☆THE SWEETEST HANDCUFFS☆ - 28 By Dingdi Pachuau

 ☆THE SWEETEST HANDCUFFS☆ - 28 By Dingdi Pachuau

A ni thei lo ang, ka en reng ringawt a. Tlêmin a thu sawi chuan min țhâwng deuh bawk nèn, sawi mai tùr ka hre lo. A tân ka pawimawh si chuan, ani hian nula enin min lo en rêng em ni ang? Ni lo, ni lul lo ang, Arini a țhen chhan pawh kha... 

"Ngaih loh lamah i ngaih loh hrâm ka beisei, ka sawi awmzia chu, ka chanchin engkim hretu i ni a, ka awm dàn leh ka natna zawng zawng pawh ka hrilh vek che, inthup țhen leh thil zêp țît țêt ngai miah lovin pângngai takin i bulah chuan ka awm thei țhin a ni, chuvàng chuan, ka tân i pawimawh lutuk a, min țanpui i duh luatah  i chunga thleng thei ngaihtuah lêk lo hian Jakob-a duh chu i tihsak ka duh lo, ani hian i chungah hian thil țha lo eng emaw tak a ti ang tih ka hlau a ni, ka chhan theih i ni dâwn si lo va," a tih tâkah chuan ka thil lo ngaihtuah avàng chuan ka inhau ru mawlh mawlh mai. Engtin nge khatiang kha ka lo ngaihtuah theih ni?

"Hlauthãwng duh suh, thil țha lo a ti duh bîk hauh lo ang, thinchhe viau mah se ka duh loh zâwng tak chuan a che bîk lo ang," tiin ka han hnèm ve a; mahse, kei ngei pawh hian a duh chu ka la hre si lo va, a duh pakhat a sawi kha chu zin dun kha a ni mai a, a hlauhawm hran nâng. 

"Amah i duh ve tho a ni tih a hre vek tawh a, chutiang zâwng chuan hma a la ngei ang," zàwi deuh sapa a rawn tih tákah chuan ka zah avàng chuan ka beng chu a sa ham ham thei hial mai, a thil sawi awmzia hi kan hre chiang dùn viau a ni. Jakob-a hi ka duh ve tho tih a hre vek lo thei lo,  message zawng zawng a chhiar vek ngei ngei dâwn a, Jakob-a khân pakhat tê mah a delete ngai dâwn si lo.

Mahse, hriat hmaih a nei ve tlat. Jakob-a duh zâwk tak chu kei ni lovin Mami a ni tih ka hriat hnu khân ka rilru tihdanglam a ni tih hi a hre hauh lo, Mami chanchin hi ka sawi chhuak khât a, ka sawi chhuah ngai loh avàngin ka hmangaih lovin ka ngai lo ve tihna erawh a ni lo, sawi chhuah hian rilruah a thar a, nâ ka nei thar leh țhìn atin a ni.

Ka nute pawh an Aizâwl kal chu an va tifuh viau mai a, Durtlângah German doctor, ruh lam thiam tak mai awm lai a lo ni hlauh mai a, a vànnei tak zet a ni. An rawn haw phei tawh a, a ke ruh a lo auh a, a kâwng erawh chu kâwng na nei țhìn tih takah, a tlûk záwng khân a lo herh palh leh ni àwm tak a ni. Ka rin aia a hlauhthàwnawm loh avàng chuan ka thaw huai nghe nghe a; mahse, kum upa lam a ni ve tawh a, indìm viau tùr leh che lo tùr chuan ka chah mawlh mawlh thung a, ka pa pawh chuan," Chêtna tùr a awm hleinem, kei ka awm a, eirawng ka bâwl thiam a, âr enkawl hi a ni deuh mai, lo ngaihtuah duh miah suh," a rawn ti ve a, ka ngaih pawh a țha deuh sawt mai.

