☆THE SWEETEST HANDCUFFS☆ - 27 By Dingdi Pachuau

 ☆THE SWEETEST HANDCUFFS☆ - 27 By Dingdi Pachuau

Thingpui a duh em tih zawh nachâng pawh ka hre lo. Amah zâwk chuan," Chuan, he laia ka lo awm vena chhan ringawt hi hriat ka duh viau, eng thil nge thleng? Zawhna a tam viau ang," a ti leh daih a, chutah chiah chuan inngaihtuah harh thutin," Thingpui ka lo thlit ang che aw," ka ti ta vat a, thingpui thli tùr chuan ka inher zui ta nghâl a. Ka thin chu a phu dawt dawt tih ka hria, eng nge a chhan? Min hre chhuak ang tih ka hlau em ni? Min hre chhuak ta se, a thin a rim ang em? He laia a lo awm ve daih dàn hi chu thu dik ka hrilh ang a, a thinrim a nih chuan a thinrim a ni mai, thu dik ka hrilha a thinrim chuan a thu thu le.

Thingpui a in lai chuan ka nu chétsual dàn leh Zodina min thlah kual dànte chu ka han sawi thuak thuak a, ka sawi vek loh chuan nakinah ka pate rawn thawh huna an rawn biak hunah eng thil mah a lo hriat si loh chuan ka pate ngaih a țha lo ang a, an ringhlel palh ang.

Nimin lam khân vànneihthlâk takin Ka pate khân Zodina kha 'Kob-a' tiin an ko a, a chhan chu kan ina a rawn kal hmasak ber khân, khatih lai khân Jakob-a a ni miau si a, nimin lam pawh khân 'Kob-a' tia an han koh châng khân a ner ru leh deuh sak țhin nghe nghe a nih kha; mahse, țha takin a chhâng zêl tho chu a ni, ani ai hian Jakob-a kha an hre hmasa zâwk miau si a, Zodina tân pawh han thinrim vak theih a ni bîk tlat lo.

"Chuan, vawiina i nute Aizawla an phei chuan engtia awm nge i tum? He tah hian ani nèn khân awm dun in tum chu a ni êm lo maw? Kei hi rawn lang lo ila chuan..." tiin a sawi zawm duh lo va, chîk zet, insehruh țeuh chung hian min melh ngur mai a, kei erawh chuan," Chutiang a ni lo, ka nu hi a kal hma ngeia hmuh ka duh vàng a ni, nang rawn lang lo pawh ni la ani chu a haw tho ang, engah nge a awm ve ngawt ang?" ka ti ve thung a, ka hawi sawn duh bîk lo, kan inmelh ngar mai.

"I huaisenna hi ka làwm ngawt mai! I thingpui siam pawh a tui e," tiin a tho ta thurh a, ka thaw huai. Thinrim mah se ka nute awm lai chuan a tilang duh bík lo ang tih ka hre ve tho a, chanchin ka hrilh vek tawh bawk a, ka thaw a veng tawh tho tho.

Ka pa rawn tho pawh chu țha takin a lo bia a, ka pa lah chuan nimina mi kha a ni lo tih hre hauh lo chuan a be sârh sârh reng a, Jakob-a pawhin pângngai taka a chhâng thei chu ka lãwm. An titi lai chuan ka en ru zauh zauh reng a, he pa hi duh takin ka lo en ve țhìn kha a nia, min duh tak tak emaw ka tih vàngin; ani erawh chuan keimah ni lovin, a duh tak zâwk chu Mami a lo ni, a hre si lo, kei pawhin ka hre chuang lo, min haiin Mami emaw min tih vàng maiin min duh chu a ni tak si a. 

