Direct Download copy code here: ☆THE SWEETEST HANDCUFFS☆ - 22 By Dingdi Pachuau Skip to main content

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

☆THE SWEETEST HANDCUFFS☆ - 22 By Dingdi Pachuau


 ☆THE SWEETEST HANDCUFFS☆ - 22 By Dingdi Pachuau



"Hetiang hian țan tlat ziah lo teh, a lo awm hma chuan hetiang hi i nih ngai loh kha, Zodin, maw, a hma ang khân awm leh ang, hriat thiam loh ka nei tawh lo ang a, i thil sawi apiang chu ka ring zêl tawh bawk ang," Arini chuan a ti ta mawlh mawlh mai a, Zodina kutah chuan a chelhsak bawk a. Lo awm dàn tùr ka hre lo kher mai, kal sawn daih thu a awm bawk si lo, hriat loh der tum dâwn ila a hriat loh theih bawk si loh a, naupang thu âwih an sawi ang maiin an bulah chuan ka lo ding ngawi reng ringawt a.


"Maw, Zodin, engtin mah ka ti tawh ngai lo ang che, min țhen lul suh, awm ngaihna ka hre lo ang, tunah pawh hian hrehawm ka tih êm hi, i tel lo chuan engtin nge ka awm ang? Ka thi thei hial ang, he nu lo lan hmaa kan awm dàn ang chiah khân awm leh ang," Arini'n a tih leh kuang kuang chuan Zodina chuan," Duh tâwk teh ang, ka sawi zawh vek tawh kha," tiin min han ko va," Tluangte, min lo hre thiam hrâm mai teh aw, a pawi ka tiin zahthlâk ka ti khawp mai," a ti sap a, inherin a chhuak zui ta daih a, Arini chuan rum zetin min rawn melh phawt a, Zodina chhuak chu ko zuiin," Zodin, min lo nghâk, thil sawi fel lawk teh ang," tiin a chhuak zui ve ta nghâl a, thil thleng chu a rang a, țhut pawh kan la țhu hman lo vek a ni, kei pawh ka la ding reng.


Engtin nge an intih zui tih lam chu ka ngaihtuah duh lo lui tlat a, ka hmai phih faia ka ha ka nawh fai hnu chuan phone la chhuakin ka han en thuak thuak a, group lamah thil pawimawh a lo awm hran lo ve. Kan boruak teh nuai vàng chuan phone khawih pawh ka tui lo, inlêng ka neih loh hmel bawk a, mu nghâl daih teh ang.


Ka muhìl țêp tihah Zodina chuan min rawn bia a, zanin boruak avàng khân thupha a rawn chawi titih a, phak deuh chual chuan a thiam loh a nih loh thu leh thupha chàwi a ngaih loh thu chu ka han sawi ve luam a.


"I lo muhìl hman tawh a ni maw?" a rawn tih chuan zêp duh bîk lovin," Aw, zanin chu ka mu hma deuh a," ka ti a, ka aw ațangin a man thiam vek dâwn tho si a, ka pha mar duh lêm lo a ni.


"Ka rawn tiharh che sia, ka inthiam lo mang e!" inthlahrung tih hriat taka a rawn tih leh chuan," Ho mai mai, min tiharh khât êm mai," nui chung hian ka ti thung a, chutah," In insawi fel thei ta em? Hetiang thil a thleng hi pawi ka ti tak zet, ka sawi tùr chu a awm lo nain insawi fel leh thei hrâm ula chu ka ti," ka ti zui zat a, ani chuan," Pawi ti duh suh, a hun a thleng ve taah ngai hmiah rawh, a thil sawite pawh kha theihnghilh vek tùrin ka duh che, rilru hrehawm phah nân i lo hmang palh rêu rêu ang e," a rawn ti sap sap a.


"A thil sawi kha a dik ngeiin ka ring, inkawp rem takin awm leh thei hrâm ula ka ti tak tak a ni, a duh ve tak zet che tih a lang reng mai si a, zah pawh a dâwn zo lo chu a nih kha," ka ti leh a, hmeichhia ka nihna angin Arini tlâwm lutuk, zah pawi sawi thei lo kha khawngaihthlâk ka ti a, min melh rum viau mah se, a chan kha ka chanah ka dah chhin a, a hrehawm ve dâwn lutuk tlat a ni.


