☆THE SWEETEST HANDCUFFS☆ - 25 By Dingdi Pachuau

 ☆THE SWEETEST HANDCUFFS☆ - 25 By Dingdi Pachuau

Vâlpuia hnên ațang chuan Jakob-a chanchin leh an inhriat chhoh kual vêl dàn leh he lai thleng thlenga an inbêngberek kual chhoh vêl dàn chu ka hre thei ta lo chu a nia; mahse, a pawi lo, amah Jakob-a hian min la hrilh tho ang, Vâlpuia chanchin min hrilh loh pawhin a thurûk kha min hrilh tho ang a, chu chu a pawimawh berin ka ring bawk. Vâlpuia hi chu a rawn lan chângin ka kàwm zêl tho ang a, Jakob-a chanchin ka zawh theih loh pawhin a chanchin ka zâwt ang a, chuta țang chuan eng emaw thil pawimawh hriat chhuah theih tùr pawh ka nei maithei asin.

Ruah a sùr hi chuan ka thinlung hi a zîng țhìn, thuamhnaw sûk ro har vàng hi a ni pakhat a, ruah a sùr chânga han zàr maina tùr hulhliap ka nei zîm si a, bâkah, in leh a vêl hnâwng chuap reng mai hi hrehawm ka ti țhìn a ni. 

Amos-ate țhianho hi an fel ka ti, min kàwm hlim tùr hian an rawn lêng ve peih reng a, rawn lèn an tum tawh hi chuan ruah pawh hi sûr eng ang mah se, nihliap nèn an rawn kal țàng țáng mai a, an fakawm thlâwt ka ti a ni. Chhùnah lo lamah hlo thlo hah mah se, an tum tawh chuan rawn lèn hi chu an țhulh phah chuang lo, min ngaina der ve êm mai a, ka tân lah ka hriat hmasak ber berte an ni bawk nèn, an bulah hi chuan ka thlâ hi a muangin kei pawhin ka ngaina ve êm êm a ni.

Zàn khat chu amah chauhin Amos-a chu a rawn lang nawlh mai a, a lo lût chu a hnung lam ka lo thlêk zui deuh nain tu mahin an rawn zui miah lo, ani pawh chuan ka chezia chu a lo hre thiam ve chiang," Zanin chu keimah chauhin ka nia, Remsiama Lungleiah a riak a, Nunmawia erawh an nute in lamah a kal leh ta duan duan a nih kha," a'n ti deuh kher a, nui chung hian," I sawi dàn chu a pian nèn a inhmeh tawp maw le," ka lo ti a, ani pawh chu a nui ve sûng a.

Thingpui ka pêk hnu chuan eng eng emaw kan sawi a, fiamthu pah deuh hian a bialnu chungchângte chu ka zâwt chhin a, ani pawh chuan zêp nei lêm lo chuan min hrilh ve mai bawk a, thu dik min hrilh chiah em tih phei chu ka hre lëm hlei lo va.

"Arini țawng kual vêl hi chu mênah thlâk tum la, a țha ber ka ti. Farnu hrilh takin ka hrilh che a nih chu, ka farnu chu ni chuang lo mah la," tiin thutak hmêl zet hian min rawn en a, kei pawhin chutiang a rawn sawi chhuah thut avànga mak tih vàngin ka lo en vat nghe nghe a. Sawi zawm lehin," Nula leh tlangvâl nih chuan duh zâwngte kan lo nei ve a, kan inkawp a, a hnuah eng eng emaw vàngin kan ințhen a, kan induh leh chuan kan inkawp ve leh mai țhìn a ni ngai a, insawichhiat kual vêl chiam pawh a ngai lo. Arini hi chu a ti mah mah a ni,  Kob-a'n a duh zâwk che nia a hriat chuan, Kob-a a duh tak tak a nih bawk chuan țan lâk phah nân hman zâwk lel tùr hi a nia, chutiang pawh ni si lo, a mize dik tak a rawn phawrh chhuakah ka ngai hmiah mai. Thu dik leh dik lo pawh a thliar thiam tawh lo nge, a duh duh a sawi ni maiin ka hria, hmaichhanah a lo hrilh hre ve che a nih pawhin khing duh miah suh, amah ang i lo ni ve palh hlauh ang e," a ti leh barh barh a.