Tûkțhuan ei kham hma deuh takah ka nute chu an kal ta a, kal ka duh ve tehlul nèn, an remti tlat si lo va, thinrimna chi lah a ni mang si lo, ka mood erawh a off ve khawp mai. An liam hnu chuan Jakob-a chuan," Le, i mood kha han on tawh rawh le, an remti lo chung kal ve ngèn rual lah i ni tawh hek lo, pasal neih tum ve thut thut tawh i nih kha," a han ti dût a, ka en vat a, a lo nui mang hauh lo.

"Pasal neih ka la tum ngawt ngawt lo bawk aw, min hre chiang deuh angin țawng ve ziah suh, min hre chiang tawp lo," ka tih chuan a nuih a za viau a niang, a nui pût pût phawt a, chutah," Zanin chu honeymoon kan hmang mai dâwn em ni ang? Vènthàwn tùr an awm ta si lo va," a ti a, râp zet, meng phâwk  tak chung hian ka en nghâl vat a, ani lah chuan," Eng nge, ka rilru dik tak alawm ka sawi, mi tih loh dàn pawh a ni chuang hleinem," a lo ti leh a, chhan pawh ka tum lo, râp hmel zet hian ka en reng ringawt.

Zàn han riah leh thu va awm suh, Jakob-a nèn hlauh phei chuan in pakhata riah dun ka duh hauh lo, chawhnu hma lam deuhah haw tùrin kan chhuak phei ve leh ta a, Mami thlalâk pawh chu a hàwn ta nge nge a, tlãn pah chuan min fiam zauh zauh a," Naute pangchang ang maia nu leh pate ngen tum, khatiang a nih chuan kan inneih hunah engtin nge i awm ang?" a tih loh leh," Inneih zànah te hian i țap hi ka thlèm tlaivàr che a ngai hial ta ve ang ka ti," a ti a," Mahse, thlèm dàn che ka thiam ngawt ang," a ti thùl, a va țawng tam tak, a inhmeh viau lo.

Mami ka ni lo tih hi ka hrilh mai dâwn em ni ang? Hrilh ta ila a âwih ang em? A thin a rim ang nge, a hlim zâwk ang? Nih leh, chu pawh chu lo ni se, a duh taka ka ni lo tih ka hrilh chuan 'Thurûk' kha min hrilh duh kher ang em? A tân eng mah ka nih si loh chuan eng aiah nge min hrilh tâk ngawt ang? Zodina tân thil pawimawh tak tùr a ni ngei àwm si a, ka hriat chhuah si loh chuan ka pui thei lo tihna a ni dâwn asin, chutah, a lo thinrim phei chuan Zodina tân thil pawi tak pawh hi a ti duh mai lo ang maw?

"I va ngawi ve! Min rawn hnaih la?" a rawn tih chuan," Ka nute kha ka ngaihtuah a, kawng a sawt ve tho si a, hrehawm a ti viau ang em tih ka ngaihtuah a ni," ka ti ve zaih a, ani chuan," Ngaihtuah duh suh, driver khân a tlãn chakpui hran lo ang, na nei a phur tih a inhre ve reng dâwn asin," a lo ti ve a, ruah a rawn hnaih leh tawh avàngin remchângah dingin raincoat kan ha a, ka pa chu ka be zawk pah bawk a.

Ngaihtuahawm an nih loh thu leh an thlen chin rawn sawiin kan awm dàn chu min rawn zâwt lêt a, kan lét leh tawh tih ka hrilh chuan," A nih tak chu, tluang deuhin in tlãn dâwn nia, fîmkhur ula, ruah a sùr nasat chuan chàwl rih mai rawh u, tlàn luih a ngai lo a nia, chêtsual a hlauhawm," tiin min chah dap a, min ngaihtuah viau ang tih ka hre thei a ni.