Arini leh a nu chuan min lo sawi nasa țhin tih ka rin loh deuh deuh kâ ațangin ka hre leh nawlh nawlh țhin a, mak ka ti thei viau mai. Eng nge hlâwkna an hmuh ang aw ka ti țhin; mahse, Arini bialpa hlui chungchâng a ni tlat mai a, hriat thiamna chin ka nei ve leh țhìn tho bawk, an rilru a na ve ang a, an tum loh deuh deuhin an țawng chhuak ve țhin pawh a ni mahna! Min sawi chhiatna chi hrang hrang ka han hriat châng chuan hrehawm ka ti a, hrehawm ti țhin mah ila awmzia a awm lêm loh avàngin engah mah ngaih loh ka zir  a; mahse, a rûk tak chuan ka inthlahrung ve viau thung, a chhan chu mi sawi theiha ka awm hi hrehawm ka ti a ni, nulât tlangvàl kawngah a la ni zui. Ka ngaihtuah ka ngaihtuah phei hi chuan Arinite nufa chu mãwl tihna chin ka nei a, kei hi chu min lo sawi mai mai se, Zodina an han sawi tel leh zêl hi chu a finthlâk vak loh ka ti ve tlat, Zodina'n a lo hre ve vek àwm si a, eng angin nge a ngaih tawh ang? Arini hian a duh tak zet a nih si chuan sawi chhiat tel kher a ngai lo asin.

Jakob-a lah hi a rawn lan azâtin zin chungchâng a sawi ziah a, zin tùrin hun ka nei thei mai bîk si lo. Min kar chu a duh meuh bîk lo a ni ang," I hman hunah maw le; mahse, hman erawh tum ve thuai la aw, chhuanlam siam zêl lovin," a ti deuh kher a, ka zinpui duh loh vànga chhuanlam siamah min ngai a ni chiang mai.

"Jakob, eng nge he khawvêlah hian i duh ber? Entîr nân, mi țhenkhat chuan 'sum neih țeuh' te pawh an ti maithei a, 'in ropui tak neih' pawh an ti thei tho, chutiang deuh chuan, eng nge i duh ve?" tiin ka han zâwt a, min enin a nui suk a,"Nang  nèna zin dun theih hi ka duh ber chu a ni, kan zin huna ka thil tih tùr erawh ka la sawi rih lo ang, thurûk a ni rih," a han ti a.

"Thurûk hi i ngah àwm ngawt mai ka ti," ka lo ti ve thung a, ani lah chuan," Ngah vak lo, ka hrilh deuh vek tawh zâwk che alawm, kan zin dun hunah lah pahnih ka la hrilh leh dâwn zui che a nia, thurûk vawn abar pawh ka nei tawh lo ang," a ti leh a, a nuih avàng chuan ka nui ve a. Mami emaw min tih vàng maia min duh a ni tih leh min hai a ni tih ka hriat ațang kha chuan a lakah hian ka inkiltawih deuh tlat tawh a, a hma anga nêl tak leh rilru pe ve taka han kawm leh pawh hi har ka ti tawh a ni. Airport-a a hmuh kha kei ni lovin Mami a ni a, kei hi a phirpui ka ni tiin han hrilh ta ila thil thleng thei tùr ka ngaihtuah a ngai bawk si, ka bumah ngaiin thinrimin min kalsan daih ta se, engtin nge Zodina chu ka țanpui theih tâk ang? 

"Ka âwih lo, a hma pawhin min hrilh țhat duh hauh loh kha aw," ka ti leh a, hetia han tih ve rêng rêng hi ka duh, tlêmin han titau deuh thei bawk ila...

"Âwih teh, dâwt ka hrilh ngai lo che, dâwt hrilh che lah ka duh hek lo, ka thin a rim viau pawhin i bulah hi chuan ka insûm ve hrâm hrâm țhin asin, chu bâkah, nang hi chu chàn che ka duh lo va, eng thil mahin min pawh țhen lah ka duh hek lo, ka remti ngai lo bawk ang, ka dam chhûnga ka zui tùr i ni a, thihnain min țhen ta a nih ngawt loh chuan ka lak ata hi i kal bo lah ka phal ngai hek lo ang," a ti leh ta mual mual a. Hei hi alawm ka duh loh chu ni, ka nihna dik tak hrilh ka tum deuh zuau zuau pawha ka ìp leh țhinna chhan chu. A thin a rim sî ang a, buaithlâk deuh hian a che chhuak duh mai ang tih ka hlau a ni, ka tân chuan a pawi kher lo ang; mahse, min ring êm êmtu, a chanchin mi dang pawh hrilh duh lova keimah chauh min hrilhtu Zodina tân a pawi thei ngei ang.

August thla a ral meuh chuan ruah sûr pawh a zia ta, tlai ni tla tùr mawi theihzia mai chu, a êng mawi thei lutuk hi ka hman phawt chuan tlai tin ka thlîr ziah țhin. 