Ani chuan," Ni maithei, nia, a thiam loh a ni lo, ka thiam loh vek a nia, a bul ber chu keimah ka ni, min hriat kha, ka natna zawng zawng nèn hian hetia tàwp mai hi thil țha ber a ni," a rawn ti ve leh sap sap a. Chutia a thiam loh thu leh a natna chungchâng a rawn sawi chhuah chuan amah chu ka khawngaih ve leh a, a awm dàn, a natna chungchâng hi hrilh mai ta se, an inkâr chu a fel duak zâwk mai lo'ng maw? Arini pawhin a duh tak zeta a hmangaih tak zet a nih chuan hre thiamin a bula awm chawt a duh zâwk ngei ang.


"Zodin, i chanchin hi hrilh ta mai la, a fel--" ka sawi zawh hma chuan min rawn pawt chatin," Ni lo, eng mah fel tùr a awm tawh chuang lo, a tàwp vek tawh!" a rawn ti vat a, sawi leh tùr hre tawh lo, ka inthiam lo deuh bawk si chuan ka hmui chu ka pet ka pet ringawt a. Ka ngawih tâk reng vàng chu a ni ang," Ngaihtuah buai duh suh, i lo awm hma daih ațang tawh khân inkawp lo tùr kan inkawp a ni tih ka hre tawh," a rawn ti leh ringawt a, ka țawng ve chuang lo, sawi mai tùr ka hre tawh lo a ni.


Kan inbiak tàwp hnuah pawh chuan ka ngaihtuah zui reng a, ngaihtuah zui lo tùr khân min ti tak nain ka thei lo, ka mut chhuak lah kha a bo zo vek tawh a, ka harh chiang kar kar tawh khawp mai. Arini chan chu ka ngaihtuah a, zanina a awm dàn ang khân khawvêla ka duh ber hmaah pawh ka awm ve thei kher dâwn em ni? Khati khawp khân tlâwmin kei ngei pawh min zah zo lo a nia, Zodina hian a ti deuh mah mah zâwk a ni lo maw le? Ka hmuh dun ve țhin lah khân an induh tawn ve viau țhìn khân ka hre si a. Zodina khân ka awm hma ațang tawha inkawp lo tùr inkawp an ni tih a hriat tawh thu kha a sawi ngei mai; mahse, Arini thil sawi dànah kha chuan ka awm hmaa an awm dàn angin, hlim taka awm leh a duh thu a sawi a nih kha. An inkâr hi Arini sawi ang khân kei hian ka tichhe tak tak em ni ang? Zodina taksaa Jakob-a rawn lang hian kei hi min pan tlat si a, chu chu Zodina emaw tiin Arini hian a hre thiam lo ngei ang a, chu chu an buaina bul ber a ni ngei ang, hriat thiam har dâwn hek le, a bulpui ber hriat loh miau chuan, hetia a lan dàn ringawt ațang hi chuan Arini hi dem theih a ni lo, a bialpa hi a duh viau tih a hriat a, an inkâra hneichhe dang awma a hriat rual rualin thîkthu a awm ngei ngei dâwn tlat si a ni.


Rilru a buai, ka ngaihtuah lo thei si lo. Mi inkâr tichhetu ka ni ta ringawt mai a nia, a zahthlâk ka ti a, Arini tak pawh hmuh leh a hrehawm ngawt ang, min melh rum viau pawh kha a àwm viau asin, Zodina hian chanchin engkim hrilh vek duh se aw...


"Ngaihtuah mûk ngar ngar hle mai, ka koh ka koh che pawhin i hre hauh lo a nia," U Ropuia paper hlàwmin min rawn vawm fuh chuan ka harh chhuak zawk a, a thil sawi pawh chu ka hre chhawm nghâl vat bawk a, a rûk taka inthiam lo deuh chung chuan," Nia, tûnlai tê hian thil eng emaw ngaihtuah vak ka chîng a," nui deuh chunga ka tih chuan," Wow..!! A fuh dâwn e, khaw chhûng tlangvâl tu emaw ber a ni ngei ang chu maw," aw thian zauh pah chuan a lo ti a, a lu a bu nghat nghat bawk a.