Kan tum ram kan thlen meuh chuan kan huh viau mai a, ruah a sùr duh êm avàngin kan tlãn chak thei lo va, kan thleng tlai viau bawk. Bàl berh viau tùra ka inngaih laiin ruah sûrin min tlèng fai hneh ve deuh bawk a ni, kan fai viau mai. Jakob-a chu lo pêng ve rih tùrin ka han sâwm ve ngial a; mahse, ka rin loh takin," Ka haw nghâl zâwk ang e, nang pawh intihul thuai thuai la, i inha lum vat dâwn nia, i dam loh phah hlauh ang e," a lo ti ve tlat a, ka sâwm lui tawh lo, ruah a la tla reng si a, ani pawh haw thuai se, intilum thuai rawh se.

Ka intihfel hnu chuan ka phone ka han en a, ka pa missed calls vawi hnih lai a lo awm, kawnga kan tlàn lai leh ruah sùr lai a ni bawk a, phone phawrh chhuah ngam a ni tlat lo a ni. Keiman ka han be ve thung a, tluang taka an thlen thu ka hriat chuan ka thaw huai mai, Muanpuii leh Rosy'n an lo buaipui vek a, an in luahah an va innghat rêng bawk a ni. Ka nu pawh ka be ve nghe nghe a, a awka chhuak pawh ngaihthlák a hrehawm lovin a zia viau e, an tlãn thui si a, a insawh na zualin a chauh phah ang tih kha ka hlau êm asin.

A tûkah pawh Jakob-a tho ka hmu leh! U Ropuia nèn office-a kan awm laiin a rawn lût lehpek a, a rawn inha thianghlim leh viau tho! Ruah sûr lo mah se nimin lam a sùr nasat avàngin khawlai a la huh viau a, ni pawh a lang lo. U Ropuia rawn kal pawh kawngah a rawn tlu deuh fo ni àwm a ni, a sawi dànin. Jakob-a leh Zodina kha chuan min tlûkpui hauh lovin an khalh thiam a; mahse, anni zawng, an lo tlãn țhang tawh a, a cheng an man ve tawh bawk a ni.

"Engtikah chuan nge kan zin dun theih ang le?" Jakob-a'n a rawn tih chuan ka en vat a, U Ropuia ka en leh vat bawk. Ani erawh chuan thil a lo ziak mawlh mawlh a, Jakob-a thil sawi chu hre àwm pawhin a awm lo; mahse, a hriat tho chu ka ring, ţawng ri awm chhun a ni tlat si a.

"Khawiah maw?" tia ka chhàn chuan," Ka hrilh tawh che kha, kan hostel hmun hlui fanpui che ka duh ka tih tawh kha. Nuam i ti dâwn si a, chuvàng chuan fanpui ngei che hi ka tumruh viau mai a ni, i hman hun ka nghâk che a ni ber, tur luih kher che ka duh mang si lo va," a lo ti duah a. Ni dâwn tak e, min hrilh tawh tak. Han zin khawthawn chu a châkawm viau mai; mahse, hun ka nei theiin ka ring chiah lo, Krismas dâwn chawlhah daih a nih ngawt loh chuan.

"Ka hna hi, zin khawthawng tùra chawlh han lâk chi a ni si lo va, kan innghâk rei àwm êm mai," ka tih chuan," A pawi vak hleinem, thurûk ka hrilh tùr che kha i hre har deuh dâwn tihna a ni mai a," a lo ti awlsam êt a, kei chuan," A fair lo," ka lo ti ringawt a, a la nui hawk zui. Hei tak hi a ni ka ngaihtuah chu, ka nihna dik tak(A duh Mami ka ni lo tih hi) hi a hun hmain hrilh ta ila, min hrilh duh tho ang em? A duh ka tihhlawhtlin hnuah khân min hrilh kha a tum kha a ni a, a duh ka tihsak hmaa ka nihna dik tak ka hrilh chuan min kal bosan ang a, amah ka hmuh theih tawh si loh chuan eng thil mah ka hre chhuak thei hauh lo ang.

