☆THE SWEETEST HANDCUFFS☆ - 23 By Dingdi Pachuau

 ☆THE SWEETEST HANDCUFFS☆ - 23 By Dingdi Pachuau

Kimi chhuah hnu chuan kan ngawi dùn vang vang phawt a, be hmasa tùr ka ni tih hriain biak dàn tùr chu ka han ngaihtuah a," I lo kal hlauh chu a tihzia hle mai, hmuh che ka duh țhìn khawp a," ka han ti phawt a, ani chuan," I duh chauh maw? Chuan, min hmu tùrin i rawn kal ta chuang lo va," nui hmel pu deuh chung hian a lo ti a, chhàn mai dàn tùr ka hriat loh avàng chuan ka ngawi rih a.  Amah vêk chuan," Tak tak chuan, eng thilah nge min hmuh i duh ve mial a?" thutak deuh zâwk hian a rawn ti leh a.

"Englo a nia, ka lo sawi tùr chu a awm lo maithei a; mahse, keimah vàng a nih deuh tlat avàngin Arami nèna in chungchâng hi ngaihtuah țha leh la ka tia, a khawngaih--" ka la sawi zawh hma chuan a lo nui hak a," I damloh kha, khatiang lam kha chu i dam chian bal hunah chauh i sawi dâwn nia, tûn hunah hi chuan ka ngaihthlâksak lo mai ang che," a ti a, țawng tuma ka àn zuau lai chuan," Ka puin i damlo tih hi hria se chuan a rawn kan vang vang duh chein ka ring a ni, nang hi chu a tân hian i 'cial' ve tlat si a," a ti ta daih a, chutia a pu a rawn sawi chhuah tâkah chuan mitthlaa a hmêl hmu rauh rauh pah chuan ka nui sak a.

"Nia, min nêlin ka chungah a fel bawk a, kei pawhin ka ngaina riau asin. A dam țha zêl tiraw? Kan inhmu khât leh ta deuh a, dam țha zël turah ka han ngai ngawt a," ka tih chuan,"Aw, dam țha zêl e, a upa ve deuh tawh a, a pangchang deuh țhìn e tih lohah chuan a dam țha e," a lo ti a, a hmêl chu ka en a, a lo nui deuh a ni tih ka hmuh chuan," A àwm ve tho alawm, min duattute bulah hi chuan pangchan hi a nuam ve êm asin," ka ti leh a.

"I pangchang ve ngai em maw ni?" a rawn ti ve thung a, kei chuan," Ngai ve e a, ka nu leh pate bulah chuan 'naute lian' ka ni mai," nui hak hak chung hian ka ti a, a țhen ve sak nain ka thil sawiah chuan ka inthiam lo nghâl zat, a hriatah nu leh pa lam ka han sawi chhuak a nia, ani hi, a nu leh pa bula awm lo a ni tih ka lo theihnghilh chiang lutuk ringawt, a rilru ka tihnat loh hrâm ka beisei.

Kimi rawn lûtin," Ka rei in ti em? Nge, in lo titi nasa viau hman zâwk?" nui chung hian a rawn ti a, kei chuan," I rei lutuk a, kan lo rêl hman țêp che," ka lo ti vat a, a nui var var a," Min lo ngai hman a ni maw? Chuti, thingpui chhuang nghâl mai ang aw?" a ti a, gas ka dahna lam pana a kal chu Zodina chuan," I nula ngawt ang," tiin a lo fiam ve a, kan nui ta dar dar a, ka lu chu la na deuh fek fek mah se an bulah chuan nâ anga lan chu ka tum lêm lo.

Zodina pawh Zodina dik tak a ni bawk a, Kimi titi bawrh bawrh chu a lo zàwm ve zauh zauh a, Jakob-a anga mi bula ti tak hmêl pu leh ngawi deuh rùn ang kha a ni lo. A zaidam a, ka hriat țantirha inthlahrung dûk ang nungchang kha a paih ve deuh tawh bawk a, a hmel hmuh leh a bula awm pawh a nuam tawh; mahse, Kimi'n a biak chânga 'Kob-a' a ti țhìn chu nuam a ti fahran lo tih ka hre thei thung.