Tlai khat pâwna tlai ni tla tùr ka thlìr vang vang lai chuan ka hnung lam ațangin Amos-a hian min rawn barakhaih thut mai a, ka phu chiang kher asin. A la nui huk huk zui a, ka ngei lutuk chuan," I va sual tak! Ka phut nasatzia kha i hria em?" tiin a hnungah chuan ka chùm zawt mai a, ani lah chuan," A na..aah! Arini ka fuihpawrh ang a, ka sawisaktîr dâwn khawp che," tiin a hnung chu pha leh pha lo hian a'n tuai vat vat a, ka nuih ve ta thung a.

"Ka lakah intihuai viau mah la, Arini i ngam loh tawp kha, ka chumtîr dâwn chiang lutuk che," a tih leh chuan," Engah nge min rawn barakhaih chiam ni? Lunglêng takin tlai ni tla tùr lungrun takin ka thlìr ve êm êm a..." ka ti ve thung a, ani lah chuan," Engah nge i lunglèn viau? Hetah khua hmunah in awm dùn reng a?" a ti leh a, ka han tin leh uaih a, ani lah chu a kutin a lo indang ve uaih bawk a; mahse, ka bêng ta êm lo.

"Ngawi mai teh, nang leh zêl hi chuan he lam hi chu sawi lo la ka lãwm khawp ang, ka ning tawh teh a nia," ka han ti a, ani chuan," Engah nge min chum ni? I lãr ropui si," a ti phawt a, a hnuah erawh chuan," Tak tak chuan, ka ti ve mai mai a nih kha, ni e, kei pawhin ka hnê tawh khawp mai, ka lo hnèpui che a nih deuh ber chu, mihring hi a lo mak theih khawp mai tih ka hre chiang tawh viau a ni. A hma chuan nula fel tak leh hawihhâwm tak niin an sawi țhìn a, ka ring țhìn bawk; mahse, tlêm lai deuh khân a nihna dik tak ka hre chhuak ta hlauh a, khata țang kha chuan miin 'A fel' tia an sawi ţhin pawh hian ka ring tawh thertê lo," a ti ta bawrh bawrh a.

Ka inthiam lo leh deuh viau mai. Arini chanchin kan sawi chhuak ta si a, chutah, a țhat lohna lam a la ni zui, mi kan rêl a ni ta ringawt mai.

"Vawiin hna i thawk nange? Hmuh tùra i awm ve teh tlat ni, tlai dangah ka hmu ngai si lo che a," tiin thu dang ka sawipui ta daih a, ani chuan," Ka rawn rîm dâwn che maw le, nang hmu lova rei lo tê ka awm pawh hian ka ngai hman si che a, ka chang tawh lo che tih ka hre tho nain," a han ti leh țâlh a, ka melh rum leh viau mai a, ka kut erawh ka tin tawh bîk lo.

Amos-a kal liam hnua in chhûnga ka lût tùr chuan ka mitsîrin Zodina ka hmu tlatin ka hria! Ka han en chiang leh ngat a, ka in luah chhak deuha thing kung phènah a ding deuh tlat a, Amos-a kha chuan a hmu kherin ka ring lo, hmu lo se ka ti viau bawk. Ka en reng lai chuan a rawn dâk ta dák dâk a, ka lo en reng si a, zah hmêl deuh tak hian a rawn nui ta san san mai, a chezia ațang chuan Vâlpuia a ni tih ka hre zui nghâl.

"Nurse, i awm maw? Tlangvâl i bia kha ka hmu che a, thil pawimawh deuh in sawi a ni ang tiin ka rawn pawh ngam lo che u a," inthlahrun hmêl zet si; mahse, ka hmuh tâk avànga hlim nui san san chung hian a rawn ti a, ka lam panin a rawn kal zui nghâl a.

"Pawimawh hran lo ve, lo kal rawh, rawn en kher lo che ila chuan rawn kal i tum miah lo tihna a ni maw?" ka lo ti thung a, ani chuan," Aih, tum tho e; mahse, ka zak deuh a," tiin ka bulah chuan a rawn ding a, ni  a liam ruai chu a ni tawh a; mahse, khua a la êng viau tho.

"Tlai ni liam tùr ka lo thlîr a, mawi i ti ve țhìn em? Ti ila, nang chu i la naupang deuh a, a mawina pawh i la hmu thiam kher lo ang," nui chunga ka han tih chuan," A, min ngai naupang chhia viau suh, ka upa ve tawh tho asin," a han ti phawt a, chutah," Nula ka la rîm lo nain nang hi chu ka nêl tlat che a, nula rìm angah pawh ka inngai lo a nia, ka u kha i ni tlat a tiraw?" te chu a ti leh lawi a, a thil sawi dàn chuan ka nuih a tiza roh mai mai mang e, ka nuih hak hak a.

