☆THE SWEETEST HANDCUFFS☆ - 29 (B) By Dingdi Pachuau

 ☆THE SWEETEST HANDCUFFS☆ - 29 (B) By Dingdi Pachuau

Kan haw kawngah pawh chuan Zodina thil min hrilh chu ka ngaihtuah zui zêl a, ka ngaihtuah ngut ngut lo thei lo, engtin nge kum heti chhûng hian a lo zêp theih? A sawi ang tak tak kha thil thleng a nih si chuan...  Dâwt min hrilh êm chu ka ring si lo, kei chauh min hrilh a nih si chuan a pa leh a pute, a chhûngte dang pawhin an hre miah lo tihna a ni dâwn a, engati nge a pa chu a hrilh mai loh? A nih loh pawhin, a chhûngte tu emaw tal chu hrilh ta mai se... ngaihtuah tùr a va tam tak!

Ka dàra min rawn sâwi avàng chuan ka phu deuh zawk a, ka en vat bawk. U Ropuia'n inthiam loh hmel taka," Eng thil nge i ngaihtuah êm êm?! Ka biak mawlh mawlh che pawh i hre lo a nia!" a tih chuan ka inthing harh thuai a, lu thing deuh nak chuan ka han thaw leh huai phawt a," Ka ngaihtuahna ka lo kàwm char char alawm le, zia lo khawp mai, eng thil nge ni ta?" ka han ti a, a rûk tak chuan ka inthiam lo khawp mai.

"Ka rawn thlen hma khân eng thil nge in lo tih ni? Ka rawn thlen hnu khân i țawng ve àwm ka hre miah lo," nui hmël deuh leh mitko sàn ãk pah chuan a han ti leh a, za lo zet hian ka nui sak a," Thil pawimawh lutuk, mi dang hriat ve chi ni miah lo min hrilh a, ngaihtuah zui reuh reuh ngai chi a la ni zui a," ka tih chuan ani pawh chu a nui ve sak a," Chuti, ka be buai tawh lo ang che, ngaihtuah chhunzawm leh tawh rawh," a ti a, ka nui hak ringawt.

Hrehawm ka tih châng leh ka thinrim chânga ka tih ve dàn, ka thinrim ka inhrîkthlâk ve dànin, na zet zet leh chak zet zet chuan chhuat chu ka nâwt zawt zawt a, ka insehruh nasa viau bawk. Tunah hi chuan ka thinrim vàng a ni lo, ka rilru hrehawm vàng leh ka ngaihtuahnaa Zodina thil min hrilh kha a luh tlut tlut vàng a ni. Hetia ka tih loh hi chuan ka ngaihtuahna a buai thei mai ang, hetia chhuat ka nawh zawt zawt hian a hnuah ka zia huai țhìn a, mi chunga ka thinrimna leh ka thinlunga hrehawm ka tihna ka paih chhuah ve dàn a ni a, Arini nu leh Arini min rawn àn khum țum pawh khân ka chhuat hian a tuar khawp a; mahse, a tuar dàn hi a dang ve thung, ka thinrim poh leh chhuat hi a fai ting a ni mai. Thinrima àn buan buana a hnua inchhìr lehna tùr thlentîr ai chuan a zia viauin ka hria, ka hah deuh thung a.

Jakob-a ka hmuh leh veleh chuan," I thurûk min hrilh tùr kha ka hre tawhin ka hria," ka han ti teh ngawt a, ani chuan," Chuti maw?! Eng thil nge i hriat chu?" tiin chiang zet leh mit khap hauh lo chuan min rawn en a, kei chuan," Min hrilh hmasa chhin phawt la, chuan, ka hrilh ve ang che, a inang ngei ngei ang," ka ti ve thung a. Ani chu a lo nui hawk a.