Thingpui kan in zawh hnu lamah chuan ka lu nâ pawh chu a reh ve țan ta a, Kimi chuan," Ka lo mangnghilh țêp, committee ka ngai tak!" tiin a tho thut a, chutah," Kal ngei ngei ka ngai, pawisa submit tùr ka nei bawk si. Tluangte, min hre thiam hrâm mai rawh aw," a ti leh a, kei chuan," E, kal rawh, kal rawh, i fel lutuk, kei pawh hei ka zia tawh hi, ka lu pawh a na tawh lo," ka lo ti vat a, Zodina chuan," Ka awm hi, ngaițha tak khân kal rawh," a lo ti ve a, Kimi chuan," Ni e, tirh a ngaihnaah chuan lo tîr dawt dawt mai rawh," nui chung hian a ti a, a chhuak zui nghâl a ni mai.

"Tih tùr pawimawh i nei ve lo maw?" tia ka zawh chuan,"Hei i damlo ka awmpui che alawm," a lo ti mai a, kei chuan," In lamah tih tùr pawimawh i neih chuan inthlahrung lovin haw tawp rawh, ka dam tawh a, awmpui kher ka ngai lo a nia," ka ti leh a, ani lah chuan," I ngai pawh ka ti hran chuang lo, ka awm ve tawp mai," a lo ti leh mai a, haw tum hmël a put loh avàng chuan ka sawi zawm duh ta bîk lo va.

A hnu deuhah chuan hre chhuak thutin," Min biakna kha i delete lo va?" ka ti a, ani chuan hriat thiam loh hmêl tak hian min rawn en a, kei chuan," Kha, in ina zanriah ka ei zàn kha, mut dâwnah min rawn biak kha," ka ti leh a, ani chuan," Chu chu, buaina a awm deuh tihna em ni?" a lo ti vat a, kei chuan," A, awm chuang lo ve, i delete zêlin ka lo ring a," ka ti ta ringawt a.

"Ka delete zêl tawh dâwn lo, ka phone a ni alawm," a tih chuan," Ni tho mai; mahse..." ka lo ti a, ka sawi zawm duh lo, ani lah chuan," Buaina a awm a nih chuan sawi la?" a ti ve leh mauh mai a," Awm hran lo," tiin zahzêlah ka nui sak ringawt a.

A lêng ta reng a. Eirawng bàwl a lo hun pawh chuan," I damlo sia, kan theih loh laiin kan tibuai nasa țhìn che nèn, vawiin tlai chu i chêt ai ka chêtsak ang che, rawng ka bàwl thiamzia pawh i hriat kha," a ti sauh sauh a, ka theihtâwpin ka hnial ve nain a sâwt lêm lo, a thil tih tum chu țhulh a tum hauh lo tih ka hmuh chuan," A, chaw pawh ka ei peih lo ang, bàwl a ngai lo ang," ka ti ta ringawt a, ani lah chuan," Chaw nghei ngawt loh tùr, a țha ngai lo, châk loh pawhin tlêm tal ei tùr," a ti leh tlat a, hnar ngaihna pawh ka hre tawh lo.

A nî a bia a, a biak rual chuan a pu chu be telin," Ka pu, Tluangtei a damlo va, hei eirawng ka bàwlsak dâwn a, ka rawn haw tlai deuh ang aw," a tih ri chu ka hria a, a pu rawn chhànna chu hre thei lo mah ila," A ngaihtuahawm lo ve, lo ngaihtuah suh, a zia viau e, kan tihbuai nasat theih êm avàngin a theih loh lai tal hi chuan buaipui hi a phû a," Zodina'n a tih leh tâkah chuan a pu rawn sawi tùr àwm chu ka hre deuh ruak mai.

