☆THE SWEETEST HANDCUFFS☆ - 21 By Dingdi Pachuau

 ☆THE SWEETEST HANDCUFFS☆ - 21 By Dingdi Pachuau

A thu sawi chu a dik ngeiin ka ring, ka ringhlel lo. Jakob-a a nih chhûng na nâ nâ hi chuan hmeichhe dang hi a melh ka la hre tlat lo, lérh hmel viau mah se, min duh ve tak zet niin ka hria a ni.

"Ka hriat châk thil dang ka zâwt zui zêl dâwn che aw?" ka tih leh chuan," A pawi lo chin chauh chu," tiin min lo chhâng a. Melh deuh ralhin ka han nui pah deuh a; mahse, ani erawh chuan nui hmel a pu ve hran lo.

"Unaute i nei em?"

"Nei lo." Deuh hmak chuan; mahse, ka zâwt zêl tho ang.

"A nih, thil pakhat leh lawk, sawi chu a nuam lo maithei a; mahse, zawh che ka duh bawk sia, engati nge nu nei lova i insawi tlat a?" tiin, tlêma inthlahrung ru deuh chuan ka zâwt leh a, ani chu a han phun deuh sup phawt a, thâwk la hawkin," Piang lo law law se, a tân a țha zâwk ang, nu ni tlâk a ni lo," a ti ta nghut a, mak ti takin ka en deuh reng a, ani erawh chuan sawi zawm zêl tumna pawh nei lo chuan a ngawi zui ta daih a.

Han zawh zui zêl pawh chu nuam ka ti ta bîk lo, hriat belh erawh ka châk telh telh thung a, tûn atân chuan tâwk rih phawt se, nakinah hun remchângah ka la zâwt leh tho ang.

Kan ngawih dun vang vang hnuah chuan amah zâwk chu rawn țawng chhuak hmasaah țangin,"Pawnfèn vâr fêng leh tawh la, i inhmeh ve thlâwt si a," a rawn ti chhuak ta daih a, nichína kan thil sawi nèn khân a inpèrsan hlê si a, a rilru hriat tumin a hmel chu ka en vat a; mahse, ani erawh chu a lo maimichhîng daih thung a.

"Ka ngaina lêm lo, pawnfèn hrim hrim hi ka ngaina vak lo va... hmeichhe thuam chu ni tho mah se," tia ka chhàn chuan," Mahse, i inhmeh alawm, i nù hnâp mai a, ka mitthlaah pawh i la châm reng asin," a lo ti leh a, rawn mengin chiang zet hian min rawn en ta thung a, kei erawh chuan zah avànga ka biang sa hat hat chu khawihin ka hawi sawn ve thung a. A la nui hawk zui a. He pa bulah hi chuan ka zak zauh zauh chu a nih hi, zak tho mah ila min han fak lah hian chhûngril lamah nuam ka ti ru veng veng tho bawk si a, ka lo lérh ru phian a ni ang ka ti, ka rilru put hmang hi ka inhre thiam tawh bîk lo, mi tak tak pawh ni hauh si lo hi rilru ka pe tlat chu a ni si a.

*******

Zàn khat chu ka mut dâwnah Arini message dêngkhâwng zet mai ka dawng nawlh mai a, ka han chhiar chhuak chu ka țim deuh sawkin ka hre nghe nghe, chechàng lo chuan ka phone chu ka melh reng a.

*Kan khuaa hna thawka rawn awm ve mai i nih hi, zak ve deuh teh, mi pahnih inkâr țha lai rawn tihchhiat tum ringawttu hi i hmuingîlin i ring em? Teuh lo mai! I lo tenawmzia hi, nunnèm hmèl tê si hi i chhûngril hi a lo țawih a nih chiah hi. Nuamsa taka i awm theih ring hauh suh, Pathianin phubâ a lâk loh pawhin keimahin ka la mai ang*

Hetiang thil hi ka tawn ka ring pha hauh lo; mahse, hei, ka tawng chho ta chu a ni ta si a. Engtin nge ka tih tâk ang? Arini rilru nâin ka siam ta chu a ni a, Zodina ngaizâwng hauh si lo hian a langah chuan Zodina nèn inzui kan ang lo thei dáwn si lo, engtin nge ka sawi fiah ang? Arini rilru put dàn hi ka hre thiam reng mai, a rilru chhiat vàng chu a ni vek bîk lo, Zodina a lo duh ve êm mai a, thil awmzia a hriat loh chuan hei hi a rilru tùr chu a ni tlat, a rilru nat vàng a nih hi, rilru a nat chuan kan duh loh thilte pawh kan sawi chhuak țhìn rêng a ni.

