☆THE SWEETEST HANDCUFFS☆ - 26 By Dingdi Pachuau

 ☆THE SWEETEST HANDCUFFS☆ - 26 By Dingdi Pachuau

Thingtlâng ngang a ni ve bawk a, mite pawh chuan Zodina'n ka training tùr min hruai tih chu an lo hre leh fur tawh niin, tunah chuan ka mikhual hran tawh lo bawk a, hmaichhanah ngei pawh min fiam ngam ta hlawm a, rilru nuam vak lovin ka nuih liam mai mai. Arini'n a hre ve leh tawh ngei ang a, engtiang takin thinrim leh ang maw? Min hmu tùra rawn kalin min țawng khum leh ang em? Rilru en tlang theihna hi awm se, ka rilru hi en tlang vek thei se ka va ti tak êm! 

A lo hre tak tak a. Ani hi zawng, a buaithlâk a nih hi, inah min rawn kalchilh leh hmiah mai a, min han țawng khum tak tak mai chuh, sawi ve tùr hi ka hre lo rêng rêng, amahin a sawi zo vek! Sawi ve tùr pawhin hun pêk ka ni lo, a hauh vek ka ti tawp mai. Ngawi rengin a thu sawi chu ka ngaithla a, sawi vena hun pawh min pe mah se sawi tùr ka hre lo, a țawng nasa lutuk a, ka rilruah eng mah a awm thei lo va, ka ngaihtuah thei lo bawk, ka hriat chian chu a țawng nasa lutuk a, ka bîng mup mup tih chiah a ni!

A țawng tàwn tâwn lai chu a tàwp ta chat a, a tawp chhan hriat tum chuan ka han meng a, Kimi a rawn lût ve reng tawh niin, min lo en reng a, kei erawh chuan za lo zet hian ka nuih deuh sak ringawt a. Arini chuan," Nui khanglâng suh, ka la duh tâwk lo a nia," ti leh nghatin a chhuak ta daih a, a chhuah hnu chuan thâwk ka la huai huai a, min àn khum nasa lutuk a, ka thâwk a tihbuai deuh bâkah ka rilru a tibîng mup mup tlat a ni.

"A va râpthlãk tak!" tiin Kimi chu a chek zui tlak tlak a, kei chuan," Eng nge i lo tih dâwn a? I lo luhna a rei tawh em?" ka han ti daih a, thovin thingpui ka thlitsak hnuah Arini rawn kal tirha Maian ka hih lai ka dah rih kha ka hih chhunzawm leh nghâl a, ani lah chuan," Engtin nge ngawi renga i dawh theih zâwk a?!! A la zak miah lo zui!" a ti leh sap a, ka lo nui mai a," A, a thinrim ve a nih kha, nakinah a inngaihtuah lét leh hunah chuan a zak ve viau ang," ka lo ti thung a, mi pângngai tak a nih chuan chu chu a rilru tùr a ni tlat a ni, a thin a rim a, Zodina chhuhsaktuah min puh tlat si a, zak viau mah ila kawng lehlamah chuan hriat thiamna chin ka nei ve tlat, ka rilru a rawn hre tlat si lo va. Bâkah, thinrim pawh ni se, a la àwm thei tho, ka training tùr min hruai miau si a, ani tân zawng a nâ ang, kum tam tak a lo kawp tawh a ni a, a duh viau bawk nèn, ka tân chuan lo thinrim khuma lo tàwng lét ve kha chu a fuh ber lo ang.

Office-a rawn kai ve chhunah U Ropuia pawh chuan min fiam ta zauh zauh a," A pà rem rem riau, jmeh pawh in inhmeh ka ti, ka thil sawi kha ka la hre reng a nia, a thleng dik dâwn tlata hriatna ka nei chhah viau a ni" tiin. Office-a min rawn kalchilh lai khân kan pahniha kan awm lai a ni a, khata rawn kal kha Jakob-a a ni a, ani tân chuan ka training-naa min hruaitu nèn khân thuhmun a ni, hmêl pakhat leh taksa pakhatah mi hrang pathum an rawn inlan chhâwk ţhin tih hre ve lo tân chuan a àwm viau e, chhàn vak pawh tum lovin ka nuih liam ve mai mai, Zodina thurûk a ni miau si a, sawi fiah dâwn chuan thurûk puan a ngai dâwn tihna a ni asin.

