eng emaw tak a nei a ni ang.

Khawhar inah chuan ka hmu lawi a; mahse, Jakob-a chu a ni hauh lo, bâkah, Jakob-a hi chuan min rawn contact hmasa tlângpui a, a reh deuh reng hi chuan amah kha a bo leh ta a niang ti ila a dik viau ang. Zanina mi pawh hi a inthuam dàn ațangin Vâlpuia a nih ngei ka ring, bâkah, a țhu kun deuh ngar a, hawi pawh a hawi chhuak lêm lo, ka melh zauh zauh a, a zâi ve pawhin ka hre lo, kan hla sak chu a thiam lo pawh a ni mahna. 

*******

"Vawiin chu ka lunglèn a zual deuh a, ka rawn bia che a nih hi, thlalâk hlui ka en kual a. I awm si lo nèn, Mami thihcham a lo ni leh kher bawk a," ka nuin a rawn tih chuan," Ni dâwn tak e, a lo rei ta deuh a ni maw? Ka hre chhuak miah lo nia," inthiam lo angreng tak chuan ka ti a, ka nu chuan," A, i buai ve êm mai a, bâkah, nia, hun a lo kal ve hret tawh a, a àwm ve tho alawm," a rawn ti ve a; mahse, Mami, ka laizawn neihchhun boral cham ka han hre chhuak lo chu mak ka ti a ni. Nikum lam kha chuan ka hna ka la zawm hman lo va, a thlànah pawh kan kal nghe nghe a nih kha. Ni e, a boral ațangin kum 5 chuang zet a lo liam ve ta reng mai, hmun dangah ka lo awm ve ta bawk nèn, ka hre chhuak lo pawh chu tlêmin ka inthiam ve deuh hlek.

Mami hi ka phìrpui niin kei aiin a piang chhuak hmasa zâwk a, kei aiin a upa hret tihna a nih chu. Phìr ni ta chu, kan inang êm êm a, kan inkàwm ngeih a, khawi iloah kal dáwn ila kan inzui chawt zêl a, school pawh kan kal dùn zêl a; mahse, kan lian chho telh telh a, kan tui zâwng a inang thei ta bîk lo va, matric kan pass chhuah hnuah kan ințhen lo thei ta lo. Bâkah, kei hi chu lehkha lam hi ka chemkalna a ni lo a ni ang, Cl-xii ka pass hnuah chuan Health Worker ka training ta daih a, ani erawh chu a vengva deuh a, phai lamah a chhuk ta thung a. Ka pa hian lehkha kan zir zêl theihna a nih dáwn phawt chuan tiin ka nu nèn ár an vulh țeuh a, a hlawh tam vak lo nèn chuan țang kawpin kan unau hnih chuan min chãwm ta țàng țáng a, zirna lamah rual a awt a, kan duhna min zahsak a, Mami pawh hi a duhna tak college a sawiah a kaltîr ta rêng a ni, sum lama harsatna kan hriatah a sawi lang ngai lo.

"Hi, Nurse, eng nge i ngaihtuah vung vung a?"

Hun liam tawh ka ngaihtuahna ram ațang chuan ka harh chhuak nghâl a, Vâlpuia lo nui sâng hmêl ka hmuh chuan," Nang i ni maw? I va reh ve? I dam em? Eng mah i thawk nange?" ka ti ta sawk sawk a, ani chuan,"Tam viau mah se vawi khata chhàn vek ka han tum ang e," tiin pawisawi lo zet hian a han nui phawt a," Aw, keimah Vâlpuia ngei ka ni e; ka reh viau pawhin ka lo hre hleinem. Ka dam a, vawiin chu, hna ka thawk peih chiah lo a nih hi," a tih zawm leh kalh kalh a. Chutah," Nurse, min hre chat chat thei hi mak ka ti ngawt mai, i fing viau a ni tiraw?" a rawn ti leh a.

Ka nui hak a," Fing vak nâng, i fing daih zâwk," ka ti a, țhutna chu kawh hmuh vatin," Țhu rawh, i  lo kal khât si, thingpui pawh tui deuh kan in dâwn nia," ka ti sauh sauh a, ani chuan," Ka va lãwm dâwn êm! Phû lo viau mah ila," a lo ti sap a, a mitmeng nung sar ațang chuan a hlim tih ka hre thei mai a.