"Nia... A, a rilru a hrehawm ve rih a nih hi, chutiangah chuan ka ngaihsak tawp mai, nakinah, hun a kal deuh hnuah chuan a fel vek mai ang," nui deuh chung hian ka ti sap a, ani pawh chuan," Ni e, eng eng emaw thu lêng vêl hi tu emaw talin an hrilh tawh ngei chein ka ring a, chu lo ah, amah ber pawh hian a lo àn khum hrep tawh hial zâwk maithei bawk che a, i hriat thiam mai a ngai a nih ber hi. Ngaihtuah ngut ngut duh lêm suh, thil țangkai pawh a ni lo va, hriat reng tlâk lah a ni hek lo, hetiang lam hi chu beng lehlamah hian hria ila, lehlamah chhuahtîr leh daih ila, a țha ber, rilruah hian dah reng duh miah loh tùr," tiin min hrilh ve suap suap a.

Ka mut hmunah chuan Amos-a thil min hrilh chu ka ngaihtuah lét nauh nauh a, hun dang, zàn dangah chuan thil ho deuh deuh sawiin kan nui nasa țhìn a; mahse, zanin zet kha chu thu țha tak tak a sawiin min hrilh ve a ni, a zahawmin a thil sawi kha thil țha tak a ni. Arini hi ka haw hran lo; mahse, hrehawm chu ka ti ve tho, min ngeia min haw êm êmtu an awm tih hriat hi thil hriat nuam a ni lo, khaw khatah awm tlângin Biak in khatah kan lâwi bawk si a, thil nuam tak chu a ni lo alawm. Hmuh pawh ka hreh ru ngawih ngawih ta chu a ni si a, hetianga kan awm a ngai ta hi ka thiam loh vek em ni le?

Ruah a sùr duh êm avàngin U Ropuia tân pawh rawn kal a huphurhawm êm êm mai a, kawng a diakin a nãl si a, a lei a țhat ëm avàngin a ban pah bawk nèn, huphurhawm tak a ni. Ani paeh tûnlai tak hi chuan a rawn kal khât deuh hlek a, tih tùr țûl tak a awm hran lo nèn, a rawn kalna tùr ka huphurhpui a, ruah lah chu a tla cherh cherh reng mai si a, min rawn biak châng hian," Lo kal lo mai rawh, ka lo kêp mai ang che," ka ti leh ringawt mai țhin. Kawngah a chesual ang tih ka hlauh bâkah, a rawn kal ang a, kawngah a tâng ang a, buaipui ngaiin a awm leh sî ang tih ka hlauhpui ve a ni.

Hun lo cheih cheih asin! Training an han ko leh thut mai a, fùr hunpui lai hi chuan koh loh hrâm tùr asin le ka ti ru vawng vawng ringawt mai. Ke ka nei ve bawk si lo, bâkah, lo nei pawh ni ta teh rêng ila ka khalh ngam lo tawp ang le. Hun erawh kan la nei ve deuh hlek, vawiin Thawhţanni chauh a la ni a, training hun chu kâr tàwp Zirtàwpnîah a ni. An sawi pawimawh bawk si, U Ropuia kal mai rawh se a tih theih miah loh, kal vek tùr an ti bur mai. Kan hna leh kan duty a ni a, group-ah han phun deuh laih laih mah ila han ngaihtuah chian tak tak chuan sawisêl thei dinhmunah kan ding hauh lo, thil țûl lovah hotuten training tùrin min ko lul lo ang le.

Kalna tùrah ka buai ru leh ta a ni. Remsiama a service chhun ber lah chu an sumo a chiangkuang lo va, a tlãn ngam chiah lo. Tu nge ka biak leh tâk ang? U Ropuia'n kalna tur lìrthei chungchâng min rawn zawh chuan," A awm thei mai ang," tiin ka chhâng ve ngawt a; mahse, a vâng khawp ang le. Tûn ang huna kan kawnga tlàn chu thil huphurhawm tak a ni si a, Zodina ka rilruah lang vau vau mah se ka dah bo vat a, va hrilhin va bia ila chuan min hnialin ka ring hauh lo; mahse, ani pawh tûn anga tlãn chhuak tùr chuan ka khawngaih, a tâng ang a, a lìrtheiin a tawrh phah palh ang.

Mahse, ka han ngaihtuah kual vêl pawhin tu mah biak ngam ka nei lo, Remsiama sumo lo chiangkuang lo kher kher chu a thinrimthlâk ka ti; mahse, tih theih eng nge ka neih chuan le? Ka han thaw leh huai țhin a, ka ngam ber Pu Rovate hian an bike hi an siam țha har lutuk tawh mah mah a ni, thil țûlah anni hi ka biak ngam ber an ni si a. A, a pawi lo,  kein ka kal mai ang, a him ber ang chu, accident leh tâng tih vêlah ka buai lo bawk ang a...