Kan ngawi deuh vang vang a, chutah," Hawh, i rawn kal ta sa sa, lo pêng la, thingpui te i in ang chu," ka ti a, min hnial bîk lo chuan inah chuan min zui lût a, thingpui ka siam rak rak lai chuan"Nurse, in hausa ngawt lo maw?" a rawn ti chhuak phawng a, ka thingpui siamsak chu chàwl meuhin chiang zet hian a hmêl chu ka va en a, a hmêlah chuan fiamthu hmel a lang lo va, a ti tak hmêl êm êm zâwk a ni tih ka hmuh chuan," Vâlpui, hausa han tih ngawt chuan awmzia tam tak a nei thei ang a, sum ngah hi hausa tia i sawi chuan keini chu kan hausa hauh lo ang le, ka pa hlawh tlém leh ka hlawh chhuah ve tlêm hi kan ei chu a ni mai," tiin ka han chhâng a, min chhâng lêm lo. Thingpui ka siam zawha ka va pêk chuan," Nurse, engati nge ka chungah hian i fel êm êm a? U Jakob-a pawh hi ka chungah a fel êm êm țhìn a, in inhriat vàng hi em ni ka chungah i fel?" a lo ti leh a.

"Ka fel em ni? Fel min titu ka hriat vawi khatna," tiin ka kut chu ka han bêng a," Ka lãwm e, Vâlpui. Nangmah hi i fel êm a, mi fel na nâ nâ chu, tu nge i chungah sual thei ang? U Jakob-a pawhin i fel tih a hre chiang a, i chungah a sual bîk miah loh hi," ka han ti leh a, ani chuan," Nia, in fel ve ve; mahse, ka pa kha chu ka chungah a sual ve deuh țhìn a, min hrâwk vak laiin U Jakob-a khân min rawn chhan a, ka pa chu a hnek a, a pà ka ti a nia, ka pa chuan a hlau teh asin," a ti leh a.

"A ni maw?!! Chuan, engtin zêl? Chumi hnuah chuan U Jakob-a chuan a hnênah a hruai ta che em ni?" hriat chhhunzawm châk tak hian ka han ti a, thingpui chu a in phawt a, chutah," Ahh, ka tihpalh, ka sawi chhuah miah loh tùr ka sawi chhuak a... Nurse, zêp tlat rawh aw, U Jakob-a'n a hriat chhuah hlauh chuan athin arim ang a, min chhan duh tawh lo palh ang, sawi lo tùr khân min ti reng asin le," inthiam loh hmel zet hian a ti ta niah niah a.

"Lungngai miah suh, eng mah ka sawi chhuak lo ang, ka tiam che, min ring hmiah rawh," ka lo ti vat a, min rawn en a, ka lo nuih sak a, min en reng hnuah chuan min ring ngam a ni ang," I thingpui siam chu a tui hle mai, ei siam i thiam ngawt lo maw?" a ti leh daih a, kei chuan," Thiam vak nâng, thingpui chu tui i ti tak tak maw? Min fak der a ni lo maw?" nui chung vêk hian ka han ti leh a, ani pawh chuan nui chung hian," Aih, ka ti der miah lo, thiam ka ti tak tak che asin, i fel bawk si a, i fel vàng hian a tui zual a ni ang," a ti leh a. A la naupang chhia nain țawngkam hi a thiam ve leh zêk țhìn a, mi dang thil sawi chu ni se chu ka ngei ru thei hial maithei a ni; mahse, ani thil sawi hi chu ka ngei thei lo, a rilru tê hi a thianghlim tlat si a.

"Ka lãwm e, taka, chaw ei ve nghâl ta che? I duh em?" tiin ka han sâwm chhin a, ani chuan," Nurse, i tizahthlâk e... Duh mah ila ka ei ngam teuh lo mai, kei tehlul min sâwm a, ka ei tlukin ka lãwm tawh hrim hrim," a lo ti vat a, chaw eia sâwmtu a nei ngai lo em ni le? A lãwm hmèl chu hmuh a nuamin kawng lehlamah chuan ka hnuk a tiulh thei deuh hial zâwk nia!