"Naupang emaw min ti em ni? I thil sawi naupan chhiatzia kha, tlangvâl senior lam tawh ka ni tih theihnghilh suh. Bâkah, tuna ka hrilh che chuan ka duh min tihhlawhtlinsak duh tawh nâng, ka duh i tihhlawhtlin hunah chauh ka hrilh ang che, i hria maw?" tiin a han meng sawr sawr a, chhiat hi chu a chhe lo alawm, Zodina hmel hi a lo chhe lo a nih hi.

"Nih leh, kan zin hnuah min hrilh ang em?" ka ti ve leh thung a, ani chuan," Teh rëng mai! Ka hrilh mawlh ang che," a ti phawt a, chutah," Engati nge i hriat châk êm êm a? I tân a țangkai dâwn pawh a ni si lo," a ti leh zat a, ka ngawi vang vang phawt a, a hnu deuhah chuan," Engah nge a țangkai loh ngawt ang? I telna a nih phawt chuan engkim ka hre duh alawm, ni lo'm ni?" ka lo ti thung a.

Ka chhànna vàng chuan a han nui suk a," Min chhànna chu ka duh reuh mang e! A dik chiah a ni, kei pawhin i chanchin tawh phawt hi chu hriat ka duh asin, engkim hriat vek ka duh țhin. Vawiinah kha nu, Arini an ti em ni kha, kha nu kha a lo kal a, i chanchin kha ka duh loh zãwngin a rawn sawi vei ngawt a, ka lo bêng lo chauh chu a ni. Ka pawi sawite hi chu ka dìm thiam ve lo, mi dang an awm  hlauh erawh a vànneih phah ta deuh chu a nih kha, min hlau tawh khawp ang chu," a ti ta duah a.  Mit pawh khap ngam lo chuan ka lo en reng a, engtin nge a hlauh tawh khawp tùr chuan a lo tih ni ang? Arini chuan a pu a va kan ve a ni ngei àwm si a, engtin tak intàwng dùn ang maw? Ani chuan Zodina emaw kha a ti ngei àwm si a.

"Engtin nge min sawi a? Kut erawh i thlâk loh hrâm ka beisei," ka hre châk ve deuh bawk si a, ka zâwt ta nge nge a, ani chuan," Thlâk nâng, mi dang an awm hnai ve a, mipain hmeichhia kut han thlâk êm chu a hmingchhiatthlâk ve alawm. Lalpû-a rawn kana rawn kal chu a ni ve ngei ang a; mahse, a țawng duh zat zat lutuk a, i chanchin țha lam pawh sawi lova dâwt hlîr mai a rawn sawi kha ka ngaithei lo a ni, a thil sawi sawi chhuah vek kher erawh a țha lêm lo, i rilru a nat phah thei a, na tùrin ka duh si lo che a," a ti sup sup a.

Zodina pu chu a zia chhoh hleih theih loh avàngin chhûngte inrâwn khâwm chuan Lunglei lama inentîr mai chu țha an ti a, an kal hma zànah Kimi nèn kan va lêng ve a, a chanchin ni tîn ka hre reng tho a, ka hman chângin ka va tlawh ve tho bawk a, kei pawhin inentîr an ti chu țha ka ti, a khawsik a ngawrh ve tho sia, hetia tawrh tlawk tlawka  damdawi han ei leh ringawt țhin chu a fuh ber lo.

A tûkah Zodina leh a nî chuan Lunglei lama inentîr tùr chuan an hruai ta a, ka ngaihtuah ve reuh khawp mai. Natna țha lo tak chu a nih loh ka beisei, heta tuar ai chuan a țha tho tho, doctor thiam tak tak an tam tawh a, a natna, a khawsik chhan chu lo hre chhuak mawlh rawh se.

A chanchin chu hriat duh viau mah ila biak hmasak chu ka hreh ve reng, engtikah nge Jakob-a a rawn lan ang tih ka hre lo va, Zodina ni lova Jakob-a biak fuh hlauh kha ka hlau a ni. Bâkah, tûn thlengin phone a nei leh tawh tih pawh a la hre lo va, Zodina tân eng emaw fuh lo palh thei hlauh a awm ka hlau a ni.