Office-ah ka awm a, ruah a bâng deuh chiah a ni, U Ropuia pawh a rawn kal leh thei lo. Pu Rova a rawn lang ve hlawl a, ka lo chiau-au vat. A ţhut fel hnu chuan," Ruah chu a sûr duh tlak tlak hle mai maw ... A hun lai a ni ve miau mai a, ruah hi chuan sùr bâk tih theih nei hek lo le, a hna hi chu a tlin ve ngawt mai," a han ti luam a, nui chung hian," A hna a hre chiang lutuk a, a thawk țha lutuk mah mah a ni," ka lo ti ve a, kan nui dùn hak hak a. 

Kan titi luam a, khawchin lam hlîr chu kan sawi a, a hnu deuhah chuan  her kualin tum loh deuhin Arini chungchângah chuan a lût ta a, nge a tum ve hrim hrim zâwk ni? Muang chiar chuar hian," Bawihtei'n i inah a rawn kalchilh che tih a sawi a, i lo chhâng lêt ve lo hlauh chu a làwmawm ka ti tak tak a ni," a ti phawt a, a chàwl dat phawt a, chutah," Chhàn lêt kha awmzia a awm dâwn si lo va, i chhâng lêt ve hlauh a nih chuan a țawng tinuam zualtu mai a ni dâwn tlat a ni. Zodina kha i biak ni lovin ka biaksak che a ni tih a hre hauh lo tihna a ni ngei bawk ang a,  thu dik hre hmasa lova rin thu kalpui ringawt hi zawng, a țha lo viau asin," a ti leh a.

"A, engah vak ka lo ngai hleinem, a thinrim a țawng chhuak ve maiah ka ngai mai, bâkah, a zahthlâk bawk sia, theihnghilh daih ka duh!" ka tih chuan," Chutianga i ngaih theih chuan a țha lutuk tlat! Anni ang hi chu khin lêt loh hi a him, an țawng tam si a, an dâwt sawi pawh hi a hnu deuhah hi chuan anmahni ngei pawh hian an âwih leh țhinin a nia ka rin ni!" a lo ti a, amah lah chu  a nui huk huk bawk sia, ka nui ve ringawt a. 

Chawhnu thingpui in tùra haw ka tum dâwn lai tak chuan ruah a rawn tla leh țan a, tukverh ka khâr țha zo chiah tihahchuan office veranda a rawn ri a, ka hawi chhuak vat a, rin loh deuhin Jakob-a a lo ni a, ani hi zawng ruah sùr hun lai pawh hian a inha thianghlim thei a nia, tunah pawh Jacket rawng thianghlim lam a rawn ha leh tawh!

Ka êp deuh chiahah chuan a ding a, be lovin ka en deuh reng phawt a, ani pawh chuan min biak hmasak a tum lêm lo a ni ang, min en ve tho. A hnuah erawh tlâwm hmasa zâwkah țangin," A sûr tam hma hian chhuak thuai ang, thingpui in tùra haw ka lo tum chiah a," ka han ti a, ani erawh chu a țawng chuang lo, min en reng tho a, ka hmêl ațangin ka rilru hriat a tum a ni ang, hawi sawnin," Min en reng ziah suh, ka zak ve thei tho," tiin ka țhutna ațang chuan ka tho ta nghâl a, ani chuan eng dang sawi lo chuan," Tu nge ka nih?" a rawn ti ta sup a.

"Ka hria che alawm," tiin ka han en nawn ve leh ngat a," Jakob-a i nih loh chuan tu nge maw i nih chuan ang le?" inti hre fê hian ka han ti leh a, dawhkàn chunga ka bag chu ka la a, ani chu a nui hawk a," Min hre sual chhiava a nih chu," a rawn tih leh chuan ka en nawn leh vat a," Nangmah ber ber pawhin Jakob-a emaw min ti tawh chu a nia, a va hahthlâk tak êm!" a ti leh a.