Mahse, engtin nge ka hrilh fiah tâk ang? Thil awm dàn engkim ka hrilh ve dáwn em ni? Hrilh vek ta ila a hre thiam ang em? Ni lo, Zodina thurûk hi amah Zodina'n a hrilh loh chuan ka sawi chhuak thei lo ang, bâkah, Zodina pawhin thil awm dàn, kan inkawp lohzia hi a hrilh ve tawh maithei asin, thil ni thei tùr hrang hrang ka ngaihtuah a, khumah chu mu thei lovin ka let ka let a, an inkár hi a lo khi ve deuh tawh hrim hrim pawh a ni thei tho, nge keimah hi Zodina hriat loh hian min rawn vau deuh zâwk ni? A chângin thiam ka han inpe deuh a, ka ngaizâwng pawh a ni lo va, a thuhrimah, a bialpa chu engah nge a hum theih loh ni? A hum thei lo a nih chuan a bialpa hian a duh tâwk tak tak lo tihna a ni mai ti tein ka ngaihtuah thùl. A, ka rilru a buai nuai mai, muthilh tum phawt záwk mai teh ang.

Arini hmuh pawh ka hreh leh zual tawh a, inkhâwm pawh ka hreh phah zo vek. Min rawn àn khum tùr hian office-ah emaw ka inah emaw a rawn kal thut mai ang a tihte ka ngaihtuah a, rilru hrehawm ru takin hun ka hmang a ni ber mai. Jakob-a a nih châng lahin min rawn tlawh zut lo thei bawk si lo va,ani lah hi, han hrilh fiah ve chiam chî lah a ni si lo. Chuta kârah Kimi tìtí ațangin Arinite chu an in-break ni àwmin ka'n hre zui lehnghâl a, nui chunga," An ințhen chhanah i hming a ri ring teh a nia," tia min han fiam phei chuan hrehawm ka ti tak zet; mahse, a hnu lawkah," Ka ti ve mai mai a nih kha, i rilru kha i lo tihrehawm ngawt ang e, mi pahnih inngaizâwng kârah hi chuan boruak hi a pângngai reng thei bík lo tih hi hriat ve tùr a nia, nupa inkârah pawh a ni, inngaizâwng phei chu innei pawh an la ni lo va, ințhen hi chu a awm ve fo, inhmangaih tak tak kan tihte pawh an ințhen fo a nia," a ti leh a; mahse, a thil sawi chuan min hnèm hran lo.

Zodina chu hmuh ka duh viau a; mahse, ka hmuh leh phei chuan Kimi min fiamna kha a tak tak a ang zual dâwn a, ka ngam chiah lo.  An inkár lo zawh ve chiam pawh chu thil țha ber pawh a ni kher lo ang; mahse, an lo ințhen tak tak a nih chuan keimah vàng a nih loh hrâm ka beisei thung. Zodina'n min ngaizâwng lo va, kei pawhin ka ngaizâwng lo va, chuvàng chuan keimah vàng chu a ni thei lo ang.

Vànneihthlâk takin ka ti dâwn nge, Pu Zuala'n min rawn ko leh hlauh mai a, an ina kalna hun ka nei remchâng ta hlauh a ni. A inti dam țha lo leh tawh a, chuvàngin Zodina phone ațanga min rawn biain an ina tlawh tùr chuan min rawn ngèn a ni, ani hi chuan min ngamtlâkin min nêl ve a, hman loh sawi ngam pawh a ni lo. Huphurh ru tak si, kal duhna rilru pu tho si chuan an in lam pan chuan ka kal hnak hnak a, chawhnu lam deuh a nih tawh avàngin khawlaiah mi hmuh tùr an awm lêm lo va, a tihzia khawp mai, school ni se chawhnu hun an țan chho deuh chauh a ni bawk a, mi hmuh tùr an vâng pharh mai.

Pu Zuala'n min lo hmuh veleh chuan," Nang tê hi chu i fel ka tiin i bulah hi chuan ka pangchang ngam tlat a, ka rawn ko leh ta mai che a nih kha, office lamah i buai lo ang chu tiraw?" a lo ti vat a, kei chuan," Buai lo ve, tih tùr a awm hran lo, i eng ber nge nâ a?" ka ti lêt vat a, na nei leh damlo hmêl pawh a pu hran lo; mahse, ni e, a upa ve tawh a, damdawi ei reng nei a ni bawk a, anni ang hi chu hriat thiam an ngai.