"Ni maithei, ni lo maithei bawk," nui chung vëk hian ka ti leh a, U Ropuia hi mi fel tak a ni a, ka chunga thil thleng hi hrilh vek ta ila ka thâwl hawk thei maithei a ni; mahse, Zodina chanchin sawi chhuah ngei a ngai dâwn a, a natna thurûk pawh ka sawi chhuah ngei a ngai ang, chu chu thil dik a ni bawk si lo.


"Tu tlangvâl ber hi nge vànnei tùr chu? A hming tal min hrilh ve la," a rawn tih leh chuan ka nui a,  ka dawhkàna paper inpharh diai chu enin," Tu ber hi nge maw ni dâwn le?" ka ti phawt a, chutah," Ka va luck hmel tak! Zahthlâk e, miin an lo hre rêu rêu ang tih a hlauhawm, luck lo ropui si," tiin ka han insawisa zui a, U Ropuia nèn chuan kan nui leh rih a.


Pu Zuala chanchin chu zawh ka duh țhin avàngin Zodina chu ka be zauh zauh a, a pu hian phone a nei ve si lo va, Zodina phone-ah ka be tawp mai. A nî phone number ka hre bawk si lo va, ka va biak châng lah hian min han be rei thei khawp a," Min rawn tlawh leh tawh la," a lo ti ziah zui a, va tlawh zawk chu duh ve viau mah ila kal loh rih mai țhain ka hria a, bâkah, Pu Zuala pawh a dam chho zél tih Zodina hnên ațangin ka hria a, va tlawh kher kha a țûl ber lo tlat. Zodina nèn kan inkârah thil awm awm lo mah se, bialnu țhen hlim a ni a," Amah vàng a lo nih chiah hi," tiin miin min lo ngaihbel thei bawk, thu dik ni lo mah se ngaihbel theiha awm kha ka duh lo, a theih chin chinah chuan ka invèn ve a ngai.


Inrinnî a ni a, tûkțhuan ka ei kham hnu lawkah chuan ka mutpuan leh thosilèn chu sûk tùrin surf tuiah ka chiah a, ka chiah chhûng chuan ka pa ka be rih a, eng eng emaw sawiin kan nui a, chutih lai chuan phone call dang a rawn kal a, Jakob-a number a ni tih ka hriat chuan ka pa hnênah chuan," Pa, nakinah ka rawn be leh ang che aw, call dang a lo kal tlat," tiin, kan inbiakna chu ka titàwp a, Jakob-a call chu ka chhâng zui ta nghâl a.


"Zonun, inah i awm em? I awm ngei a ngai. Ka rawn kal dâwn, inhmuh ngei ngei a ngai," a rawn ti nghâl a, eng a hria chu ni maw? Ka chhàn ve hma chuan a titàwp daih zui a! He pa tak hi chu, ka thaw hak a. Hm, lo kal teh se, eng thilah nge inhmuh a ngaih viau ni? Min ngai a niang, ka nui sak a. Ka hmuh lohna a rei ve leh tawh alawm, kei pawhin ka ngai, ka phâ lo ang, hmuh ka châk.


A rawn thleng thuai a, a hmel leh mitmeng chuh! A rawn luh veleh ka bula rawn țhut pah hian a phone chu min rawn pe a," Hei hi eng nge a awmzia? Ka awm loh chhûng khân eng thil nge thleng? Sawi fiahna ka phût, ka duh loh ber a ni tih i hria tiraw?" a rawn ti ta nghut nghut mai. A ngaihna hre lo zet hian a hmel chu ka en reng phawt a, ani lah chuan," Phone kha en rawh," a rawn ti leh nghut a, ka kuta a rawn hmeh bel a phone chu ka en ve ta a.