Pu Rova'n ka training dâwn tih chu engtin nge a lo hriat ka hre lo," Engin nge kal i tum ang?" tia min zawh chuan," Ka hre lo, kein ka kal mai dâwn em maw ni ka ti deuh a," tiin ka chhâng a, ani chuan," E khai a! Kawng a thui tham ve tho si, a fuh ber lo ang, mahni chauh lehnghâlin," tiin a han chek tlak tlak phawt a, chutah," Two-wheeler nei hi chu an awm ve nual a; mahse, lo lamah hian an buai ve hlawm bawk si a," a han ti leh nuap nuap a, a ngaihtuahna a sëng ve nasa a ni ang, melh ngai melhin a chal chu a chuar nâng nâng reng a.

Vànneihthlâk takin ka ti dâwn nge, Zirtàwpnî zîngah chuan ruah a sûr miah lo va, nî erawh a lang chuang lo, chhûm a zïng deuh chuai a, chu pawh chu ni se ka lãwm tawh tho tho. Chhuah lai ațanga ruahin min nan chuan a fuh dâwn lo êm asin, raincoat ka nei bawk si lo.

Zodina chuan min rawn lam a, raincoat nèn a rawn infam ap mai. Bike a khalh thiam ve viau tih ka hre tawh nain ka huphurhpui viau tho. Bâkah, a inthlahrunawm ka ti, Jakob-a kha lo ni thut ta zâwk se, ani kha chuan khawiah pawh min kalpui peih deuh ang a...

"Kha, hei hi ha ve rawh, kan tlàn laiin eng boruak nge kan tawn dâwn pawh a hriat si loh a, inhâk sa hi a țha," tiin hmeichhe raincoat fual leh kekawr hi min pe a, hnial lovin ka lo ban vat. Ka han ha leh rih a, a lo lian țha viau bawk niin, ka bag pawh ka raincoat hâk chhûngah chuan a leng vek mai, a țha tawp, ruah pawh sûr mah se, ka bag chu a huh dàwn miah lo tihna a nia.

Kan tlan chhuah hnu rei vak lovah chuan," Engah nge nangman min rawn biak mai loh a?" a rawn ti chhuak ta sap a," Nia..." tiin ka han tàwp leh rih a, ani chuan," Engah nge i inthlahrun ni? Keini pawhin a țûlah chuan kan rawn ko dawt dawt mai che a, a țûl a nih phawt chuan hremhmun thleng pawhin kan kal dawt dawt mai tùr lah ni," a ti leh a. Ka lo nui hak a," Hremhmun thleng thleng...! Chu êm zawng, thleng lul suh se," ka ti a, ani pawh chu a nui ve tho tih ka hria.

Kawng chu nãl ve tak a ni, khuar laiah lah chuan tuihâwk a tling leng lung bawk a; mahse, tuihâwk tlèmna leh nãl lo lai nia a hriatna lamah zêl chuan a tlãn a. Kan tlûk ka rin tehlul nèn, kan tlu bîk miah lo. Kawng chanve vêl kan tlàn hnuah chuan ruah a rawn tla ta seng seng a, taksa huh lo mah se hmai leh kut chu a huh lo thei lo.

"A hrehawm viau em?" tia min zawh chuan," Hrehawm lo, nangmah kha, khalh a harsa ngawt lo maw?" ka ti ve thung a, ani chuan," Harsa lo ve, ka ti țhang alawm, min rawn nghen hnaih deuh kha hreh lo la aw, chuti lo chu i rawl vek mai ang," a rawn ti leh a, ka nghèng hnai tawh mah mah zâwk a ni. Kawng a nãl si a, amah hlata ka țhut chuan a balance ka tidik tâwk lo ang tih ka hlau a ni, bâkah, ka hlauh ve pah deuh avàngin hnaih zeta țhuin kawng nãl zual deuh kan tlàn laite pawh chuan nghet zetin ka kuah a, kan àwn deuh châng chuan a kekawrah ka țhàmsak vak mai.

"Keimah vàngin i hrehawm phah vek a nih hi," ka ti ve thung a, ruahin hmai lam min rawn theh țhat țhat avàng chuan men kuau hleih theih a ni lo va, ani tân phei chuan a hrehawm dâwn tih ka hre chiang. 