"Ka awm hi a nuam lo seng seng reng a, nâ êm êm phei chu ka nei law, a hmasa berah chuan bp min han check-sak phawt la tiraw?  A thiam deuh bera kan neih i nî lahin min fehsan daih bawk si a, Bawiha lah hi hetiang kawngah hi chuan ka ring zo tak tak si lo," a ti barh barh a, kei chuan," Engah nge i rin loh ngawt? En dàn a thiam ve tho te chuan," ka lo ti thung a, ani lah chuan," Min check-sak ve hi chuan normal angin a sawi ziah a, tlêma ka lu a hai deuh pawh hian, chuvàng chuan ka ring lo a ni," a lo ti leh a, ka nui hak hak a. 

Ka check-sak lai chuan," Nang hi chu ka tunu ang maiah ka ngai che a, ka ring che a, ka ngamtlâk bawk che a ni. Thil engkim ka hrilh tawh bawk che kha, i hria tiraw? Kha pawh kha ka rin tlat vàng che a nih kha, i mitmeng leh awm dàn ațang hian ka rin ngam chi i ni tlat," a ti bawrh bawrh a, ka lo nui sak a, min ring ngam tlat hi a làwmawm ka ti, min ring tlattu bulah chuan rinawm loh hi a harsa a, a chhan chu min rin tlat chuan mi rinawm hmuhin min hmu tihna a ni a, rinawm taka kan awm a ngai a, min rin êm êm laia a rin loh zâwng ang taka kan awm leh si chuan min rinna kha kan tihchhiatsak vek dâwn tihna a ni dâwn a, a dam chhûngin min ring leh thei tawh ngai lo ang.

"I Bp hi chu tlêmin a sâng hret a nih hi; mahse, ni danga mi nèn a inang deuh reng tho, damdawi kha i ei țha ang chu tiraw?" ka han ti a, ani chuan," Țha e, a ei hunah ka ei zat zat," a lo ti vat a, ka lu chu ka bu nghat a," A țha lutuk, a nih leh, zànah i mu țha thei em?" tiin ka han zâwt leh a, ani chuan," Zànah hian, tûn hnai chhoah hian ka mu țha vak lo, khumah hian ka meng leh reng țhìn, chuvàng chu a ni thei ang em?" a lo ti a, kei chuan," Um, ni ve thei tho e, zàn men rei hian Bp hi a tidanglam ve nasa thei a, muthilh tam hi taksa tân chuan a țha ber a ni," ka han ti dap dap a.

Zodina a rawn lût a, polythene hian eng eng emaw hi a rawn khai lút țûn a, kan bul dawhkàna a thil khai dah pah chuan," Thil lei tùr a tam lo khawp mai," a han ti phawt a, chutah," Tluangtei chu, kan rawn ko buai leh che sia, biscuits i ei țeuh mai a niang chu," a ti leh zat a, kei chuan," Mai mai a, ko buai lo ve, tihian lènna hun ka nei ve pah a ni mai a, remchâng ka lo ti khawp zâwk asin," nui chung hian ka lo ti a, Pu Zuala pawh chuan," Ni e, inah leh office-ah a tawm reng a, hetia koh chhuah zauh zauh hi a ngai," a lo ti ve bawk a.

Zodina kal sawn leh hlàn chuan Pu Zuala chuan," En teh, kha, tlêm lai deuha i sawi Upa Thuhlaa thu ziah chungchâng kha, ka ti ve chhin a, ka thawn ve a, an rawn chhuah ve mai tak tak asin, i en ve duh em?" a ti sar sar a, kei chuan," A ni maw?! A va țha ve! A ţha lutuk ringawt! Khawiah nge, ka chhiar ve duh a nia," ka lo ti chûl a, a tih tak tak ka lo ring pha miah lo a nia!

"Bawiha, i buai loh chuan ka room dawhkàna Upa Thuhla chanchinbu kha min va lâk lawk teh," tiin Zodina chu a han ko a, a rawn lâksak ve mai a, a kal sawn zui nghâl a. A han kéu nuap nuap a, chutah, chanchinbu a kèu sa chu min rawn pe a, ka lo la vat a,"Mahni thil ziah chhiar chu mi dang thil ziah chhiar nèn chuan a inang hauh lo," a tih sap chuan nui chung hian," A dikin ka ring; mahse, hei i ziah ngaihnawm hmel êm hi," ka lo ti vat a, chanchinbu chu ka bih zui nghâl a.