Zodina min rawn biakna, zàn ka mut dâwna minute 20 deuhthaw zet kan inbiak țum kha, a lo hmu chhuak pek a lo ni, a lo lang chiang ngang mai, a minute zát nèn lam maw le, Zodina khân a lo delete hmaih palh a ni chiang mai.


"Eng vàngin nge a rawn biak che? Eng thil nge a sawi? Minute 18 leh second 45 zet lehnghâl!" tiin a hmai chu a han huih pâwk a, hmêl chang bànga min rawn enin," Eng thil nge a rawn sawi? A huang lo a nawr tih a inhria em? Ka en liam thei lo ang, ka nunah a rawn inrawlh thiang lo, kei pawh a bialnuah ka inrawlh ngai em? Teuh lo! A harsatna lak ațangin ka chhan chhuak tê tê a, ka nunah rawn inrawlh a tum leh si, ka en liam hauh lo ang," tiin a tho thut a, chhuatah chuan a vei tawn ta nghut nghut mai a. Ka hlau ve lek lek hial mai, a thinrim hmel êm avàng chuan sawi mai tùr ka hre lawk lo, Zodina țan zãwnga ka țawng chhuah hlauh chuan a thinrim ka belhchhahsak ka hlau bawk si.


"Ka tã liau liau i ni, kan inkârah mi dang an rawn inrawlh ve ka remti thei ngai lo ang, a theih loh bur a ni tawp mai!" a tih leh nghut nghut chuan," Khatia vei tawn thuak thuak reng lo khân lo țhu phawt teh, ka lu i tihai a nia, thil awmzia ka hrilh ang che," tiin ka țhutna bul chu ka han bêng thak thak a, ani pawh chu a ding chut a, min rawn en vung vung phawt a, a hnuah chuan a rawn țhu ve ta a.


"A bialnu nèn khân an intithiam chiah lo deuh a, a chhan pawh a bialnu khân thil a hriat sual palh vàng a nia, ka chungchângah. Chuan, thil awmzia kan sawi a nih kha," invêng ru tak leh fîmkhur tak chuan ka ti a, dâwt han hrilh ringawt chu ka thei chiah bîk lo, a rilru a chak si, dâwt ka sawi a nih chuan hre chhuak leh ta se... bâkah, Zodina tân thil țha lo tak a tih phah hlauh chuan, thil a buai vek a ni mai.


"Eng nge a awmzia? A bialnu khân thil a hre sual a... Kha pa khân i chungah rilru dik lo put a neih vàng tihna em ni? A ngaizâwng che a ni tiraw? Chu pa chuh, a châk lo ang! Khaw êng a hmuh ngam tawh lohna tùr thil ka tih a ngai a ni," a ti leh ta nghut nghut mai a, hlauthãwng ru zet hian a kutah chuan ka vawnsak a," Zahngai, zahngai, khatia i awm khân i hlauhawm teh a nia," ka ti sap a, ka ti tak tak a ni, Zodina tân ka hlauhthàwnpui bâkah thil țha lo eng emaw a ti ang tih ka hlau, ka hriat duh thil ka hriat chhuah hma hian thil a pawi zo vek palh ang.


"A lakah eng rilru nge i put? Hetia i țan tlat mai hi ka duh hauh lo a nia, rilru dang i pu chu a ni êm lo ang chu maw?" hnai zetah, chiang zeta min rawn en kur pah chuan a rawn ti a, ka hmai bul chêta min rawn en a ni bawk a, dâwt kha lo sawi ta ila chuan ka tîm chãwih chãwih ngei ang.


"Min ringhlel a ni maw? Min rin loh miau chuan tihngaihna ka hre bîk lo le, miin min biak chuan ka chhâng ve bawk ang chu, bâkah, ani phei chuan a pu chungchângah pawh min be duh fo va, min râwn fo rêng a ni. Chuan, ani tak phei chu i taksa neitu a nia, ka kawm ngeiha ka biak țhat a ngaih châng a awm alawm, biak duh loh ngawt chu a fuh bîk lo, i taksa hi țha taka a enkawl a ngai a, rilru sual puin lo enkawl țha duh lo ta se, buaithlâk deuh tùr a nia, kan inhmu thei tawh lo thut maithei asin," ka ti ve ta thung a, hetiang zâwnga ka tih loh chuan kan sawi fel hlei thei lo palh ang, a thinrim ropui si.