Zànah amah zâwkin min rawn bia a, naktûk lamah an inentîr dâwn chauh zãwk a lo ni. Vawiin lama motor a chuan vàng chuan a pu chu a chau ve deuh a, chaw pawh tlêm eiin a mu tawh a ni tih min rawn hrilh a, a khawsik a awm leh awm lohte chu ka han zâwt ve a, a awm thu leh a mut hma lawka damdawi a ei thu chu a rawn sawi leh a.

Kan inbiak tàwp dâwn chuan,"Phone kha dah țha la aw, a chhiat i duh loh chuan," tiin ka han chah a, ani chuan," I bialpain a hmuh chhuah i hlau deuh a ni maw?" tiin a rawn nui hak a, kei chuan," Hlau nâng, i duh leh dah țha suh," ka ti deuh hlak a, a rawn nui leh hawk hawk mai.

"Hetia i han țawng vêl hian i lawmawm tlat, i inhmeh lo ka ti dâwn nge, thinchhiat ve hmel deuh taka i han ţawng hlak hi chuan i hlauhawm ve hmel riau a," a lo ti duh chauh a, nui ve duh hauh lo hian," Ka thinte chu a chhia alawm, min la hre chiang lo hle mai ka ti," ka ti ve thung a, ani lah chuan," I thin a chhe lo tih hre tùr chuan ka hre chiang ve thawkhat tawh che alawm; mahse, hei aia hriat chian leh deuh deuh che erawh ka la duh cheu tho," a rawn ti leh a.

A pu entîra a awmpui chhúng tal hi chuan Jakob-a leh Vâlpuia rawn inlan lo hrâm se ka tihpui tak zet a ni. Vâlpuia a nih hlauh chuan a inkiltawih bâkah a zakzum àwm si a, khawpui deuh záwkah a awm tam lo tih a hriat reng bawk si, a che buai palh ang. Jakob-a nih erawh chuan chutiang lamah chuan ka ngaihtuah hauh lo va; mahse, a pu chu a rawn hawsan daih ang tih ka hlauthãwng, a duhna lamah chuan khua a hmu vak dâwn si lo.

A tûk tlai lamah chuan Zodina chuan min rawn biain a pu chu Sèrkawn lama an admit thu chu min rawn hrilh a, an lo admit êm chu ka ring pha lo nain an lo admit chuan tlëmin thlâ a muang thei deuh zâwk ang chu ka ti rilru a, Zodina hnënah chuan," A, i pu tân a țha zâwk ang chu, he laia tuar leh țhin ai chuan doctor uapna hnuai ngeia awm chu a thlamuanthlâk zâwk ngei bawk ang, amah chu eng nge a an rêng rêng? A hreh ngawt ang a... ka khawngaih roh mang e," ka han ti a, ani chuan," A zia lutuk, rawn ngaihtuah duh miah suh, zêp lohah leh a hriat leh tâk lohah chuan admit hi ka duh daih zâwk a, doctor-in chiang zâwkin a awm dàn an hre thei ang a," a rawn ti ve leh a.

Dàwrah Artui leh Alu lei turin ka chhuak a, tum loh deyhin dàwrah chuan Arini a lo țhu ve niin, ka pên lût ve tawh si a, pên chhuah leh nghâl vat chi a ni si lo, a theih hrâm chuan anni nufa hi chu hmuh loh tawp ka duh tawh a ni; mahse, khaw khatah, chutah pawh thingtlângah lehnghâl chuan a inhmuh loh theih loh. Bâkah, engah nge ka hmuh hreh viau ngawt ang? Thil ka tisual pawh a ni lo va tiin ka infuih ru sauh sauh a.