"Zodina... maw!! Ngawi teh, i ni maw?!! A va mak! I ni tak tak maw?! Mahse... min lo hre thiam lawk mai teh," ka ti nawk nawk a, Zodina a ni ang tih ngaihna ka hre miah lo nia! Thil ka sawi thui hman ang tih a va hlauhawm ve le! 

"Ka ni tak tak."

"A nih, engati nge... i jacket kha? A vâr i ha sia?" Ka va mãwl tak! A ngaihtuah tlèmthlâk viau a ni, Jakob-a chauhin rawng thianghlim  kher a thlang bîk nâng, kei pawhin a vâr lam pawh ka ha ve fo alawm, Jakob-a ka ni chuang hleinem. 

"Ka jacket a nia, ka ha ve thei lo em ni? A vâwt alawm," a lo ti leh mai a, ka ngawi daih tawh, ka țawng duh tawh lo, thil àwm ang lo deuh deuh ka sawi chhuak leh palh ang.

"Keimah tak tak ka nih lai hi chuan nang tal hi chuan min hre chiang hrâm teh, mi dang dangin hming dang danga min koha hrehawm ka tih țhin tehlul nèn," a tih leh chuan," Ka tih palh liau liau a ni," ka ti lo ti sap a, ani chuan," Inthiam lo viau duh suh, eng mah i tisual hleinem, min hre chiang viau tawha ka lo ngaih vàng a nih kha, hriat chian viau ka har ve deuh a ni ang e," tiin a han nui deuh sak a," Le, thingpui in tùr chuan kal ila?" a ti leh zat a.

Inah kan lût fel chiah tihah chuan ruah chu a rawn súr tam leh zui nghâl a, kan huh hman teuh viau a ni. Flask-a ka dah sa tui lum chu thingpui atân ka han thli chhuak a, ka chhuang zui nghâl a. Eng emaw sawi hian ațawng a, ka hriat chian loh avàng chuan a lam chu ka hawi vat a," Eng maw? Han sawi leh mai teh," ka tih chuan," Ring deuh hleka inbiak a ngai dâwn a ni maw?" tiin a han nui leh sak a, chutah," Ruah sûr hi i hlau deuh țhìn em? A sùr tam deuh châng hian ka tihna," a ti leh a.

"Hlau lo ve, engah nge ka hlauh ngawt ang?" ka ti ve thung a, ani lah chuan," Ka hre chuang nâng," a lo ti mai a, kan inen a, kan nui dùn ta ringawt a." Hmeichhe dâwihzep deuh hmuhin min lo hmu a ni maw?" ka ti ve leh thung a, ani chuan," Hmu lo ve, i dâwihzep hleinem," a ti ve leh mai bawk a.

Thingpui in lai chuan," Ka puin a ngaihtuah khawp che a, rawn tlawh che pawh a duh tehlul nèn, a rawn lêng chhuak hlei thei si lo va," a han ti a, lo en vatin," Ngaihtuah ka ngai hleinem, ruah sûr mai mai hlau rual lah ka ni lo va," tiin ka han nui a, ani erawh chu a nui hauh lo, thutak zeta," I inah Arini a rawn kal tih kha a hre ve a," a rawn tih tâkah chuan mit khap hauh lo hian ka en ta ràn mai! Engtin nge an lo hriat ni? A va mak tak!

"Thingtlâng kan nihna hi a lang leh țhìn alawm, Ka ni fanu kha i hria ang a, mi sawi a lo hre ve a, engkim hre thiam rual a ni ve bawk si nèn, chaw ei laiin a sawi chhuak a," a tih leh chuan ka lo thaw hak a, ka duh aiin miin an lo hre tam tlat,  Kimi bâkin hre lovah ka lo ngai mai asin!

