☆THE SWEETEST HANDCUFFS☆ - 24 By Dingdi Pachuau

 ☆THE SWEETEST HANDCUFFS☆ - 24 By Dingdi Pachuau

"A ni maw?! U Jakob-a chu tu nge ni a? Kan khuaah hian a awm ve em?" tiin ka han zâwt a, ani chuan," Aih, awm ve lo ve, a awm ve lo," tiin min lo chhâng a, chutah, kan thlang deuha lui chu kâwkin," Luiah khuan kan kal nghâl mai dâwn em ni ang? Khua a lum bawk sia, tui dài a nuam ngawt ang," a tih zawm zat a, a hmêl chu ka han en a, kal a châk tawh tih a lang reng si a, zawhna han zawh chhunzawm zël pawh châk viau mah ila a duhna lam chu tihpuitlinsak rih a ngai.

Luia a chevêl chu ka thlîr reng a, a rilru chu Vâlpuia ni mah se, a taksa pianhmang leh pâwn lam lan dàn chu Zodina a ni a, a țawng loh phei chuan tu pawhin hmu se 'Zodina a ni' an ti vek ang, âwih har hi chu ka ti ve ţhìn alawm; mahse, a taka tawngtu ka ni miau mai si a, âwih loh ringawt theih pawh a ni lo.

Khua a lum bawk a, lui tui vâwt raiha ke han chiah vang vang chu a nuam sawng sawng khawp mai, ka han bêng per chhak chhak a, Vâlpuia'n chutianga ka ti a hmuh chuan a lo nui hak hak a. Kan kalna hi lui lian tia sawi tùr chu a ni hauh lo, fùrah erawh chuan a lian ve fú țhìn a nih hmël, a kuang a zau tlat. Saisih lui kha a ni em aw? A mawng lam a ni thei mai lo'ng maw?

"Vâlpui, hei hi Saisih lui a ni em?" tia ka han zawh chuan," Aw, kan chhak deuh lawkah khian Chawltui luiin a rawn fin ve a, fùr lai chuan a lian ve thei teh asin; mahse, ka hlau ngai chuang lo, tui hi ka ngaina a, chèn pawh hi ka têt tê ațanga ka thiam a nia," a ti barh barh a, zawhna dang zawh belh hun tak nia ka hriat avàng chuan," A nih tak chu, tui chèn thiam hi ka ngaisâng thei teh asin, ka thiam loh vàng hi a nih ka ring

 A nih leh, i têt lai chuan khawi luiah nge i chèn țhin a? Hetah hian em ni?" tiin ka zâwt zui zat a.

"Ni nâng, kan khuaah lui lian ve tâwk tak a awm a, tah chuan kan chêng țhìn, Lungchhuan lui an tia, hmânah chuan lung lian pui pui a inchherchhuan nasa țhìn a ni àwm e; mahse, tûn hnuah erawh chuan hmuh tùr a awm tawh lo, hêng lai lui hi chu chènna tham pawh a ni lo," tiin a han nui a," Nurse, kan khuaah chuan lo la zin ve ta che, a nuam asin," a ti leh sârh sârh a.

"In khua chu khawiah nge a awm? Eng nge a hming?" ka tih chuan," Sâwtah, a hla lutuk, i la kal lo ang, U Jakob-a erawh chu a rawn kal tawh a," a lo ti leh mai a, Jakob-a nèn an inhriat dàn, an inlaichìn dàn tak hi ka hre châk.

"U Jakob-a nèn chuan engtin nge in inhriat a?" tia ka zawh leh chuan," Kan khuaah a rawn kal ka tih tawh kha, U Jakob-a chu, nang pawh hian i hmu tawh lo maw? I chanchin hi a sawi tawh tlatin ka hria!" a rawn ti ta mai! Makti zet hian ka en vat a, ani pawh chuan min rawn en ve reng a, chutah," Ngawi teh, nang chu nurse i nia, U Jakob-a sawi kha chu i ni lo ang, nurse chungchâng a sawi ngai lo leh si, a bialnu a sawi kha chu nurse a ni lo, i ngaih tițha lo duh miah suh," nui chung hian a ti leh a, tui chu a'n bêng per ve chhak a," Thei i ei châk em? Theihai rah lawh tùr a tam viau asin, a hmin pawh a awm nual tawh ang," a ti leh ta daih a.