Khaw chhûnga miho lah chuan a ngai tëin, Zodina nèn kan chanchin chu an sawi nuam leh viau a nih ka ring, school naupang damdawi kan pêkin ka nèl leh ka biak êm êm ngai lohte pawhin min lo fiam nak nak a, a hming chu sawi dawt lo mah se, Zodina nèn min hmehbel a ni tih a hriat viau tho, tunah hi chuan hêng ang hi chu ka dawngsawng thiam viau tawh a ni, min sawitute pawh ka dem viau hran lo, ngaihbel theih tùr tingin Zodina lah hian min hruai ve zauh zauh bawk si a, thil nihna dik tak hre ve lo tân chuan an thil sawi hi a dik vek tlat a ni.

Vâlpuia rawn lan ní ve thung chuan hlim hmêl takin ka lo nuih var var a," Nurse, ka kut min kheisak eawh aw, hlîng ka ti lût a," a rawn ti a, U Ropuia rawn kal loh nî a ni hlauh chu a vànneihthlâk khawp mai, awm ve se zawng, a hre chiang ve tawh si a, thil awmzia sawi kual deuh paha thil  thup țhen ngai awm bawk, tlêma dâwt tel lek leka sawi kha ka peih lo.

A kut ka kheisak lai chuan," Nurse, kan inhmu khât deuh sia, bâkah, a hma khân U Jakob-a chanchin kha ka hrilh thei ta si lo che a, i thin kha a rim ka lo ring asin," a tih chuan," Engah nge maw ka thinrim i rin ngawt le aw? I lakah hian tu nge thinrim thei ang le?" ka lo ti thung a, a kuta hlîng lût ka khei chhuahsak  nghâl hlawl a, a sei reuh phian mai. A thî ta sar sar a, a na ve reuh ngawt ang le.

"A nâ em?" ka tih chuan," Na lo ve, ka tuar țhang alawm," a lo ti mai a, chutah," I khei thiam hle mai," a ti leh a, nuih sak pah chuan," Ka lãwm e," ka lo ti a, ani pawh a nui ve leh mai. Kan ngawi deuh vang vang a, amah chu rawn țawng chhuakin," Nichinah khân ka lakah tu nge thinrim thei ang kha i tia, ka chhâng ang che, ka pa a thinrim fo a, tunah chuan U Jakob-a pawh a thinrim ve ta bawk a," a ti chuai deuh raih a, ka en vat a, nui hmêl a pu nâin nuihzat vàng a ni hauh lo ang.

"Nu leh pate chu an thinrim ve fo alawm, an thinrim reng chuang lo a nia," ka lo ti ve a, ani chuan," Ka pa chu a ni ve lo, ka naute angin a fa tak tak ka ni bawk si lo va, a châng chuan thih daihte hi ka châk rum rum țhin, ka nu erawh ka khawngaih țhìn a, ani chu ka lakah a thinrim ve ngai lo," a ti leh sap sap a, a mitmeng dul deuh raihah chuan khawharna ka chhiar theiin ka hria. A pa chu a pahrawn niin a duat vak lo a ni tih a lang reng mai a, naupan têt ațanga hna thawka an chhawr nasat tak a nih ka ring bawk, ram lam nuam a tih bâkah a chezia a zei thlarh thlarh êm mai.

"Kan rethei a, ka têt deuh lai pawhin school kal ve lovin nî tin ka feh țhin; mahse, nuam ka ti a, pawi ka ti ngai lo, hrehawm pawh ka ti lo, kan chhûngkaw tân ka thawh theih chuan ka ti țhin a; mahse maw, ka pa chu ka chungah a lãwm ngai chuang lo, ka chungah a thinrim reng ni maiin ka hre țhin," a ti leh sap sap a, kei chuan," Tak tak maw? Engati nge a thinrim reng ni tlat chuan i hriat le tiraw? A lo thinrim tak tak lo pawh a ni thei tho asin," ka lo ti thung a, ani chuan a lu chu a han thing nã nã a," Ni lo ve, a thin a rim alawm, a chhan chu ka nu ni lo, a ngaihzâwngnu nèn an awm dùn lai ka hmu a, ka nu bula ka sawi chhuah a hlau a nih ka ring," a rawn ti chhuak ta a.