"Eng mah a ni lo, theihnghilh vek ka duh," ka ti a, ruah a sûr bengchheng deuh bawk a, a hre fumfê kher lo maithei; mahse," A pawi ka ti, a tuar lo tùrin i tuar ta si a," a rawn tih chuan," A ho lutuk! Sawi sawi pawh ka duh lo, engah vak mah ka lo ngai hran hleinem, nangni pawhin theihnghilh vek rawh u, ka pu pawh chuan thil ho mai maiah min lo ngaihtuah duh suh se," ka ti a.

Ruah a sûr duh tlãwrh tlãwrh si a, chawhnu lamah chuan Office pawh ka kai ta lo. Zodina pawh a haw thei bîk lo, a lêng ve ta reng a, eng eng emaw kan sawi a, a hnu deuhah chuan," Vawi khat chauh ka sawi tawh ang, Arini vànga rilru hrehawm taka i awm avàngin pawi ka ti a, amah ang lo taka i ngawih theih si avàngin ka chhuang thung che. Hmeichhia țheuh țheuh pawh hi a lo inan loh theih khawp mai tih ka hre chhhuak uar uar a ni," a rawn ti chhuak leh a.

"Țhen lo la chuan hetiang hi a thleng miah lo ang maw le, ka sawipui leh lai che khân--" a kut a lo phar avàng chuan ka țawng tàwp chat a, ani chuan," Ni e, ka thiam loh vek a ni, a bul ber chu keimah ngei hi ka ni tih ka hria, thiamthu sawi tùr ka nei hauh lo," inthiam loh hmêl tak chuan a ti a. Chutia a inthiam lo hmêl ka hmuh leh tâk si-ah chuan ka thil sawi chhuah vàng chuan ka inchhîr leh zat a, thutak taka sawi pawh ka ni chiah lo, fiamthu deuh paha sawi ka ni mah ang chu; mahse, a lo ngai thutak si a.

"Ka ti mai mai a nih kha, nakinah Jakob-a'n thurûk min hrilh hunah chuan engkim a fel kuar mai ang," ka ti ta ringawt a, min chhâng lawk lo va, min en vang vang pah chuan thâwk a han la hap phawt a, chutah," A duh i tihhlawhtlin hunah maw? Kei, țha ka tih zâwng  leh ka rilrem zâwng a ni miah lo, thil țha lo tak a lo ni thei tih i ngaihtuah ngai em? Ni lo, ti lo mai rawh, pawi lo, thurûk chu hre chhuak lo mai rawh, thil ho tak bâk a ni lo ang," a ti ta daih a.

*******

Lo nei ve lo mah ila, anhnah ka ei khawp lek lek hi chu min rawn pe liam liam țhin a, kei akâr min duhsaka lo ațanga chawhmeh min rawn hawn ve hrâm hrãm țhinte hi an zahawm ka tiin ka lãwm tak zet a ni. Pu Rovate chhûngkua lah hian min rawn pe ãwl lo va, dãl, alu leh artui ni lo, thlai hnah leh rah chi hrang hrang ka han ei pawlh kual chu ka chaw ei pawh a tui ve thei khawp mai bawk. Thlai an thar țhain an thar tam hlawm si a, kawng hi țhain motor țha tak service bawk se, an changkàn phah awk awk ngei ang le, tunah hi chuan kawng hi an mutàn chu a la ni ve rih a nih hi.

Pathianni chawhnuah ka pain min rawn bia a, ka nu inkhâwm bâng chu step-ah a tlu sual deuh a ni àwm e. A ke leh a kâwng chu nâ a ti viau mai a, damdawi in lama an kalpui thu min rawn hrilh a ni. Ka rilru chu a bîng deuh chûk chûk maiin ka hria a, na taka a insawh loh hrâm ka beisei, kan biak in ka han mitthlà a, han tlu na viau tùrin step sâng a awm lo asin le, a vànduai palh ve a ni ngei ang.