"A nih, chaw i lo ei duh si loh chuan, zaninah tal chuan rawn lêng la, inkàwm ila?" ka ti leh a, a chhan chu a chanchin hi ka hre chhunzawm zêl châk a ni, engtikah nge kan inhmuh leh ang tih hriat a ni si lo va, ka hmuh theih lai hian ka hriat duh tam tak hi hriat belh ka duh a ni.

"Nula inah ka lêng ngai lo va."

"Mahse, kei chu nula ka ni lo, i u ka nih kha, i u inah i lêng ve dâwn tihna a ni mai a?" nui chunga ka lo tih chuan a nui leh ta san san a," Aw le," a ti a, thingpui chu a in zui leh ta nghâl a.

Zànah chuan a rawn lêng ta ngei a, a inthlahrun loh nân ka lo be nghâl bawrh bawrh a, Zodina emaw Jakob-a emaw chu ni se chuan tuna a thuamhnaw hâk hi chu an ha duh lo maithei a ni. Ni lo, Jakob-a chuan a ha hauh lo ang le, Zodina erawh chuan a ha duh thei mai ang, ani kha chu a awm apiang inbel duh mai chi a nih duh hmel a, Jakob-a erawh a duh fìr ve khawp ang le.

A tìr lamah chuan ka chanchin lam ka hrilh siam siam phawt a, ka cousin-teho nèna kan inkawm hlim dàn leh kan chét chhiatnate ka hrilh kual a, ka mitthlaa ka hmuh lêt avàng chuan ka nuih a za thar a, ka nui var var reng a, ani pawh chu a lo țhen ve sâng a. A hnu deuhah chuan Rosy-i birthday party-a ka chét chhiatna chu hrilhin Birthday cake a zai hmaa a cake-a a hming ka lo nem pherh vek dàn chu ka hrilh leh a.

"Eng nge ni chu chu?"

"Eng ber chu maw?" ka tih chuan," Englo, ih, i nem pherh chu maw le," a lo ti vat a, kei chuan," Birthday cake-a a hming maw le," ka ti mai a, ani chuan," Aw, chu chu, eng nge ni bâtdei kêk chu?" a rawn ti ta! A hmel chu ka en chiang vat a, a tifiam a nih ka ring a nia; mahse, nui hmêl leh tifiam hmêl rêng ka hmu lo.

"Bâtdei kêk chu chhang tihna em ni?" a lo tih leh chuan," Aw, ni e, i piancham a lo thlenin i làwm ve țhìn ngei ang a, ka cousin Rosy-i pawh chu a piancham a lo thlen khân lawmna hun a buatsaih a, dàwrah chhang a siamtìr a, siamtute chuan chhangah chuan a hming kha an ziahsak a, chu chu ka nem pèr ta vek kha a nia," makti rilru tak chuan ka ti ta duah a, chutiang zawhna min zâwt chu mak ka ti lo thei lo a ni, a mak ve êm asin, Birthday cake hriat loh tlat chu! Han ring lo ngawt dâwn ila, dâwt min hrilh duh êm dâwn em ni?

"A nih tak chu, a nuam ngawt ang, ka la hre ngai lo va, ka la hmu ngai lo bawk a nih chu. Chutiang chhang chu a tui viau ang tiraw?" a lo ti leh a," Um, tui e, chi hrang hrangin an siam a, biscuits hi i hria ang a tiraw?" ka tih chuan a lu a lo bu nghat a," Aw, biscuits pawh chi hrang hrang a awm ang chiah hian birthday cake pawh chi hrang hrang an siam thiam a, piancham neituin siam tùra a duh ang ang khân an siam thiam a; mahse, lian deuha an siamtîr chuan pawisa kha an châwi tam ve a," ka ti leh a.

"Ka hmu ve châk ngawt mai," a lo tih sap chuan ka phone ka phawrh vat a,   ka han google nghâl a, cake thlalâk hrang hrang chu ka han entîr chuan," A va mawi ve le! Chhang pawh a ang ka ti lo, a tui ngawt ang! Nurse, i ei tam tawh ngawt lo maw?" tiin thlalâk chu a en vang vang reng a, a mit pawh a khap lo. A hmu ngai lo tak tak a nih ka ring chiang ta.