U Ropuia'n Pu Hluna a râl a, a la rawn lêt lo va, a rawn lét hma ngeia thingpui ka pêk a țha ang, a lo thlen hmain haw hman nghe nghe se a țha zual ngawt ang, a hmel hi chu a hmuh tawh fo a ni ngei ang a; mahse, Valpuia hian a hre ve kher àwm si lo, a rinhlelh ka duh lo.

Flask-a thingpui ka dah sa chu ka han thlit a, kei pawh ka inthlit nghâl bawk a. A thingpui no dawhkàna ka dahsak lai chuan," A tui ngawt ang," a lo ti sap a, kei chuan," In rawh, a sa over lo a nia," ka ti a, ka han nuih phawt a, chutah," Khawhar inah khân ka hmu ve nawlh che a, biak che ka duh tehlul nèn, hmuh zui tùr i awm lo va," ka han ti leh a.

"Ka la naupang a, ka kal duh lo alawm, ka rualpuite pawh tu mah an la kal lo a nia. Zak chung chungin, ka pu thu sawi hnial ka duh loh vàng chauhin ka kal a nih kha, ka zahzia kha, ka ngaihtuah lét pawh hian ka la zakin ka hria! Hlã lah pakhat mah thiam ka nei ve bawk si lo va," a ti sap sap a. A lo nih chiah chu, a thiam lo a nih kha ka ring rêng a. Tûna a thil sawite hi Kimi emaw Arini emaw Amos-ate'n emaw hre ve ta se mak an ti àwm mang e, kei hi chuan mak ka ti hran tawh lo. Mak tih ai chu Vâlpuia han biak vël hi nuam ka ti tawh hial zâwk!

"I naupang viau hran hleinem, kal rual i ni ve reng tawh zâwk, kal ziah tawh rawh aw, hlã pawh i thiam thei thuai mai ang," ka tih chuan," A ni maw? Mahse, ka rualpuite tu mah kal an la awm si lo va, inla tlangvâl zual chhuahin min chhuah mai dâwn asin," a lo ti thung a, lu bu nghat pah chuan," A nih tak chu, ka thu chu ni se chuan i kum rualpuiteho pawh chu kal ve vek tawh tùrin ka hrilh ngei ang," ka ti leh a.

"Ka nuin min  la remtihsak kher lo maithei, keimah chauh ka nih vàngin rethei viau mah ila min ngaihtuah a, min en tlangvâl thei lo a nih ka ring; mahse, ka nu hi chu a sual miah lo a nia, ka pa zâwk hi ka pa dik tak a ni lo va, a fa dik tak ka nih loh vàng pawh hi a ni maithei, min ngaihtuah lo mah mah țhìn ka tia; mahse, min hmangaih ve tho chuan ka ring," a ti malh malh a, ngun zetin a thil sawi chu ka lo ngaithla a, a chanchin a sawi vawi khatna a ni bawk a, hriat loh neih ka hlau a ni.

Mut hmunah chuan vawiin lama Vâlpuia thil sawi kha ka ngaihtuah lét vang vang a, ka khawngaih roh khawp mai. Nu leh pa tak tak ni lo kâra sei liante dinhmun hi ka la tem chhin ve loh avàngin ka hre thiam ve lo va, chutih rual erawh chuan ka vànneihzia ka ngaihtuah tel nghâl bawk. Nu leh pa kárah sei lianin duh apiang sawi ngam leh ngèn ngamin ka awm a, anni lahin min ngaihtuah êm êm bawk. Mihring nun inan loh theihzia leh dinhmun inchen loh theihziate ngaihtuah chhovin ka vànneihzia mawlh chu ka hre chiang ta ber mai.

*******

"Jakob, i nu leh pa chanchin min han hrilh teh, kei chu, i hriat vek tawh kha, kan khuaah hial min rawn tlawh bawk a."

Zànah a rawn léng a, a chanchin hriat tam hi ka duh. Mi tak tak ni lovin, mi taksa rawn luah mai mah ni se a chanchin hi ka hre chiang châk, Zodina ka puih theihna pawh a ni ve maithei asin!