Ka nu chu ka ngaihtuah viau mai, ka pa hi chuan zêp leh i hi a nei ve vak lêm lo va, a ke leh kâwng nâ a ti viau a rawn ti kha a ni a, ka nu chuan nâ a ti viau tak tak ang tih ka hre nghâl a ni. Khua hi zia deuh se haw phei ve lawk ka va duh tak! A chinchâng chiang taka hriata mit ngeia hmuh ve pawh ka duh; mahse, engtin nge ka tih chuan ang le?

Zàna chanchin min rawn hrilh leh chuan kan khuaah chuan ruh lam thiam a awm si lo va, a ke chu an lo tuamsak satliah ringawt a, Serchhîp lama mi lah chu a zin lai a lo ni ve bawk nèn, Nilainîah chauh a lo haw dâwn si a, rem han ruat mai dàn tùr a hre thiam lo va, chhûngkhatte an inbe kual dâwn a ni awm e. Ka nu chu ka han be ve a, a țawng dàn ațang chuan nâ a ti tih ka hre mai, amah ngaihtuah lo tùr chuan min ti ve tak nain ka ngaihtuah lo thei si lo.

U Ropuia chu ka han bia a, thil awm dàn ka han hrilh chuan," A va zia lo ve aw! Chuti a nih chuan i haw ngei dâwn nia, engin nge i haw ang?" a rawn ti a, chu lam chu ka lo la ngaihtuah miah lo tih ka hre chhuak zui zat a, a va buaithlâk țhìn êm! Haw ka han tum ve ngawt a nia, eng tak chuan haw ang maw? Zodina ka ngaihtuah chhuak zawk a, ani leh ani zêl chu, tlàwmngai thei pawh ni se, a zahthlâk zozai tawh.

Pu Rovate inah ka kal zawk a, ka nu chanchin chu hrilhin haw ka tum thu chu ka han sawi nghâl a, ani chuan," A nih tak chu, nia, i haw ngei dâwn nia, biak i nei tawh em?" a han ti a, ka la neih loh thu ka han sawi chuan a chal chu a han dawm vang vang a," Zanin pawh khua a zia viau hi a, naktûk zîng lamah pawh zia tùrah ngai ila, Zodina ka lo biaksak leh mai dâwn che em ni ang? Ani lo chu biak mai tùr an vâng êm mai a," a ti leh a, ka ngawi reng ringawt. Ka thil tawn an hre ve vek a, a thinrim ber ber pawh an ni ve; mahse, engtin nge kan tih chuan ang? Mi dang han ngamtlâk deuh biak mai tùr, min tlàwmngaihsak thei tùr ka hre ve lo. Remsiama, Amos-a, Nunmawia. Anni lahin bike emaw scooty emaw an nei mang si lo. Zodina a nih leh mai loh chuan...

"Keiman ka bia ang e," ka ti chhuak ta sap a, Pu Rova chuan," I hreh deuh a nih chuan ka be thei reng alawm, ka be hreh ve hauh lo a nia," a lo ti leh a; mahse," Be hreh lo ve, ka bia ang," ka ti leh a, Pi Vani pawh chuan," Nia, i biak chu a țha ber ang, thil awm dàn dik takin i sawi ang a, a tlàwmngai thei êm êm ang," a lo ti ve a.

Vànneihthlâk takin ruah a sûr lo va, chhûm pawh a zîng lo. Haw pheina tùr motor la zawng chawp tùr ka nih avàngin zînga chhuah ka ti a, dâr 6 a rík chuan ka kawtah Zodina chu a rawn ding leh vàng tawh. Haw vat ka tih chhan pawh ka pate chuan min lo nghâk dâwn a, Thawhlehnîa Aizawl lama inphurh phei mai an rêl tlu a ni, ka thlen phei ve chuan kei pawhin ka hruai duh maithei a, ka nu leh pa duh dàn pawh a ni ang.

Kawng erawh a nãl viau a, ruah a sùr lêm loh avàng erawh chuan berh deuh mah ila a zia tho tho. Lunglei kan thlen dâwnah  kawng sîra tui khawh thlaah chuan kan kete chu kan han tleuh thuak thuak a, bike pawh Zodina chuan a tleuh pah thuak bawk a, tlêmin hmuh pawh kan nuam deuh tawh ang chu.