"A tui ngawt ang!" ka lo ti ve a, dingin a han hawi kual a," Kei chu ka ei nasa țhin a maw, ka ei chãk vak lo, i tâ tur kan lo țeuh dâwn nia," tiin min rawn en a, nui chung hian," I ei nasa lutuk ang a, i pum lam a ngaihtuahawm ang tih chu a hlauhawm angreng," a han ti leh a, kei chuan," Nurse ka nia, damdawi ka ei mai dâwn alawm," nui chung vêk hian ka lo ti ti ve a, ani pawh chuan," Ni dâwn tak! Ka va mãwl tak êm! Nurse hi chu an ngaihtuahawm ngai loh tih kha ka hre ve reng țhin sia, ka lo theihnghilh zawk a ni, nurse hi ka ngaisâng țhin a, nang pawh hi ka ngaisang teh che a nia," thutak zet hian a ti leh a, hetiang thu min hrilhtu hi Vâlpuia chu ni lo se chuan zakin ka sen awp awp ngeiin ka ring; mahse, ani hi chu, Amah a ni tlat.

"Ka lãwm e."

Nilêng deuhthaw chuan huanah chuan kan awm a, theihai kan lawh nual bâkah chawhmeh kan la nual bawk a, lui kam vêla chakawk chu min vehsak bâkah tumbu a khawrh a, min pe nual bawk. "I lo kal manah i hàwn hrim hrim tùr a ni," tiin thlâma lèn an dah chuan an dîla sangha sen chi chu a man a, ka hnial lui chungin lian tâwk tak hi min pe leh tlat a," Nangmah chauh i nia, i kham ang chu tiraw? Kan kal leh hunah kan la man leh dâwn nia," a ti a, kei chuan," Vâlpui, ka lãwm lutuk a nia aw, a tui ngawt ang! Vawiin chu chawhmeh leh thei ei tùr i zârah liau liau  ka va hàwn hnem dâwn tak!" ka lo ti vat a.

Vawiin chu ka hlâwk tak zet a ni. A chanchin ka hriat belh nual bawk si a, a táwk teu teuh viau, vawi khata tam tak hriat ai chuan a țha zâwk, hun kan la nei ang a, ka la zâwt leh mai dâwn a ni.

Zàn lamah erawh ka rawl ta viau mai a, inkhâwm pawh chu ka peih lo lek lek mai; mahse, ka inkhâwm lui ta tho a, a tûka ka tho chhuak phei chu rawl tak hi ka ni; mahse, ka rilru a hlim tho, Vâlpuia bula ka kal kha ka inchhîr hauh lo.

Arini'n hmaichhanah Zodina ka biak tawh leh biak tawh loh chu min han zâwt leh a, buaithlãk hi ka ti. Zodina ka biak chhunah ve lah khân min chhâng țha duh lo a nih kha, ka dinhmun a tilaklawh tlat, remchâng hmasa berah tihtak zeta zawh a ngai a ni. Arini bulah pawh chuan hun remchâng ka hmuh fuh zân loh thu ka sawi ta ringawt nghe nghe a, ani lah chuan," Nimin lamah khân an huan lamah in kal niin ka lo hria a," a la ti zui, a buaithlâk asin, a bulah hian Zodina ni lovin Vâlpuia nèn zâwk kan kal dun thu hrilh ta ila engtin nge a ngaih ang? Eng mah hi a hre ve bawk si lo va, hrilh chi lah chu a ni bawk si lo, ka rilru hi a va tibuai tak!

"Tluangte, nangmahah chauh ka innghat ka tih kha aw, min sawi felsak theih ringin beiseina sâng tak nèn ka lo nghâk reng ang che, ka ring che a nia," a han tih leh phei chuan Zodina chu hmuh thuai thuaia sawi fel thuai thuai ka châk tak zet a ni, a sawi ţhat duh loh hlauh teh chuan aw... amah vànga ka buaizia leh rilru hrehawmna ka tawn nasatzia hi, ka hmuh leha ka zawh leh hunah chuan min chhâng țha viau tùr hi a ni ringawt mai!