"Nu ka nei lo, ka pa erawh chu khawvêla pa țha ber a ni thung," tiin meng sawr sawr chung hian min rawn en a," Eng atân nge i tih a?" a rawn ti leh daih a, kei chuan," Ka hre ve chãk maw le," ka lo ti mai a. Ngun zeta min enin," Nu nei lovin ka lo piang chu mak i ti em? Ka lo pian chhuahna chhùl neitu chu thisâwn rawh se!" a han ti mai chu, mak ti zet hian ka en ta reng a! Hetiang êm êm hi chu a la sawi chhuak ngai lo, a țawngkam hmante lah hi, a râpthlâk mah mah. Anchhia hi zawng phuh chhuah loh tùr asin, tu mahin an lo dawng duh bîk lo va, a phuh chhuaktu kaah a lút leh duh an tih țhin kha.

"Mahse, ka lo piang chhuak ve nawlh hi ka lãwm, nang ka hmu thei si che a, nang hi tawng lo phei che ila chuan hmânah khân ka thi daih tawh ang," a ti leh a, kei chuan," Engah ngawt maw?" ka lo ti vat a, ani chuan,"Thih hi ka hlau ve hleinem; mahse, tunah chuan ka hlau tawh, hmuh theih loh che hi ka hlauh ber thil a ni," a ti leh sup sup a, dawnsawn a nuam viau mai. Kei akâr min han thlahlelin min hmuh loh a hlau a nia, làwmawm tak a ni.

Ka nui sak a, ani lah chuan," Nuih chauh kha em ni ka làwmman tùr chu? Eng emaw chu ka phû vein ka hria," a ti nghut nghut a, kei lah chuan chhaih pah deuh hian," Nuih hi a man a tam asin aw, ka nuih che chuan ka hlim tihna a nia," ka lo ti thung a. Ani chuan," Ka làwmman tùr chu? Ka la mai dâwn asin," a lo ti leh a, min rawn hnaih sauh bawk a, kei chuan hlauthãwng deuh tak hian ka lo en hrâ a, a nui suk a.

"Eng nge hlauh tùr awm? I hlauthãwng hma mah mah a ni, thil țha lo chu làwmman atân ka duh bík hleinem," tiin a rawn ãwn phei a, ka chalah chuan a rawn fáwp zauh a. A duh tâwk mai dâwn emaw ka ti a; mahse, duh tâwk mai lo chuan," He tah pawh hian," tiin ka hnâr hmâwrah chuan a rawn fâwp leh zauh a, ka lo îp zawr mai! He pa hi chuan chét dàn chi hrang hrang min hmuhtîrin mipa dang la tih ngai hauh loh ka chungah a ti zêl chu a nih hi.

"Ka awm loh hlànin kha pa khân i chunga hetianga a tih ve hi ka rem ti hauh lo a nia, ka tân chauh awm rawh aw, a châng chuan hruai bo daih che hi ka duh ţhin, kan pahnih chauha kan awm dun theihna tùr hmunah--" a tih lai chuan a phone a rawn rì a, a phun zui sup a, a sawi chu hre lo mah ila thil țha lam chu a nih ka ring lo ve tawp.

"Hun lo lutuk!" a ti leh sup a, pho e chu phawrhin a han hmet tàwp a, ka hmu hman zuai tho, Arini hming a ni, mak pawh ka ti chuang lo.

"He nu hi chu aw... engati nge maw a bialpa hian a ngaihtuah tâwk chiah lo em maw ni le? A phû tâwk hre teh se," a han ti ngul ngul a, kei chuan," Zahngai, zahngai," ka lo ti thung a, thaw hawk chung hian," Min tihbuai leh chuan kha dâwihzeppa ngei khân a tuar tawh ang, a chunga ka țhatna hi a hre chiang duh tlat lo, a bialnu hi eng emawtia tih deuh hlek a ngai a ni," a ti leh bul bul a.

"Zahngai! Tuna i thil sawi vêl dànah kha chuan i sual hmèl lutuk a nia aw," nui chunga ka lo tih chuan," Ka sual lo a nih hi, a bialnu pawh vawi khat tê mah ka la dek chhin lo, duh ila chuan hun remchâng zawng ka hmu nasa a nia; mahse, i tân ka rinawm tlat," a han ti zui leh zat a.

*A INKHÂWM TAM LEH TAM LOH LAM ÂI CHUAN A BULA MÍTE CHUNGA A RILRU PUT DÀNAH TEH ZÂWK RAWH*