Lunglei kan thlen chuan ka chhukna tùr hmun chu ka hrilh a; mahse, min panpui hauh lo. Ding lo chuan a tlãn zêl a, Bazâr vêng kan thleng phei a, kan la tlãn zêl tho. Sèrkàwn lamah kan tlãn chho a, chutah Zotlâng petrol pump-ah kan ding ta chauh a. 'Petrol lâk phawt a tum vang a lo nih hi, min phur thla leh ngei ang' ka tih lai chuan bike chu a tinung a, Lunglei hlatsan lam zâwngin kan tlãn ta zêl mai a! 

"Khawiah nge min kalpui dâwn?!!" ka tih chùl tâkah chuan," Ka hruai haw dâwn che maw le," a lo ti mai a, kei chuan,"Âwihawm loh lutuk! Lét leh vat ang," ka ti leh vat a; mahse, a ding duh hauh lo, speed sâng angreng takin a tlãn zêl a, ka tân pawh han din luihtîr ngam pawh a ni lo, nghet zetin a kawrah ka țhãm țùng ringawt!

Inbe lo chuan kan tlãn char char a, kan inbe lo rei ngar ngar asin! Haulawngah kan ding a, ka rilțàm a ring a niang, dàwrah min luhpui a, min râwn miah lovin kan ei tùr a lam a, ngawi rengin ka en reng ringawt! 

Ei tùr kan nghah lai chuan," Thinrim âwih loh, nakinah i duh leh min hau mai dâwn nia, i thlen thuai thuai ka duhpui si che a, bâkah, ka pu duh dàn pawh a ni hrim hrim a, motor dang chàn kual leh ai chuan tuna kan kal dàn hi a rang zâwk daih," a han ti a, ka țawng chuang lo. Min duhsakna mah ni se, a țawng har lutuk a, tlêmin ka thin a tirim deuh tlat. 

Kan ril a țâm ve deuh bawk a, ei tùr a lo thlen chuan kan ei nghâl mawp mawp a, ei man pawh chu ka pe hman lo, min nuih sakin," Ka lo chawlhpui har mah mah che a ni tiraw? Mahse, kawng lakah chawlhna  tùr a awm mai lo ve bawk a ni," a ti leh a, ka chhâng chuang lo.

Kan tlàn chhuah hma chuan ruah kawng a rawn hnaih leh tawh avàngin Raincoat, a hmaa min hâktîr kha min pe leh a, ka ha ve nghâl mai bawk a, thil hi a ngaihtuah kim bîk ngawt mai, kei chuan ka lo hrechang leh tawh miah lo asin.

Ruah a sûr bur bur lo bawk a, kan tlãn tluang bawk nèn, kan thleng hma viau mai. Thênzâwl kan luh hma deuh hlekin ruah a hàn a, chhûm erawh a zîng deuh hlek thung. Chuti chung pawh chuan thiam takin bike chu a khalh par par reng a, han thinrim khum deuh hlek mah ila a chungah ka lãwm ru viau tho.

Kan ina lo awm kan chhûngte chuan Zodina chu an lo làwm khawp mai a, min hruai thlengtu a ni bawk nèn, làwmthu an hrilh malh mawlh a, ka nu leh pa chuan a hmêl an lo hre sa tawh a, a hming erawh an lo theihnghilh tawh a lo ni, kan han inhrilhchawp leh rih a. Ka nu pawh ka rin ai chuan ka hmu zia e; mahse, ka rilru no a chhuak a, ka mittui erawh ka dang zo lo a ni. Ka pa lah chuan," Kan naute kha a ni miau mai a, min ngai tawh a nih hi," a lo ti mai a, mi dang erawh chuan min fiam chhunzawm a, Zodina awm lai leh hmuh laia chutianga ka awm chu ka duh vak lo, nëp min ti ngawt ang.