Zàn inkhâwm bàna Amos-ate țhianho an rawn luh chuan," In va zahawm khup khup ve! In lo lêng duh ta lo va, min do ta a nih hi ka lo ti mai asin," tiin ka lo chhàwn vat a, țhutna ka kawh hmuh nghál a, țhut pah chuan Amos-a chuan," A khai, hlauh kan nei pawh a ni maithei a," min rawn melh ralh pah chuan awmze nei tak hian a ti a, kei chuan," A ni maw? Tu nge i hlauh a? In nu kha maw?! A mak, i pà ve viau emaw ka ti, țawngka chauhin a lo ni maw?" ka lo ti thung a, ka dang duh bîk miah lo.

Nunmawia leh Remsiama nuih a lo za nasa mai a, Amos-a'n an nui a hmuh chuan," Teuh lo mai! Hmeichhe hlau rual ka nih tawh loh hi, nangni kha, nangni angin bialnute ka hlau ve lo aw," a han ti leh a, anni lah chu an nuih a za sauh emaw tih tùrin an han nui leh tlat tlat a, Amos-a vêk chuan," In duh tâwkin han nui teh u. Tluangte, thingpui han lumsan daih rawh, keimah chauh min han pe bawk la?" a ti leh a, a hnu deuha an nuihza zualpui a reh hnu chuan Nunmawia chuan," Tluangtei chu i va ngam lo ta êm! Khatiang a nih phei chuan tu emaw pawh i ngam lo dâwn tih a lang sa reng mai," nui hmël pu chung chuan a han ti a, Amos-a chuan," Hmeichhia zawng, kan ngam sa reng a, an làwmah, kan ngam lo der mai mai alawm, fin hi a ngai ve a; mahse, nang anga zui duan duan erawh ka tlin ve lo," a han ti leh sak a, Remsiama lo inrawlh vatin," A zui ngai em maw ni? Nimin pawh khân a zui lêm lo, a ûm ni zãwkin ka hria," a lo ti ve a, Amos-a chuan," Ni ang chu, tenawm lutuk, a zui duan duan loh leh a ûm a," tiin a han chek tlak tak zui a, a hmêl hmuh bawk chuan a nuih loh theih loh, anmahni chu an insawisa kual a, ka lo rawl sa bawk nèn, ka nui lo thei si lo va, ka nui zo chiah tihah nâ tiin ka țhen leh sak sak țhin.

Zodina aiin Jakob-a ka hmu hmasa leh ta zâwk a, Vâlpuia thil sawi kha ka ngaihtuah chhuak rauh rauh a, ani pawh hian Vãlpuia kha a hre ve ngei ang, ka zâwt chawt mai dâwn em ni ang? Mahse, lo hre lo ta se, mipa hming a ni sia, a lo thîk leh mai  lo'ng maw? Buaina tenau ka siam chhuak leh ringawt mai zâwk ang em?

"Ka duh chu engtikah nge min tihhlawhtlinsak theih ang aw?" a rawn tih chuan," Eng thil nge tih ka hriat phawt loh chuan," ka lo ti thung a, ani chuan," Thil țha deuh maw le," nui suk chung hian a ti leh mai a. Nui hmêl pu duh hauh leh rilru tikhauh lui chungin," Thil țha lo lam kha chu ngaihtuah chhin hauh suh, ka tihlawhtling chuang hauh lo ang," ka lo ti leh a.

"Engati nge thil țha lo lam ni tùra i ngaih tlat a?" a rawn tih chuan," A țhat loh duh hmel êm alawm," ka lo ti ve thung a, a nui hawk a," Mi sual tak hmuhin min hmu a ni maw? Ka sual lo ka tih tawh kha, ka rilru pawh a chhe lo," a ti leh a, chutah," Rilru chhia puin mi sual ni ila chuan, mi țanpui duhna rilru pawh ka pu nâng, nang pawh ka lakah i la him pial hi maw," a ti leh a.

A ti dik ve leh tho mai. Min bialnu en êm êm a, a țha lo zâwnga min khawih hi chu a la tum miah lo, vawi khat chu min fâwp tawh a, chutiang bâka hmasâwn chu a la tum hauh lo. Ni e, ka lo ngai sual deuh a ni maithei, a thil duh chu thil ho deuh pawh a lo ni maithei asin... mahse, ka ring chiah lo deuh.

"Vâlpuia i hria em?" 

Ka rin ang ngeiin, min rawn en nghâl vut a, ngawi rengin mit pawh khap eih lo chuan min rawn en a, ka zâwt sual ta ngeiah ka inngai.