"Chutiang zâwng chuan sawi kher lo teh, he taksa hi a enkawl țha duh lo a nih chuan keiman ka enkawl mai ang, a taksa hi ka thunun hlen tlat ang a, ani chu a pil bo hmak mai dâwn a ni. A pil bo hmak theihna tùr thurûk lah chu ka nei țha mai si a," tiin a han nui suk a, chutah, tàwp leh chutin," Ka duh loh zâwng thil a ti leh a nih chuan ka pil botîr hmak tawh ang, chu chu nang pawhin hre tel la aw, khatianga rei uchuak kha a be leh che a ni emaw nangmahin i bia emaw a nih chuan a chungah action lâk a ni ang, nang erawh chu engtin nge ka tih phal ve tehlul ang che ni? Ka tâna hlu ber kha i ni miau mai a; mahse, min chuhpuitu an awm erawh ka remti ngai lo ang, chatuanin," a ti leh duah a. 


Thurûk hi hriat chhuah ka duh, eng thil nge ni? Hei hi Zodina ka puih theihna hmanrua pawh a ni maithei, ani hi chu duh viau mah ila mi tak tak a ni lo va, Zodina taksa hmanga rawn inlâr ve mai a ni, duh tak tak theih dinhmunah a ding lo, hei hi ka hre kar tùr a ni.


Nuih sak pah hian," Thurûk chu ka hre ve châk tawh, min hrilh ve tawh la," tiin ka han hnaih sauh a," Mawh, min hrilh a hun ve tawh i ti lo maw?" ka ti leh a, mawi a tih ber tùra ka rin ang chuan ka'n melh a, ka nuih pah bawk a, ani lah chuan," Ani thurûk mai mai hre tùr chuan min tlawn kher lo teh, engati nge hriat i châk êm êm? A lakah hian eng emaw ni chu a awm a ni tiraw?" ka rin loh deuh chuan a rawn ti ta thung a, chutah," Thurûk ni na nâ nâ, sawi chhuah te chu," a lo ti hluk a, kei erawh chuan," Min ringhlel ziah lo teh, a hma pawhin min hrilh i tum tho kha, eng nge ka hriat ve chu a pawi viau? I bialnu ka ni lo em ni?" tiin ka nawr ve ta thung a. Ka ti fuh khawp mai, a hmêl chu a dang daih.


"Ni e, ka bialnu dik tak i ni, engah nge ani thurûk mai mai ka zêpsak reng ang? Ka la hrilh khawp ang che; mahse, ka duh min tihhlawhtlinsak phawt la?" a rawn ti ve ta thung a, a meng zîm sawr sawr bawk a, ngun zetin ka en a, min en dàn chu hrisêl lo deuha ka hriat avàngin," Khatiang lam kha chu ngaihtuah hauh suh," ka ti țhat a.


A nui hawk a,"Eng nge ka ngaihtuah a? I hria em ni?" a tih chuan," Tenawm miah suh," thutak zet hian ka lo ti leh a, a nui leh hawk a," I lawmawm reuh mang e, thinrim ve pawh hian ka nui leh țhìn," tiin ka kut chu lain a hûm vang vang a, ka beng bulah rawn kûn hnaiin, "Nakinah ka duh chu ka hrilh ang che," a ti sup a.


A haw meuh chuan a tlai ruih tawh a, ka insûk tùr pawh chu ka su sawk sawk a, a ro hman lo chiang kher mai. Zanin chu thosilèn zâr lova ka mut mai a ngai dâwn a ni, Zodina vàng vek, min rawn biakna kha delete tùr a ni asin le, ngaihtuah tãwi lutuk mai!


A tûka kan inkhâwm bâng chu Arini lah chuan min lo ko chat a, Kimi chuan," A va pawimawh àwm ve aw," tiin a lo fiam a, ani chu a lo nui sâng a," Pawimawh lutuk!" a ti ve mai bawk a, biak in thlanga thing hlim hnuaiah chuan kan ding leh a, biak in kawta țhute chuan kan țawng an rawn hre phâk kher lo ang.


