☆THE SWEETEST HANDCUUFS☆ - 18 By Dingdi Pachuau

 ☆THE SWEETEST HANDCUFFS☆ - 18 By Dingdi Pachuau

Jakob-a message chuan min tihlim ve deuh a, ka hlimpui tùr ni lova inthiar fihlìmsan tùr ka ni tih erawh ka hria chiang; mahse, ka rilruah hian hmun a chang thûk ve tlat tawh a, ka thinlung duhna hi ka hawisan ngawt thei bîk lo. A tìrah khân ani hian min rawn pan hmasa lo se chuan heti tak hian ka thinlungah hmun a chang kher bîkin ka ring lo, mipa, min duha min hĕltu leh min zar buai peihtu, ka bula tawlh reng leh kei pawhin ka ngei bík loh a ni ve tlat mai a, heti taka min duhtu chu rilru pêk loh a har ve asin.

Mahse, mi tak tak a ni bawk si lo.

Ka thil ngaihtuah kual nasat vàng chu a ni ngei ang, mumang hrehawm zet ka mang a, Jakob-a, Zodina leh Vãlpuia chu a hran țheuhin ka lo hmu a, mak ti takin ka lo en tawn chhên hlawm nghe nghe. An pathum chuan min hre vek a, min koh dàn erawh a inang lo vek thung. An hmêl chu dang vek mah se, ka mumang a nih vàng nge, ka hmuh tawh hnu ang maiin ka hre hrang vek thung a, anmahni hmachhawn zâwnga dingin an hmaah chuan phuar behin ka lo awm a, min chhan beisei taka ka en reng lai chuan an pathum chuan an infin kháwm ta rup a, chutih rual chuan hmeichhe thinrim țê tuar tuar rî ka han hria a, chu rî chu khawi ațanga lo kal nge tih hriat tumin ka hawi kual ta nghâl a; mahse, tu mah ka hmu lo, chutih lai chuan khua a rawn thim khup khup a, ka hmaa mi pathum kha hmuh tùr an awm tawh lo, mi pakhat chauh hi a lo ding tawh a, khua a thim chak êm avàng erawh chuan a hmël ka hmu thei lo, thlî a thaw nasain phuar beh ka ni bawk si a, min phuar behna ata chu tàl chhuah tumin ka lo tãl vak vak a; mahse, ka tàl nasat poh leh ka hah a, min phuarna pawh a nghet telh telh niin ka hria, hmeichhe thinrim țê rî lah chu a ring ang telh telh a, ka hlau bawk si, ka mangang bawk si chu ka rúm kâwk kâwk a, ka lo rûm chhuak nghê nghê a, ka harh phah ta a ni, ka lo tãl nasa deuh a niang, ka thlanfîm pawh a lo tla hial nia!

Hma takah thovin zîng dang ang lo takin Zíng țawngțai inkháwmnaah ka kal ve a, ka rin aiin inkháwm an tam lo; mahse, nuam ka ti phian, a chhan chu rilru thiang takin Pathian hnênah ka țawngțai thei a, inah pawh țawngțai thei tho mah ila a mîte nèna inpàwl khâwm chu boruak a nuam tlat. Ka tho hma pawh chu ka inchhír lo khawp mai a, ka theih phawt chuan zîng tin kal ka tum ve tawh ang ka ti hial nghe nghe a ni.

Office ka kal a, U Ropuia pawh a rawn thleng har lo. Thil țûl kan han ti dùn malh malh a, kan titi pah bawk a, an chhûngkaw chanchinte chu ka zâwt pah a, an dam țhat thu sawiin ka chhûngte chanchin min han zâwt ve bawk a, kan inhrilh tawn mawlh mawlh a nih ber chu, ziah fel ngai a ziah zawh hnu chuan," E, ka lo mangnghilh țêp, khaw tawntirh bera awm Pi Sângi kha, drip khaisak a ngai tak!" a ti chhuak hap a, kei chuan," A ni maw? Ka ziak zo țêp-" ka tih lai chuan," Vawiin chu ka'n àwl ve tawh ang che, tlàwmngaiin i kal ziah a," a lo ti vat a, kei chuan," A ho e, a harsa hleinem," ka ti leh a, ani erawh chuan," Vawiin chu kal ka tum ve tlat tawh, ka ãwl ngun tawh a, ka zak zozai tawh e. Ziah ngai kha lo ziak zo rawh, ka'n kal ang e," tiin a ding zui nghâl a, kei pawh chuan ka tilui ta bîk lo.