"Mipa dang hming hi i kâ ațanga chhuak lo tùr leh ka hriata sawi lo tùrin ka duh che!" a rawn ti ta chiah a, chutah, mit khap zauh pah hian," Kha pa kha i hmu țhìn em ni? Eng mah a hre lo, thil sawi a neih pawhin âwih suh ang che. Chuan, ka hriatah mipa dang hming sawi chhuak tawh lo la ka ti khawp mai," muangchâng, fiah zet si hian a ti kalh kalh a, a hmêl pawh a lang chang deuh a, a lang hlauhawm lek lek bawk.

Phone a vawm chhiat daih avàng khân Zodina biakpawhna tùr ka hre tawh lo va, amah lah hi rawn lèn a tum loh hmel bawk si a, Arini thil min chah kha tihfel thuai thuai ka duh, remchâng hmasa berah ka lènchilh mai ang, naktûk chawhnu hian va kal ta mai ila, inah a lo awm kher ang em? A lo awm loh chuan, kal man a awm àwm lo; mahse, a pu kan angin ka kal thei tho a, a lo awm fuh hlauh chuan a vànneihthlâk a ni mai.

Ngaihtuah chhuak țha inti tak chuan ka bu nghat a, ngaihțha tak chungin ring vak lo hian '10,000 reasons' tih hla chu ka sa rât rât a, ka sa tui dâwn chauh tihah chuan kawngkhàr a rawn ri karh karh a, ka zai tàwp chat a, ka zai ri kha a hre ngei ngei ang a, thiam lo chu min ti ve ngawt ang chu!

Ka rin loh deuhin Zodina a lo ni a! Ka zak ru khawp mai a; mahse, zak anga awm duh lovin," Teh tlat che chuan, mi chhe ngaihtuah chu koh aiin a lo hnai a nih chiah hi," ka lo ti a, a țhut hnu chuan," Chu, mi chhia hi min lo ngaihtuah ve a ni maw? A va làwmawm ve!" a lo ti thung a, kei chuan," Naktûka rawn lèna rawn hmuh che ka tum a, ka lo ngaihtuah lai tak che a nia. Rawn be lâwk tùr chein phone lah i nei tawh mang si lo va," ka ti leh a, chumi ka sawi lai chuan tlêmin ka inthiam lo ru deuh ngawt a; mahse, chutiang rilru chu ka paih bo leh vat a, a thiam loh hi alawm, engah nge min biakna kha a delete loh vei ni.

Thingpui ka thlit lai chuan,"Chuti chu, ka haw leh mai dâwn em ni ang?" a rawn ti a," Engah ngawt maw?" ngaihtuah chiang lo zet hian ka lo ti thung a, ani chuan,"Rawn lèn loh phah nân i hman tâkah ka ti, naktûkah chuan rawn lêng tho ang che," a rawn ti leh a, thingpui no chu chawiin ka pe nghâl a.

"Ka dam țhat huna sawiah khân i ti a, tunah chuan ka dam țha tawh bawk a, Arini nèn in chungchâng kha sawi chiang tawh ang," ka ti nghâl a, amah hmachhawn zâwng lo deuh hlek chuan țhuthmun ka rem ve zui ta nghâl a. Ani chuan," Engati nge chu chu i lo vei ve êm êm a?" a rawn ti ve ta thung a, ka hmui chu ka liak hun tê tê phawt a," In ințhen chhanah khân min sawi duh lo mah la, ka inthiam thei lo alawm, Arini hmuh te hi hrehawm ka ti a, ka dinhmun tùr hi ngaihtuah ve ta che," ka ti chhuak ta a, ka rilru dik tak a ni ve a, ka zah duh bîk lo, bâkah, ka nël ve tawh a, thil hi hre thiam se ka ti a ni. Ințhen lo se chuan heti chiam hian ka buai dâwn lo va, inkhâwm lah ka hreh phah titih tawh a, phone khawih pawh nuam ka ti lo, Arini message a lo awm ziah a.

"Nangmah vàng a ni lo ka tih tawh kha, khami kawngah kha chuan hrehawm ti duh miah suh," a tih chuan," Chutiang a ni ringawt thei lo, lo awm lo ila chuan in ințhen kher nâng, a bul tumtu ka ni ka ti lo thei lo," ka lo ti leh a, a ngawi vang vang a, kei pawh chuan sawi leh mai tùr ka hre rih lo. 