"Aw, ei tam ve tawh tho e, kan tét lai deuh kha chuan kum tin kan làwm ziah țhin a; mahse, hetia hmun hranga ka awm hnu hi chuan lawm a rem ta lo va, ka làwm ngai ta lo. Nang, engtik nge i piancham i hria em?" tiin ka han zâwt zui a, ani chuan," Aw, November thlaah ka piang a, ni 7-ah a ni nghe nghe, a thleng ve leh țêp tawh a nih chu. Kei chu vawi khat mah ka piancham ka la làwm ve ngai lo, sikul pawh kal lova ram lama hna thawk țhìn ka ni a, thingtlâng bakberha awm kan ni ve bawk nèn, ram lama thil awm leh thlai hmingte hi ka hre hlur a, a bâk hi chu ka hre ve vak lo," a ti leh ta barh barh a, a thil sawi hmêl chu ka en reng a, a inthlahrung hmel leh a inkiltawih hmêl chuan ka thinlung a dek tlat mai a nih chu.

"A nih chu, kei chu ram lamah hian ka kal tam lo êm êm a, i hriat ang ka hre lo țeuh dâwn tihna a ni, tlat tamna mual a inang lo va, hriat záwng lah a inang vek thei hek lo. Ka hriat ang tam tak hi i hre lo ang a, i hriat ang tam tak kha ka hre lo ve bawk ang, chutiang chu alawm hringnun chu, tu mah hi inhmusita inen hniam thei kan awm lo, kan hriat zâwng a inang lo mai a ni," ka han ti dap dap a, a lo ngaithla ngun khawp mai a, lu bu nghat nghat pah chuan," A dik ngei ang; mahse, nang hi chu i fel ve hrim hrim, kei ang mai mai pawh min kàwm peih a nia, i zârah Bâtdei kêk pawh ka hriat phahin ka hmuh theih phah a, ka lãwm tak tak a ni, ka nauteho pawhin an hmu châk ve viau ang chu," a ti vang vang a.

A chanchin pawh ka zâwt chhunzawm thei lo a ni. A lèn chhûng chuan zawhna dang dang, inkahpah deuh deuhin min zâwt a, fiah thei ang ber tùrin ka chhâng zël a, a hriat loh chu google-ah enin kan inhmuh țhìn bawk a, chutiang chuan zàn hun chu kan hmang ral a ni.

A haw hnuah erawh chuan ka ngaihtuah zui vang vang a. Ka hmuhsit vàng ni hauh lovin Birthday cake êm pawh a hre lo chu mak ka ti zui zêl a, tûnlaiah chuan naupang tê pawhin an hre vek tawh a nia, an awmna a thingtláng khua ve bawk ngang ni tùr a ni, bâkah, an khawsak a harsa ve bawk a nih ka ring, ka khawngaih kuang kuang reuh mang e. Ngaihtuahna thar ka nei ta thut mai! A birthday a hla tawh vak lo bawk a, a takah birthday cake a la hmu lo bawk nèn, surprise ila a țha viau ang!

*******

Office-a ka la awm lai chuan Arini nu a rawn lang ve hlawl mai a, mak ti ru viau mah ila hlim hmêl tak pu lui chungin ka lo chhàwn vat a, naupang vaccine kan pék zawh tawh avàngin U Ropuia pawh a haw hman tawh a, kei pawh haw mai tuma ka lo intintuah lai mêk a ni.

"Tluangi maw? Arini nu ka ni tih i hria ang chu tiraw?" tiin a mitmeng lian kel kawl chuan min han en a, ka lu ka lo bu nghat ringawt a, ani chuan a sam tãwi deuh mãt han huih zauh pah chuan," Engati nge ka fanu leh a bialpa inkârah hian i inrawlh tlat a? Hetiang hi a țha lo asin, mipa dang i hmu hlawl lo em ni? Health worker lai i nia, mi bialpa i chuhpui tlat mai hi hriat thiam a har ka ti a ni, an ințhen tawh tih chu ka hria; mahse, an ințhen chhan hi nangmah vàng a ni tih i hria tiraw?" min tih khum ta piap piap mai. Ka hmaah chuan a ding ràn mai a, ka nu rual zetin chutia min han țawng khum ta mai chu, ka zah lohna pawh hi a lo zak chem chemin ka hria, chutih rual chuan awm loh daih theih ka châk, khûk chem chema khûk ral daih tluka châk ka nei àwm lo ve ka ti!

*I NGAIHTUAHNA TLUKA THIL TI THEI KHA A AWM LO A NIA, CHUVÀNGIN, THIL ȚHA LO LAM NGAIHTUAH LOVIN THIL ȚHA LAM TIH TÙR KHA HAN NGAIHTUAH ZÂWK TEH LE*