A chhuak deuh chiah tihah chuan Jakob-a a rawn lût a, a rawn inha vár leh khawp mai. A Adidas T-shirt vár sar mai leh a kekawrbùl vâr zet chuan a tilang 'fresh' khawp mai a, khaw lum zet hnuaiah chuan hmuh a hahdam tak zet. A silver țhi awrh, a chain hràw angreng tak leh a locket Kraws lem chu a inhmehin a tilang pà zualin ka hria, a chal ser deuh, khuar deuh reih pawh chu a lang chiang kelh kawlh viau mai a, he ser pawh hi a inhmeh ka ti zo vek tawh!

"Min en lài zo dâwn."

Ka harh chhuak nghâl zawk mai a, ani pawh chuan ngun takin min lo en ve reng niin, a țhutna tùr chair chu melh zauh pah hian," Lo țhu rawh, vawiin chu eng mah i thawk nange?" zahzèlah chuan ka ti daih a, a mitah pawh ka en ngam tawh lo. Ani erawh chu a nui hak a," I zak a ni maw? Ka bulah hi chuan zak duh mah ta che," a lo ti a, a țhutna tùr chair chu ka bul hnaih lamah pawtin a țhu zui ta nghâl a.

"Eng mah i thawk nange?" ka ti leh a, ka dawhkàna ka thil ziah chu ka melh chhuk ràn a, ani chuan," Min han en lawk teh, tu nge ka nih?" a lo ti thung a, en leh tho tho chu a ngai dâwn a nih hi. Muangchâng hian ka hawi chhuak a, nui chung hian," Ka hria che, min test kher suh," ka ti a, ani chuan," A nih, tu nge ka nih?" a lo ti leh a, chiang zeta a mita enin," Jakob-a," ka han ti phawt a, chutah," En teh, i hming ang chiah pu hi high school ka kal laiin kan class-ah a awm ve a, fiam nân 'Kawpza' kan ti țhìn, a haw ngai lêm lo va, kan koh châng pawh hian a êih ve lauh lauh zêl," nui chung hian ka ti leh a, ka mitthlaah chuan class ix kan zir laia kan class room leh kan țhianpa Kawpzaa chu ka hmu chuai chuai a.

"I school kal lai chanchin hi min la hrilh chiang lo tiraw? Min han hrilh teh, ka lo ngaithla ang," a lo ti vat a, kei chuan," A, kei chu lehkha ka thiam thei lêm lo va; mahse, class ngaia țhut nawn erawh ka nei bík lo, kan khuaah High School thleng ka kal a, a bâk zawng chu hmun dangah niin chhungte ka hmu phâk lo a nih chu," ka ti a, ka sawi tawi thiamin sawi kim ka inti ru viau bawk.

"Hmun danga i zirna chanchin chu?" a lo ti leh a," A dang chu Aizâwl lamah a ni tawh a, health worker pawh Aizâwlah tho ka training a," ka ti ve leh a, ani chuan," Hrehawm i ti em? I nu leh pate hmu thei lova awm chu a nia ka tih," a lo ti a, a zawhna chu mak ka ti deuh hlek a, min hmuh dàn leh min hmuhna hmunte kha a rawn sawi leh ka rin vàng a nia. En vang vang pah chuan," Aw, a tìrah chuan hrehawm ka ti khawp mai a; mahse, a hnuah erawh chuan naupang chhia ka ni tawh lo tiin ka infuih ve nasa a, naupang ang maia nu leh pa bula awm reng thei ka ni lo tih thlengin, ka inngaihtuah harh a nih ber chu. Chubâkah, ka vànnei leh zêl a, ka training-puite an fel êm êm a, ka lunglènzia an hriatin min kàwm hlim a, hrehawm leh lunglêng lutuk lovin kum chu ka hmang liam ve thei ta a ni," ka ti sap sap a. 

"A nih tak chu, nu leh pate bula awm theih loh hi chu a hrehawm ve alawm; mahse, hei, hrehawm i tawrh ve țàng țáng ațang khân hlawhtlinna i hmu tawh a," tiin a han nui suk a," Kei pawhin ka hmu thei ta che a, tuar chhuak peih lo la chuan kan inhmu kher lo maithei asin," a ti leh a, a sawi zo chiah tihah chuan U Ropuia a rawn lût a," Ka rei i ti em? E, inlêng kan nei a ni maw?" a rawn ti lût nghâl bawrh bawrh a, chutah," Ka rawn tibuai che u em?" nui chung hian a ti zui leh zat a.