E khai, engtin nge a nih theih? Ani naupang tê hmuh laia a pa leh a bialnu awm dùn a hmuh chuan a rilru a keh chhe vek ngei ang le, ka thil hriat hi a va mak hlawm êm! Rilru nâ pahnih ka tawng a, Vâlpuia leh Jakob-a, pakhatin a nu a haw ngawih ngawih a, pakhat lah chu a pahrawnin a haw viau thung ni àwm a ni a, chuvàng chuan a rilru a hrehawm a ni ngei mai. A pa lah chuan biak țhata sim ahnêkin thinrim hmêl a lantîr thung a, a thinlungah huatna a tuhsak ngei bawk ang. Ani ang, mi rilru dam leh pawisawi lo lutuk tân chuan a va na dâwn êm!

"Ka hlim lovin a châng chuan ka pa chu ka haw țhin, huatna thinlung neih ka duh loh viau laiin leh pa tak tak anga en ka duh viau laiin ka nu leh ka nauteho a fawrsan țhin avàng chuan ka thin a rim țhin; mahse, ka nu ka khawngaih thei êm a, ka naute lah an la tê ve bawk si a, eng thil mah ka ti thei lo, chuan, U Jakob-a nèn hian kan intawng ta a," tiin a thu sawi chu a han khãr a.

Zodina ka hmuh theih veleh chuan ka thil tawn chu ka hrilh a, Vâlpuia chanchin leh Jakob-a chanchin chu ka hrilh ve ve a; mahse, Jakob-a'n min hai thu erawh chu ka sawi lo thung. 

"An hun tawn hian inanna lai a nei tlat i ti ve lo maw? A, Jakob-a sawi ' Thurûk' a tih kha hre chhuak thei tawh ila aw... hma chu ka sâwn thei ngeiin ka ring maw le," ka han ti a, ani chuan," I tâna hlauhawm tùr a nih dâwn chuan chu thurûk teivet chu hre chhuak lo tawp ila ka duh zâwk!" a lo ti thung a, en vatin," Engah nge a hlauhawm ngawt ang le? Min ngaihtuah duh suh, eng thil țha lo mah ka chungah a ti duh hauh lo ang," ka ti ve leh thung a.

"Chutiangin ka ngaihtuah lo thei ringawt lo che, ka chanchin hre vektu i ni a, keimah vàngin i tawrh phah thei asin," a tih chuan," Tawrh a ngaih leh kan tuar mai ang chu," ka lo ti leh mai a, ka bânah a rawn vuan chawt mai!

"Keimah vànga i tawrh ka remti thei lo ang, Arini hnên ațangin i tuar tawh a, Jakob-a hnên ațang chuan, ni lul lo ve, ngaihtuah hauh suh, ka phal ngai lo ang," hnai zetah, ngun zeta min en chung hian muang cherh chawrh, awka ring lo tê hian a han ti a, a insehruh dànah a thu sawiah chuan a chiang ve thawkhat a ni ngei ang.

"I tân a pawimawh thei ka tih tawh kha," ka tih chuan," Ka hre duh tawh lo, i hmu leh a nih pawhin a thil duh i tihsak thei lo ang tih hrilh ang che," luhlul hmèl zet hian a ti leh a, ka en deuh vang vang ringawt. Hetia a awm hi a inhmeh ve lo ka ti dâwn nge, a inhmeh phian zâwk pawh ka hre lo.

"Chuan, i hriat tùr chu eng thil dang mah ka tâna  pawimawh a awm lo, nang chauh lo chu."

*I ȚHIAN ȚHA TAK TAK KHA CHUAN HMAICHHANAH A SAWISÊL ANG CHE A, MIIN I HNUNG LAMAH I CHANCHIN CHHE LAI AN SAWI ERAWH CHUAN A ȚAN VIAU THUNG ANG CHE*