Zodina'n thingpui rawn siamin min rawn pe a, kan bylah chuan a rawn țhu zui ve nghâl a, a thingpui siam pawh a tui hmel khawp mai. A chhang rawn chhawp pawh chu a tui ngawt ang, a hmêl ațang chuan a hriat sa reng, chhang an neih tui theih viau kha.

"Ei țeuh rawh, kan tibuai ngun si che a," Zodina'n a tih chuan a pu pawh chuan," Ni e, ei țeuh rawh khai, nang hi chu ka tihbuai ngam kha i nia, ka la tibuai leh zêl che pawhin ka ring, ka la tihbuai theih che chuan ka la dam tihna a ni mai, ka thih hunah chuan ka tibuai thei tawh dáwn miah lo che a nia," a lo ti duah a, kei chuan," E, min tibuai zêl rawh, kum tam tak chhûng chu min la tibuai zêl tùrin ka duh hlê mai che," ka lo ti ve a, ani pawh chuan," E, tibuai ngei ang, thih mai mai hi ka la tum hleinem," a lo ti ve sauh sauh a.

Thingpui in zawh hnu rei vak loah chuan damdawi a ei a," Ka han zâl lawk ang a, nang erawh chu lêng reng tho rawh aw. E, zanriah ei ve nghâl ta che?" Pu Zuala chuan a han ti a, kei chuan," Chaw ka heh lutuk, sàwm mai mai chi ka ni lo," nui chung hian ka lo ti a, Zodina chuan," Ni e, ei ve nghâl rawh, a hmeh lam chu i duh duh a ni mai," a lo ti ve a, Pu Zuala pawh chuan," Ni e, a tam mai, sa lam pawh, sa lam lo pawh, kan nei chikim viau a nia, ei ngei ngei ang che," a ti leh a, a tho țaih țaih a, a room lam pan chuan a kal zui ta nghâl a.

Haw ve nghâl mai ka tum deuh nain Zodina chu han titipui lawk ka duh deuh avàng chuan," Vawiin chu i pu i awmpui deuh tihna em ni?" tiin ka han zâwt țan a, ani chuan," Aw, ni deuh tho mai, chaw chu ei ve nghâl tak tak rawh aw, eng emaw han sawipui che pawh ka duh pah a," a han ti zui zat a, kei pawhin titipui ka duh ve tho avàng chuan," Ei kher chu a ngai chuang lo, a buaithlâk mai mai; mahse, eng emaw sawi i duh chuan ka hman reng tho a," ka lo ti ve thung a.

Deep-freezer ațangin vawksa leh Bàibîng phawrh chhuakin plastic chawhtawlhah chuan tui a han dah phawt a, chutah chuan vawksa leh Bàibîng chu a han chiah a," Ka puin ei ngei tùrin a tih che kha, hnial lo hrâm mai rawh," a ti sap a, Vawksa ai chuan Bàibíng chuan ka chil a ti pût zâwk a, a tui dàn tùrzia mawlh chu ka lo ngaihtuah a ni, engtin pawhin siam se a tui dáwn tih ka hre kar mai si a.

"A hma pawhin ka ei tawh tho kha, ei leh ringawt chu thil țha ber pawh a ni lo ang," ka tih chuan ka lam rawn hawiin," Tunah hian Zodina ni lovin Jakob-a ni ta ila, sâwm che ila, i ei duh ang em?" a rawn ti ta khauh mai, ka en nghâl zawk a, chhàn mai ngaihna ka hre lo zui.

"Ka ti ve mai mai a nih kha," amah vêk chuan tiin a han nui sak a," I tân buaina a thlen loh tluan zêl ka beisei, a thlen lo ang tiraw?" a ti leh ta zãwk a, kei pawh chu inngaihtuah harhin," Thlen lo ve, chutiang eng mah a awm lo," ka lo ti ve ta vat a.

A ngawi leh vang vang phawt a, eng tak rawn sawi chhuak leh ang maw tiin ka lo ngaihtuah ve thung a, ka zawh ngai hauh lovin Arini nèn an chanchin rawn sawi se ka ti ber mai, ka tân chuan zawh a huphurhawm êm asin.