"Tibuai lo, eng nge Pu Sângi chu a lo an a?" ka lo ti vat a, ani chuan," A zia viau; mahse, a chak chhuak har deuh a, bûr hnih a khai chuan a chak sawt mai ang," a lo ti leh a," Ka va chhuak leh lawk aw, chawhmeh lei tùr nei ka hria a," a ti a, a chhuak zui chu a ni leh nghâl mai.

A chhuah hnu chuan kan ngawi deuh ràn reng phawt a; mahse, insûm rei a inti deuh tawh a niang," Tûn hnai hian boruak danglam deuh i tawng em?" a rawn ti chhuak leh hlawl a, ka en zawk a, Arini nèna kan boruak kha a hria em maw ni ka ti hman nghe nghe a; mahse, ani hi chuan a hre lul lo ang tih ka ngaihtuah leh nghâl a," Eng maw? Eng thilah maw?" ka ti leh ta zâwk a.

"Ka hre chiah chuang lo," a ti phawt a, a chàwl dat a, sawi zawm lehin," Hmeichhia, tu emaw lak ațangin buaina i tâwk em? Buaina tih lêmah, rilru hrehawmnate pawh a tel ang chu. Min hrilh hreh lo la?" thutak zet hian a lo ti leh a, ka nui sak a, Arini a sawina chu a ni chiang, ani kher hi chu hrilh chî ni nâng aw... A thin a rim mai dâwn asin, a thin a chhe ve si a, thil pawi a thleng mai ang.

"Buaina tâwk angin ka lang em ni?" ka ti ve thung a, ani chuan," I lo tawh tâkin ka ti a, i tâwk em?" a ti leh a, ngun zet hian min rawn en reng bawk a, ka lu chu ka thing nã nã ringawt a, țawngka erawh chuan ka sawi chhuak lo, dâwt ka sawi dâwn tihna a ni si a.

"A țha a nih chu, han tâwk teh vaih, ka dìm dáwn hauh lo," a ti leh nghut nghut a, nui chung hian," Zahngai, i kawlh hmèl lutuk!" ka lo ti a, ani erawh chuan khap fak fak chung  hian," Harsatna i tawh phah chuan ka kawlh viau ang," a ti leh bul bul thung a.

A awm rei lutuk lo,  U Ropuia rawn lêt leh hmain a haw hman daih. U Ropuia rawn lét chuan min rawn fiam hlutin," A lo țhut hnaih angreng si che a, ka rawn tibuai chiang che u a nih hi ka ti rilru a, ka inthiam lo ru viau asin, chuvàng a nia ka chhuah leh vat ni," a tih chuan," Teuh lo e! Ani kha chu ka hmel hriat țha tak a ni alawm," ka lo ti a, ani lah chuan," A țha alawm, hmel hriat hi neih țeuh tùr, nula i la nia, helaia tlangvâlho hi an màwl viau leh màwl viau loh test nân ka hmang teh ang che, helaia i thawh chhûng chu," a ti leh a, amah lah chu a nui tak ang vur vur a, za vak lo hian ka nuihpui ve ringawt a.

Zànah Jakob-a chu a rawn lèn ka ring deuh a nia; mahse, a reh vung vung mai. Ani hi, amah kha a ni leh ta lo pawh a ni maithei, a buaithlâk ngawt mai. Amah kha amah a ni lo leh țhìn a, ngaihtuah chian phei hi chuan mi țhenkhat chuan an hlau maithei a ni, kei erawh hi chuan hlauh ngaihna ka hre lêm lo, bâkah, hlau thei dinhmunah pawh ka ding lo hrim hrim, hlauh ahnêkin Jakob-a phei chuan ka rilru a luah hial a nih zâwk hi, zathlâk zâwk hian.