"I tân te chuan hremhmun thleng pawhin ka tih tawh kha," a ti phawt a, chutah," Nula hmel țha bulah chuan hrehawm a awm thei tak tak hleinem, ni tin khaw chhe hnuaiah service ngai pawh ni se phûr takin kan kal zêl mai ang chu," a tih zawm leh a, min fiam dan kher kher chu amah nèn chuan inhmeh lo ka ti roh lutuk a, ka nui lo thei lo.

"Tak tak chuan, ka pu damdawi lei a ngai ve tawh tho a, chumi rual chuan phone lei ka duh pah bawk a," a tih leh chuan," A tihchi dâwn em ni?" ka lo ti sap a, ani chuan," Ka lei a nih phawt chuan ka dah țha viau tawh ang, vawm chhiat mai mai chu ka phal tawh hauh lo ang," a ti leh a.

Lunglei kan thlen chuan U Ropuiate in lam kan pan vat a, min lo hmuh chuan," Ruah a sûr bawk sia, ka lo ngaihtuah khawp che u a," a lo ti vat a, a fel thei a nia, tûkțhuan pawh an inah kan ei ta nghe nghe. Zodina pawh min drop-a tlàn chhuah nghâl tum kha a nia, U Ropuia chuan a remti tlat lo va," Ruah a sûr si a, hmun dang pan a buaithlâk mai mai," a ti tlat a, chaw ei khamah chuan kan chhuah khalh nghe nghe a, ruah sûr a zia deuh hnuah a chhuak ve ang chu.

Nilëngin kan training a, ruah pawh a sûr nilêng deuhthaw. Khua a vâwt sûk mai lehnghâl a; mahse, ka inthuam lum hlauh a, a zia khawp mai. Tlai dâr 4 rîk hma hretin kan bâng a, zîng dâr 10-a țan kan ni bawk a, mawng a na ve duh khawp mai.

U Ropuia chuan riak ve mai tùrin min ti a; mahse, riak ta ngawt ila naktûk lamah engin nge ka haw chuan ang? Peih chu a peihawm viau loh alawm, kawng a nãl leh dâwn si. Zodina ka khawngaih lâwk, a kut thâ a kham tawh ngawt ang!

Lunglei ațanga kan chhuah  hma deuh ațangin ruah pawh a hàn ve ta a, raincoat erawh kan ha sa leh nghâl a, muangchângin kan tlãn chhuak a. Tlãn chak lo tùr chuan ka han ti ve a, a hmanhmawha a tlàn chak chuan kawng a nãl si a, thil țha lo zâwk a thleng ang tih ka hlau a ni.

"Phone chu i lei ta em?" 

"Min zâwt har ka lo ti tawh viau asin," a rawn ti phawt a, chutah," Lei ve ta ngawt e, buaina a siamsak loh che erawh beisei ila," a ti leh a, kei chuan," I dah țhat viau a ngai ang, sim card thar i lei nghâl em?" tiin ka zâwt leh a. A hmaa a sim card kha chu a keh chhe tel ve tlat si a, a hman theih tawh loh a ni.

Kawng chu zîng lam ai kha chuan a zia deuh tawhin ka hria, a nãl tho nain vawiin lamah ruah a sûr nasa a, tlëm chuan a tlèng fai deuh a ni ang. Zodina pawh chuan," Ka kekawrin a tuar lo deuh tawh ang chu maw?" nui chung hian a ti a, ka zak lek lek a ni; mahse, ka zahna tilang duh hauh lo chuan," Eng zât nge ka pêk ang che? Nang chu awm lo la chuan ka training thei dáwn lo tihna a ni si a, ka lãwm hle a ni, ka pêk zah tùr che chu sawi hreh suh aw," ka ti ta daih a.

"Khua a chhe bawk sia, a to ve phian ang," a tih chuan," A dik ang, sawi hreh lo la," ka ti ve leh thung a, khaw chhe hnuaiah, kawng nãl tak leh hrehawm takah peih lo pawh sawi lovin min hruai a nia, a tlàwmngaihna a ropui, eng zât pawh sawi mah se ka pêk ngei ngei a ngai.

"Thlen hunah kan sawi dâwn nia."

Khaw luh dâwnah a rawn sûr leh ta vak a, khua a thim ve tawh bawk si a, a hrehawm duh kher mai. Ka in kawt thleng min thlah a," Lo lût ve rih mai rawh, a sûr nasa êm mai, nakin deuhah i haw mai dâwn nia," ka ti a, veranda zau lo têah chuan dingin ka raincoat hâk chu ka han hlîp nghâl a, tui a far tlak tlak mai.