"I lo hre ve tawh maithei a, Arini nèn kan in-break tih kha, i hria ang tiraw?" a rawn ti ta chiah mai a, kei chuan," Aw...hre thawi deuh, tak tak em ni?" ka lo ti thung a, ani chuan," Aw, tak tak ni e, ka dinhmun ațang hi chuan ințhen mai hi thil țha ber niin a lang tlat a ni, rei tak lo inkawp tawh mah ila hetia ka tih mai hi a țha, a tân chuan hriat thiam ka har dâwn êm mai a," a ti leh dap dap a.

"Mahse, a hma zawng pawhin in lo inkawp char char tho sia, țha takin in inkawp tho a ni lo'm ni?" tia ka han zawh chuan," Dinhmun harsa takah a ding reng a, keimah vàngin hun harsa tak leh hriat thiam har tak tùr a hmachhawn fo bawk a, thlah zalèn mai hi țhain ka hria a ni," tiin min chhâng a, min rawn enin," I lo inthiam lo ngawt ang e, nangmah vàng a ni lo a nia, engah nge nangmah vàng a nih ngawt ang? Kan ințhen chhan tak chu keimah vàng hi a ni," a ti leh a, chutah," Jakob-a chuan eng nge thil pawimawh deuh hrilh che a nei em? A chanchin ka hriat ve tùr ang chi te?" a rawn ti leh ta daih a.

"Nei vak lo, unau a nei lo va, mi neinung ve tak fapa chu a nih ka ring, a titi dàn leh a zirna a sawihmang ațang hian. A nu hi a haw tawp a, a pa erawh a hmangaih viau niin ka hria. Vâlpuia tak zâwk hi chu a la naupang deuh hlek a, kum 19 chauh a la nih bâkah a rilru a la thianghlim viau, mitthi inah pawh a la kal ngai lo a ni àwm e, huana feh hi nuam a ti tawp a," tiin a maha mi nung pahnihte chanchin chu ka hriat ang ang ka han hrilh ve a.

"Min hlau miah lo tihna a nia," a lo tih chuan," Hlauh tùrin awm hek lo maw le, chu chu a lo țha hlei hlei bawk sia, an chanchin ka hriat phah zêl a," ka lo ti a, ani pawh chuan," Ni e, hlau tlat la chuan a buaithlâk viau maithei a ni. Anni lah chuan an nêl viau che tih a lang reng bawk a, ka thîk ru viau zâwk dâwn maiin ka hria," tiin a han nui a, kei chuan," Min nêl tlattu chu hlauh theih ni nghâl lo chuan, an chanchin chu ka lo la zâwt chiang zêl dâwn nia, thurûk hriat chhuah theih pawh ka nei maithei asin," ka lo ti a, ani chuan," Ni e, keimah vàngin i hah phah hrep lo thei si lo va, a châng chuan ka lo hrilh ta kher kher che kha ka inchhìr leh țhìn, i buai lohna tùrah ka tibuai hrep zêl si che a," a ti sap sap a.

Ngaihtuah hauh lo hian a bânah chuan va dawmsakin," A ho êm mai, buaina ka nei hleinem, a chhan bulpui ber kan hriat chhuah theih hlauh chuan tih tàwp theih dàn pawh a lo awm maithei asin, chu chu ka beisei tlat a ni," ka han ti sap sap a, amah chu ka en chho pah bawk a, ani pawh chuan min rawn en chhuk ve a, a mitmengah chuan làwmna leh beiseina inpawlh nawkin ka hmu, ni e, țanpui theihna a awm phawt chuan țanpui ka duh a ni, țanpui dàn tùr chu ka hre chiang lo; mahse, kawng a awm ngeiin ka ring tho.

"Ka lâwm e," a ti sap a, a bân ka dawmsakna kut chu a en thla vang vang a, chutah chuan hre chhuak zawkin ka kut chu ka la sawn a, ka nui zui sak a, ka nuihzat vàng chu a ni hauh lo, a bân ka han dawmsak ve ngawt kha ka inthiam lo zahzêla nui ka ni zâwk.

"Mi tu pawhin i hriatah nangmah vànga ințhenah min lo sawi maithei; mahse, engah mah ngai lo tùrin ka duh che, nangmah vàng i ni lo ka tih tawh kha, harsatna i neih phah a nih chuan min hrilh hreh hauh suh aw, ka duh hauh lo, hrehawm i lo tih phah ngawt ang e," a hnua a rawn tih chhuah leh chuan ka lu ka lo bu nghat a, Arini message kha chu sawi chhuah ka tum hauh lo, eng thil mah ka chungah a ti lo ang, a rilru nat vàngin a ti ve mai a ni.