Kimi cousin, nula senior ve lam deuh chuan pasal a nei dâwn a, a pasal tùr pawh hemi khaw mi tho hi a ni àwm e. Kimi chuan min sâwm ve nghe nghe a, inneih sàwmna card pawh min pe, an khaw tih dànphung hi a lo ni ve deuh hrim hrim a ni àwm e, thingtlâng a nih avàngin Kohhran Dàn thianghlima an inneih dâwn chuan in tinah sàwmna card an sem chhuak vek a nih loh pawhin in tinah lûtin țawngkain an sâwm chhuak vek zêl a lo ni, an tih dàn hi a danglam phian a, kawng lehlam takah chuan țha ka ti viau bawk.

Biak in khat tlatin inkhâwm kan awm a, mo pawh an chei nalh viau e. Kimi cousin Duhi hi kohhran țhalai lamah active viauin executive committee member hlun a ni àwm e. Chuvàng chuan a rawngbàwlpuite pawhin an ui a, an lawmpui bawk a, thlah nân leh lawmpuina ni fãwmin hla an rem hial nghe nghe a, an tiropui khawp mai. Inneih thilpêk pawh a dawng tam viau a, miin an lawmpuizia ka hmuh chuan mi fel tak a nih ka ring ve ngawt a.

Arini pawh ka hmu a, ani erawh chuan ka va en lai tak chuan min lo en ve lo hlauh, a inti chhe lo leh khawp mai. Amahin a zir bâkah a incheinain a zir bawk a, mit pawh a la viauin ka ring. Zodina pawh ka hmu ve leh a, Arini nèn chuan an țhu dùn lo va, inhlat erawh an inhlat chiam lo. Zodina tak pawh hi ka khawngaih roh, ka khawngaih phâk chu ni hauh lo mah se. A chhan chu amah hi mi sual a ni si lo va, a bialnu erawh mi țha a ni hauh si lo lai tak hi a ni, a tâ a lo hauh viau vàng pawh chu a ni mahna; mahse, inkawp pawh ni se innei êm pawh an la ni lo va, a tu zâwk zâwk pawhin rilru dang an la pu thei tlat a ni. Lo innei dâwn pawh ni ta se Zodina hi a khawngaihthlâk dâwn hian ka hre tlat pek a nih chu, ngaihtuah loh loh tùr ka ngaihtuah kual a, Arini khân min ringhlel a, ani ngaih dàn ațang hi chuan a nih duh hmèl viau a ni, ka dem lo; mahse,  Zodina kher hi chu ka ngaizâwng lo, amah ni lovin, a hmêl ang pu, a taksa ang taksa nei Jakob-a zâwkin a ni ka rilru luah ni.

Ka thil ngaihtuah avàng chuan ka lo en reng tih réng ka hre lo, rawn hawiin min rawn en ve ta chat a, a nui deuh sak zui a, ka hawi sawn chiang kher mai! Ka thil ngaihtuah vàng vek, thil țha lo tak a ni, nuam lo ka ti kher mai. Mi dangin min lo hmu phei se chuan ka ngaizâwng emaw an tih loh pawhin ka star emaw an ti ngei ang, ka maimichhîng vang vang a.

Mo leh moneitute chuan thla lâkpuitu an ngah khawp mai a, Kimi pawhin min ko ve a, ka kal ve mai bawk a, Arinitehoin an lâkpui hnuah chuan kan lâkpui ve a, a mipa lam hian Lunglei lama thlâ la thiam an ruai a, inneih inkhâwm hun chhûng pawh khân video-in a lo cover char char a ni. Camera a țha tawh a, kan lang mâwi phêt phét ngawt ang.

Kimi chu a buai deuh avàng leh mo lamhnai a nih vàngin kan haw rual lo va, mahni chauha ka haw lai chuan ka hnung lam ațang chuan," I va hmanhmawh bîk ve a!" tia min be rî chu ka han hria a, ka hawi lét a, a aw ațangin Zodina a ni tih ka hre sa tho na a, ka hawi lét tho a ni.

"Hmanhmawh hran lo ve, engati nge i haw daih a?" ka ti ve vat a, ani chuan," Nang pawh?" a lo ti thung a, kal pah chuan," A, kei te chu," ka ti ringawt a, sawi chhunzawm tùr ka hre lo, a lo nui hawk a, Jakob-a nui rî chiah chiah a ni, mak ka tih vàngin ka en phei hau nghe nghe a; mahse, Jakob-a ni lovin Zodina a ni tho. Ni ve bawk ang chu, Zodina taksa, hmêl leh awte hi alawm Jakob-a khân a rawn luah țhin ni. An chezia erawh a dang țhin ngei a, an aw pawh a châng chuan a inang lo bawk.