A ni lah tak a, sûr tam tak a ni, a buak hian a baw tlãwrh tlãwrh tih theih a ni. Kawngka chu hawngin veranda light ka han on a, ani pawh chu bike ațang chuan a lo chhuk ve a, raincoat ka bànnaah chuan a raincoat chu a han bâng zui ve nghâl bawk a.

In chhûnga a lo luh veleh a inhrûkna tùr towel ka lo pe vat a, kei chu ka hmai leh ka kut a ni deuh mai a, ka sam tlêm nèn, ka pheikhawk huh kha chu pâwnah ka hlîp daih a, ke hrûk hul a ni mai; mahse, ka hnâwng deuh chuapin ka hre tho. A inhrûk chhûng chuan thingpui ka chhuang a, a ril a țâm tawh viauin ka ring, kei pawh a ţâm ve deuh tawh tho.

"A sûr nasa hle mai maw..." a tih chuan," Aw, bâkah, ka inah hian a ring deuh bîk a, ceiling loh a nih vàng hian a ni pakhat a," ka lo ti vat a, ani chuan," I huh nasa em?" tiin min rawn en a," Huh nasa nâng, ruah sûr kha nangman min hliah deuh tlat a, raincoat min hâktîr lah kha a phui țha viau bawk a, ka huh nasa lo," ka lo ti leh vat a.

Thingpui in hnu lawkah chuan 'a zia deuh' tiin a haw ta thuai a, chelh zui ka tum lêm lo. Inthlãk thuai thuai pawh a duh ve ang a, a riak dâwn te a nih ngawt loh chuan a haw a ngai a ni, pawisa erawh a la duh tlat lo! 

"Ka la a nih chuan engtin nge ka hmuh ngam tawh ang che? Ka hruai cheah ngai mai rawh, min puih nasat tawhzia ngaihtuah phei chuan vawiin kha chu eng mah lo mai a ni, bâkah, nuam ka ti riau," a ti tlat a, pêk luih ka tum pawhin a duh lo. A inrin loh lai deuh nia ka hriat pawhin a lo inring hman zêl a, ka pe thei țhak lo.

A haw hnuah a phone thar leh sim thar ațangin min rawn be ngei a," Ka biak hmasak ber i ni," a rawn tih chuan," Engtin nge ka number i hriat theih a?" ka han ti hê hâw a, ani lah chuan," Ka vawng vek alawm," a lo ti mai a, chutah," Chaw i ei tawh em?" a rawn ti leh a. 

Ka ei peih loh thu leh eirawng pawh ka bàwl loh thu ka hrilh chuan," A ni maw? I chàu a niang, mu hahdam nghâl daih rawh," a rawn ti leh a," Kei chu ka ei a, ka inbual zo diam tawh bawk asin," a rawn tih leh chuan," Puar laia inbual chu a țha lo asin," ka lo ti vat a, ani erawh chuan," Ka thlen veleh khân ka inbual a, chumi hnuah alawm chaw ka ei chauh," a rawn ti leh a, eng eng emaw thil ho tê tê kan sawi a, kan inbiak tàwp dâwna," Tui deuhin i mu dâwn nia, Kawaī Z," a rawn tih chuan ka meng phâwk nasa. Chu chu Jakob-a'n ka hming min phuahsak kha a nia, engtin nge a lo hriat ve ni? Ngawi teh, message kan inthawnte  kha a chhiar ve țhìn tak ang chu, kan inkâr chu kei tluk zet deuhthawin a hre ve ang chu maw le! 

"Engah nge mak i tih viau? Kei pawhin ka ko ve thei tho lo che em ni?  Nula hmel țha leh duhawm tak i ni a, chu chu tu tlangvâl mitah pawh a ni vek ang chu," a rawn tih leh phei chuan mak ka tiin ka biang sa hat hat chu ka dawm vat a, he pa hi a duhnaah chuan țawngkam pawh a lo thiam viau àwm hi le.

*ONE-SIDED LOVE HI I NGAIHTUAH VE NGAI EM? BEISEI LÊT A NEI LO VA, HMANGAIHNA LAH A PHÛT LÊT HEK LO, HMANGAIHNA THIANGHLIM TAK A NI, CHUTIH RUAL ERAWH CHUAN NÂ A TI VE THEI THO, PHAT RUAL A NI LO; MAHSE, ONE-SIDED LOVE TLUKA MAWI LEH THIANGHLIM HI A AWM TAWH KHER LO ANG*