"Kan inkawp tluan chuang lo ang, mipa hian tawrh theih chin leh dawh theih chin kan nei ve a, chu chu a tàwp a nih chuan a tàwp vek a ni mai, chuti chuan, i hre thiam tawh em? I tel ve miah lohnaah inthiam lo tawh suh ang che," a rawn ti chhuak ta kalh kalh a, sawi tùr hre lo chuan ka en reng ringawt a, ka hmui chu ka pet ka pet ringawt a, ka ngawih reng avàng chuan amah vêk chuan," Sawi vek lo mai ang. Eng nge, thu thar i hre leh tawh em? Min han hrilh ve la,  nge, hrilh phal loh ka ni zâwk?" tiin thil dang daih chu a rawn sawi chhuak ta a.

"I fing, thil dang rawn sawi chhuak daih suh," ka lo ti thung a, ka rin loh deuhin a rawn nui hak a," Sawi tùr a la awm em ni? A tàwp vek tawh lo em ni a? A thuhrimah, engati nge ani nena kan inkawp leh chu i duh êm êm a? Min han hrilh teh, kan inkawp leh chhan tùr chu?" a rawn ti ve ta thung a, a thil min rawn zawh chuan min tidang titih a, chhàn nghâl mai dàn tùr hre lo chuan ka han nè nè kual phawt a, chutah,"A duh êm che a, i tikhawngaihthlâk alawm," tiin hnu ka khâr ta ringawt a.

"Mi khawngaihna ngah tak i ni," a han ti phawt a, hnial tuma ka àn zuau lai chuan," Chiang takin ka sawi ang, mipa hian dawh theih chin kan nei ka tih tawh kha, ka duh loh dànin vawi thum min țawng khum tawh a, ka tlâwm viau, tlàwm nawn leh ka tum tawh lo," a ti charh charh a, chutah," Nang vànga ințhen kan ni lo, sawi nawn ka duh tawh lo a nia,  chuan, min sawipui tawh loh ka beisei bawk," a ti leh ta kalh kalh a, sawi tùr a vâng duh khawp mai a, ka zak chem chem ni maiin ka hria.

A hnu daihah Kimi hnën ațangin Arini'n Zodina a țawng khum dàn nia an sawi, an ințhen chhan nia an rin chu ka hre ta a. Mi sawi dàn a hriat ve tho a ni a, a sawi dàn chuan," Arini hian a duh luatah duh dàn tâwk a thiam lo va, a țhen phah ta a nih àwm hi. Kob-a chu i hriat kha, a pa pastor a ni a; mahse, a châng hi chuan pastor fapa chêt ni lova chêt ve châng a nei tho a, pastor fapa a nih vàng ngawtin thil tisual ve thei lo leh thlèmna tâwk thei lova tlu ve thei lovah ngaih loh tùr a ni; mahse, chu chu Arini hian a nu leh pa bul lova a awm hi a pu duat sualah ngaiin hmusit tak leh mei nei takin a țawng khum ta a ni àwm a, Zodina hian a hre lo der a ni ang, an inkawp chhunzawm tho a; mahse, tûn hnaiah hian eng emaw chungchângah chutiang lam thil bawk chuan a țawng khum leh ni àwm tak a ni. Arini chu fel viau mah se, a duh lohna lamah chuan a nasa ve ka tih tawh kha, Kob-a tân chuan na tak tùr a ni, a bialnu ngei maiin hmusit takin a țawng khum tihna a nia, mipa tân phei chuan a tlàwmthlâk zual ngawt ang," a ti a ni. A țawng khumna țawngkam tak sawi kher lo mah se Zodina sawi kha ka hre chhuak uar uar a, ka tân chuan lo inrawlhna chi a ni tawh lo tih ka hre chiang ta ngang mai. 

Arini bulah pawh chuan thil awmzia chu pehhêl angreng takin ka hrilh a, hrehawm ka ti ruin amah pawh chu ka lainat angreng, rilru na tak leh hrehawm ti taka a awm ka rin tehlul nèn," A tìr ațanga ka rin dàn sa a ni, kan inkâr tikhawlotu i nih avàngin nangmahah hian beiseina ka nei lo hrim hrim, hlim taka awm chu inring suh, ka tichhe vek ang che u, in inkawp rem chuang lo ang, ka bialpa min chhuhtu hi eng mah ti lova ka en liam mai mai che chu ring hauh suh, lo inring ang che," tiin thinrim takin min kalsan zui ta nghawng nghawng a, a ngaihna hre lovin ka en zui reng ringawt, chutianga min țawng khum chu ka ring pha hauh lo asin, theihtâwp chhuahin Zodina bulah pawh ka han sawipui ve kha a nia, ka tihngaihna hre lo lutuk chu ka nui ta hawk ringawt a, a hnuah erawh chuan ka inkhawngaih ta zâwk! Àn khum mai mai tùrin ka lo phar buai ve viau chu a ni sia.