"Buaina ka siam em? Ka tih awmzia chu, keimah ka nih loh lai khân a nia ka tih," tiin min rawn en a, ka mit chu khap fak fakin ka hawi sawn a, kan hma lam chu enin," Siam lo ve, buaina a awm lo, i phone lamahte buaina i nei leh zâwk em?" ka ti zui ve zat a, ani chuan," Nei hran lo ve, lo nei ta pawh ni ila nang i awm a, ka thlâ a muang," a lo ti sap a, a tifiam a nih ringin ka en zauh a, a lo nui suk a.

"Vawiina in hla rem kha in thiam khawp mai," ka ti leh a, ani chuan," A làwmawm e. Zirna hun kan nei tam lo zâwk a; mahse, rin ai chuan kan sa chhuak țha phian a," a lo ti ve leh a, a țawng tam ve tawh a, kan inhriat țan tirha a inthlahrung hmêl pawh kha a paih ve viau tawh a, pângngai takin a titi ve tawh a ni. 

Kâr khat hnuah chuan tlai khat chu Kimi chuan," Zanin chu lêng lawk ang hmiang, U Duhite inneih thlalâk kha a chhuak vek tawh a, en pahin lêng ila?" a rawn ti siam siam a, tih tùr ka nei lêm lo bawk a, ka lo aw ve thuai a. 

Zanriah ei khamah chuan kan chhuak dùn a, U Duhite in kan va thlen chuan mi pawh an lo awm ve nual a, thlalâk chu an lo en ve niin, a țhenin an inneih video an lo en bawk a, min lo hmuh chuan," Lo lêng r'u, duh neiin  in rawn lêng tih erawh ka hre sa tho a, in lanna pawh a tam kha," U Duhi chuan nui chung hian a lo ti vat a, Kimi chuan," Ka en châk tawhzia chu a," a ti hluai a, U Duhi pasal U Vanlala pawhin min lo be ve nghâl vat bawk a.

Kan lanna a lo awm ve nual tak tak a! Thlalâk lah chu an han edit thiam khawp a, a mawiin a fiah fai a, keini takngial pawh kan lang no sur mai a, model hlawh nei lêm lote pawh kan nih duh hmel alawm le! Kimi lah chuan," Camera han țhatzia chu!" a ti deuh chhên a, U Duhi chuan," Hmël țha na nâ nâ chu a lan chhiat theih hleihnem," a lo ti thung a, an inchhâng tâwk viauin ka hria.

U Vanlala chuan," E, taka, ka mangnghilh țêp, Tluangte, kan cameraman khân i number min dîl tak asin, thlâ pawh a lâksak nasa chein ka hria," a ti a, ka nui ringawt a, Kimi chuan," A fuh dâwn e," tiin a kut chu a lo bêng a, U Duhi chuan," Chuvàng a lo nih chiah chu, a thlalâk kha a tam riau ka lo tih," a lo ti ve bawk a, chutiang lam hlîr chuan min fiam a, ka nui liam mai mai ringawt. Thlalâk chu pathum lai min hawntîr a, kei pawhin mawi ka tiin a fuh ka ti khawp mai, a tak aiin a fuh, ka kawr hâk rawng chu a lang tak a, ka puan bih erawh a lang êng thung a, a lang mawi riau asin.

Kan haw ka ina ka lüt tùrin," Khawiah nge i lèn daih a? Ka lo nghâk reng che a," ti sup rî ka hriat chuan ka inher vat a, thim chin deuha lo ding  ka hmuh chuan ka thaw deuh huai a; mahse, min tihlauthãwng țêp.

"Min lo nghâk rei tawh àwm mang e, Jakob, i dam țha em?" ka ti a, a chhan chu zanin chu T-shirt vâr ha lovin Jacket dum a rawn ha a, a dum lamaa inthuam ka hmih vawi khatna a ni hial ang chu. A dam țha chiah lo ang a, chuvàng chuan jacket a ha a ni ang tih ka ngaihtuah a ni.

"Dam e; mahse, ka hmuh loh rei che hi chuan ka damlo mai dâwnin ka hre țhin. Chuvàngin, hrisêl taka ka awm i duh chuan min hmangaih rawh."

*ŢHIANTE MIT HI INENNA DÂRTHLALANG ȚHA TAK A NI*