"Tluangte, i chunga ka thil tih avàng khân pawi ka ti a, zahthlâk taka ka țawng khum che avàng khân khawngaih takin min ngaidam hrâm dâwn nia, ka rilru hah hrehawmin khua ka lo hmuh loh vàng a ni, min ngaidam hrâm rawh aw," a ti ta mial mial a, ka kut chu a rawn vuan a," Mi rilru țha tak i ni tih ka hria, nang leh zêlin min ngaihdam loh chuan hawi ngaihna pawh ka hre lo hial ang," a ti leh a.


Ka kut chu a vuan reng mai si a, nuam lo ka tiin hrehawm ka ti angreng khawp mai,"A, engah mah ngai duh suh, theihnghilh vek ang, engmah tihsual i nei hleinem, ka hre thiam lutuk che a nia, thil i hriat sual vàng a nih kha, ngaihdam ngai pawhin i awm lo," ka ti ve ta ringawt a, keimah vànga khatianga awmah khân ka ngai lo thei bík lo va, ka inthiam chiah bîk lo, ngaihdam min dîl bawk si nèn, awm ngaihna hriat a har.


"Kha maw, i rilru a țha ka tih tawh kha, min hriat thiam ka ring rêng a ni. Ka lâwm e, ka rilru a hrehawm lutuk a, Zodina nèn kan inkâra hetiang hi a lo ni bawk si a, ka thiam loh liau liau a ni, mi fel tak a ni asin, ka duh lutukna lamah  ka lo huangtau mah mah a ni," a ti leh mawlh mawlh a, a hmel chu țah chhuak ni awm tak hian a sen țeuh mai a, an inkâr dik loh chhana amah a han inpuh ta chu mak ka ti ru kher mai, engtin nge maw a lo tih ni?


"In inkârah eng mah a awm lo a tih pawhin ka âwihsak duh tlat lo va, hmân ațang tawhin kei lo hmeichhe dang a melh ngai lo tih ka hre ve reng a, chuti chung chung chuan ka thîk lui tlat che a, a insawi fiahna pawh ka ngaihthlâksak țha duh lo va, mipa tân chuan a tlàwmthlâk ve dâwn êm asin, ka khawngaih ngawih ngawih, ka inlâk luhlul vàng vek a ni, engkim hi ka thiam loh hulhual a ni," a ti leh sap sap a, a thil sawi chu a ti tak êm êm mai si a, a hmel men deuh pàr nèn chuan ka khawngaih reuh khawp mai.


"A nih tak chu maw le, han insawi fel leh thei hlauh ula," ka tih chuan," A dik alawm, insawi fel leh theih tluka duh hi ka nei lo ang, khawngaihin thil pakhat chauh ngen leh che ka duh a, ngèn tam lua chu min ti lo hrâm la aw?" tiin beisei nei tak hian min rawn en a, a mittui a tling deuh kiau nèn, nuam ka ti lo tak zet.


"Eng thil nge ni ta? Ka theih phawt chuan--" ka tih lai chuan ka kut chu hmer nghet deuh salh pah hian," Zodina bulah ka thiam loh vàng liau liaua hetiang hi thleng a nih thu leh ka inchhìrzia hi i hmuh hunah min lo hrilhsak hrâm ta che, nang chauh hi ka innghahna awmchhun i ni tawh, in inkàwm ngeih tih ka hria a, a pu pawhin a nêl êm êm che, i sawi phawt chuan a ring che ang a, kan inkâr pawh hi a fel leh thei ngeiin ka ring, min sawisak ang tiraw? Ka ring thei ang che tiraw? Mawh, khawngaihin?" a ti ta sek sek mai a.


Ka huphurh hran lo, keimah vànga hetianga awm hi an nihna chen a awm ka ti ve tlat a, inthiam lohna chen pawh ka nei ru ve tho, ni e, min ngèn na nâ nâ chu, ka sawi ngei ang.