Chaw chu ka ei ve leh ta nge nge, haw a theih tlat si loh a ni. Chelh tak têin min chelh tlat a, bâkah, ka haw theih loh nân eng eng emaw min sawipui zêl a, a pu a rawn tho chhuak leh ta bawk nèn, ka haw lui duh ta bîk lo. A nî a rawn haw har deuh avàngin eirawng ka bàwlpui a, chawhmeh siam lah chu a thiam zêk lehnghâl a, a vawksa kan chu a tui viau a, chu ai mah chuan a Bàibîng bai chu a tui ka ti zual. A siam dàn chu ka zâwt dîlchhût khawp mai a, chutianga bai tui chu ka la ei ngai lo tlat a ni. A pu lah chuan," Dìlchhût vak ngai lovin pasalah nei mai la, a siam hlîr i ei char char mai dâwn alawm," a lo ti thung a, fiamthu mah ni se min ti zak lek lek thei hial a ni.

Zànriah ei khamah Pu Zuala'n thingpui hâng in leh phawt a tih tlat avàngin ka han țhu leh rih a, kan in zawh hnu rei vak loah chuan ka haw ve ta a, ngai ka ti lo chung chung chu Zodina'n min thlah a, bike-a min thlah a tum zet a; mahse, ka duh loh tlat avàngin kein kan kal ta zâwk a.

Kan titi pah reng a, T-shirt vâr a hâk avàng chuan Jakob-a emaw ka ti leh dâwn țhìn, an aw chhuakah danglamna a tam lua hran lo va, ngaihtuah vak loh phei chuan a hriat hran vak loh, Jakob-a erawh a châng chuan a thinchhe deuh hlek țhin a, bâkah, lérh hmel deuh taka han țawng leh han men kual vêl a chîng a, amahin min biak hmasak loh phei chuan, thuamhnaw vâr a haa nih ngawt loh chuan hriat hran theih pawh a ni meuh lo.

Ka in kawta Arini lo ding ka hmuh rual chuan ka ding dat a, ka en ta reng ringawt. Ani erawh chuan min lo hmu reng tawh a nih hmel, min lo en reng tawh a. Ka in kawta light chu êng lo mah se ka in piaha solar street light êng chuan a chhun pha miau si a, a lang chiang êm êm a ni.

"Eng thil nge ka hmuh hi?!!"

Zodina chuan a kut vei lam chuan ka hnungah a rawn dawm a, harh chhuak zawkin," Arini teh tlat chu, min lo nghâk em ni? Hei, Zodina pu hian chaw eiah min sâwm a, ka rawn haw har ta deuh a nih hi, eng thil nge ni ta?" ka ti ta sawk sawk a, in lam pan chuan ka kal zui ta nghâl a, Zodina pawh chu ka hnungah a rawn kal zui ve bawk a.

Kawng ka hawn hnu chuan light ka han on a," Lo lût r'u," ka han ti zui zat a, Arini chuan," Thil hi hre thiam lo der lo teh, i hre thiam vek! Nangmah vànga ka thil tawn pawh i hre vek, rilru țha ber ang hian awm tum lo mai teh, rûl hlauhawm ber ang chauh i ni," a rawn ti lût ta bawrh bawrh mai.

"Arin...!!!"

"Thil dik lo sawi ka nei em? Ani hi rawn awm lo se nang nèn hian hetiang boruak hi kan nei dáwn em ni? Kan inkawp tih a hre reng a, a rawn inrawlh lui tho a--" Arini'n a sawi zawh hma chuan Zodina chuan," A tâwk! Duh tâwk rawh, hetiang sawi hi ka duh lo a nia, ka sawi vek tawh kha, ani hian tel vena a nei hauh lo," awki hniam chhek chhawk, dam thluam anga lang si hian a han ti sup a, chutianga a țawng chu ka la hre ngai hauh lo. 

*FIRST LOVE HI CHU KAL ZIR ȚAN ANG DEUH HI A NIA, TLÛK HLAU LOVIN I KAL BAWP BAWP ANG A, A HNUAH DIK TAKIN I KAL THEI TAWH MAI ANG*