Mahse, Arini chuan ka luh tirha vawi khat min lo melh zawk bâk kha a awm chhûng chuan min melh nawn leh ta lo! Ni dang ang lo takin a meng khup deuh tlat bawk a, țawng pawh a țawng lo. Alu leh Artui lei tùr ka inthlan lai chuan Dàwrneitunu chuan min be bawrh bawrh a, ka chhâng ve zêl bawk a, Arini chu a lo ngawi  reng a, Alu leh Artui ka en daih avàng chuan min lo melh rum leh rum loh pawh ka hre lo; mahse, ka ring chiah lo, ka va en leh zauh pawh chuan ka luh tirha a awm dàn ngai reng khân a lo la awm!

Mak ka ti tak zet a ni. Jakob-a khân engtiang takin nge a lo tih ang aw tih ka ngaihtuah phah a, kâr liam ta lawka min țawng khum dàn leh min tih dàn zawng zawng ngaihtuah lêt chuan khatia melh pawh min melh ngam lo lëka a han awm thei ta mai kha, mak tih loh rual a ni lo.

Inrinniah Kimi nèn an loah kan kal a, chaw kan fûn a, hmarcha hlang ràwt sa kan keng bawk a, rama chaw ei hi a tui duh bîk an tih țhin avàngin chaw fùn pawh hi ka rawt tlat a ni. An lo kan thlena thlâm kan zu thlen meuh chuan a naute pawh an lo țhu chàwl dar dar tawh a, an kal lai ka hre miah lo a nih chu, kan hmaah thãwm ka hre bawk si lo va, kan hnung lama kal thãwm awm țhìn kha anmahni hi a ni ang ti ila a âwihawm loh lutuk bawk si, min thlen khalh daih a nia! Kan hma daihah an kal a ni ngei ang.

Rei fê thlâma kan chawh hahdam hnuah chuan thlai awmchhun chhun zawng tùr chuan kan chhuak a, an lo chu ka han hawi kual vêl a, ni sa val val hnuaia thli thaw har harin an buh a han chhêm fâwn vêl chu hmuh a nuamin ka lung a tilêng deuh ngawt nia. Han ngaih êm êm phei chu ka nei hauh lo; mahse, engtin emaw tak ka awm tlat, ka thinlung chu engtin emaw hnîm deuh ruihin ka hria a, chutih rual chuan buh kûng han ãwn leh deuh dial dial țhin chu mawi ka ti êm êm tho si.

Lo kal ka châk chhan pakhat chu kan ti dáwn ta. Kan chawhmeh tùr chu kan chhuang so vut vut tawh a, Kimi  bai siam chu ka ei châk tawh viau a ni, a tui dâwn tih a lang reng bawk si a. Hmarcha hlang ràwt kan kenah chuan a tihângtu atân tiin zopurùn hnah ka lo râwt tel bawk a, ril pawh a țâm țan ta raih raih mai.

"Maian hi ka hângso leh lawk ang aw,  nge i ril a țâm viau tawh em? Kan ei tawh zâwk mai dâwn em ni ang?" Kimi'n a tih chuan," E, i tih dàn dân le, ka nghâk thei lutuk," ka lo ti vat a, chutah," Puiate khân an ei ve dâwn nange? Khawnge an kal daih a?" ka han ti zui zat a, ani chuan," Lui lamah an kal ta a nih kha, an ei peih lo tawp ang. A nih, Maian chu ti tawh lo mai ang aw, kan ei tui thei tho ang chu maw," a ti a, ka ei tui thei dâwn tih ka hre chiang lutuk a, ka lo nui ringawt a.

Rumpum chhum, thlai rah bai, Alu kan leh Purùn ràwt zet chuan chaw ei a va titui teh rêng êm! Inah Runpum chhum hi ka ei ngai lo tluk a ni, a chhan chu tui ka tih lêm loh bâkah ka ngaina tehchiam lo; mahse, vawiin zet chu tui ka ti thar ta tak zet, hetiang tak hian a lo tui a ni tih ka hriat chhuah phah.