Hnial hneh hek lo i, eirawng chu a bâwl ta rak rak a, a inkhâwm thuam nèn a la inthuam ap mai si a, ka inthlahrung ru khawp mai; mahse, ka tirh pawh a ni lo va, bâwl tùrin ka ti hek lo, a thu a nia, a duh leh tibàl rawh se. A rûk chuan ka nuih a za deuh, eirawng báwl ka hmuh tawhah chuan a la smart ber mai àwm e, a pheikhawk lah chu a faiin a tle țha nasa mai si.

"Jakob-a chuan thil sawi a nei leh tawh em? Nge biahthu di hlîr mai a hlàn țhin che?" a rawn tih chuan ka phu zawk a, a pheikhawk char char chu ka lo en niin, a hmel chu ka en hû a, ani lah chuan," Ka pheikhawk chu mawi i ti deuh a ni maw?" a lo la ti zui a, ka zak ve lek lek a ni.

"A fai êm a," tiin ka chhâng ta ringawt a, ani lah chuan," Ka thil zawh che chu?" a rawn ti leh a, kei chuan," A, aw, nei ve tho e, thurûk min hrilh a tiam a; mahse, chu chu a duh ka tihhlawhtlinsak hunah chauh a nia," ka ti a, ngaihven hmèl zet hian min rawn en chiang sauh a," Chu chu eng nge a awmzia? Eng thil nge a duh chu?" ngaihven tih hriat zet hian a rawn ti a.

"Ka hre rih lo, min hrilh lo va."

"Thil țha lo lam a ni thei a ni tih i ngaihtuah em? I tâna thil țha lo leh hlauhawm lam a nih chuan ti hauh suh ang che," a ti ta charh a, kei chuan," Mahse, thurûk min hrilh dâwn alawm, i tâna thil pawimawh tak a ni thei asin," ka lo ti ve thung a.

"Chu pawh ni se, thil țha lo lam a nih dâwn chuan remti suh ang che, ka duh lo, min țanpui i tumna lamah i tân thil țha lo a thleng thei, ka tân thil pawimawh tak a ni chiah ang em tih pawh hriat theih tak tak va ni suh," a ti leh a, a thil sawi chu a tih tak êm avàng leh chiang zeta min en kar reng avàng chuan nuam ka ti lo lek lek.

"Thil țha lo lam a ni bîk nâng, ka tâna țha lo tùr chu a ti duh bîk lo ang," ka tih pawh chuan lu thing nar nar pah chuan," Tunah tak hi chuan ka chanchin ka lo hrilh ta che kha ka inchhîr ta hial mai," a ti sap a, kei chuan," Eng aiah chuan maw? Min rin ngam vàngin ka lo lãwm êm êm a," ka lo ti ve thung a.

"Thil țha lo lamah ka barh luh phah dâwn chein ka hre tlat, pawi ka ti hle mai," a tih chuan," Ni lo, chutiang lam chu a ni lo tawp ang, engkim min hrilha thurûk hial min hrilh hunah chuan i buaina pawh hi a kiang thut maithei asin, a țha lam a nih ring zâwk ang," ka ti ve thung a.

Chaw ei ve nghâl tùr chuan ka sâwm ve nain a haw ta thung a, a inthuamna inthlâka zàna rawn lèn leh a tum a ni. Eirawng pawh a báwl thiamin a siam tui khawp mai, ei ka châk loh tehlul nèn, ka ei ve nual a, a làwmawm khawp mai. Kimi'n a țawkte pickle min rawn suah bawk a, chu pawh chu a tui viau a ni.

Zàn lamah chuan Pu Rovate nupa an rawn lêng ve ta thung a, Zodina pawh a rawn lang har lo. A puin ka ei atân tiin ei tùr eng eng emaw a rawn kentîr nual a, a tihlàwmawm rual rualin a tizahthlâk ka ti, damlo na tak pawh ka ni si lo va, ka inthlahrung ru tlat.