Ka nu chuan Zodina chu a haw a phal tlat lo va," Haw leh nghâl vut vut kha i tum ang e, ka remti miah lo, Bawihtei i rawn hruai thleng ta sa sa, zàn i riak ngei tùr a ni," a ti tlat a, ka pa pawh chuan," Haw nghâl lah lo ve, a riak ve ngei ang, làwmthu pawh kan la sawi zo hleinem," a lo ti ve bawk a, ani pawh chu haw luih tum angin a lang lêm lo.

Ka nu chu na ti lo ang takin lang mah se nâ a ti tih a han țhen leh sak sak dàn ațang chuan ka hre thei mai a, naktûk lama kal dàn tùr leh kal tùr an sawi chhuah erawh chuan min telh ve hauh lo! Ka han zawh chian chuan ka pa chuan," Nang chu hna nei i ni a, i kal ve a rem lo ang. Ka awm a, Aizâwlah ni se i cousin-te an awm nual a. Bâkah, i nu hian mi dang kalpui lova ka kalpui hi a duh tlat a ni," a han ti dap dap a, ka nu pawh chuan," Ni e, kan inhmu tawh a, ka zia viau tih i mit ngeiin i hmu tawh bawk a, min kalpui tùr chuan ka phût miah lo che, i pa a awm a, i unautehovin min buaipui thei bawk ang. Rei pawh kan va thang nâng, kan lo haw leh thuai ang," a lo ti ve dap dap a.

Zànriah ei khamah chuan chhûngte an rawn kal khâwm leh tel tel a, Zodina pawh an bulah chuan țhuin a titi ve barh barh a, kei erawh chuan ka nu leh pate thuamhnaw ken tùr ka siamsak a, thingpui inna note ka seng fel hnuah Zodina mutna tùr chu ka en fel leh a, ka han hawi kual vêl a, ka nuin a lo singsa kual a ni tih ka hmu thiam nghâl, Mami dâk deuh hleka a nui lai thlalâk pakhat hi frame nalh zetah, bangah chuan a lo târ a, ka nui deuh sak a, he thlalâk hi ka hmuh lohna a rei tawh viau mai ka ti, ka han en chiang a, a fiahin a lian țha bawk a, hmuh a nuam viau a ni. Mami nuih peihzia tak te kha, hun kal tawh chu ka mittthla suangtuahnaah chuan a rawn thar uar uar a; mahse, ka inthing harh ta vat a, Zodina pawh a mu duh tawh ang, a hman tùr towel leh a bun tùr ka pa chapal chu lâksakin a khum bulah chuan ka dahsak nghãl bawk a.

Zàn ka mut țhat theih loh avàng chuan zîngah, hma takah ka tho a, ruah pawh a súr lo va, khua pawh a thiang viau e. Thingpui ka lum zo chiah tihah chuan Zodina a rawn tho chhuak ve a, ka hmuh veleh chuan," Good morning. I va tho hma ve! I mu țha thei lo a ni maw?" ka lo ti vat a, ani erawh chuan thil danga min chhâng lo chuan min en ngur pahin," Room banga i thlalâk tàr saw min pe daih rawh aw, ka hmuh hmasak ber nia ka hmuh dàn chiah che a nia, I khuavàng pawh a lang chiang, khami nî pawh khân i nuih pah khân tlêmin i dâk deuh a, i khuavàng pawh chiang takin ka hmu alawm," a ti daih a, min en ngur mah se a rilru ngaihtuahnaah hun kal tawh a ngaihtuah lêt ve a ni maithei.

Ka en reng a, Zodina ni lovin Jakob-a a ni leh tawh! Chuan, room banga thlalâk saw ka thlalâk ni lovin Mami, ka phìrpui boral ta thlalâk a ni. Thil hre chhuak thutin ka hmui ka hup ta vat! Chhei, Jakob-a hian min lo hai reng a lo nih hi, Mami emaw min lo ti char char tih hriat reng, Lalpa leh! Engtin nge ka tih tâk ang? 

*MIHRING NGAIHA HLAWHTLINNA CHANGA I DINHMUN SIAM REM A LO NIHIN SIAM REMTU CHE THEIHNGHILH KHAWPIN CHAPO NGAI SUH ANG CHE*