Kain a duh tih vàng maiin ka han ei ta țeuh chu a nia. Dul hmul khât phuara kan ei hnu chuan ka kham ve ta țâwk, ka kham hnu chuan ka puar lutuk chu ka tho nghâl mai peih lo zui a, ka țhu hlè hlé mai, ei lai chuan tui viauin kain duh viau mah se a hnu lam hi a... lo insùm deuh tùr a nia tiin ka inchhîr deuh ngawt a, awmzia lah chu a nei thui lo khawp mai.

Dâr 2: 45-ah kan haw a, kan kal chak ve deuh bawk a, in kan thleng har lo. Ka luh hma ațangin in chhûnga ka phone ri ral ral chu ka hre thei a, tu tak ni ang maw ka tih rilrûk lai chuan phone rî chu a tàwp a, kawng chu hawng vatin ka ipte ah dawhkàn chunga dahin phone ka dahna lam chu ka pan zui ta nghâl a, ka han en a, Zodina missed calls (15) lai a lo awm!

E khai! Hetiang êm êmte chu, a pu a țha lo zual a ni thei ang em? Engati nge vawiinah khân ka lo ken mai loh ni ti rilru nauh nauh chuan ka han ti lêt ve a, a lâk rual rual chuan," Zodin, engtin nge i pu a awm?! A zual deuh em ni?!! Vawiinah loah ka kal daih a, phone ka keng si lo va, tunah in ka thleng chiah a, ka rawn ti lêt nghâl a nih hi," ka han ti zung zung a.

"Engah nge ani chu ni tùra min han ngaih chu le! Amah ka ni lo! Keimah ka ni, Keimah Jakob-a."

A thinrim aw chhuak hlauhawm zet chuan min tițim sung sung thei hialin ka hria! Ni e, Zodina ni lovin Jakob-a a ni, engtin nge ka lo hriat loh theih ni? Mi pângngai Zodina kha chuan vawi hnih khat min rawn biak a tum hnuah ka chhàn theih loh chuan chu aia tam chu a rawn call hauh lo ang. Vawi 15 lai a nih chuan eng emaw thil a thleng a ni ngei ang tih ngaihtuah nachâng hriat tùr hi a ni a...

"Phone a lo nei ru reng a, ka hriat hauh lohin. Chuan, in lo inbe ru țhin bawk a... Zonun, i ti mak hlê mai, ka rilru i tina hlê a ni, i hria ang tiraw? Ka rilru a nâ, kha pa kha i eng nge a nih chiah min han hrilh teh! Ka ring êm êm che a, keimah ang tho i nih ka ring asin. Ka lo ring sual chhiava che a nih hmel, ngawi tak rawh, kha pa kha i hmu leh tawh lo ang, a nun ka tihbuai loh vêk pawhin he khawvel hi hma chhawn ngam lo tùrin ka siam tak tak tawh ang, chu chu ka thu tlûkna a ni," a rawn ti ta tuar tuar a!

Min va tihlau teh rêng em!  Ka ãwm chu ka dawm a, ka thaw dèp dép ringawt. Ka hlauh ang ngeiin Zodina phone chu a hmu chhuak ta si a...

"Ni lo, Jakob, min ngaithla teh, ka țawng chu i hria tiraw? Khawiah nge i awm? Tunah tak khân khawiah nge i awm han sawi teh," ka ti lawm lawm a, a thin a rim si a, thil țha lo tak a ti duh mai ang tih ka hlau a ni. A ti hlauh a nih chuan Zodina tân a pawi dâwn lutuk.

*THUAMHNAW MAWI TAK HI PÂWN LAM MAWINA ATÂN MAI A NI A, CHHÛNG LAM MAWINA ATÂN A NI LO. CHHÛNG LAM MAWINA ATÂN CHUAN NUNGCHANG MAWI TAK NEIH HI A TÂWK TIU TEU VIAU*