Pu Rovate bulah chuan Zodina chu a țawng tam lo hle a, an biak erawh chuan țha takin a chhâng tho a, a zak deuh em maw ni chu aw ka ti. Inkhâwm bànah Kimi a rawn pêng haw lehnghâl bawk a, thingpui hâng an in leh hnuah Pu Rovate nupa chu an haw a, anni pahnih erawh chu an la țhu thung.

Arini'n min rawn text a, ka damlo chu eng nge ka an tih min rawn zâwt  pah chuan Zodina hnêna ka sawi tawh leh tawh loh chu min rawn zâwt pah a, ka chhâng rih lo, a làwmawm lam ka la hrilh thei dâwn rih si lo va, a thuhrimah, engtin nge maw ka damlo a ni tih pawh chu a lo hriat ni? Kimi hi a zawh chiah ka ring si lo, a hriatna a țha àwm viau a ni, chuti a nih chuan vawiiin chhùn lam khân Zodina a rawn lêng a ni tih pawh a lo hre leh daih tawh ang chu.

An lêng rei vak lo," I men rei chuan i damloh phah leh ang," an ti a, an haw rual a, kei pawh an haw hnu lawkah chuan mu tùrin ka khum chu ka pan a, ka mut tak tak hma chuan damdawi ka ei leh phawt a, ka mu ve ta chauh a. 

Ka damloh chungchâng hi ka nute ka hrilh hauh lo va, an hriat pawh ka duh kher lo. Kâr a hlâ a, min rawn ngaihtuah viau ang tih ka hre ve kar a, an rilru tihhrehawmsak kher kha ka duh lo a ni. Bâkah, khawsik satliah ve mai ka nia, na tak pawh ka ni lo va, chuta kára va hrilh buai kha ka duh lo a ni.

Ka lukham hnuaia ka phone chu a rawn nghawr dat a, ka han en a, Jakob-a number angin save mah ila  Zodina message a ni tih ka hria.

*Ka ngaihtuah ka ngaihtuah hian Jakob-a hi ka thîk ru ta riau mai*  tih tê hi a lo ni a, ka han chhiar chu ka phu zawk thei hial! Ngaihtuah thui chi pawh a nih loh hi, thil ka ngaihtuah chhuak nghâl phut, a delete loh vaih chuan aw, buaina tênau a thleng leh khawp ang le. Ani lah khân delete zêl a tum tawh loh thu kha a sawi ngei bawk si, Jakob-a tihthinrim a tum em maw ni le? Ka chhâng duh lo, a delete àwm si lo va, Jakob-a'n a hmuh vaih chuan Zodina chungah mai ni lo, ka chungah hial a thinrim thei si a, thil pawi zâwk a thleng palh ang.

Ka thaw hawk a, he thil hi a bul ațang khân lo hre lo tawp ila, a rûk hian ka buai ka buai lo tùr hi a ni a; mahse, Zodina'n min hrilh ve miau mai si a, min ring ngam a, min hrilh a, ka țanpui theih a ring a ni a, min ringtu chu ka tibeidawng thei lo ang. Ni e, Jakob-a hian min duhin kei pawhin duh tho mah ila mi harsatna thlentu ka ni thei lo ang, Zodina khân Jakob-a hian min hmuh ațang khân a rawn inlâr zing viau tih a sawi kha a ni a, keimah vàng hi a ni chiah ang em? Beiseina ka lo siamsak lêt vàng  hi a ni thei tak tak ang em? 