Mahse, Zodina chu ka hmu nghâl thuai thei bîk lo. Phone-a han biaka han sawi chu ka duh bîk meuh lo va, hetiang thil serious hi chu hmaichhanah ngei ni thei se ka duh si a ni. Arini lah chuan min rawn be deuh zut a, Zodina bula ka sawi tawh leh sawi tawh loh chu min rawn záwt deuh chhên a, ka inthlahrung khawp mai, ka la hmu thei mai bîk si lo va. Ka hmuh theih zâwk chu Zodina ni lovin Jakob-a a ni rih tlat, ani hi chuan min rawn contact hmasa zâwk zêl a, min rawn biak loh pawhin a rawn lêng a, a bula Arini chungchâng han sawipui lah chu a chi mang meuh si lo. Chutah, Vâlpuia a rawn lang leh zauh bawk a, ani hi hrilh ringawt ila awmzia a awm dãwn hauh si lo, ka inlêng dangte lah chu Amos-ate țhianzaho an ni leh mai a, Zodina hi zànahte hian rawn lèn ve tùr hi a ni ngai a, ka hmuh duh veleh ka hmu leh thei lo chu a nia.


In bul ka tifai e ka ti a, khawchin ka enah vawiin lama ruah súr thei dinhmuna kan din avàngin ka hmanhmawh ve hle a, an sawi lãwk dik ve viau a ni. Zîngkârah ni a rawn chhuak êng sût a, chaw ei kham lam ațang erawh chuan chhûm a rawn awm a, a rawn chhah telh telh a, chawhnu lamah chuan a rawn sûr ta mai rêng a, ka intifai zo hman chiah chiah a, ruah erawh chuan min nan hman hlek  thung.


Ka huh deuh hlek avàng chuan ka inbual nghâl a, vawiin lam ka thawk ve deuh bawk nèn, ka lu chu a na deuh bûr maiin ka hria. Zànah erawh chuan ka inkhâwm tho a, ka mut dâwnah damdawi ka ei thung a, naktûk lamah chuan a reh maiin ka ring.


Mahse, a reh hauh lo, zànlaiah pawh ka khawsik avàng chuan ka tho a, damdawi ka ei leh a, ka lu chu a na ngut ngut bawk a, vawiina ruahin min nan hman hlek vàng kha a ni thei mai ang em? Pathian zârah ka hrisêl a, ka khua hi a sik khât ve riau asin le.


A tûkah pawh chuan ka inkhâwm peih lo va, Kimi'n min rawn sàwm lai pawh chuan ka lo inkhuh hlún leh tawh a, thil awmzia chu min zâwt a, inkhâwm bàn veleha a rawn haw nghâl tùr thu min hrilhin a chhuak leh ta thuai a. Ka damdawi eiin min chhâwk hlei thei lo va, vawt ka la ti viau rih a ni. Intuam hlûn chung chuan ka inngaihtuah kual a, ka nu leh pate ka ngai vawng vawng mai. An bulah chuan awm ila chuan min ngaihtuah leh dâwn si a, tuna loh theih loha ka chêt ngai ang hi an bulah chuan ka ti dâwn hauh si lo.


Inkhâwm chu an bâng har ka ti khawp mai a, Kimi a awm chuan a nuam ve deuh hlekin ka ring a, mahni chauha awm ai chuan a zia ngei ngei ang tih ka ring tlat. Jakob-a emaw tal hi rawn kal thut mai se, ani chuan min ngaihtuah ngei ang a...


Kimi a rawn luh chuan ka lu nâ chu ka damdawi ei chuan min chhâwk deuh hlek tawh a, țhutthlèng ațanga tho chhuakin ka lo be vat nghe nghe a, a hnunga Zodina rawn lût ve ka hmuh tâkah erawh chuan ka țawng tàwp deuh chat a, ani rawn kal ve hi chu ka beisei loh thil a ni.


"Eng nge i lo an? Kimi hian a sawi a, ka hre ve chiah a, a zia lo hle mai," tiin ka bula plastic chair-ah chuan a rawn țhu a, a inkhâwm bâng ve tho a ni ngei ang, a smart zaih mai.