Kimi'n," Vawiina kan hnatlâng chu i chanchin hi min zâwt leh nawlh țhìn a, sawi dawt ngam chiah lo hian ka rin loh deuh deuhin Kob-a nèn in inzui leh zui loh min zâwt a, mak ka ti angreng khawp a," a tih chuan Arini ka rilruah a rawn lang nghâl zawk a, a awm mai mai lo tawp tih ka hre nghâl bawk.

Ka nui ringawt a, sawipui chiam pawh ka duh chuang lo. Arini rilru nâin heti zâwng hian hna a thawk ve a ni mai, thu lawilo chu duh leh, lo theh darh chiam mai teh se, thu dik a nih chuan loh chuan.

"A lo lèn ve zauh avànga inkawpa ngaih ringawt chu a fuh bîk chiah lo, mi dang inlêng pawh i nei tho a," a tih leh chuan," An duh duhin lo ngai mai mai teh se, ka luck hmel deuh tihna a ni mai," nui chung hian ka lo ti thung a, nuam chu ti vak lo mah ila tihngaihna awm hek lo le, hetiang lam thil hi sawi nuam kan tih chi a ni si a, bâkah, khaw chhûng mi tak tak ka ni bawk si lo nèn, sawi chu ka nuam khawp ang le, Arini țantu lam tân lah Zodina nèn an ințhen lai ni nèn, an ințhen chhanah min han puh bawk ang a...

Fùr hunpui a rawn inher chho leh tawh a, ruah pawh a rawn sûr zing leh ta. Mi min sawina pawh chu kei ngei pawhin ka hre ve ta a, hrehawm ti ru viau mah ila ka tih tùr țhulh phah ka tum lo va, inkhâwm pawh ka țhulh phah chuang lo. Arini bâkah a nu hmêl hmuh pawh a nuam lo khawp mai a; mahse, ka hmuh châng pawhin ka hmu lo der tawp mai țhin. Anni min țawng khumna chu hre lo mah ila hmuh fuh chânga ei lo leh ngei hmel taka min melh țhinna chu ka hmu lo thei bîk si lo va, a rûk tak chuan hrehawm ka ti ve tho; mahse, hêng thil hi Zodina vàngin ka tuar chhuak thei ngei ang, thu dik an hriat loh vàng mai mai a ni tiin ka inhnèm țhin.

Vâlpuia ka hmuh leh hmasakna berah chuan zawhna ka zawh duh êm êm," U Jakob-a chuan engtin nge huan chungchâng kha a hrilh che? Engtin nge a hriat le?" tiin ka zâwt ta a, ani chuan," Nurse, eng mah ka sawi thei tawh lo, U Jakob-a chungchâng chu min zâwt tawh lo hrâm rawh aw, min hria tih a hria a, a thin a rim lutuk  a," tiin inthlahrung deuh tak hian min en a, a hmêl pawh a phâ deuh dai a, hrehawm ti hmêl a pu bawk. 

"U Jakob-a chu a hlauhawm viau a ni maw? A thu i âwih bawk sia," ka tih leh chuan," Aw, hlauhawm e, engkim a tichhe vek thei alawm, a chak a, a huai a, a fel a, a duhnaah chuan a sual thei viau bawk, a thin a rim chuan engkim a tibuai vek mai ang," a ti leh roh a, ka en vang vang a, zawh zui zêl duh viau mah ila a duhna chu ka zahsak a ngai ka ti ve tlat.

*MI DANG CHANCHIN ȚHA LO LAI KHA THUP BOSAKIN AN CHANCHIN ȚHA LAI CHAUH SAWI CHHUAH CHÎNG LA, CHUTIN MI DANG PAWHIN I CHANCHIN ȚHA LAI CHU AN RAWN SAWI VE DÂWN NIA, THIL ȚHA HI CHU MI TIH TÙRAH DAH NGAWT LOVIN BUL ȚANTU NI THEI ȚHEUH BAWK ILA...*