Ka hlauhthàwn ang chiahin Jakob-a a rawn lan leh chuan a rawn thinrim nasa mai tih a hmel ațangin ka hria a, zahpah a nei hran tawh si lo. Office-ah, U Ropuia awm laiin min rawn kalchilh riap mai a, min biak a duh thu a rawn sawi chuan thil awm dàn ni àwm chu ka lo hre nghâl ruak a, U Ropuia hnênah chuan ka chhuah lawk tùr thu chu ka han hrilh zauh a, ka chhuak chu  Jakob-a chuan min rawn zui nghâl vut a, hmun danga inbiak ai chuan tiin ka inah ka luhpui a, a hlauhawm kher asin. Ka chungah mawi lo taka a chêt duh chu ka ring lo; mahse, thil pawi a ti ang a, mi dangte hriatah a thinrimna chu tilang chhuakin Zodina thurûk chu a phawrh lang vek ang tih ka hlau ngawih ngawih thung, Zodina tân thil pawi tak a ni ngei dâwn si a, mi â a an ngaih loh vêk pawhin chiang lo taah an ngai vek ngei ang.

Zaidam takin thil awmzia chu ka hrilh fiah a, thinrim taka a țawng pawh chuan thinrim awka ka chhuah ve lo, Zodina a huatzia chu namai lo tak a ni. 

"Ngawi tak rawh, a bialnu chungah khân phubâ ka'n la ve ang e, thil hre thiam duh lo rêng rêng mai, tu nge tuar zâwk chu kan hre mai ang," a ti nghut nghut a, ka han en țhìn, a thinrim êm êm mai si a, he a taksa leh a hmêlhmai zawng zawng hi a huat êm êm Zodina tho kha a ni si a, thil mak tak hi chu a ni ve a ni.

"Eng thil pawi mah i ti lo ang tih min tiam thei ang em? Mawh...? A chungah rilru danglam deuh ka pu chuang bawk si lo," ti zâwngin ka thlêm a, ani lah chuan," Ngaihzâwng melha a melh che hi ka duh lo a ni tawp mai, nang duhna thinlung hi a nei tùr a ni lo," a ti ve thung a, sawi tùr chin pawh hriat thiam a har, Zodina ka țan deuh a nih chuan a thinrim a zual sauh emaw a ni ang a, țawngkam hman fîmkhur a ngai a ni tawp mai.

"A be leh tawh tùr che a ni lo," tiin a phone chu chhuatah chuan a han vawm țhuai a, ka phu zawk nghe nghe! A phone chu a darh hneh nasa, a vawm na ve êm bawk a ni. A chal chu dawmin," A phû tâwk chiah a ni!" a ti zui a, kei pawhin ka hlau ru khawp mai, heti khawp hian a thin a rim a ni si a, han khap daih dàn tùr ka hre tawh hlawl lo.

"Lo kal teh."

Hlau deuh hlek chung chuan ka en ràn a, ka pan chuang lo. Ani chu a thaw hawk a, min rawn pan hnai hrut hrut a, min rawn kuah a, ka lo țang deuh țùng a ni tih a hriat chuan za lo tih hriat tak hian a nui hawk a," I chungah chuan ka thin a rim ve miah lo a nia, ka tihlau viau che a nih chuan pawi ka ti," a ti leh sup a, min kuah ta hlù hlú a. Tlêm chuan ka inthlahdul thei ta deuh; mahse, ka la hlau ru deuh tho.

Chutiang boruak teh nuai kârah chuan Arini chuan min rawn text ve reng a, Zodina aia Jakob-a ka hmuh tam zâwk rih avàng chuan Zodina biak chianna hun ka nei thei meuh si lo, phone-ah lah ka be thei bawk si lo va, a buaithlâk khawp mai, hun ka neih theih rih loh thu ka hrilh ringawt mai zêl a, a rûk tak chuan hrehawm ka ti, Jakob-a lo lêng hi a lo hmuh ve țhin phei chuan dáwt ka hrilhah a ngai ngei àwm si a.