"Ka zia e, damdawiin min chhâwk țan tawh a," ka tih chuan," Engtizia teh thut nge ni dâwn le? Nang ber han damloh ve chu, i inhmeh lo," a ti leh a," Nimina ruahin min nan hlek  vàng kha a nih ka ring deuh ngawt a," ka lo ti vat a, Kimi chuan," A ni ang, ni dangah i khawsik kan hre ngai hleinem," a lo ti ve a, chutah," Ka zu inthlâk lawk ang a, ka rawn kal lehnghâl ang, Kob-a, lo haw miah suh aw, thingpuite kan lum dâwn nia," a ti a, ani chu a lo țhen deuh sak a," Haw lo ang, kan thleng ve chauh alawm," a lo ti mai a. A han ţhen deuh sak chhana ka rin chu Kimi'n 'Kob-a' tia a koh vàng kha a ni ngei ang chu, ni e, Jakob-a a ni tlat lo alawm.




*I CHUNGA ȚHAT AN CHHUAH VÀNG MAI LEH THIL ȚHA AN TI LAI I HMUH VÀNG MAI KHÂN MI ȚHAAH NGAI NGAWT SUH*

Comments

Post a Comment

Popular posts from this blog

☆LUHLULPA☆ - 1 & 2 By Dingdi Pachuau

☆LUHLULPA☆ - 1 By Dingdi Pachuau Ka fanu tui taka a muhìl sâk sâk chu ka thlîr reng a, ani lah chuan hmangaih takin ka thlîr a ni tih hre hauh lo hian kàwi sàwi zeta a teddy bear kuaha mu hian a thaw sâk sâk a, a biang tài deuh têkin a hmêl a han tihțhatzia chuh..ka thlîr ning thei mawlh lo. Mahni rîla rah fate hi chu mi fâte ai chuan kan duatin kan lo hmangaih deuh chu a ni, hmangaihna mita kan thlìr vàng pawh a ni ang chu, mi fate aia an chhiatna kan hriat theih miah loh ni. Rei tâwk fang ka thlìr hnuah chuan kûn hniamin a biang tài têkah chuan ka fawhsak zauh a, thàwm dìm takin room ațang chuan ka chhuak ta țhem țhem a, kawng erawh ka khâr lo. A lo harh veleh min ko leh vak emaw a ni ang a, ka hriat thuai loh chuan a lo țap leh palh thei si a, chuvàngin ka khâr duh lo. Choka zîm zetah chuan lût pheiin kan nufa ei tùr chu siam tùrin ka buatsaih țan ta nghâl a. Kan in chhûngah hian bungraw changkâng tak tak awm lêm lo mah se kan mamawh hi chu a awm kim ve viau, mamawh ...

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

RUATSANGA - 13

RUATSANGA - 13 By Dingdi Pachuau Min fawh kârlakah chuan min duh thu leh duhawm min tih thu a sawi sap sap tih ka hre ruai ruai. Ka thluak a buai a, ka chhia leh țha hriatna a buai vek tawh tlat a ni. Engtin pawh min ti se, hnial thei dinhmunah ka ding tawh lo hrim hrim. Tunah chuan a kuta min chúl mai duhtâwk lovin a hmui,zei zeta min fawhna ngei chuan a kut hnu a chhui ta zai zai mai. Ka nghawngah fâwpin,ka âwmbâwrah a tâwp chat a, ka hnute khuhtu awm tawh hauh lo chu a fawp ta chat mai. Kei lah nuamtiin ka lo er, ka la tawn ngai loh a ni bawk si a,lo dawnsawn dan pawh ka hre chiah lo. A nuam ka tih em avang chuan awmngaihna hre lovin ka lo tâl ve sek a. Fawh mai duhtâwk lo chuan a hmúr chu a'n seh pah nar nar a,a kut lehlamin a fawh loh lam chu a khâl pah bawk a. Awm ngaihna reng ka hre lo, ka lu ka thle tawn chhén mai. Chutah, tâwp thutin, châknaa khat mitmeng sexy zet chuan min melh ta rún a. Hrethiam lo zetin meng dâ vâ riaiin ka melh chho vat bawk a. "D, i d...