Ka dam chho a; mahse, kan boruak chuan min tichau a, chaw pawh ka ei tui hlei thei lo. Zodina eirawng bàwl kha ka hre chhuak zauh zauh a, chaw ka ei châk loh châng phei chuan ka mitthlaah ka hmu ziah a, a siam ang khân ka siam thiam ve si lo, lo lêng se ka ti ru țhin. Lo lêng se, ka dam chiang tawh bawk a, buaina hi ka ching fel vek thei lo a nih pawhin Arini buaina tal hi chin fel ka duh, min ring a, min zâwt ve nasa bawk si.

*******

"Nurse, vawiin chu kan huanah leh luiah kal tawh ila? I office nî a nih chuan loh hi."

Vâlpuia ka hmuh chuan ka nuih var var a, thil ka ngaihtuah chhuak thut a," Chaw in ei tawh em ni?" ka ti ta vat a, ani chuan," Aw, kan ei kham deuh chiah a," a lo ti ve mai bawk a, ka insûk ka zâr zawh chuan," Aw le, kei pawh ka ei tawh a, han insiam ila, kal ila ni mai alawm," ka ti ta thën a, hlim hmêl taka nui chung chuan," Aw, ka haw ang a, ka rawn sâwm ang che aw, ka rei lo ang," a ti a, a hmel pawisawi lo zet chu a hlim tih a hriat kher mai.

Ni e, min sàwmna a rei ve tawh a, a zahawm ve tawh, a hlimna han siamsak ila, chutih rualin ani hi zawng a rilru a thianghlim a, thil ho têah pawh a hlimin a lãwm thei a, kawm hlim pahin thil tam tak ka zâwt pah thei ngei ang.

Zawhna hrang hrang ka ngaihtuahnaah a lo lût zut zut a, eng lam nge zâwt hmasa ber ila țha ang tihte ka ngaihtuah kual a, a hun lo thleng phawt se, zawh dàn tùr chu a inpha man chho ve mai ang chu maw.

Miin min lo hmuh dun lam pawh ka ngaihtuah peih tawh lo, a duhna hi tihhlawhtlinsak ila, ka thil hriat duh hi hriat thuai thuai ka duh tawh. Jakob-a lah hian thurûk a tih kha min la hrilh har hmel si a, Vâlpuia ațang hian eng thil emaw tal ka hre chhuak hma thei zâwk ang.

Huan a sawiah chuan kan kal ta ngei a, hei hi Zodinate huan a ni ngei ang, huan puitling tak a ni, hmuh pawh a nuamin a hmuhnawm viau bawk. Thlâm pawh ka hmu a, mi hmuh ka inrin tehlul nen, tu mah ka hmu miah lo thung.

"Huan chu in nei nuam hle mai, a zau bawk si," ka tih chuan a nui var var a," Tak tak maw? Kei pawhin nuam ka ti alawm, nuam ka tih avàng hian ni tin ka kal țhìn bawk a, in lamah tih tùr țûl tak a awm a nih loh chuan," tiin min lo chhâng a. Ka han hawi vël a, a hmun a remchângin a âwih hran bawk si lo va, Vâlpuia'n nuam a ti viau pawh hi ka hre thiam khawp mai.

"I vànnei bîk e, hetianga huan nuam hi in nei bîk a nia," ka tih chuan," Nia, U Jakob-a min hrilh a nia, min hrilh lo se chuan kei pawhin ka hre bîk lo ang," a rawn ti a, makti zet hian ka en ta hau mai! 'U Jakob-a' a tih chu ka hriat Jakob-a hi a ni thei ang em? Engtin nge a hriat? Engtin nge an inhriat ni ang? Ka rilruah zawhna a rawn inlâr zut zut mai.

*CHAPONA HI A MAK KHAWP A, MI DANG PÊK NGHÂKA A TLACHAWPA NUNG ȚÂWK ȚÂWK, MI RETHEI BERTE PAWH HIAN CHAPO HUN HI KAN NEI VEK ASIN!*